بسم الله الرحمن الرحيم


اولا نقول شكرا لاستجابة عبقر وتلبيه طلب واقتراح أحد الأعضاء بانشاء القسم الجميل دا اللي ان شاء الله نقدر نفيد بعض ونستفيد منه

طبعا كلنا عرفنا ان اول خطواتنا في طريق الحياة كانت الثانوية العامة التي لا تعتبر شيئا بالنسبة للمجتمع الجامعي ودراسة الكليات

طبعا بعد حمد الله والصلاة والسلام على رسول الله نبدأ اول موضوعات القسم دا وانا هتكلم فيه عن حاجات كتيرة قابلتها في كليتي

انا طالب في اعدادي صيدلة وطبعا زي ما احنا عارفين ان كل الكليات العملية وبرضو النظرية بيبأى فيها اكتر من سنتر وكورسات والحاجات دي كلها فطبعا عاوزين نتكلم في الأتي:

يا جماعة احنا ناس شباب بعد كدا هنحمل مسئولية أمة بأسرها فازاي في كل حاجا نعتمد على الأخرين حتى في دراستنا بنعتمد على الغير امال امتى هنعتمد على نفسنا هنفضل طول عمرنا بأسلوب التليقين استاذ او دكتور ويشرحلك وانتا تسمع وتدفع وتروح تدخل تجيب امتياز وعلى الله السلام لا انتا فاهم ولا انتا عارف

انا عن نفسي ولله الحمد مش باخد ولا كورس ومش ناوي اخد ومش لمقابل مادي مش هتفرق بس هيه هتفرق في الوقت اولا ثانيا هعيش طول امتي كدا بتلقن من شخص عمري ما هعتمد على نفسي وطبعا مش عاوز ارجع لموال الدروس في الثانوية العامة لأن الكورسات تعتبر نسخة طبق الأصل

يبأى اقول سؤالين ؟

هل تواظب على حضور جميع المحاضرات والسكاشن ؟

وهل تؤيد ام تعارض الكورسات ؟؟

وشكرا ومبروك ليكم القسم

سلام الله عليكم

انا بحضر محاضرتين بس واروح حد لسه هيروح اساسا
قصدى حصتين :D :P
لكن الكورسات وجع دماغ يا راجل
اسمع شرايط احسن :P
وروح العملى بس :P :D
يا بنى روح ودور عالمعلومة واقرأ
(كلمة لاستاذنا فى الفصل)

ارفضها و ابصم بالميه


يا بني ازاي تبأي طالب جامعي و مش عارف تفتح مرجع و تدور دي مهزلة انسوا كلام الثانوي الفارغ


مفيش مقارنة بين الكلية و الثانوي

الثانوي بتذاكر عشان تجيب مجموع و خلاص , الكلية بتذاكر عشان تبأي محترم و مالي مركزك في وظيفتك بعدين

بحضر كلة كلة محاضرات على سكاشن

مفيش فايدة

اخدت خمس كورسات لحد دلوقتى

<div align="center">موضوع كويس ومهم..

والقسم ده فكرته جميله

حضور المحاضرات والسكاشن مهم جدا خاصه في الكليات العمليه....

وانا مش بايد موضوع الكورسات الا للضروره في بعض المواد

بعض المواد الطبيه خاصة تحتاج خبره الدكاتره في الشرح والحياه...لان الدكتور اكيد بيفهم اكتر من الطالب ومش هينفع مجرد حفظ الماده...لازم الفهم الشديد........

ولازم الطالب الجامعي يبقي مجتهد وبيزاكر عشان يفهم وظيفته في المستقبل مش مجرد يزاكر عشان يدخل الامتحان ويجيب امتياز

لان بعض الطلبه اللي بتجيب امتياز للاسف بيبقوا حافظين فقط بدون فهم...ودي كارثه.......</div>

اولا السلام عليكم و رحمه الله و بركاته

ثانيا ازيكم يا شباب و حشتــــــــــــــــــــوني اوي

اخباركم ايه و اخبار الدراسه ايه ...... يا رب نكون كلنا مبسوطين

ثالثا شكرا عبقرينو على المفاجأه الحلوه دي .... انا فوجئت النهارده بالقسم ده

انا مادخلتش من زمان بس اعمل ايه الامتحانات و الهم اللي ورايا و الله

ندخل في الموضوع ......

