اهلا وسهلا بك فى بوابة الثانوية العامة ... سجل الان

العودة   بوابة الثانوية العامة المصرية > الجامعات المصرية > المجموعة العلمية > كلية العلاج الطبيعي

إضافة رد
 
أدوات الموضوع انواع عرض الموضوع
  #1  
قديم 27-08-2015, 09:23 PM
DPT-Blue Phoenix DPT-Blue Phoenix غير متواجد حالياً
عضو ممتاز
 
تاريخ التسجيل: Jul 2014
المشاركات: 253
معدل تقييم المستوى: 10
DPT-Blue Phoenix is on a distinguished road
New نظام الدراسة والحياة الجامعية


اتكلمنا فى المواضيع الى فاتت عن المجال والمواد ..
طيب دلوقت ايه بقى ؟! عرفنا عن مجالنا ؟! اخدنا فكرة عن المواد ؟! بس احنا لسه مقلقين شوية الحياة الجامعية دى عاملة ازاى هل هى زى ما بتنقلها الأفلام المصرية مثلا ؟! هل هى زى اى مرحلة من الى فاتوا زى الثانوى مثلا ؟! تعالوا نشوف ..




- ‫#‏نظام_الدراسة‬ : الاول فى عندنا حاجتين حاجة اسمها ‫#‏محاضرات‬ Lectures و حاجة اسمها ‫#‏سكاشن‬ Sections .. ايه الفرق ؟!


1- ‫#‏المحاضرات‬ : دى الى بتكون فى المدرجات وطبعا المدرج بيكون مكان واسع ممكن ياخد الدفعة كلها .. او الدفعة تكون متقسمة على جروبين 3 على حسب كل دفعة بقى وعددها .. والمحاضرات هى ‫#‏النظرى‬ الكلام النظرى بيدخل فيها ‫#‏دكاترة_او_استاذ_دكتور‬ مثلا هو الى بيديك المحاضرات يعنى الناس الكبيرة يعنى مش اى حد مش واحد حديث التعيين .. الدكاترة الى بتديك فى المحاضرات غالبا بيكونوا هما الى حاطين الكتب او عارفين بالظبط ايه الى بييجى فى الامتحان يعنى تحضر المحاضرات عشان تفهم الامتحان هييجى ازاى وتحاول تستفيد من الدكاترة ..

2- ‫#‏السكاشن‬ : ودى اماكن صغيرة زى اوض كدا بتتقسم فيها الدفعة لمجموعات صغيرة والمفترض ان السكاشن دى هى ‫#‏العملى‬ شغل العملى بتاع المادة وتطبيق على النظرى الى اتقال فى المحاضرة .. وبيدرسها المعيدين او المدرسين المساعدين وكدا .. الناس الى لسه تعتبر حديثة التعيين او بقالهم مدة بسيطة يعنى .. السكاشن بيكون فيها غياب وحضور غالبا واعمال سنة على عكس المحاضرات الى المعظم فيها مبيكونش فيها غياب وكدا الا فى بعض المواد الى ممكن ميكونش ليها سكاشن وكدا على حسب كل دكتور بقى وتقسيمة للدرجات .. فحضور السكاشن مهم عشان العملى اولا ثانيا عشان الغياب واعمال السنة .. مش كل المواد فيها سكاشن طبعا لان مش كل المواد فيها عملى لكن كل المواد فيها محاضرات دا اكيد هههههههههه لانه كله فى نظرى ..
- وغالبا الى مبتفهموش فى المحاضرة ممكن تسال فيه المعيد فى السكشن او بعد السكشن يعنى اول باول كدا ومتفوتش ..

--------------------------------------------

#‏طيب_بالنسبة_للغة_الانجليزية‬ ؟!

- كله مقلق حبتين من اللغة وانا كنت زيكم لالالا كلنا كنا زيكم ومقلقين حتى الى كان لغات لانها مصطلحات طبية وكلها او معظمها جديد .. مش مشكلة اللغة هى اقصى حاجة الترم الاول وهتتعود على النظام والترجمة وكله هيبقى فل باذن الله .. طيب بالنسبة للترم الاول نعمل ايه ؟!

