اهلا وسهلا بك فى بوابة الثانوية العامة ... سجل الان

العودة   بوابة الثانوية العامة المصرية > الركن الإجتماعى > اجتماعيات طالب

اجتماعيات طالب قسم خاص بالطلاب للتعارف و تبادل المعارف و الحلول للمشكلات التعليمية

إضافة رد
 
أدوات الموضوع انواع عرض الموضوع
  #1  
قديم 04-08-2015, 01:44 PM
الصورة الرمزية ..Ginger..
..Ginger.. ..Ginger.. غير متواجد حالياً
عضو مجتهد
 
تاريخ التسجيل: Sep 2013
المشاركات: 111
معدل تقييم المستوى: 11
..Ginger.. is on a distinguished road
افتراضي زتونة الثانوية العامة ... الخلاصه ،نصائح


مرحبا بكم في الثانوية العامة
مبدئيا احب اعرفكم بنفسي انا اسمي رنا خلصت ثانوية عامة الحمد لله وبإذن الله داخلة طب بشري

عشان في ناس كانت بتسألني علي نصايح عشان الثانوية العامة فانا عملت الموضوع ده

الاول كده احب اقول اني كنت زيكو كده بدور علي نصايح للثانوية واعمل ايه واذاكر ازاي وكل حاجة
انا كنت بدور علي نصايح من وانا في تانية ثانوي الترم التاني .. كنت بقعد علي النت واجيب نوتة كدة جنبي واكتب بقي النصايح وطرق المذاكرة واحمل كتب ومذكرات من علي النت
يعني كنت سايبة مذاكرة تانية ثانوي شويه وقاعدة بشوف تالته
وتقريبا كده مفيش موضوع علي النت الا والحمد لله قريته
يعني انتو هتاخدوا بإذن الله خلاصة تجارب كل من كتب موضوعا علي النت عن الثانوية العامة وانا بردوه هحط التاتش بتاعي واقولكوا استفدت من النصيحة دي ازاي وكده يعني وهقولكوا نصايح من عندي كمان

بس ادعولي وادعوا للي كتبوا نصايح علي النت

هعملها في صورة مشاركات متتابعة عشان متصدعوش من القراية ... ممكن تجيبوا نوتة بردو تكتبوا فيها النصايح اللي عجباكوا وخلوها قدامكوا علي المكتب او اكتبوها في ورق فلوسكاب وعلقوها لو عاوزين
الموضوع ده عبارة عن 11 مشاركة هنزلهم كلهم دلوقتي باذن الله ... استنوا لما الموضوع يكمل وبعدين ردوا معلش

رد مع اقتباس
  #2  
قديم 04-08-2015, 01:45 PM
الصورة الرمزية ..Ginger..
..Ginger.. ..Ginger.. غير متواجد حالياً
عضو مجتهد
 
تاريخ التسجيل: Sep 2013
المشاركات: 111
معدل تقييم المستوى: 11
..Ginger.. is on a distinguished road
افتراضي

نبدأ بقي:
اولا: نصائح عامة كده:
1) متقولش لحد ذاكرت ايه قول: "الحمد لله ماشي الحال" عشان في ناس ممكن تحسدك وناس تانية ممكن تحبطك (وبالذات الناس اللي بيقولولك مذاكرناش عشان معظمهم خبثا وبيحاولوا يشوفوا اللي حواليهم عاملين ايه في المذاكرة عشان يبقو هما الاحسن منهم) بس اوعي اوعي اوعي تتخابث وتكدب عشان حرام اولا ثانيا الناس بتبقي عارفة الكداب وبيكرهوه جدا ثالثا ملهاش لزمة والله هو الحافظ مش الكدب والخبث

2) متذاكرش مع واحد صاحبك عشان 3/4 الوقت هيضيع وانتو بتتكلموا وبتهزروا بس ممكن تظبطوا مع بعض يعني مثلا تتفقوا تخلصوا جزء معين في اي ماده مثلا خلال وقت محدد بس طبعا وكل واحد في بيته

