مشاهدة النسخة كاملة : مصر.......مش عارف!!


The_Relativistic200
09-09-2006, 08:39 AM
مـصـر ! مـش عـارف



لو سالتك انت مصري هتقولي ايه!؟ على مدى خمس ساعات تقريبا كنت موجود فى احدى صالات ارض المعارض
سمعت الاغنية يجي عشرين تلاتين مرة لدرجة انى كنت هقوم ابوس ايد الراجل بتاع الدي جي عشان يعتقني اولا
لاني مبحبش نانسي ومبطيقش صوتها وثانيا لانه شغلها بدل اغنية بحبها لفضل شاكر ، بعد ساعتين تقريبا تأقلمت
مع الاغنية وحسيت انى لازم اراجع نفسي فعلا .. ليه مفكرش في اجابة السؤال ده! اول ما سالت نفسي السؤال
ده اتخنقت وقلت هنقلبها فلسلفة بقى ونقعد نفكر ونوجع فى قلبنا ، لكن الادهى والأمر اني سالت نفسي انا ليه بحب مصر !؟
بعد تحليلات كتير وشوية تفسيرات عادية وتقليدية شبيهه بالكلام العبيط بتاع حسين فهمي لاحمد السقا في فيلم مافيا ،
الاجابة الواضحة اللى لاقيتها على سؤالي لنفسي هو اني بحب مصر ومش عارف ليه ، لكن بخاف افكر اكون موجود بره مصر وبخاف افكر مقدرش انجح فيها زي ما بحلم ، معرفش ..

فيه كلام كتير واجابات اكتر صحيح هي مقنعة الى حد ما لكن برضه مفيهاش السبب الواضح اللى مفروض احسه باقتناع
لكن فيه شوية صور لو اتجمعت بحس انها بالنسبة لي تعني مصر


..ليل القاهرة وانعكاسات الاضواء على النيل ،
ناس ماشية والتوهان مسيطر عليها ... سواقين ميكروباصات بتسب وتشتم فى بعض وخناقات على الدور ...
اشارات رئيسية واقف فيها عسكري واحد ومفيهاش اشارة.. ستات بمشنات فى وسط البلد بيبعيوا فاكهة وطفل صغير
فى مشنه جنبهم ، كباري زحمة وتحتها مراحيض شعبية ، عيال بتشم كله وبتشرب سبرتو ، اذان وناس بتجري تلحق
الركعة الاولى ، فورميلا وان اليومي على طريق صلاح سالم والاتوستراد ومغامرات سواقين هاشم باص ، وسط البلد
وافيشات السينما فى عماد الدين ، صور على الحيطان لمرشحين مجلس الشعب ، اعلانات عن سكن للطالبات على اسوار الجامعات والمدن الجامعية ، كشك سجاير عليه يافطة بيبسي ومكتوب عليه ابو اشرف للسجاير والحلويات ،
جرايد بايته ومجلات فوق الوش مربوطين بحبل ، مانشيتات كتير عن مبارك شتيمة وعلامات استفهام وعلامات تعجب وصور بنات واسماء جرايد غريبة





.. كوبري اكتوبر واعلانات الزبادي والبنوك والافلام والبرامج والالبومات الجديدة واسماء الفنادق المنورة ماريوت وهيلتون رمسيس .. السرايا والفلوكه على الكورنيش ، سبرتايه صغيرة وكرسيين وكوبايات شاي بتتغسل فى جردل وقعدة على النيل
،موقف عبود يوم الخميس والزحمة وعربيات خشب عليها ولاعات وتانية عليها شرايط كاسيت وتالته عليها صنية كنافة ، ليموزين راكب فيها خليجي بزيه المعروف وعينيه بتلف يمين وشمال والموبايل على ودنه ، محطة اتوبيس بتفضى اول
ما يوصل اتوبيس رايح رمسيس او العتبة او التحرير ، قهاوي مليانه ناس بتتفرج على روتانا سينما واي ار تي افلام
ومصارعة ، كوفي شوب فى عباس العقاد ..ميلودي ومزيكا .. بنات بتشيش وشباب بتشتغلهم ، صلاة الجمعة وعربيات الفاكهة على باب الجامع وشرايط اسلامية وبخور وسواك ومنقبات بيبيعوا اسدالات وايشاربات وعبايات ... ناس بتجري وتفرش جرايد فى الشارع يصلوا عليها عشان يلحقوا الركعة التانية ... اهرام الجمعة.. اول فجر فى رمضان والجامع على اخره وشباب كتير ..ليلة القدر فى جامع عمرو بن العاص او ابو بكر الصديق فى مساكن شيراتون .. تمر وتبرع بالدم ووجوه بشوشه وبكاء .. الشيخ جبريل ودعاؤه .. الشيخ ياسر سلامة وصوته الندي الخاشع ..كتيبات صغيرة عن فضل العشر الاواخر .. التهجد


