ارجو النصيحة

[zarpona]

يا جماعة انا ادبست في كلية تربية وانا مش حباها خالص انا اصلا علمي علوم 83.5 بس مقبلتش في اي كلية علمي
هو انا لومش بحب التربية ممكن امشي فيها ولا هتعقد اكتر
طب لو في كليات تانية ممكن اقبل فيها ممكن تقولولي زي ايه

سؤال كمان ولو هفضل تربية وعايزة اتخصص في مادة علمية ينفع ولا فية درجات معينة لكل قسم
ارجو الرد

[zarpona]

ارجو الرد سريعا

لو مردتوش هعيط

[احمد الحفناوي]

السلام عليكم ورحمه الله وبركاته
وعسي ان تكلاهوا شيئا ويجعل الله فيه خيرا كثيرا
انا مدرس ثانوي علم نفس خريج دفعه 2007 واتعينت 2011
انا طبعا زيك بالظبط كنت كاره جدا الكليه مع اني كنت علمي ولتقدير الله سبحانه وتعالي بعد مافضلت اتنقل بين الاقسام استخرت الله ودخلت هذا القسم اللي ماحدش بيدخلوا كتير ومع ان دراستي علميه ويشاء الله بعد ما تخرجت يكون هذا القسم هوسبب في تعيني في احدي المدارس الحكوميه .............. لم اكن اعلم في البدايه ماهي الحكمه من دخول هذا القسم ولكن عرفت بعدها ان الله تعالي كان له اراده وتدبير سبحانه وتعالي ..................... عموما ان سني حاليا 26 سنه والحمد لله راتبي وصل 1050 وتقريبا احصل علي خمسه اضعاف هذا المبلغ من الدروس الخصوصيه ..الحمد لله انا حاليا
افضل بمراحل كثيره من كل زملائي خريجي الهندسه ..........ولو خيروني الان بين الهندسه والتربيه لاخترت التربيه
الدراسه سهله في كليه التربيه ولكن هناك بعض الاقسام التي تشترط المجموع ..........وذلك حسب المحافظه اللي انتي فيها............... ارجو من الله تعالي ان يوفقك للخير والصالح .......

[zarpona]

شكرا لرد حضرتك الكلام ده طمني
عموما انا بحب علم النفس طب هو كان بياخد من درجة معينة "جامعة قناة السويس الاسماعيلية "
وكمان سمعت ان خريجي علم النفس بيشتغل اخصائي نفسي مش مدرس نفس الكلام دة مظبوط؟
وشكرا لدعاء حضرتك

[احمد الحفناوي]

اعتقد ان قسم علم النفس في جامعه قناه السويس لايشترط المجموع كما ان خريج تربيه لايمكن يكون اخصائي بل خريج اداب علم نفس هو اللي بيكون اخصائي نفسي.............. هوانا عندي في الزقازيق السنه بتاعتي كان يشترط الدرجه النهائيه 50
ولكن اعتقد هذا العام نتيجه للمجاميع المنخفضه في ماده علم النفس سوف لايشترط المجموع ....................... وعموما انا كنت بصحح الماده في المجمع التعليمي بالاسماعيليه كنت بصحح ورق الاسماعيليه وبورسعيد وشمال سيناء والسويس.....
والدرجات كانت منخفضه غير السنه اللي فاتت يعني ان شاء الله السنه دي لايشترط المجموع .............................
واتوقع ان شاء الله لماتتخرجي تلاقي وظيفه مناسبه مستنياكي ..............وانا شايف ان افضل وظيفه للبنت هي انها تكون مربيه وانا بعمل ماجستير في علم التفس الاكلينكي في كليه الاداب جامعه الزقازيق وان شاء الله تعالي بمثابه حصولي علي الدكتوراه احصل علي ترخيص لفتح عياده اومركز علاج نفسي . علم النفس قسم جميل جدا وسهل والدراسه فيه ممتعه ..............واي مساعده ان شاء الله ان تحت امرك ...وربنا يوفقك

[zarpona]

يعني من وجهه نظر حضرتك علم النفس هيكون افضل ؟ انا اصلا حباه
هي فعلا درجات علم النفس السنة دي منخفضة جدا عن اي سنة
ان شاء الله بعد العيد هقدم وربنا يوفقني للافضل
وربنا يوفق حضرتك في الماجيستير انا عموما بحب الناس اللي مبتقفش عند حد من المذاكرة والدراسة وعقبال ما نقوللك يا دكتور
بس ممكن توضحلي ايه حكاية العيادة او مركز التاهيل النفسي ؟

[zarpona]

شكلي كده هستغل حضرتك كتير
اسفه للازعاج والاسئلة الكتير بس انا بقالي سنين مجهزه نفسي اني ادخل صيدله
وفجاة لقتني هدخل تربيه

[احمد الحفناوي]

تحت امرك في اي شيء اقدر اقدمه ليكي وشكرا علي شعورك النبيل..........
بالنسبه لمركز العلاج النفسي هو بالظبط عياده نفسيه وبنعالج فيه مرضي نفسيين ولكن الفرق بين اخصائي العلاج النفسي وبين الطبيب النفسي ان الاخصائي لايستطيع استخدام العقاقير الطبيه كالمهدئات والصدمات الكهربيه ........................
ولكن الاثنان عملهم واحد ...بل اغلب الناس تفصل الذهاب الي مركز العلاج النفسي لان اخصائي العلاج النفسي هو شخص حاصل علي الدكتوراه ومتمرس في عمل الاختبارات والمقاييس النفسيه والمقابلات الشخصيه علي عكس خريج كليه الطب النفسي حيث تكون دراسته طبيه لان معظم الحالات تحتاج الي علاج وارشاد نفسي وليس الي مهدئات ماعدا الحالات المرضيه الشديده مثل الفصام اوالعصاب اوالبارانويا .....حتي هذه الحالات لايستطيع الطبيب النفسي التعامل معها ولكن يتم تحويلها الي مستشفيات متخصصه .......
وللعلم معظم اساتذه علم النفس في كليه الاداب يلقون محاضرات في كليه الطب ......فهناك د/عبدالله عسكر استاذ علم النفس -كليه الاداب -جامعه الزقازيق معظم محاضراته في كليه الطب جامعه عين شمس وجامعه القاهره
وبالمناسبه هو الذي سيشرف علي رساله الماجستير بتاعتي..........الراجل ده عنده اكبر مركز علاج نفسي في الزقازيق كما ان له ايضا مركز علاج نفسي في القاهره ويعمل معه العديد من الاطباء النفسيين في هذه المراكز.........

[zarpona]

شكرا لمتابعه حضرتك وعلي المعلومات الكتير اللي حضرتك ذوتني بيها
بس كالعاده هاسال تاني
طب انا لما اكتب رغباتي في الكلية هعرف منين القسم اللي قبلت فيه ؟
وازاي ممكن اعرف كل قسم خد من كام درجة ؟