ثورة 2072 ثورة الشورما

[تامر الطويل]

هذه القصه من وحى خيالى وليس لها علاقه بالواقع


ثورة 2072 ثورة الشورما


امام ميدان التحرير وقف مجموعه من الشباب وهم يحملون لافتات ويهتفون ، يسقط يسقط النظام ، يسقط يسقط كل جبان ، ومن بعيد تقدم مذيع قناه العالم وسأل مجموعه من الشباب عن سبب نزولهم ميدان التحرير ، فإندفع شاب وسيم يرتدى جاكت اسود وقناع بلياتشو وقال له
الشاب / احنا نزلين النهارده علشان نسقط النظام
المذيع / الاول عرفنا بنفسك
الشاب / لاء ياعم أحسن الجماعه إياهم تعرفنى
المذيع / ولما انت خايف منهم قوى كده نزلت ليه
الشاب / انا نزلت النهارده علشان اعرف الحكومه والنظام ان البلد دى لسه فيها رجاله ، وهتعرف ازى تجيب حقوق الشعب ده ، وبرضه علشان مبقاش كداب انا نزلت علشان البنت سوسو رهنتنى انى مقدرش انزل الميدان مع الثوار ولا اقف فى وش الداخليه والنظام ، وانا من خلال البرنامج بتاع حضرتك احب اقولها ، اهوة ياسوسو نزلت ولا همنى وبقيت راجل ومش عيل فرفور زيئ ماقولتى عليا
المذيع / فرفور ايه ورهان ايه خلينا فى موضوعنا ، لو سمحت حضرتك ، انت قولت انك نزلت النهارده علشان تطالب بإسقاط النظام ، ممكن نعرف السبب ؟
الشاب / هو حضرتك مش عايش فى البلد دى ولا ايه ، فى مليون سبب حضرتك ، اولها الحكومه العظيمه منعت الشورما والهوت دوج وقال ايه عيزنا نشرب مايه من الحنفيه وده حضرتك ليه ، علشان هيمنعو المياه المعدنيه ، تخيل حضرتك الظالمه هيمنعو المايه المعدنيه
المذيع / يعنى حضرتك نازل النهارده علشان مطلبين اولهم الشورما والهوت دوج وثانيا المياه المعدنيه
الشاب / مش بس كده حضرتك
المذيع ، امال فى ايه تانى ؟؟
الشاب / البنت جيجى اخت الواد كوكى انتيمى كل ماتشوفنى بتقولى ياعيل ، وانا النهارده من مكانى ده وسط الثوار فى الميدان ومن خلف قناعى احب اقولها اهوة ياجيجى بقيت راجل بالعند فيكى ومشيت لوحدى من بيتنا لحد ميدان التحرير ومخفتش ياختى
المذيع / شكرا لحضرتك وياريت تلحق تروح قبل الليل مايليل ياشاطر

ويبص المذيع حوليه يلاقى شاب ماسك يافطه مكتوب عليها إنتى فينيادودى ؟ انا ميشو
فيقرب منه المذيع ويقوله

المذيع / لو سمحت ممكن اتعرف بحضرتك
ميشو / انا ميشو ياعمو
المذيع / وحضرتك النهارده نازل الميدان بتطالب ب ايه
ميشو / تقصد ايه حضرتك
المذيع / بقول لحضرتك انت نازل الميدان بتطالب ب ايه ؟ ، يعنى بتطالب الحكومه والرئيس ب ايه
ميشو / انا مليش اى مطالب عند الحكومه ، بس لو هما مصممين يبقه يدورولى على دودى
المذيع / هى كانت معاكم فى المظاهرة وإتقبض عليهامن الداخليه ومتعرفش مكانها
ميشو / لاء حضرتك ، دودى دى صحبتى انا اتعرفت عليها من على موقع صحبه نت وإتفقنا النهارده نتقابل فى الميدان ، ومش عارف ليه الميدان زحمه كده ، هو النهارده الفلنتين
المذيع /يعنى حضرتك مش من الثوار
ميشو / ثوار إيه ؟
المذيع / الثوار اللى ضدد النظام والحكومه
ميشو / لاء والله ابدا ، انت عايز تودينى فى داهيه ولا ايه
المذيع / خلاص ، خلاص انا اسف إنى سألتك
ميشو / لوسمحت حضرتك لو مفهاش إسائه أدب منى ، هو انا ممكن اطلب طلب تانى من الحكومه ؟
المذيع / إتفضل أطلب ، يعنى هى جات عليك
ميشو / حضرتك انا عايش فى المهندسين وأول إمبارح وانا قاعد فى بيتنا مع لوجى سمعنا صوت غريب على باب البيت أنا بصراحه خوفت وطلعت أجرى وإستخبيت تحت السرير
المذيع / ونعمه الرجاله
ميشو / بس لوجى حضرتك طلعت بره تشوف فى إيه
المذيع / طلعت ارجل منك
ميشو / بتقول حاجه حضرتك
المذيع / لاء ابدا بقولك كمل
ميشو / ومن ساعتها وهى مختفيه ،دورت عليها كتير ، بس من غير فايده ، فايريت الحكومه تدورلى عليها وترجعهالى انا من غيرها حاسس انى ميت
المذيع / خلاص إهدى يااستاذ ميشو انت صعبت عليا وانا بضم صوتى لصوت الاستاذ ميشو وبقول للحكومه إنتى فين ياحكومه وفين لوجى ولا إحنا خلاص بقينا فى بلد اللى يروح مايرجعش