- بص احنا الحمد لله دلوقت فى عصر تكنولوجيا واحسن من الى قبلنا كتير .. عندك قواميس ورق ممكن تشتريها لو انت بتحب تفهم المعنى بالظبط فى قواميس طبية ورقية فيها المعنى العربى بالتفصيل وكل الكلمات الى تتخيلها .. غير كدا فى قواميس طبية وغير طبية كتير جدا وقواميس انجليزى انجليزى .. حاول تجيبلك واحد طبى وواحد عام وواحد انجليزى انجليزى لو معاك القواميس دى هتساعدك كتير من البداية ويا سلام لو فيها نطق كمان كدا زى الفل .. حاول بمجرد ما تاخد محاضرة اقراها فى الاول و لو اخدت الكتب بمجرد ما تاخدها حاول تترجم اكبر كم ممكن اهم من المذاكرة بدون فهم دلوقت دا هيفرق معاك بعد كدا ترجم كل الى انت عايزه فى الاول لو معنى الجملة وصلك خلاص مش لازم تترجم بالحرف .. احسن من كدا لو لقيت حد اكبر منك مترجم ومعاه كتاب مترجم يبقى فل .. لقيت اى حاجة مترجمة كلمات او ورق بيتباع هاته هيريحك كتير ..

----------------------------------------------

‫#‏المذاكرة_ازاى_و_المجموع_و_الكورسات‬ ؟!

- المذاكرة طبعا مش زى الثانوى اطلاقا خااااااااااااالص انسى الثانوى دا كدا .. يعنى اسلوب احفظ الاحياء بالكلمة واحفظ الكيمياء بالحرف دا مش هنا .. واقعد حل 2000 مسالة فيزياء انت مش فى ثانوى .. يعنى متشتغلش اسلوب حفظ زى ثانوى لان دا مش هيفيدك اوى وهيرهقك بدرجة كبيرة جدا جدا جدا على قلة فايدة ومال ايه ؟!

زى ما اتفقنا فى ‫#‏مواد_مقالية_كتابة_كتير‬ الى هى غالبا ‫#‏مواد_الطب_البشرى دى ابدا ذاكرها من الاول حاول تفهم على قد ما تقدر وتحفظ بعدها ذاكر اكتر فى التشريح عشان فيها كتابة عالية اقل شوية فسيولوجى وبتعتمد على الفهم اكتر .. الهستولوجى والكيمياء ممكن اقل شوية او اكتر شوية مش هتفرق .. حاول تجيب امتحانات من الاول خااااااااالص من بداية السنة او تسال الى اكبر منك على نظام الامتحان فى كليتك وتعرف الاسالة المهمة فى كل شبتر وتركز عليها من البداية لو ركزت عليها من البداية خلاص الموضوع انتهى ..

-- مواد علاج طبيعى بقى ‫#‏مواد_الفهم‬ مواد علاج طبيعى بالذات احفظ من هنا للسنة الى جاية هتقل فيها برده مواد علاج طبيعى بوجه عام الكترو هيدرو تمارين علاجية ميكانيكا او غيرها هى مواد فهم بدرجة كبيرة حاول تفهم اكتر حفظ اقل يعنى تاخد المحاضرة والسكشن تترجم تفهم احفظ بشكل اقل من مواد بشرى وحاول تجيب امتحانات من الاول او تسال الى اكبر منك ..

- ‫#‏الكورسات‬ : ارجوووووووووكم يا جماعة انتم مش فى ثانوى بلاش تحطوا الكورسات فى دماغكم صدقونى اوائل الدفعة معظهم عندنا مثلا مكنوش بياخدوا كورسات انا عمرى ما اخدت كورس واحلفك الف مرة انى فاهم احسن بكتير جدا من ناس كانت بتاخد كورسات .. اعمل الى بقولك عليه وان شاء الله مش هتحتاج كورسات انا عارف انك خايف من الاول بس لو ذاكرت هتعدى مفيش مانع لو واحد صاحبك بيروح كورس او الدكتور بتاع الكورس منزل ورق ملخص واسلوبه حلو تشتريه وتعرف الى قال عليه الدكتور او تجيب تسجيلات بلاش كورسات فلوسها دى ممكن تشتري بيها انضف اسطوانات ومراجع والله احسن من 1000 دكتور بتاع كورس .. ولو اتعودت على الكورسات هتقضى سنين الجامعة كلها بكورسات .. ممكن تاخد دورات فى الاجازة احسن .. لان الكورس الى هامه كله الامتحان مش انك تكون فاهم وناجح كل تركيزهم بيكون ازاى تجاوب امتحان الامتحان هيخلص بس بعد الجامعة انت هتتخرج ؟! الحفظ ولا ليه لازمة فهمك وممارستك ومهارتك الى هتفيدك خلى بالك ؟؟؟؟؟؟؟؟!!!!!!!!!!! مش ثانوى احنا ..

