بسم الله أبدء هذا الموضوع عن اول يوم لى فى كليه الطب حفظكم الله
حينما نجحت فى الثانويه العامه بتفوق والحمد لله وربنا كرمنى بكليه الطب كنت اعيش حاله من الانبساط الغير عادى والغير مسبوق:022yb4: حيث حققت لاهلى حلم لطالما حلموا به وكم تمنيت ان تمر الايام ويذهب الصيف لاذهب انا الى كليتى المنشوده وارى هذا الصرح الذى يسمى كليه الطب ... وياريتى مشوفته خير اللهم اجعله خير لقيت نفسى واقف فى حته شكل شبكه الصرف الصحى بتاع امريكا اللى بنشوفها فى الافلام ....مواسير وبلاعات وحفر وبتاع مش مشكله قلت جايز اصلاحات محنا شعب الاصلاحات ونفضت للموضوع واتجهت الى قاعات المحاضرات لاتلقى اول حروف الطب واذا بى تائه فى الكليه مش عارف اروح فين واجى منين ومنين بيودى على فين ولكنى رأيت مدرج كبير مفتوح وممتلئ بالطلبه عن اخره فدخلت خلسه خشيه ان يرانى احد وكانى اسرق :049gc0:اذ كنت مخضوض
فهذا العالم غريب على اذ لم اعتد عليه فى المدرسه المتواضعه التى كنت ادرس بها حيث الفصل والطباشير واجرى يله هات بشوره واطلع ياد على الصبوره وارفع اديك اما هنا فوجدت عيال نضيفه ومحفلطه ودكتور شكله حلو ونضيف :romarioxp6:تحس انه ولا الناظر بتاع مدرستنا المهم الدكتور شغال رغى ولطم بالانجليزى وراسم عين على الصبوره وعمال يكلم شكله كان بيشرح فيها وانا طبعا اول مشوفت العين مرسومه فرحت قلت ده طب بجد وقعدت بقه وطلعت الكراسه 24 فرخ وهكتب بس كان فيه مشكله انى فاهم ولا حرف من اللى بيقولوه الراجل ده قعدت شويه جايز افهم برضو مفيش فايده ساعتها تعبت نفسيا واضيقت واللى زاد الموضوع اكتر ان مفيش ولا واحد قاعد جنبى او فى المدرج مبيكتبش انا الوحيد اللى قاعد مبكتبش وهنا دار حوار طويل مع نفسى لم انسه طيله حياتى اذ هاجمتى الشكوك وتملك منى االيأس وانعدام الثقه معقوله ياربى كل الناس دى فاهمه وانا الوحيد اللى مش فاهم كلهم بيكتبو وراه زى الاله الكاتبه وانا مش فاهم حاجه .... طب ازاى هو انا دخل كليه الطب من على السطوح منا داخل زيى زيهم وجايب 98% ومتفوق اكيد فيه حاجه غلط وهنا انفجرت سائلا الشخص الذى بجوارى كابتن انت فاهم حاجه؟؟؟؟ فاذا به يبص لى مستغربا من تحت النظاره ولم يجب فعدت ادراجى لحوارى مع نفسى وشكوكى واذهب بنظرى يمينا ويسارا بعيد وقريبا حتى اجد اى شخص مثلى لاعلل به نفسى واقول هذا مثلى ولكنى لم اجد وهنا عشت لحظات صعبه من الشك وخيبه الامل والعجز والتفكير فى عدم قدرتى على مواصله الدراسه بهذه الكليه وسط هؤلاء الامواس والدحاحين :040vk0:ده حتى شكلهم كبير عليه و الدكاتره اللى حتى دخلو مقلوش ازيكم واهلا والنهارده عيد والكلام ده ياجدعان انا لسه طالع من الثانوى حد يقولى حاجه احنا فين هنا ولا بتاع المهم انفجرت مره اخرى مصمما على معرفه الخطا وسالت الشخص الذى امامى انت فاهم حاجه يبنى فبص برضو واستغرب قمت ساكت لقيت الاخ اللى جنبى بيقولى انت فى سنه كام يادكتور قلته اولى ومش فاهم حاجه هى السنه بدءت من زمان ولا ايه ولا انا اللى جاى متاخر؟؟ لقيته ازبهل وفتح عينيه وفتح بقه حتى ظهرت اسنانه وانفلت فى الضحك والمسخره وقالى يبنى دى سنه رابعه وهنا لم اكذب له خبر وطلعت على البنج وعديت على روس العيال اللى قاعده وقمت ناطط وطالع بره والمدرج كله ميت على نفسه من الضحك وكنت حاسس انى طالع من غير هدوم بس ولا همنى اهم حاجه انى مطلعتش غبى وحمدت ربنا انى مش فى الدفعه دى المهم قعدت ادور على دفعتى لحد ملقيت هيصه جايه من ناحيه فاتجهت اليها تلقائيا واذا بمدرج يشبه الاخر يعج بالطلبه ولكن مع الاختلاف الناس هنا كانت كلها واقفه مفيش حد قاعد على بعضه ناس بتفط على البنشات وناس بيجرو ورا بعض وناس ماسكه فى بعض وناس عماله تلعب فى نغمات الموبيل وايه سوق يابا سويقه انا اول مشوفت المنظر قلت هما دول ... انا متعود على الناس دى هما دول اللى هيفهمونى وهفهمهم هما دول حبايبى وفجاءه دخل الدكتور الكل اتخرس وصاحبنا دخل قال كام كلمه انجليزى محدش فهم حاجه طبعا كله عمال يبص لبعضه وكل الناس عماله تفتح فى عينيها وتلعب فى ودانها اول مسكت قام كله مصقف على ايه محدش عرف والدكتور طبعا متعود على المنظر ده وعارف الاشكال بتاع ثانوى ودى وقلنا كلمه عربى هى دى الحاجه الوحيد اللى فهمتها فى اليوم ده .... ايه ياض الغباء اللى بيخر من عينك ده انت وهو :confused:؟؟ محدش يبرق و يبص بغباء كده وقام صاحبنا الدكتور قعد يشرح نظام الدراسه والمناهج والكتب والناس فى المدرج نازلين نغز فى بعض وضرب وتصفير واللى جايب معاه سندوتش ونزل يكله تحت البنش واللى جايب بالطو من اول يوم ونفسه يلبسه راح قالع ولابسه لما لاقى انه هيروح من غير ميفرح بلبسه و الدكتور طلع من المحاضره احمر وكانه طالع من مقموره عمال يبرطم مش عارف كان يومها فى حاجه مضايقه ولا ايه والمهم عدى اول يوم ورجعت البيت بعد ملقيت ان الحياه لونها بمبى والناس كلها بتفهم وحلوه فى الدفعه بتاعتى ومفيش حد احسن من حد وقعدنا يجى 4 شهور محدش فاهم حاجه فى اى حاجه خالص قمت مطلع اشاعه فى ان فى امتحان فى ماده عندنا محدش كان بيعرف يقرا اسم غلاف الكتاب بتاعها من بره علشان يزاكرها ويومها مفيش ولا واحد من الدفعه جه الكليه كله غاب ورحت يومها ملقيتش حد اقعد معاه حرمت اطلع اشاعات
منقول

