ممكن أستعد ازاى

[hamada966]

انا ان شاء الله السنه الجايه فى هندسه خاصه الشروق او العاشر فكنت عايز اسئل ازاى اقدر استعد يعنى هل اراجع منهج رياضه 2 و 1 كويس جدا وكل نظريات الهندسه المستويه الى درسناها فى السنين وبرضه منهج الفيزياء ولا هناخد منها حاجات بسيطه جدا و الباقى كله جديد و هل فى كورسات او مهارات معينه المفروض تبقى معايا ولا مجرد انى اركز على المهارات الذهنيه الاساسيه التحليل والاستنتاج والتفكير السريع والاستدعاء بجانب الرياضه وبالنسبه للانجليزى احفظ مفاهيم الرياضه واقرأ الفيزياء من مناهج اللغات ولا هى بتبقى مجرد مصطلحات بسيطه ممكن اذاكرها خلال السنه بدون مشاكل،واسف طولت عليكم شويه وشكرا جدا وربنا يستر

[eng.taki]

فقط استمتع بالاجازة كل ده هدوسه في الدراسة استمتع بجد
علشان متندمش انك ما فصلتش

[hend442]

لا استمتع بالاجازة لانك فى الكلية مش هاتلاقى وقت فاضى !!
بس ممكن تاخد كورس انجليزى وشوية مصطلحات كدا ولو ماخدتش عادى كلوا بيتظبط فى الدراسة
والدكاترة بيبقوا مراعيين موضوع اللغة

[Engineer ..]

زي ما الباش مهندس قالك بالظبط .. ولو إني شايف ان الحماس عند الطلبة الجدد برده هيخليه ينفذ اللي ف دماغه فأنصحه بشوية حاجات
أولاً انت تقدر تذاكر منهج اعدادي هندسة التيرم الاول بسهولة جداااااا بس المشكلة مش انك عارف او مش عارف .. المشكلة هتبقى في انك مش لاقي حاجه تذاكر منها زي ثانوي (ملزمة كاملة ومدرس بيفهمك كل حاجه) ... بس مترهقش نفسك في الأجازة ولو برده عايز تنفذ اللي ف دماغك
فهقولك هتحتاج ايه ف كل مادة
الفيزيا انت عندك خواص مادة ( موائع ) ومعادلة الإستمرارية و تطبيق قوانين الطاقة عليها وقاعدة أرشميدس واللزوجة .... تقريباً اللي انت أخدته في ثانوي في الموائع مش هيزيد عنه إلا أجزاء فنية بسيطة جداً .. بالإضافة للصوت والموجات عامة .... الجديد في الفيزيا التحامها بالرياضة

الرياضة تقريباً بتدرس الدوال الأساسية كلها وخواصها وعمليات عليها ورسمها طبعاً وتدخل علم التفاضل والتكامل بئه بإنك تدرس تفاضل كل دالة وتكاملها وتطبيقات الكلام ده
الهندسة التحليلية ... معادلات جبرية للأشكال الهندسية بإختصار كده
والجبر جديد بس جميل جداً وهتحب الرياضة عامة لأنها أجمل حاجه في هندسة بصراحة من وجهة نظري


دول الفيزيا والرياضة بإختصار برده والباقي مفهوش حاجه ماعدا الرسم الهندسي ( )

عامة احنا موجودين ان شاء الله لو عايز أي حاجه في الكلية سواء علمية أو اجتماعية
... وياريت أي استفسار تكتبه هنا http://www.thanwya.com/vb/showthread.php?t=418034

بالتوفيق وأسف للإطالة

[issac-newton]

لا داعي لأي شئ من ذلك فقط استمتع بالأجازة
العقل البشري يحتاج الى فترة راحه , خصوصا انك طالع من ثانوية عامة ريح عشان تكون فريش

[hamada256i]

لوسمحت يا جماعة هو ايه احسن كلية هندسة خاص؟؟؟؟؟؟؟
وهل هندسة خاص احسن ولا حاسب الى ومعلومات؟؟؟؟؟

[Eng.Ahmed Hagag]

تنورنا إذا دخلت الشروق إن شاء الله ..
لو اي استفسار عن الشروق أنا موجود إن شاء الله ..

[Eng.Ahmed Hagag]

وبالنسبة للأجازة ديه تاخدها راحة ولا تذاكر ولا تعمل أي حاجة لحد ماتبدأ إعدادي إن شاء الله تحياتي ..

[hamada966]

اولا شكرا لكل الباش مهندسين على التفاعل الجميل و خصوصا المهندس نيوتن الى شجعنى انى اكمل رياضه من الاول اساسا و متخفوش هقرفكم كتير الفتره اللى جايه ثانيا انا ليه عايز اذاكر شويه فى الاجازه لان بصراحه انا حاسس ان فرصه ذى كده انا ممكن ابقى مستاهلهاش و خايف لمقدرش اجارى فى المنافسه اللى هتعرضلها خصوصا بعد اللى شوفته فى الامتحانات السنه دى ثقتى اتهزت شويه وحاسيت انى لازم انمى مهارات اكتر افكر اسرع احل اسرع بشكل ادق يبقى عندى معلومات اكتر اكتر حتى من اللى بدرسه بالنسبه ليا الرياضه هى نص حياتى يمكن تفتكرنى ببالغ بس هى دى الحقيقه من ساعه ما كونت فى ابتدائى و الماده دى اكتر حاجه بحبها وببدع فيها وفى ثانوى بالذات السنه الى فاتت اضطريت انى اتعلم حاجات كتير منها لوحدى بصراحه انا فى الحصه يمكن كنت بجمع 20 او 25 % من الدرس و الباقى كله كنت بذاكره لوحدى ويمكن ده ادانى دافع اكتر انى مستسلمش و انى اكمل كنت بتعلم من اى حته واى حاجه من النت ولو حتى من مواقع اجنبيه من الكتب من الاجابات من اى ملازم من رسمه شوفتها من صحابى من اى حاجه وكنت بعمل حتى لنفسى كمان حاجات من ورق لقوانين لملاحظات ليا و حاجات للنظريات القديمه والحمد لله قدرت اكون معرفه كويسه بالمنهج واظن ان استاذى على الرغم من بعض اهماله ليا وانه حتى مراجعش معانا ولا حتى كان بيعلملنا حاجه احنا حليناها الا انه فادنى اكتر من ما ضرنى بس انا قلقان من اللى جاى خايف لاضيع الفرصه او ابقى اصغر منها وخصوصا حاجه زى كده لاننا مش اغنيا اوى ولا حاجه و لما اهلك يقرورا يساعدوك بالشكل ده بتحس انه شرف ولازم تعامله بنفس القدر من الاحترام والمسئوليه

[vampire_3ala2_16]

بيعجبني حماسكم جدااا