اولا بالنسبه للمحاضرات و السكاشن فانا و الحمد لله بحضرها كلها من اول السنه و ما سبتش اي حاجه الحمد لله لغايه دلوقتي

غير مره واحده في رمضان غبت من محاضرتين علشان كنت عيانه و حتى واحده منهم الدكتوره طردت العيال و مردتش تشرح

و مره تانيه انا دخلت حطيت كتبي و شنطتي و طلعت اندي لصحابي من استراحة الطالبات فالدكتور لما رجعت ما رضاش يدخلني

و لا رضا يخليني اخد الشنطه ... وكنا حوالي 40 طالب برده ما دخلوش

بس في نقطه ان احنا عددنا قليل يعني 125طالب بس ... فالشرح احسن و كمان الدكاتره لذاذ اوي و مصحبنا اوي

ما عدا الدكتور اللي مرضاش يدخلني ......كمان انا بستمتع بالشرح بامانه

اما بالنسبه لوضوع الكورسات فعايزه اقول ان احنا عندنا مابيعملوش ورق حتى او مذكرات

و لا في اي نوع من انواع الكورسات لان احنا اي حاجه بنبقى عايزنها بنروح للدكتور على طول

المعيدين كمان زي العسل و بيحبونا اوي و معظمهم اصحابي حاليا

كمان انا بفهم كويس اوي من الدكاتره و بكتب وراهم كل حاجه فمش محتاجه ان شاء الله كورسات

بس في مصيبه كده اسمها الرسم الهندسي بفكر اخد فيها كورس

بس انا و الله مستوايا حلو فيها و رسمي بيبقى كله صح

بس مشكلتي اني ما بشطبش اللوحه حلو وبسيب حاجات كتير ورايا ......

يعني الحكايه ببساطه حكاية تقدير .....

اما اي حاجه تانيه فمقدور عليها

مره تانيه بقولكم وحشتوني

و بشكر استاذ اشرف على القسم الحلو ده

و بشكر محمد البري على الموضوع الرائع ده

و ما تنسوش تدعولي كده معاكم

بسم الله الرحمن الرحيم
اولا الف مبرووووووووك على القسم الجديد وشكرا يا استاذ عبقرينو
ثانيا بالنسبه للموضوع
انا بحضر الحمد لله السكاشن كلها لأنها مهمة جداا عشان تعتبر تطبيق على الى النا اخدته فى المحاضرات وعشان الحضور برده
انما المحاضرا فمش كل المواد ببقى بحضرها دايما فى مواد معينه مش محتاجه لفهم وبتحتاج لحفظ لأسف
زى حقوق الانسان والانتاج انما الرياضه والفيزياء والرسم وباقى المواد الى بتحتاج فهم بحضرها الحمد لله ولو فاتتنى محاضره بحضرها مع اى دكتور تانى بس لأسف مش كل الدكاتره كويسين عشان كده انا بختار الدكاتر الى بفهم منهم
بس وشكراا يا محمد على طرحك للموضوع ده وياريت يا جماعه القسم ده يكون نشيط زى بقيه اقسام المنتدى الممتازة
ومعلش لأنى اتأخرت فى الرد ومش بدخل الايام ديه على المتتدى زى الاول عشان الميد تيرم :D

موضوعك جميل يا محمد
بس بصراحه انا مش مع كلامك
انا شايف ان النظام من الاول هو اللى غلط
يعنى احنا اتعودنا فى ثانوى نروح دروس ونظام المذكرات
الواحد خد على الطريقه دى انه يلاقى ورق متجمع مختصر فيه المفيد
وده اللى بيخلينا ناخد كورسات فى الكليه
انا بصراحه باخد كورسات فى 3/4 المواد
انا مش باخد الكورسات عشان اذاكر
بس ده نظام صح
يعنى خد كورسات تجيب تقدير

اوكي وانا هعتمد على نفسي امتى بأى اي نعم امتحاني كمان شهر وفيه مواد مفتحتهاش بس ولو هشيل المادة مليون سنة مش هاخد كورس فيها

لأني م الأخر بقتنع ان اللي بياخد كورسات هيفضل طول عمره تحت أسلوب التلقين ولا عمره هيعتمد على نفسو

اما بالنسبة لكلام الدكتوره فلاور في الطب والصيدلة والاسنان والعلاج الطبيعي فيه ناس بتاخد في مواد معينة عشان تقدر تطبق دراستها صح طيب انا في كلية صيدلة ومش باخد ومقتنع ان اللي بياخدوا معايا في الدفعه كورسات هيجيبوا امتيازات بس وبعدين هل هيه من نفسه أكيد لأ

