السلام عليكم ورحمة الله وبركاته


وحشني المنتدي الجميل ده جدا

عندي طلبين ياريت حد يفيدني فيهم
انا تانية تجارة القاهرة

اولا:سمعت ان فيه شغل اوتدريب للطلاب
عاوزة اعرف ايه شروطه؟ وازاي اقدم ؟وياتري بيكون عن طريق الجامعة والا البنك اوالشركة مباشرة؟ وايه الشركات اوالبنوك اللي بيكون فيها شغل او تدريب؟
لاني نفسي اشتغل جدا واكيد هستفيد منه في دراستي

ثانيا:الكورسات:
1)انا السنة اللي فاتت كنت في المجموعة المتميزة وكانت نزلة منحة كورس انجليش واخدنا اول ليفل في حوالي شهرين ونصف وبعد كنده عملولنا امتحان وقالولنا ان الكورس هايكمل مع بداية السنة الدراسية اللي جاية ولحد دلوقتي مافيش اخبار
ياريت اللي يعرف حاجة عن الكورس ده يقولي

2)اخدت في الصيف كورس icdl وخلصته في نهاية شهر 7 والمفروض الامتحانات تكون في اول شهر 8 لكن لحد دلوقتي مامتحناش ولا فيه اي اخبار (الكورس ده كان تبع مكتب key اللي في القبة)ياريت اللي يعرف حاجة عن الكورس ده كمان يقولي
مش عارفة حظي عامل كده ليه مع الكورسات


المهم عاوزة حد يقولي اخد كورسات ايه تاني وفين بس تكون موثوق فيها وميحصلش زي اللي حصل ده



وادعولي اعدي السنادي علي خير عشان انا مابنزلش الجامعة ولا بحضر محاضرات خالص عشان عندي شوية ظروف مع شويتين تلاتة كسل

ويارب اجيب جيد واعدي صافي:022yb4:

اه ..... نسيت اقولكو كل سنة وانتو طيبين:av4056bb7jp3::av4056bb7jp3:

وتحياتي ليكو كلكو:078111rg3::078111rg3::078111rg3::078111rg3::0 78111rg3::078111rg3:

اولا:سمعت ان فيه شغل اوتدريب للطلاب
عاوزة اعرف ايه شروطه؟

الشروط بتبقي على حسب الجهة اللي انتي عايزة تتدربي فيها

كتير من الشركات والبنوك فاتحاها على البحرى عادي .. أي طالب يتدرب عندهم عادي بأي شروط

لكن عندك مثلا البنك الأهلى سمعت انه مش بيفتح التدريب الا لسنة تالته بس .. وتكون جايب جيد

فيه برده البنك المركزى .. لازم تجتازي الانترفيو والانجليش .. وتدفعى مصاريفه (450 جنيه)

بس طبعاً مش كل البنوك بتدي شهادة تدريب .. فيه بيدي وفيه مش بيدي .. انتي وحظك بقى

بس مش مهم الشهادة على قد ما المهم انك تستفيدي من التدريب ذات نفسه

وازاي اقدم ؟وياتري بيكون عن طريق الجامعة والا البنك اوالشركة مباشرة؟

برده بيبقي على حسب الجهة اللي انتي هاتقدميلها

طبعا في جامعتنا العزيزة (جامعة القاهرة) التدريب بيبقي معمول للأوائل وبتوع المجموعة المميزة

عشان كدا بينفضوا للطلبة العاديين

التدريب بيبقي في جهات مختلفة زي البنوك و الشركات

لو عايزة تدربي في البنك المفروض ان فيه استمارة تدريب بتطلع من البنك نفسه

عشان كدا موضوع التدريب في البنوك دا بيبقي محتاجلة واسطة من البنك ذات نفسه

عشان اول ما الاستمارات بتنزل بتتنسف

اما الشركات العادية فا بيبقي التدريب فيها كالمعتاد يعني مش محتاج اجراءات ولا حاجة

بس انتي بتروحي بنفسك وتقوليلهم انا عايزة اتدرب .. بتديلهم السي في بتاعك فيه بياناتك

وماتنسيش اهم حاجة سواءا كان التدريب بنك او شركة ..

