على طريقة ناقر ونقير .. وفالح ومفلح للناقد أبو قلم محمول .. سيكون هذا الموضوع .. ولكن ستكون المناظرة بين مقالات الأهلاويه والزملكاويه .. بحيث تعرض مقاله أهلاويه ويقابلها في نفس الوقت مقاله زملكاويه .. بكل حياديه ..
ولست مسئولاً عن أن الأهلاويه أو الزملكاويه بينقدوا أنفسهم بأسلوب ساخر .. وخاصة الزملكاويه في الوقت الحالي .. بسبب النتائج المخيبه للآمال .. وخروجهم من كل البطولات هذا العام .. وكذلك عدم حصولهم على أي بطولة طوال الخمس سنوات السابقة .. سوى بطولة كأس مصر العام الماضي ..

الحلقة الأولى
وهذه مقاله الأهلاوي : حسام أحمد
استطاع اقوى جهاز مخابرات في العالم متخصص فقد في كورة القدم جهاز (FBS) وهى اختصار لكملة ( Foot Ball Spies) من التجسس على مكالمات لبعض الشخصيات الهامه:

ترن ..ترن ترن .. ترن
ديكستال(المدير الفنى للزمالك) : الو خبيبي كيفك مرجان خادم الجان اللى طلع السكر من البتنجان .
مرجان : أمر امرك مطاع بس من غير رغي عندى صداع
ديكستال : خبيبي انا رخت لواخده بتقري الفنجان قالتلى طريقك مسدود يا خبيبي . كلها 3 خطوات وتاخد استماره 6 , قلتلها ازاى كده , قالتى يعنى فاضلك زلطه وتطلع بره .
مرجان : مش قلتلك من غير رغي , كلامها واضح يعنى بعد 3 شهور هيكرشوك من الزمالك
ديكستال : ماهو علشان كده عاوزك تعملى عمل مسحور يخلينى اقعد في الزمالك على طوول
مرجان : اعملك عمل تقعد على طول ههههههههههه كنت عملته لنفسي يااخويا
ديكستال : ايه ده هو انت دربت نادى الزمالك !!
مرجان : هو فيه حد مدربش نادى الزمالك.....
هههههههههههههههههههه
=============================
ترن ..ترن ترن .. ترن

عصام الحضري : الو مرجان , كنت فين بكلمك بقالى اسبوع تليفونك مقفول
مرجان : ايوا يا عصام عاوز ايه مش كفايا اللى حصلي بسببك
عصام الحضري : حصلك ايه بسببي وعملت ايه في العمل اللى طلبته منك
مرجان : عمل ايه بس اسكت
عصام الحضرى : مش قلتلك تعملى عمل تخلي جماهير الاهلى تسامحنى وادارة الاهلى ترجعنى العب في الاهلى
مرجان : اسكت متفكرنيش انا حضرت العفاريت واول ما قلت اسمك وقلت طلبك العفاريت علقتنى من رجلى اسبوع تحت الارض
عصام الحضري : ليه كده
مرجان : العفاريت طلعت بتشجع النادى الاهلى ومش طايقه تسمع اسمك
عصام الحضري : ينهار احمر حتى العفاريت طيب والعمل
مرجان : شوف حد عنده الة زمن يرجع الزمن لوري قبل ما تسيب الاهلى ده الحل الوحيد ... ههههههههههههههههههههه
=============================
ترن ..ترن ترن .. ترن ترن

مشجع زمالكاوى : الو مرجان
مرجان : الو مين معايا
مشجع زمالكاوى : انا سمعان مشجع نادى الزمالك اللى طلب منك تعمل عمل للفريق علشان يفوز في مطش بنى عبيد , يعنى مش كفايا الدوري ضاع اهوه الكاس كمان ضاع
مرجان : ربنا يعوض عليك يا ابنى
المشجع : انت شكلك ساحر اى كلام حتة عمل صغير زى ده مش عارف تعمله
مرجان : مش عارف اعمله ايه بس , ده انا نادى الزمالك ده هيخلينى اطلع من هدومى
المشجع : ليه بس يا مرجان
مرجان : بص ياابنى انا نزلت 11 عفريت يلعبوا مع نادى الزمالك في المطش ده
المشجع : وكانو فين ال 11 عفريت دول لما الزمالك اتغلب
مرجان : يابنى الحكم صفر كده وكل لعيب من الزمالك يجي يشوط الكوره من هنا يقلش يشوط العفريت اللى بيلعب معاه بره الملعب ,كل العفاريت طلعت مصابه من اول 10 دقايق والاحتياطى شاف اللى حصل للاساسي هرب اعملك ايه تانى بقي
ههههههههههههههه

=============================
ترن ..ترن ترن .. ترن

عبد المنصف (حارس الزمالك) : الو مرجان
مرجان : ايوا يا منصف ازيك عامل ايه
عبد المنصف : مش كويس خالص عبد الواحد السيد رجع تانى وشكلى هطول على الدكه
مرجان : معلش اتدرب كويس وربنا يوفقك
عبد المنصف : افهم من كده ان العمل اللى قلتلك تعملهولى مش نافع
مرجان : عمل ايه يا منصف معلش كنت مشغول بالعمل بتاع احمد شوبير وزاهر
عبد المنصف : مش قلتلك انى علشان ارجع اساسي لازم اقف مطش الاهلى الجاى وميدخلش فيا اجوان خالص
مرجان : طيب وايه المشكله انت حارس كويس
عبد المنصف : يامرجان انا كل ما اقف في مطش الاهلى يدخل في 3 او 4 اجوان بالميت
مرجان : اه بس دى مشكلتك دى بسيطه قوى ومش محتاجه عمل
عبد المنصف : بجد ازاى بقي
مرجان : مش النادى الاهلى بيلبس احمر
عبد المنصف : اه طبعا
مرجان : هات 2 ديوك رومى وحطهم في الجون معاك وابقي خلى مهاجم من النادى الاهلى يدخل منطقة الجزاء
ههههههههههههههههههههههه
=============================
وهذه مقاله الزملكاوي : أحمد
هؤلاء ما يطلقون عليهم زملكاوية

المقال دا أنا مستعد أدخل بيه السجن .. أيوة أدخل السجن بس أقول اللي في نفسي.

قعدت أفتكر أنا ليه شجعت الزمالك رغم إنه بتاريخه العريض اللي قرب علي 100 سنة و 50 سنة في الدوري ما أخدش غير 11 بطولة دوري فقط !!! آه والله 11 بطولة !! العبد لله شاف بعينه ووعي منها في حياته 5 بطولات!!!!

يعني كان فيه قبل مني ناس قعدوا يشجعوا 43 سنة من سنة 1948 لغاية 1991 وماشافوش غير 6 بطولات دوري !!!أكيد الناس دي شافت حاجة غير اللي شافوها بقية الناس وإختاروا إنهم يشجعوا الزمالك!!

المهم قعدت أفتكر اللعيبة اللي خلتني أبتدي وأفضل أشجع الزمالك لغاية دلوقتي يووووووه إيه الحلاوة دي.أشرف قاسم، نادر السيد، إسماعيل يوسف , خالد الغندور , محمد صبري , حازم إمام , إيمانويل ( أحسن محترف أفريقي في تاريخ مصر ) , أيمن منصور , حسين عبد اللطيف , أحمد رمزي , هشام يكن , تامر عبد الحميد , طارق مصطفي , مصطفى نجم , رضا عبد العال , وغيرهم ............

.إفتكرت دول و للأسف بصيت علي القائمة بتاعة الزمالك زعلت أوي !!! مين دول ؟؟؟ تعالوا نتفرج--------------------------------------------------------
مركز ( بوابة المرمى ) فعلا الناس اللي في المركز أكتر ناس بتستحمل قرف الفرقة كلها زي البواب اللي شايل هموم العمارة كلها يمسح السلم ويمسح العربيات ويجيب الطلبات للعمارة كلها وفي نفس الوقت مايسبهاش عشان يحرسها من السرقة !! ملحوظة ( الإستنساخ لم ينجح في مصر )

1- عبد الواحد السيد : أحسن من قام بحراسة البوابة بس عنده عقدة إسمها الخروج من المرمى لو أي كورة عرضية يلزق في الجون زي مايكون مربوط في العارضة بحبل خفي (بس الوحيد اللي يصلح للإستمرار في الزمالك ولو رحل تبقي خسارة كبيرة جدا)

2- محمد عبد المنصف : تاني أحسن من قام بحراسة البوابة وهو عامة بيبقي في الطيلمانة بيلبس شوية إجوان عجب ويصد كور مايصدهاش غير بوفون (غالباْ ملبوس)

3- عماد السيد : ماعرفش حد بالإسم دا!!!
=============================
مركز ( كبد الدفاع ) قلب الدفاع سابقاْْ
ولكن .... تحول إلي كبد ملئ بالسموم غير قادر علي آداء وظائفه يفشل في التخلص من السموم (الأخطاء) في كل مرة يتعرض فيها الجسم (الزمالك) للمرض (الخطر) ......... زمان كان إسمه قلب الدفاع وأعتقد عشان حاجتين إنه أولاْ يكون راجل وعنده قلب جامد وثانياْ يكون عنده إحساس بمكانه في الملعب.

