دخـلت حـآسبـآت .. ليـه بيـضحكـو عليـك ؟؟ [الأرشيف]

BêDô ΜâśĦâĶëL

23-09-2009, 03:26 AM

السـلام عليـكم

دخـلت إيـه ؟
حـآسبـآت إن شـآء اللـه
هههههههههههههههههههههههههه طيب ربنا معاك يبني

طبعا الكلام ده ناس كتير سمعتو
وطبعا كل واحد بيضحك عليك بيكون مقتنع ان انت هتتخرج ان شاء الله من حاسبات هتقعد جنبه ع القهوة
بس ايه مشكله الشعب المصرى مع كليه الحاسبات
مشكلتنا الحقيقية ان الناس متعرفش دى كليه ايه اساسا
كل اللى بيسمعها يفتكرنا هنتخرج عشان نقف ف سيبر او عشان نعرف العيال تلعب جيمز ازاى

ماهو اساسا لو الناس تعرف دى كليه ايه كان زمانهم بيتخانقو مع عيالهم عشان يدخلوها
لان لو الواحد بص ف اول حاجة قدامه وهى بيته هيلاقى اى حاجة ف وشة محتاجة برمجة
طب مين اللى بيبرمج الحاجة دى ؟؟ العفريت صح ؟

وبعدين الكلام ده دلوقتى بس
امال كمان كام سنة لما كل حاجة هتبقي بالكمبيوتر ؟؟

الكل عندى بيقول انى مجنون عشان سبت هندسة عن حاسبات مع انى شايف ان حاسبات متقلش ف الاهمية عن هندسة البترول
طب البترول وكلها كام سنة ويخلص :d
بس البركة ف الحديد بقا :d

انما البرمجة دى مجالها مش محدود
هتلاقى مكانتك ف كل حته

اوعى ف يوم تزعل من كلمة حاسبات دى
ده انت تفخر بيها
بس قول ربنا يهدى الناس وتفتح ودانها بس وتعرف هى بتتكلم عن ايه
ده فيه ناس فاكره اننا بنتخرج محاسبين
صباح الفـل عليكو كلكو واتمنى انى مكونش طولت

BaNZeR

23-09-2009, 03:45 AM

انا واحد داخل هندسة بس كنت محتار بين هندسة وحاسبات
مدخلتش هندسة عشان حاسبات وحشة
لكن عشان انا كان هدفي من زمان هندسة اصلاً

ببساطة حاسبات ده جديدة
وبالنسبة للجيل القديم الكلية ده مش معروفه
فبالتالي محدش حيعرف قيمتها

اللى يقولك ليه يابني دخلت حاسبات
وربنا معاك
وربنا يسهلك
وحاجات تحسسك إنك عملت حاجة غلط كده :d

بس هي حاجة واحدة حقولهالكو

رسول الانسانية اللى كل كلامه من كلام ربنا الناس علقت عليه وقالت عليه ساحر ومجنون

يبقى انت مستحيل تعمل حاجة صح او غلط والناس متتكلمش عنها
يعني من الآخر
نفض لكلام الناس وطبق نظرية
نفض تعش تنتعش

المهم تكون واثق انت من اختيارك وبس

eng/el doktor

23-09-2009, 03:50 AM

صباح النور يا بشمهندس
سيبك من القيل والقال هو يعنى اللى بيضحك ده هيأكلك عيش
م الآخر إعقلها وتوكل
كل عام وأنتم بخير
وإبتسم فأنت ف مصر

Moky

23-09-2009, 07:21 AM

سيبك من كلام الناس
لان الناس لازم تقول أي كلمة تعقدك في الكلية اللي أنت دخلها وخلاص
كأنه حرام يعنى أنك تبقى مبسوط بكليتك :bosyht9:
الناس بتتريق على كل الكليات مش حاسبات بس
ومطلعين عيوب في كل الكليات :angry2:
كل كلية ليها لقب تريقة خاص بيها
مش مهم الناس رأيهم أيه في كليتك المهم رأيك أنت أيه
وحتى الشغل وكده بيقعدوا يقولوا لو دخلت الكلية دي مش حتلاقي شغل
ما فيش أي كلية لقيت الكل متفق أنك حتلاقي شغل
كل أصحابي على أختلاف الكليات اللي دخلوهاسمعوا شتية في الكلية اللي مخترينها
بس قول ربنا يهدى الناس وتفتح ودانها بس وتعرف هى بتتكلم عن ايه
المشكلة أن الناس أحيانا بتبقى عارفة بس بتشتم برضه في الكلية وبعد ما يخلصوا شتيمة يقولوا بس هيه برضه كلية كويسة وكده وده على كل الكليات
هوه أنا صحيح مش حاسبات بس المشكلة دي في كل الكليات:frown:
بجد بقت حاجة تزهق

Eng. Alios

23-09-2009, 07:50 AM

جزاك الله كل خير على الكلام الجميل دا ...

