أنزل يا واد من فوق كتاف القاهرة
مليون شهيد
وتاريخ مجيد
من الكفاح المشترك
وخوض غمار المعترك
وف آخر الشوط أخسرك
مين علمك تقتل أخوك
وأمك وأبوك
وإحنا اللى قدمنا الدماء
قبل العرق
خلاص وصلنا لمفترق
وثورتك.. حريتك
دول كان مخاضهم أرضنا
وف حضننا
تيجى انت تهتك عرضنا
تحرق علمنا
اللى كان شاهد على قبر الشهيد
وترهب الطفل الوليد
تنسى تاريخك يا بليد
بقى هو دا الجيل الجديد
ده نسل بن بيلا وبومدين والرجال
اللى لما ضاق الكون عليهم
شدو لبلادنا الرحال
رفعوا علمهم فوق صدورنا
قبل ما يغوص فى الرمال
غمض عيونك جوا قبرك يا جمال
ماتشفش أحفاد النضال
واقفل ودانك
أصل البيان الجاى من صوت العرب
بيقول على المصرى انضرب
بيقول تاريخك كله كان وهم وخطب
نام يا بطل
لا عليك ملامة أو عتب
وانزل يا واد من فوق كتاف القاهرة
أنت فقدت الذاكرة
لا تصلى فى الأزهر
ولا تمشى ف حوارى السيدة
ولا تسمع الكوكب وهى منشدة
ولا تقرا محفوظ النجيب
ولا حتى تسمع عندليب
خليك كده
تحرم عليك
كل العيون والأفئدة
تحرم عليك كل الدماء والأوردة
وبريئة منك ألف مدنة
وكل جبهة ساجدة
وأنا حفضل المصرى
كريم العنصرين
اللى متربى وساكن فى الحسين
اللى علمتك تقول الضاد
وتنطق كلمتين
يابو اللسان الأعجمى
انزل يا واد من فوق كتاف القاهرة
من امتى بتشيل العيال
دى مصر ولادة رجال
سادات.. مبارك
ومعاهم الناصر جمال
واقفين على شط القنال
رافعين علمها
اللى بإيديك اتحرق
رجالة من عزة وشهامة مش ورق
يا حارق الطوق والشراع
مين راح ينجيك من الغرق
انزل يا واد من فوق كتاف القاهرة

بقلم الشاعر : محمد محمود السعيد

بصراحة شديدة وربنا
شكرا على الموضوع
دمت فى رعاية الله

جميله جدا ومعبره

بصراحة اكثر من رائعة وأعتقد أن مشهد العلم هو البطل الرئيسى لهذا الشعر الجميل .

وهو الذى جعل الدم يغلى فى عروق المصريين ، وجعلنا جميعا نحس ان علمنا هو كيانننا نحن المصريين

القصيدة رائعة جداً
ولكنها مقتبسة وقوانين الركن تمنع وجود قصائد مقتبسة فتلك القصائد مكانها القسم الأدبي
دمت بخير أخي الحبيب

جميلة أوى الحقيقة

لي رأي دي لو راحت لمخرج زي محمد نصر أو مدحت شلبي هيعملك عليها اربع حلقات حرام تكون مدفونة في هذا الوقت الذي نلملم فيه كرامتنا



ملعونة ياللى احلى وصف ليك مجنونة