بسم الله الرحمن الرحيم

في البداية أرجو من الادارة تثبيت الموضوع لأهميته:av4056bb7jp3:

الموضوع ده أنا هحاول أكتب فيه معظم التساؤلات اللي بنفكر فيييييها زي
*نظام الدراسة و الكتب عامل ازاى*
*المواد الدراسية*
*الكتب الدراسية*
*نظام الامتحان النظري و العملي*
وكماااااان هتكلم عن :
1 - كارنية الكلية
2 - كارنيهات المواد
3 - كارنية الامتحانات
و كل الحالات الخاصة اللي ممكن تختر على بالكو


كلنا كطلبة لسة داخلين كلية الطب
و بعدين أحب أقول لكم ان أنا طالب زيكوا داخل سنة أولى طب عيين شمس و ألف مبروووك لكل اللي دخل كلية من المجموعة الطبية الجميلة و ان شاء الله أي حد عندوا تساؤل يتفضل و أنا أجاوب :friendsxs3:

نظام الدراسة و الكتب عاملة ازاى


طبعا انسى نظام الدراسة المدرسى الروتينى بتاع ثانوى ده
أنت دلوقتى فى مرحلة جديدة تماما و مختلفة عن اللى فات
بالنسبة لسنة أولى

عدد المواد 7
4 مواد رئيسية و 3 مواد اضافية
و كل مادة ليها قسم معين للدراسة بالكلية و كل قسم ليه رئيس


نظام الدراسة هيكون عبارة عن ::

المادة مقسمة لجزئين
-جزء نظرى يدرس من خلال محاضرات
-و جزء عملى من خلال السكاشن
بيتم توزيع الطلبة على السكاشن على حسب الترتيب الأبجدى
علشان كده مهم جدا تعرف فى أول السنة رقمك كام و فى سكشن كام من خلال ورقة هتتعلق فى الكلية أو من خلال موقعنا بلاطى أسهل....


-المحاضرات بتكون من الساعة 9 غالبا للساعة 12 متقسمة على 3 محاضرات كل محاضرة ساعة
-المحاضرات هتكون فى مدرج المحلاوى بالنسبة لسنة أولى و تانية
و الأماكن هتعرفها لاحقا


-بعد المحاضرات تبتدى السكاشن من الساعة 12 للساعة 6
متقسمة على 3 سكاشن كل سكشن ساعتين
بس متقلقش أنت ليك سكشن واحد فى اليوم يعنى مثلا سكشنك من 2 لـ 4 و بعدها خلاص خلصت
-السكاشن بتكون فى قسم المادة أو المعمل الخاص بيها
الأماكن هتعرفها لاحقا برضه http://www.bala6y.org/vb/images/smilies/biggrin.gif

-الحضور فى بعض السكاشن بيكون بالبالطو ضرورى


-مهم جدا حضور المحاضرات لأن كل دكتور بيشرح جزء من المنهج بيحط أسئلة الامتحان فى الجزء ده
و لازم تعرف كل دكتور ركز على أى جزء فى شرحه


-المحاضرات ملهاش غياب انما السكشن بغياب و دخول السكشن بكارنيه المادة زى ما هتعرف بعدين كل مادة ليها كارنية
و هتعرف هيتعمل ازاى لاحقا

المواد الدراسية

القسم ده مكتوب كتير جدا و أعضاء كتير تناولته بشىء من التفصيل
و كلامها فيه رائع جدا
علشان كده هعمله مختصر




نبدأ بالـ 4 مواد الأساسية
و زى ما اتفقنا كل مادة ليها قسم خاص بيها فى الكلية
و هم


فسيولوجى


-المحاضرات فى المحلاوى و السكاشن فى قسم الفسيولوجى
-علشان المادة دى هتحتاج تشترى جهاز ضغط ( محلات بيع الأجهزة الطبية أمام الكلية ) و البالطو و كارنيه المادة
-مادة بتتكلم عن وظائف الجسم الطبيعية
-المادة دى هتمتد معاك لسنة تانية كمان
-المادة دى من 250 درجة



