مشاهدة النسخة كاملة : موضوع للكل ( ممنوع دخول ولاد ابو اسماعيل )
amr_2010 27-10-2006, 08:26 PM أزيكم يا جماعة عاملين أيه
طبعا كلنا نسمع عن العنصرية
والعنصرية بدأت ببداية أمريكا يعني بداية القرن ال15 تقريبا
كانت بدايتها الجثث والمجازر والأبادات بعد مياخدوا السود من افريقيا بعد وعود وردية بالعمل في ال(New World) بيرحوا هناك يكتشوفوا أنهم مجرد عبيد شغالين بأقل سعر
والي احلى من كده ان فيه درجات كمان للعنصرية
يعني الي لونه فاتح شويه (لون بشرته يعني) ده بيكون خادم جوه البيت الباقي بقى الي هما السود بيشتغلوا في الارض ويناموا في الحظيرة
بدا تمرد السود على المعاملة الغير أدمية دي تماما وهنا بدا الصدام بين البيض والسود والي مكنش في صالح السود خالص
ورغم سياسية القمع الخرافية الي كانت ضد السود ظهر ناس بالنسبالي ابطال وقفوا قصاد النظام
وعرفوا أزاي ياخدوا حقوقهم تدريجيا
يعني فيه ست فاضله كده مش فاكر اسمها للاسف بس عملت حاجه جميلة أوي
زمان كان البيض بيركبوا الاتوبيس عادي وفي الاخر بيقعد السود
الست دي قعدت في كورسي بتاع البيض والظابط جي علشان يقومها
رفضت وصممت على موقفها ودخلت السجن وحصلت مظاهرات جامده جدا بسبب الست دي
وبالمناسبة هيه لسه عايشة لغاية دلوقتي
بعديها كان فيه ناس الي مشهورين الى حد ما زي مارتن لوثر كينج
واليجا محمد
والرجل العظيم (Malcom X )
الي لازم اعمل موضوع عنه قريب ان شاء الله
والناس دي خدت حقوقهم بشكل ما تدريجيا بس برضو فيه عنصرية لغايه الان
والي بان اوي وشها القبيييييييح في اعصار كاترينا
وطبعا فيه عنصرية ضد الملونين بشكل عام وكمان ضد الاصوال العربية أو الاسلامية أو الآسيوية واللاتينية وغيرها محدش ينسى الى حصل بعد 11 سبتمبر
والكلام ده مش في امريكا وبس لا في دول تانية زي جنوب افريقيا الي كانت مقسومة نصين بجد
يعني البيض في حته والباقي في حته تانيه
الي يحرق دمك ان البيض اصلا 5 مليون والباقي 29 مليون
وبرضو كان فيه ابطال عرفوا ازاي ياخدوا حقهم زي طبعا نيلسون منديلا
ومن الحجات الطريفة شويه اني شفت بنفسي اعلان عن حاجه زي مؤتمر كده عن العنصرية
وفي أخر الاعلان مكتوب NO CANADIAN يعني ممنوع دخول الكنديين !!!!!