عايز تجيب مجموع اعرف نظام الامتحان واحفظ على اساسه ‫#‏احفظ‬

عايز تبقى مميز افهم كتييييييير واقرا فى الاجازة واطلع وهات مراجع ونزل كتب وروح دورات واتعلم ..


عايزين نفرق بين ‫#‏الهدف‬ و ‫#‏الوسيلة‬ المجموع عمره ما كان هدف وانت مش داخل الكلية عشان تبقى ‫#‏مدرس‬ عشان تدرس مجرد شوية مواد انت داخل عشان تبقى ‫#‏دكتور‬ متميز فى مجالك مفيش مانع تجيب مجموع وتتفوق لكن المجموع دا يبقى ‫#‏وسيلة‬ والهدف هو انك تبقى دكتور متميز فى مجالك والتميز بييجى بالفهم والتدريب والمهارة مش الحفظ ..

اوعى تبيع هدفك عشان مجرد وسيلة والله حقيرة ولا هتفيدك انك تبقى معيد مش فاهم حاجة ايه الفايدة شكلك يا عم قدام نفسك ؟! وصدقنى فى من دول بالهبل او هما الاغلبية الى هتقابلها !؟ الفهم اولا وثانيا وثالثا واخيرا والحفظ وسيلة وعمرها ما تكون هدف ابدا ..
‫#‏الحفظ_وسيلة_مش_هدف‬ هتقدر قيمة دا لو اتخرجت من الكلية زى كتير جدا شفتهم والله مش عارف حاجة الا مجرد كلمتين درسهم فى الكلية وحرفين ‫#‏حفظهم‬ آلة بتكرر كلام وتطبعه فى ورقه دا مش دكتور والله وسعتها قدام نفسه بيكون عارف انه ميستحق اللقب مفيش اصعب من دا لازم يكون هدفك ‫#‏التميز‬ اوعى حماسك ينتهى بمجرد دخول الجامعة اوعى ..
قليل اوى الى بيتميز وكتير جدا الى بيطلع زيادة عدد انت الاساس اختار من دلوقت ..

-----------------------------------------------

‫#‏نذاكر_منين‬ ؟!

1- هتشترى الكتب وتحجزها لو نزلت .. وخاصة لو عليها شيتات .. والى تعرف تصوره صوره لانها مش مضيعة فلوس وخلاص لكن لو عليه شيت ودرجات اشتريه ..
2- فى بور بوينت الى بيشرح منه الدكاترة خد ذاكر منه بجانب الكتاب واحسن انك تذاكر من البور بوينت ولو فى حاجة زيادة فى الكتاب اعرفها لان البور هو الى بيتشرح فى المحاضرة ..
3- لو فى ورق امتحانات هاته او ورق ملخص لطريقة الامتحان او ورق دكاترة اسلوبه جميل ..
بلاش تحفظ نصا واتعلم تعبر باسلوبك .. وغالبا الورق والحاجات دى كلها بتكون فى مكتبات معروفة وجنب الكلية ..
..... حاول تفهم على قد ما تقدر فى اى محاضرة واحضر ومتقولش ملهاش لازمة لا ليها لازمة المحاضرة وسجل المحاضرة دائما معاك الموبيل افتح التسجيل وحاول تسمع المحاضرة تانى وانت فاتح الكتاب وتمشى مع الدكتور او مع البور بوينت وتمشى مع الدكتور تانى هتفهم فسجل المحاضرات اول باول هتحتاج حاجات منها اكيد .. اسال فى اى حاجة انت مش فاهمها اول باول واوعى تتكسف تسال ..

----------------------------------------------

- ‫#‏المدينة_الجامعية‬ : فى القاهرة هنتكلم على القاهرة فى مدينة للولاد ومدينة للبنات .. مدينة حكومية يعنى ودى 160 جنيه فى الشهر وتقريبا التقديم بنفس السعر دا كدا فى الاول .. وفى مدن خاصة زى مدينة امبابة مثلا .. دى تقريبا التقديم ليها فى الاول فى حدود 1500 جنيه وكل شهر بتدفع حوالى 150-200 جنيه مش متاكد بالظبط ..

- مصاريف الكلية الحكومية تقريبا فى حدود 200 جنيه تقريبا كدا ..

