محاكمه الجمل ( بقلمى الخاص )

[تامر الطويل]

محاكمه الجمل

من داخل الجيزة وامام محكمة جنايات القاهرة وقف امير وصديقه ادهم ينظرون الى مبنى المحكمه وينتظرون فى الخارج لحضور جلسه النطق بالحكم على مرتكبى موقعه الجمل الشهيرة فى ميدان التحرير فينظر ادهم لأمير ويقول له

ادهم : ياترى القاضى هيحكم ب ايه ياامير

امير : بالاعدام طبعا , وكمان الاعدام مش كفايه على الناس دى

ادهم : مش عارف ليه قلبى مش مطمن ياامير وحساس ان القاضى هيحكم بالمؤابد بس

امير : مؤابد ايه ياعم ، توف من بوقك ولا اقولك حوش التفه دى اكيد هنحتجها جوة لما نشوف صفوت الحرامى ولا فتحى موافقه

ادهم : طيب يالا بينا ندخل الجلسه هتبدء

وداخل المحكمه دخل امير وادهم وجلسا على كرسى القاعه وأخذا ينظرون إلى فتحى سرور رئيس مجلس الشعب السابق والى صفوت الشريف رئيس مجلس الشورى ووزير الإعلام الأسبق وهنا نظر امير الى ادهم وقال له

امير : شوف الكالح بيبصلنا إزى وكأنه عايز يضربنا بالرصاص

ادهم : سيبك منه إلى إختشوا ماتوا

امير : ربنا يخده ويريحنا من جرايمه وسرقاته ، بقولك ايه ياادهم . انا هنام شويه ولما يجى القاضى والحاجب يقول محكمه إبقه صحينى

ادهم : إنت هتصتعبط ياامير إحنا فى محكمه مش فى بيتكم

امير : انا مطبق بقالى يومين فى الشغل ونفسى انام ، وبعدين دول 5 دقائق ومش هنام انا هريح بس وبعدين الحكم معروف يابنى الاعدام ، انا جاى بس اشوف وشوشهم والقاضى بيحكم عليهم

وفعلا ينام امير ويغوص فى حلم عجيب شايف فيه قاعه المحكمه وصفوت الشريف لابس لبس محامى وفتحى سرور لابس لبس النيابه والقاضى قاعد وسط المستشارين وهو اللى جوة القفص فيصرخ امير ويقول

امير : أنا إيه إللى جبنى هنا ؟؟ وليه الناس دى بره ؟؟

القاضى : إسكت يامذنب متتكلمش غير لما أوجهلك سؤال

امير : سؤال إيه ونيله إيه أنا معملتش حاجه

القاضى : إسكت بقه الله يخرب بيتك ضربتلى الدماغ إللى كنت عمله

وينظر القاضى اللى القاعه الفارغه ويقول

القاضى : صباحنا فل إن شاء الله وبالصلاه على النبى كده مش عايز نفس فى القاعه ، النهارده معانه قضيه الحمل

المستشار الاول : الجمل جنابك

القاضى : مفرقتش كتير كلهم بيمشوا على 4، إتفضل إرغى ياعم سرور وخلصنى وإنجز كده عندى مطش كورة ومش فاضلكم

فتحى سرور : ياسياده القاضى موكلى برئى ولم ي*** اى شخص فى موقعه الجمل , ده حتى مبيعرفش يركب جمال ولا حتى حمار

امير : ماتلم لسانك إنت كمان إيه حمار دى

فتحى سرور : أقصد ميعرفش يركب حمار

القاضى : امال ايه اللى وداه ميدان التحرير فى اليوم ده

فتحى سرور : كان رايح الملاهى وتاه

امير : ملاهى ايه وزفت ايه ، انتوا بتهزروا ، أنا كنت فى ميدان التحرير لانى عايز البلد تنضف

صفوت الشريف : وده اعتراف إنه كان هناك علشان البلد تنضف ، ارجوك سجل ده عندك سيدى القاضى

القاضى : معايش قلم

امير : ليه هو انتوا مابتحبوش النضافه ولا ايه ، وبعدين انا اقصد بالنضافه نهايه الفساد وإسقاط النظام ورحيل مبارك وكل اعوانه

صفوت الشريف : ارجوك سجل دى كمان سيدى القاضى عايز النظام يقع بعد ماصرفنا عليه ملاين من فلوس الشعب

القاضى : هو انت اطرش قولتلك معايش قلم ، ينفع أحفظ

فتحى سرور : ياسياده القاضى موكلى كان فعلا تايه وحظه الاسود وداه الميدان مع الناس المخربه اللى عايزة الحرميه تمشى ، ولما لقى نفسه فى الميدان ولقه الشباب وقفين فى الميدان بالملاين افتكرهم مستنين الاتوبس بس لما لقاهم بيهتفوا وبيقولوا ( الشعب يريد إسقاط النظام )، عرف ساعتها انهم مخربين وجرى على طول يروح ، راحت رجاله امن الدوله قبضه عليه