السلام عليكم ورحمة الله

الموضوع ده عن يوميات طالب فى
كليه طب
شوفوا اللى حصلوا
ومستنيه ردودكم

طبعا زى مانتم عارفين صبحت الصبح فى المدينه الجامعيه اللى حضرتى باسكن فيها أنا وزملائى من الرجال وكأنها محمية ذكور المهم بعد ماصبحت قمت رايح على السخان عشان أترجاه انه يشتغل اوعى ييجى فى ذهنكم انه سخان مايه بعد الشر ده سخان كهربا بنعمل عليه شاى وكده المهم بعد ماترجيت ساعته وبست السلك بتاع حضرته عشان يشتغل سخنت عليه طبق الفول العال اللى يشد حيل أربعه من الجمال وعليه كوب من الزيت اللى ماتلاقيش زيه عندكم فى البيت وده طبعا من حلاوته ولونه اللى قرب يبقى زى لون البنزين بس من النوع النضيف بنزين 80 المهم ربنا قوانى وقمت بالطبق كله وغمست ب3 ارغفه بتوعى وقمت حبست بكوباية شاى متينه وطبعا كنت شاحت الشاى والسكر لكن الحمد لله النعناع اللى كنت حاطه عليها ماكنتش شاحته لأنى كنت شاحت بزياه اليوم اللى قبله المهم قمت لبست هدومى ولفحت البالطو الأبيض على كتف والسماعه على الكتف التانى قال ايه السما بتمطر ملايكه
وياريتنى مارحت المستشفى ولاجبت بالطوهات من أساسه المهم دخلت الأتوبيس
ربنا كرمنى بواحد اعتقدته ان الكمسرى طبعا شاف البالطو قام قاللى لو سمحت ياضكتور قلتله اسمها دكتور قال المهم أنا عايز أسألك سؤال قلتله اسأل قلت يمكن الكلام ياخدنا وينسى ياخد منى تمن التذكره ماهو ياما أخدو منا حق تذاكر المهم قاللى والدتى عندها الكبد وأنا بخاف أكل معها واسلم حتى عليها أعمل ايه أنا خايف طبعا أخوكوا سمع كده عمل فيها الطبيب الهمام قمت منشف نفسى ورافع اكتافى قال ايه الباشا حيجاوب حطيت ايدى على كتفه وقلتله بص شوف ياابنى مافيش حاجه اسمها الكبد راح فرح الراجل وقال ياااااه يعنى دى كلها اشاعات ومافيش حاجه اسمها كبد أصلا قلتله لأ يا ناصح أنا قصدى انه مفيش مرض اسمه الكبد الكبد ده عندى وعندك وبيصاب بأمراض كتيره اللى منها وأخطرها الفيروسات الكبديه والفيروسات دى كتير أهمهم A , B , C ,D وقعدت أشرحله وقلتله A,E بيتنقلو عن طريق الأكل والشرب يعنى الأكل الضارب زى اللى موجود فى عربيات الفول اللى ماليه مصر كلها واللى شخصيا مندوب دائم عليها صباحا ومساءا وطبعا الشرب يعنى الماء الملوث عشان كده بيييجو للعيال الصغيرين أكتر لأنهم دايما هما اللى بيرمرموا . لكنB,Cبيتنقلو عن طريق الدم( الدم يعنى نقل دم ملوث أو سرنجه ملوثه بدم وعن طريق عمليات غسيل الكلى ) أنا قلت الكلام ده كله ولقيت الراجل وشه احمر ولقيته جمع قواه فى قبضة ايده وعايز ياخدنى بالبونيه فى وشى ولقيته بيقول ده كله عند ماما ياسوادى عليكى ياما قلتله لأ يابنى أكيد أمك عندها فيروس واحد قال اه عندها فيروس سى قلتله خلاص كده يبقى تمام عيش مع والدتك عادى كأنى مافيش حاجه أصلا واشرب معاها وعيش براحتك معاها بس حاسب لدمك ييجى على دمها من جرح مثلا أو حاجه زى كده طبعا أنا بقول كده وبادعى ربنا انه ينسى التذكره وفى اللحظه دى لقيت واحد أسمر لابس بدله سمرا وطاقيه برده سمرا وفيه مسدس فى جنبه وعليه حاجات بتلمع على كتفه تقريبا والله أعلم بيقولوا عليه ظابط لقيته مسك الراجل اللى أنا كنت فاكره الكمسرى ولقيت بيقوله أخيرا وقعت ياسمكه ومين ده شريكك هاتوهم وأخدونا على القسم من غير مانطق بحرف واحد وطبعا الظابط دخلنى أوضه وراسه وألف سيف أقوله سمكه مخبى الحشيش فين بس الراجل بصراحه أكرمنى أخر كرم (اوعى حد يضحك ويفكر انه عمل لى حاجه) أبدا بس من ساعتها وأنا أسفل راسى أحمــــــــــــــــــــــــــر مع أنى ماأخدتش الا 16 قلم على غفله وطبعا خرجت من القسم ومن ساعتها بحط ايدى على قفايا بلاقيه دافــــــــــــــــــــــى حتى فى عز السقعه ومن ساعتها وأنا بحط البالطو والسماعه فى كيس وبقيت أسمع اسم الكمسريه بصدع

