خليها فى توقيعك.... علشان ما تتعبش من كتر الكتابة!!! [الأرشيف]

مشاهدة النسخة كاملة : خليها فى توقيعك.... علشان ما تتعبش من كتر الكتابة!!!

جمال سراج

30-06-2009, 05:08 AM

ayadooo

30-06-2009, 08:06 AM

السلام عليكم ورحمة الله وبركاته
ما تستغربش من العنوان
من الملاحظ أيها السادة والسيدات الزملاء والزميلات أن هناك من الأعضاء من يختم حديثه فى أى مشاركة
بـ مستر/ ............ أو أستاذ/ ...................
مدرس كذا أو مدرس أول كذا أو معلم أول كذا
ما الداعى لذلك اصلا
هل هى نوع من الدعاية مثلا
او هى نوع من الفزلكة متاسف فى التعبير يعنى!!!!!!!!!!!!!!
او ربما هى البحث عن درس خصوصى بقا من خلال المنتدى
بجد لا اعلم سببا مقنعا!!!!!!!!!!!!
ومع ان الذى يفعل ذلك ربما صار معروفا لدى الكثيرين بالمنتدى!!
ومع العلم بان مشاركته هذه ربما لا تكون لها صلة بمادته اصلااقصد مادة تخصصه الذى يقوم بالدعاية لها!!!
وربما لا توجد له مشاركات فعالة فى مجال تخصصه او حتى فى الاقسام المختلفة بالمنتدى بلاش مادته
ومع العلم ايضا انه يمكنك التعرف على اى زميل او زميلة ( وظيفة - سكن - مشاركات - مواضيع) وغير ذلك من خلال مشاهدة الملف الشخصى
اضغط على اسمه واختار مشاهدة الملف الشخص
انتوا جميعا عارفين كدا!!!
اتعرفت انا شخصيا وربما الكثير منكم - تعرفنا من خلال مشاهدة الملف الشخصى الذى يجب ان تتحرى فيه الدقة والصراحة

* لا وايه كمان تلاقى من يكتب مدرس كذا وكذا ( مادة تانية) مع العلم بان كل الناس بتدرس مادة واحدة بس تخصصها اللهم الا اذا كان هناك عجز مؤقت لبعض الوقت يمكن معالجته وبردوا مش مادتك
وباثتثناء الزملاء بالتعليم الابتدائى ( معلم الفصل) طبعا لا اقصدهم
* ايضا من يكتب سيرة ذاتية عن حياته مثلا وجدت من يستعرض بوضوح - مثلا اللى اتعلم دورة كمبيوتر 3 ايام يقول 3 ايام كمبيوتر بكذا وربع ساعة بالفيديوا كونفرنس و............... حاجة بجد تنقط!!!!!!!!!!!!!!

يا سادة نحن فى منتدى تعليمى أكثر رواده من المعلمين ولسنا فى سوق سمك!!!!!!!!!!!! مثلا يعنى
مع احترامنا لبتوع السمك
يا سادة خلى عملك وموضوعك هو من يتحدث عنك مش اسمك فى نهاية الموضوع هو اللى هيعملك دعاية... دا لو عاوز تعمل دعاية يعنى!!!!!!!!!!!!!!!

يا سيدى ويا سيدتى كن وكونى اكثر تفاعلا وايجابية فى المشاركات وبلاش المواضيع التافهة او الردود التافهة
مش عاوز تعلق بلاش - معندكش رد عادى جدا - بس بلاش 5000 مشاركة وموضوع على وزن مشكووووووووووووووور او حتى جزاك الله خيرا - او حتى فى ميزان حسناتك
مبقولش بلاش
بس خلى قبلها تعليق بسيط يثرى الموضوع - ويضيف جديدا ويدعمه - احيانا مشاركتك بالموضوع تكون افضل من مشاركة كاتب الموضوع نفسه- زى ما بيقولوا صاحب الموضوع نكشك بالكلام !!!!!!!!!!!
يا سادة حاول افادة الطلاب بمادتك باى شىء ممكن
امتحان - مذكرة من اعمالك او حتى منقولة - شرح بسيط - حل امتحان - اجابة سؤال اى حاجة
بلاش الحاجة تطلع فى الدرس بس !!!! وهنا لا
وبلاش تدخل عشان تاخد وخلاص - حاول تفيد زى ما بتستفيد!!!!!!!!!!!! الدنيا خد وهات
ياريت تكون مشاركتنا بمادتنا اكثر من مشاركتنا بغير مادتنا وخصوصا اذا كان جمهورها عريضا - اقصد مش زى طلاب اللغات مثلا اللى عددهم بسيط وقلما حد بيدخل اصلا - مستغنيين اصلا!!!!!!!!!!!! للاسف
فى النهاية عاوز اقول حاجتين
1- لا اقصد مطلقا اى شخص بكلامى هذا - الكلام لكل الناس - خدوا بالكوا لكل الناس
مش الكلام على مين!!!!!!!!!!!!!!!!!!! واللى على راسه بطحة يحسس عليها زى ما بيقولوا!!!!!!!!!!
وكل واحد يقلب الكلام فى دماغة وانا اول واحد هيقلب الكلام باذن الله
2- اعلم جيدا قول القائل صراحتى لم تترك لى صديقا - ولكنى أأمل ان تكسبنا صراحتنا صداقة الجميع بإذن الله
دمتم بكل ود
واليكم جميعا تحياتى

بسم الله الرحمن الرحيم
( وجعلناكم شعوبا وقبائل لتعارفوا ان اكرمكم عند الله اتقاكم)
صدق الله العظيم
لالالالالالالالالالالالالالالالالالالالالالالالالا لالالالالالالالالالالالالالالالا
حضرتك معظم مرتادي المنتدي العظيم ده ليسوا من ذو المواد الحية بتاعة الدروس (زي مادة حضرتك ) او اللغة الانجليزية
وحتي علي فرض انها مادة حية معظم المارة هنا في المنتدي العظيم برضه ده مش ( بتوع دروس)
وحضرتك الله يخليك ويبارك لنا فيك ذكرتني ...................بالوزير الاسبق ( ال مصر يلزمها عشرات السنيين لتصليح ما افسده)
اي دعاية تقصد اتهام بعض المعلمين بدون ادلة كما فعلها
طيب ما قول حضرتك ان بتوع الدروس ليس لديهم وقت للاسترزاق عبر المنتدي
سترهم الله دنيا واخره هم عباره عن عدد قليل جدا يعد علي صوابع اليد الواحدة في كل مدينة وحي وقرية ونجع وعزبة
واعتقد و لا امبراطور واحد من هؤلاء الاباطرة يفكر مجرد تفكير التجول هنا في اروقة المنتدي للحصول علي معلومة كغالبيه مرتادي هذا المنتدي العظيم
( ليس لديهم وقت)
ما قول حضرتك ان البعض منا يذكراسم المنتدي امام زملائه بالمدرسة ينظروا اليه ( باستهجان وسخرية واستهزاء) لسبب بسيط ان بعض المعلمين
وبعض الطلبة واولياء امورهم ارتبط مفهوم المنتديات والانترنت بمفاهيم خاطئة
اذكر لحضرتك
شيء لدينا ناظرة لا تجيد التعامل مع الحاسب الالي اطلاقا
ياويله وسواد ليله لو وجدت معلم بصورة ما فاتح الحاسب الالي لان ارتبط في ذهنها( بالخيبة والمسخرة وقلة الادب ( وهل الكمبيونر والانترنت كذلك ) كلا والف كلا
مع ان لدينا 75 جهاز حاسب الي
لالالالالالالالالالالالالالالالالالالالالالا
ليس هناك دعاية للبعض اذا كان مقصدك حلال وانا اثق في ذلك
ليس هنا في قسم كادر المعلم
كادر المعلم يرتاده الغالبيه العظمي معلمين محترمين ومعلمات محترمات
يبحثوا عن معلومة عن مشاركاتهم في همومهم و احزانهم
كلام حضرتك اولي به اقسام المواد الحية (بتاعة الدروس )
ووبالنسبة للدعاية والدروس مصر ليست ( القاهرة ولا الاسكندرية) اللهم لا حقد ولا حسد
مصر دي قري ونجوع واحياء فقيرة معدمة وعزب مجهولة
الحصة فيها تقف باقل من 50 قرشا لدينا معلمين في القرية و القري المجاورة فاتحين اوكار الدروس كما يقال عليها
( مجانا)
اقسم بالله العظيم مجانا والاسماء لدي وكفاءة ما بعدها كفاءة والغالبية العظمي الشهر ب 10 جنيهات عدد 12 حصة
وقري باكملها في مصر نهضت علي اكتاف معلم او اثنان من ذوات ( البلوشي ) ومازال العطاء مستمر

