|
مشاهدة النسخة كاملة : اللى داخلين صيدلة الزقازيق دكتور حس 11-09-2009, 02:07 PM كل عضو داخل صيدلة الزقازيق او فيها يعرفنا بنفسه وانا هعمل موضوع للناس اللى داخلة الكلية جديد عن كل حاجة تتعلق بالكلية وانا زميلكم حسام على من بنها وانا داخل تانية صيدلة الزقازيق دكتور حس 11-09-2009, 02:10 PM بالمناسبة انا كمان هقولكم الزاى تروحوا الكلية سواء للناس اللى بتركب مكروباص او بتركب قطر وكمان ان شاء الله المواد والدكاترة الل هتديكم وكمان المعامل والسكاشن والادوات وكل حاجة بس اتمنى ان اللى داخلين جديد او قديم يدخلو يعرفونا بنفسهم عشان نبقى اسرة واحدة mido125 11-09-2009, 02:46 PM والله مش عارف اقولك ايه الف شكر انا محمود من بنها لسه داخل جديد دكتور حس 11-09-2009, 02:54 PM والله مش عارف اقولك ايه الف شكر انا محمود من بنها لسه داخل جديد اهلا يا محمود انا والله بعملكم الموضوع اهو وبجهزة واحتمال ارفعه على بليل او بكرة ان شاء الله وهقولك كل حاجة انت منين يا محمود فى بنها ؟؟؟؟ وان شاء الله اشوفك على خير فى الكلية والكلية هتعجبك جدااااااا mido125 11-09-2009, 03:34 PM انا من المنشية عند الرياح التوفيقى skybaby 11-09-2009, 03:41 PM انا ان شاء الله معاكو في صيدلة الزقازيق وكنت عايزة اعرف الجدول حتى لو مش نزل عايزة بتاع السنة الي فاتت عشان اعرف اخر محاضرة اوسكشن بتبقى الساعة كام وعايزة اعرف هل حيبقى في دراسة يوم السبت ولا حيبقى اجازة لان في كلام في الموضوع ده اسفة جدااااااااااااا طولت عليك دكتور حس 11-09-2009, 09:22 PM انا ان شاء الله معاكو في صيدلة الزقازيق وكنت عايزة اعرف الجدول حتى لو مش نزل عايزة بتاع السنة الي فاتت عشان اعرف اخر محاضرة اوسكشن بتبقى الساعة كام وعايزة اعرف هل حيبقى في دراسة يوم السبت ولا حيبقى اجازة لان في كلام في الموضوع ده اسفة جدااااااااااااا طولت عليك بصى يا دكتورة انا هرد على اسئلتك وان شاء الله الموضوع لما اعمله هتعرفى كل حاجة بالتفصيل ان شاء الله الجدول بتاع السنة دى لسه منزلشى لو عايزة الجدول بتاعنا السنة اللى فاتت اوك كان اول يوم فى الدراسة الاحد..محاضرة صيدلانيات(1) من9 الى 10:40 وبعدين محاضرة عضوية(1) من 10:40 الى 11:30 وفى نفس اليوم محاضرة صيدلانيات (2) يعنى الاعادة من 11:30الى 1:10 ومحاضرة عضوية (2) الاعادة برضو من1:10الى2 الاثنين ...محاضرة عضوية (2) من 9الى 10:40 وبعدين محاضرة لغة (2) من 10:40 الى 11:30 ومحاضرة كيمياء فيزيائية (1) من 11:30الى1:10 وبعدين محاضرة لغة (1) الاعادة من 1:10 الى2 الثلاثاء..محاضرة عضوية (1) الاعادة بتاعة يوم الاثنين من 9الى 10:40 وبعديها محاضرة تحليلية (1)من 10ك40 الى 11:30 ثم محاضرة فيزيائية (2) الاعادة بتاعة يوم الاثنين من 11:30الى 1:10 وبعدين محاضرة كيمياء تحليلية (2) الاعادة من 1:10 الى 2 الاربعاء...يوم سهل شوية فى المحاضرات محاضرة عقاقير (2)من 9 الى10:40 وبعديها محاضرة كيمياء عامة(2) من 10:40الى11:30 ثم محاضرة عقاقير(1) الاعادة من 11:30 الى 1:10 ثم اخيرا محاضرة الكيمياء العامة (1) الاعادة من 1:10 الى 2 الخميس ...