و فعلاً

اللي دخل هندسة بيتريقوا عليه لو دخل اي قسم ضعيف زي غزل و نسيج كدا ...
و اللي دخل بترول قريب ح يتريقوا عليه , لان في اربع اقسام في بترول الخريجين بتوعهم مبيشتغلوش و بيقعدوا في البيت إلا لو تميزوا ....
و اللي دخل فنون عمارة ( زي حالاتي ) ح ياخد تريقة لأنها برضه كلية مش معروفة رغم إنها أول كلية في مصر منذ قديم الأزل يعني .... و هيا أصلاً طبق الأصل من هندسة عمارة ...
و اللي دخل حاسبات و معلومات ح تلاقي اللي يقول له : ح تطلع مدرس كمبيوتر , و اللي يقول : ح تطلع بياع بليلة .... رغم إنها أجمد كلية في مصر و بتطلع صفوة المجتمع : مبرمجين و مطورين !!
و اللي دخل علوم ... لا تعليق ...
و اللي دخل تجارة ... لا تعليق ...
و اللي و اللي و اللي ...

الناس مش عارفة هيا عايزة إيه ؟ .... تقدم و لا تخلف ؟

المهم كل واحد دلوقتي يحمد ربنا على اللي هوا فيه ...

منعرفش ربنا مخبي إيه بعد كدا ؟

جزاكم الله كل خير

eng/el doktor

23-09-2009, 02:53 PM

يا جماعه أعتقد إنكم جميعا عارفين قصة حجا وابنه .........
بجد اللى هيعمل زى حجا ويسمع لكلام الناس آخرته معروفه
والله لو صحب الناس جبريل ..ما سلم أحدهم من القال والقيل
لقد قيل ف الله أقاويل ملفقة ..فكيف إذا قيل فيك بعض ما قيل
بجد يا جماعه لا أنا ولا إنت ولا هو ولا هى ح نقدر نغير ثقافة 75 مليون راس يبقى خلاص
لقد أسمعت إذ ناديت حيا ..ولكن لا حياة لمن ينادى
ولو نار نفخت بها أضائت ..ولكن أنت تنفخ فى رماد
جزاكم الله خير

eng/el doktor

23-09-2009, 02:57 PM

وفعلا زى ما قال البشمهندس على
هتقول طب
هيقولك طب من بؤك
هتقول صيدله
هيقولك بياع نضيف
هتقول تجاره
هيقولك كلية الشعب
هتقول حقوق
هيقولك متر إلا ربع
هتقول حاسبات
هيقولك بتاع سيبر
هتقول مش داخل كليات
هيقولك فاشل ملكش ف التعليم
أدخل أى كليه وإثبت نفسك فيها
يا جماعه زى ما قولت وح قول
إبتسم فأنت فى مصر

eng.ahmed55

23-09-2009, 04:17 PM

السلام عليكم طبعا انا مع كل الاراء اللى اتقالت
بس اللى بيمشى ورا الناس مش بينفع
مش مهم تدخل كية ايه المهم تنجز فيها
والحمد لله احنا فى كلية الحاسبات والمعلومات
يعنى الانجاز فيها هيبقى اكتر
مش زى الاداب{انا مش بقلل منها}
انا بقول ان التميز مش بيكون اوى زى الكليات العلمى
يعنى الحمد لله ان احنا فى اجمد كلية فى مصر
ادخل وشوف على موقع الاستاذ على حاسبات عين شمس
شوف اد ايه لاحق بترول وهندسة
وبالرغم من كدا تحدى كل الناس ودخل حاسبات
لان مجالها الحمد لله كويس
دا فيه واحد جارنا بيشتغل مهندس قوى سافر السعودية بقاله شهر ومش لاقى لحد دلوقتى شغل
انا مش بقلل من الهندسة
لا ...الهندسة والحاسبات وصيدلة........الخ دى كليات القمة ودى اللى عاوزة ناس يطوروها
مش نحط ايدنا على خدنا ونقول احنا فى كلية قمة وفرحانين ان الناس بيقولولنا يا بشمهندس
لا اعرف انت عاوز ايه من الكلية لو عاوز لقب يبقى احسن متدخلش الكلية
لوعاوز تفوق يبقى ذاكر واجتهد فى عملك
وان شاء الله ربنا هيوفقك
اخر حاجة عاوز اقولها انك تحب الكلية اللى انت فيها حتى لو كانت اقل كلية فى التنسيق
حاول تثبت للناس انك حاجة محترمة
والله انا بحترم الدكتور حتى لو كان فى معهد فنى صحى
معلش طولت عليكوا بس الموضوع فعلا كان عاجبنى وشكرا للبشمهندس اللى كتبه وكل اللى تعب ورد على الموضوع

