مبروك الانتصار يارجالة ... الكورة وحدة كل المصريين والفرحة علي الوجه! [الأرشيف]

**تسابيح**

31-01-2010, 10:38 PM

ازيكم ياجماعة؟
اتوحشتني بزاف بزاف بزاف (بالجزائري ) :d
وحشتوني اوي اوي (بالمصري)
هو انا مش مفروض دلوقتي اكتب مواضيع
حداد علي الامتحانات يعني بس ما علينا:o
حبيت بس اقلكم ألف مبروك يارجالة علي الانتصار
والحمدلله الكورة وحدتنا والحمدلله
شايفين الفرح اللي في الشعب المصري بجد حاجة تفرح القلب
والريس الله يخليه للشعب المصري تحس انه معانا علي طول
المهم بقي قلت لازم ياتسابيح تنزلي الشارع بعد مباراة مصر والجزائر
وتتفرجي علي فرحة الشارع المصري والوحدة اللي بقي فيها
نزلت مشيت في الشارع عشان اشوف ان كل المشاكل الحمدلله اتحلت
ودلوقتي الحمدلله بقينا متوحدين ونخاف علي بعض

:::::::::::::::::::
لقيت
رجل عجوز
هدومه مقطعه وقاعد علي الرصيف
رحت لها قلت : شفت الماتش يا حاج شفت الانتصار بتاعتنا ووحدتنا
حسيت انه بيقول انت هبله يابنت انتي ...:bosyht9:
وبعدين بصلي كدا وقالي :: يابنتي انا معنديش بيت يحمينا من البرد هيبقي عندي تليفزيون
قلت اكيد دا راجل معقد سيبك منه:(
:::::::::::::::::::::::::::::

رحت كملت لقيت دار مسنيين في شارع كدا سألت ايه دا
قالوا: ناس اتجوزوا فبعد كدا رموا ابائهم هنا عشان مش ليهم مكان
ومش بيسألوا عليهم
قلت ايه الناس دي اكيد فيه حاجة غلط
دي الكأس ياجماعة
فيه ايه؟!اللي وحدنا ...
............................

قلت اروح المستشفي يمكن يكون فيه حاجة
رحت لقيت راجل قاعد في مكان كدا قلته مالك فيك ايه؟!
قالي: عايز اعمل عملية بس مش معايا فلوس ولا ملين والدولة مش ليه حد يدفعلي الفلوس
قلت:: معلش اصلك لو كنت بتلعب كورة دلوقتي كنت زمانك الريس جالك لحد عندك وسأل عليك وسفرك لباريس تتعالج
قلت مش دي الوحدة اللي حققيتها الكورة أكيد في مكان تاني...
.......................

نزلت الشارع تاني
واحد حاطط ايده علي خده
قلت: فيه ايه ياعم الحاج ؟
قال:: يابنتي عندي هموم الدنيا كلها...
قلت: طيب احكي يمكن اقدر اساعدك
قالي: معاشي 60 جنية وعندي 4 عيال ومش عارف اصرف عليهم وكلهم بيدرسوا
قلت: وليه يدروسوا أصلا هو اللي اتعلم عمل ايه احسن لك تروح تخليهم يلعبوا كورة
بلا تعليم بلا هم :(
قلت أكيد فيه حاجة غلط مش دا الوحدة بتاعة الكورة!!
.............................

رحت البنك عشان اخلص ورق وقعدت واستنيت
ويعتبر انا اول واحد جاية
وكل شوية واحد يدخل قبلي فيه ايه انا جايه الاول
رحت للراجل قلت انا جاية قبلهم اشمعني
قالي ادفعي :(
قلت فيه ايه مش الكورة قدرت علي الرشوة والحاجات دي ....
لا لا ياتسابيح ... لسه الاماكن كثيرة مش تيأسي
..............

مفيش فايدة نروح بقي الجامع نشوف الشباب خلينا في الدين شوية
لقيت شباب واقف ادام الجامع والاذان بيأذن ومشغلين اغاني
ومحدش فيهم ولا راح يصلي ولا قفل الأغاني
قلت لا ياشيخة دي نسبة قليلة مش تقول اني الناس نسيتها اخرتها
وبعدين الكورة وحدتنا ... لسه بدري دوري تاني.....
..................

