دعوة جريئة : لمقاطعة مشاهدة العاشرة مساء و90 دقيقة واخوتهم [الأرشيف]

علاء سيف

23-07-2009, 12:23 PM

اولا ارجو للجميع الفائدة وارجو منهم المشاركة
البداية وجدت نفسي وكثير غيري يدمنون على متابعة هذة النوعية من البرامج
القاهرة اليوم والعاشرة مساء و90 دقيقة والحياة اليوم و000
واشاهدها كل يوم واتنقل بينها محاولا الا يفوتني شئ
ولكن من حوالي عام ونصف انتبهت الي هذا الادمان
وان هذة البرامج نجحت لانها تتعامل بمنطق التفكير الشيطاني
اوضح لكم وارجو الصير
ادم عليه السلام والشيطان كلاهما خالف امر الله وعصى ولكن ادم عليه السلام ارجع الخطا لنفسه وهو ما نسميه اليوم النقد الذاتي قل ربنا ظلمنا انفسنا
اما ابليس فارجع المشكلة الي الله وبرأ نفسه قال فبما اغويتني
نرجع تاني للبرامج هي ناجحة لانها تجعلنا نشعر ان كل الكوارث والمشاكل سببها الحكومة والمسؤلين واحنا الشعب الملائكي
ولذلك يحبها الناس
ثانيا هي تسود الدنيا في عيوننا والبعض يقول هي اصلا سوداء ماشي يبقى كفاية نعيشها سوداء بالنهار ومش لازم نشوفها سودا بالليل كمان
ثالثا هي برامج متحيزة جدا ولكن تدعي الحيادية وتتعامل مع الضيوف بمتطق اللي نحبه ندلعة واللي مش عاجبنه نشرحه
رابعا تخلق نجوم للمجتمع والشباب من المدعيين وانصاف الجهلاء لمجرد انهم بيكرهو اسرائيل ما كلنا بنكرهها
وأهم حاجة انها تجعل كل فئات المجتمع في حالة كراهية مع بعض الرجل ضد المرأة والفقير ضد الغني والمواطن ضد الشرطيوالمسلم ضد المسيحي
وتركز على اسوأ النماذج في كل الفئات ماعدا الاعلاميين والمذيعين ومن على شاكلتهم فهم ملائكة وان اخطئوا فلهم اجر المجتهد
وأخيرا انها طريقة للهرب من الحياة الخاصة وان يفكر كل منا فيما هو مسؤل عنه وسيسأله الله عنه الوقت والزوجة والاولاد
وصلة الرحم و000
الى الشأن العام كمثل رجل يهش الذباب عن غيره والعقارب تسعى في حجره
وقلت لنفسي ممكن بدل الساعتين اللي باشاهد فيهم جرعة النكد دي اقرأ 3 اجزاء قرآن او كتاب مهم او اتكلم مع زوجتى بدل الخرس الزوجي او الاعب اولادي اوازور اقارب او0000000 خمسين حاجة كلهم افيد امتع
وقد كان ومن ساعتها قلت اعراض الاكتئاب
ارجو رايكم واتمنى للجميع الفائدة

http://img411.imageshack.us/img411/3080/97451626.gif

النجم الكبير

23-07-2009, 12:53 PM

برافو عليك

طب والواحد ينقطع عن العالم وعن اللى حواليه

متهيألى انك بتتعامل مع البرامج ده يأبيض يأسود

على الاقل اعرف ما يحدث حواليك

فى يوم او يومين

واعمل اللى انت قولت عليه فى باقى الاسبوع

عموما انا لا أدمن هذه البرامج

ولكن اشاهدها فى الاسبوع مرة او مرتين

وبجد موضوعك جميل جدا

بارك الله فيك

أسيل رزق

23-07-2009, 12:54 PM

أنا عن نفسى مشاهدتى ليهم قليلة
و يمكن أكتر برنامج بشوفه الحياة اليوم و يوم مابتفرج عليهم كلهم بتكون فى مناسبات زى أخبار الثانوية العامة و الأحداث المهمة فقط
فا مش هقدر أحكم على كلام حضرتك .. بالنسبة للحياة اليوم أنا شايفة إنهم معتدلين لا هما حكومة ولا هما شعب .. اللى غلط بتقول عليه غلطان

بس كلام حضرتك مش معناه إننا نقاطعها .. هى بتعرض الواقع و ماينفعش إننا نهرب منه .. على الأقل نشوف حال الدنيا ماشى إزاى و نشوف برده الآراء المختلفة سواء من المذيعين أو من الشعب أو من الحكومة

ده اللى أقدر أقوله على قد مشاهدتى للبرامج دى

Mr.Hani

23-07-2009, 12:55 PM

bosy .. mostafa

23-07-2009, 01:44 PM

انا مش بحب اتفرج عليهم
بجد بيجيبوا اكتئاب اصلا
والله معاك حق في اللي بتقوله
كله بيتكلم عن السلبيه و خلاص
محدش بيقول فين الكويس
يلا خير
شكراً للموضوع

aboabo29

23-07-2009, 02:02 PM

موضوع جميل و مهم فهذه البرامج كلام في كلام

الباشا حسن

23-07-2009, 03:55 PM

بدايةً ... شكراً لأخينا الغالى علاء

فكرة الموضوع طريفة ( جديدة ) و مفيدة

بس وجهة نظرى المتواضعة ( بعد متابعتى لهذه البرامج )

