الدنيا دي ف جزمتك

[M.Sherif]

برغم ان الفصحي لها رونقها
و برغم عشقي لها
إلا أنني كتبتها اليوم عامية

عجبي عليك ياللي بتعشق قمر
ميت في حبه و هوا غير البشر
مهما الزمان و القدر قال كلمته
تقدر تسيب حبيبك يوم؟ ....فشر








بيقولوا يابني غرقان ليه في حبها؟
ده طريق قلبك غير طريق قلبها؟
قلت تعالوا و اقفوا مكان ما وقفت
رب القلوب ربي وبرضه كمان ربها

يوم ما الحبيبة بتضحك بيبقا يوم المني
يوميها النور يشقشق بنورك يا ربنا
و يوم حبيبتي ما تزعل ...الكون يكون زعلان
اشتاق ليوم تبتسم....اشتاق ليوم فرحنا


عجبي عليك يا زمن ..الحب ده جبار
من طين خلقنا الله.....و قلوبنا دي من نار
الطين عشان الجسد ....و النار نيران الهوي
يا قلبي سرك في بير....دانا كاتم الاسرار

الروح تروح للروح ...و العين تدوب في العين
القلب راح للقلب .....و الكيميا بين الاتنين
آمن يا عم و صدق....آمن ده همس الحب
من غير ما تفهم ليه؟ ازاي و امتي و فين؟

حمار حمار بصحيح برسيمه كل صباح
مافيش في قلبه كلام ...و قفله دون مفتاح
عايش بدون احساس ..و القلب عمره ماحب
ايه رايكم ينفعه نجيبله ميت جراح؟؟؟؟؟؟؟

مقدرش اعيش حمارنجي .....مقدرش اعيش قلة
انسان بلا احساس ....و مريض بميت علة
مقدرش اشوف القمر........و اسكت و انام مقهور
ياللي انت غاوي الحلل..!!....اي اك تسيب حلة

عيش الحياة بقلبك...عيش الحياة ببسمتك
القلب ده قلبك.....و الرسمة دي رسمتك
اياك تخاف م الحب ....اياك تخاف م الهوي
الحب فوق راسك....و الدنيا دي في جزمتك

يا عم صبرك شوية.....الدنيا مش كده قفش
حس بطعم الحياة ......بيتك و لو بلا عفش
استمتع بكل حاجة.....و حتي لو متعبة
الحب طعمه جميل ......يهبش في قلبك هبش

ضحكت ضحك عجيب....من رسمة الاقدار
ضحكت ضحك كتير...و الضحك ده أسرار
سااعات بنضحك فرحة.....و ساعات بنضحك بلا
شر البلية يا قلبي .......و الوقعة للشطار