مستنيه ردودكم

__________________

http://www3.0zz0.com/2008/09/24/00/705252446.gif

هههههههههه حلوة اوى منتظرين المزيد

موضوع جاااااااااااااااااامد جدا وجميل
ميرسي ليكي ع التوبيك الجميل ده

حلو
مشكووره

جميل جدا بس في دكتور بضرب علي قفاه بردو

جميل جدا بس هتلاقيه كره الطب هههههههههههههههههه

لذيذ أوى بس والنبى بلاش حكاية الضرب ع القفا

جميل اوى شكرا ليكى
ياعينى الدكاترة متبهدلين

جميل كمل وبعدين حصل إيه

:dهههههههههههههههههههههه
الموضوع جميل فوق الرائع
تسلم ايديكى

ههههههههههههههههههههه جميلة جدا

انا جبت لكم موضوع حلو عن اول يوم فى الكلية بردو

اهوه






دلوقتى بكتبلكوا ليله دخولى الجامعه - يعنى بكره اول يومى لسه -مش عارفه اوصفلكوا انا حاسه بايه بالظبط
يعنى شويه قلقانه على فرحانه على مش عارفه اعمل ايه بالظبط وواحده صاحبتى كل شويه تسأ لنى هتاخدى ايه معاكى بكره ؟؟
أقولها ايه دى مش عارفه ؟ هاخد السندوتشات مثلا والمصروف اكييد مممم وايه تانى هاخد قلم مثلا وهاخد اسكتش .... مش عارفه اخد البالطو ولا ايه ....انا لو عليا نفسى البسه وانا نازله ونفسى اخده مع انى واثقه انى مش هاستعمله قبل العيد ....بس هيقولوا عليا هبله وماله بقى مهم هيكتشفوا ده بعد كده لوحدهم عاتى يعنى وهروح الساعه كام بقى .. انا بقول اصلى الفجر وانزل عشان انا عارفه انى هتوه هناك كتير يبقى اتوه بروقان بقى خاصه ان الكليه كبييييييره و المدرسه متجييش فيها حاجه وخاصه برضه انهم لمينا احنا واسنان وعلوم فى مكان واحد عشان نتوه ونخبط فى بعض براحتنا . ربنا يستر بس ومروحش احضر مع بتوع اسنان ولا العلوم . يارب وفقنى فى الكليه دى الى دخلتها بكامل قواى العقليه وباختيارى التام ومتشمتش حد فيا خاصه ان عندى فى البيت كل شويه يرموا كلام من نوعيه اما نشوف هتعملى ايه -على اساس انى صمصمت على صيدله و رفضت الطب بتاعتهم دى -اكتر حاجه قلقانى من الكليه دى حكايه الضفاضع والكائنات و الحشرات الزاحفه التانيه الى هنشرحها مش فاهمه احنا مالنا اصلا . انا مش متخيله نفسى اصلا وانا بشرح ضفدعه ....عاااااااااااااا.....انا ممكن اخبطها فى نافخوها عشان يغمى عليها وبعد كده ابقى اشرحها براحتى بقى . بس برضه اهو ارحم من جثث البنى ادمين .
اول ما ارجع بكره من الكليه هحكيلكوا عملت ايه
سلملم مؤقتا بقى

ومش هتأخر عليكم
ده الباقى


اهوه

اسيبكم مع الكاتبة












معلش اتأخرت عليكم مش بايدى يعنى النور كان قاطع والنت كان فاصل و التلفون عطلان والميه بتقطع برضه يعنى كنت هبعتلكوا البوست على ضوء الشمعه مثلا عموما شكلنا كده هنعزل من البيت