- تكلفة الكتب .. بالنسبة لكتب الطب البشرى وهى بتكون الترمين بتكون حوالى 300 جنيه تقريبا .. ياما انتم بتروحوا تجيبوها من القصر العينى او لو اتحاد الطلاب اتطوع او حد اتطوع منكم او عملتوا رئيس دفعة بدرى يلم الفلوس ويشترى كتب للدفعة كلها مرة واحدة بالحجز ودا اريح بكتير ..

- تكلفة باقى الكتب برده بحوالى 300 جنيه بس دا للترم الواحد يعنى ..


- فى طبعا مصاريفك الشخصية وكدا ممكن متكونش عايز تاكل اكل المدينة مثلا بص فى الحكاية دى فى جميع انواع المطاعم يعنى من اول حاجات شعبية واسعار قليلة لحد مطاعم اسعارها عالية .. بالنسبة لمصاريفك الشخصية دى بتعتمد عليك انت بصراحة بس هحط كمتوسط 300 جنيه فى الشهر مصاريفك الشخصية بصرف النظر عن المدينة والكتب .. لو هتصور ورق لو هتشترى حاجة وكدا ..

- بالنسبة بقى لحكاية غربة والخوف وكدا .. كدا كدا فى يوم من الايام هتضطر تعتمد على نفسك وحكاية انك تبدا تبعد عن اهلك من دلوقت فى مرحلة بتتكون فيها شخصيتك ليها مميزات كتير .. هتخليك تعتمد على نفسك فى حاجات كتير .. هتبدا تتعلم تستقل بحياتك شوية .. هتبدا تعرف تتعامل مع كل انواع الناس .. فهى حاجة مهمة جدا واتعلم تتعامل مع كل الناس ..
- بالنسبة للناس الى خايفة بقى اولا المدينة ممكن بتقدم طلب تحويل من غرفة لغرفة يعنى بس تقدم دا من بدرى .. بالنسبة للكلية هتلاقوا ناس كتير متطوعين ان شاء الله وهيساعدوكم فمن الناحية دى متقلقوش وخير ان شاء الله


- كلية العلاج الطبيعى جامعة القاهرة .. جنب مدينة الولاد الجامعية مباشرة .. وهى خارج نطاق الجامعة بص جامعة القاهرة فيها اكتر من جزء .. فى الجامعة نفسها او يعنى داخل حيز الجامعة فى كل الكليات تقريبا .. الا طب وصيدلة واسنان وتمريض وعلاج طبيعى ومش عارف ايه وضع هندسة .. على العموم العلاج الطبيعى قريبة من محطة اسمها محطة ‫#‏البحوث‬ ومركز البحوث يعنى لو انت هتركب مترو انزل محطة البحوث واسال على علاج طبيعى القاهرة او مركز البحوث واسال هناك على الكلية سهلة يعنى .. فلوس المواصلات يعنى المترو جنيه واحد القطار من المنصورة مثلا حوالى 6 جنيه ونص تقريبا لو عادى مكيف حوالى 20 .. المواصلات يعنى بتتراوح بين الميكروباص 12 - 16- جنيه تزيد شوية تقل شوية فى الحدود دى كدا .. يعنى مواصلاتك رايح اعمل حسابك على حوالى 20-25 جنيه كدا احتياطى .. بس القطورات بتسهل الدنيا يعنى والمترو ..

كلية الطب البشرى والاسنان والتمريض والكلام دا فى مكان لواحدهم وجنبهم بشوية صيدلة .. ههههههههه الجامعة متفرقة فى كل حتة .. بس صدقونى كون ان العلاج الطبيعى فى مكان لواحدها اريح بالنسبة لحاجات كتير وتلاقى كل المكتبات والحاجات خاصة بمجالنا احنا فحاجة احسن .. جنبك ملاعب والمدينة الرياضية جنبك المدينة الجامعية فانا بقول خليك فى سكن المدينة الجامعية اريح وهيوفر وقت .. طبعا ممكن تاخد سكن برا وبيختلف السعر فانت بتتفق مع مجموعة من زمايلك وتاخدوا سكن بس هتضطروا تجهزوا اكل وممكن يكون المكان بعدين حبتين فعشان توفير الوقت خليكم فى المدينة الحكومية على الاقل توفير الوقت .. لو هتسكنوا برا شوفوا شقة من دلوقت وشوفوا السعر وكدا ..