3) طبعا ودي نقطة مهمة جدا الصلاااااااااااااه في موعدها ويا ريت الولاد تحرص علي صلاة الجماعة في المسجد

4) الثقة في الله واقسم بالله الكلام ده مش نظري .. ربنا سبحانه وتعالي بيقول: "انا عند ظن عبدي بي" وعايزة اقولكوا اني كنت حاسة ان ربنا هيكرمني حتي وانا بعيط من القلق والخوف كنت من جوايا حسه ان ربنا هيكرمني اوي والحمد لله انا مكنتش اتوقع اني اجيب المجموع ده

5) الدعاء وقراءة القران ... حاول تبقي قريب من ربنا علي طول ومش بس عشان الثانوية ده طول حياتك

6) وانت في الدرس لاااااااااااااااازم تبقي قاعد مركز ولو مش ناوي تركز متروحش احسن ... هتروح الدرس تتعدل كده علي الكرسي وتبقي متابع المدرس ومركز معاه مش قاعد بتتكلم مع صاحبك وبتتناقش معاه هتروحوا تلعبوا بلاي ستيشن في انهي سايبر

7) بمناسبة البلاي ستيشن لو ناوي تاخد فلوس الدروس وتروح تلعب بيها بلاي ستيشن يبقي ابشرك انت كده حطيت رجلك علي اول طريق الضياع ... مش عشان رايح تلعب (انا كنت بخرج مع صحباتي عادي علي فكرة اللي هو بالنسبة للولد بيعادل لعب البلاي ستيشن) لكن عشان انت خدعت باباك ومامتك ودي تعتبر سرقة بالنسبالي بصراحة .... عايز تروح تلعب خلص المذاكرة اللي وراك وقول لباباك انا خلصت اللي ورايا وعايز انزل شوية هات فلوس عشان العب بيها بلاي ستيشن (الصراحة راحة بردو )

8) ساعة المذاكرة الموبايل يتعمل silent او يتقفل خالص

9) ذاكر اول بأول واوعي تدخل حصة وانت مش مذاكر اللي قبلها

10) ابعد عن اي صاحب ممكن يعطلك عن المذاكرة ... هيضيعك وانت اللي هتتقهر بعد كده

هكمل المشاركة الجاية بقي
رد مع اقتباس
  #3  
قديم 04-08-2015, 01:47 PM
الصورة الرمزية ..Ginger..
..Ginger.. ..Ginger.. غير متواجد حالياً
عضو مجتهد
 
تاريخ التسجيل: Sep 2013
المشاركات: 111
معدل تقييم المستوى: 11
..Ginger.. is on a distinguished road
افتراضي

يلا نكمل:

11) اوعي تبص لغيرك ذاكر ايه وخلص ايه اهم حاجة تعمل اللي عليك وتتقي الله في شغلك

12) التفكير ان العباقرة هيجيبوا مجاميع عالية وان انت جنبهم ولا حاجة عبارة عن جريمة ممكن تخليك تفقد الامل

13) لو ريحت اسبوعين تلاتة يبقي كده شكرا ... عقبال ما تبدأ تلم نفسك تاني هتبقي مش عارف تبدأ منين وتروح فين

14) الثانوية العامة فرصه هتحدد مسار حياتك كلها خليها ذكري جميله عندك

15) استعين علي قضاء حاجتك بقضاء حاجات الناس ... يعني لو واحد صاحبك مش فاهم حاجة وانت فاهمها اشرحهاله واحتسب اجرك عند الله عشان يكرمك

16) متصدقش اللي بيقولوا مذاكرناش ... دول دحيحة (الغالبية العظمي منهم يعني وانا قابلت ناس كده والله)

17) لما تيجي تخرج مع صحابك .. اخرج في يوم يكون عندك فيه درس واحد عشان متبقاش ضيعت اليوم كله برة البيت من غير مذاكرة

