"أم الدنيا..وهاتبقى أد الدنيا..."..

[aymaan noor]

"أم الدنيا..وهاتبقى أد الدنيا..."

" سنتين كمان..وهاتستغربوا مصر بقت كده ازاى.."

محمد ربيع

السفير الأمريكي ستيفين بيكروفت:
- جرى ايه يا جماعه ؟ هى الطيارة مابتزلش ليه ؟ مش قلتم الرحلة كلها نص ساعة ؟
.
السفير البريطانى جون كاسل:
- مش عارف الحقيقة..ده احنا داخلين على ساعه اهه في الجو..
.
بيكروفت:
- الطيار عمال بيلف بينا حوالين نفسنا..
(ينادي احدى المضيفات)..
هى الطيارة مابتنزلش في المطار ليه ؟
*************
تتوجه المضيفة لكابينة القيادة..وتسأل الطيار:
- السفرا قلقانين من تأخر الهبوط..
.
الطيار:
- مش عارف أقول لهم ايه..30 سنة طيار وعمر ما عدت عليّ حاجه زى دي...
.
المضيفة:
- خير..
.
الطيار:
- الجماعه مش موجودين...
.
المضيفة:
- ها !!!!!
.
الطيار:
- عمال أنادى على برج المراقبة بقى لي أكتر من نص ساعه وماحدش بيرد عليّ..مشيوا كلهم ومافيش حد موجود...
.
المضيفة:
- طب هانعمل ايه ؟ وأقول لهم ايه ؟
.
الطيار:
- العمل عمل ربنا..هانفضل ننادى عليهم..لحد ما يصحوا من النوم أو يرجعوا ان كانوا خارجين..
يا إما نرجع القاهرة تاني..
قولي لهم..اننا مازلنا بنحاول الإتصال ببرج المراقبة..
**************
تعود المضيفة للسفيرين وباقي الركاب لإخبارهم بسبب التأخير..
وتستمر الطائرة في الدوران بلا هدف..دقيقة...خمسة..عشرة..عشرين..ثلاثين..
.
بيكروفت:
- ما تشوفوا لنا الأخبار ايه...الوقود هايخلص...يا تنزلونا يا ترجعونا..
**************
تدخل المضيفة مرة أخرى كابينة القيادة..لتفاجأ بالطيار..في حالة يرثى لها..
خلع ربطة عنقه وألقاها على الأرض..فتح أزرار قميصه..وتدلت فانلته الداخلية خارج سرواله..
شعره واقف وقد تفرق في كل إتجاه..
احمرت عيناه واللعاب يسيل من فمه..
وقد أخذ يضرب في جنون بيده المرتعشة على أزرار أمامه..وينادي بيأس على برج المراقبة لعله يرد..في صوت اختلطت فيه بحة الإنهاك مع الإنزعاج الشديد...
وأخييييييييييييييييرا..يأتي الرد من برج المراقبة:
- ايه ؟ ايه ؟ فيه أيه ؟
ايه الدوشة وقلبة الدماغ اللي انتم عاملينها دي ؟؟!!
.
الطيار في صيحة أمل وانتصار:
- الحمد لله...ياما انت كريم يا رب...
.
المراقب:
- ماعندناش رحلة جايه بالإسم ده..
.
الطيار:
- ده مش اسم الرحلة..دى طيارة السفارة الأمريكية..واحنا مبلغين بالرحلة..ومتصلين بيكم..وواخدين التصاريح..مش بتردوا علينا ليه ؟
.
المراقب:
لا مؤاخذه..ماكناش موجودين...
الموظف راح يجيب ساندوتشين فول...وانا موصيه كمان على سجاير كليوباترا..
(ينادي على عامل عنده)..
يا بلحه..انت ياض يا بلحه..روح شوف لنا المدعوق ده راح فين..أكيد لقى الكافيتيريا قافله وراح يجيب من بره..
.
فقد الطيار النطق تماماً..وشك مساعده في إصابته بجلطة دماغيه..
فأخذ مكانه وواصل الحوار مع برج المراقبة:
- احنا دلوقتى حالتنا صعبه جداً..
.
المراقب:
- ده انتم تحمدوا ربنا...لولا ان انا معدي بالصدفة وسمعتكم بتوأوأوا..كان زمانكم متشعلقين كده لحد ما يرجع المدعوق بالفول والسجاير..
********************
أعلن مساعد الطيار عن استعداد الطائرة للنزول..فانتفض الركاب وقد دبت الروح فيهم من جديد..وشرعوا في ربط أحزمة المقاعد بكل همة..
لسبب غير مفهوم مرت بخاطر السفير الأمريكي بيكروفت..بعض تصريحات السيسي:
"أم الدنيا..وهاتبقى أد الدنيا..."..
" سنتين كمان..وهاتستغربوا مصر بقت كده ازاى.."
.
أما السفير البريطاني كاسل...فقد استغرق في التدوين على أجندته..
"فكرة جيدة جدا..أن تعود السياحة البريطانية لمصر في أسرع وقت..
والفكرة الأجدر بالتشجيع..إنشاء أول مفاعل نووي مصري على بعد كيلومترات قليلة من المطار الذي ستهبط فيه الطائرة الآن..."
________________________________________
حدث بالفعل..
مطار العلمين - مصر - 27 أكتوبر 2016

القصة من 5 مصادر مختلفة على رأسها جريدة الأهرام..بما فيها البيان الرسمي للشركة المصرية للمطارات ومطار العلمين:



http://gate.ahram.org.eg/News/1272395.aspx

http://www.elbalad.news/2463861

https://www.albawabhnews.com/2184294

http://www.akhbarak.net/articles/235...A7%D9%88%D9%8A

http://www.moheet.com/2016/10/27/249...l#.WBWpetUrLIV