4 - هاني سعيد: الواحد مش عارف إنت مع مين بالظبط بس أكيد قصير بالنسبة لليبرو (بردو مهم للفرقة)

5- محمود فتح الله: مدافع كويس لكن قلبه قلب فار دايما يرجع قصاد المهاجم مش عارف خايف يعرقله ولا خايف يرقصه بس في الحالتين خايف (بردو مهم للفرقة)

6- أحمد مجدي: اللي عملك مدافع ظلمك واللي أساسا لعبك كورة ظلمك أكتر (لاتعليق)

7- عمرو الصفتي: قلب أسد ودماغ عصفورة وجسم ... (غالبا تجربة هندسة وراثية)

8- كريم ذكري: حواديت وحكايات عن ولد جاي من المصري وبعد كدة بخ (مش مفهوم)

9- وسام العابدي: قلب دفاع منتخب تونس بطولة أفريقيا 2004 اللي أخدتها تونس ماتعرفش هو كويس ولا وحش (ياترى العيب في مين؟ أكيد مش هانعرف)

10- عمرو عادل : ماعرفش حد بالإسم دا
=============================
مركز ( الظهير الخفي ) ... كان إسمه زمان الأيمن لكن مفيش أوفرات بتترفع بالرجل اليمين من المكان دا خالص عشان كدة أصبح إسمه الخفي وبردو لإن لو عايز تهجم علي الزمالك هجمة عنترية فأنا برشحلك المكان دا بكل جوارحي الرقابه هاتلاقيها خفيفة ظريفة لا تتعدى شد من الفانلة (طبعا مش لدرجة إنذار) أو تلامس خفيف (يريح عليك) ومش هاتلاقي أي إشتراك في الأوفر لإن الظهير الخفي بيقف علي بعد 5 متر مكعب من الكورة (حقيقة علمية)

11- أحمد غانم سلطان: عنده إستعداد يجري 120 دقيقة بس ماتطلبش منه حاجات قمة في الصعوبة 1- يرفع كورة بالمقاس 2- يرفع عينه وهو بيجري 3 - يعمل فاول تكتيكي (يعني فاول يوقف بيه اللعب مش يطرد فيه يارب يكون بيقرأ عشان يتعلم)

12- محمد عبد الله: لو أخد الكورة في منطقة الخصم ولوحده وممكن يرفع بكل سهولة تفتكر هايرفعها؟ تبقي متفائل هايدور علي أقرب مدافع ويرقصه ويقف بعدها يبص للجمهور شفته أنا رقصته إزاي وبعدها يرفع وتكون كل مدافعين الخصم جالهم إنذار علي يد محضر إنه هايرفع فتتقطع (لاعب إستعراضي يصلح كممثل لا كظهير أيمن)

13- الناشيء حازم إمام : ماعرفش حد بالإسم دا
=============================
مركز (الظهير المتصابي) .. زي العجوز المتصابي بالظبط بيتظاهروا بكل أفعال فترة المراهقة رغم إنها ولت وعدت من زمان ينزل الماتش يرفع ويشوط ويغطي ويدافع ويهاجم وفجأة وبدون سابق إنذار المفعول ينتهي ويبتدي يحس بتقل في رجليه كأنه خلاص هايموت بس يبقي فرحان بالشويتين اللي عملهم

14- أسامة حسن: تقيل تقيل تقيل يامجنني (مع الإعتذار للسندريلا)

15 - علاء علي: لو تفتح صفحة الظهير الأيسر في تاريخ الزمالك هاتلاقي إن الصفات الجسمانية والعقلية للمركز دا لم تتغير منذ عهد مينا موحد القطرين - (قصير - جسمه ضعيف - لايجيد اللعب في مركز الظهير الأيسر) إذن العيب مش فيه لإنه لم يشذ عن القاعدة

16- ريكاردو: ليه اللعيب دا محترف؟ ليه مايكونش عامل نفسه محترف وهو في الأساس شخص من 70 مليون شخص عايشين في البلد (إحتمال وارد لإن إيه اللي هايخلي لعيب يسيب البرازيل ويجي يبتدي حياته في مصر ؟ مش شايفينها غريبة شوية؟)
=============================
مركز (الوسط المشنافع) المدافع سابقاْ أو (لاعبي الإنتكاس) الإرتكاز سابقا .. أيوة مشنافع وإنتكاس، السبعة اللي تحت دول أكتر من نصهم عايز إعدام و الباقي عايز إعادة تأهيل ويمكن واحد أو إتنين وبقول ممكن يجي منهم مع الوقت اللي هو مش موجود أصلاْ

17- أيمن عبد العزيز: فرعون تركيا القادم برياح التغيير والثورة التركية في الكورة المصرية، وتعال ياعم إتفرج في الملعب ... إيه دا!! إيه اللي أنا شايفه دا!! مين دا؟ إقفل التلفزيون بدل ماخش أضربه!! (تايه، باصات مقطوعة كما لو إنه بيلعب بعين واحدة، هي الكورة في تركيا بقت كدة؟؟)

18- محمد أبو العلا: دا بقي حكاية، هربانة منه علي طول، لقيته في مره في برنامج هابط بيقولك أنا مش عارف هانضم إمتي للمنتخب !!! يانهار مالوش لون!! إنت عايز تنضم للمنتخب !! طيب هاتنضم ليه وعلي حساب مين دا بركات مش طايلها (عديم الإحساس بالمعنى الحرفي والشكلي والعقلي والنظمي للكلمة)

19- أحمد عبد الرؤوف: ممكن يجي منه مع الوقت (إعادة تأهيل)

20- محمد إبراهيم: ممكن يجي منه مع الوقت (إعادة تأهيل)

21- علاء عبد الغني: اللعيب دا مات إكلينكيا في تصادم طائرة مع إتوبيس نقل عام في السعودية (جريدة صوت العقل الفيومية)

22- أحمد الميرغني: لو فضل جسمه بالشكل دا يبقي بلاش منه أحسن من دلوقتي ويبتدي يشوف نادي تاني (إعادة تأهيل)

23 - علاء كمال: ماعرفش حد بالإسم
=============================
مركز (اللي هايعدلوا المايلة) .. صانع الألعاب سابقاْ .. زمان كان المكان دا للعيب رايق بيبدع ويفنن ويباصي كورة مقشرة للهجامة والإرتكاز يأمنه لكن دلوقتي مطلوب منه يدافع ويلتحم ويباصي ويرقص ويشوط ويجيب إجوان يعني من الآخر يبقي فرقة كاملة (ملحوظة: سوبرمان وباتمان وفرافيرو إعتذروا عن الإنضمام عشان الجو في مش مناسب للطيران طوال أيام السنة)

24- شيكابالا : الولد بيموت بالراحة الناس بتحمله أكبر من طاقته ولإنه مش زي بقية الأبطال مابيقولش لأ وبيقعد يحارب في الملعب لوحده بس لاحظت في ماتش الأهلي اللي فات إنه بيلعب من غير نفس يتهئ لي إنه إبتدي يزهق

25- محمود سمير: ماعرفش حد بالإسم دا
مركز (فاقدي الذاكرة) الهجوم سابقاْ .. يتميز لاعبو هذا المركز بالفقدان الجزئي وفي بعض الأحيان الكلي للذاكرة فلايتذكروا أين هم أو ماذا يفعلون في الملعب أو مين الناس اللي لابسة أبيض دي أو أصلاْ إيه البتاعة الأبيض في إسود دي اللي هم قاعدين بيجروا وراها 90 دقيقة دا لو جريوا أساساْ!!!!