إننا بلاش نكون متطرفين فى أفكارنا و رؤانا ( إما شرق أو غرب , صح أو غلط )

يعنى إما نحب بجنون و هطل أو نكره بعنف و قسوة

يعنى أكيد مش كل حلقات البرامج دى مجتمعة بتقدم شئ تافه أو متطرف أو كاذب

أكيد فيه حلقات مفيدة فى بعض الموضوعات ( مش بالضرورى كلها )

و كما يقولون [ ما لا يدرك كله لا يترك كله ]

خلاصة الكلام ... مش مطلوب من أعضائنا المحترمين يحبوا البرامج دى أو حتى يتابعوها

بس على الأقل نحترم المجهود المبذول فيها و لا نحتقر ما يقدم فيها

و أتمنى نناقش كل أمورنا بهدوء لأننا شعب عظيم فعلاً

استدراك ... لست ممن يدمنون مشاهدة هذه البرامج , و لا قريب حد فيها

و ختاماً ... أرجو يكون كلامى مقبول , و ألا أكون أسأت لأى عضو محترم

و كل احترامى و تقديرى لأخى العزيز علاء و لكل من ساهم ( و يساهم ) فى الموضوع .

أخوكم حسن .

abou aliaa

23-07-2009, 05:23 PM

يا سيدي هذي البرامج جاءت على شاكلتها من برامج Talk Show في الدول الغربية لكن الفرق أن الاخيرة مبنية على أساس علمي تنتهي بحل للمشكلة

أما عندنا فإن البرنامج يكون أكثر نجاحا عندما نقول في اليوم التالي (( شوفت فلان اللي بهدل فلان إمبارح ))

فاكرين حلقة مناقشة مشكلة الخبز و جاءت المذيعة المحترمة و هي تمسك رغيف العيش قائلة كيف يأكله الشعب بقرف و تؤكد أنا باكل العيش اللبناني

يعني أقصد
1- لا القائم على البرنامج صادق في تناوله لقضايا الناس و لا يصل لحلول
2- الضيوف الاجلاء غالبا بعيدون عن المشكلة ( مثل مشاكل دينية يستفتي فيها فنان )
3- تخرج من الحلقة بضغط أو سكر أو كلاهما يعني الحلقة زودت مشاكلك

علاء سيف

23-07-2009, 05:48 PM

طب والواحد ينقطع عن العالم وعن اللى حواليه

متهيألى انك بتتعامل مع البرامج ده يأبيض يأسود

على الاقل اعرف ما يحدث حواليك
أخي الغالي مرورك الغالي يسعدني
لم اقصد طبعا عدم متابعة الاحداث ولكن هناك في راي فارق بين الخبر والراي وهذة ليست برامج اخبار وان ادعت ذللك يمكن ان نتابع الاخبار من اي قناة وكل القنوات الوانها معروفة
ولكن هم يعرضون الرأي على انه خبر

علاء سيف

23-07-2009, 05:55 PM

على الأقل نشوف حال الدنيا ماشى إزاى و نشوف برده الآراء المختلفة سواء من المذيعين أو من الشعب أو من الحكومة
يا فرحتي المشرفة نفسها عندنا يادي النور
برضة ياغالية تابعي زي ما انت عاوزة كما رديت على مشاركة النجم لكن صاحب الرأي يقول ان ده راي مش هو الخبر هو الرأي واذا كان عرض اراء يكون في حياد في العرض عموما مشكورة ورايك مقنع

علاء سيف

23-07-2009, 05:58 PM

اشكر الجميع على الردود التي اثرت الموضوع وسأحاول الرد المفصل وشكرا

eyad2000

23-07-2009, 06:21 PM

كلام حضرتك مش معناه إننا نقاطعها .. هى بتعرض الواقع و ماينفعش إننا نهرب منه .. على الأقل نشوف حال الدنيا ماشى إزاى و نشوف برده الآراء المختلفة سواء من المذيعين أو من الشعب أو من الحكومة

ده اللى أقدر أقوله على قد مشاهدتى للبرامج دى

sweet heart

23-07-2009, 06:25 PM

جزاك الله خيرا على الموضوع
البرامج دى فعلا بتعقد الناس وتضييع وقت وخلاص

The Secret

23-07-2009, 06:27 PM

بص حضرتك

كل حاجة زيى ما ليها مميزات ليها عيوب

يعنى البرامج دى ليها عيوب وليها مميزات وانا شايف ان مميزاتها اكتر من عيوبها

لسبب انها بتعرض المشكلة من الطرفين وبتجيب فى الغالب ضيوف من الطرفين

يعنى مش بتظلم حد

ويوم ما بتعمل الحكومة حاجة كويسة بيقولوا دا عملوا كذا وكذا

ويوم ما بتكون فى البلد حاجة مش مظبوطة بيحاولوا يعرضوا المشكلة عشان تتحل

يعنى فى الاخر دا فى صالحك وفى صالحى

واذا كنت حضرتك شايف ان دا بيضيع وقتك فا من الافضل تشوف مصالحك الاول

ويوم ما تفضى خالص عايز تشوف ايه اللى بيحصل فى البلد شوف او متشفش ودى حاجة ترجعلك

انت تتفرج او متتفرجش

اما حكاية انك شايفه دا اكتئاب فا دا واقع ولازم نتعايش معاه ومنحاولش نهرب منه

لكن سؤال ما المطلوب من هذا الموضوع ؟

هل وقف هذه البرامج ؟

واذا كان دا رايك ف حضرتك شايف انه كدا مشكلنا هتتحل والدنيا هتبقى لطيفة ومش سودة ؟