BêDô ΜâśĦâĶëL

23-09-2009, 04:30 PM

BêDô ΜâśĦâĶëL

23-09-2009, 04:32 PM

صباح النور يا بشمهندس
سيبك من القيل والقال هو يعنى اللى بيضحك ده هيأكلك عيش
م الآخر إعقلها وتوكل
كل عام وأنتم بخير
وإبتسم فأنت ف مصر

يا صباح الفل على عيونك
على فكرة انا اكتر واحد تتخيله ينفض لكلام الناس
عشان طوول مانا مقتنع بحاجة هى ف دماغى بس ده ميمنعش انى بتناقش مع الغير
شكرا ع الرد يا بشمهندس ونورت الموضوع :)

BêDô ΜâśĦâĶëL

23-09-2009, 04:35 PM

سيبك من كلام الناس
لان الناس لازم تقول أي كلمة تعقدك في الكلية اللي أنت دخلها وخلاص
كأنه حرام يعنى أنك تبقى مبسوط بكليتك :bosyht9:
الناس بتتريق على كل الكليات مش حاسبات بس
ومطلعين عيوب في كل الكليات :angry2:
كل كلية ليها لقب تريقة خاص بيها
مش مهم الناس رأيهم أيه في كليتك المهم رأيك أنت أيه
وحتى الشغل وكده بيقعدوا يقولوا لو دخلت الكلية دي مش حتلاقي شغل
ما فيش أي كلية لقيت الكل متفق أنك حتلاقي شغل
كل أصحابي على أختلاف الكليات اللي دخلوهاسمعوا شتية في الكلية اللي مخترينها

المشكلة أن الناس أحيانا بتبقى عارفة بس بتشتم برضه في الكلية وبعد ما يخلصوا شتيمة يقولوا بس هيه برضه كلية كويسة وكده وده على كل الكليات
هوه أنا صحيح مش حاسبات بس المشكلة دي في كل الكليات:frown:
بجد بقت حاجة تزهق

والله يا زميلي دى مشكلتنا كشعب وامنية حياتى بجد اننا نفكر قبل ما نتكلم ونعرف بنتكلم ف ايه
لان فيه ناس كتير ان مكانش معظمهم بيتكلمو عن حاجات ويحسسوك انهم خبراء فيها وهما اول مرة يسمعوها
شكرا ع الرد :)

BêDô ΜâśĦâĶëL

23-09-2009, 04:38 PM

BêDô ΜâśĦâĶëL

23-09-2009, 04:39 PM

BêDô ΜâśĦâĶëL

23-09-2009, 04:47 PM

dando-255

23-09-2009, 06:48 PM

بص اللى يقولك انت ف كلية ايه
قوللوا كومبيوتر سيينس
هينبهر لأنه مش هيفهم انت بتقوللوا ايه
زى بتوع تجارة اللى عاوزين يتمنظروا بيقولوا بيزنيس او ماركيتينج
انسى كلمة حاسبات و معلومات دى