26- أجوجو : (المصارعة هي الحل) مفيش حد ينكر إن جسم أجوجو من أكبر مميزاته في الإلتحامات والكرات العالية لكن ...... وآه من الكلمة دي - اللمسة الأخيرة
لما شفت أجوجو في الملعب عرفت المعنى الحقيقي للكلمة دي وعرفت ليه ماراحش نادي كبير في أوروبا رغم لياقته البدنية العالية بس الندم مايفيدش (مهاجم بدون فعالية زي القطة المشمشية حلوة بس شقية)

27- جمال حمزة : واحد صاحبي قالها لي (جمال لما يسترجل عامل زي رونالدينهو لما يتدلع) لعيب ماعندوش غيرة علي الفانلة ولا حتى بيبذل مجهود أراهن إنه بنسبة 99 % ماعرقش في ماتش الأهلي وبس طالع يشاور علي البادج ويبوس الفانلة وحركات مابنشوفهاش غير في مصر وفي الزمالك علي وجه الخصوص (لو مشي مش هازعل ولو قعد مش هازعل عشان في الحالتين هو مش موجود)

28- مصطفي جعفر: ينفع إحتياطي لكن أساسي لأ وألف لأ (أكبر دليل علي صعوبة الموقف في الزمالك)

29- عبد الحليم علي: وادعاْ يا من كنت صديقي (غير مأسوف عليه لقد إنتهي)

30- شريف أشرف: المستقبل بيد الله والحاضر لا يشفع فلتستمر لعل وعسى
=============================

ما رأيكم؟ ..
هل هناك مقالات ترشحونها للمناظرة؟

شكرااااااااااااااااااااااااا يا مستر على الموضوع حلوه جدااااااااااااااااااااا


خصوصا (عبد المنصف و مرجان)

فكرة جميلة ويارب نلاقى قابلية من عند الاعضاء فى المنتدى

انا معاكم وباذن الله اقدراعمل واجيب حاجات تفرح الناس باذن الله

تقبل مرورى

فـيــه حــاجــة غـلــط !!

http://www.zamalekfans.com/Component/Article_Fans/NewsPhoto1_20081123190136.jpg




سيداتى آنساتى سادتى ... معكم المعلق الرياضى زياد عوف من استـــاد الـقــاهـــ ..... يوووووووه غلطت تانى !! انا بكتب مقال مش بعلق على ماتش فى الاستاد ... معلش جلﱠ من لا يسهو .. فى حياة كل واحد يومياً عشرات الغلطات ... الشاطر هو اللى ميكررش غلطه و يقفز من فوقه لأحلامه، مع ان فيه ناس مصصمة تفضل تحت على طووول و مستمرة فى الغلط ! فى مصر احنا على طوووول تحت .. مش لأننا مصممين ع الغلط .. الموضوع ببساطة اننا منعرفش هو فين الغلط عشان نصلحه !!! • هوبا عباس جه ... هوبا عباس اتعزل ... هوبا عباس جه تانى ... هوبا عباس حيمشى عاشر .... اكيد فيه حاجة غلط ! • ادارة و غيرنا .. لاعيبه و جبنا .. مدير فنى و بدلنا .. جهاز معاون من كتر تغييره زهقنا .. مترجم و شلنا .. جمهور و انقرضنا ..... و لسه النتايج زى ماهى من 4 سنين .... فيه حاجة غلط ! • الزمالك بيلعب على استاد ميت عقبة الدولى مع البدرشين بطل الوجه البحرى و القبلى و كسبنا 8 ... و الأهلى كسب القطن 2 بالعافية على استاد القاهرة المتواضع .... مبرووك يا زملكاوية خلاص ضمنا الدورى .. ولا غلط ؟! • للشهر التانى على التوالى الزمالك بيتفوق على الأهلى فى ترتيب اتحاد التاريخ و الاحصاء الدولى ... خسرنا من الجيش و الأوليمبى و كسبنا انبى !! واضح ان الكمبيوتر بتاع الفيفا مهنج و حاسبها غلط ... بالمنظر اللى احنا فيه ده ابشركم بالتصنيف الأول عالمياً قريب جداً .. • نكسب الاتصالات فى آخر كام دقيقة مقبولة ... نقع قدام الجيش مبلوعة ... نخسر بالتلاتة مع الرأفة من الأوليمبى فضيحة .... اكيد اللاعيبة بتشوط ع الجون الغلط ! • ان كل واحد يسيب مذاكرته و شغله و يقعد يتكتك و يفكر مين حيكسب الدورى ده اكبر غلط ... قانون الاتحاد الدولى الجديد بيقول: "الفريق ابو فانلة حمرا بيكسب الدورى و الكاس و عليهم دورى الأبطال هدية " !! لازم نراجع القوانين قبل مانتكلم ... • لما فاكس يوصل الساعة 4:30 يقول ذيع ... و فاكس الساعة 6 يقول ماتذيعش ... و الساعة 9 الشاشة تضلم !! اكيد دى الكاميرا الخفية ... بس برضه فى حاجة غلط ! • سيادة اللواء مدحت شلبى و سيادة النائب أحمد شوبير .... النهارده أهلاوى .. بكره زملكاوى .. بعده الاتنين سبب تدهور الكورة المصرية !! الموضوع مافيهوش حاجة غلط لأن البيزنيس فوق الجميع .. • لما يهاجم (الأهلاوى) علاء صادق الزمالك ده شىء طبيعى، الانتماء غلاب برده .... لما يقطع فى الحكام كل يوم بيزنيس و مصالح و عادى جداً .... لما يمجد فى اللون الأحمر كل 3 دقايق شىء متوقع من مقدم برامج بعيد 180 درجة عن الحياد .... بس لما فجأة يقلب ع اللون االأحمر و يغسل التى شيرت بتايد و يتحول لأبيض و يشرب عصير فراوله و يبقع تانى احمر يبقى فيه حاجة غلط ! • لما ييجى واحد نكرة اسمه جمال حمزة يتمرد نقوله لا يا حبيبى كده غلط ... يجيب جون نهتفله و يبقى حبيب الملايين ... يقول حروح فى الأهلى نعدله العقد و فوقيه بوسه ... يغلط فى خالد الغندور اللى هو برقبة عشرة زيه و برضه ناس بتأيده !! واضح ان فيه ناس مش عارفه الصح من الغلط .. كمل يا جيمى اللى انت بتعمله .. انت صح يا حبيبى .. • مدرب طول الموسم قاعد جنب الجماهير بيتفرج على فرقته من المدرجات ... و كل ماتش يطلعله توأمه من تحت يونسه ... و أخوه فجأة بأه كبير محللى الدورى المصرى ... و رئيس النادى اللى شغال فيه بيشتغل مع دجال بعد الضهر عشان يفك السحر اللى معموله يا عينى. عرفتوه ولا لسه ؟؟ عشان اسهلكوا الفزورة اول حرف من اسمه "حسام حسن" ... اللى فهمه انه كده بأه مدرب ضحك عليه و فهمه غلط ! • بلدوزر مصرى اسمه عمرو زكى كان بيكافح عشان يحترف بره ... و مدرب ويجان مصر عليه و متمسك بيه. رفع اسم مصر عالى و اعلام مصر وصلت مدرجات انجلترا و الطرابيش ظهرت فى استادات لندن ... و هداف الدورى الانجليزى اسمه البلدوزر و كله عينه ع الاسطورة اللى كانت مدفونة مع عباس باشا و دماغه الناشفه. نصيحة من واحد بيحبك: اوعى ترجع الزمالك دلوقتى بالاستقرار العالمى اللى احنا فيه ده ... صدقنى حيبقى اكبر غلط !! لو قعدنا نتكلم من هنا للسنة الجاية مش حنخلص ... للأسف الكورة المصرية كلها غلط X غلطX غلط ... اكيد حد وحش مش بيحبنا و بيكره "مستر سيد" عاملنا عمل !! زيــــاد عـــــوف

الحلقة الثانية

كتب: soury

الزمالك ... محطم كل الأرقام القياسية!

الزمالك هو القطب الثاني للكرة المصرية -كما يعرف للبعض سابقا- فاز بالعديد من البطولات والألقاب المحلية والأفريقية والدولية ومثل مصر في العديد من المحافل على مستوى القارة السمراء؛
أيضاً الزمالك هو أول نادي مصري عربي افريقي آسيوي يحقق افضل فريق في العالم - شهر فبراير 2003 وكاد الزمالك يشارك في بطولة العالم للأندية الثانية قبل أن يتم الغاؤها لأسباب تتعلق بالراعي الرئيسي للبطولة.
في بداية الألفية الجديدة ظهر الزمالك بمشاكل إدارية لم تكن ظاهرة من قبل وعلى الرغم من ذلك استطاع ان يحقق فريق الكرة وغيره من الألعاب الرياضية العديد من البطولات في هذه الفترة,حتى جاءت الانتخابات بما لا يحمد عقباه بتولي مرتضى منصور رئاسة نادي الزمالك ومن هنا بدأت القلعة البيضاء في الانهيار والوقوف على حافة الهاوية.
لن ادخل أكثر من ذلك في التاريخ والأسباب ولكنها مقدمة هامة جدا للأرقام والأحصائيات التي تثبت أن هذا الموسم وبعد نهاية الدور الأول هو أسوأ مواسم الزمالك على الأطلاق والنتائج هى خير دليل. مقارنات سريعة: الزمالك في موسم 2003 - 2004 بقيادة فينجادا لعب 26 مباراة فاز 21 تعادل 5 ولم يهزم أحرز 59 هدف ودخل مرماه 16 هدف وتوج باللقب.
الزمالك في الموسم التالي-موسم انتخابات مرتضى- بقيادة الألماني دراجوسلاف وتبعه بأربعة أشهر البرازيلي كابرال لعب 26 مباراة وفاز في 9 تعادل 9 هزم 8 أحرز 37 هدف ودخل مرماه 30 هدف وانهى الدوري سادساً! الزمالك الموسم الماضي وفي نهاية الدور الأول خسر 18 نقطة حيث هزم فى أربع مباريات وتعادل فى مباراتين خلال 15 مباراة ليس ذلك فقط بل هو الفريق الوحيد من رباعى قمة الدورى المصرى الذى خسر أمام منافسية جميعهم حيث خسر الزمالك أمام الأهلى وبتروجيت وطلائع الجيش والأسماعيلي.
الزمالك هذا الموسم وبعد نهاية الدور الأول بقيادة الألماني هولمان وتبعه المصري رفعت يقدمان أسوأ عروض الدور الأول لتاريخ الزمالك على الأطلاق ويشاركهم موسم الألماني دراجوسلاف حيث ان الزمالك فاز 6 وتعادل في 3 وهزم في 6 وأحرز 18 هدف ومني مرماه 15 هدف وهو في المركز السادس! إذا أستمر الزمالك بهذا المستوى في الدور الثاني ...لا تعليق!
=============================
كتب: hoh

