ناوي على طب يبقى تعالى هنا

[كاريمان]

الاناتومى " التشريح "

الماده دى هى اللى هتخليك تحس ان ف كليه طب بجد
وبجد هتحس بمتعه لو مثلا بتتفرج على فيلم اجنبى وبيعملوا عمليه ف جزء انت درسته هتلاقيك سايب الفيلم وعمال تدرو على العضلات والاعصاب والشرايين والاورده ..وهتألف تاليف (×
بس هتكون مستمتع
غير طبعا انها هى السؤال الاساسى اللى فى كل اجتماع عائلى او خروجه مع الصحاب هتتسأله انت بجد دخلت المشرحه ؟؟؟!!! وشفت جثث فعلا ؟؟!! والغريب انهم بعد ما يسألوك هيبصولك كده نظره استغراب او فخر حسب اللى سألك و هيقولك لالالا متحكيليش متحكيليش مش عايز اعرف (×
رغم انه هو اللى سأل
اولا متخافوش
الموضوع بسيط جدا
ف الاول مفيش سكاشن اول اسبوعين فى الدراسه تقريبا يعنى حضرتك مش هتشوف المشرحه غير بعد اسبوعين وف الاسبوعين دوول انت طبعا بتاخد محاضرات الاناتومى وكل شويه هتلاقى الدكتور بيقولك ..ودى حلوه هتشوفها كويس ف ال body ولما تروحوا المشرحه ...وهكذا
فانت هتبقى نفسك تروحها
تانى حاجه ان المشرحه مش ضلمه ولااللمبه بتطفى وتنور من تلقاء ذات نفسها والباب الهواء بيحركه كل 5 ثوانى وجو الرعب بتاع الافلام دا



بالعكس انا شخصيا لما دخلت المشرحه اول مره مكنتش مصدقها انها هى واسعه وشبابيك كتير مخلياها على طول منوره ونظيفه ..
.وف الاول ريحتها عاديه (؛
دا لان ف الاول مش فى ولا body وبعد كده بتتعود عليها عادى لدرجه انى اعرف ناس لما يغيبوا عنها شويه بتوحشهم (؛

نيجى بقى للمنهج بتاعنا
بصراحه الاناتومى كميته كبيره جدا
وهتستغرب هنلحق نخلص كل دا ازاى .
.متقلقش هتخلص ان شاء الله (؛


basis




ده جزء بناخده في الاول ..كتاب صغير جدا..فيه اساسيات التشريح و كلام عام عن جسم الانسان..







Upper limb




يعني الطرف العلوي..وده بندرس فيه الاطراف العلوية يعني منطقة الذراع والكتف واليد..بكل تفاصيلها التشريحية...
اللي هي.. عظام..وعضلات..وأعصاب...وأوعية..وكمان الحاجات الاكلينيكية اللي بتتعلق بتشريح الجزء ده من الجسم...وده بيعتبر أتقل الاجزاء لانه دسم اوي بالمعلومات...



Thorax




يعني منطقة الصدر..وفيها بندرس منطقة الصدر بكل محتوياتها وتشريحها..بما فيه القلب والرئتين وحاجات تانية كتييير..
يعتبر الجزء ده من اخف الاجزاء..رغم احتوائه على معلومات مهمة جدا وغنية جدا..





Lower limb




يعني الطرف السفلي...وفيه بندرس الفخذ والرجل والقدم..تشريحيا .




Embryology




يعني علم الاجنة...الجزء ده مقسوم بين سنة اولى وتانية






الدكاتره فى المدرجات بقى

فى اكيد دكاتره كتير حلوين فى الاناتومى
لكن افضل اتنين على الاطلاق ف راى الشخصى على الاقل هما د/ مدحت ود/ ايهاب
د/ مدحت



اطيب وافضل شخصيه ممكن تقابلها ف حياتك
هيأثر فيك فعلا
وهتحبه كده لله ف لله حتى لو مش هتحضر عنده
وهتلاقى كده فى كلام خاص بيه زى
نحن فى القصر العينى سوبر نهين عشقا بــ
ودا معناه ان الحاجه اللى هيقولها دى مهمه
او ان طلبه الطب دول يهود (×
واجازتنا يوم نجاحنا
وكلام كتير اوى هتستمتعوا بيه جدا