لالالالالالالالالالالالالالالالالالالالالالالالالا لالالالالالالالالالالالالالا
حضرتك .................... انظر لسيادتكم ان حضرتك كبارة هذا المنتدي بفعل مجهوداتك الجبارة وليس بفعل الصورة
لا يا سيدي من قال لدي كذا وكذا وكذا لا تضن عليه بما قال لان ده مجهود وعرق سنين يكفي ان لا الحكومه لا المجتمع كرمه
تكريمه عند الله سبحانه وتعالي
لدينا اساتذة جامعه يرتادوا المنتدي لم ينالوا حقوقهم
بل من حق استاذ الجامعه يرفع قضيه علي من لا يناديه بلقب دكتور ( لان كما يقال الالقاب محفوظه )
لدينا معلم اي فرد يتجرأ ويقول له اسمه بدون لقب يقول له من فضلك استاذ ( فلان الفلاني )
حتي ولو كان وكيل وزارة
معظم الملفات الشخصية لمعظم مرتادي القسم لا تحتوي علي اي معلومة
من يذكر اسمه هنا ووظيفته له كل الحق
وليس بها دعايه ولايحزنون
ده من باب التعارف نحن في قسم كادر المعلم معلم = وظيفة
ده كتر خير المشاركين عند المجاملة بكلمة مشكور لا نه بيحيط الكاتب ان من ذكر كلمه مشكور مر من هنا واهتم
بموضوعه
من باب المجاملة
ونحن كشعوب الارض نحب المجاملات وكفي
حتي قيل ان الكلب ضرب به المثل في شدة الوفاء ووالمجاملة هل تعلم لماذا لانه ( بيطمر فيه )
وعندما يطمر فيه العيش والملح تجده ماذا اقول .................. من حركات هذا الحيوان المسكين
مع الفارق (وحاشا لله )
فالمجامل بكلمه وفاء كثر اللهم من امثالهم لان ( بيطمر فيه)
بيشعر يالامتنان والوفاء لصاحب الموضوع كما طمر في واثنيت علي كل مواضيع حضرتك
بل ملازم حضرتك اصبحت اساليب استرزاق لمعظم مكتبات الجمهورية وليس خط القنال فقط والشرقية
وذكر هذا السيد الوزير ام الكادر امتحاناته اصبحت ( سبوبة ) هل كان يقصد سيادتكم
لالالالالالالالالالالالالالالالالالالالا
كان يقصد اصحاب المكتبات باب رزق فاحه الله لهم
وايضا يرتاد القسم ناس كبار مدراء ونظار
بطلوا دروس من بدري
بل لم يتعاطوه
ا اصلا
دي شماعة لا بتقدم ولا بتاخر في العملية التعلمية
مصر مش القاهرة والاسكندرية
مع كل احترام وتقدير لاهل القاهرة والاسكندرية
ولو كانت مصر القاهرة والاسكندرية
كانت انتهت من زماااااااااااااااااااااااااااااااااااااااااااااااا اااااااااااااااااااان
مصر دي احياء فقير وقري وعزب ونجوع غلابة لا بتوع دروس ولامافيا ولا استرزاق لا بيتركوا المساجد ولا المساجد بتتركهم

ارجو الا تغضب
والحمد لله ملفي الشخصي لا يحتوي علي اشارة واحدة من عن حياتي ولا ولا محل سكني ولا محافظتي ولا اي شيء
لدواعي امنية
واذا ذكرت شيء بيكون في رسائل خاصة لخاصة الخاصة وللاحبة
اما ذكر اسم المادة لا اجد به اي غضاضة
لان كاتب هذه السطور من قريه فقيره افقر قري مصر
ومجهولة والدروس فيها باقل من 10 جنيهات ومعظم الاولاد مجانا لان القريه من شدة فقرها ( بيناسبوا) بعض ختي لا تكون تكاليف الجواز باهظه وبالتالي كلهم اقرباء بعض بفعل النسب
هههههههههههههههههههههههههه
لا تزعل مره اخري
واترك المجال لبعض الزملاء لابداء الراي
قلت ما يمليه علي ضميري
واجري وثوابي عند الله

واعتقد ان كل شيء مباح طالما لا يتعدي ( الدين ولا التقاليد ولا العرف ولا الاخلاق ولاالقيم ولا العادات ولا ضد الوحده الوطتية ولا الانساب ولا العائلات ولا ولا ولا ولا ولا ولا بيهدد امن البلد ................ ولا بيحرض علي الارهاب )
دي اراء تحتمل الصواب والخطأ
من اخطأ له اجر ومن اصاب له اجران
وجل من لايخطيء
وكلنا بنتعلم من حضرتك و من عظماء المنتدي الكبار
سيدي
لاتزعل مرة اخري وارجو ان تتقبل النقد بصدر رحب
(تلاميذنا بنتسول منهم ان ينتقدونا لنعدل من طرقنا واساليبنا امامهم)
وبنتعلم منهم
ابو جهاد عودة
عياد محمد
(توبة اقول اسم المادة تاني )

nabila_banoub

30-06-2009, 09:23 AM

مستر جمال
فوجئت بقسوتك و هجومك على كل من كتب أسمة و مادتة
أنا أتفق فى الرأى مع الأستاذ عياد

ayadooo

30-06-2009, 09:39 AM

مستر جمال
فوجئت بقسوتك و هجومك على كل من كتب أسمة و مادتة
أنا أتفق فى الرأى مع الأستاذ عياد
السلام عليكم
استاذة / نبيلة متفق مع رأي حضرتك
قسوة غير مبررة
بس الاختلاف في الرأي لا يفسد للود قضية
اعتراف اليوم من دكتور مفيد شهاب ان ليس لدينا معارضة بمعني معارضة( لان حكومتنا الرشيدة بتصادر المعارضة اول بأول زي ال الطفل كل يوم يمر ويقطع جزء من النبته الخضرا القدام بيته علشان لا تكبر ولا تظلل ولا تثمر )
وعليه العوض
بس لسه في امل
احنا بصراحة بنلاقي نفسنا هنا
يعني ثورة الانترنت اتاحت لنا الفضفضة بس ارجو تكون بدون زعل
ابو جهاد عودة
عياد محمد

aly almasry

30-06-2009, 09:47 AM

اخطأت سيدي مع احترامي الشديد
اعرفك بنفسي
معلم اول رياضيات ولم اكتب مرة واحدة ذلك
لكن ذلك لايمنع ان عدم معرفتي لبعض الناس وخصوصا صغار السن بالمنتدى
سبب حرجا كبيرا بالنسبة لي
على سبيل المثال
حدث ان ارسل لي رسالة خاصة بخصوص موضوع ما
وكانت من احدى بنات المنتدى وكانت تطلب اشياء فى قسم ما
المهم خاطبتها بكل ادب حضرتك ممكن وبعد اذنك وما الى ذلك
دفعها ذلك الى فرضية ان من يخاطبها اصغر منها سنا
واخذت فى لهجة حادة من الامر والنهي
يعنى انت لازم تشيل الموضوع ده وتحط الموضوع ده
وكفاية تقصير وما الى ذلك من لهجة حادة مستفزة وجارحة لى