وانا لحد الأن رافض دروس الثانوية العامه مع اني اخدت دروس وفعلا هيه اللي ضيعتني

ورافض الكورسات تماما

بسم الله الرحمن الرحيم

اولا : شكرا للاستاذ اشرف على انشاء هذا القسم الجميل ... ثانيا : شكرا لمحمد البري على هذا الموضوع الجميل ...
بالنسبة ليا انا . انا كلية تربية فنية كل اللي فيها عملي .بمعنى ان السكاشن فيها اهم من المحاضرات . ومع ذلك انا باحضر كل المحاضرات والسكاشن .. لكن في مرات ما حضرتش فيها المحاضرة لما اكون داخلة متاخر والدكتور مش بيدخل بعده ...
لكن السكاشن الحمد لله حضرتها كلها..
اما بالنسبة لحكاية الكورسات دي فانا مش بشجع الحكاية دي لانها فعلا عدم اعتماد على النفس . بالنسبة لما كنت ثانوية عامة كنت باخد دروس لاني مش باعرف اجمع المعلومة ولا ادور عليها في مكتبات بلاضافة لان الاساتذة في المدرسة محدش بيشرح لانهم اعتمدوا على الدروس الخصوصية . لكن في الجامعة يبقى عيب اوي لو ما عرفتش تدور على المعلومة ( ودي كلمة دكتور عندنا ) ..

شكرا يا محمد على الموضوع الجميل

السلام عليكم ورحمة الله و بركاته
الاول شكرا يا دكتور محمد على الموضوع الحساس اوى ده
طبعا الكل عنده حق ان الكورسات مليهاش لازمة
فى كلمة مرة الدكتور بتاع الميكانيكا قالهالى
انت كنت فى ثانوية عامة تلميذ
المدرس بيدلعك
وبيرضعلك المعلومة
بس انت دلوقت طالب
يعنى انت اللى بتطلب العلم
وعلى فكرة انا حاطط الحلقة دى فى ودنى
مش مشكلة لما تلف على الدكاترة و المعيدين لحد ما تجاوب على اسئلتك
اتعب
علشان فى الاخر تلاقى نتيجة تعبك
وعموما ميرسى على الموضوع
شدوا حيلكم
شكرا ليكم

<div align="center">

مبروك عليكم يا شباااب

وشكرا عبقرينوا على المفاجآت الحلوة دى

الحضور مهم يا شباب ..ولكن عشان تبقى متميز لازم تبذل جهد من عندك

عشان يكون ليك وجهة نظر تتبناه ..

عليكم بالمراجع والبحث عبر النت ومعرفه ما هو جديد بالنسبة لتخصصاتكم


واخير شكرا يا محمد

........</div>

اولا مبروك على القسم الجديد
ثانيا شكرا يا محمد على الموضوع الي فعلا مهم

ثالثا رايي بقة انا معرفش نظام الكليات التانية بس بالنسبالي بقة طب اسكندرية :-
اولا انا باخد 4 كورسات وعشان محدش يقول ثانوية عامة انا عمري ما خدت دروس في حياتي كلها الا في الجامعة

اما ليه بقة باخد كورسات يعني لازم نشوف الجثث عملي ونعرف ده فين وده فين ازاي اشوف وازاي افهم والجثة متجمع عليها ميت واحد وهما 4 جثث بس كل جثة مية يا فرحتي اشوف فين بقة ولا اعمل ايه ادي حاجة ؟؟؟

لما تكون قاعد في امان الله في محاضرة وفي ناس قاعدة تتكلم يوقم الدكتور يقول ادينيا كده خلصنا كذا وكذا وكذا عشان تبقو تتكلمو تاني ومشى والمرة الي بعديها بدأ من نص الكتاب على اساس انو خلص واحد زي ده تعمل معاه ايه ؟؟؟

لما يكون الدكتور قاعد بيتكلم في المحاضرة وانت مش فاهم حاجة وتيجي تسالو عن معنى حاجة يقولك يابني انت حمار انت في كلية بتتكلم انجليزي مش عربي شوفلك كلية تكلمك عربي ده تعملو ايه ؟؟؟؟ مع العلم ان نفس الدكتور في الكورس بتاعو بيكلمك بالعربي على سنجة 10 ;)