18) لو هتسألني عن رأيي تخلي الدروس كلها مع بعض في 3 او 4 ايام ولا توزعها علي الاسبوع هقولك انا رأيي في الاول خليها متوزعة لكن ساعة المراجعة بقي وكده خليهم مكدسين مع بعض عشان انت ساعتها هتبقي محتاج تقعد في البيت من اول اليوم لاخره عشان تلم اللي وراك لكن في الاول خليها متوزعة عشان تعرف تذاكر كل ماده في يومها وكدة بس براحتك بردو دي اراااااااء

19) متتعبش نفسك في السهر وكده من الاول ... الكلام ده جاي جاي بس متأخر حبه

20) لو بتعرف تصحي الفجر تصلي وتبدأ مذاكرة يبقي ممتاز "البركة في البكور" ... لو مبتعرفش وبتعرف تذاكر بليل يبقي ذاكر بليل (اعمل اللي يريحك انا كان نفسي اصحي الفجر وابدأ اذاكر بس للأسف مكنتش بقدر فكنت بذاكر بليل )
رد مع اقتباس
  #4  
قديم 04-08-2015, 01:48 PM
الصورة الرمزية ..Ginger..
..Ginger.. ..Ginger.. غير متواجد حالياً
عضو مجتهد
 
تاريخ التسجيل: Sep 2013
المشاركات: 111
معدل تقييم المستوى: 11
..Ginger.. is on a distinguished road
افتراضي

ثانيا: نصائح المذاكرة بقي:

1) كل اسبوع كتابة paragraph وموضوع تعبير بالتبادل ... دي حاجة مفيدة علي فكرة

2) حفظ كلمات للترجمة .. لو المدرس بيديك كلمات او لوهتحفظ لوحدك من مذكرة معاك او هنا علي البوابة مثلا

3) مذاكرة بدون حل = صفر ، لازم تحل كتيييييييييييير في اي مادة

4) المذاكرة تكون من كتاب المدرسة او ملزمة او كتاب خارجي مطابق ليه

5) متقولش درس صعب هو انت كنت ذاكرته عشان تعرف وبعدين ما هو لازم يبقي صعب ما هي حاجة انت اول مرة تعرفها بعد كده هيبقي تافه

6) وانت بتذاكر يبقي جنبك ورقة فلوسكاب، تكتب فيها الاسئلة اللي مش عارفها وتروح تديها للمدرس بتاعك

7) لو في حاجة محتاجة تتحفظ ممكن تسجلها وتسمعها في اي وقت (في الموصلات، وانت بتروق اوضتك ...كده يعني)

8) ماتبقاش مهمل في مذاكرتك وتشتغل علي ماده اكتر من التانية لمجرد انك بتحبها او لأنها تقيله علي قلبك

9) ما تحددش وقت معين للمذاكرة لما تخلص قوم

10) ثبت كتاب واحد للمذاكرة يكون مطابق لكتاب المدرسة لكن الحل افتح براحتك ... بس خلي بالك ساعات في كتب بتكتب معاني اكتر من التانية او مواطن جمال او كده ممكن بقي تزودها في الكتاب او المذكرة اللي انت بتذاكر منها

11) لو غلط في سؤال او مسألة متبقاش دي حاجة تهدمك .... بس تخليك تتمرن علي حلها

12) خلي المعلومة دي في دماغك: المعلومات تفقد خلال 24 ساعة، لو اتراجعت بعدها تفقد خلال اسبوع، لو اتراجعت بعدها تفقد خلال شهر لو اتراجعت بعدها تفقد خلال 6 شهور، لو اتراجعت بعدها عمرها ما تتنسي

13) شرب الماء اثناء المذاكرة يزيد الاستيعاب

14) المكسرات والموز والشيكولاتة بتدي طاقة عشان تذاكر ... بس متكترش عشان متتخنش

15) لازم اتقان كل جزئية علي حدة مهما كان صغرها

16) عشان تعرف تحفظ قسم المعلومات الكبيرة لمعلومات صغيرة وسهلة الحفظ واربط بين المعلومات وبعضها