الباشا حسن

23-07-2009, 10:03 PM

كل إنسان حر فى سلوكياته و آرائه

سيف عبد العظيم

23-07-2009, 11:52 PM

اولا ارجو للجميع الفائدة وارجو منهم المشاركة
البداية وجدت نفسي وكثير غيري يدمنون على متابعة هذة النوعية من البرامج
القاهرة اليوم والعاشرة مساء و90 دقيقة والحياة اليوم و000
واشاهدها كل يوم واتنقل بينها محاولا الا يفوتني شئ
ولكن من حوالي عام ونصف انتبهت الي هذا الادمان
وان هذة البرامج نجحت لانها تتعامل بمنطق التفكير الشيطاني
اوضح لكم وارجو الصير
ادم عليه السلام والشيطان كلاهما خالف امر الله وعصى ولكن ادم عليه السلام ارجع الخطا لنفسه وهو ما نسميه اليوم النقد الذاتي قل ربنا ظلمنا انفسنا
اما ابليس فارجع المشكلة الي الله وبرأ نفسه قال فبما اغويتني
نرجع تاني للبرامج هي ناجحة لانها تجعلنا نشعر ان كل الكوارث والمشاكل سببها الحكومة والمسؤلين واحنا الشعب الملائكي
ولذلك يحبها الناس
ثانيا هي تسود الدنيا في عيوننا والبعض يقول هي اصلا سوداء ماشي يبقى كفاية نعيشها سوداء بالنهار ومش لازم نشوفها سودا بالليل كمان

للاسف انا مش معاك ده اعلام
اخى الكريم النهرده انتا قاعد فى بيتك والخبر بيجيلك

سورى دى وجهة نظرى

ثالثا هي برامج متحيزة جدا ولكن تدعي الحيادية وتتعامل مع الضيوف

عاوز اعرف منك حاجه ايه فى مصر مفهوش تحيز او وسايط
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟

بمتطق اللي نحبه ندلعة واللي مش عاجبنه نشرحه

رابعا تخلق نجوم للمجتمع والشباب من المدعيين وانصاف الجهلاء لمجرد انهم بيكرهو اسرائيل ما كلنا بنكرهها
وأهم حاجة انها تجعل كل فئات المجتمع في حالة كراهية مع بعض الرجل ضد المرأة والفقير ضد الغني والمواطن ضد الشرطيوالمسلم ضد المسيحي

ليس هناك اى دليل انها قناة فتنه انا مش معاك اسف
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وتركز على اسوأ النماذج في كل الفئات ماعدا الاعلاميين والمذيعين ومن على شاكلتهم فهم ملائكة وان اخطئوا فلهم اجر المجتهد
وأخيرا انها طريقة للهرب من الحياة الخاصة وان يفكر كل منا فيما هو مسؤل عنه وسيسأله الله عنه الوقت والزوجة والاولاد
وصلة الرحم و000
الى الشأن العام كمثل رجل يهش الذباب عن غيره والعقارب تسعى في حجره
وقلت لنفسي ممكن بدل الساعتين اللي باشاهد فيهم جرعة النكد دي اقرأ 3 اجزاء قرآن او كتاب مهم او اتكلم مع زوجتى بدل الخرس

فى دى عندك حق
بارك الله فيك

الزوجي او الاعب اولادي اوازور اقارب او0000000 خمسين حاجة كلهم افيد امتع
وقد كان ومن ساعتها قلت اعراض الاكتئاب
ارجو رايكم واتمنى للجميع الفائدة

http://img411.imageshack.us/img411/3080/97451626.gif

الاختلاف فى الرأي لا يفسد للود قضيه
اخى الكريم
ليست هذه البرامج حرام فقط او غير ذلك بل جميعهم

واعلم جيد ان مصر كلها هى بلد الوسايط
والانحياز
تقبل مرورى

COoL HEaRT

24-07-2009, 01:20 AM

من الحجات الجميله اوى ان الواحد يدخل موضوع اسمه مقاطعه لحاجه غير اللى اتعودنا عليها
البضائع الاسرائيليه والكلام ده
والادهى انه يكون لبرنامج عربى بيقدم حقايق وانا هرد ع كل نقطه حضرتك قلتها
لان للاسف موضوعك يفتقر لدليل مادى واضح
وزى الجمله المشهوره المتهم برىء حتى تثبت ادانته
المشكله ان الاتهام نفسه يكون باطل!!