مش عارف هيتكلموا عن اي عنصرية في المؤتمر ده
(دلوقتي اكيد عرفت قصدي بعنوان الموضوع)
وفيه ممثل كوميدي أسمه Dave chappelle ليه برنامج مشهور جدا أسمه Chappelle's Show
أول حلقة عمل حاجه استحاله تتخيلها
تصور ان فيه واحد اسود اصلا بس أعمى ومش عارف انه اسود والناس قالت ليه أنه أبيض
وبقى أبيض متعصب جدا ضد السود وبيشتم فيم وبقى كبير جماعة الkkk
ان شاء الله برضو هبقى ارفع الحته دي
الشاهد من ده كله ان العنصرية موجودة وفي كل مكان بس ده مش سبب اني كتبت الموضوع
انا بس كنت عايز أسال سؤال
هل العنصرية موجودة في مصر؟
ياريت بجد أسمع رائيكم في الموضوع ده وانا هقول رائي بعد مسمع رائيكم على طول
بس مبدئيا كده فيه عنصرية فعلا في اللبس والشكل والمسكن والتعليم وفي كل حاجه
أسيل رزق 27-10-2006, 08:57 PM العنصرية فى مصر افتكر ايوه ومش فى اللون وبس فعلا فى كل حاجة
المصريين دلوقتى بقوا طبقتين طبقة غنية أو حرامية و طبقة فقيرة دا برده عنصرية
موضوع رائع فعلا وجميل جزاك الله عليه خيرا
amr_2010 27-10-2006, 09:04 PM شكرا لمرورك اسيل
شكسبير 27-10-2006, 09:15 PM العنصرية فى مصر عنصرية اختلفت فى معاناها عن العنصرية التى نعرفها هى عنصرية قد سلكت طريق اخر طريقا قد ميز بين فئات المجتمع وعدنا الى النظام الطبقى من جديد ليس العنصرية هنا فى التفرقة بين البيض والسمر ولكن التفرقة فى مجتمعنا بين الأغنياء الذين اعطتهم الدنيا من خيرها والفقراء الذين ورثوه عن ابائهم هذه هى التفرقة التى نعيشها اليوم
amr_2010 27-10-2006, 09:23 PM شكرا لتعليقك شكسبير
msamido 27-10-2006, 09:25 PM لا صراحه انا ما شفتش العنصريه اللونية دي في مصر بدليل الناس اللي جايين من السوادن وتلاقيهم في كل مكان في مصر والناس بتعاملهم كويس وعادي جدا
بس العنصريه اللي في مصر عنصريه دينيه وطبقيه
هتقولي دينية ازاي يا عم ده احنا بلد مسلم
هقولك ما هي دي المصيبه
اصل حكومة هانم فافي شويتين ومعندهاش اي شخصيه وبتخاف كتير من ماما امريكا وكل الأمهات المتحدة " قصدي الامم المتحدة" فتلاقي لو اتنين شباب اتخانقوا في الشارع زي ما بيحصل في اي مكان وهب هب جه امين شرطه محترم بس يلا انت وهو بس يا بن ... (بيب ) رقابه ما تخدوش في بالكم
المهم يشد الاتنين علي القسم وبطاقتك يلا انت وهو والاتنين يطلعوا البطاقة ويشوف اول بطاقة ويرميها علي جنب وبعدين يبص في التانيه وتلاقيه تنح شويه وبعدين جاب ألوان وبعدين يروح مرجع البطاقة التانيه دي لصاحبها ويقوله تقدر تروح دلوقتي والتاني يقول وانا يا بيه يقوله لا انت هتشرف شويه
ويخرج الأول ويقعد يبص في بطاقته كده وهو مش فاهم اي حاجه ويسأل نفسه هي البطاقة مكتوب عليها مخابرات ولا امن دولة ولا حاجه ويقعد يراجع في اسمه يمكن يكون علي اسم واحد من كبار الدوله " يا عم انت دخلت في النوع التاني من العنصريه كده ..... حاضر معلش خلينا نرجع " المهم يحط بطاقته في جيبه ويمشي
خلينا بقي نرجع الاوضه تاني الاخ اللي لسه جوه يقوله ايه يا بيه انا مش همشي انا كمان وكأنه قال مش عارف ايه تلاقي البيه المحترم قام خابط علي المكتب زي ما بتشوف في الافلام ويقوله انت يا بن مش عارف مين عايز تعمل فتنة طائفيه في البلد وطبعا الاخ يقول زي ما يقول هو خلاص كده بقي مهدد بتمة عمل فتنة طائفية ويمكن يلبسوه كمان تهمة التأمر علي قلب نظام الحكم بس بصراحه يعني بيحترموه اوي جوه وبيأكلوه كمان
المهم هو بياكل اللي فيه النصيب ويخلع وهو مطلوب منه بعد كده لو حب يتخانق لاي سبب من الاسباب مع اي حد يسأله علي اسمه الاول
اصل الحكاية ان الاخ اللي مشي علطول ده اسمه مايكل ماجد مرقص نيكولاس
اما الاخ اللي شاف احلي احترام جوه ده كان اسمه محمد
يارب حد يكون فهم حاجه
المهم ده نوع من العنصريه في بلدنا
النوع التاني بقي اللي هو النوع الطبقي وده من اسمه مش عايز كلام كتير ورغي زي الاول معاك اتنين كيلو كوسه هتوصل مش معاك روح عند امك وعلي فكره مش بيشتروا الكوسه دي من السوق هتلاقيها في اسواق تانيه مكتوب علي مداخلها " ضمير للبيع " وتلاقي جواه واحد قاعد علي قهوة بيقول وعندك واحد وسطه وصلحه للبيه هنا والبيه ده لما يقوم يدفع الحساب هيدفع حاجه بسيطه تمن للواسطه اللي شربها دي يدوب عشرين الف
كفاية كده رغي
سلام
.