17) لو في حاجة انت مش فاهمها كويس من المدرس بتاعك النت واليوتيوب مليانين مدرسين ومذكرات شوف اللي عاجبك فيهم والبوابة هنا فيها مذكرات كويسة بردو
كفاية كده دلوقتي
رد مع اقتباس
  #5  
قديم 04-08-2015, 01:49 PM
الصورة الرمزية ..Ginger..
..Ginger.. ..Ginger.. غير متواجد حالياً
عضو مجتهد
 
تاريخ التسجيل: Sep 2013
المشاركات: 111
معدل تقييم المستوى: 11
..Ginger.. is on a distinguished road
افتراضي

ثالثا: معوقات المذاكرة وطرق حلها:
1) الزهق: الحل تغيير شكل الاوضة بتاعتك يعني مثلا هات السرير مكان الدولاب ، المكتب مكان الكنبه كده يعني وكمان الترفيه بين المواد بيعالج الزهق

2) السرحان: الحل المذاكرة بصوت عالي وبدء المذاكرة بالاصعب (بس انا مش واثقة في موضوع بدء المذاكرة بالاصعب ده ... علي العموم جربوا)

3) عدم الرغبة في المذاكرة: الحل تذكر الهدف اللي نفسك تحققه وتذكر يوم النتيجة

4) النسيان: الحل تكرار الحفظ والمراجعة واستخدام اسلوب الكتابة ومتذاكرش وانت مجهد عشان المذاكرة بتبقي زي قلتها

حته كده : يوم النتيجة الفرق بين اللي ذاكر واللي اهمل زي اللي دخل الجنة والنار .... اللي في الجنة مع اول لحظة فيها نسي كل لحظة ألم وتعب، واللي في النار مع اول لحظة فيها نسي كل لحظة فرح وسعاده عاشها
(مش فاكرة مين اللي كان كاتب كده بصراحة بس هو كلامه صح مليون% )
رد مع اقتباس
  #6  
قديم 04-08-2015, 01:51 PM
الصورة الرمزية ..Ginger..
..Ginger.. ..Ginger.. غير متواجد حالياً
عضو مجتهد
 
تاريخ التسجيل: Sep 2013
المشاركات: 111
معدل تقييم المستوى: 11
..Ginger.. is on a distinguished road
افتراضي

رابعا: طرق مختلفة للمذاكرة:
اختار اللي يعجبك منها واشتغل بيه

1) تخيل انك معيد وبتشرح للناس وبتحاول تفهمهم كل جزئية

2) استخدم الكتابة للحفظ الجيد (انا بحسها ساعات بتضيع وقت بس في ناس بتأكد ان دي احسن طريقة للحفظ بس جربوها ولو لقيتوا نفسكوا بتحفظوا كده يبقي كملوا بيها ومش هتبقي تضييع وقت ... احسن ما تضيع وقت وانت عمال كل شوية تكرر في حفظ نفس الحاجة)

3) لحن المعلومات واعمل اغاني (في قانون كده في الكيمياء اسمه law of mass action انا كنت لغات تقريبا بالعربي اسمه قانون فعل الكتلة .. القانون ده انا محفظتوش غير لما عملته اغنية jingle bells )

4) استخدم المرح والتهييس (مثلا: بكتيريا ايشيريشيا كولاي انا كنت بفتكرها ب ايشواريا راي الممثلة الهندية )

5) استخدم الخرايط الذهنية .. دور عليها في النت وشوف بتتعمل ازاي

6) جمع الحروف من اول الكلمات اختصار يعني (مثلا: فسفور نيتروجين منجنيز حديد نحاس نيكل تبقي فن محن نيكل ) وممكن تعملوا كده في الحاجات اللي ليها خطوات

7) ارسم المعلومات اللي فيها وصف (بالذات في الايام و prisoner of zenda )