فؤاد سليم

23-09-2009, 07:05 PM

بص اللى يقولك انت ف كلية ايه
قوللوا كومبيوتر سيينس
هينبهر لأنه مش هيفهم انت بتقوللوا ايه
زى بتوع تجارة اللى عاوزين يتمنظروا بيقولوا بيزنيس او ماركيتينج
انسى كلمة حاسبات و معلومات دى
بلاش تقول كلمة "كمبيوتر" أصلا ;)
قوللو Informatics and CS
مع العلم أنه CS يعنى Computer Science :p

eng/el doktor

23-09-2009, 07:24 PM

ادخل اى كليه واثبت نفسك فيها
فعلا كلامك ده بيدل ان عقليتك عالية جدا
شكرا ع الرد
ربنا يكرمك يا بشمهندس ويجزيك خير إنك فتحت ساحة الحوار ف الموضوع ده وكلامك مظبوط بس اللى يدخل أى كليه دا لازم يكون مؤمن بقدراته ويتحدى الأقاويل لانه ممكن ينهار نفسيا وممكن يحس إنه بلا هدف مما يؤثر على دراسته كليا وجزئيا
جزاك الله كل خير

BêDô ΜâśĦâĶëL

24-09-2009, 12:04 AM

وجزاك على ما فعلت يا بشمهندس :)

وبعدين احنا هنبص ع الاسامى ليه يا بشمهندسين
وانا شايف ان كلمة حاسبات دى مش وحشة وبالعكس ف نظرى انا الكلمة دى كبيرة اوى

eng.ahmed55

24-09-2009, 12:12 AM

انا شايف ان الموضوعات عن كلام الناس كترت اوى انتوا مدينهم مساحة كبيرة
بصوا كأن ولا حد قال حاجة
انتوا بس ردوا عليهم عما يعرفوا الكلية
وبعدين دلوقت مش هتعرف ترد عليهم اوى
الا لما تدخل الكلية وتتعرف اكتر والحمد لله انا مش بتاثر بكلام الناس
وان شاء الله الدراسة فاضلها اسبوع وتبدا انا شايف ان انا نبطل نتكلم عن الناس ونشوف مستقبلنا ونثبت نفسنا عشان نجبرهم انهم يقدرونا
انا بجد بشكرك يا بشمهندس على الموضوع دا وكل سنة وانت طيب

BêDô ΜâśĦâĶëL

24-09-2009, 12:20 AM

وإنت طيب يا احمد :)
وان شاء الله تبقي سنة بداية موفقة للكل ان شاء الله
وانا حاسس فعلا ان فى حاجة هتحصل قريب هتعرف الناس يعني ايه حاسبات ..
وبعدين جورج قال كلام الناس لا بيقدم ولا يأخر :d

eng/el doktor

24-09-2009, 03:05 AM

واحساسك إن شاء الله ف محله أكيد أكيد هتحصل الحاجه دى
غالبا غالبا هتبقى النقابه وإنشائها يؤدى لرفع تنسيق الكليه
وتنسيق الكليه بمثابة مقياس جودة الكليه لدى شعبنا المبجل
مما يؤدى لعودة الألسنه لجحورها
وتصحيح ثقافة الشعب والفكره الخاطئه
وهو أعظم إنتصار لنا جميعا:022yb4::022yb4::022yb4::022yb4:
إنتهت النشره
هنا القاااااااااااااهره

Eng. Alios

24-09-2009, 08:34 AM

BêDô ΜâśĦâĶëL

24-09-2009, 02:07 PM

يا جماعة المفروض انكم كطلبة حاسبات .... لازم تشاركوا في إنشاء النقابة ...

الموضوع نايم دلوقتي .... و الموضوع مش سهل ...

لازم تعملوا حاجة في الكلية علشان موضوع النقابة ده ...

و أنا معاكم في أي حاجة ح تعملوها ...

ما هو مش معقول يبقى في نقابة للتطبيقيين و نقابة للفنانين التشكليين و نقابة لعمال مترو الأنفاق و نقابة لسكك حديد مصر ... و يبقى مفيش نقابة لمهندسي البرمجيات ؟!!!!! ..... دا معقول .... الكلام دا معقول ؟!!

لازم نبذل اقصى جهد علشان النقابة

حاسبات عين شمس هى اللي فكرت في مشروع النقابة .... و احتمال يبقى في اعتصامات السنين اللي جاية , مادام مجلس الشعب مش باصصلنا ...