قلت سبني من الحياة خلينا في الناس الميته فيه موعظة
والواحد بيخاف طبعا من الاخرة
لقيت واحد بيدفن ابوه وبسأل صاحبه هتتفرج علي ماتش مصر وغانا فين؟!:(

...........................

قلت انا مش هخرج من بتنا وتفرج علي القنوات الفضائية
لقيت بيقول ان الريس اتصل باللاعيبين
عشان يشجعهم
افتكرت لما الصخرة وقعت ولما القطار حدث التصادم
مشفت الريس اتصل بالاهالي عشان يكلمهم ولا حاجة
واكتشفت برده انهم من بيلعوا كورة :d
شفت ابن الريس وهو مع الشعب
وبيقول الحمدلله حققنا انتصار
كأننا كنا في حرب ... ال حقننا انتصار ال...
اول مرة اشوف المحروس علي عينه وسط الشعب
مشفنكش الا في مباراة الكورة
عشان نقول بقي بحب المصريين وبيخاف عليهم
وهمومهم همه والحاجات دي بقي
عشان نشجعه في الانتخابات .........
قلت :: لا تسابيح مش تظلمه ولا حتي تظلمي الريس اللي علي طول
مع الفريق اللي بيتصل بيهم دايما ومش صبهم ولا لحظة
افتكرت برنامج واحد من الناس اللي فيه هموم المصريين
الناس اللي عايشة حياة مهينة الناس اللي بتشرب ميه
مليانه بلاوي
قلت ...لا دا الكورة وحدة ....
............................

نشوف الجرائد مكتوب فيها ايه....
فتاة ماتت بسكته قلبيه من الفرحة
واخر مات من الحزن
من أجل كورة القدم
طبعا كل واحد هيتسأل عن اللي كان بيعملوا
واخر حاجة كان عليها هيبعث عليها!
قلت ... مش دي الوحدة بتاعة الكورة

::::::::::::::::::::::::::::::::::::::::::::::
فتحت قناة الناس وخلاص
لقيتها بتعرض
أغنية جراح أمه
ماذا نقول اذا التقينا بالرسول؟ هنقوله ايه ؟ هنقوله ياهل تري شفت اللي للدنيا جري.؟
شفت البشر وقلوب أشد من الحجر والشمس تشهد والقمر........
افتكرت شفت غزة وأهلها وهما بيندبحوا ومش بنتكلم
بناء جدار وحصار اقتصادي من كل ناحيه
حتي الناس اللي كان معترضة ع الجدار ملقتش صوتهم
كل التلفاز بيتكلم ع المباراة ومش فاضيين
افتكرت لما السفير الجزائري المسلم اتحاصر عشان مباراة كورة قدم
افتكرت بردو ان فيه اسرائيل علي ارضنا وبتشرب دم اخوانا المسلمين
ومحدش من اللي عمل نفسه رجاله دول
راحو للسفارة واعترضوا واللي قالوا ان السفير الاسرائيلي يمشي
حسيت بالخيبة اوووي
افتكرت ان فيه مصريين مسلمين بيكرهوا الجزائريين المسلمين
اللي زيهم عشان كورة قدم ...!!!

.........
قلت خلاص بقي اروح منتدي الثانوي يمكن الاقي حاجة
لقيت بردو كل الاعضاء بيتكلموا عن الكورة
والانتصار علي الجزائر ...
وكرامتنا ....
فعلا الكورة وحدتنا خلت ناس مسلمين يكرهوا مسلمين زيهم
فعلا وحدتنا خلت ناس في المنتدي يكتبوا توقيع والله يكسف
وكمان حرام تصدقوا دا:bosyht9:
اكتشفت ان الكورة شتت الشعب ومش وحدته

الفكرة من اخ مسلم جزائري درس الشارع الجزائري
وانا قمت بدراسة الشارع المصري بعد المباراة
واكتشفت انه مش يفرقوا عن بعض كثير !