------------------------------------------------------------

#‏مبدأ_زى‬ ؟!

- بص اولا عايزين نتفق مفيش حاجة اسمها ‫#‏صحوبية‬ فى ديننا الاسلام ودا بكلام القرآن بس مش هشغل دماغكم دى محتاجة مواضيع لواحدها .. ايوه يعنى مفيش ولد يبقى عنده صديقة بنت او صاحبته وكدا دا غلط وحرام انتهينا من النقطة دى بكلام القرآن .. والآيات فى القرآن دا الكلمة لا تحتمل الا معنى واحد وباجماع علماء يعنى دى نقطة مفيش فيها خلاف .. مش من اخلاق مسلم ومسملة انهم يصاحبوا ويخرجوا ويهزروا وارقام تليفونات والكلام دا لا طبعا ..
- طيب حكاية ‫#‏زى‬ دى .. تيجى تساله مين دى يا عم يقولك دى ‫#‏زى_اختى‬ .. او دا ‫#‏زى_اخويا‬ انا هناقشها معاكم من ناحيتين ..
1- هل فعلا الى انت بتقول عليها اختك دى هى اختك فعلا ؟! لا طبعا .. طيب هل هى من المحارم يعنى متحلش ليك بمعنى مينفعش تتجوزوا لا طبعاااااااا تحل ليك .. يبقى زى اختى الكلمة غلط لانها ولا زى اختك من ام واب او ال2 يعنى ولا زى اختك من حيث انها متحلش ليك يبقى الكلمة مرفوضة والتشبيه مرفوض وزى دى مرفوضة بالعقل اهو ..
2- عايزين نتخيل مع بعض كدا لو مشينا بمبدأ زى فى كله يعنى مرة دا زى اخويا ومرة دى زى اختى .. مش بعيد نلاقى قدام شوية دى زى مراتى .. الاسلام حدد العلاقات الانسانية بشكل قاطع وصلات القرابة والمحارم وكله .. فدا اساسا حكاية زى دى يعتبر طريق لكل غلط وتبرير للصحوبية وطريق لتدمير العلاقات الانسانية الى هى اساس .. فنبعد عن الكلام دا ؟!

ومال ايه .. هل مفيش تعامل خالص ؟! لا دا يبقى تشدد لو انا قلت كدا .. بص فى فرق بين زمايل فى الكلية فى المستشفى فى الفريق الطبى بنتكلم فى نطاق معين قدام كل الناس مفيش خلوة انكم لواحدكم او بتتكلموا فى تليفون وتهزروا وكدا مفيش الكلام دا والكلام بحدود معينة وفى نطاق ‫#‏الضرورة‬ يعنى ايه ضرورة يعنى حاجة لازمة وضرورية كدا دا تمام .. انما ان مثلا الكلية تخلص نقعد نشرب حاجة ونتسلى مع بعض دا غلط او ناخد ارقام تليفونات بعض او نهزر فى مدرجات ويحصل تلامس كل دا غلط وحرام .. خلاص النقطة دى اظن واضحة .. وانا ياما كتبت عن دا والمواضيع بالهبل بادلة من القرآن فمش محتاج اكتب تانى ..

ودى نصيحة والله الحكاية دى مصدر لكل ابتلاء ممكن تتخيله ؟! تخيل كدا مراتك وهى مصاحبة ؟! تخيلى كدا جوزك وهو مصاحب فى المستقبل !؟ ايه شعوركم ؟!
احنا اه سن مراهقة وسن شباب ؟! بس صدقونى كلها كام سنة وبنرجع نندم على كل حاجة عملناها فى السن دا وكل وقت ضيعناه فى حاجات مش مستاهلة شوف اى حد كبير بيقول يا ريت فخلينا نستثمر وقتنا وعمرنا الى هنتسال عنه دا صح .. لان هو دا اختبار الحياة طريق صح وطريق غلط ووقت محدد بس احنا منعرفش وقتنا هينتهى امتى فنعمل كويس فى حياتنا ونعمل لاخرتنا .. صدقونى والله الحياة مش مستاهلة كل دا واننا نودى نفسنا ورا الشمس عشان شوية طيش او سن شباب او مراهقة .. وخلى بالكم من مواقع التواصل دى لان كتير اوى الى ممكن متقدرش تعمله على الحقيقة ويكون فى مواجهة تقدر تعمله على مواقع التواصل ومحدش شايفك ومفيش مواجهة يعنى الشخص دا مش قدامك .. فخلى بالكم من مواقع التواصل كارثة لو استغلتها غلط وبتضيع الوقت بطريقة رهيبة وبتبقى ادمان .. وصدقنى لو واحدة قالتلك زى اخويا وبتاع عندك على طول الحظر Block وريح دماغك وركز فى هدفك الى انت متغرب علشانه والى انت تعبت فى الثانوى علشانه والى انت هتتعب علشانه برده ..