الحقيقة لونها أحمر

للحقيقة ألوان .. و الحقيقة في بلادي ذات لون أحمر .. مهما اعترض البعض ، مهما انفعل أو تزمر .. في
بلادي الأرض و السماء و الهواء لونه أحمر .. البرج و الهرم و العلم و حتى النهر لونه أحمر ..
أنظر للخارطة
خطوط الطول و العرض رسمت بحبر أحمر .. تفرح الأرض أو تحزن و تكتسي أيضا بالأحمر .. فالأحمر زيا
رسميا و الزى غير الرسمي أحمر أكثر ......
منذ مئة عام كان هناك الانجليز .. يطأون الأرض مرحا يحتسون النبيذ .. صرخ المصريون و حرقوا نباتات
الصبار .. استشاط سعد غضبا و أقسم بثورة الأحرار .. ارتدي مع الطلبة لون المجد و الكبرياء .. لونا لا
يعرف زيفا أو مبالغة أو عبارات إنشاء .. الأحمر في وجه الظالم المستبد .. لون الأمة و الكرامة ، لون سعد
بدأ النادي الأحمر فكرة في رأس عمر بك .. يدا بيد مع أنوار الحرية لا ينفك .. و منذ ذاك الحين ذاب الأحمر
في علم مصر .. وذابت الأرض في لون النصر .. هو الأهل و البيت و الوطن و الأرض .. الأحمر هو الشرف و
الكرامة و العزة و العرض .. منذ ذاك الحين حلق النسر يبحث عن الحرية .. يبحث عن كتب التاريخ و
صفحات المجد الأبدية .. النسر الأحمر يزعق بكل شموخ : أنا ابن سعد زغلول .. تحدثوا عني بكل فخر و
لكن تذكروا فالأمر يطول .. هذا أنا الأهلي من الشعب و الشعب مني .. لا معني عندي للفشل و التدني
أفرد أجنحتي في الأربعة اتجاهات .. بين ذراعي الإسكندرية و سيناء و الدرر الباقيات .. ولدت في القاهرة
و عنواني شارع أفريقيا الكبير .. جنسيتي عربي صورتي فوق الجميع أطير ..
علي باب مصر تمثال صالح و التتش و الخطيب .. و في قلب مصر طاهر و حسام وتريكة الرهيب ..
صالح المايسترو صاحب الأخلاق ، قائد محنك لا يعرف نفاق .. و التتش محمود مختار الاسم الكبير ،
رمزا للأهلي للوطن للطفل الصغير .. و الأسطورة صاحب الكرة الذهبية ، بيبو جلاد الحراس خطيب
الجمهورية .. ومارادونا النيل أبوزيد الهلالي ، ممزق شباك بدرجة مثالي .. و حسام الأهداف للعالم
عميد ، صائد قناص بوجه عنيد .. و اللامعقول تريكة الانسان ، ملك متوج في مصر و اليابان .
أبحث في ألبومي الأحمر عن ذكريات .. أجد المحلي و الأفريقي ، أجد ستة وستات .. في مصر و العرب
و أفريقيا السوداء ، أسيك و كوتوكو و الزمالك و الرجاء .. و أجد في صفحة أخري كانون الكاميروني ،
ابن رادس و المولودية و النجم وسوجارا الجابوني .. و أعود للبحث و التنقيب و التدوير ، أجد مجموعة
من أجمل ما رأيت من تصوير .. صورة للوحش اكرامي و ثابت و شوبير البرلماني .. بجوار صورة لهيكل و
مروان الفلسطيني و الحضري عاشق الإسترليني .. و في أسفل الصفحة رأيته يحمل نسر كبير ،
عرفته لأول وهلة صاحب الصورة أمير ....
قلبت الصفحة هالني ما رأيت ، باقي الدرر و أنتيكات البيت .. فهذه صورة من عهد بعيد ، الجنرال
الجوهري لاعب و مدرب عتيد .. و بجواره وحش لوس أنجليس و أبيدجان ، عبده صالح صاحب الصولجان
.. وصوره كبيره للمجري الفذ هيديكوتي ، و فايتسا الفأر الألماني ، وصورة للمجري و البرنس يونس
ورجل الجامعة هاني.. وصورة للفناجيلي مع زيوار و الجندي و مدكور .. و أخري للشربيني و مصطفي
كامل منصور .. و أبو المعاطي و توتو و الضظوي و مكاوي .. و المكير زيزو و صفوت و عامر و الوزير
الأهلاوي .. ثم صورة كبير لبلدوزر بيرامار ، و رمزي الألمان رجل الإصرار .. و الشيخ ياسين مع رمضونا و
البدري و عرابي الأرقام.. و الشيخان و حشيش و شطة و مختار و همام .. و صورة للسايس و جاد الله
و محسن والكروان الشربيني ، زيكو الأوروبي و البارومتر ميهوب اللاتيني .. وصورة غامقة لميلا المصري
عباس ، و الوتد هادي و مشير و أيمن و أجمل كأس .. و في صفحة جديدة حديثة الألوان ، صورة لطلبة
الأهلاوي و رضا الفنان .. وبدر البدور و عبد الباقي و يوسف الشجعان ، و ماهر الترسانة و بن صلاح
الدين البهلوان .. و الهانزاوية المحلاوية عمارة و رضوان ، و كشري و كفتة وكمونة ونخلة كمان .. و صورة
لعبد الجليل و أنور و المنياوي علاء ، و أبو الدهب صاحب القذائف الحمراء .. و صورة من غانا للأسد
إيبواجي ، و ستة بيبو و ريان و و عبد الحفيظ و ناجي .. و أحدث الصور من أنجولا لراقص التانجو
سيباستياو ، و أمامه فلافيو لا دروجبا ولا نداو .. و في قلب صور اليابان صورة صخرة حمراء ، عليها
بالعربية جمعة و شادي ضد الأنواء .. وصورة لشوقي الإنجليز الرهيب ، و متعب المتعب كربونة
الخطيب .. وصورة زئبقية لللولبي بركات .. النحاس و الشاطر و بلال الآهات .. و في نهاية الصور صورة
صقر بلجيكي فنان ، و عجيزي و محمدي و تونسي جلبان .
أغلقت الألبوم ففاجئني عنوانه و صورة الغلاف .. الاسم نادي القرن و الصورة لبرتغالي خطاف .. ظننته
قرصان أو ملاح ، و لكنه بنظرة إمعان عرفتة جوزيه السفاح .. صائد الأرقام و الألقاب ، خالب العيون ، ساحر الألباب جلست أفكر في أحمر الأبطال ، منذ قرن يضخ في الأجيال .. و كتبت عن الأهلي و ما كل ما في القلب
يقال .. عجز القلم أحيانا و استعصي في يدي المقال .. فالأهلي شهيقي و زفيري و الأحمر حب
عضال .. لا تسألوني يا رجال .. عن سني عن اسمي عن أية مجال
و لكن وفقط شقوا صدري تجدوه يقبع لا يزال .. الأهلي أجمل و أعظم كرنفال .. عنوانا للتحدي و
الرجولة و النضال .. لا يطاله الموت محال .. يضخ أجياله و لا يعرف زوال .. إسألوا عنه في الفيفا في
الكاف في المونديال
تعرفوه جيدا ( فالأهلي أهلي و أهلك حقيقة لا خيال )

فين المشاركات والآراء في الموضوع ؟

ايه الروعه وخفه الدم دي يا مستر اسامه
بجد موضوع في منتهي الروعه
وبالراحه شويه علي الزملكاويه كفايه عليهم فريقهم

شكرا على الموضوع الجميل

بسراحة انا اهلاوى وفرحت جدا فى الحلقة الاولى والثانية

ايه الروعه وخفه الدم دي يا مستر اسامه
بجد موضوع في منتهي الروعه
وبالراحه شويه علي الزملكاويه كفايه عليهم فريقهم

شكراً مسيو وليد .. على مرورك الكريم .. وعلى رأيك في الموضوع

شكرا على الموضوع الجميل

بسراحة انا اهلاوى وفرحت جدا فى الحلقة الاولى والثانية

شكراً الباشا هنري .. على تعليقك على الموضوع .. وانتظر المزيد من الحلقات المميزة أن شاء الله ..