لما تيجي تسال دكتور في المحاضرة عشان منتاش فاهم حاجة يقولك مش اسئلة انت في محاضرة ولو فتحت باب السؤال مش هخلص ماشي يا عم عندك حق اجيلو في مكتبو يقولو ده مش معاد الساعات المكتبية تعالالي فيها اجيلو فيها يقولولي مشى ؟؟؟

وغيرو وغيرو بعد كل ده ايه المطلوب مني لازم هاخد كورسات اما بالنسبة للحضور كل السكاشن بحضرها اما المحاضرات نص ونص

وشكرا على الموضوع وده بالنسبة لكليتي معرفش الباقي :)

انتا على طب طيب يا عمي منا ليا زمايلي كتير قوي في طب ومحدش اشتكى منهم ومنهم في فك الموت اللي هيه عين شمس وانتا عارف معناها

طيب انا صيدلة ودفعتي من أكبر الدفعات على مستوى الجمهورية 1300 طالب وطالبة

والمعامل وكل حاجا دا كفايا منظر المدرج مش هتفرق يا عم

الكورسات ما هي الا وسيلة تلقين ولو انتا مهما كان لازم تتعب وتعمل كل حاجا بنفسك وتتناقش مع زمايلك اللي فاهم يشرح للي مش فاهم ومتقوليش الكلية فيها حد مبيخدمش والصبيان يخدموا البنات والعكس

لأ انتا بس اتصاحب على ناس كويسة

اكيد لو انتا طب بتاخد كورس في الفسيولوجي :D :lol: عقدة ناس كتيرة

المهم ربنا يوفقك ويوفق كل الناس سواء جامعات او ثانوية عامة

بس سوري مش معترف بالكورسات ولو هفضل في الكولدج لمدة 20 سنة :D

منا ليا صحابي في طب اليكس :(

مش عارف تختلف النظرة بأى ولكل واحد نظرته البديهية

السلام عليكم اولا انا لسه جديد ف المنتدي
اما بالنسبه للموضوع فهو موضوع ف غايه الاهميه ......
الكورسات = الدروس الخصوصيه .......بس الفرق هو
الدروس الخصوصيه بعد ماتكبر وتبقه كويسه بيقوللها " كورسات "
مش معني كدا انها غلط ...لا لا لا
لان بيبقي فيه حاجات الواحد لو اطنطط عمره مهيعرفها... وده مش غباء منه
ده عشان الدكاترة الجامدين اوى اللى بيدرسلولنا
وانا صحيح ف علوم عين شمس قسم جيوفيزيكس

السلام عليكم و رحمة الله و بركاته

ازيكم يا شباب

و الف مبروك علي القسم الجديد و لو انها جت متأخرة قوووووووووي

بالنسبة للمحاضرات انا مش بحضر اي محاضرة خالص

وبحضر كل السكاشن ماعدا سيكشن الحاسب الالي بروح

لانه بيكون يوم الخميس اخر النهار

للعلم انا في كلية طب اسنان اليكس

بالنسبة بقي لموضوع الكورسات

انا من مؤيدي موضوع الكورسات بس مش في كل الظروف

يعني في المواد المهمة بس

سلام بقي و كفاية فضايح لغاية كده

السلام عليكم ورحمة الله وبركاته
شكرا علفى انشاء هذا القسم الرائع لكى يضم طلبة الجامعات
وعلى فكرة انا فى اولى طب المنصورة يعنى مع الدكتور محمد البرى
المهم
انا فى الاول كنت شوية مستهتر لكن دلوقتى الحمد لله
انا كنت داخل الكلية ومش عاوز آخد دروس خالص
وكنت بشوف اصحابى اللى كانوا معايا فى ثانوى بياخدوا دروس وتقريبا فى 3 مواد من 4 مواد وفى اللى بياخد المواد كلها
قلت لنفسى انا كده هبقى لوحدى وصممت ان استمر فى طريقى بلا دروس ولا كورسات كفاية دروس ثانوى واهدار الوقت
وربنا يسهل فى الامتحانات
يــــــــــــــــــــــــــــــــــارب

السلام عليكم
انا يا جماعة فى اولى علوم عين شمس و الصراحة لا انصح احد بدخول تلك الكلية الا اذا كان حاببها
انا جربت احضر محاضرات وسكاشن و شرح للطلبة الاكبر مننا بس للاسف مفيش فايدة برضة
اضطريت اخد كورسات فى مادة
و بعدين فى مادة تانيه
و بعدين فى مادة تالتة
لحد ما اخذت فى كل المواد
بس لم استفد شيئا اللى حصل لى مجرد تضييع للوقت وتشتتيت وفى الاخر زيي زي اللى ما اخدش