محاضرة عقاقير(1) من 9 الى 9:50 وممكن تطول حسب مزاج الدكتور لان بعديها مفيش محاضرات خالص ثم الاعادة من 11:30الى 12:20 بصراحة الجدول تعبنى لانى دورت عليه لانى مكنتش عارف مكانه ( هههههههههه معلشى بقى الورق كتير مش صيدلة بقى !!!! بس ياريت تفهميه وعموما 1 و2 لان الدفعة هتتقسم مجموعتين على فكرة الجدول فى سكاشن بس مينفعشى احطها لان المعيدين هيضبطوها معاكم المواعيد عشان الناس اللى بتسافر واسباب كدا هتعرفوها المهم ياريت يكون الجدول كويس بالنسبة لموضوع يوم السبت حتى الان الدراسة يوم السبت بنسبة 100 % ولو فى تغييير انا هقولكم انا معاكم طول السنة لاى استفسار واى خدمة وسلامى ليكى ولكل اللى داخلين وانتظرى الموضوع لانه هيقولكم على كل حاجة عن الكلية موضوع طوييييييييييييل بس جميييييييييييييل http://www.thanwya.com/vb/life/icons/icon16.gif محمد السيد طلبة 11-09-2009, 09:37 PM شكرااااااااا يا دكتور حس يا ريت أول مجدول أعدادي ينزل ترفعه على المنتدى علشان نعرف حنمشي في السنه الكبيسه دي أزاي skybaby 11-09-2009, 09:37 PM شكرا على الرد والافادة انا فاهمة الجدول نسبيا بس عايزة افهم ايه موضوع الاعادة ده يعني كل واحد يروح في الميعاد الي على مزاجه ولا ايه وعايزة اعرف يعني السكاشن بتبقى متاخرة لحد السعة كام تقريبا عشان السكن وكدة دكتور حس 11-09-2009, 09:48 PM ياللى داخل صيدلة الزقازيق .. هنعرفك كل حاجة فيها يا دكتور يا اللى دخلت الزقازيق هتشوف اجمل سنين عمرك وممكن تكون اسود ( بعد الشر طبعا) وده انت اللى تحدده طبعا نبدا يا معلم الموضوع بتاعنا ( او يا دكتورة عشان متزعليش من كلمة معلم دى ) السلام عليكم ورحمة الله وبركاته حبيبي ياللي لسة مخلص ثانوية عامة مبروك علي النتيجة اللى محدش عرف يجيبها غيرك وكمان دخلت صيدلة الزقازيق ؟؟؟؟ دا انت معدى يا معلم (واد مخلص) (او بنت جايبة من الاخر ) مبروك كمان مرة علي الكلية الجميلة دى هنا اسال انا هجاوبك على كل حاجة ان شاء الله اسال عن اي حاجة في الكليه وانا هقولك رغم انى بقالى سنة واحدة بس لفيت كتييييييييير (اصلى لفاف قديم ) وحفظت الزقازيق وخصوصا القومية (متركزشى عشان متهيسشى ) لحد لما انت تسال اللى انت عايز تساله انا هقولك شوية حاجات كدا خفيفة ( بس مش اوى يعنى !!! ) زى نظام الكلية _مكان الكلية _اقسام الكلية _مجالا العمل بعد التخرج (ده ان اتخرجت اصلا ) ( انا بهذر ان شاء الله تبقى من الاوائل بس مش للدرجة دى برضو ) هههههههههههههههههههههههههههههههههههههههههههههههههه هههههههههههههه اضحك وفرفش كدا ومتبقاش معقد من اولها وعيش اللحظة وكامان ياعم هعملك تعريف للمواد اللى عندك الترم الاول كلها المشاركة الجاية بقى لازم اذلكم شوية ( بهذر ) انا على طول بهذر بس ساعة الجد جد عشان الموضوع تعبنى اوى !!!! محمد السيد طلبة 11-09-2009, 09:54 PM هههههههههههههههههههه صباح الروئان يا معلم القوميه كمان ده أنت رايق بئا يا عم مش تئول من الأول كده ده مبئاش