اه,,,, ف المحاضره بتاعت د/ مدحت انسى انك ممكن تعرف تعق
دا الارض نفسها بتبقى محجوزه عشان الناس تعقد عليها وهو بيشرح

د/ ايهاب بقى



برضه من افضل دكاتره الاناتومى ف الكليه
انسان مفيش زيه طيب جدا ومرح اسلوبه ف الشرح بيختلف كتير عن اسلوب د/ مدحت
لكن الاتنين تروح لهم وانت مطمن انك هتفهم هتفهم مفيش بديل اخر

فى دكاتره تانى كتير كويسين اوى ف الكليه
زى د/ شريف
ود/ سامح دوس
د/احمد جلال
وغيرهم

بالنسبه لدكاتره الكورس مبعدناش كتي
لانهم برضه هما هما د/ ايهاب ود/ مدحت
طب ليه ناخد كورس وهما يبنزلوا فى المدرجات ؟؟؟
سؤال وجيه اقولك انا
زى ما قلنا ان المنهج كبير جدا وطبعا الكورس بيبتدى قبل الدراسه فدا بيكون فرصه انهم يذاكروا نوعا ما برحتهم
السبب الاهم بقى انك عشان تقدر تتابع مع دكتور واحد طول السنه لان سبق وقلنا ان كل شبتر دكتور مختلف بينزل فمثلا دكتور مدحت المفروض كان ينزل upper وbasis

مثلا
( احنا اتصرفنا وخليناه ينزلنا طول السنه (× )
وبعد كده دكتور تانى ينزل يكمل وهكذا
بس النقطه دى مبقتش مشكله اوى

لاننا قدرنا نصور محاضرات دكتور مدحت طول السنه وبالتالى لو حصل ومنزلش ف جزء معين هتكون المحاضره بتاعته موجوده فيديو



طيب اذاكر منين بقى ؟؟؟
بص فى طبعا كتب القسم ودا المصدر اللى د/ مدحت يشرح منه
وفى كتب د/ ايهاب
>غير ان ممكن تلاقى من الوقت التانى فرسان القصر منزلين مختصر لجزء معين او اى حاجه تساعد
بس اساسى يكون معاك اطلس ب اى شكل من الاشكال تشترى او تحمل واحد من على النت او تبقى تاخد الصور اللى د/ مدحت بيشرح عليها ف المحاضرات المهم تبقى معاك صوv
غير طبعا فيديوهات acland
وكلهم لينكاتهم متوفره وجاهزه
لكن بجد المذاكره متنفعش من غيرهم اناتومى من غير صور تبقى بتهرج وبتضيع مجهود


الدرجات
برضه هى ب 250 درجه زى الفسيو
امتحان عملى ف الترم الاول5

امتحان الترم الاول35
عملى اخر السنه45
نظرى اخر السنه125
شفوى30
كتاب كده بيتحل وبيتسلم 10

وكده يبقى خلصنا من الاناتومى

[كاريمان]

ملاحظات على الماشى
" من التوبيك القديم "

• الطب مهنه ساميه جدا وفى منتهى الرقى

ومعنى انك قررت تكون جزء من المهنه دى
لازم تبقى مستعد ان الطب هيكون حياتك
متخفوش انتوا مش هتبقوا معقدين
ولا هتلبسوا النظاره كعب الكوبايه

ولا هتمشوا بخمسيه الف كتاب على ايديكم ..احم ..الحق يقال
انتوا ممكن تمسكوا 3 كتب مثلا ولو محب للعلم اوى ممكن تبقى تمسك فى اوقات كده اطلس ولا حاجه (؛

تمام كده
طيب بالنسبه بقى للى هيكونوا معانا فى القصر
فدول مش بس ببقوا جزء من اسمى مهنه لا وكمان بقوا من افراد عيله القصر العينى
اللى هى تعتبر من افضل كليات مصر والوطن العربى
" ف راى الشخصى هى الافضل على الاطلاق "

• الترم الاول عليه 115 درجه فقط من ال 800 (؛

لانهم عارفين ان اول سنه واول ترم بيكون ملخبط

محدش فاهم حاجه ولا عارف حاجه
نظام جديد ناس جديده وممكن لكتير منكم بلد جديده وسكن جديد كمان