امير : إيه إللى إنت بتقوله ده هتودينى فى داهيه الله يخرب بيتك ، متصدقوش ياباشا أنا كنت مع الثوار من يوم 25 يناير وانضربت بعصيان الامن المركزى وإستحميت بخرطيم المايه بتعتهم

صفوت الشريف : ارجوك بقه سجل دى ، ده إعتراف رسمى إن الحكومه وفخامه الرئيس ورجالته عايزة تحمى الشعب وتنضفه من غير متاخد ولا مليم رسوم نضافه

القاضى : اما صحيح حكومه وطيه ونصابه

صفوت الشريف : ليه بس ياجناب القاضى

القاضى : علشان حمت الشعب بفلوسنا

صفوت الشريف : ياجناب القاضى الشعب المصرى المطحون بقاله 30 سنه مستحماش علشان مفيش مايه ورحته طلعت وفاحت ده كان ناقص يلوثلنا الهواء اللى بنتنفسه فى مرينا والساحل الشمالى وشرم الشيخ وكان لازم ننضفهم

امير : والله ماحد عايز ينضف غيركم يالمامه ياغجر ياوكلين البلد ولعه

صفوت الريف : سجل عندك دى ، وكلين البلد ولعه

فتحى سرور : ودى فيها ايه دى كمان ؟؟

صفوت الشريف : مفهاش بس ممكن نعدلها ونلعب فيها ونخليها مثلا مبارك ورجالته أشرف ناس وساعتها نعمله قضيه سب وقذف

القاضى : إنت ياله ياللى إسمك أمير ، إعترف وخلصنى أنا إتأخرت على الماتش ولسه عايز اروح البيت ألبس الشورت بتاع مصر

امير : انا مش فاهم حاجه انا كنت مع الثوار بندافع عن اللى باقى فى مصر وبنطالب برحيل الطاغيه ورجلته وفاجاه وإحنا واقفين دخل علينا ناس ركبين جمال وإحصنه وحمير ومسكين صور الطاغيه مبارك فى إديهم وقال ايه عايزنا نمشى ونخلى الميدان ونزلوا فينا ضرب بالعصيان الى معاهم ولما مسكنا واحد منهم قالنا انه قابض فلوس علشان يعمل كده من ناس تبع الحزب الوطنى وقيادات كبيره فيه

فتحى سرور : موافقه

صفوت الشريف : هو انت اى حاجه موافقه مفيش مره مرفوض ، زهقتنا ياراجل فى عيشتنا وخليت المصرين يضحكوا علينا وميصدقوش إننا ناس حساسه وطيبين ، قول مرة موافقه على طلب اعضاء الحزب الوطنى ومرة على طلب المعارضه مرفوض ، خلى فيه ديمقراطيه

امير : انا عايز افهم حاجه واحده بس ، انا هنا ليه

القاضى : انت هنا علشان الثورة نجحت

امير : إزى الثورة نجحت واكون مسجون وبتحاكم وإللى *** اصحابى واخواتى فى موقعه الجمل بره عايش حياته

القاضى : علشان بعد الثورة مانجحت سبتوها تضيع من إديكم

امير : إحنا نزلناعلشان نحقق حلم الحريه والعداله الاجتماعيه وماكنش يهمنا حكم ولاسلطه إحنا كان كل إللى يهمنا إننا ننقذ إللى باقى من مصر قبل الحراميه مايسرقوها ويبعوها

القاضى : بس بقه انا زهقت منكم الحكم بعد ما اشرب الشاى ، رفعت الحكوة

وهنا يفوق امير على صوت ادهم وهو بيصحيه وبيقوله إصحى يابنى ادم القاضى هينطق بالحكم كل ده نوم هتودينا فى داهيه

امير : إيه ده طب والمرافعه

ادهم : خلصت خلاص إسكت بقه القاضى هينطق بالحكم

وهنا يدخل القاضى ويقول

حكمت المحكمه حضوريا ببرئه كل المتهمين فى موقعه الجمل من التهم المنسوبه إليهم وإلقاء القبض على كل الشهداء بتهمت موتهم بدون تصريح من بقايا النظام السابق وأعوانه وحبس الجمل والحصان والحمار ثلاثه اشهر مع إيقاف التنفيذ ,,,,, رفعت الجلسه

بقلم

تامر على الطويل

امير الجروح

[محب رسـول الله]

المجد للشهداء


و ان شاء الله ما هنسكت علي حقهم

[مـــــلك]

رحم الله شهدائنا
أستاذي الفاضل
أسلوبك شيق للغايه
وخيالك واسع
دمت مبدع ومتألق
تسلم إيدك