ويبص المذيع لميشو ويقوله

المذيع / هى عندها كام سنه
ميشو / عندها 3 سنين حضرتك
المذيع / وكمان طفله اللى ضايعه ياحكومه ظالمه ، مع حضرتك صورة ليها يااستاذ ميشو علشان نعرضها فى التليفزيون يمكن اى حد من المشاهدين يتعرف عليها
ميشو / ايوة حضرتك انا معايه صورة ليها وانا شايلها ، إتفضل حضرتك


ويبص المذيع للصورة وبعدها يبص لميشو بغضب ويقوله


المذيع / ياأستاذ بقولك صورة ل لوجى
ميشو / ماهى دى صورتى وانا شايل لوجى حضرتك
المذيع / وحياه امك ، هى لوجى دى كلب يا ابن الكلب
ميشو / وليه الغلط بقه حضرتك
المذيع / غور ياجزمه ياابن الجزمه بدل مااعلقك فى الميدان ، غور ياله


ويمشى ميشو وفاجاه تيجى مسيرة من شارع الثورة وتدخل ميدان التحرير وفيهم واحد متشال على الاعناق بيهتف وبيقول


الثائر / يالى ساكت ساكت ليه منعو الكفته وناقص ايه ، هو ناقص تانى ايه الحشيش بقه بالكرنيه


وفاجاه يهجم عساكر الامن المركزى على المتظاهرين ويبدئو الضرب بخرطيم المياه والمتظاهرين العزل بيجرو فى كل حته بيحولو يستخبو من خراطيم المياه
ويلمح عسكرى الامن المركزى ميشو ماشى فى الميدان ورافح اليافطه فيرشه بخرطوم المياه
فيبصله ميشو بغضب ويقوله


ميشو / يح ، سخنو المايه شويه ياظالمه المايه ساقعه تلج يامفترين ويطلع يجرى بره الميدان


وهنا يبص المذيع حوليه يلاقى رجل عجوز قارب عمرة على ال80 فيقرب منه ويقوله


المذيع / ممكن نتعرف بحضرتك ؟
الحاج / انا اسمى امير نور الدين
المذيع / اسمك امير ، يعنى اقولك ياحاج امير ، ماعلينا ، ممكن تقولنا ياحاج امير انت نازل النهارده الميدان بتطالب ب ايه ومتأخذنيش ياعنى صحتك على قدك
امير / الثورة اللى عملها الشباب دول فكرتنى بثورة 25 يناير 2011 ، اللى عملناها زمان ضدد مبارك وشلته الحرميه
المذيع / هو حضرتك كنت من ثوار الميدان يوم 25 يناير
امير/ ايوة ياابنى و وقفنا 18 يوم فى الميدان وسط قنابل غازل وضرب من الامن المركزى وسمعنا كلام من الناس والاعلام الفلولى ب إننا بلطجيه ومخربين وعمله نزلين الميدان علشان نخرب ونهدم فى البلد ، بس صبرنا وإستحملنا كل كلامهم عننا ، ونجحت ثورتنا وطهرنا البلد من الحراميه والاقطاعين ونظام كان سيقنا بالكرباج وامن الدوله اللى مبترحمش ، وانتخبنا اول رئيس مدنى للبلاد
المذيع / هو حضرتك بعد الثورة مسكت وزاره ايه ؟
امير / وزاره البلطجه
المذيع / نعم دى وزاره جديده كانت على ايامكم واتلغت على ايمنا
امير / لاء ياابنى دى مش وزاره دى تهمه وجهت لكل شباب الثورة من النظام الحاكم اللى اخترناه علشان يحقق لنا مطالبنا ومطالب الثورة من العيش للحريه للعداله الاجتماعيه ( منهم لله قسمونا نصين وسحلونا وسجنونا ، وخلونا نشحت ونكرة ثورتنا )
المذيع / فاكر ياحاج والتاريخ مسجل كل حاجه عملوها الجماعه ، بالله عليك ماتفكرنى ده جدى لسه لحد دلوقتى كل اما يسمع سيرتهم تجيله حاله تشنج
امير / علشان كده نزلت النهارده مع الشباب الاحرار دول علشان اقف معاهم واطالب بنفس مطالبهم
المذيع / هو حضرتك عارف مطالب الشباب دى ايه ياحاج ؟
امير / اكيد زى مطالبنا زمان ، عيش ،حريه ، عداله اجتماعيه
المذيع / يخساره ياحاج فى زمنا ده مطالبنا إتغيرت وبقه كل همنا ليه الحكومه منعت الشورما وليه الحكومه هتمنع المياه المعدانيه
امير / بتقول ايه الحكومه منعت الشورما ، ياولاد الدايخه ،قولى ياابنى بسرعه هى الحكومه منعت شورما الفراخ ولا اللحمه
المذيع / وهى هتفرق ياحاج
امير / ايوة طبعا هتفرق ، اصلى بحب شورما اللحمه
المذيع / روح ياحاج وإرتاح ومتخفش شورما اللحمه بخير
ويبص المذيع للمصور ويقوله
المذيع / ياله بينا ياادهم علشان نلحق معادنا مع رئيس الوزراء