المهم ما اقصده اننا لسنا وحدنا في هذا المنتدى معنا طلبة ولازم تكون لغة الخطاب فيها شىء من الاحترام
بمعنى اخر يعني لو كان هناك تعريف بالاستاذ يكون احسن
وبعدين لازم يكون هناك حسن ظن بالسادة المعلمين وهو حر يكتب ما يحلو له بما لايكون خارجا عن القوانين او العرف او الشرع
تقبل تحياتى

Khaled Soliman

30-06-2009, 09:56 AM

أخي الكريم أنا واحد من الناس لم أقم بتعديل توقيعي إلا بعد أن تبين لي أن بعض الأعضاء قد يعتقد أني قريب منه في السن أو يقوم برفع التكليف ويتخطي الحدود في حواره و من المفروض إن أي مدرس في المنتدي بدون رغبته يكتب تحت أسمه مدرس كذا بدلاً من عضو خبير أو قدوة ألخ لبيان قيمته و قيمة مواضيعه حتي يتعامل معه الإشراف والإدارة والأعضاء علي هذا الأساس.
بارك الله فيك

Abu Menna Mohamed

30-06-2009, 10:31 AM

مشكووووووووووووووووووووووووووووووووووووووووووووووو وور !
يا سيدي الكلمة الطيبة صدقة , ايه المشكلة اننا نستحسن مجهود اخ فاضل او نعرف انفسنا فالمقصود ان نجد انفسنا في منتدي راق و ايضا من الافضل ان نحسن الظن ببعضنا البعض و عموما جزاك الله كل خير !

الأستاذة هدى

30-06-2009, 10:31 AM

أستاذ جمال
السلام عليكم ورحمة الله وبركاته
دعنى أتفق وأختلف معك
أما نقطة الاختلاف فهى نقطة الدعاية أعتقد أن الغاية من دخول معظم المعلمين هنا ليس الدعاية
وكتابة اسم المادة فقط ليس من قبيل الدعاية انما هو من قبيل التعريف وهذا ما أؤيده بينما لو ربط التوقيع والاسم وبالمادة واسم المدرسة هنا أتفق معك فى كونها دعاية لا داعى لها

أما المشاركات مشكور وجزاك الله خيرا فهى بالفعل لا تضيف للموضوع وغالبا ما لا أحبذها وبالفعل رأيت مواضيع 80% من المشاركات فيها مشكور وجزاك الله خيرا فكانت مواضيع عجيبة مللت من الدخول والعودة اليها من كثرة المشاركات السلبية لكن ماذا ستشارك فى موضوع نقل ملف مثلا للمنتدى بغير مشكور او جزاك الله خيرا لو أنه موضوع للنقاش لوجدت إضافة بينما نقل ملف يحتاج الشكر من باب (من شكر الناس فقد شكر الله ) أما غير ذلك فأتفق معك فيه حيث كثرة المشاركات من هذا النوع خاصة فى المواضيع التى تحتاج نقاش تكون مشاركات تغيظ الصراحة لكن لا مانع من تقبلها احيانا حسب مقتضى الموقف

وليتقبل الجميع تحياتى

السيدحمدى

30-06-2009, 12:08 PM

الأخ الفاضل/"لأستاذ جمال
انا اختلف مع حضرتك فيما قلت كما وكيفا
وكما قال الفاضل[ابو جهاد ] أقسم لك عند ذكر اسم المنتدى امام الزملاء
الجميع يكون فى حالة استغراب ونفور بل وتريقه احيانا وهذا ليس تقليل من شأن النتدى
ولكن هذا المكان نحن ننظر اليه نظره اخرى مختلفه تماما عما تراه حضرتك
فهو مكان للفضفضه وازالة بعض الهموم والتعرف على سخصيات جميله ومحترمه
والأستفاده من بعضنا
اسف اخى الفاضل فأنت كنت قاسى جدا فى حكمك والله المستعان

abou aliaa

30-06-2009, 01:59 PM

اخواني الأعزاء لا داعي لتحميل الأمور أحكام قاسية

و الأنسان يقدم حسن الظن في المعاملة حتى يظهر غير ذلك
حتى و إن ظهر ما يدل عن غير ذلك ((( فإن الدين النصيحة )))

أنا أظن أن بعض المعلومات عن العضو قد تفيد مثل

معلم أم طالب (( لأن لكل طريقة في الخطاب ))
المادة التي يدرسها (( أصحاب الاهتمام المشترك ))
المحافظة وليس تفاصيل السكن (( لأن لكل أقليم مشاكل و قضايا قد لا توجد في غيره))

