يومك اسود النهاردة من اوله [الأرشيف] - بوابة الثانوية العامة المصرية

M.Sherif

12-02-2009, 05:02 PM

اشهر 55 جملة بيقولها الاب و الام في مصر

ازاي تعرف انك اتربيت في بيت مصري

سمعتها اكيد قبل كده

مش كده ؟؟؟؟؟؟

...................................

..........................

................

........

....

..

مش عايزة اسمع صوت

ماتردش عليا

تقعد في اول صف ادام السبورة

لو مش فاهم حاجة ارفع ايد وقول للاستاذ متتكسفش

اللي بيشيل قربة مخرومة بتخر عليه لوحده

و مالها الكتب بتاعة الوزارة؟

بص كويس و انت بتعدي الشارع

ماتتأخرش بعد المدرسة وتصيع مع صحابك

افرد ضهرك (( و دي اكتر جملة اتقالتلي في حياتي))

بتذاكر ازاي و البتاع ده شغال جنبك؟

ماتمشيش حافي (( و في مرحلة معينة ماكنتش بسمع غيرها الجملة دي ))

ربنا يهديك

اطفي التليفزيون و قوم ذاكر

اقفل صدرك

اوعا تاخد من حد حاجة

بلاش وقفة الشبابيك والبلكونات

لو فلحت ابقا تعالي اعمل بي بي علي قبري ((( جملة فيها خيال واسع اوي )))

كل علي مهلك...امضغ كويس...كل من ادامك...ماتحفش...ماتزلطش....

كفاية رغي في التليفونات

ماتقعدش قدام المروحة وانت مستحمي

الفيلم مش هينفعك

وانت فاكر ان احنا مستنيين منك حاجة؟

ماتعليش صوتك

كفاية لعب في الشارع

يا بني اللي ذاكر ذاكر خلاص..اطفي النور وقوم نام بقا

بلاش لعب بالمقص بيجيب الفقر

يابني كلم خالتك العيانة

اوعا حد غريب يديك حاجة تاكلها ولا تشربها

النوم لحد الضهر بيجيب الفقر

اوعا تكدب عليا تاني مرة

لازم تاكل سلطة

اشرب اللبن..... كمل الكوباية...

لو شفت خناقة مالكش دعوة بيها

عيب احترم اللي اكبر منك

كلمنا لما توصل

مالكش دعوة بالسياسة

بلاش اكل بره

ماتلبسش القميص علي اللحم زي العيال الصايعة

يابني انت مسطول ولا ايه؟

انت فاكرنا نايمين علي وداننا

وطي المدعوق ده شوية

يابني قوم اقرا كلمتين ينفعوك (( الكلمة دي سبب عقدتي م القراية عموما))

ايه الخيبة و الاستهتار اللي انت عايش فيهم دول؟

انت فاكرنا لاقيين الفلوس دي في الشارع

و الله مانت نافع وادي دقني اهه

ماتصوتش في الحمام

اغسل رجلك وسنانك قبل ماتنام

ماتلزقش في التليفزيون كده ((ساعتها ماكنش في كمبيوتر))

سلم علي عمك كويس

يابني محدش بينفع حد

ماطلعش ايدك من شباك العربية

هقطم رقبتك...هعقطع ايدك...هقطعلك لسانك..هدبحك

عارف اوضة الفيران ....هحبسك ((موضة قديمة))

ربنا يرزقك بعيل يوريك اللي ورتهوني

ماتطلعش ع الملاية النضيفة برجليك المعف....... دي

ماتقعدش عريان كده قدام اخواتك...ياواد قوم البس حاجة يا واد...

اقلب القناة دي بلاش مسخرة وقلة ادب

نسيت تشرب

نسيت تاكل ..نسيت تاخد المصروف ..نسيت تعكنن علي اهلي؟

طلع ايدك من جيبك وانت بتكلمني

يومك اسود النهاردة من اوله

عايزة ابص الاقيك ادامي دلوقتي حالا

ماتتشقاش في الفسحة وكل سندوتشاتك كلها

ادي اللي انت فالح فيه

ياللا يا ابو كحكة حمرا...ليك نفس تضحك يا فاشل؟

الكلام ده يا جماعة اتقال للعظماء كلهم في صغرهم

ماتتكسفوش تعترفوا

.......................

.............

.......

....