الأناتومى أو التشريح


-محاضراتها فى المحلاوى
-و سكاشنها فى المشرحة
هتلاقى عدد من الدكاترة واقفين يشرحوا ممكن تحضر مع أى واحد منهم
-و هتحتاج قفازات أو gloves و هتحتاج البالطو طبعا و كارنيه المادة
و طبعا هتحتاج تشترى سكيليتون سنة أولى
ممكن تشتريه من أى أسرة بتقدم خدمة بيع السكيليتون
و علشان تعرف الأسر و خدماتهم ادخل على بلاطى منتدى الأسر
السكيليتون فى حدود 150 جنيه
و مكوناته من هنا http://www.bala6y.org/vb/t7690/

-مادة بتتكلم عن تركيب جسم الانسان كعظام و عضلات و أعضاء و هكذا
-المادة دى من 250 درجة أيضا



الهستولوجى


-محاضراتها فى المحلاوى
-سكاشنها بتتقسم على معملين معمل فى قسم الهستولوجى و معمل فى قسم البارا
-المادة دى ليها كتاب هتتمرن فيه على رسم ما تراه تحت الميكروسكوب
و الكتاب ده عليه درجات
-هتحتاج فيها البالطو فقط لا غير و كارنيه المادة طبعا مع الكتاب
-مادة بتتكلم عن التركيب الخلوى للأنسان
يعنى بتبص للأعضاء بتتركب من نوعيات من خلايا معينة
هتدرس النوعيات دى
-المادة دى من 150 درجة




البيو أو الكيمياء الحيوية


-محاضراتها فى المحلاوى
-سكاشنها مقسمة لجزء شرح و جزء عملى فى معمل الكيمياء
الجزء الشرح ساعة فى مدرج الكيمياء بقسم الكيمياء
و الجزء العملى فى المعمل بالقسم أيضا
-هتحتاج أنابيب اختبار ممكن تشتريها من المكتبات الموجودة داخل الكلية
و هتحتاج الـ gloves كمان
و البالطو و طبعا كارنيه المادة
-مادة من اسمها بتتكلم عن المركبات الكيميائية فى الجسم و التعامل مع أى مركب كيميائى دخل الجسم
-المادة دى من 150 درجة أيضا




و 3 مواد اضافية
اضافية بمعنى أنك ممكن تأجلها لما بعد سنة تانية كمان
أو لاقدر الله لو منجحتش فيها هتعدى السنة عادى بسلام بس تمتحنها السنة اللى بعدها أو اللى بعدها
مش مرتبطة بسنة أولى يعنى


الانجليزى


-محاضراتها بتكون فى المبنى الجديد فى مدرج من المدرجات اللى بداخله فى الدور الأرضى
محاضراتها لا تكتب فى الجدول و لما بتبدأ المحاضرات بيكتب ورقة للاخبار بذلك
أو ممكن تتابع من على موقع بلاطى علشان تعرف هتبدأ امتى

-مش محتاجة تعريف انجليزى عادى يعنى



الكمبيوتر


-معمل الكمبيوتر تحت مدرج المحلاوى
-هتدرس وورد (word) و كده
-و هينزل ورقة قبل الامتحان النظرى فيها أسئلة هييجى منها الامتحان
-و ليها امتحان عملى سهل جدا



حقوق الانسان


مادة تم اضافتها حديثا من سنة تقريبا
معرفش عنها حاجة http://www.bala6y.org/vb/images/smilies/battingeyelashes.gif

الكتب الدراسية

محدش هيقدر يفيدك كتير فى الحتة دى
أنت اللى عليك تعرف كل كتاب طريقته عاملة ازاى و تختار اللى يريحك
هيبقوا نفس المنهج متقلقش http://www.bala6y.org/vb/images/smilies/biggrin.gif

