السلام عليكم
انا عاوز فى الموضوع ده اجمع اكبر قدر من المعلومات عن موضوع الازمه الماليه العالميهو عن اسباب حدوثها و ما هى ازمةالرهون العقاريه دى و اى حاجه عن الازمه دىو لا تبخلوا عليا باى معلومات من فضلكم و شكرا

بص يا سيدي .. الأزمة وكل مافيها كالآتى ..

اول حاجة .. فيه شوية شركات للعقارات في امريكا حبت تعمل شوية شغل ..

فقامت بانية شوية بيوت لفئة محدودى الدخل .. وطبعا محدودي الدخل ماصدقوا ..

بس المشكلة ان شركات العقارات دي كانت بتستهبل .. ازاااااااي ؟

مشيت بمبدأ ان المضطر يكع فلوس ..

بمعني ان انا دلوقتي الشركة دي بتقدملي البيت الفلاني بقيمة 50 الف جنيه

وانا محدود دخل ومش هاعرف اسدد الـ 50 الف نيه مره واحده .. الشركة قالتلي نو بروبليم

هانقسطلك المبلغ دا على الفترة اللي انتا عايزها بس خلي بالك ..

كل ما مدة التقسيط بتزيد كل ما الفايدة هاتزيد ..

دا غير كمان لو سيادتك ماسددتش في شهر واحد بس الفايدة بتاعتك هاتتضاعف 3 مرات ..

يعني لو الفايدة الواحده عن الشهر الواحد 500 جنيه .. المفروض هاتبقي 1500 جنيه !!

وانا راجل محدود دخل وما باليد حيلة .. ويعني هوا انا لاقي ؟! .. قولت خلاص نقسط مش مشكلة

انا اشتريت وبقسط .. جاري اشتري وبيقسط .. ابن خالي اشتري وبيقسط ..

عمي اشتري وبيقسط .. مديري في الشغل اشتري وبيقسط .. ومن خلال كدا الموضوع انتشر

وبدأ ان الناس تكتر على الموضوع دا ..

ودا خلى سعر الشقة اللي انا المفروض تمنها 50 الف من شهر بقي بعد شهرين بـ 100 الف !!

طبعاً القسط بتاعي انا حراق اوي .. ومش قادر ادفع .. قولت اروح اخد قرض من البنك عشان اسدد ..

طب وايه الضمان دانا راجل شحات ! ..

يبقي كدا مافيش غير اني اضمن القرض اللي هاسحبه دا بالبيت

اللي انا اصلا واخد القرض عشان اسدده !! .. طبعا بعد فترة ظهر ان الموضوع فيه غلط

وان الناس مش قادرة تدفع قيمة الاقساط دي .. فقاموا امتنعوا عن السداد ..

وطبعا اما امتنعوا عن السداد دا أثر على نسبة الاقبال على شراء العقارات دي ..

قامت الاسعار اما كانت في السما السابعة نزلت سابع ارض !

طب دلوقتي البنوك تعمل ايه .. انا راجل مدين للبنك دلوقتي بقيمة القرض ..

ولو ماسددتش القرض طب ماهو القرض بيتسحب عليه فوايد ..

دا غير الفوايد المضاعفة بتاعة قسط البيت ! .. شغلانه منيلة وخراب من كله

البنوك هاتعمل ايه .. هاتروح تطرد الناس ؟ .. قالتلك لأ ..

احنا نبيع قيمة الديون بتاعة العملا اللي سحبوا القروض دي لمستثمرين

على هيئة سندات وبضمان البيوت ..

يادي النيلة .. يعني البيت لسه مش ملكي اصلا وانا ضامنه في البنك ..

والبنك ضامن البيت اللي لسه مابقاش بتاعي للمستثمر

والمستثمر طبعا ابن لذينة وصايع وفاهم اللي بيحصل ..

المستثمر قال انا مالي .. يولعوا كلهم .. انا اروح لشركة تأمين محترمة واخليهم يأمنولي على البيوت دي

طبعا شركات التأمين ماصدقت .. رزق من عند ربنا جايلها اهو وبالملايين كمان .. حد طايل ؟!

طب وهيا الشركات عايزة ضمان التأمين ايه .. نفس البيت برده !!

وبدأت شركات التأمين تشوف شغلها

وبدأت تسحب الاقساط بتاعة التأمين على السندات بتاعة المستثمرين

وبكدا الموضوع اتبهدل خالص مالص

انا متمسك بإن البيت دا بتاعي .. والبنك بيقول انا مش هاسيب البيت الا مانا اسدد قيمة القرض .. والمستثمر بيقول انا مالييش دعوة البنك مديني ضمان بالبيت دا واتصرفوا انتوا معا بعض .. وشركات التأمين بتقول اولعوا كلكوا انا مالييش غير اني اخد حقي من البيوت !!

