بسم الله الرحمن الرحيم[color=#FF0000]

حبيت احط نصائح لاخوانى بتوع الرياضة و خاصة رياضة 2
ربنا مع بتوع رياضة 2
الاول و قبل كل حاجة
الكلام اللى هيتقال ده من واحد كان جايب 50 فى رياضة 2 و كان مرشح لأوائل الجمهورية
المهم
أهم حاجة فى الرياضة انك متركنش
يعنى هتشتغل فراغية
وبعدين تسيها و تدخل فى التفاضل
وقت ما انت شغال تفاضل
"كل يوم " حل ولو مسألة واحدة فراغية من كل باب
دا أولا .... لا زم يكون المنهج فى دماغك على طول
ثانيا : من شهر 3 ابدأ حل امتحانات
* لازم تحل كل دليل التقويم و الأهم من الدليل هو كتاب المدرسة
وقت ما انت بتاخد حاجات جديدة
كل درس او باب تحل عليه الآتى:
1- تمارين كتاب المدرسة
2- تمارين دليل التقويم
3- مسائل الامتحانات السابقة + الامتحانات اللى فى اخر كتاب المدرسة و دليل التقويم
4- هاتلك على الاقل كتابين خارجيين حل منهم
عن نفسى انا كان معايا كتاب اسمه 100% و كتاب " لامى "
و حاول انك تحل فى كشكول مش فى و رق و ترميه
من شهر 3 تبدأ تحل من تانى كل الحاجات اللى انت حليتها قبل كده
ركز على أمثلة و تمارين كتاب المدرسة خصوصا فى الميكانيكا
- الفراغية محتاجة فهم " و غالبا معظم المسائل افكارها مشتركة"
- التفاضل و الجبر محتاجين تدريب و لازم تحل بايدك و تطلع نواتج
- الميكانيكا عايزة تركيز جامد و تطلع نواتج بايدك و الالة الحاسبة
متشتغلش بأى الة بتحل معادلات زى 5000 الجديدة اللى طالعة
أثناء الامتحانات بعد ما ترجع من كل امتحان حل مسألتين بس من فرع واحد
علشان متنساش الرياضة
-ليلة الامتحان أوعى تسهر وخصوصا فى التفاضل و الميكانيكا
-لازم ترتب نفسك انك من شهر 3 لازم تبدأمراجعة
----------------------------------------------------------
نصيحة:
رياضة 2 اللى بياخدها بيتظلم فى كل حاجة و أكتر واحد بيحس بكده هو اللى واخد رياضة 2 عن حب مش مجبر
وعلى فكرة اللى واخد رياضة 2 علشان المجموع عمره ما بيجيب 50 فيها
- هتلاقى نفسك مظلوم فى جدول الامتحانات
وكمان تنسيق هندسة بالنسبة لواحد جايب مجموع كويس بيتعبله حالته النفسية و بيحس ان مجموعه ضاع
بس أوعى تحط حاجة زى دى فى دماغط لأن نظام الكلية غير نظام ثانوية عامة 180 درجة

وعموما لازم تكون واثق فى نفسك
انك متضيعش وقتك
وانك لازم تتعب علشان لما تجيب تحس بحلاوة اللى انت جايبه و انك تعبت فعلا
لازم تكون متقرب من ربنا و يكون فى صلة جامدة بينك و بينه لانك صدقنى مش هتلاقى غير ربنا انك تشكيله همك و حزنك و هو الوحيد اللى هيفرجلك كربك
و بصفة عامة بالنسبة لثانوية عامة و خصوصا سنة 3 عايزة واحد متابع بس مش شرط انه يكون عبقرى او فذ بس المهم انه يكون لامم كل المنهج و الأفكار و يحاول انه يشغل دماغه على قدر امكانياته
متحاولش انك تسيب مادة المستوى الرفيع للآخر
كل اسبوع يوم الجمعة ذاكر درس واحد بس
على اخر السنة هتلاقيك ذاكرتها و راجعتها كمان
متحاولش انك تختلط بالناس كتير فى الفترة دى يعنى متركزش مع واحد و قبل كل درس تضيعوا بتاع نص ساعة كل مرة
نص ساعة مع نص ساعة هتلاقى جزء كبير من وقتك هيضيع
خليك لوحدك و اللى تسمعه من الناس التانية حاول تعمل احسن منه
حاول دايما انك تكون فى المقدمة و انك تكون احسن واحد دايما
وربنا يوفقكم و اى حد محتاج حاجة انا فى الخدمة
اخوكم محمد