منتدى ده بئا قهوه مفتوحه دكتور حس 11-09-2009, 09:56 PM شكرا على الرد والافادة انا فاهمة الجدول نسبيا بس عايزة افهم ايه موضوع الاعادة ده يعني كل واحد يروح في الميعاد الي على مزاجه ولا ايه وعايزة اعرف يعني السكاشن بتبقى متاخرة لحد السعة كام تقريبا عشان السكن وكدة بصى الكلية بتبقى فى حدود 1200 طالب دفعتنا كانت كدا 1200 طالب بيقسموكم مجموعة 1 ودى بتشمل سكاشن a و b و c ومجموعة 2 ودى تشمل سكاشن d و e و f مثلا السكشن a كمثال بيبقى فيه حوالى مثلا 200 طالب منهم 100 واحد فى مجموعة 1 و100 فى مجموعة 2 والمجموعة 1 لها اسبوع فى سكاشن واسبوع لا والاسبوع اللى مفهوش المجموعة 2بيبقى عليها سكاشن يعنى الخلاصة انتى فى اسبوع هتلبسى فيه البالطو واسبوع لا وهكذا بس طبعا انتى كبنت بتجيبى معاكى البالطو كل يوم ( ههههههههههههههههه) وعلى فكرة المعيد اول يوم قالنا طبعا عارفين هتلبسوا بالطوا وفرحانين وخصوصا البنات لانه بيليق عليهم اوى اكتر من الولاد المهم انتى يوم ما تتاخرى فى الكلية هتخلصى الساعة 2 ونص هو انتى هتسافرى ؟؟؟؟؟؟ انت من الزقازيق ؟ ولا منين ؟؟؟؟؟ دكتور حس 11-09-2009, 10:00 PM هههههههههههههههههههه صباح الروئان يا معلم القوميه كمان ده أنت رايق بئا يا عم مش تئول من الأول كده ده مبئاش منتدى ده بئا قهوه مفتوحه هههههههههههههه ايه ياعم انت فهمت غلط ولا ايه انا كنت باخد قرص عضوية هنااااااااااك هو انت من الزقازيق وان شاء الله سنة حلوة علينا كلنا وانتظر بقى بقية الموضوع وسيبك من القومية دلوقتى http://www.thanwya.com/vb/life/icons/icon16.gif دكتور حس 11-09-2009, 10:05 PM شكرااااااااا يا دكتور حس يا ريت أول مجدول أعدادي ينزل ترفعه على المنتدى علشان نعرف حنمشي في السنه الكبيسه دي أزاي على فكرة مفيش حاجة اسمها جدول اعدادى لان النظام فى الزقازيق بقى نظام حديث من 4 سنين يعنى انت مثلا لو لسه داخل تبقى اسمك فى سنة اولى حديث وانا فى تانية حديث وهكذااااااااا وعوما لما ينزل هرفعه لكم محمد السيد طلبة 11-09-2009, 10:05 PM قرص عضويه ههههههههههه أشك في كلمه عضويه دي skybaby 11-09-2009, 10:08 PM شكراااااااااااااااااااااااااااااا وياريت تكمل الموضوع هو انتى هتسافرى ؟؟؟؟؟؟ ان شاء الله حاسافر دكتور حس 11-09-2009, 10:11 PM نبدا يا دكاترة بقى موضوعنا ( اتعودوا بقى على كلمة دكتور ) ( والله وكبرت وبقى ليك برستيج ) مكان الكلية موجودة عند مستشفى الجامعة لو حضرتك بتركب سرفيس أو mcv من الزراعة او المحطة قدامك مكانين تنزل فيهم يا اما تنزل مستشفى الجامعة وهنا هتمشى شارع المستشفى وتعدى على طب وبعديت تدخل صيدلة من تحت السلسة اللى رابطين البوابة بيها -من سنتين مش عايزين يشيلوها- ( لما تروح هتشوفها ) ( كل يوم هتوطى من تحتها ) * او تنزل كمبيوتر قول للتباع اللى مع السواق نزلنى عند كومبيوتر وهو هينزلك ودى الباب الرئيسى لدخول الجامعة من ناحية وانت جاى من المحطة ودى تقريبا تعتبر بوابة صيدلة لأنك هتنزل جنب مبنى المعامل على طول اوعوا تتوهوا.. لو حضرتك بقى من