السلام عليكم

ازيكوا يا جماعه عاملين ايه يارب تكونوا بخير

كان فيه حاجه بقالها مده شغالانى ومش لاقيه لها اجابه

هعرضها عليكوا من خلال موقف حصلى قريب

من مده كده كنت لسه جايه من بره وداخله بيتنا

لفيت الباب خبط

وغالبا ماما بتقولى متفتحيش لحد لان عندنا بيبقى فيه مندوبين مبيعات رخمين وناس غريبه كده بتخبط

وبما ان مفيش بواب ولا أمن عالعماره فاحنا مش بنفتح لاى مندوبين مبيعات

فانا اما الباب خبط مش عارفه ايه خلانى افتح

فتحت لقيت واحده واقفه

هى كانت شكلها عادى يعنى مش مبهدل ولا حاجه

انا كنت بحسبها يعنى واحده جارتنا عايزه حاجه ولا بتاع

بس انا لقيتها بتعيط وقربت من الباب

وبتحكيلى على حاله وفاه وحد اتوفى وهى معهاش فلوس

فانا بصراحه خفت منها ومكنتش عارفه اتصرف وفى نفس الوقت كانت صعبانه عليا

انا اصلا مكنتش سامعه هى بتقول ايه بس لانى كنت وقتها مركزه فى انى مش عارفه هى بتضحك عليا ولا نصابه ولا ايه

اقفل الباب ولا ادخل اساعدها

طب مانا لو دخلت ممكن تدخل ورايا ولا حاجه وفكرت كمان انها ممكن تكون بتمثل عليا

المهم انى قلتلها انا اسفه بس مفيش حد موجود دلوقتى

اللى استغربتله بقى انها مثلا مزودتش فى الكلام لا دى قاللتى حاضر حاضر واختفت

انا بجد اتضايقت اوى وحسيت انها كانت محتاجه فعلا وانى مش ساعدتها وانى كنت قاسيه اوى

بس هى كانت بتقول انها ساكنه فى منطقه تعتبر بيعيده عننا شويه

معقول تكون لفت عالبيوت كلها ومحدش ساعدها

انا بجد ببقى محتاره فعلا ادام الناس دى

هما فعلا بيبقوا محتاجين ولا بيبقوا بيمثلوا

يعنى الناس اللى بتبقى فى الشوارع قاعده تطلب المساعده

بتبقى فعلا محتاجه ؟؟

طيب ليه ميشتغلوش اى حاجه معقوله فيه حد يقعد طول اليوم يطلب المساعده من الناس

ويوميا كمان

هى دى بقت وظيفتهم

طيب والناس اللى بتمشى تنادى فى الشوارع واحيانا بالميكروفونات كمان

معايا ابن مريض وكذا كذا كذا

دول برضه بيبقوا محتاجين ؟

دول احيانا بيبقوا مأجرين تاكسى وحاطين الميكروفون فوق وبينادوا

معقوله دى يعنى ؟؟

ده حتى اى انسان محتاج بيبقى محرج يقول انه محتاج

ومفيش حد بيحب يقلل من نفسه بل بالعكس كله بيبقى عايز يظهر فى احسن صوره واحسن حاله

تفتكروا الناس دى محتاجه مساعدتنا ليهم ولا لا ؟؟

انا اول ماقريت العنوان عرفت التوبيك بيتكلم عن ايه
وعرفت ردى كمان
هما ممثلين برعين
وفى حدوتة ظريفة كده هحكيهلكو
بس بعدين
موش دلوقتى