كافي نت وعيال بتلعب ميدل شبكة ...شتايم وخناقات بين عيال صغيرة مقطعين وش بعض .. فرن عيش وطابور طويل ..موتوسيكلات الدليفري فى الشوارع الجانبية .. تاكسيات ادام الهرم والمواقف ومشاوير بعيدة لازم تتفق فيها مع السواق .. لما توصل يطلب اتنين جنيه زيادة عن اللى اتفقتوا عليه ، ناس نايمة فى الشوارع وشبعانين نوم
والشمس متسلطة فى وشهم .. بحس انهم حاسين بالامان رغم نومهم فى الشارع مش عارف ليه..
صناديق زبالة فاضية وجنبها اكوام زبالة بيقلب فيها عيال صغيرين يمكن يلاقوا حاجة تنفع ..
عربيات فول وناس واقفة تاكل حتى لو مش جعانيين بس يمكن عشان روتيين اتعودوا عليه



مستشفيات تأمين صحي وزحمة ادام شباك الدوا وموظفة بتزعق او بتتكلم فى التليفون
وناس بتجري فى طرقة طويلة وغرف كئيبة ، معاهد اورام واطفال تحسهم ولادك
ومتبقاش عارف حاسس بايه وانت شايفهم .. مقابر بها سكون باعث للطمأنينة
وخوص مرمي على الارض ويفط كبيرة مكتوب عليها هنا مدافن آل فلان وواجهات سيراميك للقبور
..قبور مش مكتوب عليها اسماء



اسكندرية
وقت الغروب فى كافيتريا ع البحر اسمها المحروسة .. اكلة دسمة عند بلبع .. قعدة على الرمل ادام البحر
ووراك سان ستيفانو ..فنجان قهوة على كازينو كلاسيكي فى محطة الرمل مش فاكر اسمه... جرين بلازا ورز باللبن عند صابر .. قهوة مظبوط قبل الضهر فى كازينو قصر الاحلام في رشدي .. تأجير عجل فى المعمورة بعد العصر

بورسعيد ومعدية بورفؤاد
وطرح البحر وديليسيبس واغنية ناوي تعاتب لعمرو دياب ...سندوتش فواكه البحر
من مطعم البرج ..خناقات بورسعيدية وتاكسيات ريحتها بنزين ..التجاري والقهاوي ولعب الاستميشن على
عشرة جنيه وتقلب بكرسي فى الكلوب ..علب الكمبوت المميزة والبرفانات اللي شكلها حلو ورخيصة وملهاش
ريحة !عصير من عند سلسبيلا في اخر التجاري ..معاكسات عبيطة ومجليطة للبنات بالعربيات بطريقة غبية
.. نمر العربيات على يافطة صفرا منطقة حرة بورسعيد


المنصورة
بضجيجها وزحمتها ومواصلاتها الرخيصة وقراها ونجوعها الكتيرة من اول مدخلها
بعد القليوبية لغاية مخرجها عند المحلة او دمياط



الاسماعيلية
بهدوءها القاتل والمانجه على طول الطريق وشوارعها الغريبة وميادينها الاغرب وكمية النخل على طريقها الصحراوي الرهيبة واكواخ بياعين المانجه بكل انواعها والخوخ العرايشي

العريش
والحدود ودكاكين صغيرة وزاوية اصغر وسوق سمك فيه انواع عجيبة وناس طباعها حادة لكن طيبين ...
تماثيل قديمة مكتوب عليها للذكرى الخالدة عمرو وهبة حب للأبد .. قلب وسهمين