جمال سراج

30-06-2009, 02:53 PM

السلام عليكم ورحمة الله وبركاته

أولا شاكر جدا مرور حضراتكم وتعليقى باختصار من الآخر للأول متأسف يعنى
1- كما ذكر الجميع اختلاف الرأى لا يفسد للود قضية رأى أى شخص يحترم بأى حال حتى لو كان خطأاا نحترم الشخص ولا نعمل برأيه
2- أنا مطلقا لم أذكر أسماءا ولا أعنى شخصا بعينه.... لماذا اعتبر بعض الأشخاص هذا الكلام موجها اليهم!!!!!!!!!!!!!!
ربما اقصد أشخاصا رحلوا عن هذا المنتدى - أيوة اعنيهم - أشخاصا رحلوا عن المنتدى كانوا شعلة من النشاط والحماس وكثرة المواضيع المهمة - أصبحوا الآن أعضاءا هنا بعد أن كان منهم المشرفين - لذا تجدهم الآن من المتفرجين والمتفرجات ولا اشك ان فيه منهم ناس عاوزة التقليل من شان الناس هنا - لذلك كنت حريصا على عدم التقليد - بلاش نقلد - خلينا دايما على الحياد
لا اشراف يلزمنا ولا التقرب من مدير المنتدى او حتى مؤسس المنتدى يعنينا - يعنينا الزمالة ويعنينا طلابنا فقط
وتصدقوا انا لا اعرف لا مجلس ادارة المنتدى ولا اعرف الا القليل من المشرفين ذو الصلة بمادتى ( الرياضيات)
3- هناك اشخاص زملاء وزميلات افاضل اسىء اليهم او هما فهموا انهم اسىء اليهم ورايى انا الشخصى انه اسىء اليهم من جانب بعض الاشخاص بادارة المنتدى ورحلوا عن الاشراف والمشاركات فى المنتدى كلية وهناك منهم من هو اكثر احتراما وتقديرا عندى - لم يرحل كلية وترك الاشتراك فى المواضيع العامة او الحوارات والنقاشات وظلت علاقته بمادته وطلابه زى الفل اقول زى مين
زى الأستاذة والأخت الفاضلة نداء الجنة ( حد يعرفها)!!!!!!!!!!!! ربنا يبارك لها فى اهلها ونفسها وعافيتها
وهناك من لا يتخلى عن المشاركة فى أحلك ظروفه ولا يبخل بوقته وعلمه على طلابه وايضا زملاءه اقول زى مين
زى أختنا الفاضلة والعزيزة وزى ما تقول قول من أشيك الألفاظ الأستاذة آمال عبد الهادى حتى انها تتابع المنتدى من خارج مصر من الكويت أحيانا مش بس كدا لقد أسىء اليها بمدرستها لانها تفيدنا بعلمها وجهدها ظنا منهم ان فى هذا قال افشاءا لاسرار المدرسة مثلا !!!!!!!!!! حد يعرف كدا!!!!!!!
* يا سادة انا طلبت من شخص مهم جدا بالمنتدى اسمه بيكتب باللون الأحمر !!!يكتب شكرا لبعض الناس بقسم الكادر
لهم الفضل على المنتدى كله - قالى حاضر ولم يفعل!!!!!!!!!! - صدقونى مش هتفرق معايا يكتب او ميكتبش لو كان لنفسى
لكن تفرق لو لزميل له الفضل علينا وعشان كدا انا ايضا احيانا ما يطلب منى اشياء من بعض الاشخاص لا القى لها بالا عملا بالمثل الصحيح الكبر على اهل الكبر صدقةالذى يتفقمع حديث شريف فيما معناه اذا رايتم المتكبر فتكبروا عليه..........
وعلى كل اعضاء مجلس الادارة ومؤسسيه وغيرهم كما قلنا مرارا اننا لا يلزمنا الا زملاءنا وطلابنا حتى لو رحلنا من قريب او بعيد
ولا تعنينا الدعاية ولا الاعلان ولا المنظرة بتاع المواقع التانية اللى فيها 10 عمالين يردوا على بعض ويمزعوا فى بعض
لا وواخدين القاب ومناصب!!!!!!!!!!! حاجات فخمة قوى
* هناك اشخاص لم تعد لها صلة بالاشراف فى بعض الاقسام ورحلت عن المنتدى الا بدور المتفرج والمتابع لمواضيع بعض الاشخاص
وربما لا تزال اسماؤهم موجودة كمشرفين فى الاقسام دى __ طب ليه!!!!!!!!!!!!!!!!!!! طب ليه دى مش اغنية شاهيناز!!!!!!!!!مش اسمها شهيناز بردو

* ربما ناس تقول واحنا مالنا اقولك حقك بس كن على دراية وخلاص وخليك مرن بالمعاملة ومحدش يضحك عليك
احنا ملناش بقصص المنتديات والمزايا المادية والعائد المادى والكلام دا - بس المفروض يبقى لنا دخل ببعض الاشخاص اللى بنتعامل معاهم بالمنتدى - يعنى يرضى الناس ان مشرف مثلا عشان اسمه مشرف وبكذا قسم تبقى مواضيعه مثبته فى كل قسم وربما هناك مواضيع مهمة جدا اهم من مواضيعة اصلا واشيك منها لاعضاء غير مثبته !!!!!!!!!!!!!!! طب ليه عشان مشرف يعنى ولا ايه!!!!!!!
متقولولنا عشان نعمل زيكوا!!!!!!!!!!!!!! ابدا والنعمة ما نفكر نعمل لحد يفتكر سوء فيا!!!!!!!!!!!!! أصل فيه ناس ما بتصدق !!!!!!!!
3- يا سادة انا مقلتش ميكتبش اسمه ولا وظيفته خالص - انا بقول مش فى كل مشاركة
يعنى حضرتك لو رديت عليا هنا يا أخى يا حبيب قلبى يا أستاذ السيد حمدى - لو رديت عليا هنا 5 مرات لازم تكتب فى كل مرة
السيد حمدى - معلم أول أ ثانوى رياضيات - بمدرسة السيدة خديجة الثانوية بنات - بالزقازيق - شرقية- مش صح كدا
خلينا اجيبها فيك لانك حبيبى فى الله ومش هتزعل منى - نحن لم نتلاقى ولكن تلاقت قلوبنا على الخير سيدى الكريم!!!!
اعتقد حضرتك هكتب مرة واحدة بس فى بداية الموضوع او اذا كان تعليقا لا يكرر انما لو على كل تعليق ولنفس الشخص تبقى من وجهة نظرى مبالغ فيها ولا اقبلها شخصيا وانتم جميعا احرار بالتاكيد

بعد كل حاجة - الجميع فوق رأسى من أعلى
أكن للجميع خالص احترامى وتقديرى وحبى صغيرا كان ام كبيرا
كل الناس عندى مهمة - يعنى اذا اعتبر اى شخص أو شعر باهانه من كلامى او موضوعى من اساسه فأنا متأسف له بشدة
وله منى كل الإحترام- انتوا عندى اهم من الموضوع
وهى فضفضة مش أكتر - وجابت نتيجة- نكشتوا واتكلمتوا وطلعتوا اللى عندكوا وانا كمان!!!وانا اتعلمت وبتعلم ولحد ما اموت هتعلم ان شاء الله منكوا كلكوا - الصغير قبل الكبير
بالتاكيد لا احكر على فكر او راى احد كما هو مطلوب من الجميع ايضا ان يحكر على رايى المتواضع الذى قد اكون فيه مخطاا !!!!!!!!!! .............. وربما أيضا قد أكون صائبا
أخيرا اتمنى من التعليقات القادمة ان تعلق على الجديد يعنى لا داعى لاطالة ملهاش لازمة عشان ما نبقاش دخلنا فى شات عالياهو مثلا!!!!!!!!!! - مع احترامى- اتكلم براحتك قول رايك بصراحة
بس بلاش نعيد فى الكلام ونقول انا اقصد وما اقصدش
لا انا بقول انا ما اقصدش اى حد معين - بس خلاص بتاعة شعبولا !!!!!!!!
دمتم بكل ود واليكم تحياتى

قلب صغير2

30-06-2009, 03:15 PM

انا مع حريه ان كل واحد يعمل الى هو عايزه
يكتب بياناته او ما يكتبش بياناته
مع انى افضل معرفه البيانات
فالجميع هنا على درجه كبيره منا الوعى والفهم
ولازم نفرض حسن النيه

بس انا احى جدا نقاشكم الجاد وطريقة حواركم
المحترم
فحتى مع الاختلاف يبقى الاحترام والود

جمال سراج

30-06-2009, 03:28 PM

لاحظوا بس حاجة
الموضوع بتاعى اسمه
خليها فى توقيعك ................ يعنى ما قلتش بلاش ............. اه خليكوا فاكرين
لا وعشان خايف عليكوا من كتر الكتابة لتتعبوا!!!!!!!!!!!!!!!!!!
بجد شكلها مقبول جدا فى التوقيع مستر / خالد لانها بتبقى حاجة طبيعية بقا مش بتكتب عن قصد كل مرة وجهة نظرى مش اكتر
آه يا مكار يانا!!!!!!!!!!!!!!!!!!!!!! مش هتخلصوا معايا!!!!!!!!!!!!!!!
تحياتى وحبى لكم جميعا

جمال سراج

30-06-2009, 03:40 PM

حاجة تانية مهمة من وجهة نظرى
صاحب الموضوع بالدرجة الأولى هو المعنى بالرد على مشاركات الزملاء فى الموضوع - الكلام دا فى المواضيع التى تكون فيها اختلاف لوجهات النظر - يبقى صاحب الموضوع هو اللى يرد
مش حد يشوف حد يتفق مع رايه يقوم يعلق عليه او حتى يقدم له شكرا!!!!!!!!!!! صاحب الموضوع اعتقد يقدر يرد كويس
اثتثنى المواضيع الهامة التى فيها افادة للآخرين او مساعدتهم - دى عادى رد براحتك انما فيما يتعلق بوجهات النظر صاحب الموضوع الاولى بالرد فقط
لانه ربما يختلف صاحب الموضوع معاك ومع من أيدك بالراى !!!!!!!!!!!!! لا هنعمل بمدأ قالوله بتاع شاهد ماشفش حاجة!!!!!!!!!!!!
دى وجهة نظرى ولا داعى للتعليقات غير المجدية او التى تؤدى الى فرقة
تحياتى