الضوء الشارد

12-02-2009, 06:12 PM

افرد ضهرك (( و دي اكتر جملة اتقالتلي في حياتي)) يمكن حضرتك طويل ذى ماأنا طويل

ماتلزقش في التليفزيون كده بنفذ كلامهم وبلذق فى الكمبيوتر

وانت فاكر ان احنا مستنيين منك حاجة؟ واللى بياكل على درسه بينفع نفسه وماحدش هينفع حد
والله دى اكتر جملة بتتقالى

شكرا على الموضوع بس أنا باشك أن حضرتك قاعد معانا فى نفس البيت

هانى الشرقاوى

12-02-2009, 06:16 PM

الموضوع دمه خفيف أوى
بس أنا الصراحة مسمعتش الكلام ده قبل كده
يمكن علشان أنا فضلت فترات طويلة بعيد عن اهلى ومش مقيم معهم بصفة دايمة
بس بجد الموصوع ظريف أوى

مس رانيا حسن

12-02-2009, 07:01 PM

بص كويس و انت بتعدي الشارع
لازم تاكل سلطة
اكثر جمل قيلت لى
موضوع جميل
جزاك الله خيرا

مسيو وليد عسكر

12-02-2009, 07:03 PM

اهدي لك اخي شريف اهم العبارات اللي بتتقال في بيتك التاني بعد ما بتتجوز
وبعد ماتسمعها فكر كويس ياتري عباراتك في بيت الاسره ارحم ولا عبارات المودام ؟؟؟؟
*اهو ده اللي انت فالح فيه
*خد العيال احلق لهم
*عاوزين سباك الحمام بقت ريحته تقرف
*انت هتفضل اعد كده لا شغل ولا مشغله؟
*انت كنت فين من صباحيه ربنا؟
*ومالك واخد بالك من نفسك كده مانت طول عمرك مبهدل وحالتك بالبلاه
*اه ياني من عينك الزايغه دي
*عاوزه اروح للكوافير شعري شوف لي 200 جنيه
*فين يا راجل التايير اللي قلت هاتجيبهولي في عيد ميلادي؟
*امي ولدت عاوزيين نروح ننقطها
*البيت فاضي مافيهوش لقمه واحده
*مين اللي كانت بتكلمك في التليفون؟
*شكلك كده مايطمنش زي ماتكون عامل عامله
*بتبص علي ايه يامنيل ...عاجباك ؟
*سناني بتوجعاني عاوزه اروح للدكتور
*امي بتسال عليا عاوزه اروح لها..ولازم اخد لها حاجه وانا رايحه
*خلي امك تبعد عننا علشان بتحشر نفسها في اللي مالهاش فيه
*مصروف البيت مايكفيش نجيب عيش حاف
*انت حاطط ايدك في الميه البارده وانا دمي بيتحرق
*ياراجل اتلحلح شويه وشوف الدنيا ماشيه ازاي
*قرفتني في عيشتي كان يوم اسود يوم ماتجوزتك
*اللي خدته القرعه تاخده ام الشعور
********************************

فكر كويس
ودي رساله الي كل شاب ..
خليك في المضمون...طبعا انا بهزر لان الموضوع كله ساخر من اوله لاخره

dream2

12-02-2009, 07:09 PM

هههههههههههههه

ايه ده يا استاذ شريف

كل الكلام الكبير ده وطلعت فالح واستاذ كمان

ما شا الله

اكيد طبعا معظم الكلام ده

بيحصل فى اغلب البيوت المصريه

لان الابناء بيعصبوا الاباء

ومش بيسمعوا الكلام ببساطة

ربنا يكون فى عون الوالدين

ويقدرهم على تربيه ابنائهم احسن تربيه

شكرا على الموضوع

dream2

12-02-2009, 07:11 PM

اهو ده اللي انت فالح فيه
خد العيال احلق لهم
عاوزين سباك الحمام بقت ريحته تقرف
انت هتفضل اعد كده لا شغل ولا مشغله
انت كنت فين من صباحيه ربنا
ومالك واخد بالك من نفسك كده مانت طول عمرك مبهدل وحالتك بالبلاه
اه ياناي من عينك الزايغه دي
عاوزه اروح للكوافير شعري شوف لي 200 جنيه
فين يا راجل التايير اللي قلت هاتجيبهولي في عيد ميلادي
امي ولدت عاوزيين نروح ننقطها
البيت فاضي مافيهوش لقمه واحده
مين اللي كانت بتكلمك في التليفون
شكلك كده مايطمنش زي ماتكون عامل عامله
بتبص علي ايه ...عاجباك ؟
سناني بتوجعاني عاوزه اروح للدكتور
امي بتسال عليا عاوزه اروح لها..ولازم اخد لها حاجه وانا رايحه
خلي امك تبعد عننا علشان بتحشرش نفسها في اللي مالهاش فيه
مصروف البيت مايكفيش نجيب عيش حاف
انت حاطط ايدك في الميه البارده وانا دمي بيتحرق
ياراجل اتلحلح شويه وشوف الدنيا ماشيه ازاي
قرفتني في عيشتي كان يوم اسود يوم ماتجوزتك

