مشاهدة النسخة كاملة : كل ما يهمك عن هندسة البرمجيات ...


Eng. Alios
02-10-2009, 04:49 AM
السلام عليكم و رحمة الله و بركاته ...

ازيكم يا حاسباتيين ...

يارب تكونوا بخير ...

عايزين نشد حيلنا السنين اللي جاية ... احنا مش ناقصين قرف ...

يارب كلكم تجيبوا امتيازات السنة دي و اللي جاية و اللي بعدها ...

* * *

هندسة البرمجيات

كتر الكلام عن هندسة البرمجيات ... و بالأخص طلبة حاسبات حلوان ...

و الطلبة مترددة من التخصص دا ...

تعالوا نشوف ايه النظام ...

هندسة البرمجيات
قسم هندسة البرمجيات هو قسم جديد موجود بجامعة حلوان و فقط ...
و هو يعمل بنظام الساعات المعتمدة و بمصروفات تتراوح ما بين 5400 الى 7000 جنيه في السنة ..

التخصص من سنة أولى طبعاً ... و ممكن من تانية و تقدر تخصم المصروفات في تانية ... يعني تعمل معادلة و بدل ما تدفع 7000 تدفع 6000 ... يعني على حسب المواد ...

بالبلدي و بإختصار ... هندسة البرمجيات تهتم بإنشاء برمجيات عالية الجودة و بأقل تكلفة ... كذلك تهتم بالتخطيط البرمجي و كيفية دعم اتخاذ القرار و حل المشكلات ... و هو الوجه الأعلى للمبرمج ...

و الفرق بين مهندس البرمجيات و بين عالم الحاسب .. أن عالم الحاسب يهتم بالبنية التحتية للبرمجيات يعني وضع الأساس للبرمجيات ... و بالتالي فهو يدرس العلوم الاساسية المناسبة لعملية البرمجة ... كذلك مهندس البرمجيات يرى الأخطاء في البنية التحتية و يحاول استكشافها و تصليحها و كذلك الرفع من جودة البرمجيات و لا يدرس البرمجة أيضاً بشكل مكثف .

* * *

من مميزات القسم هو أنه تخصص جديد و نادر .. و مش موجود في كليات الهندسة نفسها .. و بيهتم بإعداد خريج قادر على انه يبرمج البرمجيات الكبيرة زي الويندوزات و برامج الأوفيس و إدارة البنوك ..

من عيوبه بقى : انه شغال بنظام الساعات المعتمدة و بالرغم من انه نظام ناجح في اوروبا , الا انه نظام مش شغال في مصر , و على العموم لابد من اجتياز 129 ساعة معتمدة في تخصص هندسة البرمجيات .. طبعاً انت ممكن تخلص الـ 129 ساعة دول في سنتين ده لو انت فلتة مذاكرة يعني و بتذاكر من الثانية للثانية ... و لو انت عايز تبقى زيك زي اي خريج يبقى تحاول تقسم المواد على اربع سنين ... و ممكن تبقى زي طب و تخلص في سبع سنين .. بس إنت من نفسك ح تحاول تخلصه في اربع سنين بالضبط ..
و الكلية مش مشكلتها انك تخلصهم في قد ايه .. الكلية حطت لك مدة انك تقسم ال 129 ساعة دول على اربع سنين ... انت بقى عاوز تخلصهم في ستة في عشرة مش مهم ... المهم تخلصهم و ده اللي عاوزاه الكلية ..

المواد طبعاً هى خليط من مواد علوم الحاسب و نظم المعلومات و تكنولوجيا المعلومات و تقريباً خمس او ست مواد عن تخصص هندسة البرمجيات ... بس أغلب المواد علوم حاسب ...

و دي حاجة كويسة خالص .. انك بتتخرج مهندس برمجيات شامل يعني تقدر تبرمج مواقع انترنت كبيرة و تدرس اتصالات و شبكات ...

و طبعاً مكانتك مش ح اقدر اتكلم عليها .... لأنك زيك زي مهندس بترول و يمكن أحسن كمان ...

* * *

بالنسبة لسوق العمل ...

لو سألت منسق القسم نفسه ح يقول لك في شغل ... و ح يسكت ...

طب شغل فين ؟

الكلام اللي جاي ده عن واحد سعودي متخرج من تخصص هندسة البرمجيات بكلية الحاسبات و المعلومات بجامعة الملك سعود ... الراجل ده نفسه قال ان التخصص لا يزال محبوس مش حر .. بمعنى أن العالم العربي حالياً لا يطلب خريج هذا التخصص بكثرة و من المحتمل ان يضمر هذا التخصص في العالم العربي ... و لن نجد إلا شركات الكمبيوتر فقط هى التي تحتاج مهندس البرمجيات ... و ليس أي شركات بل شركات البرمجة فقط ... و هذا النوع من الشركات نادر الإنتشار ...

* * *

من عيوب القسم برضه كام حاجة كده :

- حكاية انه بفلوس ... الموضوع ده مستفزني شخصياً ... لسببين :
أولاً : جامعة اسيوط حالياً بتناقش انها تغير اسم قسم علوم حاسب إلى قسم هندسة برمجيات مع إضافة مواد تخصص هندسة البرمجيات ... و المجلس الأعلى للجامعات بيفكر في الموضوع دا .. بل و بيفكروا انهم يضموا قسم هندسة الحاسبات اللي في كلية الهندسة لكلية الحاسبات و المعلومات ..
ثانياً : ان القسم بفلوس .. و يعتبر ارخص قسم في الاقسام الخاصة الجديدة اللي موجودة بكليات الطب و الهندسة و الحاسبات .. و اعتقد انكم سمعتوا عن قسم نظم المعلومات الحيوية اللي في حاسبات عين شمس و اللي مصاريفه بتوصل لـ 12 ألف جنيه في السنة .