Khaled Soliman

30-06-2009, 03:56 PM

قدسنا

30-06-2009, 05:20 PM

الله الله الله على كل الاراء المحترمة الواردة في الموضوع وفي النهاية كل زميل حر وسيفعل ما يحلو له واحترمكم جميعا على النقاش الحر الشريف

ibrahimsalhin

30-06-2009, 05:55 PM

السلام عليكم
زملائى الاعزاء خير الكلام ماقل ودل وانا عايز اقول لو انكم قابلتم الاستاذ جمال سراج واتكلمتوا معاه زى ماحصل معايا هتعرفوا ان الراجل ده متواضع جدا ونفسه ان الناس فى المنتدى تفيد بعضها من غير دعاية او استعراض او مشاركات من غير فايدة لاحد ومفيش حد ينكر ان المشاركات غير الهادفة اصبحت كتير جدا والسيرة الذاتية بتبقى مملة لما تكون مجبر تقراها عشان تفهم المشاركة عايزة ايه هل المدرس الاول افضل من المدرس العادى يبقى مش لازم تتكتب
جايز اسلوبه كان شديد شويه بس انا وضحت وجهة نظره بكل صدق بدون مجاملة وانا مفيش مصلحة بينى وبينه غير الكلمة الطيبة

ممدوح مصطفى الانصارى

30-06-2009, 06:04 PM

Soaad-532

30-06-2009, 07:35 PM

اخوتى الاعزاء/ هذا المنتدى اشعر انه بيتى احكى من قلبى بصدق اسمعكم جميعا استفيد منكم كثيرا لدرجة انى اعاتب البعض من شدة شعورى بالانتماء اليكم دام بيننا المعروف والاخلاص والمحبة ودمتم لى اخوة اعتز بكم واذا وجدنا احد فى اسرتنا زعلان من شىء يجب علينا تبسيط الامور والعمل علىالارتياح النفسى للجميع.
وبمناسبة اننا فى الصيف يجب على كل واحد منا اعطاء معلومة جديدة عن اى شىء يعرفه معلومة (دينية-ثقافية-فنية........)
ولكم تحياتى.

leprince

30-06-2009, 08:41 PM

السلام عليكم اخى الغالى

فعلا من فترة لم اقرأ مثل هذه المواضيع الرائعة و التى تحث الناس على العمل و الاخلاص فيه و لكن البعض فهم الموضوع غلط .
اولا الاستاذ جمال لم يخطأ عندما ذكر انها نوع من الدعايه فى بعض الاحيان و خاصة ان الادارة هى التى تعطى صفة المدرس للذين يستحقونها بالفعل . فلا داعى لكتابة مدرس مادة كذا فى التوقيع لكن لى ايضا تعليق
هناك بعض المدرسين يدخلون باسماء مستعاره فى هذه الحاله لا بأس من كتابة اسماؤهم حتى يتم التعارف الذى يقصده اخى عياد محمد . اما مدرس مادة كذا فهذا متروك للادارة و تقييمها حسب الاعمال التى يقدمها و تكون فعاله لتلاميذه .

طبعا نحن اخذنا نصف الحديث و لم نكمل آخر الموضوع

وبلاش تدخل عشان تاخد وخلاص - حاول تفيد زى ما بتستفيد!!!!!!!!!!!! الدنيا خد وهات
ياريت تكون مشاركتنا بمادتنا اكثر من مشاركتنا بغير مادتنا وخصوصا اذا كان جمهورها عريضا - اقصد مش زى طلاب اللغات مثلا اللى عددهم بسيط وقلما حد بيدخل اصلا - مستغنيين اصلا!!!!!!!!!!!! للاسف

والف شكر لك استاذى الفاضل / جمال سراج على هذا الموضوع الاكثر من رائع

تعليق بسيط :- انا كاتب اسمى فقط فى التوقيع لان الكثير من الاخوه يريدون بعض الخدمات و لا يعرفون غير الاسم الذى ادخل به

جمال سراج

30-06-2009, 09:50 PM

اقتباس
المشاركة الأصلية لمسيو أحمد عمارة
تعليق بسيط :- انا كاتب اسمى فقط فى التوقيع لان الكثير من الاخوه يريدون بعض الخدمات و لا يعرفون غير الاسم الذى ادخل به
ههههههههههههههههههه
ربنا يجزيك خير
طب أعمل ايه يعنى!!!!!!!!!!!!!!!!!!!!!!!!
يا مستر حضرتك فاهم ماذا اعنى والله
يا سادة والله فيه ناس بيكتبوا اسماءهم والله بطريقة شيك خالص ولا يمكن يتبادر لذهنك اى شك فى نواياهم
بالتاكيد زى الاغلبية طبعا اللى منهم انت يا مستر والجميع هنا بلا شك
ههههههههههههههههههه
يعنى اسكت
لا مش هاسكت وانا مصر بضم الميم يا مسيو أحمد
معلش يمكن الطريقة كانت قاسية شوية لكن الله أعلم بالنوايا والله - دى حب ومعزة مش أكتر
ربنا يبارك لك وللجميع
وتانى معذرة والله لا اريد احراج أحد او الذم بأى شخص بعينه
الجميع فوق رأسى
الله
بلاش الواحد يفضفض يا ناس!!!!!!!!!!!!!!!!!!!!!
ههههههههههههه
تحياتى لحضراتكم جميع وايضا احترامى

جمال سراج

30-06-2009, 10:02 PM

السلام عليكم

موضوع فتح نفسنا
للمشاركة
رغم حرارة الجو
وحرارة الامتحانات
وسعيد جدا بمشاركات
زملائى الافاضل
وحوراهم الراقى
وهذا هو عهدى الدائم وثقتى
فى زملائى ومهنتى
بس عارف يا مستر جمال
أحيانا كتيرة أجد من يسالنى
من رواد المنتدى
سؤال: هو انت مدرس ايه؟
وغالبا ما أبحث وأسال زملائى عن تخصصهم
المهم أنا موافق الزملاء طبعا
وأؤيدهم فى كتابة اسمائهم وتخصصهم
فى التوقيع .
واستعطفهم ان لا يدخروا جهدا
فى تخصصاتهم على اعز ما وهبنا الله
أبنائنا للاعزاء طلاب المنتدى
دمتم بخير وخالص تحياتى

والله زمان يا أستاذى وأخى العزيز
دايما تحث الناس على الخير وأنا منهم وليك فضل كبير عليا والله وربنا الاعلم
وبعدين يا مستر هو يعنى كان لازم انكش عشان تنورنا هنا فى قسم الكادر وتشرفنى بتوجيهاتك يا كبير
خلاص يا عم هاشد فى الكلام كل يوم عشان تنورنا وتشرفنا
زى ما بقول يا مستر انا اقصد قلة محدودة والله ولا احمل لهم فى نفسى غير الخير ولذا كتبت والموضوع بصيغة العموميه
يا عم اللى عاوز يكتب براحته النوايا يعلمها الله - بس لنا حده بحول الله وبهدى من الله ان نعرف النوايا الظاهرة لنا بقدر الامكان اما الباطن فلا يعلمه ولا يحاسب عليه الا الله تعالى!!!!!!!!!!!!
واستعطفهم ان لا يدخروا جهدا
فى تخصصاتهم على اعز ما وهبنا الله
أبنائنا للاعزاء طلاب المنتدى
هذه الجملة طالما ذكرتنى بها واحملها لك تاجا على رأسى - كونك تدلنى على الخير وايضا الجميع
والله عاوز وممكن اتكلم للصبح
ما تقلقش انا بعرف اتكلم يعنى
هههههههههههههههه
بس كفاية حضرتك اصلا تقدر الناس وتتفهم الامور
بالتاكيد زى كل الناس الاعضاء فى منتدانا وبيتنا الكبير
دمت بكل خير واليك تحياتى
وايضا للجميع!