جزاك الله خيرا على الكلام الجميل ده
و فعلا نصايح مهمة اووووووى
و فعلا بتوع رياضة بيتظلموا شوية و خاصة اللى جايبين مجموع حلو و يجى التنسيق و يحسوا ان مجمعهوم ضاع و اتساو باللى اقل منهم
ربنا معانا و يوفقنا كلنا

الف شكر

بس انا رياضة واحد وحخلص اخر شهر 3 هل فى ذلك خطورة

لا طبعا مفيش اى خطورة
الخطورة بس انك لما تيجى فى شهر 3 بعد ما خلصت تكون نسيت اللى انت خدته فى اول السنة
بس هى دى الخطورة
بس لو المنهج كله فى دماغك باستمرار
يبقى ان شاء الله هتجيب الخمسين
وربنا يوفقك ان شاء الله
اى اسئلة انا موجود و نفسى كلكم تبقوا احسن ناس و تجيبوا اعلى منى كمان باذن الله

ألف شكر على النصيحة
و ربنا يكرمك

:unsure: على فكرة انا لاحظت فى كلامك رسائل سلبية كتيرة بتحسس الواحد إنه خلاص ضااااااااع :unsure:


انا فى تالتة ثانوى وواخد رياضة 2 ، وهى من أمتع المواد فى حياتى كلها ..مفيش فيها أى حاجة صعبة إذا تم تنظيمها وعدم اهمالها زى ما قلت


لكن طالما الرياضة دايما فى بالك وانت بتحب المادة .. يبقى عمرك ما هتواجه مشاكل أبدأ .. ولو واجهتك مشاكل .. هتحلها بإذن الله لإنك مش عايز مشاكل مع الرياااضة



يارب نقابل كل اللى فى تالتة وعلمى رياضة السنة الجاية فى كلية الهندسة بإذن الله


شكرا يا محمد على الموضوع وبارك الله فيك

لا لا يا درش انا مقصدش انى أزرع الاحساس السلبى دا نهائى
كل اللى أقصده هو انك لازم تنظم نفسك بس
ومتزعلش لو لقيت حاجة زى دى
ماشى يا بشمهندس؟
ربنا يوفقك

يااااااااه ده انا مش هنا خالص
بجد كان مفروض اشوف الموضوع ده من زمان
المصيبه ان شهر 1 خلص
بس حصل خير
والرياضه ماده لذيذه بجد بس عايزه حل كتير جدا
وطبعا الحكايه دى مش عايزه حد بيمل بسرعه
وعموما انا بشكرك على النصايح دى بجد استفدت كتير
وربنا يوفق الجميع ونبقى السنه الجايه فى هندسه باذن الله :)

يا بشمهندس فى الأول احب اشكرك ع الكلام الجميل ده.واحب اقولك انى سمعته كتير او كلام يشبهله بس انا اتاثرت بكلامك جداا وتقبلته ونفسى اعمل بنصايحك .بس عندى مشكلتين متهيألى ملهمش حل :1-ان انا معملتش الحاجات اللى قولتها من اول السنة و دلوقتى باقى ع الإمتحانات 3شهور بس .2-انى مش مقتنع بالهندسة قد كدة مع انى بحب الرياضة جدااا ويمكن هو ده اللى تسبب فى المشكلة الأولى .وعلى فكرة أنا كنت علوم وحولت رياضة عشان المجموع بس انا اخترت الرياضة عن الأدبى .(قولت حاجة فيها تفكير)وعشان انا بحب الرياضة كماان وعلى فكرة انا بحب المجالات الهندسية اكتر من الصيدلة والطب بس عشان طبعا زى ما انت عارف فى مصر الصيدلة والطب أحسن حاجة عشان كدة دخلت علوم.أرجو الرد..........ارجو الرد..........

:) شكراااا جزيلا