الجنيه بَلَّغ فرار

[aymaan noor]

الجنيه بَلَّغ فرار

الأستاذ على إبراهيم السايس

«بيسألونى عن الدولار .... إيه حكايته فى كل دار؟
هوه عملة أمريكية .... إيه علاقته بالدينار؟
الجنيه المصرى عايم .... واللا ساقط فى القرار؟
كان بمدنة عالية جدا.... حطموا منها الجدار
والفقير بيشد شعره .... ارحمونى م المرار
الفاتورة غالية جدا .... فى الفلافل والسولار
السبب واضح يا صاحبي .... دى حقيقة مش هزار
كنا بنصدر حرير .... اقتصادنا كان فنار
كنا ناكل قمح غيطنا .... كنا سلة للثمار
اسألوا كتب التاريخ .... كنا رواد العمار
النهارده إيه جرالنا .... قرشنا فقد الوقار
وسط أهله وسط ناسه .... يرفضوه حتى الصغار
الحكاية مرة ثانية .... والسبب فيها «نزار»
ابن خالتى الحاجة «زاهية» .... اللى مُلسن فى الحوار
كان بيحلق بالدرة .... والنهاردة بالدولار
كان بيطبخ بالكانون .... والنهاردة بالبخار
كان بيركب الحمار .... والنهاردة عنده كار
عقدة الخواجات فى دمه .... غاوى تغيير المسار
نفسه يلبس من باريس .... أمله يكسب من لاجار
كل ده محتاج لعملة .... بس صعب يا «نزار»
الدموع ما ترد ميت .... الجنيه بلغ فرار».

[aymaan noor]

«الطمَّاعين م البشر .... صنف كده ملعون
الياما ف إيدهم شويَّه .... ولو بكاوى قارون
بحر الجشع عندهم .... مالوش حدود وقانون
هُمَّه أساس البلاوى.... والأذى فى الكون
لو السما مطَّرت .... لولى مع مرجان
تلقى النفر منهم .... يشكى: «أنا غلبان»
ولو بيزرع.. .... فى خُمسميت فدَّان
فيها العنب والتين .... أشكال مع ألوان
وفيها قمح ودرة .... وألوف من التيران
ورغم كل الغِنى .... يُصرخ: «أنا الحيران»
ولو فى منصب كبير .... مكانش فى الحسبان
فيه الخدم والحشم .... فيه النعيم أطنان
وبرغم كل البريق .... والضى واللمعان
يندب فى حظَّه قوى .... ويتوَّهك تَوَهَان
ولو مراته حورية .... قوية الإيمان
ست كريمة وسخيَّة .... من خيرة النسوان
وبرغم أكل الحمام .... والأوزى والغز لان
طبع الديابة فى دمُّه .... وبالنعيم كفران
أصل الرضا فى التقى .... وخشيَّة الرحمن
ومهما كان القليل .... يكتر مع القنعان
ربَّك يبارك قوى .... للعابد العرقان
القلب طاهر نقى .... وبالإيمان عَمْران».