انا شايفه كلو تقطيع ف الزمالك وتمجيد ف الاهلى

وبعدين هو مفيش بطوله معترف بيها غير بطوله الدورى يعنى

انا شايفه كلو تقطيع ف الزمالك وتمجيد ف الاهلى

وبعدين هو مفيش بطوله معترف بيها غير بطوله الدورى يعنى


يا نغم أنا قلت في بدايه الموضوع الآتي:
"ستكون المناظرة بين مقالات الأهلاويه والزملكاويه .. بحيث تعرض مقاله أهلاويه ويقابلها في نفس الوقت مقاله زملكاويه .. بكل حياديه ..
ولست مسئولاً عن أن الأهلاويه أو الزملكاويه بينقدوا أنفسهم بأسلوب ساخر .."

لذا إذا كان عندك مقالات أو موضوعات أخرى تعجبك أعرضيها فالموضوع مطروح للجميع للمشاركه فيه .. كنوع من الدعابه في أطار منافسه والتي اتمنى أن تكون شريفه .. وتتسم بالروح الرياضية.

يا نغم أنا قلت في بدايه الموضوع الآتي:
"ستكون المناظرة بين مقالات الأهلاويه والزملكاويه .. بحيث تعرض مقاله أهلاويه ويقابلها في نفس الوقت مقاله زملكاويه .. بكل حياديه ..
ولست مسئولاً عن أن الأهلاويه أو الزملكاويه بينقدوا أنفسهم بأسلوب ساخر .."

لذا إذا كان عندك مقالات أو موضوعات أخرى تعجبك أعرضيها فالموضوع مطروح للجميع للمشاركه فيه .. كنوع من الدعابه في أطار منافسه والتي اتمنى أن تكون شريفه .. وتتسم بالروح الرياضية.

إنتوا اللى قولتوا:049gc0:

:slap1qk6::slap1qk6:


تاكس تاكس ..اليابان ياسطى ...

- لا يابنى مش طالع انا لسه طالع من الكمين والرخص مسحوبة ..

- معلش يااسطى اطلع بقا وربنا هيسترها معانا متقلقش انا حاجة كبيرة اوى فى البلد ومفيش حد هيقولك رخصك وبرضه الاحتياط واجب بلاش تطلع على اليابان علطول لف بينا من المكسيك دول عالم غلابة وملهمش فى حاجة يااسطى وياريت تقف فى مكسيكو سيتى عشان عاوز اطلع اسلم على خالتى شكشوكة هى طيبة قوى وملهاش فى حاجة ساكنة فى الدور ال13 ..وحالتها زفت وعاوز اديلها حاجة تسند بيها نفسها لاخر الشهر

- مكسيكو سيتى البلد ولا مكسيكو سيتى المحطة يابنى

- انت هتهزر يااسطى شغلنا اى حاجة نسمعها ونروق الكلام وياريت لو عندك اى حاجة لسعد الصغير ..

- انت تؤمر اسمع اغنية سعد الجديدة ... الاهلى فى كل حتة عمالى يشيل اجوان وزى مالبس الكمين ..شال فى اليابان

- الا صحيح يابنى انت رايح اليابان ليه

- انت مش عايش ولا ايه يااسطى فى هناك كاس العالم للاندية والاهلى العالمى هناك ..وانا رايح اتفرج على الماتش من ارض الملعب واشوف الاهلى فخر العرب ومصر وافريقيا والامم المتحدة وعم عبده الحلاق وابراهيم سكلانس الى ساكن فى الشارع الى ورانا

- بطولة العالم يااابوى يعنى هتلاعبوا البرازيل والارجنيتين وهتطلعوا فى التلافزيون على المحطات الاوربية .

- لا يااسطى مش البرازيل والارجنيتين ..من الاخر كده البطولة ديه مفيهاش غير فريقين الاهلى (ومانششتر يونايتد) واحنا رايحن نغلب مانششتر ده ونرجع بالكاس ..

- مانششتر مرة واحدة ..وكمان اول ماتش

- فى ايه يااسطى انت شادد كولة على الصبح ولا ايه ..اول ماتش ده مع ****وكا فريق كده عامل زى مركز شباب اولا عم سيد البرعى الى جنب الخرابة بيلعب فى المكسيك فى المركز ال13 .. واحنا الاهلى ابطال مصر وافريقيا يعنى ماتش نزهة بالنسبة لنا لو اطقم اللبس بس نزلت الملعب من غير لاعيبة هنكسبهم يعنى كسبانين بس ده احنا الاهلى وعنجنا ابوتريكة اكبر شعبية فى العالم واحسن لاعب فى العالم واحسن كل حاجة فى العالم

- ايون ابوتريكة سمعت عنه ..ده مشهور جدا

- اخير يااسطى عرفت حاجة بدماغ الكولة الى انت عملها ديه

- اصل يابنى كان راكب معايا شاب تمام وكفاءة اسمه ياسر وكنت سامعه بيقول ده يستاهل جائزة مهرجان كان السينمائى ...غير انه يستحق لقب الفراشة الذهبية ببدلتين الغطس الى عنده واحدة لمنطقة الجزاء وواحدة لبرة المنطقة ..ومن ساعتها عرفت انه لاعب كبير خلص جوائز الكورة وبيدوروا يدوله جوائز السباحة والسيما..

- مين ياسر ياسطى ده ..ده (وقبل مايكمل الكلام لبس قفا على قفاه سمعته مكسيكو سيتى كلها نفر نفر)

وبعد مسافة طويلة وعلى ابواب اليابان ايقظ السائق المشجع الاهلاوى النائم ...

- اصحى يابنى وصلنا اليابان..

- بجد يااااسطى ..وجينالك يايابان .. وزى ماهنيدى نيم الصين من المغرب احنا هنيمك من الضهر يايابان .. احنا الاهلى يايابان .. انتى مين

- الاستاد اهوه يابنى اجى اخدك امتى

- بعد النهائى ياسطى انت عارف احنا مش هنتنازل على اقل من النهائى ونغلب مانششتر ..

- على العموم خد نمرتى وابقا رنلى وانا حاجى اخدك علطول

دخل صاحبنا الاهلاوى الاستاد وكله مفعم بالحيوية والنشاط وعمال يجعر ولا قطن ولا كتان الاهلى فى اليابام والسنة الجاية ولا فجل ولا كرات الاهلى فى الامارات ..ووفجأة وهوبااااااا الهدف الاول للاهلى احرزه لاعب ****وكا فى مرماه من خطأ دفاعى وهوبا الهدف التانى للاهلى وصاحبنا عمل يتنطط احنا الاهلى انتوا مين ..احنا الاهلى العالمى الكبير اوى ..وانتهى الشوط الاول ..

اما الشوط التانى حدث ما حدث (مش عاوز اقول قلة الادب الى حصلت ياجماعة مهما كان دول اخوتنا برضه والاهلى فريق مصرى ولازم نحافظ على شعورهم (الى هما كانوا بيشدوا فيه النهارده) فيها ايه يعنى لم يفضحوا مصر وافريقيا عادى بتحصل كتير وفيها ايه لما يشيلوا 4 مع الرأفة والماتش كان اقل واجب يخلص 7 ولا حاجة عاااادى وفيها ايه لما يقعدوا شوط كامل ميلمسوش كورة برضه عااادى .. منبقاش قلبنا فسفورى كده من جوه بتحصل كتير )

وهنا خرج صديقنا يبكى وقابل احد الاصدقاء الاهلاوية ..

- شوفت الى حصل ..شوفت الى حصل ..ضاع الحلم ..ضاع استك الشراب

- منه لله التحكيم هو السبب

- فعلا منه لله الحكم فين ضربات الجزاء وفين والطرد ..احنا عندنا الحكومة بتصرفلنا على كل ماتش ضربتين جزاء وطرد احنا لازم نعمل حاجة مظاهرات نسحب السفير من اليابان ..منشتريش منهم اجهزة كهربائية نعمل حاجة نردعهم بيها

- اه عندك حق ازاى ابوتريكة مايخدش ضربة جزاء انا اطالب مجلس الاهلى انه يستقيل لو مش هيعرف يجيبلنا حقنا فى الماتشات ضربتين جزاء وطرد ويلغوا التسلل

- لا مجلس ادارة الاهلى قايم بمجهوده كامل انا سمعت انهم تقدموا للجنة المنظمة للبطولة بيطالبوهم ان الى يحكم لنا الماتش بتاع المركز الخامس والسادس سمير عثمان ..

- يحيا العدل كده اطمنك اننا هنكسب زى مابنكسب فى مصر ..واهوه برضه المركز الخامس نعمة برضه

- طبعا المركز الخامس نعمة بس انا الى مزعلنى اننا مش هنلاعب مانششتر كان نفسى نعلم عليهم وخاصة كريستيانو رونالدو ..عشان الواد ده مغرور ومفكر نفسه حاجة

- صح كنا هنعلم عليهم تخيل كريستيانو رونالدو وهو بيتعلم من كريستيانو عجيزى ولا رونى وهو بيتعلم من فلافيو ..زمانهم بيبوسوا ايديهم وش وضهر انهم فلتوا من الاهلى ..