على فكره الفقير بيستحي انه يطلب من الناس
احنا كل سنه واحده تخبط علينا و تقولنا بنتي بتعمل عمليه و عايزه تركب صمام
بما ان اخويا جراح فسألها عن حالتها و كده فقالت له معرفش عندها ايه في القلب ولازم تركب صمام و قالت له انها في مستشفى الدمرداش (اللي اخويا فيها) و محجوزه و متفهموش محجوزه من 6 سنين تقريباً المهم قالها انا ممكن اساعدها و كده اديني بيانتها و انا هشرف عليها بنفسي و انا دكتور و كده قالت له لا خلاص يا فندم احنا بس عايزين حاجه لله تساعدنا على تكاليف المستشفى (مع العلم ان المستشفى دي تكاليفها مش عاليه اوي)
يعني كدابين لانها لو كانت فعلا عيانه كانت قالت له تعالى معانا الله يكرمك و ساعدنا و كده
بس تقولوا ايه بقى
و على فكره الناس دول مجوش تاني من ساعة ما اخويا كلمهم :slap1qk6:
الفقير عمره مايطلب من حد ابداً

==
تعرفي برضو فيه واحده بتشحت جنب بيتنا واحده كبيره كده بقالها كتير اوي من و انا في اعدادي و كنت راجعه بالليل من الشغل متأخره مره لقيت في اتنين شباب جم اخدوها على موتوسيكل و مشيوا
فانا استغربت و افتكرت في الاول ان ولادها شغلوها كده و خلاص(مهو فيه ولاد ربنا مايوريهم لحد ماعندهمش رحمه)
بس عرفت من البوابه اللي جنب العماره اللي بتشحت منها ان الست دي اسمها (ام ضاحي) و ساكنه في حته كده في القاهره عندنا اسمها (العرب) و عندها عماره و املاك بس عامله مشاكل مع جيرانها كتير فهي بتجمع فلوس عشان تبني ارض ليها معرفش فين كده و ابنها بييجي ياخدها بالليل
حتى مره كان فيه واحد من ولاد جيرانها عدى و اداها نص جنيه و قالها انا عرفتك يا ام ضاحي (لانها بتبقى مخبيه وشها بطرحه و حاطه وشها في الارض و مده ايديها)

فمعظم اللي بيطلب بيبقى ممثل بارع
اللي عايز يتزكي و يتصدق يروح للمسجد و يحط في صندوق الصدقه و الزكاه ده اضمن بكتير :)

شكراً للموضوع

بصى عشان انا الحكايه دى بتحصل معايا كتير قوى
و اقول ماما مش موجوده
او نايمه او كده يعنى
و لما ماما بتبقى موجوده بتديهم اى حاجه كده
و على طول تقولهم المفروض تروحوا تدوروا على شغلانه
انشالله اى حاجه
مسح سلالم فى اى حته
احسن من الشحاته دى
:(

ده فى يوم القيامه الشحات ده بالذات
بيبقى موجود و على جبهته علامه سوده مميزه انه كان فى الدنيا بيشحت من الناس
العمليه لا هى بسيطه و لا سهله
و لا تنفع انها تكون شغلانه
و ارض الله واسعه يعنى
:angry2:

و انا برده كنت بسال ماما
طاب هما ايش عرفنا انهم محتاجين فعلا
مش الاحسن مش ندى دول اللى مش متاكدين منهم
و نوفر الفلوس للناس اللى احنا عارفينهم محتاجين
:confused:

كانت ترد عليا تقولى بصى
اولا احنا مش متاكدين هما محتاجين و لا لاء
فكده احنا المفروض نقدم الظن الحسن
ان بعض الظن اثم
الا لو كنا متاكدين يعنى ان هما بيمثلوا علينا
او مش راديين يشتغلوا رغم قدرتهم
دول مش نديهم فعلا
:)

تانى حاجه
ان اللى محتاجين فعلا
بجد ربنا بيوقفلهم ناس تساعدهم
و مش حينقص اللى ربنا كاتبلهم انهم ياخدوه
:):):)

بس ياستى
و حلو الموضوع يا بت يا رودى :romarioxp6:

فى رعايه الله

السلام عليكم
يا الواناتك يا ريرى
ايه الالوان دى
يلا
بصى يا كوكو
انا مرة كنت رايحة درس كيميا
لقيت واحدة قاعدة على الرصيف كدة
بتشحت يعنى
حلو؟
سيبتها لانها مش كلمتنى
و بعدين روحت الدرس و روحت درس الانجلش كمان
و انا راجعة بقى لقيت نفس الست بس فى شارع تانى
و قامت قالت لى ايه
انا لو سمحتى يا ابلة
قولت لها نعم
قالت لى ادينى نص جنيه بس عشان اروح
قومت اجيتها
اصلى كنت لسه سامعة شريط دينى و كنت متاثرة اوى بيه
و قولت اعمل الخير و احتسيبه عند الله
المهم الديتها
و روحت
و انا نازلة بالليل
رايحة درس العربى
قابلت واحدة تانية قالتلى يا ابلة
و نفس الفيلم
بس انا طلعت واعية و مش اديتها
و مشيت و لسان حالى بيقول هو مفيش مغفلين فى البلد دى غيرى
بس انا مش زعلت لان الرسول قال
"ما نقص مال من صدقة"
و الله اعلم بالنوايا

انتي كان المفروض تقفلي الباب وتروحي تجيبي فلوس وترجعي
وبجد زي ماولاء قالت احنا لازم نقدم حسن النية
وانا عندي قناعة شخصية ان اي انسان كائن ما يكون (حلوة حلوة:d)
مش همد ايده عشان يشحت غير لو كان فعلا محتاح
حتى لو مش بيشتغل
اقل حاجة انه مش بيكون معاه فلوس

دى تمثيل فى تمثيل

زى طريقه مشهورة للشحاته لما شحات يقعد جنب بيض مكسور و يقعد يعيط و يقول ان صاحب البيض حيبهدله


و بعدين محكيتليش الموضوع ده ليه يا دكتور دايموند

والله انا كمان محتارة زيك
انا ساعات بحس ان هما محتاجين اوى وبديهم وانا راضية وساعات بحس انى مش طايقة ابصلهم لانهم باين عليهم اوى انهم نصابين وخصوصا لما بشوفهم نفس الناس فى كذا مكان يعنى مثلا واحدة تقوللى والنبى عايزة 2 جنيه ولا 3 جنيه عشان اروح اصلى الفلوس ضاعت منى والحوارات دى ساعات كانوا بيصعبوا عليا واديهم وبعد دقيقتين بلاقيهم بيقولوا نفس الكلام لحد تانى :angry2::angry2:

اللى غايظنى اوى اوى بقى وخلانى اكره كل الشحاتين وخصوصا بعد ما دخلت الجامعة هو الاسلوب الزبالة بتاع الشحاتين دلوقتى طبعا كلكوا عارفينه
( يا رب يخليكوا لبعض وتتجوزوا , يارب العيال يطلعوا شبهك , يارب ما يحرمك منه \ها .........)
وهكذا حاجة تخنق بجد وانا بقيت مش بحب اديهم خالص كل لما بشوفهم بيعملوا كده :angry2::angry2:
المشكلة بقى انهم ممكن يشتموا وماعندهمش اى مشلة انهم يمسكوا فيا ويمسكوا شنطتى لدرجة انى والله ساعات بخاف منهم ليشتمونى ولا يخطفوا شنطتى بديهم اى حاجة وامشى
وحسبى الله ونعم الوكيل فى كل اللى بينصبوا دول

معلش طولت عليكوا والله ده انا كان لسه عندى كلام كتير عشان الموضوع ده خانقنى اوى بس كفاية كده عشان انا بقيت رغاية اوى :d

دى تمثيل فى تمثيل

زى طريقه مشهورة للشحاته لما شحات يقعد جنب بيض مكسور و يقعد يعيط و يقول ان صاحب البيض حيبهدله