.
amr_2010 27-10-2006, 09:40 PM فعلا السودانين هنا كتير في مصر وبنعاملهم عادي
لدرجة ان في قهوه عندنا اسمها قهوة الصوماليين
بس والله بتحصل العنصريه الي انت بتتكلم عليها
انا السنه الي فاتت في المدرسه حصلت مشكله كبيره
واتحولت انا وصحابي للنيابه الاداريه وكان من ضمن صحابي واحد والده نائب وزير الصناعه
انا وصحابي دخلنا لرئيس النيابه كلمنا باسلوب وحش وقلنا قول والله العظيم هاقول الحق
بس انا كلمني عدل
المهم الواد ده دخل رئيس النيابه قاله ازيك وازي بابا وكلمه بكل ادب واحترام واداله رقم تليفونه وقاله خلي بابا يكلمني في اي وقت
دانا لو حفيت علي ..... ماعرف اخد رقم التلفون
والموضوع لحد دلوقتي مانتهاش
لكن انتهي بانسبه للواد لان ابوه كلم نائب وزير التربيه والتعليم
وهي دي العنصريه الي موجوده في مصر
msamido 27-10-2006, 09:41 PM بالظبط يا عمرو اهو الواد ده كان معاه خمسه كيلو كوسه مش اتنين بس
والنوع الاول موجود بردوه
loza99 27-10-2006, 10:00 PM انا بقي مالاحظتش العنصريه دي في مصر خالص الا في حاجه واحده
وهي التفرقه في التعامل بين الولد والبنت في البيت وطبعا مش هوضح
لان اكيد الكل فاهم سواء البنت اللي خلاص بتقول شوية رحمة او الولد
اللي نايم بيستعبط وعامل نفسه مش واخد باله من التفرقة دي وهو طبعا
في قمة انبساطه او حتي الاب والام اللي دايما يقولوا احنا عمرنا مانقدر
اننا نفرق بينكم في المعامله وبكره لما تخلفوا هتعرفوا وواضح طبعا انهم
بيغالطوا في نفسهم.......... شكرا علي الموضوع........