وهنا احس المشجع الاهلاوى بفقدان الامل فى انه يعلم على مانشستر يونايتد فقرر ان يرجع بلده ويتابع الفريق وهو يلعب على المركز الخامس من منازلهم واتصل بسائق التاكس ..وجاء سائق التاكس..


- ايه يابنى مش قولت مش هتروح غير بعد النهائى

- معلش يااسطى تعبان وية قولت اتابع البطولة من بيتنا

- طيب وماتش الاهلى خلص كام

- 4 -2 ياسطى

- الاهلى جاب اربعة بس فى الفريق التعبان ده .. وازاى فريق زى ده يجيب فى الاهلى هدفين اكيد كان فى حاجة غلط .

- لا الاهلى خسر اربعة

- ههههههه هتشتغلنى ياواد ياعفريت هو الاهلى بيخسر برضه

- لا والله بجد اصل عاوز اقولك حاجة هو ده مستوى الكورة الافريقية ...


- لا ..لحد كده واقف انا عامل دماغ كولة اه .. لكن تستهين بقارتى ماما افريقيا لا .. افريقيا طول عمرها جااامدة واحسن من امريكا الشمالية الى ملهاش فى الكورة اساسا ثم ايه المكسيك ثم مش بتشوكا ده الى النجم الساحلى غلبه وشرف افريقيا وصعد بعد اما اخد البطولة على حسابكم فى ارضكم ووسط جمهوركم ..ثم مش انت كنت عامل لى دكر بط واحنا فى السكة وعمال تقول احنا واحنا واحنا .. فوق من الوهم الى انتوا عايشين فيه ..مش تقعدوا تتفرجوا على كابتن ماجد بالليل وتصحوا الصبح تتوهموا انه الاهلى ..منها لله سبيس تون من ساعة مادخلت كل بيت وهى خلت كله عايش فى كوكب اكشن ..هو ده مستواكم المحلى اخركم محلى .. ده لو عرفتوا تعدوه اساسا .. بس ارجع واقول العيب مش عليكو .. العيب على الاعلام الاحمر الى قعد ينفخ فيكم وعمل منكم وحش .. وانتوا ياحرام قطة ...لكن عندما يجعل الاحلام من القطة اسدا ويصدق انها اسد ويخاف الاقتراب منها ..



- براحة براحة يااسطى فى ايه ..انت ايه ..الى انت متعرفهوش بقا ان لاعيبة الاهلى قصدة انها تتغلب علشان هما راحوا بدرى عن كل الفرق (فرحانين انهم رايحين اليابان بقا وهيجيبوا الديب من ديله) فلقوا الجو ساقعة قالوا يرجعوا بدرى ..


- بقولك ايه ريح بقا صدعتنى انتوا مفيش ولا مرة ابدا تخسروا بمجهودكم



- بقولك ايه يااسطى انت شكلك عميل .. احنا الاهلى العالمى .. نادى القرن ..نادى البطولات العالمى وتالت نادى عالمى .. واحنا كل حاجة .. وكل حاجة احنا و احنا واحنا واحنا ووووووووو احنا ولا حدش سمى علينا
ا

دخل قول حاجة للخالة ****وكا


..................

طبعا مش انا اللى كتباه:redface:

...............

:abdoog8:

ممكن ان اختلف فى الرأى معك Mr.Osama
لان بصراحة حاليا على الساحة الاهلى مكتسح بقوة والزمالك فى تراجع مخيف

ممكن لو متوازنين نعمل المقارنة دى

الاهلى ...>> بطولة افريقيا والدورى وكاس العالم للاندية وانتصارات على جميع الاصعدة (محدش يقول دة حقق نتائج خايبة فى كاس العالم للاندية) دة شرف ((((لمصر))) ان فريق يوصل اصلا
الزمالك ....>> كاس مصر
بلاضافة لان الادارتين تختلفان من وجهة نظرى
فأدارة الاهلى .. مترابطة ومتماسكة الى حد كبير (تبعا لنتائج الفريق كجزء...والنادى الاهلى ككل)
اما عن الزمالك... فالنتائج فى تراجع مش متوازنة

ربنا يكون فى عون الزمالكاوية لانهم بصراحة من غير قوة فريقهم الدورى ملوش طعم(( مع كامل احترامى لباقى الفرق))
ضلع اساسى فى الدورى وبالتالى لمنتخب مصر

ممكن من وجهة نظرى ان الموضوع يكون (كيفية علاج السلبيات سواء للاهلى او للزمالك)

وثانية أأكد على انى احترم جميع اراء السادة المشاركين
واختلاف وجهات النظر امر وارد فى اى موضوع
واسف على التتطويـــــــــــــــل

تاكس تاكس ..اليابان ياسطى ...
- لا يابنى مش طالع انا لسه طالع من الكمين والرخص مسحوبة ..
طبعا مش انا اللى كتباه


ممكن ان اختلف فى الرأى معك mr.osama
لان بصراحة حاليا على الساحة الاهلى مكتسح بقوة والزمالك فى تراجع مخيف
الاهلى ...>> بطولة افريقيا والدورى وكاس العالم للاندية وانتصارات على جميع الاصعدة (محدش يقول دة حقق نتائج خايبة فى كاس العالم للاندية) دة شرف ((((لمصر))) ان فريق يوصل اصلا
الزمالك ....>> كاس مصر

إلى نغم .. أنا حددت الموضوع يكون .. كنوع من الدعابه في أطار منافسه والتي اتمنى أن تكون شريفه .. وتتسم بالروح الرياضية .. وليس ما ذكرتيه من تجاوزات .. عموماً الأمر متروك للمشرفين والأعضاء للحكم على الموضوعات وتوضيح ما إذا كان موضوعك به تجاوزات أم لا ..

إلى الأخ/ محمد .. الاختلاف في الرأي لايفسد للود قضية .. أنا تركت المجال للتعبير عن الآراء من الطرفين واشترطت أن تكون كنوع من الدعابه في أطار منافسه والتي اتمنى أن تكون شريفه .. وتتسم بالروح الرياضية .. ولكن هناك من يخالف ولا يلتزم بالروح الرياضية ويبدأ في التجاوزات .. ويجب إلا ننساق وراء الخطأ ..

مشكووووور جدا Mr.Osama
وواضح ان الاخت نغم_18 زمالكوية متعصبة شوية

وانا بصراحة على الرغم من انى مش اهلاوى ولا زمالكاوى الا انى حزين لتذبذب مستوى الزمالك الضلع والدعامة الثانية للمتعة اولا وللدورى ثانيا((مينفعش مباراة اهلى وزمالك تكون من طرف واحد))
ولمنتخب مصر اولا واخيرا

يعنى سبت كل اللى مكتوب ع الزمالك فوق
وجيت ع الموضوع الوحيد اللى ع الاهلى

تريقه عادى يعنى ما شتمتش حد

كل المواضيع اللى فوق كده ومرجان وبتاع

يعنى سبت كل اللى مكتوب ع الزمالك فوق
وجيت ع الموضوع الوحيد اللى ع الاهلى

تريقه عادى يعنى ما شتمتش حد

كل المواضيع اللى فوق كده ومرجان وبتاع

إلى الأخت / نغم
نفسي أعرف في أيه في كل اللي فوق؟ فالكلام كله دعابه وليس تجريح في سلوك أشخاص كما ذكرتي في موضوعك عن أبو تريكة .. ومش عارف ليه الموضوع بدأ يأخذ صورة غير محببه بها تعصب واضح بدلاً من رسم البسمه على الشفاه عن طريق النقد البناء الهادف بعيداً عن التعصب الذي يولد الحقد والكراهيه..

الحلقة الثالثة
خالد طلعت (http://www.filgoal.com/Arabic/EditorOpinions.asp?EditorID=9&SecID=)

أخطاء شوبير


في البداية أود أن أؤكد أنني من عشاق "الاعلامي" أحمد شوبير وأكن له كل التقدير والحب والاحترام، بل وأنني أعتبره مثل أعلى يحتذى به في عالم الاعلام الرياضي الذي تدرج فيه خطوة خطوة حتى أصبح الاعلامي الأول في مجال الرياضة في الوطن العربي ولكنه وقع في بعض الأخطاء في الفترة الأخيرة أتمنى أن يتلافاها في المستقبل.

وأتمنى أن يتقبل شوبير - مع حفظ الألقاب - نقدي له ونصيحتي لأنها تأتي من أخ أصغر يحبه ويتمنى له النجاح ويخشى عليه من السقوط من على القمة التي اعتلاها خلال الفترة الأخيرة.

ودعوني أقدم لكم رأيي الشخصي في الأخطاء التي وقع فيها شوبير في الفترة الأخيرة والتي ربما هو شخصيا لا يشعر بها.


أولا: هجومه العنيف على مجموعة "ألتراس أهلاوي"

يجب أن أؤكد أنني ضد التعصب الكروي ولا أقبل الخروج عن النص الذي تقوم به بعض الجماهير ومن ضمنها مجموعة الألتراس.