كل دكتور بيشرح جزء من المادة زى ما قلنا
و كمان الدكتور ده بينزل الشرح فى كتب
طبعا فى الكلية مفيش حاجة اسمها كتاب الوزارة
الكتب ممكن تشتريها من المكتبات الموجودة داخل الكلية
و ممكن تسأل زمايلك اللى سبقوك عن أفضل الكتب للمذاكرة



بالنسبة لكتب العملى
هتشتريها من قسم المادة اللى ليها كتاب عملى و دى اجبارية
المواد اللى ليها كتب عملى هى الهستولوجى فقط تقريبا http://www.bala6y.org/vb/images/smilies/biggrin.gif

نظام الامتحان



-امتحانات دورية فى السكاشن بـحوالى 10 درجات تقريبا فى كل المواد الأساسية
-امتحانات أعمال سنة زى امتحان نص السنة كده
بس مش بنعتبره نص سنة لأنك بتكمل دراستك على الحاجات بتاعت الترم الأول عادى جدا
-امتحان عملى آخر السنة و بعدها مفيش سكاشن تانى
-امتحانات النظرى فى اخر السنة برضه و دى عليها أكبر كمية درجات
-امتحان الشفوى بعد النظرى و ده أنت و حظك على حسب الدكتور اللى هيمتحنك


بالنسبة للتأجيل

المفروض حضرتك هتمتحن فى شهر 5 أو 6 تقريبا
لو ناوى تأجل يبقى هتمتحن المادة فى الدور التانى شهر 8 أو 9 اللى بعده
التأجيل بيتم ازاى هنعرفه لاحقا

لكن انتبه


المواد الأساسية بيتوقف عليها السنة
يعنى لو لاقدر الله منجحتش فى مادة هتمتحنها دور تانى كفرصة تانية و تجيب فيها تقدير المقبول ( غير مسموح ليك بالزيادة عن المقبول لو بتمتحن المادة للمرة التانية )

و لو أجلت المادة الأساسية و لاقدر الله منجحتش فيها فى الدور التانى يبقى تعيد السنة بالمادة دى فقط

بس فيه استثناء فى سنة أولى
المواد الأساسية بتاعتها كلها هتتدرس تانى فى سنة تانية
علشان كده لو هتعيد امتحان مادة تانى و منجحتش فيها لا قدر الله هتكمل عادى لسنة تانية و معاك المادة دى بس بشرط متزيدش عن مادتين أساسيتين فقط

انما المواد الاضافية ممكن تأجلها عادى لا تتوقف عليها السنة


لو فيه مادة منجحتش فيها لاقدر الله لازم تدفع فى شؤون الطلبة 20 جنيه عن كل مادة حتى لا تحجب النتيجة بعد الامتحان التانى



النظرى بتمتحن فى أماكن مختلفة برقمك اللى أنت ماشى بيه طول السنة
قبل الامتحانات بتعمل كارنيه الامتحانات و لازم تكون دافع المصاريف و عامل كارنيه الكلية طبعا

قبل الامتحان بفترة بيتم توزيع الأرقام على الأماكن علشان كده لازم تعرف أنت هتمتحن فين و فى أى لجنة
ممكن تعرف أول بأول من الاسر



العملى بتمتحنه فى المعامل قبل امتحان النظرى بمدة كبيرة شوية


عملى الفسيولوجى يعتبر شفوى أكتر منه عملى
بتقعد قدام الدكتور و يسألك بعض الأسئلة العملى
و كل سكشن ليه يوم معين يمتحن فيه
بتتجمع مع زمايلك فى مدرج الفسيولوجى فى القسم قبل الامتحان و هينادى عليك



عملى الأناتومى بيكون فى المشرحة بالأرقام أيضا تاخد ورقة و تعدى على عينات و تقرا السؤال اللى فى الورقة و تتعرف على العينة و تجاوب



عملى البيو بيكون فى معمل البيو بتتجمع أيضا فى مدرج البيو حتى ينادى عليك لتمتحن فى المعمل
قبل الامتحان القسم بيطلع ورقة ارشادات تمشى بيها فى الامتحان