شكسبير 27-10-2006, 11:20 PM فعلا يا لوزا انت كلامك صحيح بس التفرقة ين الولد والبنت قضية يطالب بحقة فيها وخاصة البنات لأنها كائنات ضعيفة ممكن تبان قوية لكن فى النهاية هى ست والبنت محرومة من مميزات كتيرة يما بتخنقها العادات والتقاليد والعيب والصح وكلام الناس
أسيل رزق 22-07-2009, 12:03 AM ياااااااه الموضوع ده لسه عايش
قلت أرد و أنشطه .. أى خدمة :romarioxp6:
amr_2010 22-07-2009, 02:15 AM ياااااااه الموضوع ده لسه عايش
قلت أرد و أنشطه .. أى خدمة :romarioxp6:
ياااااااااااااااااه الموضوع ده لسه عايش
ده انا مصدقتش ان انا ان بقالي كتير منزلتش مواضيع في العام
كويس انك نشطيه يا مها شكرا ليكي
ولحد دلوقتي لسه فيه برضو عنصرية بس في الغالب بين الاديان
انا ليا واحد صاحبي مسيحي وواد كويس جدا خرج معايا في مره وعرفته علي اصحابي المسلمين العيال كانت بتعامله كويسه لكن لما عرفت انه مسيحي مابقوش يكلموه وهو لاحظ كده وقالي انت مكنتش قايلهم اني مسيحي قولتله لا وساعتها معرفتش ارد عليه وصحابي يقولولي انت جايبلنا واحد مسيحي يخرج معانا
بس انا شايف ان مفهاش حاجه كل واحد ليه دينه وكل واحد حر
الباشا حسن 22-07-2009, 03:41 AM عندك حق أخى العزيز ( الدين لله )
و من المفترض إن كل الشرائع السماوية بتحض على حسن معاملة الناس
amr_2010 22-07-2009, 06:39 AM عندك حق أخى العزيز ( الدين لله )
و من المفترض إن كل الشرائع السماوية بتحض على حسن معاملة الناس
هو ده الكلام وانا اوافقك علي كده يا استاذ حسن
واشمعنا انا لما ببقا مع اصحابي المسيحيين مابحسش معاهم بعنصريه ليا من نحيتهم وبيحبوني جدا ومابيحطوش في اعتقادهم ان انا مسلم ومش زيهم ويربطو الدين بالمعامله
وليه احنا ديما الي بنعاملهم وحش وبنتضهضهم ليه منكنش احسن منهم ونثبتلهم ان مفيش عنصريه ؟
أسيل رزق 22-07-2009, 07:35 AM فعلاً و الله النقطة دى بلاحظها كتير أوى بس غالباً إحنا اللى بنظهر عدم تقبلنا ليهم .. هما فى كتير منهم بيعرفوا يخبوا عدم تقبلهم أو عامةً مش بيحسسونا بكده
أنا فعلاً كانت واحدة من شلتى بنوتة مسيحية و كنا أصحاب جداً بنيجى و نروح سوا و نتكلم فى كل حاجة حتى لو خاصة بدين أى حد فينا حتى أيام رسم الرسول كانت بتيجى تقولى شفتى المظاهرات اللى اتعملت فى ... علشان الرسول ...
و حصل موقف غريب بصراحة جداً .. كنا فى الفصل و رايحين أوضة المسرح فلقيت صحبتى دى وقع منها صورة فيها رسمة كده من عندهم رحت شيلاها من على الأرض و قلت لما نرجع الفصل أبقى أديهالها .. فلقيت واحدة صحبتى تانية مسلمة بترخم كالعادة فا بتفتش جيوبى لقيتها و سألتنى عليها فاقلتلها .. قالتلى طب و شلتيها ليه ماكنتى تسيبها و خلاص .. بصراحة ماقدرتش أقولها أكتر من .. انتى لو كان وجع منك مصحف على الأرض كنتى ترضى إن واحدة تعدى و تكون شيفاه وتسيبه؟؟
إتكتمت :bosyht9:
مش فاهمة إيه المشكلة فى كده؟!!
أصلاً لما نعمل عنصرية بنفسنا بينا و بين بعض بجد ممكن البلد تتخرب بسبب كده
ربنا يهدى الجميع :bosyht9:
abou aliaa 22-07-2009, 11:27 AM بص يا أخ amr
أنا هقول لك عل موضوع لفت نظري
أما حظيت برحلة لمدة 9 أشهر للمملكة U K
و قرأت هذه القضية في الجريدة British news
محجبة بوسنية رفعت دعوى ضد صاحب العمل لأنه فصلها فسبب لها أثر نفسي و لم يكن سبب الفصل واضح
قالت المحامي في دعواها أن الفصل تم على أساس عرقي Racial Abuse
و عيه تم بطلان الفصل و تكلفة صاحب العمل بغرامة مش فاكر الرقم بس
و على فكرة في كل مكان تجد أرقام تلفونات للتبليغ عن أي سوء استغلال سواء كان عرقي أو ديني أو جنسي
لوحات عليها Report Abuse بعدة لغات اردو و عربي و هندي ........