المهم بعد مادا كله حصل .. المستثمرين مالقوش غير انهم يتسندوا

على الحيطة المايلة (شركات التأمين)

طب ماهو شركات التأمين هاتعمل ايه .. ماهو الناس مش عايزة تدفع ..

المستثمر قال انا مالييش دعوة .. انا عايز حقي ..

ومستثمر في اتنين في تلاته في عشرين في ميه .. عملوا ازمة في شركات التأمين

وشركات التأمين مابقتش قادرة توفر سيولة كافية لسداد حقوق المستثمرين دول ..

قامت بعض شركات التأمين اعلنت افلاسها لإنها مش قادرة تسدد ..

وطبعا اما شركات التأمين تفلس .. ماهو البنوك اللي كانت بتتعامل معاها في الاول هاتفلس برده

وبقي البيت اللي كان بـ 50 الف جنيه في الاول خالص ..

بقي قيمته بعد الفوايد والعك دا كله عدي قيمة الـ 200 الف جنيه

وانا بقي شايف ان الموضوع دا سببه حاجتين :

1- طبعاً الربا .. ودا واضح اوي .. لإن سبب الهبل دا كله الفوايد .. ودا بيتهيألي زي مايكون ربنا بيعاقب الناس دي .. وزي ما سيدنا محمد قال ( لعنالله آكل الربا ومؤكله وشاهديه وكاتبه )

2- استهبال وعبط من الجهاز المصرفي بتاع امريكا .. لإن القصة ومافيها ان فيه قوانين بتحكم الحد الإتماني .. والجهاز المصرفي هناك ماكانش فايق للحكاية دي .. ومافاقش الا بعد مالعملية دي حصلت .. قاموا قافشين بقي .. بالظبط كدا زي تذاكر المترو .. كان فيه ناس كتيرة مابتدفعش وتعدي .. لكن اما فاقوا .. بقي ياتدفع يا ماتعديش .. ولو عديت من غير ماتدفع هاتتقفش ..

و الله انت معلم مشكووور وى يا باشا لكن كده حضرتك شرحت ازمة الرهون العقاريه فقط و ما تطرقتش ان ازاى المشكله دى قدت لحدوث الازمه هل معنى الازمه دى يعنى ان الناس دول مقدروش يسددوا الاقساط و لا علشا حصل سحب قروض كتير ولا ازاى قدام هما معندهمش ضمانات قيمتها اكبر من قيمة القرض

هاى
بصراحه والصراحه راحه وهمه دولت شويه حلوين

بس هوه ده دماغه تمام تمام

بليس لوسمحت انا محتاج نفس البحث فلو تكرمت لما تخلصوا ابقا اعرضه علشان اطبعه وكلنا برده يستفيد وينجح

مشكور اخى الكريم
ولما اعرف معلومات هبعتهالك

انا متاسف لسبب وحيد ان انا عن نفسى كان سهل قوى انى ابحث عن الموضوع ده فى جوجل و محركات البحث التانيه و اجمع المعلومات فى ملف و اطبعها و ابقى كده عملت البحث و ريحت دماغى لكن اولا البحث معلهوش درجات يعنى لما هنعمله مش هناخد درجات زياده لاننا غير مطالبين بيه و ثانيا و ده الاهم انى بعمل البحث ده لحاجتين اولاهما انى ادرب انى اعمل ابحاث و ثانى حاجه انى اعرف معلومات جديده و اعرف العالم حوليا ماشى ازاى و ايه اللى بيحصل فيه
انا بائذن الله دلوقتى بحاول انى ابحث عن الموضوع ده و اقرا عنه و اعرف هى ايه الازمه الماليه العالميه دى و ايه اسبابها و اثرها على اقتصاديات الدول الناميه و اقتصاد روسيا و الاقتصاد الاوربى و اقتصاد النمور الاسيويه و ايه الحلول المقترحه لحل المشكله دى من الاقتصاديين و من الاداره الامريكيه
انا بائذن الله لو ربنا وفقنى و قدرت اعمل البحث هنزله فى القسم لكن انا بقول للناس اللى عاوزه تعمله ياريت يفهموا الموضوع الاول قبل ما ينقلوه و انا هسال الدكتور عن البحث يوم السبت كل حاجه عنه