:022yb4:

جمال سراج

30-06-2009, 10:13 PM

جمال سراج

30-06-2009, 10:32 PM

انا مع حريه ان كل واحد يعمل الى هو عايزه
يكتب بياناته او ما يكتبش بياناته
مع انى افضل معرفه البيانات
فالجميع هنا على درجه كبيره منا الوعى والفهم
ولازم نفرض حسن النيه

فعلا كما ذكرت حضرتك الجميع هنا على درجة كبيرة من الفهم والوعى بحمد الله
شكرا مرورك الذى شرفنى بالتاكيد
بس انا احى جدا نقاشكم الجاد وطريقة حواركم
المحترم
فحتى مع الاختلاف يبقى الاحترام والود
شكرا لحضرتك
قول للناس بقا عشان فيه منهم زعلان وبالتاكيد مقدرش انا على زعل حد
شرفتنى

الله الله الله على كل الاراء المحترمة الواردة في الموضوع وفي النهاية كل زميل حر وسيفعل ما يحلو له واحترمكم جميعا على النقاش الحر الشريف

بالتاكيد كل واحد حر ما لم يمس حق غيره او حدود الله
شرفتنى ودايما موفق باذن الله

اخوتى الاعزاء/ هذا المنتدى اشعر انه بيتى احكى من قلبى بصدق اسمعكم جميعا استفيد منكم كثيرا لدرجة انى اعاتب البعض من شدة شعورى بالانتماء اليكم دام بيننا المعروف والاخلاص والمحبة ودمتم لى اخوة اعتز بكم واذا وجدنا احد فى اسرتنا زعلان من شىء يجب علينا تبسيط الامور والعمل علىالارتياح النفسى للجميع.
وبمناسبة اننا فى الصيف يجب على كل واحد منا اعطاء معلومة جديدة عن اى شىء يعرفه معلومة (دينية-ثقافية-فنية........)
ولكم تحياتى.

شكرا لحضرتك
شرفتينى وبالتاكيد هذا المنتدى فخر لنا وبيتنا الكبير
ومناسبة طلبك سأبدأ بالتذكير بابيات رائعة فى الحلم والأناه لسيدنا ومولانا امير المؤمنن على بن ابى طالب - كرم الله تعالى وجهه ورضى عنه وعن صحابة رسول الله صلى الله عليه وسلم أجمعين

أحب مكارم الأخلاق جهدى وأكره أن أعيب وأن أعابا
وأصفح عن سباب الناس حلما وشر الناس من يهوى السبابا
وايضا حديث لسيدنا رسول الله صلى الله عليه وسلم( المرء على دين خليله، فلينظرر أحدكم من يخالل) صدق رسول الله صلى الله عليه وسلم

وأيضا مثل أو حكمه عربية:
ما لا تراه العين لا يأسى عليه الفؤاد
أو بالانجليزية:What the eye does not see the heart does not grieve

تحياتى للجميع وشرفنى مروركم جميعا
فى أمان الله

مستر حاتم فتحي

30-06-2009, 11:32 PM

السلام عليكم
لا نكر انني اعاني من العزوفعن المشاركه هذه الايام لإنشغالي بأمتحانات الثانويه العامه ( اجارنا الله من لهيبها ) ولكن اموضوع حيوي ويحتاج الي تفكير
ون خلال جمع الملاحظات علي تعقيب الاخوة الزملاء لاحظنا تباين وجهات النظر بين مؤي ومعارض ونخلص الي ان النيه هي المحك في هذا الموضوع ولن نتهم احدا او ندين احد فكلنا في قارب واحد همنا الاعظم خدمه انفسنا في المقام الأول ( ومن ينكر هذا فهو وما يشاء ) ثم خدمه بعضنا بعضاً وهذا من الامور البديهيه لأن الانسان كائن اجتماعي بالفطره فلا تجعلوا هذه الامور البسيطه تقيم حاجزا ولا يتهم ايا منا نفسه اواخيه ففي النهايه كلنا نكمل عور بعضنا البعض اعانكم الله علي القيام بثقل مسئولياتكم امام جيل من اشباب هم في اشد الحاجه اليكم وفي النهايه تحياتي الي كل مشارك
والسلام عليكم

ibrahimsalhin

30-06-2009, 11:42 PM

بصراحة كان نفسى فى موضوع زى كده من زمان عشان فى ناس زودتها قوى ومفكرين نفسهم نجوم سيما
انا نفسى حد يقولى فائدة عرض الصورة الشخصية ايه وفايدة اسم المدرسة ايه وفايدة الوظيفة ايه حد فى المنتدى بيدور على عروسة

الطلاوى

01-07-2009, 12:41 AM

اتشرف بان اقرا كل اراؤكم واقتراحاتكم واتمنى ان اكون عضو فعال فى المنتدىوان نتواصل من خلال اقتراحاتكم الطلاوى

السيدحمدى

01-07-2009, 01:10 AM

الأخ الغالى المحترم/جمال سراج
احبك فى الله وبارك الله فيك ياغالى
والأختلاف فى الرأى لايفسد للود قضيه
انت من الشخصيات المحترمه جدا من المفيدين جدا
استاذى الغالى انا اول من استفاد من اعمالك جعلك الله سببا دائما للخير
وتحياتى للجميع
كلمه اخيره فى منتدانا الغالى للمره الثانيه اقولها كم كنت اتمنى ان تكون نقابتنا
كهذا المنتدى تبحث عن حقوقنا المهدره
شكرا للجميع

جمال سراج

01-07-2009, 01:30 AM

السلام عليكم
ونخلص الي ان النيه هي المحك في هذا الموضوع ولن نتهم احدا او ندين احد فكلنا في قارب واحد همنا الاعظم خدمه انفسنا في المقام الأول ( ومن ينكر هذا فهو وما يشاء ) ثم خدمه بعضنا بعضاً وهذا من الامور البديهيه لأن الانسان كائن اجتماعي بالفطره فلا تجعلوا هذه الامور البسيطه تقيم حاجزا ولا يتهم ايا منا نفسه اواخيه ففي النهايه كلنا نكمل عور بعضنا البعض اعانكم الله علي القيام بثقل مسئولياتكم امام جيل من اشباب هم في اشد الحاجه اليكم وفي النهايه تحياتي الي كل مشارك
والسلام عليكم

تحياتى لحضرتك على الكلام المعقول والمهذب جدا
أؤيد حضرتك تماما سيدى الفاضل
دمت والجميع بكل خير

جمال سراج

01-07-2009, 01:41 AM

كلمه اخيره فى منتدانا الغالى للمره الثانيه اقولها كم كنت اتمنى ان تكون نقابتنا
كهذا المنتدى تبحث عن حقوقنا المهدره
شكرا للجميع