دمياط ..
الورش والنشارة والتجارة والموبليا على العربيات الكارو والربع نقل .. الالتزام بالصلاة وقت الادان ..
اذاعة القران الكريم فى الورش والمصانع .. اغاني شعبية لحكيم وسعد الصغير ورمضان البرنس وعبد الباسط حموده
وعصام شعبان عبد الرحيم وحماده هلال وشيرين وايهاب توفيق ..شباب صغير مسئول عن مصانع كبيرة..
سوق السمك الصغير والكبير وعربيات السمك قبل الفجر والتجار ملمومين حواليها ..
الزحمة الرهيبة يوم الخميس يوم تحصيل الفلوس من التجار ومحاسبة الصنايعية .
.راس البر وقهاويها والفطير والنيل ..ع اللسان ادام البحر فى عز الشتا واغنية كان فى الامكان لحنان ماضي
... البحر وقت الشروق والصيادين وهمه راجعين عزبة البرج


مصر شوية صور جنب بعض تحسها ومتقدرش تفسرها توحشك وانت فيها لو خدتك الدنيا
والشغل من المشي فى شوارعها ..مصر شوية اغاني جميلة واوقات اجمل ..
حزن غير مترجم في عيون اطفال اهاليهم رموا طوبتهم والمجتمع بيقرف منهم ومبيحاولش يقربلهم .
. بيت وشارع وجيران واصحاب قدام مبنشوفهمش الا بالصدفه .. العيد الصغير والكبير والتكبير فى الشوارع
والصلاة فى المساجد الكبيرة والساحات الشعبية ..اللبس الجديد والناس اللى بتحاول تنسى همومها وتفرح
والناس اللي مش قادرة تفرح وناس تانية فى المستشفيات وغيرهم بيفكر هيلبس ايه وهيخرج يروح فين

بحب كل الصور دي بتناقضها وبكل حالاتها .. بس مش عارف كل ده هى مصر اللى انا بحبها ولا مصر التانية..
الامن المركزي والواسطة وتعيين ولاد الاساتذة وظلم الظباط والدعارة فى الشوارع والفنادق والظلم
واكل حقوق الناس وقتل الموهوبين والبطالة وخطب الجمعة اللى بتتكلم عن طاعة ولي الامر
ومناهج التعليم وخوف الناس على ولادهم من المظاهرات فى الجامعة والاهلى والزمالك والمنتخب
والدوري وفرح الناس والجري بالعربيات واعلام مصر والنوادي وشيخ الازهر والقناة الاولى
والطلاق والمحاكم واثبات النسب وقضايا الميراث والنزاعات على الاراضي والعقارات والحجر على الاهل
والعرضحالجية والمحامين وفرص عظيمة للفشلة وقتل لمواهب المبدعين وتسلط المحافظين
وفساد النواب وبيع المصانع بتراب الفلوس والجرايد العبيطة وكُتاب بريالة بيقولوا اى كلام ويقولوا
ضده تاني يوم بعد تليفون من فوق .. جمال حمدان وفهمي هويدي وسلامة احمد سلامة واحمد رجب
والفاجومي وجاهين وبيرم وبلال فضل واحمد بهجت و.. ممتاز القط وابراهيم نافع واسامة سرايا
وابراهيم سعدة ومحمد علي ابراهيم وكرم جبر.. روزا اليوسف والمصري اليوم والاهرام الاقتصادي
والاهرام العربي واخبار الحوادث واخبار النجوم .. ميكي وماجد وروايات مصرية للجيب ...
الدستور والمصور وصوت الامة واكتوبر .. الخوف وملناش دعوة واللى نعرفه احسن من اللى منعرفوش
ومحدش هيغير حاجة..نصلح نفسنا الاول.. نقوم بثورة ... كل دي مصر بمضحكاتها ومبكياتها بكل تناقضتها
اللي احنا جزء كبير منها .. بنحبها .. زي ما قالت بثينة في يعقوبيان .. البلد دي مش بلدنا والبلد
بقت قاسية على ولادها .. ساعات بحس ان مصر احن على ولادها من غيرها كفاية ان ارفها
بيتداوى بضحكة ولمة صحاب وقسوة وطيبة وهموم بتضحك ..هدوء فى جامع وضجيج فى معتقل ..
اسوار خوف ورهبة وامل ملوش ارضية الا ان بكره اكيد احسن حتى لو مش عارفين ليه ..
وسط البلد وشوارعها واللبس على الارصفة واكل فى الازقة .. وكله بيعيش.. فيه بيستنى بكره
عشان ياكل ويشرب ويكسي ولاده وعيلته.. وفيه بيستناه عشان يموت بدل ما يتسول دوا مش قادر يشتريه
او بيت واقع او عيال مش قادر يدفعلهم مصاريف مدرسة او بنت مش قادر يشورها ..
بلد غريبة عجيبة كل ما تصيبها ازمة نحبها اكتر رغم ضعفنا اللى بنكرهه .