8) قسم المعلومات الكبيرة لمعلومات صغيرة

9) استخدم طريقة الالوان والمسح الشامل
أ- اقرا الموضوع قراية سريعة بدون تركيز
ب- لون العناصر الرئيسية والفرعية
جـ- اقرا الموضوع قراية بطيئة بتركيز وفهم
د- اقرا الورق مرة كمان سريعا
رد مع اقتباس
  #7  
قديم 04-08-2015, 01:52 PM
الصورة الرمزية ..Ginger..
..Ginger.. ..Ginger.. غير متواجد حالياً
عضو مجتهد
 
تاريخ التسجيل: Sep 2013
المشاركات: 111
معدل تقييم المستوى: 11
..Ginger.. is on a distinguished road
افتراضي

خامسا: الكتب الخارجية:
طبعا دي اراء وبتختلف من حد للتاني فأنا هتكلم عن الكتب اللي انا شايفاها مهمه من وجهة نظري

- العربي: كتاب الرساله و الامتحان للحل

- الانجليزي: انا كنت بستعمل كتاب واحد وهو Surprise بس لو عايزين كتاب كمان سمعت ان Senior حلو

- الفرنساوي: Genial كفاية اوي اصلا بينزل كتب كتير جدا سواء اول السنة او ساعة المراجعة

- الكيمياء: لو عربي الامتحان وتقريبا مندليف حلوين ... لو لغات el-moasser و supervisor

- الفيزياء: لو عربي الامتحان وللتدريب الوسام ... لو لغات sami book و el wessam بتاع الغات

- الأحياء: لو عربي الامتحان والاول 2500 سؤال ... لو لغات sami book ومعرفش في حاجة تاني ولا لأ عشان انا كنت معرباها

-الجيولوجيا: الامتحان ولو عايزين كتاب كمان يبقي كشكول الاول

- الرياضة: انا كنت علمي علوم بصراحة بس صحابي كانوا بيجيبوا لامي ومعرفش في حاجة تانية ولا لأ

- أدبي: انا اسفة معرفش عشان محدش من صحابي كان ادبي

اوعوا تنسوا كتاب المدرسة ودليل التقويم .... مهمين جدا
رد مع اقتباس
  #8  
قديم 04-08-2015, 01:53 PM
الصورة الرمزية ..Ginger..
..Ginger.. ..Ginger.. غير متواجد حالياً
عضو مجتهد
 
تاريخ التسجيل: Sep 2013
المشاركات: 111
معدل تقييم المستوى: 11
..Ginger.. is on a distinguished road
افتراضي

سادسا: المواد بقي :
ارجع كده للنصيحة رقم 10 في نصايح المذاكرة وخليها في دماغك علي كل ماده ولما تيجي تزود معلومة ممكن تكتبها في ورقة وتدبسها في الكتاب او المذكرة

العربي :

1)الأدب: يتحفظ من اول السنة ويتذاكر من كتاب المدرسة لازم من كتاب المدرسة ممكن تذاكره علي هيئة سؤال وجواب تعمل انت السؤال علي الفقرة او تحفظه زي ما هو كده وانا بفضل الطريقة دي عشان متثبتش في دماغك شكل واحد للسؤال وكمان ممكن تعمله بالخرائط الذهنية

2) القصة والقراءة: تقرا القصة نفسها وتمسك فقرة فقرة وتشوف الاسئلة اللي ممكن تيجي عليها حتي لو اسئلة هبلة وتحفظ المعاني والجمع والمفرد والمضاد ومتستهترش بيهم عشان دول اللي بيوقعوا الناس في الامتحان ... حاول ترسم اي حاجة فيها وصف في القصة هتسهل الموضوع جدا وانته تعرف ليه بعد كده لما تاخد القصة

3) النصوص: احفظ النصوص الحفظ وطبعا تهتم بالمعاني والمفرد والجمع والمضاد ... تعليق النصوص يتذاكر من كتاب المدرسة وممكن تعمله سؤال وجواب (علي فكرة التعليق ده مهم جدااااااااااا وبيجي منه سؤال في الامتحان) .... مواطن الجمال هتذاكرها من مذكرة المدرس او الكتاب الخارجي بس الاول افتح كتاب المدرسة هتلاقي كام موطن جمال علي كام ايحاء كده احفظهم صم الاول بعدين ذاكر بقي من اللي انت عايزه