لا بس دي بقت قديمة اوي

شكراا على الموضوع
في رايي ان معظمهم بيبقوا نصابين والله اعلم

هما ممكن يكونوا محتاجين وممكن يكونوا ممثلين

بس صدقيني لو هما ممثلين فعشان هما محتاجين

ولو هما محتاجين يبقى لازم يبقوا ممثلين

فهمتي حاجة؟؟؟

يعني مثلا ممكن تلاقي بني ادم شيك ولابس بدلة و كرافت
ومعلش المحفظة ضاعت...ممكن جنيه!!!
واحد هدومه متبهدلة ومقطعة وشكله مش نضيف خالص وعنده اعاقة ما
ست كبيرة لا بس لبس مبهدل بتجر راجل كبير مسن او طفل صغير على كرسي متحرك

اروح بعيد ليه؟؟

انتي في كلية ايه؟؟؟....اه افتكرت

بعد اي امتحان او ساعة النتيجة بتلاقي الدادات واقفين وعاوزين الحلاوة

يا ترى دول ممثلين ولا محتاجين؟؟

صدقوني كل الناس في الزمن ده محتاجين...بس الفرق في الأسلوب

اللي احنا بنشوفهم دول هما المحتاجين الصوغنططين خاااااالص

اعتقد في اغلب المواقف..انك تديهم حاجة او ما تديهمش..دي حاجة في الغالب

بتخضع للتقدير الشخصي على الأقل بالنسبة ليا


:078111rg3::078111rg3:

دى تمثيل فى تمثيل

زى طريقه مشهورة للشحاته لما شحات يقعد جنب بيض مكسور و يقعد يعيط و يقول ان صاحب البيض حيبهدله


و بعدين محكيتليش الموضوع ده ليه يا دكتور دايموند
ايوة يادكتور دايموند معندكيش حق خالص:d
لما تحصل حاجة زي كده احكي:p

أحيانا بيكونوا محتاجين فعلا .. وأحيانا لأ ..
بس اللي مش محتاجين دول بيعيشوا طول حياتهم لحد لما يموتوا شحاتين .. !!
هما بيجمعوا فلوس وبس ..
هي دي مهنتهم في الحياة ..
لحد لما يموت .. وهو عمره ما استمتع بيها أصلا ..

والله ياجولى فى زماننا ده استحالة تفرقى بين الصادق والكاذب .. الخائن والامين ... المتواضع والمغرور..................................... الى اخره

يعنى فعلا زمن العجائب
بس مش عارفة بقت ظاهرة عجيبة ظاهرة التسول وماتعرفيش فعلا تفرقى بين المحتاج وغيره
بس المحتاج بجد بيبقى عنده عالاقل عزة نفس .. ومش هايضطر مهما كانت حاجته انه يعمل كده

وفيه ناس بقى ربنا يعافينا من امثالهم سواء محتاجين او خلافه ماعندهم اى احراج
تخيلى مثلا اما اطفال فى ابتدائى يدخلوا ياخدوا كل اللى فى شنط زمايلهم وفى ( مدارس خاصة )
طب دول ايه نظامهم؟؟؟؟؟؟؟؟
محتاجين برده
طب اهاليهم ودوهم مدارس خاصة على اساس ايه ؟
انهم يروحوا يعملوا كده
تحسى ان مفيش مقاييس لاى حاجة
اى حاجة ممكن تحصل فى اى وقت وفى اى مكان
موضوع جميل تسلم ايديكى
فى رعاية الله

هى عمتا الشحاته بقيت وظيفة اكتر منها حاجة
ومش هقولك انك تقدرى تحكم على الشخص اللى قدامك اذا كان محتاج ولا لا
بس اعملى الخير وارميه البحر
او انتى بتطلعى الصدقة لوجه الله مش لزم تخدى وتسالى كل واحد عن تفاصيل حياته
وازاى تتاكدى اذا كان محتاج ولا لا طلعيها لوجه الله فقط
انما نطعمكم لوجه الله لا نريد منكم جزاء او شكورا
شكرا على الموضوع