جزاكم الله كل خير

لا يا بشمهندس الموضوع مش نايم ولا حاجة
خلاص موضوع النقابة هيتناقش ف الدورة البرلمانية الجاية وانا نزلت الجدول بتاعهم مخصوص بس مسحته ومش فاكر كان امتى بس انا متأكد انى شوفت الموضوع
وفيه 3 احتمالات
اول حاجة انهم يناقشوه وبعد المناقشة يقرروا تخصيص ميزانية لانشاء نقابة لمهندسي البرمجيات وذلك لاهميتها
تانى حاجة انهم يناقشوه ويتأجل لعدم اهمية الموضوع ف الوقت الحالى
تالت حاجة انهم ممكن ينفضو ليه خالص عشان يناقشو حاجة اهم زى انفلونزا الخنازير مثلا
وفى الحالة التانية والتالتة هيبقي فيه اعتصامات بالعبيط
وربنا انا ناويلهم على نيه ملونة :d

متخافش احنا مش نايمين يا بشهمندس شوف انا لسه مدخلتش الكليه وناوى ادخل اعتصم ايزي :d

كلنا ايد واحدة يا رجالة :d

والف شكر يا باشا على الاهتمام

eng.ahmed55

24-09-2009, 03:20 PM

لا يا بشمهندس الموضوع مش نايم ولا حاجة
خلاص موضوع النقابة هيتناقش ف الدورة البرلمانية الجاية وانا نزلت الجدول بتاعهم مخصوص بس مسحته ومش فاكر كان امتى بس انا متأكد انى شوفت الموضوع
وفيه 3 احتمالات
اول حاجة انهم يناقشوه وبعد المناقشة يقرروا تخصيص ميزانية لانشاء نقابة لمهندسي البرمجيات وذلك لاهميتها
تانى حاجة انهم يناقشوه ويتأجل لعدم اهمية الموضوع ف الوقت الحالى
تالت حاجة انهم ممكن ينفضو ليه خالص عشان يناقشو حاجة اهم زى انفلونزا الخنازير مثلا
وفى الحالة التانية والتالتة هيبقي فيه اعتصامات بالعبيط
وربنا انا ناويلهم على نيه ملونة :d

متخافش احنا مش نايمين يا بشهمندس شوف انا لسه مدخلتش الكليه وناوى ادخل اعتصم ايزي :d

كلنا ايد واحدة يا رجالة :d

والف شكر يا باشا على الاهتمام
وانا معاك يا بشمهندس عبد الله
بس ايه الحلاوة دى اعتصامات ونية ملونة
ايوة كدا لعلعها يا برنس

BaNZeR

25-09-2009, 01:33 PM

اضحكو بموقف حصل لواحد

دكتور الفيزيا وهو داخل اول محاضرة لبتوع حاسبات

قالهم
اوعى تكونو فاكرين إنكو داخلين كلية الحاسبات والمعلومات
انتو داخلين كلية علوم الحاسبات والمعلومات

BêDô ΜâśĦâĶëL

25-09-2009, 01:33 PM

وانا معاك يا بشمهندس عبد الله
بس ايه الحلاوة دى اعتصامات ونية ملونة
ايوة كدا لعلعها يا برنس
جمد قلبك انت بس وتعالى بس ابقي هات بطاقتك معاك :d

eng/el doktor

25-09-2009, 06:10 PM

يا اخوانا صلو ع النبى
كده فيها س
و ج
و ن كمان
ولا حقا
ط
ر
د

BêDô ΜâśĦâĶëL

25-09-2009, 11:01 PM

يا اخوانا صلو ع النبى
كده فيها س
و ج
و ن كمان
ولا حقا
ط
ر
د

ايه يا عم حد قالك ان احنا هنفجر الكليه
دى حاجة بتبقي منظمة يا بشمهندس ومش بنضرب الامن ولا بنجرى منهم :)

dando-255

25-09-2009, 11:08 PM

وماله يا شباب
نعتصم
هما مبيجوش غير بكدا دلوقتى

BêDô ΜâśĦâĶëL

25-09-2009, 11:19 PM

وماله يا شباب
نعتصم
هما مبيجوش غير بكدا دلوقتى

يعم واحنا نسبق بالكلام ليه
كلنا نستنى كلمة مجلس الشعب ف الدورة الجاية ..
بس قول يا رب يناقشوه ومينفضوش
بعد كدا نقرر وننظم كلنا مع بعض اللى هيتعمل

انت ف حاسبات ايه يا معلم ؟؟

dando-255

26-09-2009, 01:45 AM

يعم واحنا نسبق بالكلام ليه
كلنا نستنى كلمة مجلس الشعب ف الدورة الجاية ..
بس قول يا رب يناقشوه ومينفضوش
بعد كدا نقرر وننظم كلنا مع بعض اللى هيتعمل