4) النحو: اهتم بكل قاعدة كبيرة او صغيرة ومتستعبطش وتقول لأ دي مش مهمة، انا في امتحان العربي غلطت في توكيد، نسيت انه ينصب بالياء ممكن يجيلك واو الجماعة عادي جدا واوعي تنسي الكشف في المعجم

5) التعبير: حاول تدرب كتير عشان والله امتحان العربي ده بالنسبة لأغلب الناس وقته بالظبط متفتكرش ان 3 ساعات دول كتير في ناس مش بتلحق تخلص ... لو قالك مثلا ثورة 25 يناير ورد فعلها علي المجتمع يبقي هتتكلم في حاجتين اساسيتين: الثورة ورد فعلها وفي علي اليوتيوب فيديو بعنوان " كيف تكتب 40 سطر في ربع ساعة " شوفوه


الانجليزي :
باختصار كده تحفظ كلمات للترجمة ... تكتب paragraph ... اقرا القصة كويس واعملها سؤال وجواب وارسم الحاجات اللي فيها وصف وخلي بالك مين اللي بيقول الجملة ... كل يوم ترجملك جملة كده او اتنين ... اهتم بالقواعد وحل عليها ... اتدرب علي ال speakers و ال situations والقطع ... حل كتييييييييييييييير

الفرنساوي :
الجرامير مهم جدا ... احفظ الكلمات المهمة والمواضيع ... حل كتييييير ... افهم ال document ... ذاكره ومتهملهوش
عارف الاسئلة مين بيقول ايه وفين وكده .. ايوااا دي بقي محتاجة حد فاهم الجملة برد واو علي الاقل الكلمة اللي هتميزها
الفرنساوي تافه علي فكره

الفيزياء :
سهلة علي فكرة مش بعبع ولا حاجة ... لااااااازم تكون فاهم ... افكارها هتتلم بكتر الحل علي مدار السنة ... احفظ اللي محتاج حفظ ... النظري عليه درجات اكتر من المسائل بكتير فمتهملش النظري ... تتذاكر اول باول ( واي مادة تتذاكر اول بأول) ... ممكن تثبت كتاب بتحله ورا المدرس اول باول التمرين من اوله لأخره وكل 3 ايام تروح تحل من كتاب تاني صفحة وهتكون عديت الدرس ده بمراحل مع المدرس بس اهو تبقي بتذاكر الجديد وبتحل القديم

الكيمياء :
مادة خفيفة ما عدا العضوية تقيلة شويه ... معظمها حفظ ما عدا العضويه محتاجة فهم والفصل الاول مسائل محتاجة فهم طبعا ... ذاكر الدرس من كتاب المدرسة افضل حاجة وممكن تعمل اسئلة علي كل جزء ... الخرائط الذهنية ممتازة في العضوية ... تحل وبعد ما تخلص تراجع من الاجابات لو لقيت سؤال غلط ترجع تذاكره تاني مقتنع باجابتك روح اسأل المدرس ... ممكن تجمع المعادلات في ورقة وتراجع عليهم كل يوم الصبح قراية كده عشان العضوية بتتنسي بسرعة جدا

الأحياء:
مادة ممتعة جدا ... حاول تفهم مش تحفظ وخلاص ... تقريبا الوراثة اتشالت من عندكو ... بتتنسي بسرعة فتتراجع علي طول ... متنساش تحفظ الرسومات الحفظ اعملها في سكتش ... حل كتيرعشان متنساش

الجيولوجيا :
عندما يكون للحفظ عنوان ...محستهاش عايزة ذرة فهم لو المدرس عرف يخليك تفهمها يبقي خير وبركة معرفش يبقي احفظها زي اخواتك (اللي هما احنا) ... متنساش تحفظ الرسومات اعملها سكتش هي كمان ... دي بقي مش بتتنسي دي بتتبخر من الدماغ كده فلازم تحل كتير وتراجع كتير

