هل جربت تستخدم بنك المعرفة وتدخل علي الموقع ؟

[aymaan noor]

هل جربت تستخدم بنك المعرفة وتدخل علي الموقع ؟

من أكتر الحاجات الايجابية اللي حصلت واللي وفرت لشباب الباحثين نوافذ معرفة رائعة ، جرب مش حتخسر حاجة.



عارف البطاقة اللي معاك
ايوة اللي شكلك فيها وحش دي
اللي أنت مش عارف لازمتها ايه دي

طب عارف النت البطئ المصري اللي بتتريق عليه طول الوقت

عارف أن لما تحط البطاقة على النت ده هيتيحلك ما يساوي ملايين الجنيهات تبقى تحت تصرفك
سامعك بتقول اهوه قولي ازاي؟ فهمني ده أنا في عرض جنيه

أقولك يا سيدي و لا تزعل نفسك بس خليني احكيلك الحكاية من أولها

في ٢٠١٤
وبمناسبة عيد العلم أعلن الرئيس عبد الفتاح السيسي عن مبادرة و رؤية الدولة للعلم و التعلم و كانت:
"نحو مجتمع مصري، يتعلم ، يفكر و يبتكر".

و هنا لازم أقف و اذكر الرجل اللي هيشهد له التاريخ في يوم من الأيام بعد أن يحقق رؤيته في التعليم و البحث العلمي في مصر ا.د. طارق شوقي
للي ميعرفهوش ا.د طارق شوقي هو عميد كلية الهندسة بالجامعة الامريكية مش هاتكلم كتير عن مؤهلاته و المناصب اللي ترأسها ممكن تدور عليها بنفسك

المهم هنا أنه هو رئيس المجلس التخصصي التابع لرئاسة الجمهورية المعني بالتعليم و البحث العلمي.
ا.د طارق خد رؤية الرئيس السيسي و بدء ينفذ بالفعل من خلال مشاريع مختلفة منها إعداد المعلمين للتعامل مع تكنولوجيا المعلومات، البرنامج الرئاسي لتأهيل الشباب للقيادة
و بنك المعرفة المصري.

أكيد سمعت هنا و لا هنا عن بنك المعرفة و طبعا صحابك و السوشيال ميديا قالت أن ده فنكوش زي كل المشاريع في البلد.

طيب إيه علاقة ده بالبطاقة و الملايين.

ما أنا جايلك اهوه علشان تفهم لازم تفهم يعني إيه بنك المعرفة ده.

ربنا يعيني و اقدر أفهمك حجم المشروع القومي ده في الكام سطر دول و لو أنه محتاج ساعات علشان توفيه. ومش هتقدر.

ببساطة كدة علشان تتعلم محتاج مصادر العلم تكون متاحة ليك و هو ده اللي بيعمله بنك المعرفة

فريق العمل في بنك المعرفة تواصل مع مجموعة محترمة من ناشري العلم في العالم سواء في صورة كتب، مقالات علمية، فيديوهات تعليمية و تطبيقات للموبايل.

الإنجاز اللي حصل هنا أن فريق العمل قدر يقنع الناشرين دول يوفروا المادة العلمية لكل المصريين و ببلاش!!

المادة العلمية دي معظمها محتاج فلوس علشان تحصل عليه و اللي سافر أو تعامل مع جامعات برة عارف أن الجامعات بتوفر للمتعاملين معاها إنهم يحصلوا على المواد دي ببلاش من خلال الجامعة و بس.
اللي حصل أن مصر تعاقدت كدولة و شرط أنك تدخل على كمية المعلومات الخرافية المتاحة هو ببساطة أنك تكون مصري على أرض مصرية
بدأت تفهم البطاقة لازمتها إيه هي مفتاحك للحصول على كل هذه المعارف لانها بتثبت الشرط الاول هو انك مصري و ليك رقم قومي مصري.

طيب إيه حكاية على أرض مصرية الشرط التاني أنك تكون مصري و داخل على الانترنت من جوة مصر و ده بيثبت عن طريق عنوان الشبكة.

اللي د طارق شوقي و فريقه عمله أنه جمع كل الفلوس الي كانت مرصودة لاتاحة المعارف زي مكتبة الجامعة الرقمية و خلافه و حطهم كلهم في مكان واحد سماه بنك المعرفة و قدر بكدة يشترك في كمية معارف أكتر بكتير و اتاحتها لأفراد أكتر بمراحل من اللي كانت بتوصلهم المعارف بالطرق القديمة

سامعك يا اللي بتقول عمال تقولي معارف معارف ممكن بقى تعرفني إيه هي المعارف دي زي ما قلت في اﻷول سردها في الكام سطر دول يكاد يكون مستحيل أنما خليني أعرفك على اﻷربع بوابات الرئيسية لبنك المعرفة

بوابة للقارئ العام، بوابة للطلاب و بوابة للاطفال و بوابة للباحثين و كل واحدة من دول بتوفر للمشترك فيها كم من المعارف هائل نذكر منها أمثلة:

بوابة القارئ العام و بتوفر للشخص معلومات في شتى مجالات الحياة و من أمثلة الناشرين فيها موسوعة
Brittanica
و ناشرين زي ناشيونال جيوجرافيكس و ديسكوفري. كمان في إتاحة لتطبيقات موبايل زي
One click digital
و ده عليه كمية مهولة من الكتب و الروايات الرقمية و المسموعة
كمان تطبيق زي
Atomic training
اللي بيديلك كورسات في مجالات كتير جدا و زي ما قلت دول أمثلة

بوابة الطلاب بتوفر مواد علمية للطلاب في شتى المجالات منها مثلا
National geographics and discovery education
و دول بيقدموا كمية ضخمة من الفيديوهات التعليمية لمجالات العلوم للمختلفة
Prep test
و ده بيعد الطلاب انهم يدخلوا امتحانات الشهادات الاجنبية
و مجموعة كبيرة أخرى

بوابة الأطفال و بيبقوا تابعين لأهليهم يعني على حسابك ممكن تضيف طفل او اكتر بالرقم القومي الموجود على شهادات الميلاد

بردوا عندك حاجات
National geographic and discovery education
و مجموعة من الكتب و القصص المقروءة و المسموعة للأطفال

الجزء الكبير و الأهم و اﻷحلى من بنك المعرفة الجزء الخاص بالباحثين و بيوفر كمية رهيبة من الدوريات العلمية لباحثين مثال بس للي أعرفهم بحكم شغلي في البحث العلمي الخاص بالعلوم الطبية
Elsevier , springer nature ،new england journal of medicine, wiley and wolters kluwer
متاحين لك بالكامل و غيرهم في شتى نواحي العلوم من هندسة و إدارة و غيرها كتير ممكن تدخل تتعرف عليهم بنفسك
الميزة هنا أن ده قانوني و أخلاقي غير المواقع التانية اللي بتبقى سارقة اﻷبحاث

في بس نقطة مهمة الناشرين في مجال البحث العلمي الشريحة المستهدفة لهم هي الباحثين و الباحث بيتبع مؤسسة بحثية جامعة ،مركز أو معهد.

لذا شرط أنك تعمل حساب باحث أنك تنتمي لمؤسسة بحثية كطالب أو عضو باحث تابع لمؤسسة بحثية.

من الآخر علشان تعمل حساب باحث لازم أول مرة ساعة التسجيل تكون جوة جامعة أو مؤسسة بحثية و أنت بتنشئ الحساب لأول مرة.
و لازم تدخل عليه من المؤسسة دي مرة كل تسعين يوم غيركدة تفتحه عادي من البيت أو الموبايل.

آخر حاجة و دي مهمة قوي قوي قوي قوي ليه لازم كلنا يبقى لينا حسابات و نستخدمها للحصول على المعلومات و المعارف المهمة في شغلنا و كمان نتواصل مع إدارة الموقع لاضافة مواد تانية

ببساطة زي أي حاجة في الدنيا ليها تمن بالتالي لازم يبقى ليها جدوى الموقع مصمم بحيث أنه تدخل على كل الناشرين من خلاله و بالتالي هما هيقدروا آخر كل سنة يعرفوا إيه اللي استخدم و طبعا إيه اللي لم يستخدم و طبعا اللي مش هيستخدم مش هيتجدد تاني الاشتراك في.
صحيح هما اشتروا الحاجات دي و مش واخدين حق انتفاع، لا شراء يعني كل الموجود حاليا هيفضل موجود عندنا
بس اللي جاي مهم بردو، مهم علشان الأبحاث و العلم الجديد.

و لذلك من فضلك لو كنت بتشتكي أننا معندناش تعليم و معندناش بحث علمي و معندناش اتاحة معلومات و معارف.

من فضلك استخدم الموقع و شوف الانجاز اللي اتعمل و قرر بنفسك هل ده يستحق يكون مشروع قومي و هل هيساهم في رفع كفاءة التعليم و البحث العلمى و لا ﻷ.

احنا لأول مرة عندنا فرصة حقيقية نحسن التعليم و نتيح أفضل مصادر العلم و التعلم للناس فمبقاش عندك حجة يلا اتعلم
يلا قول للناس خليهم يتعلموا من احسن مصادر العلم

Www.ekb.eg

مش هاوصيك بقى تعرف غيرك

ملحوظة لو حابب تتعرف على بنك المعرفة اكتر الملف ده في عرض لمجموعة كبيرة من محتويات بنك المعرفة بالتفصيل اكتر عن المصادر المتاحة من بنك المعرفة

البرزينتاشن عبارة عن ١٦٥ سلايد

https://onedrive.live.com/…

[عماد عبد الستار]

[ana youssef]

لا تعليق .............نجرب الاول ... ويارب يكون كاملا ... وليس مثل موقع التربية والتعليم

[Ala'a Eldin]

بعد التجربة >>> الموقع بطىء جدا >>> وفارغ وليس به أى كتب أو معارف

[sara.eth]

لا ابدا .... لكن القديم افضل

[رمضان احمد فؤاد]

رااااااااااااااااااااائع