اللى بيركبوا تاكسى (يابختك) "ايموشن عينيه مدوّرة" ممكن تعمل فيها دُقرُم وتخليه يدخلك لحد جوة الكلية "عربية دادى" وانتظروا الباقى كدا خلصنا المكان !!!!!!!!!! دكتور حس 11-09-2009, 10:25 PM موقع الكلية الكلية تطل من جهة علي كلية العلوم "بيننا وبينهم ملعب الكورة بتاعنا" هتلاقى لعب الكورة شغال فيه طول السنة الجهة الاخري مستشفي الجامعة ومكتب المعلومات والتوثيق "اللى هوة الكمبيوتر اللى نزلت عنده" لما كنت راكب التاكسى بتاع دادى فاكره ؟؟؟ والله شكلك تهت وهتودينا فى داهية..........هههههههههههههه الثالثه كلية الطب الرابعه الطريق الرئيسى للجامعة و البحر "هيه أصلاً ترعة" لما سالت اصحابى من الزقازيق قالولى انه بحر مويس أسئلة؟؟؟؟ ايه المواد ؟؟؟ اذاكرها منين """؟؟ هناخد ايه فيها ؟؟ مجموعاتها ؟؟ تقديراتها ( ازاي امتياز وازاي جيد جدا ) ؟؟ بتعتمد علي الحفظ ولا الفهم ؟؟ يعني ايه سكاشن ؟؟ ايه جو المحاضرات ؟؟ احضرر ولا انفض ؟"؟ لي كام سكشن غياب ؟؟ يعني ايه معيد ودكتور واستاذ مادة ورئيس قسم ؟؟ هقولك والله من غير ما تسال !!!!!!! ايه المواد ؟؟؟ فى سنة اولى عندكم المواد كالتالى كيمياءعضوية organic كيمياء تحليلية analytical كيمياء فيزيائية وعامة physical & general صيدلانيات pharmacutics عقاقير pharmacognosy وطبعا اللغة مادة كدا هتحضر فيها بتاع محارة او اتنين بالكتير الا لو انت بقى من اللى مش بيفوتوا حاجة وعموما هى مش بتضاف فى اخر خمس سنين بس بتضاف فى اولى كدا بس عشان التفدير ده الترم الأول العقاقير والكيمياء الفيزيائية والعامة منتهية ترم أول باقى المواد مكملة للترم التانى وده معناه ان العقاقير والكيمياء العامة والفيزيائية لازم تتذاكر من اول مرة وتنجح فيها وتجيب تقدير كمان باقى المواد لو ماحصلش نصيب فى الترم الأول هيكون فيه فرصة للتعويض فى التانى اذاكرها منين """؟؟ حلو السؤال ده مين الشطّور اللى سأله نذاكر منين؟؟ المفروض اننا هنشترى الكتب كلها ..مش عشان نذاكر منها لا عشان كتاب العملى تمام؟؟ تمام ^_^ دلوقتى بقى هنشترى ورق نذاكر منه بتكون نفس المحاضرات اللى بتاخدوها بس واحد شاطر كدة بيكتبها وبينزلها فى مكتبة أشهر المكتبات بالنسبة لطلبة حديث الشروق وبعدين الرواد بتناغشها من بعيد فى الصيدلانيات والعقاقير صراحة انا الترم الاول ذاكرت من الورق ده جبت جيد جدا الترم التانى ذاكرت من المحاضرات اللى انا بكتبها بايدى جبت امتياز الترم التانى الحمد لله والمحصلة الحمد لله جيد جدا 80% الباقى جااااااااى فى الطريق !!! دكتور حس 11-09-2009, 10:35 PM هناخد ايه فيها ؟؟ الكيمياء العضوية ببساطة بتتكلم عن تركيب المركبات العضوية وخواصها وتحضيرها وتفاعلاتها "فصل العضوية بتاع كيميا ثانوى" بس على اوسع بمراحل مادة ممتعة بجد بس عايزة مجهود كبير العقاقير بتتكلم عن النباتات الطبية والمواد الفعالة اللى فيها وازاى نستخرجها واستخداماتها واجزاء النبات واجزاء كل جزء فى النبات وحاجات كتيييييير مادة مفيدة بس تتذاكر من اول يوم انا قلت اهه الصيدلانيات وانتو بتذاكروها