خلصنا المواد الحمد لله
رد مع اقتباس
  #9  
قديم 04-08-2015, 01:54 PM
الصورة الرمزية ..Ginger..
..Ginger.. ..Ginger.. غير متواجد حالياً
عضو مجتهد
 
تاريخ التسجيل: Sep 2013
المشاركات: 111
معدل تقييم المستوى: 11
..Ginger.. is on a distinguished road
افتراضي

سابعا: تمرين لزيادة نشاط العقل (التمرين ده حلو جدا علي فكرة):

اجلس علي كرسي مريح وخذ نفس عميق وتخيل ضوء الشمس البرتقالي الجميل وهو يغمر جسمك بالنشاط والطاقة والانطلاق والايجابية
اغمض عينيك وتخيل الشمس الجميلة وهي تبتسم لك وتمد كل خلايا جسمك بالطاقة والنشاط وتخيل جو رائع مشحون بالصحة ومغمور بالسعادة والطاقة والمعرفة والعلم
خذ شهيق من الانف ببطء شديد وعميق وتخيل الهواء الجميل الملون باللون البرتقالي الرائع يتخلل عقلك ويغمره بالمعرفة والعلم والقوة والقدرة علي الحفظ والاسترجاع
وتخيل كل خلايا عقلك وهي تمتص من الهواء اقصي طاقة ونشاط وتركيز وأداء عقلي راقي وتخيل لحظة الفرحة بالنجاح وزغروطة حلوة بترن في ودنك وحضن اهلك وحبايبك وهما بيجروا عليك وفرحانين لحظة اعلان نتيجتك
رد مع اقتباس
  #10  
قديم 04-08-2015, 01:56 PM
الصورة الرمزية ..Ginger..
..Ginger.. ..Ginger.. غير متواجد حالياً
عضو مجتهد
 
تاريخ التسجيل: Sep 2013
المشاركات: 111
معدل تقييم المستوى: 11
..Ginger.. is on a distinguished road
افتراضي

ثامنا كلمة الدكتورة / lally adel اللى قالتها لواحدة من دفعة 2014 هنا علي البوابة :

- الدرجة اللي هتجيلك دي هي تقييم ربنا لمجهودك وتعبك ... المصحح ما هو الا اداة ممكن يتعمي عن غلط قدامه وممكن يشوف الصح غلط لنفس السبب.
- كل واحد في ثانوية بالذات بياخد علي اد تعبه واللي بيتعب اوي باخلاص ربنا بيكرمه وبيعامله بفضله لا بعدله.
- هتلاقي تعبك في الورقة وانتي بتجاوبي اخر السنة، لو تعبتي في مادة ربنا هيديكي فيها اكتر ما انتي متوقعة، ولو متعبتيش في مادة مش هتلاقي حتي لو حليتي كويس .... لو اجتهدتي في مادة 90% هتجيبي فيها 90% ولو اجتهدتي 95% هتجيبي 95%، وربنا بقي اعدل من الكل بيسخر المصححين عشان يحققوا عدله ده
- خلي ثقتك في ربنا كبيرة اوي، وانتي مش عليكي اكتر من انك تتعبي وتتبهدلي وتبذلي قصاري جهدك والتوفيق من عنده هو بس، وهتعرفي المعني الحقيقي للتوفيق جوه اللجنة بجد
(الكلام ده من اروع الكلام اللي اتكتب عن الثانوية العامة وانا كتبته عندي في النوته تحت عنوان "دعوة للتفاؤل والحذر")
رد مع اقتباس
  #11  
قديم 04-08-2015, 01:58 PM
الصورة الرمزية ..Ginger..
..Ginger.. ..Ginger.. غير متواجد حالياً
عضو مجتهد
 