ايه ده مسيو وليد

طيب استاذ شريف بيكلم عن الابناء

انت دخلت شمال كده فى الزوجة

كده هتلاقى هجووووووووووووم وفير من سيدات المنتدى

ههههههههههههههه

مسيو وليد عسكر

12-02-2009, 07:14 PM

طبعا السيدات علي دماغنا من فوق وهم النصف الحلو في حياتنا
الموضوع كله ساخر وبنخرج شويه من الموضوعات التقليديه

نعمه محمود

12-02-2009, 07:20 PM

مو ضوع جمييييييييييييييييييل يا أستاذ شريف ده كلامى لعمر وحبيبة
انا خارجة دلوقتى وللحديث بقية لما ارجع

doaa shedid

12-02-2009, 08:29 PM

طارق ممدوح ذكي محمد

12-02-2009, 08:35 PM

بعد اذن اخويا شريف هرد على رسالة مسيو وليد في الاول
*اهو ده اللي انت فالح فيه
*انت هتفضل اعد كده لا شغل ولا مشغله؟
*بتبص علي ايه يامنيل ...عاجباك ؟
*انت حاطط ايدك في الميه البارده وانا دمي بيتحرق
*ياراجل اتلحلح شويه وشوف الدنيا ماشيه ازاي
*انت كنت فين من صباحيه ربنا؟
*ومالك واخد بالك من نفسك كده مانت طول عمرك مبهدل وحالتك بالبلاه
*قرفتني في عيشتي كان يوم اسود يوم ماتجوزتك
((( مفيش واحده في الصعيد تقدر تقول جملة من دول لجوزها .. وده من فضل ربنا علينا ... الحمد لله الصعايدة لسة بخير )))
*فين يا راجل التايير اللي قلت هاتجيبهولي في عيد ميلادي؟
*خد العيال احلق لهم
*عاوزين سباك الحمام بقت ريحته تقرف
*البيت فاضي مافيهوش لقمه واحده
((( وماله ... ده واجب عليا .. الرجال قوامون على النساء )))

*اه ياني من عينك الزايغه دي
((( لا.. الحمد لله غاضض بصري حتى من قبل ما اتجوزك )))
*عاوزه اروح للكوافير شعري شوف لي 200 جنيه
((( يبقى نروح للمأزون أوفر واريح ...واشرف )))
*امي ولدت عاوزيين نروح ننقطها
((( يا الله !! امها لسة بتولد ... لا الواحد يسأل كويس قبل مايختار )))
*شكلك كده مايطمنش زي ماتكون عامل عامله
((( عمل عاملة طبعا .. مش اجوزتك )))
*امي بتسال عليا عاوزه اروح لها..ولازم اخد لها حاجه وانا رايحه
((( خدليها اغلى حاجه ... خدليها روحك ... وخليكي عندها )))

Free Mind

12-02-2009, 08:38 PM

موشوع رووووووووووووووووووووووعة تسلم ايديكم

مسيو وليد عسكر

12-02-2009, 08:43 PM

بعد اذن اخويا شريف هرد على رسالة مسيو وليد في الاول

ياخوفي ياحاج طارق تطلج الوليه علشان بتجول احم وانت بتشرب الشاي
ههههههههه
ردك زي العسل وتعليقك اظرف
ربنا يرزقك ببنت الحلال

مسيو وليد عسكر

12-02-2009, 08:58 PM

طبعا الموضوع جامد موت ودمه خفيف

وكمان اضافة مسيو وليد "رغم انه متحيز لأبناء نوعه"

بس فعلا كنا محتاجين موضوع خفيف

بعد كل احداث الفترة السابقة والمستمرة إلى الان

واقترح نخليه موضوع مفتوح عن

"اشهر الجمل فى البيت المصرى"

شكرا استاذ شريف بجد الموضوع جه فى وقته
انا والله ماقصدت تحيز لان انا عارف ان فيه ستات كويسين جداا ومعاهم رجاله مالهمش لازمه...
الموضوع كله ضحك وهزار وتغير لحده الموضوعات السابقه
خالص شكري لمرورك العطر

أستاذة غادة

12-02-2009, 09:01 PM

اخى شريف ا الايام دول

هانت ربنا يتمملك بخير وتجوز قريب وتكعبل بالعيال

وهتلاقى نفسك من غير ما تحس بتقول حوالى 50 جملة بس من دول زينا دلوقتى بالظبط وابقى افتكر كلامى

ولاخونا وليد طب والله بالرغم من انه هزار بس فى شويه كلام منه بيتقال

وسبحان الله متعرفش النوم بيكبس عليه سعتها ازاى بقدرة قادر

الله المستعان وربنا يقوينا على العيال وابوهم

نعمه محمود

12-02-2009, 09:57 PM

شمس بياض

12-02-2009, 10:26 PM

ادخل الله البهجه والفرحه على نفوسكم ونفوس المسلمين

لقد ضحكت بمل ءفى (فى بيتنا ومن غير صوت --هو انا ناقصه دا صعيدى يا بوى
اقفلى خاشمك يست هانم مافيش سبع فى البيت؟ ,ولا ايه