ثانيا هي تسود الدنيا في عيوننا والبعض يقول هي اصلا سوداء ماشي يبقى كفاية نعيشها سوداء بالنهار ومش لازم نشوفها سودا بالليل كمان

باى منطق ؟؟
بص ياسيدى الفاضل انا همشي ممعاك وهبطل اتفرج ع البرامج التى تجعل الحياه سوداء فحم
اروح اتفرج ع game team مش هيخلى فى نفسك حاجه
هل هو ده الحل عشان اشوف الدنيا وردى وردى
وتنطلق انغام الست ساعد حسنى الحياه بئا لونها بمبى
بجد حكايه غريبه
هل الحل للمشاكل ان احنا نحط راسنا فى الرمل ونقول لا دول كدابين يع وحشين كخه مش هتفرج
الناس بتعيش حياه بجد وحشه فى شريحه مش لاقيه الاكل
انت شخصيه مرفهه والمشكله ان احنا ولا حاسين لا انا ولا انت ولا اى حد
موضوع العباره واللى تناولته البرامج دى ع سبيل الذكر لا الحصر
هل انى اقول لا العباره اشطه وزى الفل ابئا انا اعلام جميل
هل المطلوب انى اقدملك حواديت ظريفه تساعدك ع النوم !!
انت لو واحد من اهل الناس اللى ماتو فى العباره ولا اتحرقوا فى مسرح بنى سويف ولا اتقتلوا فى بنى مزار
بعد الشر يعنى مع ان كلنا معرضين لكده
وشفت الحملات الدعائيه دى كنت حمدت ربنا
لولاها يا استاذى الفاضل مكنش حد اخد عوض
عارفه ان المبالغ مش بتكفى ولا بتعوض بس بتساعد
برنامج زى القاهره اليوم والمشاهدين اللى قدموا اعانات لاهل الضحايا!!

ثالثا هي برامج متحيزة جدا ولكن تدعي الحيادية وتتعامل مع الضيوف بمتطق اللي نحبه ندلعة واللي مش عاجبنه نشرحه

متحيزه ضد مين .. ضد الحكومه
وهل الحكومه محتاجه ان احنا نواسيها ولا هى بتقدم ايه اصلا عشان نطبط عليها

رابعا تخلق نجوم للمجتمع والشباب من المدعيين وانصاف الجهلاء لمجرد انهم بيكرهو اسرائيل ما كلنا بنكرهها

هات مثل ووضح !!
بص يا دوك اكتب كده فى سيرش ع اليوتيوب بحث عن ياسر وبلال فضل
واسمع الكلام عن اليهود ده تبع برنامج العاشره مساءا

وأهم حاجة انها تجعل كل فئات المجتمع في حالة كراهية مع بعض الرجل ضد المرأة والفقير ضد الغني والمواطن ضد الشرطيوالمسلم ضد المسيحي

مفيش اعلام بيعمل كده :d
والا يكون اعلام غبى وساذج
ومعتقدش ان ده حصل لما طلع موضوع ان مسلمين او بعض الشباب فجروا عربيات بجوار كنيسه فى اسكندريه باين
الاعلاميين حاولوا تخفيف الموقف
بس المشكله
ان حاله الاحتقان اصلا بقت زايده اوى

وقلت لنفسي ممكن بدل الساعتين اللي باشاهد فيهم جرعة النكد دي اقرأ 3 اجزاء قرآن او كتاب مهم او اتكلم مع زوجتى بدل الخرس الزوجي او الاعب اولادي اوازور اقارب او0000000 خمسين حاجة كلهم افيد امتع

احم حضرتك ممكن تعمل كل ده بس معتقدش ان حضرتك ممكن تنزل فى نص الاسبوع
والمشكله ان مش فكره انى ابعد عن البرامج دى هى الحل
بالعكس هتضيع منك اخبار كتير
ولو عرفتها من جريده حكوميه صدقنى هتشوفها بطريقه عجيبه تحسسك ان مصر لسه بخير
ولو معارضه هتسمع عبدالحليم طريقك مسدود مسدود ياولدى

وانا متفقه مع راى زا سيكرت جدا

JASSY

24-07-2009, 03:35 AM

هي كبيرة شوية حكاية مقاطعة ديه.....

من الطبيعي كل حاجة ليها مميزات وعيوب ...ليه مناخدش ونسمع نها الكويس والهادف واللي مش عاجبنا وشايفين انه سلبي

وكده منتفرجش عليه...

ليه عندنا يا ابيض يا اسود...يلا نتفرج وندمن الفرجة يا نقاطعه خالص....

فيه لون رمادي وهو الاعتدال والتوسط والمشاهدة بعقل واني مصدقش كل اللي بيتقال...وابقى انا كده خدت خبرة واستفدت...

شكرا جداااااا على موضوع حضرتك وده مجرد راي.....

في رعاية الله......

BaNZeR

24-07-2009, 03:58 AM

كلامك مش منطقي او فيه كتير من التحيز

انا عن نفسي مش بتابع اي من تلك البرامج

بس في حلقات بتكون مهمة جداً
وفي حاجات بزعل لما اعرف إنها جت ومشفتهاش

اولاً الكلام مفهوش تحيز
انا حتكلم عن العاشرة مساءً لأنه اكتر واحد بشوفه

انا شايف إنه الاسئلة الموجهة صريحة
وبعدين الافتراضي إنه الدنيا تمشي حلو

مش حاجي اقولك إنت شلت ليه الورقة من عالارض ورميتها في الزبالة ؟؟

لكن حقولك ليه انت مش منظم وبترمي الورقة في الارض ؟
يبقى لازم نجي الوحش ونسأله

وبعدين مش كل الحلقات وحشة
في ناس بتوضح او بتصحح عنها اشاعات

وكمان في احداث زي الانفجار اللى حصل من كام شهر كده في مصر وجابولنا كل التفاصيل بتاعته