ولكن الحل ليس في الهجوم عليهم بعنف وقسوة و"فضحهم" عبر وسائل الاعلام مثلما فعل شوبير، خاصة وأنهم شباب صغير السن لن يأتي معهم العنف والقسوة بنتيجة ولكنه سيولد مزيدا من العنف منهم.

كما أن هجوم شوبير على هؤلاء جعل حوالي 100 فرد منهم يتعرض للحبس لمدة تزيد عن 24 ساعة رغم أن الكثير منهم لم يفعل شيء خطأ وما فعلوه مجرد القاء بعض الصواريخ على الملعب وهو تصرف خاطىء ولكن عقوبته لا تصل إلى الحبس.

وكان الأولى بشوبير أن يتعامل مع مجموعة الألتراس بهدوء وحنكة ويقوم باستضافة بعضهم سواء في البرنامج أو عبر الهاتف ومعرفة أرائهم وتصرفاتهم ومحاولة تقويمهم بهدوء وبعقل.

ثانيا: تعيينه مستشارا في اتحاد الكرة

لم يكن قرار تعيين شوبير مستشارا في اتحاد الكرة في حد ذاته خطأ كبيرا، ولكن الخطأ الأكبر هو اعلان شوبير في أكثر من مناسبة وعبر برنامجه في لقطات مسجلة أنه لن يقبل الدخول إلى اتحاد الكرة بالتعيين تحت أي مسمى وفي أي منصب، وأنه اكتفى بالفترة السابقة التي خدم فيها الاتحاد، وأنه لن يقبل العودة إلى الاتحاد الا عبر الانتخابات، فماذا حدث وما الذي جعله يغير رأيه؟

فشوبير حاول في البداية الدخول إلى اتحاد الكرة كعضو معين الا أن اللائحة الجديدة واصرار المهندس حسن صقر رئيس المجلس القومي للرياضة على تنفيذها حرموه من ذلك، فعاد ودخل كمستشار!

تعيين شوبير مستشار لاتحاد الكرة يعد التفافا على اللوائح والقوانين وكان من الأفضل له أن يستمر على رأيه ويبتعد عن الاتحاد لفترة مؤقتة ثم يعود الدورة المقبلة عبر الانتخابات، ووقتها كان الجميع سيحترم قراره ويسانده.


ثالثا: موقفه من قضية التوأم حسن في لقاء المصري وبجاية

شن شوبير هجوما حادا على التوأم حسام وإبراهيم حسن بسبب تعديهما على حكم لقاء المصري وشبيبة بجاية، والجميع وبما فيهم أنا يعلم علم اليقين أن التوأم أخطأ خطأ كبيرا، ولكن كان يجب على شوبير كاعلامي محايد أن يستضيف التوأم أو على الأقل يسمح لهما بمداخلة لمعرفة أبعاد الموقف ويسمح لهما بالدفاع عن أنفسهم ويترك الحكم للجمهور، ولكنه منعهما من ذلك وفرض على الجمهور رأي واحد فقط.
تعيين شوبير مستشار لاتحاد الكرة يعد التفافا على اللوائح والقوانين وكان من الأفضل له أن يستمر على رأيه ويبتعد عن الاتحاد لفترة مؤقتة ثم يعود الدورة المقبلة عبر الانتخابات

كما أن الخطأ الأكبر أن شوبير تعهد التوأم بعقوبات كبيرة من اتحاد الكرة المصري رغم أنه ليس عضوا فيه، والأغرب أنه بعدما هدد التوأم بفضح "خبايا وأسرار" اتحاد الكرة ومسؤوليه تراجع شوبير عن تهديداته وانتهى الموضوع ولم يوقع الاتحاد المصري أي عقوبة على التوأم.

رابعا: الكرة مع شوبير .. أم مجلس الشعب مع شوبير

تحول برنامج "الكرة مع شوبير" إلى برنامج سياسي وشعبي وأصبح شوبير يتطرق لقضايا شعبية وسياسية لا دخل للمواطن البسيط الذي يشاهد برنامج رياضي بها، وللأسف أصبحت معظم "المداخلات التليفونية" في البرنامج تأتي مع أعضاء داخل مجلس الشعب هم أصدقاء لشوبير بدلا من أن تكون مع نقاد رياضيين أو لاعبين أو مدربين.

خامسا: موقفه الشخصي من مرتضى منصور

وأعود وأكرر مجددا أنني لست صديقا لمرتضى منصور ولا أتمنى أن يكون هو الرئيس القادم للزمالك، ولكن ما فعله شوبير من قبل بتخصيص حلقتين كاملتين بغرض الهجوم فقط على مرتضى منصور لم يكن ذلك اعلاما هادفا أو مفيدا، ولكنه كان أمرا شخصيا بحتا ، وما زاد الشكوك حول الهدف من هاتين الحلقتين هو علاقة الصداقة التي تجمع بين شوبير وبين ممدوح عباس رئيس الزمالك السابق.

وكان الأولى أن يقدم شوبير مواضيع مفيدة وهادفة بدلا من أن يضيع وقت البرنامج في هجوم على شخص مهما كان.

سادسا: استفزاز مراسل قناة "الحياة" لجماهير الأهلي

قام مراسل قناة الحياة باستفزاز جماهير الأهلي في أكثر من مرة خلال مباريات الفريق الأحمر الأخيرة باشارات غير لائقة ، وتكون هذه الاستفزازات هي السبب الأكبر في هتاف الجماهير الحمراء ضده وضد شوبير نفسه، وقد أكد لي هذه المعلومة العديد من جماهير الأهلي في عدة مباريات مختلفة.

واذا كان شوبير يعلم ذلك ولم يفعل شيئا فهو خطأ كبير منه، أما اذا كان لا يعلم فالخطأ يكون أكبر.

خلاصة الكلام:

في نهاية حديثي أود أن أؤكد مجددا أنني مازلت على علاقة صداقة بشوبير أعتز بها جدا، وما كتبته هنا هو نصيحة مخلصة بعدما لم يصبح شوبير محبوبا من الجميع مثلما كان من قبل، وأتمنى أن يعود شوبير مجددا وسريعا لمكانته في قلوب الناس أولا قبل أن يعود لمكانته كاعلامي ومسؤول ناجح ومحايد.
==========================================
كتب : هيثم نبيل

منذ فترة قصيرة تشرفنا بالمشاركة بشكل رمزي في حملة عمرو خالد ضد المخدرات ومعالجة المدمنين ("حملة حماية " ) .

وعندما شاهدت حلقة الثلاثاء الماضي من برنامج الكابتن أحمد شوبير الذي أعتز به كثيرا ورأيت اصراره على محاربة مجموعات الأولترا في كل الأندية سألت نفسي ولماذا لا تتحول الحملة الى شباب مصر بالكامل ؟؟

لماذا لا يحول شوبير - وهو شخصية عامة تحظى باحترام الكثيرين وله مكانة سياسية وإعلامية كبيرة- لماذا لا يحول الحملة من فئة معينة ندعو الى القبض عليها ووضعها في السجون الى حملة لصالح شباب مصر بالكامل .

سنكون أول من يساند الكابتن شوبير .. وسنكون أول من يجتمع معه لنرى ماذا يمكن أن نقدم لهؤلاء الشباب (الصغير) كما وصفهم الكابتن شوبير .

سنقف معه يدا بيد حتى نصل الى الهدف الأسمى بالنسبة لنا وهو (مصلحة شباب وطن) وشباب الوطن هذا وكما قلنا من قبل هو رأس حربة هذا الوطن.. وهو الشباب الذي يتعلم ويعمل ويبتكر ومن المفروض أن كل الدول في العالم تتعامل مع هؤلاء الشباب على أنهم (رأس مال الوطن).

من هنا ندعو الكابتن شوبير وجميع من لهم صلة بشباب مصر .. نعم نحن نتمنى أن ينصلح حال جميع شباب مصر وليس جماهير الأولترا فقط.

وأختلف مع الكابتن شوبير فيما قاله بخصوص الأمن في حلقته .. وكابتن شوبير يعلم مدى مقدار تقديري وحبي له ولكن أن نشيد بالأمن لأنه يذهب الى بيوت الناس في منتصف الليل ليأخذ منها (شباب مصر) بدون اتهام معين وبدون أذن تفتيش وبدون أي شئ قانوني فيما عدا – قانون الإرهاب - فهذا هو ما يجعل هؤلاء الشباب (يكرهون مصر) ) آسف على هذا التعبير) ويلجأون الى جيفارا وغيره كما قلت أنت يا كابتن شوبير.

أن يتعامل الأمن بمبدأ (احنا بنقبض عليك علشان نتوقع أن انت حتعمل شغب في الملعب) فهذا أمر غير مقبول ولا يحدث في أي مكان في العالم .. اذا كنا نعلم هؤلاء فكل ما عليكم فعله أن تمنعوهم من دخول الملاعب أو أن تقبضوا عليهم وهم يقومون بعمل غير قانوني في الملعب أو في أي مكان أخر .. ولكن أن تصل الفوضى لكي ندخل بيوت الناس ونقبض عليهم لمجرد أننا – نشك – في أنهم سيشعلون ( شمروخ) في الملعب فهو شئ مضحك!