ربنا يفرحكم دا انتم هتاخدوا ثواب على كل من شاهد الموضوع وضحك

جزى الله خيرا من ادخل السرور على قلوبنا
انا يادوبك مصلحه الكمبيوتر من الفيروس وربنا يستر
ولى رجعه بعد شويه كان يوم ابيض من اوله
هاروح اعمل عشا

نعمه محمود

12-02-2009, 10:27 PM

Eng. A'laa Salah

12-02-2009, 10:32 PM

مش عايزة اسمع صوت
دي لما ماما تكون متنرفزه

بص كويس و انت بتعدي الشارع
طبعا بتتقالي كل ما اطلع بره البيت

افرد ضهرك (( و دي اكتر جملة اتقالتلي في حياتي))
انا كمان

بتذاكر ازاي و البتاع ده شغال جنبك؟
انا مش باذاكر غير وفي صوت جنبي
دايما باشغل الكمبيوتر

ربنا يهديك
دايما بتتقالي ده انا هاجننها

اطفي التليفزيون و قوم ذاكر
مش اتقالتلي لاني مش باحب التليفزيزن اساسا

كفاية رغي في التليفونات
دي علطول
انا مش باسيب التليفون اساسا
واذا سبته امسك الموبايل

ماتعليش صوتك
دي علطول
اصلي مش بابطل خناق مع اخويا

يا بني اللي ذاكر ذاكر خلاص..اطفي النور وقوم نام بقا
ماما متستحملش تقول كلمه زي دي

لازم تاكل سلطة
هههههه كل يوم وقت الغدا طبعا خناقه علشان مش باكلها

اشرب اللبن..... كمل الكوباية...
باشرط لما اشرب اللبن لازم يكون مع اي حاجه
كاكاو قهوه نسكافيه بس مستحيل اشربه لوحده

كلمنا لما توصل
اي مكان اروحه ويا سلام لو بره المحافظه او خارجه لوحدي في مكان مرحتوش قبل كده او في رحله

بلاش اكل بره
دي بقي بتتقالي علطول لان اغلب اكلي باكل بره

سلم علي عمك كويس
بتتقالي لما ادخل ويكون في حد عندنا وانا مش اعرف واتصدم لما الاقيه

ربنا يرزقك بعيل يوريك اللي ورتهوني
تيته بتقولها كتير
اصلي مجنناهم في البيت هنا

ادي اللي انت فالح فيه
بتتقالي كتير لاني مش باتحرك من قدام الكمبيوتر

غير كده مسمعتش باقي الكلام اللي انت كتبته دي
شكرا علي موضوعك

♥έĻ-мΰšŧâρèdâ♥

12-02-2009, 10:38 PM

ـهههههههههههههههههههـ

افرد ضهرك

ليه يـ ع ــني

ع ــلى فكرة فى كتير ج ــدن من دول متقآلوش ليــآ

يمكن لآخ ـواتى إلولآد

بس أكتر كلمه أمــي تقولهـآلي

قومـي صلى وسيبكـِ من إلكمبيوتر لآ هو فرض ولآ سُنـه

وبطلى خ ــنآق مـ ع إخ ــواتكـِ

M.Sherif

12-02-2009, 11:37 PM

شكرا علي مروركم الخفيف الدم يا جماعة

M.Sherif

12-02-2009, 11:41 PM

*قرفتني في عيشتي كان يوم اسود يوم ماتجوزتك

ههههههههه
أنا كده خلاص
صرفت نظر عن الجواز نهائي كفكرة
و من دلوقتي
هزهد في الحياة

M.Sherif

12-02-2009, 11:49 PM

كل الكلام الكبير ده وطلعت فالح واستاذ كمان

لا لا مش اتقالي انا الكلام ده
انا لو اتقالي الكلام ده اولع لهم في البيت علي طول
دانا مجنون اوي:)

M.Sherif

12-02-2009, 11:52 PM

شكرا استاذ شريف بجد الموضوع جه فى وقته

فعلا
الواحد زهق من الموضوعات والردود التقليدية
و جالي احتقان في الزور منها:)

M.Sherif

12-02-2009, 11:54 PM

موضوع جميل

مرورك الكريم هوا اللي خلي الموضوع جميل يا استاذة رانيا

M.Sherif

12-02-2009, 11:58 PM

وسبحان الله متعرفش النوم بيكبس عليه سعتها ازاى بقدرة قادر

ههههههههههههه
نوم لا ارادي

M.Sherif

13-02-2009, 12:02 AM

اضيف بقي من كلام مامتى ربنا يخليها ليا

ربنا يخليهالك يارب
تسلم ايدك علي المشاركة الجميلة دي

M.Sherif

13-02-2009, 12:13 AM

ومن غير صوت --هو انا ناقصه دا صعيدى يا بوى
اقفلى خاشمك يست هانم مافيش سبع فى البيت؟