يبقى أنت المتحيز كده
في حالة ادمانك ده يبقى المقاطعة افضل طبعاً

لكن متنصحش حد بكده لاسباب - في نظري - غير منطقية

وبعدين انا كمهندس مينفعش اشتم في هندسة
وإلا يبقى بقل من مقدار نفسي

فبرده المذيع مينفعش يشتم في بني مهنته
وإلا حنفقد احنا في مصداقيتنا مع المذيعين

**تسابيح**

24-07-2009, 11:12 AM

أنا مش متابعة كل الحاجات دي .......
انا بسمع بعض اللقطات من الحياة اليوم ........
بصراحة برنامج مفيد جدااااااااا ............
لما القمح الفاسد اللي في مصر واللي بيستخدم بره علف للحيوانات واحنا هنا بنأكله وكل دا يبقي بره وحش
لما الحقيقة تظهر ادام الناس تبقي بره وحش
بصراحة انا شايفة انها برامج هادفة جدااااااااا وبتقدم لنا حاجات كويسة

المجاهد فى سبيل الله

24-07-2009, 02:06 PM

السلام عليكم
اولا موضوع حضرتك كويس
وفيه كلام كتير وكبير جدا هو اولا احب ابينلك سبب انتشار هذه البرامج
وسماح للحكومة الديكتاتورية بتعتنا انها تسبها
طبعا مش عايز اسمع مخلوق يقولى ان الحكومة بتعتنا فيها ديموقراطية
طب حيقولى ما اهى يا عم فى برامج بدنها وبرغم من كدا سيباها وشغالين اهوة
اوقله ان كل البرامج دى كلها مجرد حقنة تخدير للشارع المصرى
يعنى بيعملونا زى الطفل
عارفين لما الطفل الصغير واحد ياخد منه مثلا حتة بسكوته وهو بياكل
بيعمل ايه الطفل بيعيط اوى صح
طب علشان يسكت انت بتعمل ايه بتعمل نفسك انك اخدت قطعة البسكوته دى من الى اخدها صح
اهو كدا بالظبط
احنا مطحونين ومذلولين بيدونا حقنة تخدير بالناس الى بتطلع وببتكلم على مشاكلنا
الى مش ليها حل فعلى ولا ليها اثر على حد
ولا تاثير الا على عقل المواطن الغلبان
الى بيسمع ويصدق
يعنى كل البرامج دى ليس الا حقنة مخدرة للشعب المصرى
ويعطى يافطة تقول ان البلد فيها ديمقراطية وانهم سيبين لنا مجال للحرية

هنا الفقي

24-07-2009, 04:43 PM

ممممممممممم
والله انا مش هاقولك انا بتابع ولا مش بتابع ولا كويسة او وحشة
لكن احنا لينا عقل
كل برنامج بيعرض الاحداث من وجهه نظره بعد التعديل:d
في مصداقية بقى مفيش دي حاجة تانية
احنا عندنا عقل نفكر ونحكم ونميز
وعندنا نت ندور ونلف
وعندنا ريموت كونترول نشوف اللي احنا عاوزينو ع التليفيزيون
واعتقد حكومتنا مقفوة اوي
يعني بتكدب وعارفة اننا فاقسين حركاتها
فمافيش داعي اعتقد للدعوة دي طالما العقل لسه بخير
لو مش بخير بقى ده موضوع تاني:p
حاجة كمان انو فعلا ي ما قال المجاهد
دي حاجة كده لزوم التخدير
بس لزوم التخدير للي بيقبل التخدير
يعني اللي يشوف مهزلة وما يتحركش
ويكتفي انو يعلق على كلام واحده زي منى الشاذلي
يقول وهو مدايق كده ((جدعة يا منى))
طب هي جدعة وانت ايه
ده اللي ينفع معاه التخدير
يعني ده اللي البرامج دي معموله عشانه
ووووووووووو بس كده

a7med_sale7

24-07-2009, 07:55 PM

انا دايما متابع لانهم برامج جميله وبتهتم بالحوادث والاخبار وحال الناس وانا احب اسمع الاخبار

هانى الشرقاوى

24-07-2009, 08:04 PM

أنا بصراحة متابع للبرامج دى
خصوصا القاهرة اليوم
بس مش متابع لدرجة الادمان

وبرده مش مع حضرتك فى حكاية المقاطعة دى

شكرا جزيلا

abdelRhman772007

25-07-2009, 01:17 PM

فى رأيى المتواضع البيت بيتك هو أحلى البرامج اللى من النوع ده
يليه بقى القاهرة اليوم و بعد كده و أنت نازل بتلاقى عيوب
لحد متوصل لبرامج تخنق بيبقى جايبين ناس عارفين إنها هتتخانق سوا
و جايبينهم نتفرج عليهم و المشكلة أن البرنامج ما بيبقاش مباشر و ما بيشيلوش لقطات
فاكرينها مصداقية بجد كان البرامج اللى من النوع ده كنت بشوفها و اتخنق
و صحيح هى الديموقراطية هنا كده خناق

ربنا يقدم اللى فيه الخير
و إن شاء الله كل يبقى أحسن
لا يأس مع الحياة
و عمومًا لو الحياة كئيبة للدرجة ده
و إذا كان من الموت بد ^ فمن العجز أن تموت جبان
مش هاموت و بتفرج على برامج الخناقات و الفضايح و على عينك يا تاجر
أحسن لى أشوف حاجة أفيد بها الناس أو حتى نفسى

لا إله إلا نستغفرك و نتوب إليك
دول اللى بيقولوا عليها جه يكحلها عماها
و كفاية لحد كدا
سلااااااااااام

Observer

25-07-2009, 01:59 PM

أعتقد أن هذه البرامج سبب مباشر فى توسيع دائرة الحرية والتعبير عن مشكلاتنا بشكل حقيقى ، وكان لها دور أساسى فى حل أو مناقشة بعض المشكلات الهامة كالإضرابات العمالية ومكافحة أنواع الظلم الذى يتعرض له المواطن البسيط فى مصر.