زى ما حكيتلكوا قبل كده احساسى ليله دخول الجامعه يعنى كنت قلقانه شويه وده طبعا مخلانيش أنام غير ساعتين تقريبا , هو مكنش قلق اوى يعنى قد ما كان تشوق لمرحله جديده وحياه وجو تانى خالص. صحيت اول واحده فى البيت مع انى محضره هدومى من الساعه 10 بليل بس قولت اقوم يمكن يحصل حاجه طارئه ولا حاجه _يمكن الاقى الطرحه مش لايقه مع الهدوم ولا فيه حاجه محتاجه تتكوى تانى الاحتياط واجب برضه_بدأت ألبس بتأنى شويتين على غير العاده مهو انهارده مش اى يوم يعنى وخلصت لبسى وماما كانت صحيت ومنستش تبعا اخد فلوس المواصلات ونزلت بدرى جدا تحسبا لأى طوارىء برضه عشان احتمال كبير اوى اتوه فى السكه وانزل قبل المكان او بعده .
وأنا ماشيه بقى فى شارعنا لقيت العيال الصغيره لابسين لبس المدرسه ورابطين الكرافت وشايلين الشنط الكبيره دى كان شكلهم تحفه اصلا عاملين زى لعب الاطفال ياااااه ,هو انا كان بيبقى منظرى كده ؟ الحمد لله ان ربنا رحمنى من القميص البمبى والجيبه الرمادى مش عارفه كنت بلبسهم ازاى ؟؟قابلت واحده صاحبتى على اول الشارع وكان معاها واحده صاحبتها كمان وركبنا ودفعتلهم على فكره يلا بقى انهارده اوكازيون .
وصلنا عند الكليه من غير توهان الحمد لله لقينا زحمه كتير اوى عالباب ووقفنا كتير شويتين علشان كانوا بيعدوا واحد واحد ويشوفوا بطاقته ورخصته ...قصدى ..وصل مصاريفه كانوا محسسنى اننا فى لجنه مرور .دخلنا اخيرا وقابلت ناس صحابى ورحنا على شئون الطلبه عشان نشوف اسامينا ومجموعتنا ونعرف راسنا من رجلينا فى الكليه دى .لقينا ورق الاسامى متعلق واللى كان معلقه بجد كان انسان نبيه اوى ,كان حاطط الورق مش مترتب على حسب الحروف ولا المجموعات يعنى مثلا بدأ بالالف عادى و هوبا لقيناه دخل عالدال وقام مكمل الف تانى وأسهم بقى طالعه ونازله و أنا كل ده مش لاقيه اسمى نوهائى . رحت اسأل عند الست بتاعه شئون الطلبه _ست رخمه اوى على فكره-لقيت كارنيهى لسه مطلعش قلت قشطه اوى كده يبقى انا اروح اقعد فى بيتنا ومفيش كليه السنه دى .قابلت واحده تايهه كده زيى قمت خدتها تدور معايا على اسمى يمكن نلاقيه هنا ولا هناك .قامت البنيه لقيته اول اسم خالص فى ورقه كده مع نفسها مش باين عليها انهى مجموعه مش مشكله يعنى مش هنختلف عالمجموعه احنا كنا فين وبقينا فين ؟؟. مشينا انا والبنيه من الزحمه دى ولقينا سلم كده بيدخل على مدرج 3والناس عماله تدخل تدخل اكنهم بيدخلوا من ناحيه ويخرجوا من الناحيه التانيه مهو لا يمكن يكون كل دول بيدخلوا يقعدوا جوه , احنا مكناش مصدقين اننا المفروض ندخل معاهم بس افتكرنا ان الجدول كان مكتوب فيه اول محاضره م3 واحنا مكناش فاهمين يعنى ايه ؟ انا عن نفسى معرفش غير م5 (المغامرون الخمسه)دخلنا م3 وياريتنا ما دخلنا,لقينا البنى ادمين فوق بعضهم واحنا ماشيين لا اراديا بقوه الدفع فقط , ايه ده هو كله داخل صيدله زيى ,للدرجه دى أنا بقيت قدوه بقى وبيقلدونى ؟؟