شكرا لحضرتك وانا معك اتمنى ذلك
تعرف امته يا مستر لو كل واحد بدأ بنفسه وعمل الصح بعيدا عن الرياء والسمعة والمنظرة
لو كل واحد بص لعيوبه بصدق وشعر دائما بتقصيره نحو الآخرين ونحو الله تعالى
لو كل واحد ممشاش فى الزفة وخلاص - معاهم معاهم عليهم عليهم!!!!!!!!!!!
لو كل واحد رضى بما قسم الله له وبص وتحرى الحلال ولم ينظر الى بدل نقدى تافه او رحلة مجانية او ايجار شقة مجانية باحد المصايف مثلا بسعر اقل ودون وجه حق ودون اعلان من اصله او اعلان صورى
لو كل واحد فينا شاف شغله زى الناس - المراقب بتاع الثانوية مثلا يعتبر الطالب دا زى ابنه ويديله الوقت كافى والراحة المطلوبة دون ملل او ضيق ومبصش هيروح ازاى وعاوز يلحق القطار او العربية او يتغدى مع العيال او .........
ولو رحت تدريب واستفدت منه ونفذته عشان حتى ما تتحاسبش على التقصير- وبردوا متبصش هيدوك كام او هتروح ازاى او هتزوغ ازاى
ولو اللى بيحاضلر من الاصل التزم بالكلام اللى بيقوله - مش جاى عشان هو كمان ياخد الارشينات ويكت او يخلص وخلاص وكانها حمولة تافهة ( عاوز اقول اعزكم الله عاوز اقول كان كلامه شوية زبالة عاوز يتخلص منها)
الكلام كتير ............ هنقول ايه ولا ايه
ربنا يرحمنا ويهدينا ويرزقنا التقوى
تحياتى واحترامى

ابو محمد الطيب

01-07-2009, 01:48 AM

الإخوة الأفاضل

حياكم الله

.................

تحية مستحقة

لكل من شارك في هذا الموضوع الطيب

...............

لاحظت أن بعض المشاركات طويلة ومرهقة

لاحظت أن كلاماتكم مهذبة مرتبة ولكنها عالية

لاحظت حرصكم جميعًا على المنتدى

....................

أخيرًا

من حقي أن أضع اسمي وصورتي وصفتي

ومن حقك أن لا تفعل !

.................

للجميع التحية

والسلام عليكم ورحمة الله وبركاته

جمال سراج

01-07-2009, 09:53 AM

[quote=ابو محمد الطيب;1367057]لاحظت حرصكم جميعًا على المنتدى

....................

أخيرًا

من حقي أن أضع اسمي وصورتي وصفتي

ومن حقك أن لا تفعل !

بالتأكيد أخى الكريم من حقك ما تريد ما لم تمس حق غيرك

وبالتاكيد الجميع حريص على المنتدى لانه بيتنا الكبير - نتلاقى فيه على الخير وفى الخير
شرفتنى حضرتك واليك تحياتى
وايضا احترامى لك وللجميع

ibrahimsalhin

01-07-2009, 02:07 PM

CAMELA

01-07-2009, 08:38 PM

ibrahimsalhin

01-07-2009, 09:04 PM

يعنى دعايه لإيه بالضبط ؟
هوده اللى احنا عايزين نفهمه يافندم طالما وضع الصورة والمدرسة والوظيفة الخ مفيش غرض منه ولا فايدة ولا دعاية اظن احنا كلنا ناس متعلمين ومينفعش نعمل حاجة بلا هدف صح؟

جمال سراج

01-07-2009, 09:33 PM

أستاذ جمال بارك الله فيك
فعلا التوقيع هو مكان مخصص للتعريف بالشخص ده طبعا لو هو عايز يعرف بنفسه
وهو وسيله ايضا لعرض مبادىء الشخص من حيث ايمانه بمقوله او حكمه او غيره
والتوقيع هو وسيله لعدم تكرار الكتابه فعلا
يعنى يغنى الشخص عن كثرة الكتابه داخل المشاركات
اما موضوع الدعايه وما الى ذلك فأنا لا اتفق فيه
يعنى دعايه لإيه بالضبط ؟
للدروس ؟
اغلب الذين يرتادوا المنتدى مدرسين
الطلبه اماكنهم مش هنا او بمعنى اصح مش هى دى نوعية المنتديات اللى بيفضلوها ( مش كلهم طبعا )
الطلبه اللى بتدخل هنا بتدخل علشان الاستفاده من اساتذتهم فى الاقسام مش علشان تدور على مدرس خصوصى
وبعدين حتى لو ده صحيح دى ارزاق ربنا موزعها ولو الشخص له نصيب فى شىء بياخده

أختى الفاضلة كاميلا - الأول حضرتك شرفتينا ونورتينا وشكرا لذوقك وأدبك العالى
أرد على النقطة دى سيدتى :
بلا شك سيدتى أنا كتبت هذا بدافع التساؤل والتعجب!!!!!!!!!!! والسخرية أيضا سيدتى
يا سيدتى ربما لا يعرف الكثير أنه فى وقت ما بالمنتدى كما قرأت فى تعليقات الأعضاء هنا أن من الأعضاء المدرسين من كان يكتب على مذكرات الدروس الخصوصية بتاعته ......... مشرف بمنتدى كذا أو بموقع كذا وكذا
هذا ما قرأته والله بل وربما أصدق ذلك الكلام فى أشخاص رحلوا عن المنتدى وكانوا شعلة فى النشاط والحيوية
تخلوا عن التلاميذ بالمنتدى بحجة عدم الاتفاق مع ادارة المنتدى
يبقى دول ناس كانت تقصد ايه من وجودها بالمنتدى غير الدعاية والمنظرة وربما عقد الصفقات زى ما قلت!!!!!!!!! لا انكر انى بقول كدا بدافع السخرية وكانه صاروخ موجه حتى يرجع الجميع لرشده ويتذكر ان الخير باق لا محالة وان هناك من المخلصين أمثالكم الكثير والكثير
وضربت مثالا لاساتذة عظام الاستاذة نداء الجنة والاستاذة آمال عبد الهادى وغيرهم - شخصيات فاضلة لم تتخل يوما ما عن مساعدة الزملاء والطلاب بالمنتدى
السيدة الاستاذة نداء الجنة اختلفت مع ادارة المنتدى ومع ذلك تشارك بقوة مع طلابها بالمنتدى
وللاسف لا تقدير من الادارة بالمنتدى
وزى ما حضرتك شايفة ذكرت ادارة المنتدى مرات كثيرة بالموضوع وحتى محدش علق منهم سلبا او ايجابا!!!!!!!
لكن للاسف لاحظت ان الناس لم تقرا الكلام للآخر او تتابع الردود كاملة أو التعليقات
لكـــــــــــــــــــــــــــــــــــــن
من الناحية الحضارية والشياكه فى التعامل فعلا المعلومات الخاصة بالشخص المفروض تكون فى البروفايل بتاعه وفى التوقيع وان تقتصر المشاركات على الغايه منها وليس التعريف( التعريف يكون فى التوقيع اللى فى آخر المشاركه )
حتى علشان الطلبه ما يضحكوش علينا ويقولوا مش عارفين يتعاملوا مع المنتديات وكاتبين بيانتهم فى المشاركات
وفى النهايه هى حريه شخصيه وكل واحد حر يعمل اللى هو عايزه طالما لا يخل بالاخلاق ولا يتعارض مع شروط المنتدى