هيا دي بقا يا اخت نور الحاجة اللي تحزن القلب
الناس فاهمه الرجولة غلط والله
ازاي يعني و أرجل الرجالة محمد صلي الله عليه و سلم
كان بيقول علي النساء
((( رفقا بالقوارير )))
هن رياحين خلقن لنا

حاجة غريبة اوي
مفاهيم عقيمة
هوا انا هتجوز واحدة و اخدها من وسط اهلها
علشان اعكنن عليها و علي اهلها
و اكرهها في حياتها
و اعمل عليها راجل بشنبات
بعلو الصوت و الخناق و الغباوة لا مؤاخذة؟
معلش اصلي مفروس
الرجولة حناااااااااااااااااان
الرجولة صبرررررررررررررر
الرجولة انسانيييييييييييييية
الرجولة احساس بشريكة الحياة
الرجولة دفء المشاااااااااااااااااااعر
الرجولة احتواااااااااااااااء
الرجولة رحممممممممممممممممة
الرجولة قوامة مع احترام وحب و تقدير متبادل
الرجولة جدعنة
الرجولة حلاوة روح
الرجولة اعطاء الحبيبة كل حقوقها الشرعية و دوما
الرجولة عطاااااااااااااااااء

اقول ايه بس؟
ربنا يهدي الرجالة اللي م النوعية دي

قال تضحكي من غير صوت في بيتك قال

omer yousfe

13-02-2009, 12:14 AM

هههههههههههه تسلم ايدك

شمس بياض

13-02-2009, 01:44 AM

ازاي يعني و أرجل الرجالة محمد صلي الله عليه و سلم
كان بيقول علي النساء
((( رفقا بالقوارير )))
هن رياحين خلقن لنا

حاجة غريبة اوي
مفاهيم عقيمة
هوا انا هتجوز واحدة و اخدها من وسط اهلها
علشان اعكنن عليها و علي اهلها
و اكرهها في حياتها
و اعمل عليها راجل بشنبات
بعلو الصوت و الخناق و الغباوة لا مؤاخذة؟
معلش اصلي مفروس
الرجولة حناااااااااااااااااان
الرجولة صبرررررررررررررر
الرجولة انسانيييييييييييييية
الرجولة احساس بشريكة الحياة
الرجولة دفء المشاااااااااااااااااااعر
الرجولة احتواااااااااااااااء
الرجولة رحممممممممممممممممة
الرجولة قوامة مع احترام وحب و تقدير متبادل
الرجولة جدعنة
الرجولة حلاوة روح
الرجولة اعطاء الحبيبة كل حقوقها الشرعية و دوما
الرجولة عطاااااااااااااااااء

اقول ايه بس؟
ربنا يهدي الرجالة اللي م النوعية دي
ايون ياخووووووى
اهو شهر سبعه قرب اهو بس والنبى ابعد عن يوم 13 سبعه دهوت
اصل دا يوم --------
المهم الميه تكدب ايش ياخوى--القرطاس
ولما نشوف ياسى شريف
على العموم اسعدك الله والمسلمين

أمل لاشين

13-02-2009, 05:11 AM

بجد موضوعك خفيف وجميل استاذ شريف .....وكفايه انه بجد رسم الباسمه في وقتها

وميرسي جدااا .....علي موضوعاتك الجميله والشيقه دائما.....وربنا يوفقك ...

وميرسي جدااااا استاذ وليد ......علي كلامك المشجع جدااااا عن الحياه الزوجيه:slap1qk6:

بندق__2007

13-02-2009, 06:02 AM

ماتردش عليا

اللي بيشيل قربة مخرومة بتخر عليه لوحده

الكلمة دى بسمعها يوميا

بتذاكر ازاي و البتاع ده شغال جنبك؟

من صغرى و انا بذاكر و انا بسمع أغانى
اتقالتلى الجملة دى أكتر من بليون مرة

ربنا يهديك

باسمعها كتيييييييييييييييييييييير

كفاية رغي في التليفونات

بسمعها لسه لحد النهاردة

وانت فاكر ان احنا مستنيين منك حاجة؟

ما احنا عارفين و لا لازم يذلونا يعنى

يابني كلم خالتك العيانة

ياريتها على قد خالتى .. ده خالتى و ستى و عمى و عمتى و مراة خالى
زى ما يكون انا الطبيب المعاج بتاع العيلة

كلمنا لما توصل

كل ما اخرج اسمع البوق الجميل ده برده
حاسس ان انا يعنى فيه 35 عصابة بيجروا ورايا هيخطفونى و يطلوبوا فدية