السلام عليكم يا جماعة
موضوع جميل اوى
جزاك الله خيرا د/ محمد

بالنسبة للمحاضرات والسكاشن
انا بحضرها كلها الحمد لله وبالذات السكاشن طبعا
يمكن الترم ده ماحضرتش كام محاضرة كده بس مش كتير بحاول اواظب يعنى

بالنسبة للكورسات
انا برضة معارضة اوى موضوع الكورسات ده
لان اكيد فية فرق بين الثانوية العامة والجامعة ومش هنعد بقى طول حياتنا فى النظام المتخلف ده

انا بس اخدت كورس فى الماس
بس بجد بعد مافشلت كل محاولاتى
احنا دفعتنا 1800 وبنبقى كتير اوى فى المحاضرة فضلت احضر المحاضرات واحاول افهم الماس ده
بجد صعب اوى وبعدين بناخد حاجات غريبة تفاضل وتكامل ومصفوفات ومحددات وحاجات كده ملهاش علاقة بالصيدلة
المهم حاولت افهم فى المحاضرات معرفتش خالص
اعدت احاول اذاكر من الكتاب حاولت جامد وبرضة مش فاهمة حاجة
جبت ورق برضة مفيش فايدة مادة معقدة
فى الاخر اضطريت اخد كورس عشان افهم
عارفين واحنا فى المحاضرة واحد بيقول للدكتور بتاع الماس انا مش فاهم حاجة
قاله يابنى انا هنا من سنة 83 ومحدش فاهم حاجة
بالمناسبة بقى انا كنت لسة بمتحنها النهاردة يعنى الحمد لله حليت بس فية برضة حاجات فى الامتحان غريبة اوى
عارفين الدكتور جالنا فى الامتحان وقالنا السؤال رقم كذا حلوه باى طريقة المهم تجيبه الاجابة وقام قايل : ده اذا كان فية طريقة اصلا ........هههههههههههههه حاجة غريبة

السلام عليكم ان هذا الموضوع رائع جدااااااااا والقسم فعلا انا مبسوطه لانشاءه وانا فى راى ان الواحد يعتمد على نفسه احسن بدلا من الدروس انا فى اعدادى صيدله جامعه المنصوره وهى كليه صعبه وعمليه بس انا اعتقد انى ممكن اموت و ما خدش كورسات وال حمد لله خلصت امتحانات واجابت اجابات مفيش دكتور كورس يقدر يقولها ههههههههههههههه

اولا بشكرك يا بري على الموضوع الجامد ده
بالنسبة للمحاضرات انا بحضر تمام يس مش محاضرة اللغة هي اللي مش بحضرها
بس مش بستفاد خالص
تخبل لما الدكتور يتعامل مع الطلبة على اساس ان هما بيحضروا ماجستيير وفاهمين كل حاجة
ده غير ان السنة دي الايحة اتغيرت ونزللزنا مواد من اولى زي الرياضة
ومواد medical
زي anatomy
وhestology
ده غير ان الكيمياء كانت بتتاخد كلها على بعض
اما عندناinorganic & physical & elementry
في الترم الأول
اما ال organic
الترم التاني
فشبه مش مستوعبين اللي بيحصل
وفاضل في medical ماده لسه هناخدها السنة الجاية
شفت العته
اما بالنسبة للساكشن فالحمد لله بحضر كله
وممكن مرتين
المرة مش عشان استفاد لأ عشان اشوف اصحابي
اما بالنسبة للكورسات
انا كنت باخد كورس في الكيمياء لأن الدكتور
يقال انه مصنف من افضل 10 دكاترة على العالم
ما بالك لما يتعامل مع طلبة
اكيد بيكلمهم على اساس ان هم بكالوريوس مش اعدادي
ده غير ان اللي بيدينا داكترة علوم (مع الأعتذار ) ليهم دماغهم حجر ومتخلفين
وطبعا ما بالك بقى في الحيوان والنبات عملي
مش اقل من 30 slide
في كل واحد
لازم تحفظهم احفظهم ازاي ولو حفظتهم اكيد هنساهم
فكان لازم اخد قعدتين مع المعيدين
يجوا البيت ومعاهم ال slides
والميكروسكوب ويقولونا ازاي نفرق
والحمد لله خلصنا الحيوان على خير ان شاء الله
والنبات ربك يستر
وشكرا يا استاذ اشرف على القسم
انا عارف انها متأخرة اوي