أنقذتنا العنايه الالهيه ولقينا مكان نقعد فيه,شويه كده والمدرج اتردم ناس الى قاعدين عالارض وعالسلالم والى عالشباك بيتفرجوا من بره مش عارفه ملهوفين على ايه كده دى محاضره يعنى مش ماتش الاهلى والزمالك .دخلنا واحد بتاع فيزيا-أكتر ماده بحبها-بس مقربش من الفيزيا نوهائى . اكتفى انه يكلمنا عن ذكرياته ايام ما كان قدنا - واحنا مالنا احنا-وقبل ما يمشى رصلنا اسامى 7 مراجع الى جانب كتاب القسم المفروض اننا نذاكر منهم والى عايز يتوسع يقدر يروح المكتبه,على اساس اننا هنذاكر للماجستير مش لاعدادى صيدله دخلنا واحد بعديه بتاع نبات تقريبا مش فاكره يعنى وكان بينهم شبه كبير اوى شكلا ومضمونا بس ده بقى محكلناش عن ذكرياته لانه كان كبير شويتين فكان ناسى يعنى بس فضل يوعينا ويدينا خبرته الطويله فى مجال التدريس (كل واحد يحط عينيه فى راسه ويخلى باله من موبايله وفلوسه وسندويتشاته وكراسه محضاراته وكراسه العملى بتاعته عشان الحراميه كتير )ده كان كلامه الى طمنا عالاخر.مش عارفه هنخلى بالنا من كل الحاجات دى ازاى؟ لازم بقى كل واحد وواحده ياخدوا مطوا تهم فى جيبهم عشان يحموا نفسهم(وبالنوسبه للشباب اللى مكنش معاهم بنات فى المدرسه بلاش تركنوا كتير عند الكافتيريا تبصبصوا للبنات عشان مش هينفعوكوا وهتلاقوهم هما نقلوا للسنه الى بعديها وانتوا لسه فى اعدادى )ده كان كلامه برضه , راجل كبير بقى وخبره , المهم انه رمى الكلمتين الى عنده ومشى .
بعد كده خرجنا من المدرج وقولنا نروح نشوف الكارنيهات خلصت ولا لأ , هما وقفوا بره وانا الى دخلت أسال فلقيت طابور طويل اوى كالعاده , خرجت قولتلهم مش هنقدر ندخل .قلنا خلاص نلف شويه فى المكان عشان نستكشفه ونبقى نرجع كمان شويه قبل ما نمشى تكون الزحمه خفت شويه .لفينا كتير وجالنا صداع من الشمس ورجعنا تانى عند الزحمه ودخلت برضه لقيت الطابور متحركش خرجت قولتلهم زحمه برضه مش هنقدر ندخل احنا نمشى بقى انهارده ونبقى نيجى وقت تانى . قالوا احنا ندخل ناخد دورنا فى الطابور أحسن ,دخلنا لقينا الزحمه مش عالكارنيهات اصلا وشباك الكارنيهات فاضى خالص ههههههههه -كانوا هياكلونى ساعتها-المهم ان هما اخدوا كارنيهاتهم وانا الست قالتلى لسه مخلصش مع انى مقدمه قبليهم اصلا , مش قولتلكوا انها رخمه ومستقصدانى من يوم التقديم بس انا مش هاسيبها ليها يوم اخد منها حقى .بس خلصنا الى احنا عايزينه وكل واحد اخد طريقه
وانا ماشيه قابلت واحده قعدت تسلم عليا ربع ساعه وتحضن بقى وازيك وعامله ايه وأنا اصلا كنت عايزه أنام ونفسى أسالها انتى مين اصلا؟الاخر خالص افتكرت انها كانت معايا فى درس فى تانيه ثانوى وطلعت معايا كمان فى الكليه وقابلت البنات الى كنت جايه معاهم وانا مروحه مع انى مشفتهمش طول اليوم وركبنا ووصلت البيت وجريت عالسرير عشان كنت هاموت وانام ونمت على طول قبل ما اوصل للسرير ومش رايحه لا بكره ولا بعده .وده كان اول يوم ليا فى الجامعه عقبال ما احكيلكوا كده على يوم تخرجى كماااان