مالكش دعوة بالسياسة

ليل نهار بقى بسمع الجملة و ياريته بيجيب فايدة معايا

انت فاكرنا نايمين علي وداننا

يعنى بيقولوها لما يعرفوا حاجة بالصدفة
بعد مليون حاجة اتعملت ما يعرفوهاش
بس الواحد هيقول ايه خليهم فاكرين انهم مصحصحين

وطي المدعوق ده شوية

بيصحوا من النوم مخصوص يقولولى كدة و انا و لا الهوا

انت فاكرنا لاقيين الفلوس دي في الشارع

ما هم لو لاقينها فى الشارع
كان زمانا احنا كمان معانا فلوس
ولا هما فاكرين اننا ما بنمشيش فى شوارع

يابني محدش بينفع حد

طول النهار ابويا يقولها
لغاية ما قربت أحس ان عليه عفريت حمادة هلال " محدش بينفع حد "

ماطلعش ايدك من شباك العربية

و اطلع ايدى من شباك العربية ليه
هو انا التباع

عايزة ابص الاقيك ادامي دلوقتي حالا

تقولشى بيحضر عفريت

عادى أكتر من كدة و بيزيح ربنا

مسيرنا هنقول كدة لأولادنا برده أصلها وراثة

شكرا أستاذ شريف على الموضوع الحلو

طارق ممدوح ذكي محمد

13-02-2009, 07:10 PM

معلش اصلي مفروس
الرجولة حناااااااااااااااااان
الرجولة صبرررررررررررررر
الرجولة انسانيييييييييييييية
الرجولة احساس بشريكة الحياة
الرجولة دفء المشاااااااااااااااااااعر
الرجولة احتواااااااااااااااء
الرجولة رحممممممممممممممممة

اقول ايه بس؟
ربنا يهدي الرجالة اللي م النوعية دي

قال تضحكي من غير صوت في بيتك قال

معلش يا عم شريف ،،،
والله تخليك في حالك وماليكش دعوه
بالصعايده خااااالص
:)
خليك انت في الدبادبيب والقلوب
والورد والعصافير بتوعك ..
وابعتلها براحتك ياسيدي
وهنشوف النتيجة في الاخر ..
:av4056bb7jp3:
وربنا يهدي الرجالة اللي من النوعية دي ....
اللي ضيعوا هيبتنا قدام الساتت
وطمعوهم فينا .....
:abdoog8:
وفي الاخر جابولنا الخلع
:049gc0:

رضا الشاذلى

13-02-2009, 09:52 PM

والله ياأخى الاولاد وهم صغيرين بيكونوا أحلى من العسل ولما بيكبروا ويتنحوا ويعاندوا ولايسمعوش الكلام زمطالبهم

تكتر على الفاضى والمليان ويسهروا الليل ويناموا النهار الواحد بيتمنى انهم احسن كانوا فضلوا صغيرين

رضا الشاذلى

رضا الشاذلى

13-02-2009, 10:19 PM

شمس بياض

13-02-2009, 11:17 PM

معلش يا عم شريف ،،،
والله تخليك في حالك وماليكش دعوه
بالصعايده خااااالص
خليك انت في الدبادبيب والقلوب
والورد والعصافير بتوعك ..
وابعتلها براحتك ياسيدي
وهنشوف النتيجة في الاخر ..
وربنا يهدي الرجالة اللي من النوعية دي ....
اللي ضيعوا هيبتنا قدام الساتت
وطمعوهم فينا .....
وفي الاخر جابولنا الخلع

استاذ طارق
اعترض على رأى حضرتك
الرسول صلى الله عليه وسلم كان فى منتهى الرحمه والرجوله فى نفس الوقت
سواعى الست تحتاج كلمه طيبه من باب الصدقه حتى يا خووووى
ولا حلال ليغرنا حرام علينا
بقولك ايه اسكت احسن
سيب اهل بحرى زى ماهما وسيبنا فى اهل قبلى

Dr.love ferdos paradise

13-02-2009, 11:32 PM

موضوع جميل اوي ولذيذ كلام كتير سمعته في البيت بتعانا برضوا قبل كده

جزاك الله خيرا

طارق ممدوح ذكي محمد

13-02-2009, 11:50 PM

استاذ طارق
اعترض على رأى حضرتك
الرسول صلى الله عليه وسلم كان فى منتهى الرحمه والرجوله فى نفس الوقت
سواعى الست تحتاج كلمه طيبه من باب الصدقه حتى يا خووووى
ولا حلال ليغرنا حرام علينا
بقولك ايه اسكت احسن
سيب اهل بحرى زى ماهما وسيبنا فى اهل قبلى

سيبك من اهل قبلي واهل بحري ومن الكلام اللي علقت بيه على اخويا شريف... لانه دعابه مش رايي ... وانا رايي مختلف عن كده ، والحقيقه اني شايف ان الناس بتتصرف وبتفكر بالعوايد والتقاليد اكتر من الدين بكتير .... ودي المشكله ... الحمد لله ديننا الاسلامي الحنيف فيه من الاوامر والارشادات ما يجعل الانسان يحيا حياته بكل السعاده في ظل تعاليم تعطي كل ذي حق حقه وترضي كل انسان عن نفسه وعن الاخرين ، ولي عوده مع احترام وتقدير المرأة في الاسلام ان شاء الله في موضوع منفصل ...