موقف آخر كنا نتمشى في ضواحي جلاسجو الساعة 8 مساءً و على فكرة ده وقت متأخر جداً فتوقفت بجوارنا عربية بها شرطيان و عندما نزلوا فوجنا بهم يسألونا هل هناك مشكلة ليساعدونا أو هل نحن تآهون
و على فكرة جميع أفراد الشرطة في UK لا تحمل سلاح ناري !!!!!!!!!!!!!!!!!!
بالظبط ذي الشرطة المصرية
يا عم التفرقة فينا من أيام فرعون
the black rose 22-07-2009, 12:06 PM شغالة انتى تنشيط يا اسيل :d
بس الموضوع يستحق
عشان العنصرية موجودة فعلا فى مصر لحد النهاردة
و ليها اكتر من مظهر
الاول العنصرية فى الاديان
فيه عنصرية بين المسلمين و المسيحين
تلاقى ان الواحد يبقى عادى و اول ما يعرف ان اللى بيكلمه مش على دينه
اتغير و بقى يعمل الف حساب
و ده مش تفكير الكبار بس مثلا
لاء تلاقى الاطفال كمان الحكاية دى نشاة معاهم
يعنى مثلا هحكى موقف هو طريف بس ليه معنى
كان فيه ولد و بنت اخوات
الولد اسمه محمد و البنت اسمها جومانة
المهم كانوا بيلعبوا فى النادى مع شوية اطفال مسلمين
فالعيال كانوا بيلعبوا مع جومانة و سايبين محمد
فابسط حاجة عملها محمد عشان العيال يلعبوا معاه
راح نداهم و قالهم متلعبوش معاها
اصلها مسيحية دى حتى اسمها جومانة و اسالوها :d
راحوا سابوا جومانا و لعبوا مع محمد
يبقى حتى العنصرية بقت بين الاطفال
نيجى لنقطة تانية
و هى العنصرية بين الفقرا و الاغنية
و دى واضحة جدااا
يعنى اقل حاجة تلاقى اى حد يبص للشخص لو كان شكله نضيف كدا و باين عليه الغنى
موبايل احث حاجة و عربية اخر موديل
يبقى يعمل اللى عايزه
و برده لو واحد شكله عادى
و اتمنع عن اى حاجة
و بعد كدا طلع ابن كوسة وزير البطاطس
يبقى جزمته فوق راس اى حد
واحدة صاحبتى باباها عقيد
عاتى يعنى
اى مشكلة اخوها يقع فيها
يقول ان ابن فلان و بتعدى
دول حتى مبياخدوش مخالفات
و ده عقيد اومال لو كان رئيس كان حصل ايه
الله يرحم ايام عمر بن الخطاب
كان يبقى قاعد تحت شجرة و متقدرش تميز بينه و بين اقل واحد فى الدولة
و فى عنصرية تالتة
تلاقى فيه عنصرية بين الاجانب اللى فى مصر و المصرين
_ اللى هما اهل البلد_
طبعا الاجانب بيبقى ليهم التميز
لو حصل مثلا لاجنبى حادثة
تلاقى عربيات الاسعاف و الدنيا اتقلبت
لكن لما العبارة تغرق و فيها مصريين
عادى و سبب غرق العبارة ياخد برااءة عااااااادى
ماهو المصريين كتير ايه المشكلمة لما يموتوا شوية
و ارواح ناس تضيع
اعتقد ان دى العنصرية اللى فى مصر
لكن اظن ان مفيش عنصرية لون او شكل
شكرا عالموضوع يا عمرو
الباشا حسن 22-07-2009, 04:24 PM لو ركزنا و تعقلنا فى الأمور هنلاقى الآتى :-
العنصرية موجودة فى كل المجالات و الفروع و على أسس مختلفة