-------------------------------------------------

#‏تجربتى_الشخصية‬ .. لو فضلت احكى ليكم مش هخلص ..
بس باختصار .. انا فى علاج طبيعى القاهرة طبعا كنت رايح مش عارف حاجة خالص ولا عارف عن الكلية اوى ولا القاهرة ولا اى حاجة وكنت مبهور بقى القاهرة والعاصمة والعلاج الطبيعى وحاجة كبيرة وكدا ولقب دكتور البالطو وكدا خلاص .. مكنتش اعرف ان دى لسه بداية الطريق ..
-- الحقيقة رحت هناك اتصدمت فى اكتر من حاجة منها :-


1- ان برده نفس نظام التعليم بتاعنا نظام الجامعة وان كان مختلف فهو برده قائم على انك تحفظ وتعرف متطلبات الامتحان هو اه احسن من نظام الثانوى وغيره لكن لازم تعرف انك هتحفظ برده وتلتزم بالكتاب عشان تعدى وكدا لكن دا ميمنعش انك تنمى من نفسك بعيدا عن نظام التعليم العقيم بتاعنا دا .. هتضطر تحفظ كتاب الدكتور اصل بيجيب منه الامتحان وتشترى كتاب الدكتور والحوارات دى النظام العقيم دا يعنى ..

2- القاهرة .. مش زى ما كنت متخيلها خالص بالعكس .. درجات حرارة مش كويسة حر .. زحمة بطريقة رهيبة .. كلها ضوضاء .. كمية متسولين رهيبة .. وهتشوف جانب تانى خالص من بلدنا لو رحت القاهرة بشكل خاص .. واحب اقولك لو انت جاى من الريف او يعنى الجزء من شعبنا الى لسه عنده الحمية وعنده المبادىء وينفع ومينفعش فاحب اقولك ان الكلام دا مش هتشوفه فى القاهرة .. هناك هتلاقى النظام الى شغال ودا الطبيعى فى الجامعة خاصة الصحوبية والهزار والتلامس بين الولاد والبنات وما الى ذلك انا مش بقول كله انا بقول المعظم .. فلو انت راجل محتفظ بمبادئك ورحت القاهرة مثلا او اى منطقة هناك كدا طنش خااااااااالص ولا كأنك شايف اى حاجة بالعكس هناك انت لو اتكلمت هيتقال عنك مش عارف متشدد وانت مالك والكلام دا .. فسيبك من الناس الى ملهاش لازمة دى وركز فى هدفك ..

3- حياة المدينة الجامعية حياة مختلفة .. بس فى جزئية كان الناس بتسال عليها على طول المدينة الجامعية عندنا فى القاهرة انت لو سكنت مع واحد ممكن تقدم طلب تحويل لغرفة تانية الله اعلم باقى المدن ايه الوضع عشان الناس الى كانت مقلقة من الناحية دى .. المدينة الجامعية على قد ما هى غربة وكدا لكن لو اتاقلمت هناك فعلا هتعيش ايام من اجمل ايام حياتك رغم الصعوبات .. هتعرف فيها اصحاب عمرك احسن اصحاب بتقابلهم فى الجامعة .. فعلا بقى زى ما بيقولوا حياة مختلفة 180 درجة .. هتبدا تعتمد على نفسك وتحس انك بقيت انسان مختلف .. بس لازم تأقلم طريقة مذاكرتك وعاداتك واسلوبك وتعرف تتعامل مع الكل والا هتتعب جامد اوى اوى اوى .. متحاولش تركز مع الناس حتى لو انت شايفهم غلط حتى لو مغايرين لقيمك صدقنى لو ركزت معاهم هتتعب ودا هيصرفك عن هدفك الاساسى وهو التفوق فى الكلية باذن الله ..