عملى الهستولوجى فى معمل الهستولوجى عينات تحت الميكروسكوب بتتعرف عليها و تكتبها



النتائج بتطلع بعد الامتحانات بأسبوع أو 10 أيام
بيتم تعليقها فى الكلية لكن حديثا النتائج تظهر على النت أو التليفون قبل تعليقها فى الكلية
النتايج مقسمة كالآتى
ممتاز 85 %
جيد جدا 75 %
جيد 70 %
مقبول 60 %
ضعيف 50 %
ضعيف جدا 30 %


بالنسبة للناس اللى تقديرها العام بيكون ممتاز و جيد جدا
هناك مكافأه تفوق تستلمها من خزينة الكلية
امتياز 120 $
جيد جدا 85 $
جنيه مش دولار http://www.bala6y.org/vb/images/smilies/biggrin.gif


و الناس اللى بتشك فى درجتها من حقها تعمل تظلم أو اعادة رصد للدرجات بفلوس http://www.bala6y.org/vb/images/smilies/biggrin.gif



لو حاجة غلط فى الموضوع أو حاجة ناقصة feel free to add

1 - كارنية الكلية

هتحتاج
صورة أو صورتين مش فاكر و احتمال ميطلبش صور علشان بقى كمبيوتر
وصل المصاريف


اللى هتعمله

بالوصل الأحمر و الصورتين تروح لشؤون الطلبة .
هتستلمهم منك و تديلك ورقة باستلام الكارنية يوم كذا الورقة دى تدخل بيها الكلية عادى.
و تيجى أنت كمان أسبوع لاستلام كارنيهك.


2 - كارنيهات المواد

لما السكاشن تبدأ


هتحتاج
كارنية الكلية
صورة حديثة
فلوس الكارنية غالبا 30 جنيه و بعض الكارنيهات من غير فلوس
يتعمل فى القسم بتاع المادة عند الموظف المختص
كارنية الكلية هيفضل معاك هو مجرد اثبات شخصية فقط

اللى هتعمله
اديله الصورة و الفلوس
هتستلم كارنيهك فى الحال



3 - كارنية الامتحانات

يتعمل قبل الامتحانات بفترة قصيرة ممكن تتابع الورق اللي بينزل ف الكلية علشان تعرف.

هتحتاج
كارنية الكلية
صورة حديثة أو ممكن من غير صورة خالص

اللى هتعمله
هتطلب اذن دفع بكارنيه الكلية بتاعك أو بوصل المصاريف
تاخد اذن الدفع تروح الخزينة تدفع و تاخد وصل أحمر
بالوصل و الصورة بتاعتك تستلم كارنيهك فى الحال



حالات خاصة

للتأجيل
طلب تاجيل من شئون الطلبه وتدفع في الخزنه مبلغ وقدره 100 جنيه وتستلم بيها وصل
وفقط


لو لاقدر الله لم تنجح فى مادة
كارنية الكلية فقط
تروح لشؤون الطلبة
تطلب اذن دفع بعدد المواد اللى راسب فيها فقط
على كل مادة 20 جنيه
تروح الخزينة تدفع الفلوس و تاخد وصل أحمر
ترجع تديلها الوصل هتمضى جنب اسمك فى الكشف أنك دفعت




لو درجتك فى المادة مش عاجباك و ناوى تتظلم
التظلمات بتفتح بعد النتيجة بفترة معينة بتتعرف يوم النتيجة

كارنية الكلية و فلوس التظلم
عن كل مادة 15 جنيه على ما افتكر
تاخد من شؤون الطلبة اذن دفع بالكارنية عبارة عن ورقة طويلة
تروح الخزينة تدفع الفلوس
ترجع بالوصل الأحمر تقدمه لشؤون الطلبة
و تشوف نتيجة التظلم بعدها بأسبوع