وارد يكون بسبب الجنس ( ذكر - أنثى )
أو يكون بسبب اللون ( أبيض - أسود )
أو بسبب الدين ( مسلم - مسيحى )
أو بسبب العرق ( مصرى - عربى - أجنبى غير عربى )
أو بسبب المستوى الاجتماعى و الثقافى ( غنى - فقير )
أو بسبب الوجاهة الاجتماعية ( العمل الموكل إليه , فلا يستوى عضو مجلس الشعب مع الناخب )
و الأهم فى الموضوع ده إيه دورنا إحنا كمتعلمين و شبه مثقفين فى الإشكالية دى ؟
أتمنى التواصل و دوام المناقشة
أسيل رزق 23-07-2009, 03:17 PM شغالة انتى تنشيط يا اسيل :d
قل أعوذ برب الفلق :d
لو ركزنا و تعقلنا فى الأمور هنلاقى الآتى :-
العنصرية موجودة فى كل المجالات و الفروع و على أسس مختلفة
وارد يكون بسبب الجنس ( ذكر - أنثى )
أو يكون بسبب اللون ( أبيض - أسود )
أو بسبب الدين ( مسلم - مسيحى )
أو بسبب العرق ( مصرى - عربى - أجنبى غير عربى )
أو بسبب المستوى الاجتماعى و الثقافى ( غنى - فقير )
أو بسبب الوجاهة الاجتماعية ( العمل الموكل إليه , فلا يستوى عضو مجلس الشعب مع الناخب )
بالظبط حضرتك قسمت العنصرية و يمكن دى الأنماط الأساسية للعنصرية
و الأهم فى الموضوع ده إيه دورنا إحنا كمتعلمين و شبه مثقفين فى الإشكالية دى ؟
فعلاً المفروض يكون لينا دور فى كده و نصحح العقول من العنصرية بكل أشكالها و أنواعها :bosyht9:
أتمنى التواصل و دوام المناقشة
أنا المفروض آخد عمولة على كل رد بنزله :d
ممكن أرجع تانى :bosyht9:
الباشا حسن 23-07-2009, 03:38 PM نتكلم جد بأه
للمثقفين دور حيوى فى مجتمعهم ( دا المفروض ) , و إلا فما جدوى تلال الثقافة اللى شايلينها
يا ريت نتعاون كلنا فى عمل أشياء إيجابية تحسسنا بقيمتنا فى مجتمعاتنا
عاشقة القراءه 23-07-2009, 03:53 PM السلام عليكم ورحمة الله و بركاته
اولا احب احيى صاحب الموضوع عليه
ثانيا احب اقول انى قرات الموضوع و قرات ايضا بعض الردود
ثالثاا فعلا العنصريه اصبحت موجوده بشكل لا يطاق حيث انها موجوده بجميع مجالات الحياه
بين الموظفين و الطلاب و المختلفين فى الديانه و المختلفين فى الجنس و المختلفين فى البلد
بجد العنصريه تزداد بمصر يوم بعد يوم
و احب افكركم ان هذا غالبا ما يكون بسبب عدم الوعى الدينى الذى يقل يوم بعد يوم
للاسف ضاع مننا الحفاظ على القيم و المبادئ الدينيه
كما ان التربيه اصبحت معتمده على المدارس و غيرها من المؤسسات التى بها العنصريه و اصبح دور الام و الاب قليل جدا
و لهذا اقول علموا اولادكم قبل ان تعلمهم الدنيا
اسفه للاطاله
تحياتى
الباشا حسن 23-07-2009, 05:10 PM كلامك صحيح
دور الأب و الأم تقلص بشكل كبير لعوامل كتيرة
|