لولا هذه البرامج لما زلنا أسرى للبرامج الحكومية العقيمة مثل البرنامج الحوارى المضحك بتاع الدكتور مصطفى عبد السميع أو برنامج البيت بيتك الحكومى برئاسة سيادة اللواء تامر أمين !!

وإن كان التكرار أو تناول بعض الموضوعات التافهة هو ما يشوب هذه البرامج أحياناً إلا أن إيجابياتها أكثر من سلبياتها ...
وشكراً

:: [ K A B B O W ] ::

25-07-2009, 02:25 PM

ساعتين قدام التليفزيون ؟؟؟؟
ده غير الوقت اللى بيضيع فى حاجات تانيه
بعد تضيع الوقت ده كله معتقدش انه من حق حد انه يقول انه مش عارف يعيش ما دام مش مقدر الوقت
ربنا يرحمنا
شكرا على الموضوع الهادف
فى رعاية الله

Amethyst

25-07-2009, 02:30 PM

أنا متابع للحياة اليوم
و أحياناً البيت بيتك اللي على الفضائية المصرية
و مش شايفاهم كلهم سواد
و بيعرضوا أخبار و كوارث
و من وجهة نظري
مش شايفة انهم بيجيبوا كل حاجة الحومة عملت الحكومة عملت
الشعب غلبان
بيعرضوا نجاحات
مش كوارث و حوادث بس
قد إيه بيجيبوا إنجازات الحكومة
إنجازات المصريين
نجاحاتهم
مش كلها سواد و تحيز
:bosyht9:
مافيش داعي لمقاطعتها من وجهة نظري
زي ما قالت مها
هي بتعرض واقع
و مش هنقدر نهرب منه
شكراً على التوبيك
;)

علاء سيف

25-07-2009, 03:28 PM

اولا شكرا لكل من كتب تعليق وارأكم كلها جديرة بالنقاش وكنت اود مناقشتها كلمة كلمة ولكن اعتذر منكم جميعا لضيق الوقت وفي نقاط سريعة اريد توضيحها للجميع
انا لاادعو ان نكون نعام ولا ندفن رؤسنا في الرمال وانا اتابع الاخبار قدر المتاح من الوقت ولكن للمرة الثانية يا جماعة دي مش برامج اخبارية وارجو انكم تميزو بين برنامج اخباري وبرامج حواريه
لم ادعو يا بنوته الى الفرجه على برامج توهم بحياة وردية
game team هو أيه ده اصلا ؟ لو كويس قوليلي
ولا اظن اني شخصية مرفهة من بقك لباب السماء
والله باكل عيش من ابو شلن لسه طبعا هتقولي يابختك محدش لاقيه
فكرتيني بقصة يمكن مش وقتها بس هموت واقولها مدرسه طلبت من بنوتة مرفهة - زي كده- تكتب موضوع عن بنت فقيرة
كتبت
كان في بنت فقيرة جدا جدا عندهم سواق فقير جدا جدا
وطباخ فقير جدا جدا وسفرجي فقير جدا جدا وجنايني فقير جدا جدا

اما عن بلال وامثاله فأنا أعتذر لم اقصد الاساءة لهذة الرموز الادبيه التي ارتقت بلغتنا وقدمت اعمال هادفة تنافس الادب العالمي مثل حاحا وعودة الندلة وخالتو والافلام المليئة بالمضامين الارتوازية المنبثقة من التشعب اللامحوري النابع من التفلطح المهموزي
وهاديك مثال واحد عللى سياسة اللى نحبه ندلعه
وارجو تردي بأمانه ولا ادعي عليكي تروحي ويمبللي أو الحدود
في لقاء مع الداعية الفاشخ فمة باستمرار قال لمنى الشاذلي
وكان الحديث عن سيدنا موسى قال بالحرف
:ماكنش ينفع موسى يدعو بني اسرائيل وهو تربية قصور
كان لازم يتدعك ويتمرمط الاول
فكان ردها ضحكة بلهاء في خجل مصطنع وقالت هي العبارات دي اللي بتخللي بعض الناس 0000
والسؤال
هو يقدر يقول كده على الشيخ صالح ولي نعمته؟؟؟؟
ولاهي كانت تقبل كده على احمد بهجت؟؟؟؟
اما موضوع العبارة فهل المهم نتفرج عشان نحس ونساعد ؟؟؟؟
اما ان الحكومة مش حتاجة حد يطبطب عليها ليه مش دي امنا وفين قلب الام وحنية الضنا
محدش قال نطبطب ولا ندلع لكن في حاجات كويسة بتحصل في البلد ومش كلهل الحكومة اللي بتعملها هي فين على الشاشات التوك شو
وأخيرا أشكر للجميع مرورهم وافقكم ان المقاطعة يمكن كبيرة شويو ويمكن اوفق الذين قالو نفلتر ونرشح ونحلل
اما انا فلن اعود خوفا من الانتكاسة ماصدقت ايدي اراتحت
من الرعشة من اثر الريموت
http://img411.imageshack.us/img411/3080/97451626.gif