هنيالك يا فاعل الخير والثواب عند الله
حسنة قليلة تمنع بلاوى كتيرة
الشحاتة بقت وظيفة اكتر من طلب
مشهتقدرى تفرقى بين الممثل واللى محتاج فعلا
المشكلة مش فيهم
المشكلة فينا
فين لجان الزكاة اللى بتوصل النفقات للى محتاجينها
لو الناس بتدفع نصاب الزكاة لبيت المال فى القرية او المدينة
هتلاقى الحكاية دى قلت شوية
ولو حد جالك متديهوش حاجة فى الحالة دى لان بيت المال كفيل بالحكاية دى
الا اذا اردتى ان تكثرى من الثواب
واعملى الخير وارميه البحر ان كان ممثل ربنا يسامحه وان كان محتاج فربنا اعطاه
دمتم فى رعاية الله

اختاه افعلى كما قال اسلام افعلى الخير لوجه الله

وانا مره قريت ان رجل تصدق على غانيه وعلى غنى ومش متذكره الباقيين

يعنى الغانيه مثل الراقصه والمغنيه كده يعنى وقال الحمد لله تصدقت اليوم على غانيه لعلها تتوب

وصدقتى على الغنى لعله يرق للفقراء ويتصدق عليهم
والزهايمر بقى اشتغل عندى ومش فاكره الباقيين

يعنى على غنى او فقير يستاهل ام لايستاهل خليها بقى بينك وبين ربنا

انا بردو راىى نفرض حسن النيه ونديهم والله اساسا ياجماعه الزمن ده صعب جدا كل حاجه غاليه والناس تعبانه وعشان كده احنا نديهم ونتوكل على الله ويمكن نفرج عنهم واحنا مش عارفين والرسول صلى الله عليه وسلم قال من ادخل على قلب مسلم فرحه ادخل الله على قلبه فرحه يوم القيامه"
وربنا يرزق المسلمين جميعا وميحتجوش لسؤال الناس

انا فاكرة جملة المستر بتاعى قالها
" المحتاج بجد والله ما يمد يتكثف ايده لحد حتى لو كان هيموت من الجوع"

يا بنتى الشحاته دى بقت شغلانه لهم أحسن من الشغل فى شركه أو أى مكان
وحصل موقف قبل كده كنت فى معرضوأول ما دخلنا كان فى واحد رابط ذراعه فقلنا نتبرع
ولما خرجنا لقيناه فك رباط ذراعه وربط راسه !!

يعنى كانت نكته بالنسبالى !!!
وشكرا يا كتكوته على الموضوع!!!

لا انا شايف ان الموضوع دا كتر اوي في البلد

لإن انا شخصيا اتعرضتله مرتين .. واخويا اتعرضله 3 مرات ومن نفس الشخص ..

فا هيا فعلا بقت ظاهرة .. وانا عن نفسي لو افترضت مثلا اني ماعييش فلوس ولا حاجة

والله العظيم انا اخدها مشى ولا اني اطلب من حد ماعرفوش

انا اه اطلب من صحابي .. اطلب من قرايبي .. لكن اي حد كدا في الشارع معدي ؟!

وبعدين اللي بيبقي في ظرف زي دا بيبقي بيستحي اصلا ..

دانا في موقف من مواقف اخويا دي .. كان هوا رايح القصر العيني .. وواحد قابله واداله الاسطوانة المشروخة

كانت طبعا الاسطوانة دي ساعتها لسه طالعه .. المهم اداله الفلوس فعلا ..

وبعد كدا بالصدفة البحتة اخويا راح يجيب اكل من كنتاكي ..

لاقا الراجل اللي خد منه الفلوس بيطلب اوردر اكستريم ميل !!