سلالالالالالالالالالالالالام

..Just Stop

31-01-2010, 10:53 PM

بنت دمنهور

31-01-2010, 11:28 PM

د/بسمة الاسلام

01-02-2010, 02:50 AM

موضوع رائع فوق الوصف
جزيتي خيرا عن كل حرف

العروبة2

01-02-2010, 07:33 AM

الناس المنفس الوحيد ليهم كان في الكرة
حتى
لاحظ الفرحة زيادة على الآخر تحس أن في كبت أو ضغط مستني يتفجر
عموماً
هأقول إنا لله وإن إليه راجعون

السيد صابر

01-02-2010, 10:25 AM

بارك الله فيك أختاه على هذا العرض الصادق لحال الأمة وهذا الشعب خاصة

وعلى الرغم من خطأ الذين تركوا الصلاة ونسوا كل شيء من أجل الكرة

إلا أن كلام الأعضاء الذين شاركوا في الموضوع أظنه حسن

فالمصري اليوم كما تفضلتي وعرضتي لنا يعيش أسوأ حالاته

لا يهتم به أحد من الحكومة ولا الرئاسة
لأن هم هؤلاء الأول والأخير ليس مصلحة هذا الشعب ولكن استمرارهم وأولادهم في الحكم والمناصب العليا

وإلا لوجدناهم يحافظون على أرواح الناس الذين انهارت بيوتهم من جراء السيول, وزيادة الأسعار و...........و........و...........

ولكن أظنهم يعاملونا وفق نظرية مفادها هي أن كل ميت في هذا الشعب تخفيف عنهم

فلو حدثت مصيبة أو كارثة أخذت بنصف هذا الشعب أظنك لن تجدي منهم من يبكي حق البكاء على من مات

وإنما ستجدي كلام وكلام وكلام لا أكثر

وبالتالي فالناس تعرف هذا حق معرفة ولذلك كثرت عليه الهموم والأحزان لعدم ثقتهم في حكامهم

ولنا الحق في ذلك

فأين يخرجون هموهم ومشاعرهم المكبوتة والمحبوسة والتي لايقدرون أن يخرجونها أو يعبروا عنها بالطرق المشروعة ولا حتي غير المشروعة؟

في مبارة كرة

حتى ولو على حساب أمتنا العربية

ومع الأسف

حتى ولو على حساب ديننا الذي علمنا بأننا إخوة

فكيف بالأخ إن فرح في مصيبة أخيه؟

هل له من فرج أو من قبول؟

هدى الله حكامنا لما فيه خير هذه الأمة
آمين

miss heba

01-02-2010, 10:54 AM

موضوع جميل جدا يا تسابيح لكن أنا أرى أن الشعب المصرى ينتظر أى شيئ يفرحه مجرد فرحة أو ابتسامة على الشفاه كل الى انتى قولتيه جميل وواقع مرير على الجميع لكن لا يوجد أى مانع من الفرحة المؤقتة لأن الكأس فع لن تغير الواقع الذى نعيشه لكنه على الأقل رسم البسمة والفرحة فى قلوب المصريين

BaNZeR

01-02-2010, 03:25 PM

والله يا تسابيح موضوعك حلو بس زي ما بيقولو خلينا نبص للنصف الممتلئ

لو ملاحظة انتقاد حضرتك هنا بيتخصص في نوعين
الأول إنه الكورة مخلتش طبقة تحس بالتانية طبقاً لل(وحدة) اللى المفروض حققتها الكورة
والتانية توحيد مصر والجزاير

موضوع الجزاير اتكلمنا فيه كتير ومش حنتناقش فيه تاني
حتى المباراة اللى شهد الاجانب على نزاهتها قالو علينا رشينا الحكم !!
ولو حنتكلم عن الفئة المحترمة في الشعب
فحتى اللى كانوا بينادوا بالاخوة والمحبة من الجزائريين اختفوا !
ولا قالو حتى كلمة مبروك او ربنا يوفقكو او حتى شتمونا !!