Hamset_Etab

26-07-2009, 12:26 PM

ثانيا هي تسود الدنيا في عيوننا والبعض يقول هي اصلا سوداء ماشي يبقى كفاية نعيشها سوداء بالنهار ومش لازم نشوفها سودا بالليل كمان

ببساطه الحاجات الحلوه بتتكلم عن نفسها مش محتاجه حد يعبر عنها..
لكن السلبيات عوزه حد يتكلم عنها..
مش معقول الناس تبقى عندها كوارث وهما يطلعوا يقولوا كل حاجه تمام وزى الفل ..
وبعدين هما بيحيبوا مستندات يعنى مش بيفبركوا عشان تزيد نسبه المشاهده..

*NODY*

27-07-2009, 06:30 PM

مش معنى انهم مسودينها زى ما بتقول
اننا نقاطعهم
كل الحكايه انهم بيعرضوا الحقيقه اللى مش عاوزين نصدقها
صحيح انى ساعات بتخنق منهم وفى حلقات مبتعجبنيش
بس مش معناه انى اقاطعهم
يا ريت تغير رايك فى الموضوع ده

محمد أبوسريع

27-07-2009, 06:42 PM

يعني احنا ما صدقنا يكون في بلدنا حد يتكلم بحرية أخيرا بنسمع رأي ونقد وتفهيم ومش عاجبنا
اللي عاش في الستينات يقد ر يحس بالفرق
وكمان قولولي بزمتكم في حد في جمال وثقافة الأستاذة منى الشاذلي؟

علاء سيف

28-07-2009, 05:41 AM

اشكر مروركم نودي ومحمد
وانا قلت اللي عاوز يتفرج ياريت يفكر ويحلل
اما منى الشاذلي وثقافتها فهي ضحلة للغاية واللي بيجعلك تتصور كدة هو فريق الاعداد اللي وراها ويكفي اصرارها على اللغة العجيبة شوية عامية وشوية فصحي مليئة بالاخطاء
وياريت تقرا ردي على البنوتة الاهلاوية تاني

ا/السيد سليم

28-07-2009, 06:53 AM

أشكرك على هذا الموضوع الهادف

علاء سيف

31-07-2009, 09:58 PM

شكرا استاذسيد يشرفني مرورك
توبيك رائع

Meeroo92

09-08-2009, 11:30 AM

انا عندى وجهة نظر بتقول ان كل حاجه فيها الحلو والوحش فمش عشان فى حاجه وحشه فى حاجه معينه اسبها او اقاطعها..انت بتاخد الحاجه بتتمسك بالحلو اللى فيها والوحش سيبك منه لان مفيش حاجه فى الدنيا حلوه 100%...انا مش بتفرج اوى عليهم بس اكتر حاجه العاشره مساء يعنى بتفرج يوم ويوم واشوف المقدمه يعنى بوجه عام انت متقدرش تقول ادمان بس على الاقل متكونش غايب عن الدنيا لأ الدنيا مش يعنى من حلواتها يعنى هندور على الحاجات الىى تفرح بس والباقى نسيبه على الاقل عشان (من لم يهتم بأمر المسلمين فليس منهم) فمينفعش نكون فى غياب تام عن الدنيا
وشكرا على موضوعك لانه بجد مهم

علاء سيف

09-08-2009, 06:01 PM

meerooاشكر مرورك الكريم
واتفق معك تماما في انه مفيش حاجة كلها ضارة وحتى الشيطان نفسه له بعض قول الحق مثل حديثه عن أية الكرسي مع ابو هريرة رضي الله عنه
والله حين حرم الخمر والميسر ذكر ان فيهما منافع للناس ولكن لغلبة الضرر
وقد يكون في هذة البرامج ما يفيد ولكن الامر عندي جاء لغلبة الاضرار على المنافع
وعموما رمضان قادم وهنبطلها وغيرها وادعو الجميع الى الانضمام لحملة لا للتلفزيون في رمضان

السندباد المصري

11-08-2009, 03:44 PM

الحمد لله انا مقاطعها غصب عني
لان مواعيد عملي في نفس مواعيد بث تلك البرنامج
كمها علينا نعمة

علاء سيف

15-03-2010, 09:34 PM

http://img30.imageshack.us/img30/5361/rody.gif

علاء سيف

18-03-2010, 06:41 PM

تواصل هذة البرامج بلا استثناء هجومها المنظم على المدرسين
وانا لا اقول انهم ممتازون وملائكة
ولكنهم ليسوا مسؤلين عن كل شرور العالم
وطالب يقتل طالب خارج المدرسة برضة المدرسين السبب
طالب يحمل مطواة ويجرح زميله اكيدمدرسه السبب
وحتى حين يحاول الوزير الدفاع عن المدرسين لايسلم من السادة الجهلاء خبراء التوك شو
وليس فيهم فيما اعرف مذيع يستحق ان يمنح درجة جيد حتى من الناحية المهنية او اللغوية
كلهم تقريبا منى ومعتز ورولا وشريف ولبنى 00000تجدهم لغة عربية ركيكة كلها اخطاء واداء مهني ضعيف
ولكن المدرسين دوما هم الحائط الاضعف