* * *

و مادام ح يبقى قسم عام ... يبقى ملهاش لزمة انك تدفع فلوسك وزيادة ..
اوعوا تفتكروا انكم ح تدفعوا 7000 في السنة و خلاص ..
أولاً : في كتب ح تشتريها , و كل كتاب موال في سعره .
ثانياً : لو سقطت أو شلت مواد , بتدفع تمنهم . و المادة بـ 500 جنيه و الساعة بـ 200 جنيه .

اللي ح يقلقك موضوع الفلوس ...
و المستقبل برضه ..

لأننا لحد دلوقتي مشفناش حد خريج من القسم دا من مصر ... القسم لسه جديد و متخرجتش منه اي دفعة لحد دلوقتي ...

* * *

و الحل ؟

الحل علشان تضمن مستقبل و وظيفة .. لازم تلتزم و تتميز ...
مفيش غير كدا ..

لأنك لو شلت مواد او سقطت لا قدر الله ... يبقى تنسى نفسك و تروح تشتغل سجان في سجن ابو زعبل ... :-)

الموضوع دا حبيت أعمله علشان الناس اللي محتارة ...

و اي استفسار انا موجود إن شاء الله

جزاكم الله كل خير

eng/el doktor
02-10-2009, 03:50 PM
أشرقت الأنوار
إنت فين من زمان
أيوه كده عاوزين مواضيعك الجامده دى يا بشمهندس
جزاك الله خير

Eng. Alios
02-10-2009, 04:01 PM
الله يخليك يا دكتور

ابقى افتح ايميلك

و يارب تكون استفدت ... علشان انت اكتر واحد محتار في القسم دا ...

hesham2077
10-07-2010, 04:40 AM
والله قسم دماغ بس عيوبة زى ما انتا قلت تكرة الواحد فية

mohamed yhia
21-08-2011, 03:39 PM
يعنى هو احسن ولا علوم حاسب

sygma-zita
27-08-2011, 12:02 PM
طب و افرضوا الواحد مانجحش ..... نبقى صرفنا فلوس على الفااااضى !!!!!!... اتكلوا على الله و خشوا حكومى أحسن......

mohamed yhia
27-08-2011, 01:29 PM
طب و افرضوا الواحد مانجحش ..... نبقى صرفنا فلوس على الفااااضى !!!!!!... اتكلوا على الله و خشوا حكومى أحسن......
طيب ما هندسة البرمجيات حكومى فى جامعة حلوان

sygma-zita
29-08-2011, 04:42 PM
يا باشا ده المصروفات بالآلاف .... يعنى فكك من الجامعة دى خالص

طاهر حافظ
03-09-2011, 05:30 AM
طب ممكن تنزلو المواد المقررة للقسم ده + المصاريف بالظبط ضروووووووووري

mtarek
03-09-2011, 05:54 AM
يعنى هو احسن ولا علوم حاسب

يا جدعان اللي حاطط الموضوع من 2009 احنا عايزين الاخبار الجديدة ..يعني الدفعة اللي اتخرجت ..وبعدين انا سمعت كلام مناقض للكلام ده تماما ..حد يفدنا:(

طاهر حافظ
03-09-2011, 04:43 PM
طب ايه الكلام المناقض اللي سمعته ياريت تقولنا ؟؟؟؟؟؟؟

Eng.Mo'men
04-09-2011, 11:06 AM
???????????????????

عبودعبدالغفار
06-04-2014, 09:01 PM
ماهو مجموع كلية هندسة البرمجيات فى الثانوية العامة وماهو مجموع الكلية لو خاص

EhabAmmar
09-04-2014, 02:29 PM
بعد اذنك يا بشمهندس لو فى واحد فى cs خاصه لسه فى سنه اوله و عوز يحول للقسم ده انا اعرف انه خاص يا ترى له مجموع زى الكليات التانيه ولا ايه النظام بالظبط او ممكن يحوله بـــ بالتقدير بتاعه فى سنه اوله فى علوم الحاسب ممكن الاستفاده بعد اذنك

ابراهيم صقر
16-04-2014, 08:27 AM
بارك الله فيك

backtrack
12-06-2014, 07:18 PM
هو انا لو ماجلبش تنسيق حاسبات حلوان ينفع اخش القسم ده ولا لأ ؟

Eng.Mo'men
20-06-2014, 01:46 AM
ماهو مجموع كلية هندسة البرمجيات فى الثانوية العامة وماهو مجموع الكلية لو خاص

93% 15 ألف تقريبا

Eng.Mo'men
20-06-2014, 01:48 AM
هو انا لو ماجلبش تنسيق حاسبات حلوان ينفع اخش القسم ده ولا لأ ؟

لا مش ينفع .. ممكن تدخله خاص بس

Code IT
13-08-2014, 04:29 AM
لا مش ينفع .. ممكن تدخله خاص بس
تقصد ايه بخاص يابشمهندس؟

يعنى حتى لو مش جايب مجموع حاسبات حلوان ينفع يخشه فى جامعة حلوان بس بفلوس اكتر مثلا؟

ولا لازم اصلا يكون جايب تنسيق حاسبات حلوان؟

EhabAmmar
17-08-2014, 04:41 AM
تقصد ايه بخاص يابشمهندس؟

يعنى حتى لو مش جايب مجموع حاسبات حلوان ينفع يخشه فى جامعة حلوان بس بفلوس اكتر مثلا؟

ولا لازم اصلا يكون جايب تنسيق حاسبات حلوان؟

تقريباً ممكن يقصد قسم هندسه البرمجيات لآنه الوحيد اللى خاص