هتحسوا انكم فى كلية صيدلة شوية ومعاملها بتزود الإحساس ده طرق تصنيع المنتجات الدوائية وانواعها واستخداماتها والاشكال الصيدلانية المختلفة مادة لذيذة انا عن نفسى بعتبر نفسى فاشل عشان جبت جيد جدا فقط وفرقت درجة واحدة على الامتياز بس قدر الله ما شاء فعل الكيميا الفيزيائية والعامة الكيميا العامة تقريبا اللى اختوها فى ثانوى مع فارق بسيط الدراسة بالانجليزى بس الكيميا الفيزيائية لو تفتكروا فصل الحرارة اللى كان فى الفيزياء بس طبعا فى حاجات زيادة اول مرة تشوفوها والمادة دى سهلة السنة اللى كانت قبلنا ( قبل اللى فاتت ) كان اكتر من نص الدفعة امتياز السنة بتاعتنا نص الفعة شايلاها لامتحان كان صعب جدا جدا جدا الدكتور هشام هو اللى حطه وهو اللى كان بيدينا وكان امتحان بصراحة ( كفاية عشان متتشائموش بس والله المادة سهلة ) وعموما احنا اللى مكناش بنذاكر التحليلية مادة ظريفة جدا جدا جدا سهلة بتتكلم فى الترم الاول عن تحليل الكاتيونات نسهل يعنى الحاجات الموجبة زى الصوديوم والبوتاسيوم وحاجات تانية كدة ازاى نفصل مخلوط فيه حاجات من دى عن طريق الوان او تفاعلات مختلفة هتعرفوها فى المعمل مجموعاتها ؟؟ بس هى دى المواد باختصااااااااار تقديراتها الكلية ( ازاي امتياز وازاي جيد جدا ) ؟؟ التقديرات "قال لسه فى سنة اولى وعايزين يعرفوا التقديرات" "ايه العيال دى؟" المهم عندنا فى الكلية او الكليات العملية كالصيدلة والطب والأسنان والعلاج والهندسة ...الخ الإمتياز >>>>> 85% جيد جدا>>>>75% جيد>>>>>>65% مقبول>>>>60% راسب بعيد عنكوا http://www.alltalaba.com/board/style_emoticons/default/smile.gifhttp://www.alltalaba.com/board/style_emoticons/default/smile.gif فيما تحت الــ 60% بتعتمد علي الحفظ ولا الفهم ؟؟ مفيش حاجة اسمها فهم او حفظ الاتنين هيمشوا مع بعض بس الحفظ هيغلب لأن الفهم لوحده مش كافى للاجابة فى الامتحان يعني ايه سكاشن ؟؟ جاء فى المعجم الحويييييط ان السكشن هو الدرس العملى الواجب حضوره والممنوع تركه والذى يتم فيه تطبيق المعلومة النظرية عملياً بسيطة اهه!! ايه جو المحاضرات ؟؟ جو المحاضرات فى الصيف حر وفى الشتا دفا هههههههههه المحاضرات حسب روح الدكتور وحسب قدرة كل واحد على التحمل فيه دكاترة كتير ممتعين وتحبوا انكم تحضرولهم وهتستمتعوا بجد بشرحهم ومعظم دكاترة سنة اولى كدة المشكلة بتكون فى ان عندنا فى صيدلة مفيش راحة بين المحاضرات ودى مشكلة مالهاش حل لحد دلوقتى احضرر ولا انفض ؟"؟ الطبيعى قوى انك هتحضر فكرة تنفض دى ماتفكرش فيها الا لما توصل سنة تالتة او رابعة لكن لازم تحضر عشان تعرف الكلية ماشية ازاى والدكاترة اسلوبهم ايه وبيشرحوا ايه والمواد بتتكلم عن ايه لا محدش ينفض لي كام سكشن غياب ؟؟ ههههههههه احنا بدأنا ؟؟ لو المادة سكاشنها كل اسبوع يبقى الاقصى 3 سكاشن وتحرم من الامتحان لو كل اسبوعين يبقى ليك شكشنين بس يعني ايه معيد ودكتور واستاذ مادة ورئيس قسم ؟؟ معيد يعنى لسه متخرج ورافع راس ماما وبابا وجايب تقدير ومرتب من العشرة او ال15 الأوائل بس دفعتنا مثلا هيعينوا اول 8 بس واكيد هيكونوا بنات ( هههههههه البنات متزعلشى دحيحة اوى اوى اوى ) انما احنا غلابة جدااااا ماتشات وبلاى استيشن وخروجات والخ الخ الخ ........... وكمان المعيد مشروع دكتور و المعيدين هما اللى بيشرحوا فى السكاشن ملحوظة: لو مفهمتش أى حاجة من المحاضرة ومعرفتش تسأل الدكتور او لسه راهب الموقف انك تروح تسأل الدكتور عليك بالمعيد هيفهمك كل حاجة ان شاء الله ملحوظة تانية: ماتصدقش الكلام ده!! مش كلهم^_^ دكتور ده يعنى معاه دكتوراه فى قسم معين من اقسام الكلية والدكاترة هما اللى بيشرحوا فى المحاضرات وهما برضوا اللى بيمتحنوا الشفوى وهمه برضة اللى بيحطوا الامتحان كل واحد بيحط سؤال الجزء اللى بيشرحه أستاذ المادة وهو المسئول عن الكورس اللى بيتدرسلك يعنى مثلا تلاقى فى قسم التحليلية استاذ المادة دكتور عبد الله شلبى وفى كل قسم بتاخد مادة هيكون استاذ المادة هوة اللى مسئول عن الصورة النهائية للامتحان دكتور حس 11-09-2009, 10:49 PM يعني ايه وكيل الكليه عندنا ف كليتنا فيه 3 وكلاء للكليه وكيل الكليه لشؤون البيئه أ.د. نبيلة نور الدين المراغى أستاذ الفارماكولوجى ومنصبها مسئول عن كل مايهم البيئة والمجتمع ويرتبط بالكلية وكيل الكليه لشؤون لدراسات العليا أ.د. عبد الله الشنوانى أستاذ الكيمياء الطبية مسئول عن كل ما يخص البحث العلمى وطالبى الماجستير والدكتوراة وكل مايهم مابعد البكالريوس وكيل الكليه لشؤون التعليم والطلاب أ.د. محمود عبد العال تقريباً اكتر حد هتسمعوا اسمه مسئول عن كل ما يخص الطلبة جدول المحاضرات وجدول الامتحان النشاط الطلابى العلاقات بين الطلبة والدكاترة حتى التجويل من سكشن للتانى لازم موافقته عميد الكليه أ.د. محمد نجيب زكريا أستاذ الفارماكولوجى والسموم اعلى جهة فى الكلية لو عندك مشكلة وغلبت خالص مفيش حل هيبقى عليك وع العميد لكن فى الحاجات البسيطة مش هتحتاج توصل هناك شئون الطلبة مكتب شئون الطلبة الفرقة الأول حديث اول مابتدخل من بوابة مبنى الادارة على ايدك الشمال اخر مكتب فى الطرقة هناك كل حاجة من اول تسليم الملف والمصاريف "بتاخد اذن دفع وتدفع فى الخزنةفى الدور التانى" والكارنيه لما ربنا يريد فى شهر 11 او 12 وكل معاملاتك الورقية والادارية فى المكتب ده الختم بس فى المكتب التانى قدام بوابة الكلية على طول رعاية الشباب المكتب المسئول عن ممارسة النشاط لو ليك فى اى هواية هتدخل المكتب ده فى الدور الارضى جنب شئون الطلبة هتلاقى على كل مكتب موظف مسئول عن نشاط الفنى الثقافى الاجتماعى العلوم الرياضى الجوالة والريس الكبير بتاعهم ........ قاعد هناك طول النهار .................................................. .................................................. ............................................ السؤال طلبة اولى حديث هتبقى محاضراتهم فيـــــــــــــــــــــن؟؟ والاجابة هتبقى محاضراتهم فى مدرج د.