.. مصر ..! مش عارف
استودعكم الله
تم النقش من الميل
embossed from my mail

الاماراتية
09-09-2006, 09:12 AM
اشكر اخي العزيز خالد الجن على هذا الموضوع الراااااااائع والصراحه انا موت الضحك وفي نفس الوقت اتحسرت على مصر المحروسه

zizo2_2
09-09-2006, 03:19 PM
لا تعليق يا خالد سوى ان اضحك لبرهة وابكي كثيرا

حال مؤلم ولكنه واقع لا يمكن الهروبمنه الا اذا حدث تغييرجذري

The_Relativistic200
10-09-2006, 02:52 AM
مشكورة على المرور اختى الاماراتية
ومشكور على المرور ايضا استاذ زيزو

وفعلا الحال يبكى اكتر ما يضحك
ولو انى بضحك اكتر

محمد البري
10-09-2006, 02:58 AM
والله انا بضحك بس هقولك انا بحب مصر

لاني عشت غربة ففعلا مش هتحس بحبك لبلدك الا لما تعيش في الغربة

ومهما كان العيب مش من البلد ولا شعبها العيب من الحكومة

شكرا خالد

msamido
10-09-2006, 03:22 AM
بجد انا اول مرة افتح موضوع ويطلع طويل واقعد اقراه من اوله لاخره من غير ما افتح صفحة بحث تانيه اطلع منها مواضيع تانيه اقراها بالتوازي مع الموضوع

الموضوع بجد شدني جدا جدا والاسلوب كان جميل اوي اوي اوي اوي


اما بقي عن الموضوع نفسه بجد انت شوقتني الف مصر اكترواكتر واكتر

ورغم كل اللي فيها ده بنحبها

شكرا ليك يا خالد

.

The_Relativistic200
11-09-2006, 12:11 AM
مشكور يا محمد وميدو على المرور
بس برضو مش هتعرف بتحب مصر ليه :D
هو لاحساسك بالغربة
بس وانت قاعد دلوقتى
عادى مش فارقة كتير

Maramero
11-09-2006, 12:33 AM
بجد موضوه اكتر من رائــــع والله

اكتر حاجة اثرت فيا بجد الجزء بتاع رمضان فى القاهرة ،، واسكندريه كمان لان دى اجمل الاوقات اللى عشت فيها تقريباً

بس هنقول ايه .... فى هم يضحك وهم يبكى .....

للأسف مش لاقيه حاجة اقولها عن حال بلدنا دلوقتى

بس زى ما قال البرى العيب مش من البلد ولا شعبها العيب من الحــكــومــة

وحسبنا الله ونعم الوكيل

لكن رغم انى شايفة ان فيها عيوب كتيييير متسألنيش انا بموووووووووت فى مصر ليه :rolleyes:

لكن اتمنى احوالنا تبقى احسن من كده ان شاء الله

شكراً يا خالد على الموضوع الجميل ده

The_Relativistic200
11-09-2006, 02:24 AM
مشكورة على مرورك يا مراميرو
وكفاية احساسك بالبلد
دى وطنية فى حد ذاتها وانتماء طبعا

وكلنا بنموت فى مصر طبعا
بنموت فى قطارات او فى البحر
وممكن على الطريق

وممكن من الشلل

عادى يعنى
ويا رب الاحسن دايما يارب :D

مسيو محمد عياد
11-09-2006, 04:04 AM
شكراً على الموضوع يا خالد

أنا قريت أول الموضوع بس فهمت الباقي من الردود

علشان مش شايف

برغم العيشة اللي احنا عايشينها .. والنهب والسرقة عيني عينك

بس ما نقدرش إلا إننا نحب البلد

وندعي عالحرامي اللي كرهنا في عيشيتنا .. إن ربنا ينتقم منه

The_Relativistic200
11-09-2006, 12:11 PM
يا محمد مشكور اولا على مرورك
ثانيا
متقولش مصر اديتنا ايه قول هندى ايه لمصر :D
الموضوع حلو كله والله اول حته مفيهاش المفيد

ولا ترمى الناس بالباطل...............قول دايما الله اعلم