ده في حين المصريين كانوا بيباركولهم يوم فوزهم قبل ما يوصلولنا

_______________
أما الجزء التاني فده ذنب الحكومة مش ذنب الشعب
الريس هو اللى متصلش وجمال مبارك هو اللى مبيظهرش غير في كورة
والامن مش بيهتم غير بسلامة الاجانب !
____________________________
اما عن اهتمامنا بالكورة
فالكورة هي الحاجة الوحيدة اللى فاضلة في مصر بخيرها !
لا فيها رياء ولا رشوة ولا كوسة ولا ظلم ولا استبداد ولا تدخل حكومي
الحاجة الوحيدة اللى بنظهر فيها بجد

وبعدين الفريق المصري ده صورة مشرفة لمصر كلها امام العالم
باخلاقه العالية واخلاق مشجعيه وما إلى ذلك
يعني المنتخب هو الحاجة الوحيدة اللى بقى يمثل صورة مشرفة لمصر

كفاية لقينا سبب عشان الشعب يفرحله بقلب !
معتقدش المفروض نكتمها بالسرعة دي !

Dodi2010

01-02-2010, 05:02 PM

الموضوع جميييييييييييييييييييييل جدا
بجد كلامك مظبوط وكل الكلام انا كنت عايزة اقوله
بس مكنتش اعرف اتكلم زيك كده
وللاسف كل الكلام اللى انتى قولتيه بيحصل
وفى كل شارع مصرى
وللمرة التانية بقولك الموضوع جمييييييييييييييييل جدا
وموضوعك يستحق عظيم الشكر و التقدير

يالا بينا

01-02-2010, 06:12 PM

بغض النظر عن كل ده
مبرووووووووووووووووووك لمصر وبس

**تسابيح**

02-02-2010, 01:45 PM

بجد الموضوع جامد

بيجسد حال الواقع اللى احنا عايشينه
انا مش بقلل من قيمة الكورة مثلا
بس كل اللى اقدر اقوله ان الناس ما بتصدق تلاقى حاجة تفرحها وتقريبا مفيش حاجة دلوقتى تفرحنا غير الكورة
وهى البطولة انتهت واخدنا الكاس
هتفضل الفرحة مسيطرة على الشارع المصرى يومين تلاتة
وبعد كدا كل واحد هيفكر فى همومه اللى هو وهم نفسه انه نساها لمدة يومين
المشكلة ان اى حاجة فى مصر تحصل متلاقيش اهتماما بيها زى ما بيهتمو بالكورة " مش بقلل من الكورة للمرة التانية "
بس فى جملة كدا واحد الله يمسيه بالخير اسمه "مورفى " لو تسمعى عنه
قال
ابتسم الان فالغد اسوأ!
يعنى فى ناس كتير اوى فى عز البرد مش لاقية بيت تقعد فيه ولو عشة هتلاقى منهم كتير عند الجوامع
والنهاردة مثلا فى صلاة العشا
المسجد كان فيه صف واحد فقط كل دا علشان ماتش كورة
ما الدنيا كلها بتتفرج عليه ونا بردو اتفرجت عليه بس الدنيا موقفتش لما ضاع خمس دقايق من الشوط التانى علشان الصلاة
عامة لسة الدنيا بخير
وياعالم ايه هيحصل بكره
شكرا على الموضوع

دمتم فى رعاية الله

عجبتي أوي **انا مش بقلل من الكورة **
انا كاتبة الموضوع عشان اقلل منها أصلاههههههههههه:d
انا بتكلم علي الناس اللي سابت كل حاجة في حياتها ونسيت مشاكلها
وبقت الكورة همها الوحيد !
بس طبعا الكورة هي بتشغلنا وبعدين دي مكيدة
عايزنا نسيب كل حاجة عشان تفكرنا كروي
مع ان أصلا فيه حاجات كثيرا محتاجة اننا نهتم بيها
لو مش هنهمل في دراستنا والبلد حالة كويس
انا مع الكورة
اما بقي الاهتمام يزيد ضدها طبعا
فاذا زاد الشيء عن حده انقلب لضده
نورت ياباشمهندس:av4056bb7jp3:

**تسابيح**

02-02-2010, 01:48 PM

والله عندك حق

بس انتي عارفة ان الشعب المصري ما بيصدق يلاقي حاجة تفرحوا علشان يخفف بيها الهموم اللي عنده
حتى لو كانت الكورة
انا نفسي فكرت نفس التفكير يا ترى بعد ما كسبنا الكاس هيتغير حاجة الاسعار هتنزل؟ الناس هتستريح ؟الغلابة هيلاقوا ياكلوا ؟
ابدا مفيش حاجة من دي هتحصل !
بس نرجع ونقول دي طبيعة الشعب المصري عايز يفرح وخلاص
شكرا على الموضوع

انا والله كمان فرحة مش عشان الكورة لا
عشان الناس فرحانة
بس بردو لازم نعرف اننا مش نزودها
ونهمل في شغلنا ونقول احنا لما نشجع الفريق نبقي عندنا وطنينا
لا طبعا الوطنية اكبر من كدا
نورتي ياروحي:)

**تسابيح**

02-02-2010, 01:50 PM

موضوع رائع فوق الوصف
جزيتي خيرا عن كل حرف
جزانا الله واياكي ياروحي
نورتي ياقلبي:078111rg3:

**تسابيح**

02-02-2010, 01:52 PM

الناس المنفس الوحيد ليهم كان في الكرة

حتى
لاحظ الفرحة زيادة على الآخر تحس أن في كبت أو ضغط مستني يتفجر
عموماً

هأقول إنا لله وإن إليه راجعون

فعلا ان لله وان اليه راجعون
ربنا يرحمنا برحمته
نورت ياأستاذي الفاضل:022yb4:

**تسابيح**

02-02-2010, 02:09 PM

**تسابيح**

02-02-2010, 02:11 PM

**تسابيح**

02-02-2010, 02:37 PM

**تسابيح**

02-02-2010, 08:26 PM

والله يا تسابيح موضوعك حلو بس زي ما بيقولو خلينا نبص للنصف الممتلئ
شكرا ع زوقك:078111rg3:

لو ملاحظة انتقاد حضرتك هنا بيتخصص في نوعين
حضرتك ادري بيتخصص ف كام نقطه:p
الأول إنه الكورة مخلتش طبقة تحس بالتانية طبقاً لل(وحدة) اللى المفروض حققتها الكورة
والتانية توحيد مصر والجزاير

موضوع الجزاير اتكلمنا فيه كتير ومش حنتناقش فيه تاني
حتى المباراة اللى شهد الاجانب على نزاهتها قالو علينا رشينا الحكم !!
ولو حنتكلم عن الفئة المحترمة في الشعب
فحتى اللى كانوا بينادوا بالاخوة والمحبة من الجزائريين اختفوا !
ولا قالو حتى كلمة مبروك او ربنا يوفقكو او حتى شتمونا !!

ده في حين المصريين كانوا بيباركولهم يوم فوزهم قبل ما يوصلولنا

بجد يابانزر والله فيه ناس في الجزائر محترمة أوي جداا كمان وبتحب المصريين
وقالوا مبروووك
انا بعد موضوع الخناقة وانا مسجلة في منتدي جزائري
فيه ناس كثيراا كانت بتقول اننا اخوة وباركوا لمصر
وناس متعصبة ودخلوا فيه شمال
بس في كل مكان الحلو والوحش
وزي ما قلت ان فكرة الموضوع من شخص جزائري مسلم درس الشارع
الجزائري وانا عملت زيه بقي وشفت المصريين
شفت اننا عندنا نفس الهموم والمشاكل !

_______________
أما الجزء التاني فده ذنب الحكومة مش ذنب الشعب
الريس هو اللى متصلش وجمال مبارك هو اللى مبيظهرش غير في كورة
والامن مش بيهتم غير بسلامة الاجانب !
____________________________

طيب انا دايما بفكر اشمعني دلوقتي الريس معانا؟!!
واللي طول عمره بيكلم الناس وحوليه حرس بملايين
دلوقتي بيقول انا مع المصريين !
مش حاجة غريبة يابانزر ولا انا اللي مكبرة الموضوع !
ما انا عارفة انه ذنب الحكومة بس الناس
لازم تفوق نفسي بجد الوحدة دي تكون بنطالب بيها بحقوقنا
اللي منهوبة واننا نعيش في حياة جميلة زي اي واحد في
الدول المتقدمة ...