كابتن شوبير ... نعم نريد أن نقف معك في حملتك من أجل الوصول بالتشجيع الجماهيري الى أفضل شكل ممكن ولكن .. نريد منك أيضا أن تتحدث عن معاملة الأمن مع جماهير الكرة – علشان احنا بتوع كورة لكن لو حنتكلم على الأمن يبقى عايزين نتكلم في حاجات كتير أوي - وكيف يمكن لنا أن نذهب لمباراة كرة قدم لكي نحترم أنفسنا وليس لكي نخلع الأحذية قبل دخول المدرج!

إذا أردتم أن تنهو مشاكل المدرجات والجماهير عليكم أن تنهو مشاكل كثيرة جدا في هذا المجتمع أولا :

عليكم أن تنهو مشاكل الثقة بين الشباب ووطنه وتقنعوا هذا الشباب أنه له دور في هذا الوطن وأنه عنصر مؤثر فيه.

ان تجعلوا الأمن يتعامل مع الجماهير عموما والشباب خاصة على أنهم بني أدمين لديهم – آمال ولديهم أحلام – تتحطم دائما ويجب أن نتعامل معهم بشكل مختلف تماما عن معاملة المجرمين.

عليكم أولا أن تقاوموا الرشوة التي سمحت لدخول الشماريخ في ملعب الإسماعيلية ولن أوضح أكثر من هذا!!

عليكم أن تعاملوا جماهير الكرة على أنها جماهير كرة وليسوا مجرمي حرب.

عليكم أولا أن تعيدوا الثقة لهذا الشباب في وطنه أولا وفي رموز الوطن ثانيا ثم في أنفسهم ثالثا.

عليكم أن تتعاملوا مع هذا الشباب بعقلية مختلفة لأن الشباب أصبح يعرف كل الحقائق من النت ومن الفضائيات المفتوحة ولم يعد يستمتع أو يتابع أي شئ – حكومي – حتى ولو كان تليفزيون لأنه فقد الثقة تماما في كل من هو منتمي لمنصب حكومي في هذا الوطن .. وهذه كارثة لو عرفنا معناها ما كان هذا حالنا.

كابتن شوبير .. المشكلة أكبر كثيرا من مشكلة – أولترا أهلاوي وزملكاوي واسمعلاوي – المشكلة يا كابتن شوبير مشكلة – شباب مصري فقد الثقة في وطن وفي رموزه – وأصبحت ملاعب الكرة متنفس له لكي يخرج كبته بكل الطرق المشروعة وغير المشروعة وبدأ يحاول أن ينتمي لأي شئ أخر غير الوطن الذي فقد الثقة فيه .. الا هل بلغت .. اللهم فاشهد !

رسالة سريعة على الماشي:

الإنسان الذي يموت ينقطع عمله إلا من ثلاث ... والإنسان الذي يعيش وهو – جبان – ينقطع عمله من كل شئ على الرغم من أنه حي !! ولكنه بالنسبة للجميع – ميت من سنين بس بيعافر !!!

واضح يانغم ان زى مقال مستر أسامة ان كلامك كله تجريح وكلام ملوش لازمة ويثير التعصب والخروج عن الروح الرياضية
كل الى كتبة مستر اسامة ليس الا روح دعابة وليس هنالك تجريح او تعصب او خروج عن الروح الرياضية كما فى مقالك

و معلشى واضح ان الى صاحب المقالة دى انسان مش محترم علشان فية كلام خارج عن الادب مثل

فى ايه يااسطى انت شادد كولة على الصبح ولا ايه ...............

****وكا فريق كده عامل زى مركز شباب اولا عم سيد البرعى الى جنب الخرابة بيلعب فى المكسيك فى المركز ال13 .......

اخير يااسطى عرفت حاجة بدماغ الكولة الى انت عملها ديه ......................

- مين ياسر ياسطى ده ..ده (وقبل مايكمل الكلام لبس قفا على قفاه سمعته مكسيكو سيتى كلها نفر نفر)

الصراحة جميع الكلام الى فى المقال خارج عن الادب

وانا مش هرد عليكى يانغم علشان احنا يامة قولنا وانتى عارفة الفرق بين الاهلى والزمالك اكتر منى
ومش هتعصب زيك كدة

وشكرآ ليك يا مستر اسامة على المقالات وياريت الاعضاء يبقى حوارهم حوار مثالى لا يخرج عن اداب المسلم المصرى

والى يخرج عن كدة يبقى .........

ارجوا تكونوا فهمتوا كلامى

شكرآ ليك يامستر على الموضوع الرائع من الاستاذ الاروع وياريت تتقبل مرورى

يا جماعة ياريت نهدى شوية ديه مقالات سخرية اينعم كلها على الزمالك اقولكوا ليه مع انى زملكاوى فريق عمرة ما فرح جمهورة عمرة ما خد بطولة عدلة اكيد هنتريق عليه والاهلى كمان هنتريق عليه والاسماعيلى كمان هنتريق عليه والكل هنتريق عليه

ارجو ان نلتزم بحدود الاداب العامة

الأهلي .. هل من منافس؟



حطم النادي الأهلي آخر الأرقام القياسية المسجلة باسم غريمه التقليدي الزمالك بعد فوزه على الصفاقسي التونسي اليوم الجمعة 6 فبراير 2009م في كأس السوبر الإفريقية.
وكان العملاقان المصريان متساويان في الرقم القياسي لعدد مرات الفوز بالبطولة، إذ انتزع كل منهما اللقب في ثلاث مناسبات.
ولكن بحصول النادي الأهلي على الكأس الرابعة في تاريخه بعد تمكنه من إسقاط الصفاقسي التونسي بطل الكونفيدرالية في استاد القاهرة الدولي، لينفرد بالرقم القياسي.
وكان الأهلي والزمالك مشتركين أيضا في الرقم القياسي لعدد مرات الفوز بدوري أبطال إفريقيا برصيد خمس بطولات لكل منهما، قبل أن يسجل الأهلي اللقب السادس في نوفمبر الماضي وينفرد بالرقم.
بالرغم من أنه كان يبدو أن انتزع الرقم القياسي لدوري الأبطال بعيدا وذلك قبل أربع سنوات ، حينما كان الزمالك يمتلك بالفعل خمسة ألقاب فيما كانت خزائن الأهلي تضم ثلاثة فقط.
ولكن وصول الأهلي إلى النهائي في السنوات الأربع الأخيرة، وفوزه باللقب في ثلاث مناسبات، وضعه على قمة الكرة الإفريقية.
وكانت الصورة مماثلة فيما يتعلق بكأس السوبر الإفريقية، فحتى عام 2003 كان الزمالك قد جمع ثلاث بطولات والأهلي واحدة فقط، حتى عادل أبناء مانويل جوزيه الرقم بالفوز بالكأس عامي 2006 و2007 .. وهاهم يحطمون آخر الأرقام القياسية للزمالك بفوزهم بالسوبر الأفريقي لهذا العام 2009م .. وكانت بطولة السوبر الأفريقية قد انطلقت عام 1993 بين بطلي أبطال الدوري وأبطال الكؤوس لعام 92 وفاز بها أفريكا سبور الإيفواري على حساب الوداد المغربي.
ألقاب الأهلي في السوبر
اللقب الأول: 2002 بعد الفوز على كايزر تشيفز (جنوب إفريقيا) بنتيجة 4-1.
اللقب الثاني: 2006 بعد الفوز على الجيش الملكي (المغرب) 4-2 بركلات الترجيح بعد انتهاء الوقتين الأصلي والإضافي بالتعادل بدون أهداف.
اللقب الثالث: 2007 بعد الفوز على النجم الساحلي (تونس) 5-4 بركلات الترجيح بعد انتهاء الوقتين الأصلي والإضافي بالتعادل السلبي.
اللقب الرابع: 2009م بعد الفوز على الصفاقسي التونسي 2 / 1 بهدفي فلافيو.

بينما كانت ألقاب الزمالك في السوبر
اللقب الأول: 1994 بعد الفوز على الأهلي 1-صفر بهدف من توقيع أيمن منصور.
اللقب الثاني: 1997 بعد الفوز على المقاولون العرب 4-2 بركلات الترجيح عقب انتهاء الوقتين الأصلي والإضافي بالتعادل بدون أهداف.
اللقب الثالث: 2003 بعد الفوز على الوداد المغربي 3-1.

موضوع لذيذ ومناظرة أنا شايف إنها مثمرة وإيجابية بين الأعضاء.. فما أدراكم لو كان الموضوع المناظرة مهم (اجتماعي ـ سياسي ـ تعليمي) وكفانا كورة....... مشكووووووور على مجهودك الرائع وآسف على تعليقي إذا كان سخيفا ..