4- فى الكلية هتقابل نوعيات فعلاااااااااا زى ما هتشوف الحلو هتشوف السىء جدااااااا .. وعشان كدا حاول تبعد عن الفيس بوك ههههههه اه انا نفسى بقعد كتير ولى نشاطات كتير عليه بس فى اولويات مذاكرتك وشغلك اولا وبعد كدا اقعد بمزاجك .. ابعد عن النوعيات الى بتتكلم كتير على الناس مش لازم تصاحبهم وخاصة البنات بيحبوا يتكلموا كتير لو قعدت معاهم هتتعدى منهم وهتاخد سيئات بكمية رهيبة .. ابعد عن بذىء اللسان دول من ابعد الناس عن الرسول صلى الله عليه وسلم فى الاخرة الانسان الى دائما يتكلم كلمتين ويشتم دا هتتعدى منه فعلا .. ابعد عن الولاد الى مش رجالة الكلمة مش محتاجة توضيح انت لو عايز صاحب .. صاحب راجل فى مواقفه واسلوبه قبل اى حاجة تانية وابعد عن النوعيات الى مقضياها صحوبية دى .. ابعد او ابعدى عن البنات المايصة هناك كتير والله الواحد شاف نوعيات غريبة الى تلاقيها عاملة خريطة مصر على وشها والى مخلصة علبتين مكياج قبل ما تيجى والى تلاقيها لابسة اضيق لبس ممكن تشوفه فى حياتك تقريبا بيبقى لبس اختها الصغيرة وهى لابساه مش عارف ايه دا ومتحملة نفسها كدا ازاى الله ورسوله اعلم الحقيقة .. وحاجات الواحد والله بيقعد يقول ربنا يهديهم ابعد عن دول سواء لو شفت اسمهم فيس اعمل بلوك سواء على الحقيقة ابعد عنهم هههههههههه اضمن .. حاول دايما او حاولى يكون تعاملك مع ال*** الاخر فى حدود ‫#‏الضرورة‬ فى حدود الدراسة كدا يعنى انما خارج الحدود والضرورة سواء على الفيس او الحقيقة بتكون نتايجه مش كويسة .. الكلام واضح بتتعامل بس بحدود .. اذا حدثت الالفة ذهبت الكلفة يعنى لو اتكلمنا مرة فى مرة فى مرة الحدود بتروح وسعتها يا هتحصلك مشاكل يا هتخسر نفسك ومبادئك فبلاش من الاول ابعد عن الحاجات دى من البداية .. وابعد عن النوعيات الى تتكلم عن المبادىء وعايزة شهرة وهى ابعد ما يكون عنها النفاق اوحش حاجة متعرفش دا ممكن يعمل ايه فحذر اهم حاجة تحذر وانت فى الجامعة ..

5- حاول تصاحب الناس الخلوقة الناس المتدينة الناس المجتهدة الناس الى تنصحك اهم حاجة فى الجامعة دى الصحبة الصالحة .. الناس دى هتعينك على الخير وانت هتعينهم باذن الله ..

6- من دلوقت حدد هدفك انت داخل الكلية ليه عايز تطلع منها ازاى ؟! حدد الطرق والاساليب الى هتحقق بيها هدفك ؟! قسم وقتك بجد عشان الوقت بيفوت بسرعة .. حاول دائما تكتسب عادات كويسة جديدة .. حاول تخلى القراءة من عاداتك .. حاول دائما تطور من نفسك .. سن الجامعة دا هو السن الى بيتحدد فيه شخصيتك فخد بالك كويس اوى اوى اوى ..

7- بمجرد ما تدخل مش هتعد عدد الجروبات عن العلاج الطبيعى الى كل واحد من دفعتك هيعملوا ومشاكل جروبات وخلافات وصفح والناس الى عايزة شهرة وكل دا سيبك من كل دا ..
8- خليك ثابت على مبادئك متخليش حاجة تصرفك عن هدفك حاول تتعامل مع كل الناس ومتزعلش حد قدر الامكان لكن ابعد عن النوعيات الى مش كويسة بقدر المستطاع سيبك من الصحوبية والكلام الفارغ دا سيبك من الناس المحيطة سيبك من اى حاجة تصرفك عن هدفك ومترضيش ربك .. والحلال والحرام واضح جداااااا والفطرة السليمة اساسا من غير حاجة هتعرفك الصح والغلط بس احنا الى ساعات بنضحك على نفسنا .. دينك ومبادئك وهدفك فوق الجميع دول احفظهم صم ..

