كل ما تحب ان تعرفه عن قسم الدراسات السياحية

[Eslam_Tourism]

1- بيدرس اية قسم الدراسات السياحية ؟

- بيدرس مواد ادارة المكاتب السياحية بانوعها واقتصاد ومحاسبة وتسويق ووعلاقات عامة والمواد اللى تخليك تعرف تتعامل مع العملاء وبرضو البرامج السياحية وغيرها

يعنى قسم بتتخرج منه فاهم شغل المكاتب السياحية فى شركات السياحة ووكالات السفر والطيران وبرضو بتبقى عارف شوية تسويق وعلاقات عامة واساسيات خدمة العملاء ووبتبقى فاهم كيف تسير العملية السياحية وحركة السفر والطيران .

وطبعا بالنسبة لمواد التسويق والمحاسبة والاقتصاد والعلاقات العامة وكل المواد اللى مش مواد ادارة سياحية مبيبقاش عليها تركيز جامد زى مواد الادارة السياحية يعنى مثلا الاقتصاد ليه مادتين بس والتسويق مادة واحدة والعلاقات العامة مادتين

2- فى تدريب صيفى فى قسم الدراسات السياحية ؟

- اه طبعا فى تدريب فى شركات السياحة والكلية بتوزع الطلبة فى الصيف على شركات السياحة بس انت لازم تلاقيلك شركة تدربك وتتعامل معاها بعد كدة عشان التدريب مفيد جدا وبيديك خبرة عملى وكمان بيديك شهادة .

3- ممكن اشتغل اية بعد ما اتخرج ؟

- ممكن تشتغل Tour Operator او منظم رحلات فى شركات السياحة وممكن تشتغل موظف حجز طيران فى شركة سياحة او طيران ودى الوظيفة الشائعة للخريجين ومتوفرة وممكن تشتغل فى الاستقبال او الحجز فى الفنادق وبرضو الضيافة الجوية واى وظيفة محتاجة لغة او كمبيوتر وبرضو ممكن تشتغل فى اى حاجة فيها خدمة عملاء .

4- انا مقدرتش ادخل ارشاد اسياحى ونفسى ابقى مرشد اعمل اية ؟

- خد دبلومة ارشاد سياحى وبعدها هتاخد الرخصة

5- عشان اشتغل فى شركات الطيران اعمل اية ؟

- لازم انجليزى جامد طبعا والاولوية للى معاهم لغة تانية وكمان لازم شهادة ICDL طبعا ولازم طبعا شهادة اماديوس او جاليليو فى حجز تذاكر الطيران وطبعا بيبقى فيه انترفيو عشان القبول
طبعا انا سامع واحد دلوقتى بيقول " يا عمنا الاختبارات دى معمولة عشان يلموا فلوس والناس اللى هيتوظفوا مختارينهم اساسا قبل الاعلان عن الوظائف " ,,,,, اقوله اعمل اللى عليك والباقى على ربنا ومتنساش تقدم فى كل شركات الطيران

6- هل محتاج اجيد اكتر من لغة وانا خريج قسم سياحة ؟

- خريج قسم دراسات سياحية اكتر واحد لازم يجيد اكتر من لغة لانك لو خريج ومعاك انجليزى بس مش هتلاقى كل ابواب شركات السياحة مفتوحة ادامك وخصوصا الكبيرة لانها بيبتقى لازم عايزة انجليزى ولغة تانية

7- هل فسم دراسات سياحية قسم صعب ؟

- بالعكس قسم دراستة جميلة وشيقة وهتحب تشوف اللى انت بتدرسه عملى اكتر من مهو نظرى .

8- مرتبات شركات السياحة كام ؟

- من 700 الى 2000 جنية فى مصر وطبعا كل شركة وحجمها وفى شركات ضخمة بتدى مرتب فوق الـ2000 جنية

9- هل متاح ليه الشغل فى الدول العربية ؟

- معظم وظائف شركات السياحة بتبقى متوفرة فى الدول العريبة وخصوصا الامارات وبتبقى بمرتبات عالية ممكن فوق الـ3000 جنية

10- هل الشغل متوفر ولا هتعب من اللف على الشركات ؟

- شركات السياحة كتير جدا قى مصر وانت اكيد لما بتمشى فى الشارع بتبقى ملاحظ كدة يعنى متقلقش مش هتلف كتير وبرضو شركات الطيران فى مصر مش قليلة ,,, ولكل مجتهد نصيب .

واى حد عنده سؤال ممكن يضيفه ,,,