مواد اولى طب بيطرى المنصورة

[Dr.Mohamed Attia]

• بيطري المنصورة ..... كليتي العزيزة
  
  رسالة من Mahmoud Osama بالاضافة للبهرات بتاعتي
  
  بالنسبة للمواد ... في الترم الاول : تشريح _ وراثة _ هستولوجي _ فسيولوجي _ كيمياء حيوية _ لغة ( انجليزي )
  
  قبل كل حاجة .. لازم تعرف ان كل مادة من دول ليها نظري وعملى عدا اللغة
  
  وبتدرس في الترم التاني نفس المواد بس بدل اللغة بتأخد احصا
  
  كل مادة من دول عليها 100 في كل ترم 50 .. بالنسبة للغة والاحصا بيكونوا من 50 علشان دول مادة ترم واحد
  
  ال 50 درجة كالآتي : 25 نظري ... 15 عملي ... 10 شفوي
  
  N.B : علشان تنجح لازم تجيب 7.5 في النظري ... افتكرها
  
  ** كيمياء حيويه ( بايو كيمستري ) هيا مادة مفيده جدا بندرسها علي تيرمين
  التيرم الاول
  عباره عن 3 اجزاء (بروتينات - كربوهيدرات - دهون)
  التيرم التاني ( فيتامينات - املاح معدنية -هرمونات انزيمات وكيمياء خلويه بتدرس تركيب الخليه )
  هيا ماده كويسه ومفيده والدكاتره بيفضلوا فيها امتحانات mcq امتحانات بيكون فيها اكمل واختياري
  
  .... بالنسبه للعملي
  بندرسه برضه علي تيرمين
  التيرم الاول بندرس الكربوهيدرات
  نظري
  جزء صغير
  والجزء التاني بيكون مجموعه من التجارب العمليه
  وبيكون في امتحان شيت للجزء النظري اللي بندرسه في العملي
  وكمان الجزء التاني من امتحان العملي بيكون التجربه العمليه
  
  ** تاني مادة معانا التشريح
  المادة دي علي تيرمين
  التيرم الاول بندرس العظام (bone) والعضلات (muscles) والجهاز العصبي والدوره الدمويه والامبيريولوجي معناه علم دراسة تطور الاجنه
  والتيرم التاني بندرس
  الجهاز التناسلي الذكري
  الجهاز التناسلي الانثوي
  الجهاز البولي
  والامبيريولوجي لكل جهاز من الاجهزه المذكوره سابقا
  
  .... بالنسبه للعملي
  التيرم الاول
  بندرس تشريح القدم الاماميه للحصان
  من عظام وعضلات
  والشرايين والجهاز العصبي
  
  والتيرم التاني
  بندرس القدم الخلفيه للحصان من عضلات وعظام والشرايين والاعصاب
  بالاضافه الي الاجهزه المذكوره سابقا
  
  *** تالت ماده.. فسيولوجي وهو علم دراسة وظائف الاعضاء
  التيرم الاول
  عباره عن 3 اجزاء
  الجزء الاول عن الخليه
  والتاني عن الدم
  والتالت عن الاحساس
  التيرم التاني
  بيتكلم عن الجهاز التنفسي والجهاز الدوري
  والدوره الدمويه
  وبيتكلم عن العلاقه بين العضلات والاعصاب
  بالنسبه للعملي
  تيرمين
  وهو عباره عن جزئين جزء عملي وجزء نظري
  الجزء العملي عباره عن تجارب
  
  ** رابع مادة ... الوراثة :
  
  وهي عباره عن تيرمين معظم الكلام فيها بيكون عن dna
  وهي زي الوراثه اللي كنا درسناها في الثانويه
  
  العملي ... عبارة عن نظري ومسائل مندل
  
  ** خامس مادة .. الهستولوجي
  وده علم دراسة الانسجة والخلايا
  التيرم الاول بيتكلم عن الخليه
  والنسيج الطلائي
  والنسيج الضام
  والجهاز العصبي
  والدم
  التيرم التاني
  الجهاز التناسلي الذكري
  الجهاز التناسلي الانثوي
  الجهاز البولي
  الجلد
  
  .. العملي :
  عباره شرايح توضيحه لكل جزء
  
  ...
  