M.Sherif

14-02-2009, 12:20 AM

طارق ممدوح ذكي محمد

14-02-2009, 12:35 AM

شكرا جدا علي مشاركاتك اللذيذة يا مستر طارق

منور الموضوع والله
حتي لو اختلفت معايا في الرأي
بس أنا واثق انك مش مختلف معايا في الرأي
و انك بتهزر
لأني متأكد كويس أوي أنك عارف تعاليم ديننا الراقي الحنيف الشيك اوي اوي
اللي كله رحمة بالحيوانات و البهائم فما بالك برحمة الزوجة و الحبيبة و شريكة العمر و الغالية و ام الاولاد الشقيانة التعبانة طول النهار في تربيتهم و اللي طالع عينيها مع الراجل تشوف طلباته كلها ((دي المثالية يعني ))
مش عيب ابدا و لا ضعف من الراجل انه يدلع مراته و يحسسها انها علي قيد الحياة
هيا معادلة يا مستر
الراجل الذكي اللي بيحمل صفة الرجولة فعلا (( بمعناها الحقيقي )) هوا اللي يعرف يحقق المعادلة دي
حب ...دلع...لعب (ايوة لعب) الرسول الحبيب صلي الله عليه و سلم قال (( هلا بكرا تلاعبها و تلاعبك))
حلوة دي امال انا هتجوز ليه ان شاء الله؟
لازم نحقق المعادلة اللي بتقول
جو دافئ...رومانسية...حب...حنان...سعادة..تفاهم مع هيبة ....و احترام...و طاعة في المعروف...و صدق ...و تقدير و اخلاص
هوا ده الراجل في نظري

و كل واحد ليه وجهة نظر

طبعاً انا معاك في كل اللي قلته ومش مختلف معاك ابدا

بس انت عارف القبلية والعصبية بين ( قبلي وبحري )

هههههههههههههههههه

عموما النبي قال عن العصبيه (((دعوها فانها منتنه )))

---- جه الوقت اللي لازم نلتزم فيه بتعاليم دينا

ونترك اي فكر اخر سواء كان تقاليد بلهاء او فكر غربي فاسد

لن يمنحنا السعاده في الدنيا الا تمسكنا بهدي رسول الله

اللهم صلي وبارك على نبينا محمد

شكرا جزيلا على موضوعك الرائع .... جزاك الله عنا خيرا

*ساسُّو*

14-02-2009, 01:26 AM

اشهر 55 جملة بيقولها الاب و الام في مصر

ازاي تعرف انك اتربيت في بيت مصري

سمعتها اكيد قبل كده

مش كده ؟؟؟؟؟؟

...................................

..........................

................

........

....

..

مش عايزة اسمع صوت
لما يكون عندنا ضيوف

ماتردش عليا

الحمد لله انا مش بحب اتخانق او ازعل حد
تقعد في اول صف ادام السبورة
علشان اشوف كويس

لو مش فاهم حاجة ارفع ايد وقول للاستاذ متتكسفش
بسكت احسن لى واسال بعدين

بص كويس و انت بتعدي الشارع

اكتر جملة اتقالتلى
ماتتأخرش بعد المدرسة وتصيع مع صحابك

افرد ضهرك (( و دي اكتر جملة اتقالتلي في حياتي))

ماتمشيش حافي (( و في مرحلة معينة ماكنتش بسمع غيرها الجملة دي ))

no comment

ربنا يهديك
لما يلاقونى بذاكر فى هدوء
اطفي التليفزيون و قوم ذاكر

اقفل صدرك
دى بتتقال للصايعين اللى عندنا*مش انا اللى بقول *

اوعا تاخد من حد حاجة

دى اتقالتلى وانا صغيرة اوى
بلاش وقفة الشبابيك والبلكونات
شباك البلكونة مقفول بقاله اكتر من 11 سنة وبيطل على حتة جبل تحفة

كفاية رغي في التليفونات
ايام الامتحانات بس

ماتقعدش قدام المروحة وانت مستحمي
ولا اخرج وانا مستحمية*دايما بتجيلى حمى بسبب كدة* حرمت خلاص

النوم لحد الضهر بيجيب الفقر

بنام لحد العصر بس
اوعا تكدب عليا تاني مرة

مش بكذب الحمد لله
لازم تاكل سلطة
مش بحبها علشان البصل

اشرب اللبن..... كمل الكوباية...