طلبة عويضة فى قسم علوم رياضة بكلية العلوم سؤال وجيه تانى طب ليه مش فى صيدلة الاجابة أوجه عشان الكلية السنة الجاية هيكون فيها 11 دفعة والمدرجات مش سايعة المهم مدرج طلبة عويضة ده نروحه ازاى -- فاكرين وصفة السرفيس وال MCV حاجة من اتنين لو انتة جاى ع المحاضرات على طول يبقى تنزل عند بوابة اداب وتدخل م البوابة وتمسك يمينك وتعدّ ادى مبنى هندسة ادى التانى المبنى التالت بعد ماتخلص هندسة تدخل وتطلع الدور التانى اخر الطرقة انما لو انتة فى الكلية فى صيدلة يعنى ماتوجعش دماغى واسأل اى حد هيشاورلك ع الطريق *** دلوقتى بقى هنتكلم عن اقسام الكلية وترتيبهم فى مبنى المعامل الدور الارضى من على الشارع الرئيسى البوابة قدامك دخلت على شمالك قسم الكيمياء الطبية مش هتتعاملوا معاه الا فى سنة رابعة وقتها هتعرفوا .. ** على اليمين قسم الكيمياء العضوية المعامل بتاعته صحيح قديمة بس ممتعة هتتلونوا وهدومكم هتتظبط بالH2So4 ********** نطلع الدور التانى المُهدّم حالياً على الشمال كيمياء تحليلية وعلى اليمين عقاقير معرفش هيكمل الشغل فيهم على اول السنة ولا هتشتغلوا فى معامل علوم واعتقد معامل علووووووووووم بنسبة 99% لان المعامل الجديدة كنت فى الكلية من يومين ولسه مخلصتش خالص الدور الثالث المفتوح على التانى نفس الكلام مهدّم الشمال معامل الفارما اليمين معامل كيمياء العقاقير او الفيتو الدور الرابع الشمال وخليكم دايما فى الشمال قسم الكيميا الحيوية اليمين بقى الناس اللى اكبر منى قالولى عارفين الاحتلال الاسرائيلى لغزة القسم ده بيتضرب زى غزة بالظبط قسم الميكرو بتدخل تتضرب وتطلع لا لا لا لا ماتفكرش انك بتطلع منه من اول مرة هع هع هع هع كان غيرك اشطر لازم تفضل مآنس فيه شوية وانتة وشطارتك بقى سنة اتنين تلاتة ماتحاولش تزوّد هاه كفاية كدة النهاردة وانا مش هكتب حاجة تانى بس انا معاكم مش هخرج من المنتدى لو فى اى استفساااااااااااااااااار انا موجود mido125 11-09-2009, 11:46 PM ايه ياعم حسام الشغل الجامد ده ممكن اضيفك عندى ؟ دكتور حس 11-09-2009, 11:49 PM ايه ياعم حسام الشغل الجامد ده ممكن اضيفك عندى ؟ طبعا بكل سرور انا كاتب ايميلى فى المشاركة اللى فاتت انا منتظر الاضافة بتعاعتك عشان هقف الايميل كمان ربع ساعة كدا اوك محمد محيسن 12-09-2009, 01:12 AM قشطة يا ريس ايوه كده خليهم يعرفوا كليتنا اكتر واكتر معاك محمد محيسن من نفس دفعتك ورايح تانية ان شاء الله دكتور حس 12-09-2009, 03:09 AM قشطة يا ريس ايوه كده خليهم يعرفوا كليتنا اكتر واكتر معاك محمد محيسن من نفس دفعتك ورايح تانية ان شاء الله اهلا بيك يا دكتور ان شاء اله نبقى اصدقاء على طول ونتقابل قريبا فى الكلية ان شاء الله http://www.thanwya.com/vb/life/icons/icon14.gif Dr.KaJoo 12-09-2009, 04:05 AM دكتر حس شكرا على الكلام الجامد ده و الشرح الجميل ده بس كتابة الايميل دى مخالفه ممكن تتوقف دكتور حس 12-09-2009, 04:17 AM دكتر حس شكرا على الكلام الجامد ده و الشرح الجميل ده بس كتابة الايميل دى مخالفه ممكن تتوقف ههههههههههههههههه انا شيلته مش من اولها اتوقف وشكرا على الملاحظة الجميلة دى سلام عشان نصلى الفجر بقى |