ماذا قال :-أحمد حسام ميدو في برنامج على دي إم سي

[الأستاذة ام فيصل]

أحمد حسام ميدو في برنامج على دي إم سي من يومين المذيع بيسأله إيه الفرق بينك وبين محمد صلاح......

ميدو بشكل مباشر قاله....

"محمد صلاح عقليته أفضل مني. أو الشخصية في العموم.......
، أنا كنت متدلع أوى
وكنت صدامي
ومبسمعش كلام حد
و متقلب المزاج
ورغم إنه كان معايا أفضل مدربين في الدنيا
لكني كنت باخد القرارات من دماغي
ودا خلاني أخد قرارات غلط كتير.
كنت أغيب عن النادي شهر كامل وانا عندي 14 سنة
وارجع ألعب الماتش النهائي وكأن مفيش حاجة حصلت.

محمد صلاح اتطور بسرعة، ورغم إنه قعد سنة كاملة احتياطي مع تشيلسي لكنه اتعامل مع الموضوع بهدوء وكان رد فعله جيد جدا."

اللي بيقوله ميدو شيء شجاع جدا، ومحترم، ومحايد.....
و فيه نقد صادق للذات
و رغبة نفسيه جاده للتغيير للأفضل....
و وعي بما حدث له.....

ميدو كان ممكن يبقى واحد من أعظم اللعيبة في العالم،
وقدراته الجسمانية أعلى بكتير من صلاح من حيث الطول (188سم) والقوة،
لكنه بيشاور لشيء مهم
و هو التدليل المفسد،
و الحالة المزاجية المتقلبة،
و عدم التحلي بالقدرة على التواضع
والانصات
والتطور
واحترام رأي الغير.
وإن الغرور
والرعونة
وحدة الطبع
ممكن يدمروا أكتر المواهب تالقا.

ميدو كان في يوم من الأيام أغلى لاعب عربي في أوروبا، وخلال أقل من ثلاث سنوات عرض نفسه مقابل يورو واحد ولكنه لم يجد ناديا يضمه فعاد إلى مصر واعتزل قبل أن يتم 30 عاما.

محمد صلاح من بسيون، بلد أرياف جمب طنطا، وظروفه المادية كانت متواضعة، لكن ابوه كان بيجيبه 5 أيام في الأسبوع القاهرة عشان يتدرب مع المقاولين العرب. بصبر وجلد وتحمل لكل الظروف، كان الأب لا يريد أن يكسر بخاطر ولده، ومؤمن بموهبته، وظل في هذا الكفاح سنين مراهقته حتى أثبت نفسه. التنشئة الجادة أو الشاقة والتي يتحملها البشر بصبر وسعة صدر تخلق أفضل ما فيهم من استقرار ورضا و صبر و حب للنجاح الحقيقى وبطولة حقيقية.

ربوا ولادكم على كده ربوهم على التحمل و الجلد و الصبر و المثابره و الطموح
مش كل شيئ يطلبوه يجدوه رهن ايديهم بأشاره واحده
ما تخلوهومش يركنوا للراحه و الكسل من وهما صغيرين
عودوهم على الشقا و الكفاح من نعومة اظافرهم
علشان بكره مش هاتعرفوا تلوموا حد غير أنفسكم.