عمار يا مصر بعلمائك و باحثيك

[aymaan noor]

بي بي سي نشرت أمس خبر عن اكتشاف فصيلة جديدة من الديناصورات - بتكمل فجوة زمنية تاريخية مفقودة مدتها حوالي تلاتين مليون سنة - في قارة أفريقيا واللي بتعود لأواخر العصر الطباشيري.. المبهج جدًا في الموضوع إن صاحب الاكتشاف ده مصري!

دكتور هشام سلام، مدرس مساعد بقسم الچيولوچيا ومدير مركز جامعة المنصورة للحفريات الفقارية، وهو وفريقه المكون من 4 باحثات (كلهم بنات؟ إيه الفخر ده؟) من جامعات المنصورة وأسيوط، شغالين بقالهم سنين على الموضوع، لحد ما انتهت رحلة البحث بأكتر من 3 أسابيع قضوها في صحراء مصر الغربية بيستكشفوا وبينقبوا، عشان يبان الخبر اليقين النهارده..

البقايا المتحجرة لحفريات الديناصور العُشبي اللي اكتشفوها بتقول إنه كان عايش من حوالي 75 إلى 80 مليون سنة، طوله 10 أمتار أو قد أتوبيس مدرسة، ووزنه تقريبًا 5 أطنان أو قد وزن الفيل، وله رقبة طويلة وألواح عظمية مدمجة في جلده.. دكتور هشام - بحسب مقال ساينتيفيك أميريكان - بيقول إن ده أول دليل علمي يثبت الاتصال الچيولوچي بين قارتي أفريقيا وأوروبا في الحقبة الزمنية دي..

الديناصور أخد الاسم العلمي "منصوراصوروس" Mansourasaurus shahinae، في تخليد لاسم جامعة المنصورة اللي عملت الاكتشاف، ومش هأستغرب والله لو الجزء التاني من الاسم "شاهيناي" طلع بيرمز لأي "شاهين" له علاقة بالموضوع برضه.. وأخد الكود MUVP_200، اللي حروفها جاية من Mansoura University Vertebrate Paleontology أو مركز جامعة المنصورة للحفريات الفقارية..


هشام سلام، وإيمان الداوودي، وسناء السيد، وسارة صابر، ومي الأمير.. كلهم دكاترة ومدرسين مساعدين بجامعات المنصورة وأسيوط..

سيتم نشر الخبر من بي بي سي ورويترز، و سيتم وضع لينك بروفايل الدكتور واللي ناشر عليه كل مراحل الاكتشاف، و كذلك لينك مقال مجلة Scientific American بتفاصيل كتيرة أوي..

أنا مبسوط والله!