بجد محتااااااجة مساعدتكوا....ممكن؟؟؟

[//بنت مصر//]

السلام عليكم
مبدئيا ياجماعة
والله أنا عضوة هنا معاكوا ع المنتدى
بس مش ينفع أكتب بعضويتى الأصلية اللى عارفينى بيها
بس بجد محتاجة رأى كل واحد فيكوا
وافتكروا يا جماعة أنى ممكن أكون ساعدت حد فيكوا بعضويتى الأصلية
ودلوقتى بجد محتااااجة مساعدتكوا ورأيكو

أنا حصلى موقف فى الكلية مدمر أعصابى
الحكاية أنى باخد مجموعة فى الكلية فى مادة هى عقدة سنة اولى
والدكتور اللى بناخد معاة بيبدأ شرح فى مكان صغير الساعة اتنين الضهر
ونظرا لأن العدد كتير جدااااا والمادة عملية أكتر ولازم تشوف وتسمع
مش تكتفى بالسمع بس
فأنا بفضل واقفة قدام باب المجموعة من قبلها بنص ساعة عشان أقعد فى مكان كويس
النهاردة كنت من الساعة 1.15 قدام المكان بس كان مقفول عشان كان فى ناس قبلينا
فضلت قاعدة وشوية وجت بنت أعرفها معرفة سطحية
خمس دقايق وجة ولد أعرفة شكلا أنة معانا فى المجموعة
والله حتى اسمة مكنتش أعرفة
وبعد تلت ساعة جت الست اللى بتنظم دخول المجموعة
وقالت محدش هيدخل من غير كارنية المجموعة !!!!!!
أنا كان معايا الكارنية بتاعى....بس مش حاطة صورتى علية
لاقيت البنت بتقولى بما أنك مش حاطة صورتك فاديلة الكارنية بعد ما تتدخلى عشان يدخل
لأنة كدة مش هيلحق مكان
أنا بصيتلها وسكت
بس قعدت أفكر
هو جاى بدرى......وهو معانا فى المجموعة(يعنى مش نصاب)
وحرام ميدخلش أو يدخل متأخر عشان واحدة بتعاملنا بالأسلوب الروتينى دة
المهم بصيتلها وسكت
ولما دخلت ندهت عليا.....اترددت شوية
فقولت حرام عليا دة مذنب من أكتر من نص ساعة
فأديتها الكارنية
وطبعا لأنى أول مرة أعمل كدة فالست لاحظت دة
ويلهوى ع اللى حصل
فين فلانة؟؟!!!,,,,,,استنينى هنا لحد أما أدخل زمايلك
وأنا قولها هما اللى قالولى أنا مليش دعوة
وهى تزعق فيا قدام الناس
البنت دخلت عاااااااادى ولا كأن الأمر يعنيها
والولد مدخلش لأنة مش معاة الكارنية
والله يا جماعة ربنا العالم انى عمرى ما كلمت أو قعدت جنب ولد فى دفعتنا
وكل زمايلى بنات
يقوم يحصل كدة
طب الناس الواقفة تقول اية؟؟؟!!!
بديلة الكارنية لييييييييية؟؟؟!!!!
لو بنت كان الموضوع هين بالنسبة ليا
أنا والله قصدى خير مش أكتر.....والولد دة معرفتش اسمة غير بعدين
الولد استنى لما الدكتور جة واكتفى بكلمة آسف ودخل عاااااااادى
وكذلك البنت
أنا اللى فضلت دماغى تودى وتجيب
وعيطت أكتر من تلت ساعة.....ومكنتش ناوية أحضر المجموعة لولا الدكتور قالى مش ماشية
دخلت غصب عنى ووشى أحمر من العياط
لاقيت البنت قاعدة عااااادى
ومكلفتش نفسها إنها تحجزلى جنبها حتى!!!!!!!
وفضلت واقفة أكتر من ساعتين
وحاسة ان الكل بيبصلى وبيفكر فيا وحش
مع أنى حتى لما صحابى كانوا يحكولى على بنات وولاد بينهم علاقات
والله كنت أقول ملناش دعوة.......يمكن أخوات ....ربنا يهديهم
لما رجعت البيت حوالى ساعتين عياط
وعندى امتحان ومش قادرة أفتح كتاب...دة غير الإرهاق نتيجة وقفة ساعتين.......وأساسا أنا مكنتش فطرت الصبح فأغمى عليا فى المترو
تعبانة وقرفانة من نفسى
احساس رهيييييييب بالغباء والعبط الهبل
عاوزة أخنق نفسى بجد
وافتكرت كلمة أخويا الكبير ليا مرة
(متخافيش على مصلحة الناس قوى كدة لأنهم مش هيخافوا على مصلحتك زى ما بتعملى معاهم)
أعمل اية بالله عليكوا؟؟؟؟
وهو أنا منظرى بقى وحش أوى كدة؟؟!!
أنا مخنوووووووووووقة جدااااااا