تاريخ التسجيل: Sep 2013
المشاركات: 111
معدل تقييم المستوى: 11
..Ginger.. is on a distinguished road
افتراضي

أخيرا:
طبعا الموضوع ده نصايح انا اللي قايلاها ونصايح ناس كتير جدا وهتلاقوا شويه من كلامي مقتبس من مواضيعهم لأن انا كنت مسجلاه بالنص في النوته بتاعتي

عايزة اقول شكرا لكل من كتب موضوع عن الثانوية العامة وطرق المذاكرة علي النت لأن انا استفدت من كل المواضيع عشان انا في الغالب قريتهم كلهم وفي ناس كتير علي البوابة هنا كتبوا مواضيع ومشاركات وعايزة اقولهم شكرا زي:
dr.lally adel ، ابانوب ايليا ، dark man ، only forward ، lolodody2010 ، never give up وناس تانية بس انا أسفة مش فاكرة الأسامي

وفي ناس من بره المنتدي هنا وانا معرفش ينفع اقول اسم المنتدي التاني ولا لأ بس الناس دي زي:
د/ شيرين ، doc doody ، new vet ، جنة التفاؤل ، tanna443 ، توتة القطقوطة5

واتمني من الله ان الموضوع ده يفيد كل اللي داخلين ثانوية عامة زي ما الناس دي فادتني
رد مع اقتباس
  #12  
قديم 05-08-2015, 04:19 AM
أمــلــي فــ ربنـــا كبيــــر أمــلــي فــ ربنـــا كبيــــر غير متواجد حالياً
طالبة بكلية الطب البشري جـامعـة المنصورة
 
تاريخ التسجيل: Jun 2014
المشاركات: 1,230
معدل تقييم المستوى: 11
أمــلــي فــ ربنـــا كبيــــر is on a distinguished road
افتراضي

موضوع جميل
جزاكي الله كل خير وان شاء الله طلاب السنادي يستفيدوا
تم التقييم للموضوع
__________________
مليش غيـــر ربــي ~
رد مع اقتباس
  #13  
قديم 05-08-2015, 06:39 AM
Mohamed Shawky99 Mohamed Shawky99 غير متواجد حالياً
طالب بالصف الثالث الثانوي ( علمي ريـــاضة )
 
تاريخ التسجيل: Apr 2015
المشاركات: 274
معدل تقييم المستوى: 9
Mohamed Shawky99 is on a distinguished road
افتراضي

موضوع جمييييل جداا .. انا داخل تانية ثانوي و بجد استفدت منه اوي
رد مع اقتباس
  #14  
قديم 05-08-2015, 09:45 AM
الصورة الرمزية سلمة بن الأكوع
سلمة بن الأكوع سلمة بن الأكوع غير متواجد حالياً
‏‎Faculty Of Pharmacy, Beni suef University‎‏
 
تاريخ التسجيل: Sep 2013
المشاركات: 838
معدل تقييم المستوى: 11
سلمة بن الأكوع will become famous soon enough
افتراضي

جزيتم خيرا ..
رد مع اقتباس
  #15  
قديم 05-08-2015, 10:53 AM
الصورة الرمزية محمدخالدفتحي
محمدخالدفتحي محمدخالدفتحي غير متواجد حالياً
أستاذ جامعي في كلية العلوم جامعة عين شمس
مستشار مادة الفيزياء
 
تاريخ التسجيل: Sep 2014
المشاركات: 1,332
معدل تقييم المستوى: 11
محمدخالدفتحي is on a distinguished road
افتراضي

اقتباس:
المشاركة الأصلية كتبت بواسطة أمــلــي فــ ربنـــا كبيــــر مشاهدة المشاركة
موضوع جميل
جزاكي الله كل خير وان شاء الله طلاب السنادي يستفيدوا
تم التقييم للموضوع
الحمد لله على كل حال
رد مع اقتباس
إضافة رد

العلامات المرجعية

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


جميع الأوقات بتوقيت GMT +2. الساعة الآن 12:31 AM.