سكتم بكتم .... وأنا مالي

[أحمـدنجـم]

وأنا مالي ..
سكتم بكتم اوعى تبحبح .. وأنا مالي
فركش طنش فرفش رحرح .. وأنا مالي
دا انا ماشي جنب الحيطة وباب الريح
من غير تجريح..
___________ ولا ولا تلقيح..
______________________ ولا ولا تلميح
راح أسده بميت ترباس
________________ وأخبي وراه إحساس
وأنا سكتم بكتم عشتم متم .. وأنا مالي..
********
البلوتيكا ما بفهم فيها .. غير إني مواطن .
وأبويا مواطن .. وأمي الحاجة الست مواطنة
بلوتيكة ايه ابجني تجدني ..
شايل بطيخة وهمي شددني..
لا لا ولا هم دا كله تمام ..
دي التفليتة عندي حمام..
والحمام .. فيه كام بانيو وشامبو
وأنا بدل اللب بأزأز جامبو ..
واللي هينكر أو يتعكر .. ذنبه على جامبو.
سكتم بكتم عشتم متم .. هأ هأ هأ آآآآآآآآآآآآآآآآآآو .. وأنا مالي؟

********
وإن حتى رغيفي لقيته بيرطن
مصرية ملامحه
مستورد قمحه
من عند الحلوة البطة واشنطن
وعليه طوابير .. أولها في شبرا
وأخرها في لُندُن
متجبلي خمسة بربع جنيه ..
يللي قُبالي ..
هأ هأ هأ آآآآآآآآآآآآآو
وأنا مالي؟
*************
وأنا مالي إن غازي إنّازي كونازي
يطلع من بيري انّيري كونيري
يوصل للبعدا انُّعدا كونُّعدا
وهتمشي بيه الدبابة
تندهسوا بيها يا غلابة
سهل يكون المدهوس عمي
بس بذمة أمك أمي
ينفع يبقى الداهس بابا؟
سكتم بكتم عشتم متم .. وأنا مالي؟
********
أنا عايش اسعد لحظاتي
وبصيف دايماً في مارينا
وزتوني أسود كالاكاتي
مش كده يا مراتي؟
مش كده يا أولادي؟
هزوا راسكم للخلف أمام
قوموا جهزوا يلا الشنطة أوام
كفاية أخدنا كتير وملينا
هنسيب حبة للي حوالينا
مشبوكة ايدينا
وف قلب الليل
هنودع نيل
ونودع جيل
راح يديله اللي ادالي ..
سكتم بكتم عشتم متم .. وأنا مالي
*******