وده يوم الضفادع







اخييرا بعد تفكير طويل ومباحثات مريره وحجج واهيه ...قررت اخد الضفدعه معايا البيت, بعد ما توصلت الى انى لو اعتمدت عالسكشن فقط يبقى هشيل الضفادع السنه دى .

وقلت فرصه برضه اخدها ومحدش موجود فى البيت منعا لاى تريقه او ازعاج , خاصه ان ماما كانت حذرتنى من دخول الضفدعه البيت لأنها مش بتحبها . وأنا مالى بقى يعنى هى متحبهاش وأنا أسقط مثلا.

بعد المحاضرات رحت للراجل بتاع الضفادع وأنا بقدم خطوه وبأخر خمس خطوات , ووصلت عنده لقيت عليه زحمه وكله بيشترى ضفادع, وأل ايه الضفدعه الوسط ب 3 جنيه والجامبو ب 3.5 ,دانا كده هخلص مصروفى عالضفادع السنه دى .

حتى الراجل ده طلع مادى اوى بيشيل الضفادع الكبيره عشان يتاجر فيها والصغيره اللى مش باينه يديهالنا فى السكشن , قررت اشترى ضفدعه وسط عشان اعرف الاول اتعامل معاها ازاى لانها اول مره ليا وبعدين ابقى اشتغل عالجامبو .