انت ف حاسبات ايه يا معلم ؟؟

انا عين شمس
و انت ؟

ahmed osman 2010

26-09-2009, 10:20 AM

حتى لو دخلت طمبوسكو قسم لحام
اجتهد فيها وعيش مع اللحام يامعلم
وانا مستعد اعتصم معاكو مع انى لسه فى تانيه ثانوى
بلاد اعتصامات صحيح
وعلى راى احمد حلمى
هى البلد دى مش الا كده

BêDô ΜâśĦâĶëL

26-09-2009, 08:38 PM

انا عين شمس
و انت ؟

حاسبات الزقازيق :)
تشرفت بمعرفتك :)

احمد هيشو

14-10-2009, 02:38 PM

انا معاكم في اللي بتقولوه المفروض يبقي في نقابه لينا اخوكم احمد حاسبات القاهره

E/GOGO

25-10-2009, 06:34 PM

والله ياجماعة كلمكم جميييييييييل جدا
وفعلا التنفيض احسن حاجة
هى ان شاء الله بعد انشاء النقابة
وكام سنه كدة على ما الناس يعرفو التكنولوجيا وتتقدم فى مصر
حاسبات هتاخد 99
ويعرفوا قيمتها
ملحوقة

kareem584

16-11-2009, 08:49 PM

بصراحة يا جماعة الموضوع إلي بتتكلموا فيه ده جميل جدا وكنت عايز أقول رأيي فيه
بس الأول عايز أعرف السنة إلي فاتت حاسبات ومعلومات أخدت من كام يعني كام في التنسيق
وجزاكم الله كل خير
كريم

shokoko2010

25-01-2010, 03:21 AM

ايه يا جماعة انتو زعلانين ليه ده كلية طب اللى كل الناس بتتخانق عليها بيقعدوا يقولوا لا متدخلهاش أصلها صعبة ويقولو للبنات لا اللى بيدخل طب مبيتجوزش يا جماعة أنا هدخل كلية حاسبات رغم أنف الجميييع

shokoko2010

25-01-2010, 03:23 AM

وعايز أسال سؤال هى الدورة البرلمانية الجاية دى امتى

أحمد الزنارى

26-06-2010, 08:15 PM

انا فى تانية ثانوى و مستنى النتيجة
نفسى ادخل حاسبات
و الى يتريق يتريق
لانى مقتنع بالكلية دى جدا و حاسس انى هابدع فيها
نفسى المجموع بتاعى يجيبها بس
ربنا يسهل

cara david

10-07-2010, 08:16 AM

eng.ahmed66

11-07-2010, 01:09 AM

بسمع كتير علي ان الكلية اي كلام وملهاش لازمة و كلام فاضي ذي دا بس بجد انا نفسي ادخلها لانها بجد هي المستقبل و اكتر حاجة مواكبة للعصر ! بس كان عندي كام سؤال هو لازم قبل ماندخلها نكون عارفين كام لغة برمجة كدة ع الماشي ولا مش مهم و كدة كدة بتتاخد ف الكلية ؟!؟؟! و هو في صحيح امتحان قدرات ليها قبل ماندخلها ؟؟ و هي بتقبل من كام ؟؟!!ا
عادى ممكن متكونش عارف ولا لغة ...انا كنت رايح الكلية وانا معرفش اى لغة برمجة ....ممكن بعد ما تدخل وتعرف النظام وتتعرف على النظام تختار لغة البرمجة اللى انت عاوزها ...والكلية طبعا بديلك اكتر لغات البرمجة بس طبعا مش بتديلك كل حاجة ...لازم انت تطور نفسك
مفيش امتحان قدرات ولا حاجة بتدخلها عادى خالص حسب المجموع
2009 ....92.3%
2008....90.2%
2007...93.1%
2006....92%
وان شاء الله تدخلها ..وربنا يوفقك