اولا موضوعك جميييييييييييل وشكرا
انا عايزة اقول ان فيه ناس فعلا محتاجين وفيه لا
وفعلا المحتاجين بيبان عليهم يعنى احنا مرة كنت مع ماما وفيه ست ركبت معانا كنا فى توناية صغيرة فالست قالت لماما ينفع تدينى ربع جنيه علشان تكمل الاجرة علشان السواق ميزعقلهاش ففعلا كان باين عليها انها غلابانة فبيبان عليهم والله واللى محتاج فعلا مش هيستنى مساعدة من الناس هيروح يشتغل
اعتقد ده رايى
تقبلى مرورى

قريت كل الردود تقريبا

كا عندى سؤال مفيش حد سأله

هو انت بتدى الناس فلوس ليه ؟؟؟؟

اذا كان ممثل او محتاج فعلا

و ان شاء الله يكون فى استفاضه كامله فى الموضوع ده

بصوا الله أعلم بحال الجميع

بس انا قلبى رُهيف أوى وبحاول إنى ماتعاطفش معاهم بسهولة لانى بصراحة مش بدى الشحاتين كلهم

أو يمكن مش بدى الشحات بمعنى الشحات اللى بيمد إيده

انا عندى أدى لواحد بيبيع مناديل على الرصيف ولا إنى ادى لواحد مادد إيده للناس

لان اللى بيمد إيده ده عنده صحة وقدرة إنه يبيع أى حاجة بدل ما يفضل يدلل على نفسه طول النهار

و يمكن حالياً بحس بالشحات المحتاج أوى .. من ساعة ما رحت رسالة وإتعاملت مع الناس حقيقى فى ناس بتكون محتاجة أكتر من الشحاتيين وبيكون عندهم كرامة فوق الوصف يعنى يحفروا فى الجبل ويسموه بيتهم و ياكلوا التراب ويسموه أكلهم ويحمدوا ربنا كمان ألف حمد وشكر..

حقيقى الشحاتين دول ممكن يكونوا أغنى من ناس كتير أوى على الأقل بالشحاتة ممكن يكسبوا 5 جنيه فى اليوم ياكلوا بيها فى ناس مش لاقية تراب الأرض أصلاً

ههههههههههههههههه الشحاتين دول نكتة

مرة شفت شحات فى طلعت حرب بيفك 100 جنيه لواحد :excl:

ولا واحدة مرة بيديها اللى فيه النصيب بتقولى هو ده اللى هان عليكى تطلعيه من جيبك أنا عايزة كمان 5 جنيه البديهى قلت فى بالى :blink:( تدينى انتى ال5 جنيه دى ؟!! :d )

ولا أستاذ العربى فى ثانوى بيحكيلنا على واحد شحات مسكوه كان واحد زميل المستر معدى فى شارع لقى واحد شحات ريحته فظيعة ورجليه مجروحة جرح جامد أوى فضل يتحايل عليه علشان ياخده يوديه المستشفى والراجل مصر مايقمش من مكان و إتحجج إنه مش قادر يقوم .. قاله هيجبلك الإسعاف قاله لا عايز تساعدنى ساعدنى مش عايز إمشى وسيبنى .. المهم الراجل شك فيه تقريباً طلبله الإسعاف وبنجوه وراح معاهم المستشفى هههههههه المفاجأة لاقوه لافف على رجله فسيح ( سمكة فاتحها بالنص ) وحاطط عليها مكركروم وطلع عنده شقة فى المعادى ههههههههه :d واتحبس

أنا رغيت كتير

كفاية كده .. لو فى حاجة تانية هقولها :bosyht9:

و شكراً على الموضوع يا بت :d

والله بيتعرفوا المحتاج من اللي مش محتاج وصدقيني أكترهم بيبقوا نصبين

ممثلين بارعين

فكرني بفيلم لعادل امام لما جاله الشحات وقاله ابعد من هنا يا حرامي
تاخد العشرة جنيه تجيب بيهم رصيد واحنا مش لاقيين ناكل

مرة واحد جالنا قالنا نفس حوار المستشفى ده وقال بس انا والله مش شحات
يعني براحتك عايز تدي ماشي
قلناله لأ راح ماشي

ده يظهر فن جديد من الشحاته (اللاشحاتة)