اما عن اهتمامنا بالكورة
فالكورة هي الحاجة الوحيدة اللى فاضلة في مصر بخيرها !
لا فيها رياء ولا رشوة ولا كوسة ولا ظلم ولا استبداد ولا تدخل حكومي
الحاجة الوحيدة اللى بنظهر فيها بجد

:078111rg3::078111rg3::078111rg3::078111rg3:لا تعليق :romarioxp6::romarioxp6:

وبعدين الفريق المصري ده صورة مشرفة لمصر كلها امام العالم
باخلاقه العالية واخلاق مشجعيه وما إلى ذلك
يعني المنتخب هو الحاجة الوحيدة اللى بقى يمثل صورة مشرفة لمصر

كفاية لقينا سبب عشان الشعب يفرحله بقلب !
معتقدش المفروض نكتمها بالسرعة دي !

طيب بص دلوقتي الحاج بانزر عالم هندسيات اد الدنيا:p
وفيوم وهو قاعد كدا
اخترع جهاز هيسهل علي الناس كثيررر
وبعدين بتفترج ع التليفزيون
لقيت التليفزيون بيتكلم عن الاعب الفلاني وانتصارته الرياضية
وانجاراته في الرياضة
مش هتقول ساعتها مش المساحة بتاعة التليفزيون
انا استحقها اكثر من اللاعب دا!!
انا اللي بدخل الوطن بجد!
والمشكلة مش كدا وبس دا انت لما تروح عشان تعمل براءة اختراع
الراجل اللي هيسجلك هيطلب منك انها تتكتب باسمك واسمه
هي دي الوطنية !
حتي مش هتلاقي حد يكلم ولا حتي الريس ...
وهتسافر بره وتخدم ناس وناس تهتم بيك وتبقي احسن واحد هناك
وحضرتك في بلدك محدش كان بيقول حتي سلام عليكم :excl:
ياريت تكون فهمتني
نورتني ياباشمهندس
وان شاء الله تخترع ومش يبقي مجرد خيال

**تسابيح**

02-02-2010, 08:29 PM

بغض النظر عن كل ده
مبرووووووووووووووووووك لمصر وبس
الله يبارك فيكي:)
عقبال الاحباب والاقارب
نورتي:romarioxp6:

aissat asmaa

03-02-2010, 07:45 PM

مبروووووووك الفوز و لكم ان تفرحوا و نحن معكم فارحون

BaNZeR

05-02-2010, 03:09 PM

بجد يابانزر والله فيه ناس في الجزائر محترمة أوي جداا كمان وبتحب المصريين
وقالوا مبروووك
انا بعد موضوع الخناقة وانا مسجلة في منتدي جزائري
فيه ناس كثيراا كانت بتقول اننا اخوة وباركوا لمصر

بجد انا مش عارف انتي فضلتي ازاي في المنتدى اصلاً :d
في واحد اعرفه كان بيقول كل الاماكن الجزائرية اللى كان مسجل فيها
(منتديات -جرايد - )
كان بتقابله رسالة واحدة
"موقوف :d"

وناس متعصبة ودخلوا فيه شمال
بس في كل مكان الحلو والوحش

وفي مكان حتلقي فيه 90% كويسين

وفي مكان برده حتلقي فيه 90% وحشين
مينفعش نساوي الاتنين ببعض

وزي ما قلت ان فكرة الموضوع من شخص جزائري مسلم درس الشارع
الجزائري وانا عملت زيه بقي وشفت المصريين
شفت اننا عندنا نفس الهموم والمشاكل !

مفهمتش النقطة دي !

طيب انا دايما بفكر اشمعني دلوقتي الريس معانا؟!!
واللي طول عمره بيكلم الناس وحوليه حرس بملايين
دلوقتي بيقول انا مع المصريين !
مش حاجة غريبة يابانزر ولا انا اللي مكبرة الموضوع !
ما انا عارفة انه ذنب الحكومة بس الناس
لازم تفوق نفسي بجد الوحدة دي تكون بنطالب بيها بحقوقنا
اللي منهوبة واننا نعيش في حياة جميلة زي اي واحد في
الدول المتقدمة ...