م/محمد يسرى

11-07-2010, 08:30 PM

نصيحة لأى حد ناوى يخش هندسة قسم حاسبات...... مش لازم تقعد 3 سنين تاخد رسم هندسى واليكترونكس وورش علشان تبقى مهندس حاسبات..... خش كلية حاسبات على طول وسيبك من اللى يقولك اربع سنين و الكلام الفاضى ده

eng.ahmed66

11-07-2010, 09:12 PM

ALaa M G

21-07-2010, 08:11 AM

أنا هدخل حاسبات وكان قدامي علوم وصيدلة لكن رغم كدا هدخل حاسبات وهذاكر في سنة اولي في الكلية رياضة 2 كامتحان معادلة رغم ان ناس كتير قالوا عليا مجنونة وغبية بس بكرة وبعده هيشوفوا مين هو اللي مجنون وبعدين طب مبقيش ليه قيمة علشان تقدر تفتح عيادة مش اقل من ماجستير والدكاتره بقوا علي قفا مين يشيل وبالطوابير ونصهم كمان لا يصلح وخدينها عافية
ورغم كدا بقول حاسبات مستقبلها افضل مليار مرة من طب وهندسة وبكرة وبعده لما تتعرف صح هتاخد اعلي مجموع كلية في مصر

!KIMO!

18-08-2011, 02:15 PM

انا الناس عماله تقولى انتا هتشتغل كده فى سيبر ,,,, بقولهم اه و بريح نفسى :d:d:006et4:

انا فعلا مكنت عايز هندسة بس ملحقتهاش بس الحمد لله بعد ما قريت عن الكليه دى عجبتنى اوى و حسيت انها ممتعة و هبقى مهندس برضه ( اما نعمل نقابتنا ) ان شاء الله :p

ان شاء الله ربنا يوفقنا كلنا و نبدع فى الكلية دى

و فى النهاية : مين هنا فى حلوااان :d

mohamed yhia

18-08-2011, 03:31 PM

amkmm

18-08-2011, 06:36 PM

الاول
كل سنة وانتم طيبين:d
الكلام فعلا بينطبق علي حالتي
نفس الكلام بيتقالي لما حد يقولي
قدمت ايه ؟ ولما اقولوه حاسبات بيزعل
لاعتقاده اني هابقي زي خريج المعهد (الفاشل)
انا مقتنع جدا بالكلية وان شاء الله هبذل فيها مجهود
وهارمي كلام الناس علشان عمره ما بيفيد
وشكرا لصاحب التوبيك ده فعلا عبر عن اللي جوانا

yami677

18-08-2011, 07:56 PM

انا معاكوا حاسبات حلوان

as.smsm

19-08-2011, 12:36 AM

yami677

19-08-2011, 12:48 AM

انا-بالعكس-يا-جماعه-كل-النااااااااااااس-شجعتنى-لانى-دخلت-حاسبات-وقالولى-انها-احسن-من-هندسه-واللى-مش-عاجبه-يعمل-اللى-هو-عايزه
خصوصا-اصحابى-وكلهم-بيندهولى-يابشمهندسه-عادى
بس-انا-مش-عارفه-اكتب-قبل-اسمى-<مهندسه>
ولا-هيتريقو-ويقولو-عايشه-الدور؟؟

ياااااااااااااه
اخيرا حد يشكر فينا
وبعدين اكتبي باشمهندسة براحتك
كل طلبة حاسبات مهندسين ......... واحسن مهندسين

انا بقي حصل معايا موقف
كنت رايح اطبع بطاقة الترشيح في السيبر
في واحد معرفوش .....مرحلة تالتة رايح يسجل رغباته
بيقولي دخلت ايه
قولتله حاسبات ومعلومات
راح قالي وليه تضيع فلوسك.......وراجل راح طالع يقولي كنت احسنلك تدخل معهد خدمة اجتماعية وتقعد سنتين
وتعمل معادلة وتدخل تجارة :frown::frown::frown::frown:
كنت عايز اديله باي حاجة
او علي الاقل اوريله المجموع اخرسه

as.smsm

19-08-2011, 06:09 AM

ياااااااااااااه
اخيرا حد يشكر فينا
وبعدين اكتبي باشمهندسة براحتك
كل طلبة حاسبات مهندسين ......... واحسن مهندسين

انا بقي حصل معايا موقف
كنت رايح اطبع بطاقة الترشيح في السيبر
في واحد معرفوش .....مرحلة تالتة رايح يسجل رغباته
بيقولي دخلت ايه
قولتله حاسبات ومعلومات
راح قالي وليه تضيع فلوسك.......وراجل راح طالع يقولي كنت احسنلك تدخل معهد خدمة اجتماعية وتقعد سنتين
وتعمل معادلة وتدخل تجارة :frown::frown::frown::frown:
كنت عايز اديله باي حاجة
او علي الاقل اوريله المجموع اخرسه