ويتجه المذيع والمصور لمكتب رئيس الوزراء وقدامه ومن خلال لقاء يقوله


المذيع / ايه رئى حضرتك فى ثورة الشباب اللى فى التحرير
رئيس الوزراء / حضرتك دول شويه عيال فاضين يعنى صيع من الاخر
المذيع / لو سمحت ياسياده رئيس الوزراء متقولش عليهم صيع دول شباب وطنين ومش صيع وليهم مطالب شرعيه ولازم الحكومه تنفذها
رئيس الوزراء / وايه هى مطالبهم بقه
المذيع / ليه الحكومه منعت الشورما
رئيس الوزراء / حضرتك ده كلام مغلوط احنا ممنعناش الشورما إحنا وقفنا إستردها من الخارج وده علشان ندعم الشورما البلدى انتاج بلدنا
المذيع / ماهو كده برضو تبقوا منعتوها ، هو فى حد عاقل ياكل شورما بلدى انتاج بلدنا ، فى طلب تانى الثوار عايزينه وهو المياه المعدانيه اللى الحكومه منعتها وصرحت اننا لازم نشرب مياه الحنفيه ونتعود عليها الفترة الجايه
رئيس الوزراء / يعنى عجبك الزحمه اللى البلد فيها ، خلى البلد تخف شويه
المذيع /وبالنسبه للعيش حضرتك اللى كل المواطنين بيشتكو منه وانه مليان مسامير واخشاب ، ايه خطتكم الايام الجايه لتطويرة وتحسينه
رئيس الوزراء / ده بقه هنلغيه خالص لانه بيكلفنا كتير جدا ، شوف حضرتك دلوقتى طن الحديد وصل كام ، ماهو مش معقول هنحط فى كل رغيف عيش حته حديده بالشيئ الفلانى وتتحمله ميزانيه الدوله ، الشعب لازم يرحم شويه ويحس بينا
المذيع / طيب حضرتك بالنسبه للمياه اللى بتستخدمها الشرطه ضدد المتظاهرين السلمين
رئيس الوزراء / يعنى حضرتك لما الحكومه تحمى المواطنين وتنضفهم ، تبقه حكومه ظالمه ومفتريه ، حضرتك دول بقالهم سنه مستحموش وريحتهم طالعت
المذيع / والله انتوا اللى ريحتكم طلعت وفاحت على الاخر
رئيس الوزراء / ازى واحنا لسه مستحمين امبارح ، انت غلطان حضرتك ، الحكومه دى حكومه نضيفه وهتفضل موجوده غصبن عن شويه العيال دول وانا هفضل موجود هنا مهما حصل


وفاجاه يدخل حرس رئيس الوزراء عليه ويقولوله ،


الحرس / يافندم لازم تتحرك دلوقتى حالا الثوار محصرين مجلس الوزراء وبيطلبو ب***ك ورئيس الجمهوريه إتنحى خلاص
رئيس الوزراء / طيب هربونى بسرعه ، من الباب الخلفى وإنشروا على كل المواقع انى مع الثوار من اول يوم وانى سبت الوزاره من اول يوم طلبو فيه الثوار ب اسقاط النظام وانى كنت ديما فى خلاف مع الرئيس والحكومه بسبب تعنتهم وإلغائهم للشورما والمايه المعدنيه ، يسقط النظام يسقط النظام ؛ انتو بتبصولى كده ليه يابهايم ماتيلا اهتفو معايه

المذيع / ياولاد ال0000000000000000


النهايه


بقلم
تامر على الطويل

امير الجروح

[لوجين20]

اله يمسيك بالخير يا امير
ايه اللى خلاك بس تسيب المنتدى
هادور فين انا ع انتاجك عشان اتابعك؟
طبعا رؤيتك المستقبلية للمشهد من سنتين يختلف عن رؤيتك السنادى
لان الموازين اختلت
وضيعت الكل مؤقتا
اتمنى اشوفك هنا تانى