ده حوار كبير اوي مش حينفع نفسره بالرياضة بس :d

طيب بص دلوقتي الحاج بانزر عالم هندسيات اد الدنيا:p
وفيوم وهو قاعد كدا
اخترع جهاز هيسهل علي الناس كثيررر

بعد الشر عليا كملي :d

وبعدين بتفترج ع التليفزيون
لقيت التليفزيون بيتكلم عن الاعب الفلاني وانتصارته الرياضية
وانجاراته في الرياضة
مش هتقول ساعتها مش المساحة بتاعة التليفزيون
انا استحقها اكثر من اللاعب دا!!
انا اللي بدخل الوطن بجد!
والمشكلة مش كدا وبس دا انت لما تروح عشان تعمل براءة اختراع
الراجل اللي هيسجلك هيطلب منك انها تتكتب باسمك واسمه
هي دي الوطنية !
حتي مش هتلاقي حد يكلم ولا حتي الريس ...
وهتسافر بره وتخدم ناس وناس تهتم بيك وتبقي احسن واحد هناك
وحضرتك في بلدك محدش كان بيقول حتي سلام عليكم :excl:
ياريت تكون فهمتني
نورتني ياباشمهندس
وان شاء الله تخترع ومش يبقي مجرد خيال

كده احنا دخلنا في موضوع سياسي وانا مبحبش اتكلم في السياسة :d

دلوقتي انا كمواطن وفرد من افراد المحروسة مصر
مطلوب مني مفرحش لفوز المنتخب
عشان خاطر كان الاولى إني أفرح لوجود عالم في بلدي ؟
وبما إنه بلدي مفهاش اهتمام حتى بالعلماء يبقى مفرحش أبداً ؟

ايوه البلد بت .... وعايزة ضرب ال.....
محنا عارفين كل ده
وكل ده حاصل سواء المنتخب فاز ولا خسر

لكن دلوقتي المنتخب فاز
اسم مصر ظهر مرة في العالم في مكان متميز
وصلنا المستوى العاشر على مستوى العالم
وخدنا بطولة افريقيا للمرة السابعة

اخيراً الواحد من ساعة ما اتولد شاف انجاز لبلده بمجهوده
مفرحش ؟
عشان الحكومة وحشة ومش بتهتم بالعلم الحقيقي ؟

سيبو الناس تعيش الحلم ولو مرة
مهو احتمال خلاص تبقى آخر مرة

**تسابيح**

06-02-2010, 10:01 AM

بجد انا مش عارف انتي فضلتي ازاي في المنتدى اصلاً :d
زي الناس:d

في واحد اعرفه كان بيقول كل الاماكن الجزائرية اللى كان مسجل فيها
(منتديات -جرايد - )
كان بتقابله رسالة واحدة
"موقوف :d"
بصراحة عمرها محصلتش معايا لسه :blush:

وفي مكان حتلقي فيه 90% كويسين

وفي مكان برده حتلقي فيه 90% وحشين
حتي لو لقينا النسبة الكبيرة من الوحشين
ليه مش نبص للنص الحلو
10في الميه كويسين برده

مفهمتش النقطة دي !
كان ياماكان كان فيه واحد جزائري عمل موضوع في منتدي جزائري بردو
وقال انه بعد الماتش راح يشوف احوال الناس ...
واكتشف حاجات غريبة ... قريبة من اللي انا كاتبه
ورحت بقي قلت لازم انا كمان اقوم بالواجب مع المصريين

دلوقتي انا كمواطن وفرد من افراد المحروسة مصر
مطلوب مني مفرحش لفوز المنتخب
انا قلت كدا :confused:

عشان خاطر كان الاولى إني أفرح لوجود عالم في بلدي ؟
وبما إنه بلدي مفهاش اهتمام حتى بالعلماء يبقى مفرحش أبداً ؟
لا طبعا انا مقلتش كدا
اولا انا علي فكرة فرحانة جدا بعد الماتش
عشان المصرييين فرحانيين ودا حاجة تسعدني
وكمان عشان هشوف الاغاني الوطنية:d
اللي خلاني اقول كدا ان لما فتحت التليفزيون
كل لما اشوف قناة لاقي قصة حياة جدو وستو:d
يبقي الموضوع ميوصلش للدرجة دي
احنا انا فرحانيين وكله تمام بس مش لدرجة
انهم يسيبوا كل حاجة في البلد ويركزوا في الكورة فقط