لو كابتشينو او عليه شاى

كلمنا لما توصل

بابا دايما بيكلمنى*ربنا يخليه* علشان يطمن عليا

مالكش دعوة بالسياسة
لازم علشان ده تخصص اخويا بنرغى سوا وتقريبا هنتقفش قريب

بلاش اكل بره
طعمه يغنى عنه اساسا
وطي المدعوق ده شوية
بتتقالى لو اندمجت فى فيلم على الكمبيوتر
يابني قوم اقرا كلمتين ينفعوك (( الكلمة دي سبب عقدتي م القراية عموما))

انا بحب القراية والمذاكرة جدا

ماتصوتش في الحمام

لو بزعق عاوزة صابونة علشان التانية خلصت
اغسل رجلك وسنانك قبل ماتنام
لازم معجون للاسنان الحساسة وشغلانة طويلة

ماتلزقش في التليفزيون كده ((ساعتها ماكنش في كمبيوتر))
لما بقى كمبيوتر بقيت لازقة بجد
عارف اوضة الفيران ....هحبسك ((موضة قديمة))

اتقالتلى اول يوم دخلت فيه المدرسةوقلبت الدنيا عياط
ربنا يرزقك بعيل يوريك اللي ورتهوني

انا فعلا وريتهم جامد وحاسة انه هيجرالى كدة فعلا
ماتطلعش ع الملاية النضيفة برجليك المعف....... دي

شيلت الملاية خالص وريحت دماغى بفرشها فى الاجازات

نسيت تشرب

نسيت تاكل ..نسيت تاخد المصروف ..نسيت تعكنن علي اهلي؟
نسيت اعمل الواجب

طلع ايدك من جيبك وانت بتكلمني

مش بلبس حاجة بجيوب لانها بكون مغرية احوش حاجات فيها وانساها

عايزة ابص الاقيك ادامي دلوقتي حالا

وبيلاقونى فعلا
ماتتشقاش في الفسحة وكل سندوتشاتك كلها
من ساعة ما دخلت علمى الفسحة انقرضت من عندنا *بقت حصة زيادة*

ادي اللي انت فالح فيه

قراة الروايات الطويلة
الكلام ده يا جماعة اتقال للعظماء كلهم في صغرهم

ماتتكسفوش تعترفوا

.......................

.............

.......

....

مرسيي كتير ليك بجد ضحكتنى وفكرتنى بحاجات كتير اوى
بس فيه جمل بتتقال لبنوتة تحفة زيي*مش اى حد*
يا مجنونة كفاياكى روايات
الرواية دى مش هتخلص ابدا*رواية تحفة بس طويلة اوى*
كفاية شات وقومى
كفاية محمول هتدمرى الرصيد
ياربي الرواية دى مش هتخلص ابدا
انتى بتتقابلى انتى والشمس صدفة*بنام للعصر*
كفاية قراية هتتعقدى وتعقدينا معاكى*أخويا وصحباتى*
انا هعملك كرسيي تيفال علشان مش تلزقى فى الكمبيوتر *معه شوية زيت*
كفاية كدة

MiDo1O2

14-02-2009, 01:41 AM

يامساء الاصطباحة :(
اولا
موضوعك جميل جدا :)
وبعدين دول قليلين ده انا لو كتبتلك اللي بيتقلي مش هنخلص
ده علشان قعدتي على الكومبيوتر
يجي 100,متعدش:(
وكده
ثانيا
بلاش الصعايدة :angry2:
كده
غلط
______________
صعيدي
مبيرحمش :angry2:
ــــــــــــــــــــــــــ
يلا ربنا يكرمك:)
على موضوعك
ـــــــــــــــــــــــــــ
No mercy :angry2:

شمس بياض

14-02-2009, 12:57 PM

[quote=طارق ممدوح ذكي محمد;1094903]طبعاً انا معاك في كل اللي قلته ومش مختلف معاك ابدا

بس انت عارف القبلية والعصبية بين ( قبلي وبحري )

هههههههههههههههههه

عموما النبي قال عن العصبيه (((دعوها فانها منتنه )))

---- جه الوقت اللي لازم نلتزم فيه بتعاليم دينا

ونترك اي فكر اخر سواء كان تقاليد بلهاء او فكر غربي فاسد

لن يمنحنا السعاده في الدنيا الا تمسكنا بهدي رسول الله

اللهم صلي وبارك على نبينا محمد

شكرا جزيلا على موضوعك الرائع .... جزاك الله عنا خيرا

الحمد لله الذى ارجعنا للحق

فعلا ما احلاها تعاليم ديننا

(والله يا خوانا برضو الصعيدى
محتاجينه ومحتاجين شدته فى زمن البنات المايص اسفه فى التعبير)البنى ادم لا عاجبه ده ولا ده سبحان الله فى طبع البنى ادمين

لكن بجد هو الانسان ياخد بمبدأ الوسطيه
فى كل شى وبعدين الرجوع للحق فضيله