انك تكوني محضرة اثبات قيد من شئون الطلبة

اثبات القيد دا بتقدميه معا السي في بتاعك عشان يبقي اثبات انك مقيدة في كلية تجارة

وايه الشركات اوالبنوك اللي بيكون فيها شغل او تدريب؟

بالنسبة للبنوك .. البنوك كلها فيها تدريب .. من اول HSBC لغاية بنك القاهرة

بالنسبة للشركات برده فيه شركات كتيرة فيها تدريب .. اشهرهم موبينيل وفودافون

انا السنة اللي فاتت كنت في المجموعة المتميزة وكانت نزلة منحة كورس انجليش واخدنا اول ليفل في حوالي شهرين ونصف وبعد كنده عملولنا امتحان وقالولنا ان الكورس هايكمل مع بداية السنة الدراسية اللي جاية ولحد دلوقتي مافيش اخبار ياريت اللي يعرف حاجة عن الكورس ده يقولي

للأسف ماعنديش معلومات عنه خالص
اخدت في الصيف كورس icdl وخلصته في نهاية شهر 7 والمفروض الامتحانات تكون في اول شهر 8 لكن لحد دلوقتي مامتحناش ولا فيه اي اخبار (الكورس ده كان تبع مكتب key اللي في القبة)ياريت اللي يعرف حاجة عن الكورس ده كمان يقولي مش عارفة حظي عامل كده ليه مع الكورسات

عادي .. الموضوع دا حصل معا اخويا برده وذلوه في حكاية الامتحان دي

بس انتي اتصلي بيهم وافضلي زني فوق دماغهم لغاية ماتعرفي ميعاد محدد

بس ماتقلقيش يعني .. طالما المركز اللي خدتي فيه معترف يبقي مش هايروح عليكي يعني

وكدا كدا انتي لسه في سنة تانية .. مستعجلة على ايه يعني ؟!

المهم عاوزة حد يقولي اخد كورسات ايه تاني وفين بس تكون موثوق فيها وميحصلش زي اللي حصل ده

يابنتي الكورسات دي مافيهاش اكتر منها .. بس المشكلة في مين يتعلم ومين يدفع !!

لو عايزة كورسات كمبيوتر في المحاسبة والكلام دا عندك مركز net skill دا مشهور وكويس اوي

لو كورسات انجليش .. عندك معهد اللغات القوات المسلحة

دا كويس واسعاره معقوله (335 لليفيل الواحد)

وفيه برده مركز نظم معلومات القوات المسلحة في مدينة نصر ..

دا برده يعتبر النسخة التانية من معهد اللغات بتاع القوات المسلحة

وفيه الهاي تكنولوجي سنتر في كلية هندسة .. كويس برده

انا طبعا بقولك المراكز اللي فيها الاسعار المعقولة ..

انما لو عايزة الهاي بقي عندك الجامعة الامريكية في باب اللوق

والمجلس البريطانى في شارع النيل

انا على فكرة كلامى معمم .. لان لو قولتلك التفاصيل يبقي مش هانخلص http://l.yimg.com/us.yimg.com/i/mesg/emoticons7/29.gif

وادعولي اعدي السنادي علي خير عشان انا مابنزلش الجامعة ولا بحضر محاضرات خالص عشان عندي شوية ظروف مع شويتين تلاتة كسل

زيي يعني http://l.yimg.com/us.yimg.com/i/mesg/emoticons7/4.gif

بس الفرق بيني وبينك .. ان انا بنزل الجامعة ومابحضرش .. لكن انتي مابتنزليش اصلا

يالا ربنا معاكى

ميرسي جدا علي المجهود الرائع ده
بس عاوزة اعرف ايه الشركات او البنوك اللي ممكن اقدم فيها بسهولة
وكمان انا ابن عمي مدير في احدي فروع بنك مصر ياتري بنك مصر محتاج واسطة ولا اقدم عادي وكمان اعرف ناس في بنك القاهرة
يعني اقولهم يشوفولي موضوع التدريب ده ولا مش مستاهل واقدر اقدم لوحدي

وكمان انا عاوزة اعرف اعمل ايه عشان اجيب طلب التدريب من الجامعة وبعدين اقدم ازاي في بنك او شركة يعني لازم في الفرع الرئيسى للبنك ولا ممكن اي فرع

حمد اللة على السلامة يا هنودة بقالك كتير مبتدخليش

انا بردة كنت عايز اعرف معلومات عن التدريب ياريت يا فامبير تقولنا اية هى الخطوات بالظبط انا كل الى اعرفة ان الواحد المفروض يروح للشؤن ويطلب استمارة تدريب بس بعد كدة معرفش بيعملو بيها اية وهل ينفع التدريب فى فروع البنوك الى موجودة جوة الجامعة على اساس انها قريبة ..........
كمان كنت عايز اسألك على الicdl لسة فى المنحة بتاعة الحكومة الى هى تدفع مبلغ وبعدين تاخدة تانى لما تخلص
معلش طولت عليك

السلام عليكم
اكيد اي شغل الايام دي محتاج لواسطة وخصوصا لو في بنك وانتي الحمد لله عندك الواسطة