على طرف سجادة الحياة

[عاطف حمدان محمد]

** على طرف سجادة الحياة **
***********************
ازاي حروفي بترتبك
والمعنى يرفض ضعفها
واما اكتبك كلمة بدلع
تمحيها عيني برمشها
وازاي سطوري بتنكسف
قدام سعادة حضرتك
والمح ايديا بترتعش
لو يوم نداكي يمسها
يا ام الضفاير مفرودين
ع القلب نسمة تونسه
والضحكة نيل ونجومي
عشقت ضيها
تروي العطاشى المحرومين
لو يوم تميل
تزرع خطاوي الشوق
غناوي بسحرها
انا مش عليل ولا قلبي
عاجز او قوي
ولا فهلوي ولا كنت يوم
بقرا الكفوف
جايز كفيف
وصبحت من نورك بشوف
أو كنت عيل
جاي يقلب ف الكتاب
أو شيخ طريقة
وعني مرفوع الحجاب
بس الحقيقة انا قلبي
عاشقك بالقوي
علشان ف حسنك
الف حاجة وعكسها
ضحكك حقيقة ودمعتك
كام الف حاجة ف بعضها
حضنك مواني قريِّبة
وسفينتي عشقت بحرها
يا ام الحكاوي الطيبة
تسحرلي روحي بنبضها
صوتك ادان فجره ابتدا
فما تمنعيش قلبي التقي
على طرف سجادة الحياة
واقف كما عيل شقي
مشتاق ف محرابك يتوب
يمسح ذنوبه بركعتين
وتقولي وقتك انتهى