9- حاول تكون ‫#‏مميز‬ بص ممكن تكون انت الى تقدر تعمل حاجة محدش يقدر يعملها ولا عملها قبل كدا ليه لأ ؟! انت ممكن تبقى حاجة كبيرة جداااااااا لو صممت وتوكلت على ربنا ربنا مش بيضيع تعب حد ؟! ليه لا ميكونش عندك فكرة كويسة وتحاول تطبقها وتفيد بيها نفسك وكليتك وبلدك كمان ليه لأ ؟! الناس الى عملت دى احسن منك فى ايه ؟! مفيش اكتر من انهم حاولوا واجتهدوا .. انت ممكن تكون ‫#‏التغيير‬ باذن الله وبلدنا وكليتنا وتعليمنا وكل حاجة هنا محتاجة تغيير محتاجة الناس الى تقود التغيير دا وتبدأه باذن الله فخليك من الناس العظيمة دى الى ليها الخير فى الدنيا والجنة فى الاخرة باذن الله ..

- خلى بالك الاشخاص الى غيروا التاريخ كان بيبقوا مجرد اشخاص بداوا الفكرة وصمموا ووصلوا فانت ممكن تكون واحد منهم وان شاء الله كلكم واحنا برده نقدر نكون حاجة فعلا كويسة على الاقل عشان اهالينا الى تعبت علشاننا دى لحد ما نوصل لهنا عشان احلامنا وشكلنا قدام نفسنا على اقل تقدير .. عشان فعلا نكون من الناس الناجحة فى الدنيا والى ليها الجنة فى الاخرة .. الناس الى فعلا بتعمر الارض وتغير من كليتها وبلدها للاحسن .. هى الحكاية محتاجة شوية تصميم واجتهاد .. ولاخر مرة بقولكم هيقابلكم صعوبات كتير لكن المهم تحافظ على مبادئك تركز على هدفك واوعى تفقد الحماس والامل وكدا مش بعد ما تتعب فى الثانوى وتوصل تقف هنا ولازم تعرفوا ان فى كتير بيحبطوا فى الكلية والله فاوعوا تكونوا منهم مش بعد كل التعب دا فى الثانوى تقف هنا او تفقد حماسك واجتهدوا وان شاء الله ربنا هيوفقكم ويوفقنا جميعا .. مهما قابلك من صعوبات انت اقوى منها باذن الله وصدقنى والله ربنا مش هيضيع تعبك ودائما الى بيختارهولك ربنا هو الافضل والله عن تجربة فى مواقف كتيرة كنت ببقى مستغرب وزعلان وبعدها بكتشف حكمة ربنا والحمد لله ..

---------------------------------------

وربنا يوفقكم جميعا ان شاء الله وتكون الكلية بداية خير عليكم باذن الله والسلام عليكم ورحمة الله وبركاته .

__________________



http://ask.fm/Elsareih

Hope + Faith + Love = Change
رد مع اقتباس
  #2  
قديم 07-09-2015, 10:05 AM
راجية الجنان 96 راجية الجنان 96 غير متواجد حالياً
عضو جديد
 
تاريخ التسجيل: Sep 2015
المشاركات: 22
معدل تقييم المستوى: 0
راجية الجنان 96 is on a distinguished road
افتراضي

بصرااااااااااااااحة كلاااااااااااااااام رااااااااااائع جداااااااااا جزااااااااااااااااااااااك الله عنا خيرا وجعله في ميزان حسنااااتك
رد مع اقتباس
  #3  
قديم 09-09-2015, 03:32 PM
DPT-Blue Phoenix DPT-Blue Phoenix غير متواجد حالياً
عضو ممتاز
 
تاريخ التسجيل: Jul 2014
المشاركات: 253
معدل تقييم المستوى: 10
DPT-Blue Phoenix is on a distinguished road
افتراضي

اقتباس:
المشاركة الأصلية كتبت بواسطة راجية الجنان 96 مشاهدة المشاركة
بصرااااااااااااااحة كلاااااااااااااااام رااااااااااائع جداااااااااا جزااااااااااااااااااااااك الله عنا خيرا وجعله في ميزان حسنااااتك



شكرا ..
وجزاكم مثله ان شاء الله ..
يا رب جميعا ان شاء الله
__________________



http://ask.fm/Elsareih

Hope + Faith + Love = Change
رد مع اقتباس
إضافة رد

العلامات المرجعية

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


جميع الأوقات بتوقيت GMT +2. الساعة الآن 11:52 AM.