  فيه مادتين منتهيين با نتهاء التيرم
  1- اللغه التيرم الاول
  هيا ماده سهله جدا
  امتحانها اسهل بكتير من امتحانات الثانويه
  وسهل تجيب فيها تقدير
  وفيها قواعد وكلمات
  
  احصا حيوي
  بندرسها في التيرم التاني
  هيا مجموعه من القوانين وبنطبق عليها
  
  الادوات :
  
  البالطو اهم منك شخصيا .. في السكاشن بس .. مش هتحتاجه في سكشن الوراثة
  
  ادوات البايو ودي ( test tubes, porcalin dish, pipette , dropper )
  فيه كمان السحاحه و الماسك و حامل الانابيب
  
  ممكن تجيبها من الكلية مع الكتاب ... وممكن تشتريها من برة
  
  ادوات التشريح بتشتريها من بره برده .. ودي للناس اللي حابها نقف جنب العينات ..
  
  N.B : بتاعتي لسه جديدة وبتلمع في كيستها )
  
  لون ( ازرق .. احمر .. بنفسجي ) ده للهستولوجي علشان الشرايح
  
  ** السكاشن كلها مهمه ده العملى بتاعك متسيبش سكشن احضر كله
  
  ** المصاريف حوالي 180 ج او 190 حاجة زي كده
  
  ** لو حريص على المحاضره و عاوز تحضرها من اولها لاخرها تكون فى الكليه من الساعه 8 او 8 و ربع عشان تلاقى مكان فى الاول و تركز مع الدكتور و تفهم المحاضره بتبدأ 8 و نص لو جيت متأخر خمس دقايق مش هتلاقى مكان تقف فيه اصلا و يبأه عليه العوض فى المحاضره و متحضرهاش احسن فى الوقت ده
  
  ** اول يوم عبارة عن ترحيب من اتحاد الطلبة ليكم
  مدرجكم رقم 1 في الوش ع طول
  
  اي سؤال انا مستعد ارد عليه ...
  
  شكر ل Mahmoud Osama
  
  Mahmoud Abd El Nasser
  
  
  
  

منقول للافادة

[captinmido]

بجد والله معلومات قيمة جدا ربنا يجازيك خير يا دكتور بجد شكرااوى كنت هموت واعرف الادوات عبارة عن اية
مع ان فى حاجات مش فاهمها فى الادوات فلو حضرتك تسمحلى بجد يبقى شكرا

[Dr.Mohamed Attia]

العفو يا دوك كلنا زملاء

هو انا على فكرة ف سنة اولى زيك بس نقلت دة من صفحة ف الفيس بوك عشان كلنا نستفاد منها

شوف انت عاوز تعرف ايه وانا اقولهولك انت تؤمر بس

[captinmido]

ربنا يخليك يارب الامر للة وشكرا بجد بس هى البايو دى يعنى اية و n.b

[Dr.Mohamed Attia]

البايو دى يعنى الكيمياء الحيوية

n.b : na5od balna

ناخد بالنا دة معتاها

اى حاجة تانيه عاوز تعرفها قولى

[la docteur.]

موضوع مهم جدااااااا ومفيد
n.b ناخد بالنا بجد ؟؟!!!*_*

[Dr.Mohamed Attia]

ايوة دى معناها ناخد بالنا

يعنى دى جزئية مهمة ودى اختصار لكتابتها بس بالفرانكو

[la docteur.]

اوكــــــــــــــــــــي

[lolaatt]

المشاركة الأصلية كتبت بواسطة la docteur.

اوكــــــــــــــــــــي

عايزة اعرف ازاى بنجيب تقدير فى جامعه المنصورة ناخد كورسات ولا نعمل ايه ؟

[احمد حسن محمد قاسم]

افضل حاجة تعمليها تفضلى اول شهر فى الكلية وتعرفى الجو ماشى ازاى وتستعجليش على موضوع ن الكورسات الا لما تعرفى المعيدين والدكاترة و المزكرات اللى هينزلها الدكتور بتاع المادة هيا اللى هيجى منها الامتحان

[lolaatt]

المشاركة الأصلية كتبت بواسطة احمد حسن محمد قاسم

افضل حاجة تعمليها تفضلى اول شهر فى الكلية وتعرفى الجو ماشى ازاى وتستعجليش على موضوع ن الكورسات الا لما تعرفى المعيدين والدكاترة و المزكرات اللى هينزلها الدكتور بتاع المادة هيا اللى هيجى منها الامتحان

هوه نتيجه تقليل الاغتراب امتى ؟

[la docteur.]

لا بلاش كورسات الا لو صعبت عليكي قوي قووووووي..
الاعتماد ع النفس افضل بكتييييير
حاولي وان شاء الله مفيش حاجه صعبه..

نتيجة تقليل الاغتراب بتبقي بعد قفل الموقع بيومين
انتي محوله منين؟؟؟؟؟؟؟؟؟؟؟؟؟؟