هانى الشرقاوى

18-03-2010, 09:08 PM

كلامك حضرتك جميل
بس مش لدرجة المقاطعة
شكرا جزيلا

علاء سيف

18-03-2010, 11:51 PM

الاخ الفاضل هاني اشكر مرورك الكريم
ارجو تراجع توقيعك مرة اخري

مستر هانى الباسل

19-03-2010, 01:43 AM

الاعلاااااااااااااااااااااااااااااااااااااام
سمك ... لبن ... تمر هندى

أبو إسراء A

19-03-2010, 07:58 AM

جزاكم الله خيرا على الموضوع المميز

علاء سيف

19-03-2010, 08:14 AM

مشكورين لمروركم الغالي

ياسمينايا

19-03-2010, 01:50 PM

البرامج دى سلاح ذو حدين ..

وكل واحد اكيد عارف انهى حد مفروض نتابعه ..

شكرا ..

Free Love

19-03-2010, 09:26 PM

أها موضوعك جميل ومقنع
بس أحنا نرتبط بعالمنا أزاي؟
ونعرف الي حوالينا ازاي لو مفيش أي قناه جابت اخبار او أي حاجه؟
أرجو الاجابه

علاء سيف

19-03-2010, 10:57 PM

مع اني اجبت قبل ذلك لكن وماله اجاوبك تاني
في فرق يبن الاخبار وبرامج التوك شو
الخبر محايد والخبر معلوماتي
والتوك شو منحاز يدعي الحياد ومحرض
ويدير الامر بطريقة صراع الديوك

صوت الامة

23-03-2010, 02:32 PM

السلام عليكم
موضوع حضرتك جميل
الا اننا نرى فى مثل هذة البرامج وجهة مصر المظلم فنراة محاولين ان نتلمس بيرق من النور
حتى ترقى نفوسنا وتسمو اخلاقنا على اى قدر ممكن وهذا افضل من الا نعرف شيئا
واعتقد ان راية هذة البرامج لا تمنعك من صلة الرحم او مداعبة اضفال حضرتك او القضاء على الخرس الزوجى
ففى الامكان ان يتعلم الانسان مثل هذة الاشياء وهو يسمع البرامج على ان الحياة اليوم والعاشرة مساءا والقاهرة اليوم و90 دقيقة كلهم اخبارهم واحدة فلال تفاضل بينهم الا الرغبة فى سماع هذا او عرض هذة اما الاخبار فهى واحدة
ويكفيك ان تستمع الى برنامج واحد
وتوزع الباقى على كثر من القيم التى تحبها وتسعا اليها
والله اعلم
بشكر حضرتك على الموضوع
وفى رعاية الله

علاء سيف

24-03-2010, 01:21 PM

اخي الحبيب صوت الامة
شكرا لمرورك الكريم
بس مش فاهم فيه مشاركات وردود اختفت ممكن بصفتك مشرف تفهمني السبب

صوت الامة

24-03-2010, 06:52 PM

اخي الحبيب صوت الامة
شكرا لمرورك الكريم
بس مش فاهم فيه مشاركات وردود اختفت ممكن بصفتك مشرف تفهمني السبب
كان فى مشكلة فى الدعم الفنى
فبفضل الله تم تلاشى الخطا وكان غصب عننا وغصب عن الادارة انها تحدث المنتدى
ولكن للاسف تم حذف اخر درود حدثت خلال الاربع ايام الاخيرة
ردود او مواضيع او اعضاء ولكن ان شاء الله جارى متابعة الامر وتصليح ما قد فسد
وكل الشكر للادارة الكريمة ولدعم الفنى الذين يبذلون اقصى جهدهم للحفاظ على هذا الصرح العظيم
والان ارى المنتدى افضل مما كان من قبل

ashrof1010

27-03-2010, 09:19 PM

يا جماعة البرامج دى معمولة علشان الم.............. يقولوا رايهم فهم يتكلمون اكثر من الضيوف ...دول عامليين زىواحد مش قادر يتكلم في البيت فيروح الشغل وما يصدق حد يقول حاجة وتلاقي سيل من الكلام وتضرب نفسك ميت ج......... اللي فتحته وتصرخ باعلي صوتك انا السبب حد ياجماعة يسكته .....ياجماعة الناس دي بتمثل والله علينا لافي يو م هتحس بينا ولا في يوم هتسال علينا هتسال علينا ....اسالوهم بتاخدوا كام في الحلقة وشوفوا نفسكم وموتوا من الحسرة ....ارحموا نفسكم واياك تصدقوهم وابعدوا عنهم وروحوا لأبو حفيظة ......الدولة ياجماعة مظلومة جدا ..احنا اللي بناكل بعضنا الل يطول التاني بيقطعه ..بيستغله ..بيستنزفه..بنتشطر علي بعضنا ....بدليل الفلفل من كام يوم كان بكام والنهارده بكام ..وغيره وغيرة ..وجعت دماغكم معلش سامحونيhttp://www.thanwya.com/vb/life/icons/news2.gif