فتحاوى وحمساوى

****
فتحاوى ع البهلى فاتحها
ع الموضه ببدله ونضاره
وخنقت الثورة بفضايحها
وبنيت الدوله على محاره
والخيبه فاحت روايحها
لما بقالها قانون و ادارة

(حركه مطيعه قوى ومهاوده
شاريه الذل بحق العوده)
**
حمساوى ما انا زيك ثاير
ولا انت بعلامة الجوده
ومعبى الحكمه فى شكاير؟؟

***
حمساوى و حمست الدين
لغمت الأحاديث والآيه
وسِكنت التلمود يا حزين
وطِلعت ونزلت الرايه
مع انك ابن فلسطين
شايل قهر سنين وسنين

(بتحرر امك من اخوك
وبتكدب ع اللى انتخبوك).
****

فتحاوى بلا خيبه استنى
حمساوى قال لو قتلوك
القاتل حيخش الجنه.
**
فتحاوى وحمساوى طِهقنا
وزهقنا م الكدب الثورى
ما تلعبوا كورة وتعملوا دورى
زى اخوانكوا المصريين؟

أحسن م الحرب الأهلية
وادعى لميرزا وابن هنية
ربنا يسخطهم حجرين
***
خلى الشعب يفوق م الخيبه
يادى الداهيه ويادى العيبه
أمى قالتها "ده عيب ع الشيبه"
لما المسلم يقتل اخوه
لما الخطوه التايهه توه
أمى قالتها "يا عيب الشوم"
عاملين دوله فى البدروم
بعد ما كانت فى بيروت
فوق الرمل بتبنى بيوت
حتة جبنه خطفها غراب
كل نتيجه ولها أسباب
غرقت فى حمام الشط
وما لحقتشى تفك الخط
**
ما بتعرفشى تسمى أسامى
اشى فتحاوى وإيشى حمساوى
أمى قالتلى ياواد يا سمير
إكسر ورا الاتنين الزير
أنا ما اعرفشى الا فلسطين!!!