اشتراك المترو
الأول تاخد استمارة المترو او القطار وتملاها
وتروح عند شئون الطلبة
ومعاك وصل المصاريف وصورة
وتاخد منهم اذن دفع تروح تدفعه فى الخزنة (10جنيه)
وبعدين تسيب الأستمارة فى الشئون
وتيجى تخدها بعد يومين
وتروح محطة القطار والمترو ومعاك الأستمارة وصورة والفلوس بتاعت الأشتراك وبعدها بيومين تروح تاخد الكارنيه والوصل

:078111rg3:اللي عنده أي استفسار يتفضل و أنا هجاوب بقدر الامكان:078111rg3:


و لو في حد هنا داخل طب عيين شمس ياريت لو نتعرف

:)و شكرررررراااااااا:):)

:078111rg3:اللي عنده أي استفسار يتفضل و أنا هجاوب بقدر الامكان:078111rg3:


و لو في حد هنا داخل طب عيين شمس ياريت لو نتعرف

و ألف مبروووووووك للجميع

:)و شكرررررراااااااا:):)

أنا طب المنصورة وشكرا جزيلا معلوماتك حلوة بالرغم من إنى مش هستقيد منها كلها لأنى المنصورة مش عين شمس

أنا طب المنصورة وشكرا جزيلا معلوماتك حلوة بالرغم من إنى مش هستقيد منها كلها لأنى المنصورة مش عين شمس


بشكرك يا أخي على مرورك الكريم
و إن شاء الله لو عندك أي تساؤل اسأل و أنا أجاوبك بقدر المستطاع
و اعتقد ان النظام ده مش هيفرق كتير منصورة أو عين شمس
:):):):)

أنا طب المنصورة وشكرا جزيلا معلوماتك حلوة بالرغم من إنى مش هستقيد منها كلها لأنى المنصورة مش عين شمس


بشكرك يا أخي على مرورك الكريم
و إن شاء الله لو عندك أي تساؤل اسأل و أنا أجاوبك بقدر المستطاع
و اعتقد ان النظام ده مش هيفرق كتير منصورة أو عين شمس
:):):):)

شكراااااا جزيلا على الموضوع الرائع ده
وجزاك الله كل خير

شكراااااا جزيلا على الموضوع الرائع ده
وجزاك الله كل خير


شكرا ليكي يا Dr.omnia على مرورك الكريم
و لو عندك أي استفسار أنا موجود:078111rg3:
و كليتك ايه ان شاء الله

:) يا ريت يا جماعة أي عضو يمر عالموضوع
يقولنا هو كلية ايييييه ؟:av4056bb7jp3:
و خصوصا لو كان ف عين شمس

و شكراااااا:)

شكراا ليك ع المعلومات الكويسه دي انا

شكراا ليك ع المعلومات الكويسه دي انا


شكرا ليكي يا dr_bosy (http://www.thanwya.com/vb/member.php?u=262680) على مرورك الكريم
و لو عندك أي استفسار اتفضلي:078111rg3:
و ربنا يوفقك ف كليتك ان شاء الله

هو مفيش حد هنا رايح عين شمس غيري؟؟؟؟؟؟؟؟؟

تسلم علي التوبيك يابوحميد

بس فين يا عم حقوق الملكية *__^

مش تقول ان الموضوع لهوسهوس من بلاطي :d

بس كويس انك جيبته هنا هيفيد الناس بردو

والدال علي الخير كفاعله :d

شكرا على موضوعك الرائع ومعلوماتك الاروع

مشكووووووووووووور جدا
موضوع رائع
انا كلية تربية رياضية المنصورة ان شاء الله

تسلم علي التوبيك يابوحميد

بس فين يا عم حقوق الملكية *__^

مش تقول ان الموضوع لهوسهوس من بلاطي :d

بس كويس انك جيبته هنا هيفيد الناس بردو

والدال علي الخير كفاعله :d

ماشي يا بو حميد عالعموم
بالراحة شوية

شكرا على موضوعك الرائع ومعلوماتك الاروع


شكرا ليكي على مرورك الكريم

مشكووووووووووووور جدا
موضوع رائع
انا كلية تربية رياضية المنصورة ان شاء الله


ربنا يوفقك ان شاء الله:)