• اه صحيح نسيت اقولك انسى حكايه الحصص والمجموعات الفسحه والكلام دا

خلاص كبرنا (؛
دلوقتى بقى عندنا سكشن ومحاضره و بريك وكورس

المحاضره

دى اللى بتكون فى المدرج دكتور بيشرح فيها ومع سعادتك الكتاب او المصدر اللى تابع منه
ومش بيكون فيها غياب
السكشن

بيكون فيها غياب وبيكون ليك عدد ايام معينه مينفعش تغيب اكتر منه
دا بيكون فى قسم كل ماده وبتاخد فيه العملى بتاع كل ماده من الاربع مواد
يعنى مثلا فى الهستولوجى
" علم دراسه الانسجه "
بتشوف صور وحاجات توضح لك اللى بتاخده فى المنهج
وفى الاناتومى ( التشريح )

بتدخل المشرحه وتشوف العضلات اللى انت بتدرسها
وهكذا فى باقى المواد

عندك الكورس بقى دا الدرس الخصوصى
ايوه فى دروس ف الكليه وف دروس ف طب
اللى بيدوه هما نفسهم دكاتره الكليه
ومش لازم تاخده عشان تجيب تقدير حلو او حتى تطلع من الاوئل

• دلوقتى بقى نتكلم عن مصادر المذاكره

طبعا الواحد فى تانوى متعود على المعاصر والاضواء والكتب الخارجيه المختلفه
غير الملازم والمذكرات اكيد

وكتاب الوزاره مرمى فى البيت مش بيتفتح (؛
احنا بقى عندنا كتب القسم ودى زى كتب الوزاره كده




بتلاقيهم فى مكتبات الكليه
وفى كتب بنستلمها من القسم نفسه
ومتنستناش ان حد يقولك ان فى كتب نزلت
لازم كل فتره تنزل تسأل بنفسك

فى ملازم الدكاتره " بنفضل نجيب فيهم طول السنه (؛

فى حاجات جديده بقى عليكم شويه هى

تسجيلات صوت للمحاضرات او الكورسات
وفى محاضرات فيديو مرفوعه على قناه فرسان القصر بتاعتنا

فى بقى زياده كتب مختلفه ممكن بتلقيها على النت او فى المكتبات عندنا لو حبيت تتعمق زياده

فى قاموس بيتجاب ف اول السنه بيكون فيه المصطلحات ومعناها
غير مثلا حد ممكن يجيب اطلس للاناتومى وكده
لو مثلا الواحد مقدرش على اسعار الكتب دى
الموضوع بيبقى بسيط لانها موجوده بسهوله على النت ولينكاتها جاهزه

غير طبعا اى معلومات ع النت
وفيديوهات مساعده ودول ان شاء الله هنجمعهم فى الجروب

• النجاح عندنا في الكلية من 60 % و التقديرات كالتالي

مقبول 60 %
جيد 65 %
جيد جدا 75 %
امتياز 85 %

[लदहीपोल]

بجد موضوع رااااااااااااااااااااااااااااااااااائع يا دكتورة وادعيلى انى اقدر ادخل كلية ال401.5طب

[شروق احمد محمد]

بجد موضوع جميل جدا
انا رايحة سنة تالتة
ونفسي اوي ادخل طب
يااااااااااااااااااارب

[كاريمان]

المشاركة الأصلية كتبت بواسطة लदहीपोल

بجد موضوع رااااااااااااااااااااااااااااااااااائع يا دكتورة وادعيلى انى اقدر ادخل كلية ال401.5طب

ان شاء الله ربنا هيكتبلك الخير فى اى مكان

المشاركة الأصلية كتبت بواسطة شروق احمد محمد

بجد موضوع جميل جدا
انا رايحة سنة تالتة
ونفسي اوي ادخل طب
يااااااااااااااااااارب

باذن الله
اجتهدى وركزى ومتكونيش فى ضغط نفسى بس وذاكرى اول ب اول وحلى كتير
الثانويه سهله جدا والله

[كاريمان]

لينكات تهمكم

الموقع الرسمى لطب القصر العينى

جروب دفعه 2014-2020
الصفحه الرسميه لاسرة فرسان القصر
اللجنه العلميه لاسرة فرسان القصر


صفحة مكتبة قصر العينى للاستعارة
ماذا تقرا مع مكتبة قصر العينى للاستعارة


LUB DUB

[ا/محمود الحريف]

شكرا جزيلا جدا