هههههههههههههههههههه
يانهار-ازرق-ليه-يعنى-كل-دا
مش-مهم-بقى-خلينا-نشجع-نفسنا-هنا-لان-فعلا-دا-اصلح
وانا-الحمدلله-فرحانه-جدا-ان-مجاليش-مجموع-هندسه-لانه-لو-جالى-كانت-هتضيع-عليا-الكليه-الجميله-دى-والحمدلله-على-كل-شىء

Eng.Mo'men

19-08-2011, 07:27 AM

انا موافقكم ومعاكم واحنا ان شاء الله اللى هنبنى مصر تكنولوجيـا وفكريا واللى يسألك عن اسم كليتك قوله هندسة حاسبات على ما يغيروا اسمها التعبان دا اللى اسم خدمة اجتماعية احسن منه مع احترامى للجميع والمشكلة تتمثل فى اولياء الامور الذين لا يعلمون شيئا ويتكلمون

تخيلوا ان البعض يعتقد ان خريج الهندسة قسم ميكانيكا ( ميكانيكي ) مثل صاحب الورشة الذى لا يستطيع كتابة اسمه
والبعض ايضا يعتقد ان خريج هندسة قسم كهربا (كهربائى) ههههههههههههههه بجد بجد الواحد زهق على رأى الأخ اللى بيقول 75 مليون راس مش فاهمين حاجة وبيتكلموا بمنتهى الثقة بس هيبدأوا يفهموا لما يعرفوا انك شغال فى شركة وبتقبض بالدولار ساعتها هيدخلوا ولادهم الكلية حتى لو خاص والمشكلة التانية بتتمثل فى النقابة
لأن النقابة دى هى أمنا اللى تايهة بجد النقابة دى هتخلى مسماك الوظيفى فى البطاقة مهندس برمجيات دى حاجة الحاجة التانية هتحفظلك حقوقك زى نقابة المهندسين كده والاطباء ومحدش يقدر يشتغل شغلتك غيرك انت يا معلم يا خريج الحاسبات ودا هيخلى الشركات تتهافت علينا وفرص العمل هتزيد والمرتبات هتعلى الحاجة التالتة من الوارد جدا تغيير اسم الكلية لتصبح ( هندسة الحاسبات والمعلومات) لأننا ندرس كل شئ خاص ببرمجيات الحاسب الآلى بطريقة هندسية الحاجة الرابعة مجموع الكلية دى هيعدى حاجز الهندسة وسينافسها كل عام الحاجة الخامسة النقابة بتوفرلك خدمات كلنا نعرفها زى العمرة والمصايف والرحلات والخدمات التانية الكتير سادس حاجة وضعك الاجتماعى هيفرق كتير جدا لأنك اصبحت مهندس رسميا سابع حاجة النقابة لها القدرة على سن القوانين ورفع القضايا بعكس جمعية مهندسى البرمجيات التى لا حول لها ولا قوة تامن حاجة النقابة دى زى الشلة اللى بتجمع الأفراد اللى ليهم نفس الهوية والمهنة ومن خلال تجمعهم يستطيعوا تبادل الخبرات ومساعدة بعضهم البعض فى مجال العمل تاسع حاجة محدش هيقدر يهذر معاك ولا أولياء الأمور هيقدروا يتكلموا عنها نص كلمة عاشر حاجة النقابة هتاخد حقها إعلاميا وبالتالى ستتهافت الشركات على النقابة لتوظيف الخريجين والنقابة لها فوائد اكثر من ذلك بكثير ولكن ذلك الحاضر الآن فى ذهنى

Eng.Mo'men

19-08-2011, 07:30 AM

مؤمن الغمرى .... هندسة حاسبات الزقازيق

MohamedHigazy

31-08-2011, 07:52 AM

حاسبات الله ... انا بحب الكليه دى اوى بس للاسف معرفتش ادخلها عشان 1% وكان دى حلم بس الحمد لله دخلت معهد حاسبات علوم حاسب يعنى زى حاسبات لان طبعا انا مش اعرف ادخل جامعه خاصه ب 19 الف جنيه غير وغير وغير بس الحمد لله المعهد زى الجامعه فى كل حاجه بظبط فى كل حاجه مواد دراسه تدريب عملى كل حاجه وانا فخور انى حاسبات وشكرا

Eng.Mo'men

03-09-2011, 06:31 PM

مشكوووووووووووووووووووووور

rehab rehab

03-09-2011, 06:43 PM