فعلا الحرية هى ان يفعل الشخص ما يريد ما لم يمس حق غيره

تحياتى لحضرتك وللجميع

جمال سراج

01-07-2009, 10:04 PM

هوده اللى احنا عايزين نفهمه يافندم طالما وضع الصورة والمدرسة والوظيفة الخ مفيش غرض منه ولا فايدة ولا دعاية اظن احنا كلنا ناس متعلمين ومينفعش نعمل حاجة بلا هدف صح؟

متابع جيد يا مستر ابراهيم ربنا يبارك فيك
بس أنا خايف فى الآخر حد يقول كوووووووووسة وبذنجان وكلام من دا - انت عارف فيه ناس اصلا مشاركتها تريقة او فرجة وخلاص!!!!!!!!!!!!!!
شوف يا سيدى كلام الشخص المحترم وتعليقه على كلامى فى الموضوع ده عشان بشكر بعض الشخصيات الكبيرة فى مجال عملنا واللى بتساعدنا وبتقدرنامع انى زى ما قلت اقدم شكرا لكل الناس والله حتى من اقدم لهم خدمة اقدم شكرى اليهم - ايوة مش ساهموا فى انى اخذت ثواب واديت الغاية من وجودى كشخص وهى العمل باتقان لان فى ذلك عبادة لله تعالى
بس هو مين على رأيك صواريخ موجهه أرض جو وجو جو وكله!!!
تابع على الرابط ده

http://www.thanwya.com/vb/showthread.php?t=125245 (http://www.thanwya.com/vb/showthread.php?t=125245)

كما ارجوا ان تقدم وايضا الناس كلها تعليق فى الموضوع دا مش بس على حكاية الاسم والوظيفة - شوف الكلام بتاعى فى الردود وكلامى عن الناس التى رحلت والناس التى بقيت ولم يوجه اليها شكر او يقدم لها الاعتذار!!!!!!!!!
واتمنى ان يقدم الناس كلهم شكر لكل هؤلاء
تحياتى لحضرتك ودمت فى امان الله
وللجميع ايضا خالص شكرى واحترامى

جمال سراج

02-07-2009, 12:29 PM

لنسرتح قليلا مع هذه الكلمات الرائعة التى أعجبتنى

زيادة !!

يقول الرافعي :
إذا لم تزد شيئا على الدنيا كنت زائدا فيها .

خيانة !!

كفى بالمرء خيانة ، أن يكون أمينا للخونة .

غرور !!

قيل :
من رضي على نفسه ، كثر الساخطون عليه

الحذاء الضيق !!

قيل :
ما فائدة الدنيا الواسعة ، إذا كان حذائك ضيقا ..

http://upload.7bna.com/uploads/a1b60c4db7.jpg

مستر حاتم فتحي

02-07-2009, 01:22 PM

جمال سراج

03-07-2009, 10:32 AM

ان من البيان لسحرا الله اكبر لا فض فوك
رحم الله الشيخ مصطفي صادق الرافعي استاذي وشيخي ومعلمي بالله لا تنسوة بالدعاء

شكرا لك مستر حاتم - شرفتنى بالتاكيد
ورحم الله شيخنا العظيم مصطفى صادق الرافعى- أحد الاعلام العظام فى سماء الادب العربى
واحد المدافعين عن الاسلام فى كتبهم العظيمة ومقالاتهم الجريئة عن المنبهرين بالفكر الغربى والثقافات الاجنبية ومن اشهر كتبه المقالية على حد علمى- وحى القلم- كتاب رائع
وبالمناسبة هو احد اعلام محافظة الغربية وبالتحديد مدينة طنطا حيث كان يعمل والده واستقر بها

جزاك الله خيرا وشرفنى مرورك

أ/ سعيد موسى

03-07-2009, 11:17 AM

مستر جمال اظن انه يوجد شخص بعينه هو المقصود بهذا الكلام ؟ وبما انك شخص مهذب فى الحديث اردت ان يكون الكلام عام ومع احترامى لجميع الاراء كنت اتمنى ان يضع الجميع صورهم حتى اعرف شكل المتحدث ! فى طفولتى كنت اسمع فى الاذاعه ابله فضيله واظن كثيرا منا سمع عنها وتخيلت لها شكل معين وعندما ظهرت فى التلفزيون وشاهدتها اقسمت انها مش ابله فضيله !!!! اكيد كل فرد منا بدون شعور يرسم صوره فى خياله لكل عضو واذا حدث وقابله لاى سبب رد الفعل من الممكن يختلف من شخص لاخر مابين الضحك والاستهزاء ( داخليا طبعا) اما كتابه الماده ففى بعض الاحيان اريد ان اؤكد معلومه فى مجال ما ولهذا اذكر ماده الشرح عموما كما ذكرت الاختلاف فى الراى لايفسد للود قيه اخوك سعيد موسى القاهره ع شمس بطاقه رقم 1234 شارع الزهراء متزوج واعول وهذه صوره ابنى فى المتحف المصرى نسيت انا مدرس دراسات

جمال سراج

03-07-2009, 01:30 PM

شكرا يا مستر ومش هاعلق
كفاية عليا تعليق
لك وللآخرين ايضا ما اريد!!! والنوايا يعلمها الله وبالتاكيد كلامى عام خاص بالتاكيد اقصد اشخاص وانا قلت كدا
مش جديدة مع احترامى
لكن من هما - دى بقا اللى شايف الكلام ينطبق على ما اقصده - يعنى اللى شايف نفسه بيمنظر ماشى - انما الواثق من نفسه بالتاكيد لا يلقى لكلامى بالا وهيعمل اللى عاوزه
وبعدين هو مفيش فى موضوعى غير الحته دى بس!!!!!!!!!1
حاجة عجيبة والله - الناس بترد وبتتفاعل بالطريقة اللى عاوزاها
فيه جزئيات كتير محدش رد عليها ولا علق عليها
اشمعنا يعنى دى
متحط حضرتك صورتك ولا متحط ولا تكتب اسمك او ما تكتبش واللى يتكلم يتكلم حتى لو انا وبعدين ممكن متردش خالص لو كلامى مش عجبك زى انا ما بعمل كتير
تحياتى واحترامى
والاختلاف لا يفسد للود قضية
واحترامى للجميع

أ/ سعيد موسى

03-07-2009, 02:04 PM

سيدى الفاضل والله لم اقصد ان اغضبك ومعذره اذا كان ردى زعلك تقبل تحياتى

جمال سراج

31-07-2009, 03:03 PM

على الرغم ان الموضوع ده زعل ناس منى رغم انى لم اذكر اسماء بعينها وان كنت اعنى اشخاصا معظمهم رحلوا عن المنتدى من دعاة الدعاية والمنظرة
الا انه من الملاحظ ايضا ان هناك اشخاصا فاضلة عدلت من طريقتها
بعض الزملاء مثلا تخلى عن توقيعه الذى كان يروج فيه لمكتبه الخاص بالكمبيوتر والانترنت ورسايل الدراسات العليا - كان حتى ذكر فيه العنوان
وعلى راى بعض الزملاء اللى بعتولى اصلا بتوقيعه : مكنش ناقص انه يكتب الاسعار!!!
انا بس حبيت اضعها ملاحظة للناس اللى زعلت وانا واثق انه حتى اللى بيعمل حاجة زى كدا عندنا بالتاكيد لا يقصد شيئا - ودعاة المنظرة مشيوا اصلا واللى بيدخل عندنا بيتفرج وخلاص!!!
تحياتى

أفنان أحمد

31-07-2009, 03:23 PM

ما شاء الله
موضوع راقٍ جدا
ووجهتى نظر معتبرتين
احترمت الرأى والرأى المخالف
ولكلِ مبرراته
والعبرة بالنوايا
شكرا أستاذ جمال وجميع السادة المشاركين