حطيت الضفدعه بكيسها فى جيب خارجى للشنطه _ الجيب ده المفروض بحط فيه الموبايل على طول بس شلته حطيته فى جيبى _ وسيبتيلها فتحه صغيره تتنفس منها مع ان الكيس اصلا مقفول بس قولت اريح ضميرى وخلاص .

لقيت الترام اللى بدورين جت قولت اما اركب فوق وبالمره افسح الضفدعه وافرجها الدنيا فى لحظاتها الاخيره . وكل شويه بقى وانا قاعده انسى وافتح الجيب عشان اطلع الموبايل الاقى الضفدعه قاعده اقوم قافله بسررررعه احسن تنط ولا حاجه واكييد مش هعرف اجيبها تانى .

كنت لسه ما جبتش سبرتو عشان التخدير فقلت اجيب وانا فى السكه و دخلت اول محل بقوله : عندك سبرتو احمر ؟! قام بصلى كده وقاللى : سبرتو !!! احنا ناس بنصلى وبنعرف ربنا سبرتو ايه ؟؟ و اخذ يقهقه كثيرا
رحت لواحد تانى : عندك سبرتو احمر ؟! فابتسم ابتسامه عريضه وقاللى : لا طبعا !! مش فاهمه طبعا ليه يعنى محسسنى انى هاخده اشربه !!!
روحت منغير ما اجيب سبرتووكلى حزن على مصير الضفدعه المجهول وكلمت بابا فى التلفون بصوت اقرب للبكاء : يا بابا هاتلى معاك سبرتو احمر عشان مش قادره اتفاهم مع الضفدعه ! وتبعا لم أسلم من بعض التريقه من نوعيه : تحبى اجبلها اكل كمان ؟؟ أنا : هو انا هاربيها هات سبرتو بس ومتنساش .

شويه كده وبابا جه وجاب السبرتو معاه والضفدعه لسه قاعده فى العلبه اللى حطيتها فيها وهى جوه الكيس برضه وقمت كبيتلها سبرتو من الازازه جوه العلبه وبرضه غرقت قطنه وحطيتها لها زياده تاكيد يعنى عشان أضمن انها مش هاتصحى ابدا وانا بشرحها .

سيبتها عشر دقايق كده و رحت فاتحه العلبه بعد كده لقيتها يعينى مزرقه كده ومسبهله عالاخر!! قلت ايه ده دى ماتت ولا ايه ؟!! زعلت اوى اوى كان نفسى تموت على ايدى مش قبل ما اعمل فيها حاجه كده .

بدأت اشرحها بدون أمل وعماله اقطع فيها براحتى بقى مهى مش عايشه يعنى مش هتحس بحاجه.

بعد ما وصلت للقلب كده , لقيت المفأجاه .......قلبها لسه بينبض هيييييييييييه لسه عايشه , فرحت اوى اوى اكنى كنت بعملها عمليه قلب مفتوح ونجحت .

ازدادت الحماسه جوايا وشلت بقى الكبد والقلب والمعده والمرىء والمراره وكله كله وشوفت اللى عايزه اشوفه وفضيتها عالاخر .

بعد ما خلصت لميت اثار الجريمه دى بسرعه ورميت الضفدعه ولا اكن حاجه حصلت , بس لسه بقى عايزه اجيب واحده تانيه عشان ابقى جاهزه من الاول بالسبرتو والذى منه , مانا خلاص بقيت خبره فى الضفاديع .

وكل ضفدعه وانتوا بخير ..........

معلش كتب الموضوع ده ف طب مع انه صيدلة
ااااااااسفة مخدتش بالى

هو أنتى ما أتقرفتيش و انى بيشيلى القلب و الكبد و الذى منة ؟؟؟؟ و لا دا بيجى بالتعود

يععععععععععععع
هوا موضوع الضفادع ده فى صيدلة بس صح؟

موضوعك لذيذ جدا بس هو اية كان شعورك وانت بتلملمى فيها

هههههههههههههههههههههههههااااااااااااااااااااااااا ااي

حكاوي ايام الطب روووووووووووووووووووووووعة

يلا كلها شوية وهحكيلكو

سلام