ايوه البلد بت .... وعايزة ضرب ال.....
محنا عارفين كل ده
وكل ده حاصل سواء المنتخب فاز ولا خسر

لكن دلوقتي المنتخب فاز
اسم مصر ظهر مرة في العالم في مكان متميز
وصلنا المستوى العاشر على مستوى العالم
وخدنا بطولة افريقيا للمرة السابعة
ألف مبررررررررررررووووووووك:av4056bb7jp3:

اخيراً الواحد من ساعة ما اتولد شاف انجاز لبلده بمجهوده
مفرحش ؟
عشان الحكومة وحشة ومش بتهتم بالعلم الحقيقي ؟

سيبو الناس تعيش الحلم ولو مرة
مهو احتمال خلاص تبقى آخر مرة

سيبو دي ليه انا
علي العموم اانا متأسفلكم
مش كان مفروض اكتب اصلا الموضوع السخيف دا
وشيل الفرحة
سلالالالالالالالالالالام

الشفق الباكي

06-02-2010, 11:44 AM

بس كل اللى اقدر اقوله ان الناس ما بتصدق تلاقى حاجة تفرحها وتقريبا مفيش حاجة دلوقتى تفرحنا غير الكورة
وهى البطولة انتهت واخدنا الكاس
هتفضل الفرحة مسيطرة على الشارع المصرى يومين تلاتة
وبعد كدا كل واحد هيفكر فى همومه اللى هو وهم نفسه انه نساها لمدة يومين

وانا اضم صوتى فى الحته دى لباشمهندس محموود

بصى حواليكى لو لقيتى حاجه تخلى الشعب دا يفرح غير الكوره قولي ايه هى والناس مستعده تسيب الكوره وتتوجهلها

قال
ابتسم الان فالغد اسوأ!

دى كمان صح انا معاها ابتسم فالقادم اسوأ

انا بجد والله كل مابيتفتح موضوع عن احوال البلد انا بحس انى بتقتل من جوا
لان مفيش حاجه لاغلب الناس تطلعهم من حالتهم الوحشه اوى اوى وكملى اوى دى لغايه ماتزهقى
تعرفى الكوره ماطول عمرها بتتلعب وكان لها جمهور اشمعنى دلوقتى كتيييير اولا والناس حاسه بيها كلهم
اسم بلد بيترفع فى حاجه واحنا اساسا تقريبا حاسيين انه شويه وطوب الارض هيدوس عليه
فسااد فى كل شبر فى ارض بلدك والحمد لله اخيرا حسينا على الاقل ان فى حاجه نضيفه فيها امل
الناس حاسه ان اللى لعبوا ادام كل المنتخبات دى ادوا صوره حلوه عن بلدنا لان اخلاقهم كانت كويسه ولعبهم كان نضيف
كل دا الناس شافته فى الماتشات اللى اتلعبت
الناس اللى كان اهتمامها الكوره من زمان اتفرجوا علشان اهتمامهم بالكوره
والناس اللى مش اهتمامها الكوره اتفرجت على بلدها اتفرجت علشان مره تحس ان علم بلدها بيترفع فى حاجه

عامه انا شايفه ان مووضوعك عندك حق فيه
بس مفيش مانع ان الناس تاخد يومين
الناس هترجع تانى تمشى فى الشارع تكلم نفسها مش هينسوا همهم يعنى
ولسه مشاكل البلد زى ماهى
ولسه اللى بيسرق بيسرق
ولسه الحكومه هتبقى هتبقى اسوأ اسوأ
والمستشفيات هتتملى
لسه الناس هطق اكتر من دلوقتى
لان بلدنا مش بتشوف يوم احلى من اليوم اللى قبله
بجد ماتعرفيش ليه
اشمعنى احنا بالذات بنمشى لورا مش لادام
اشمعنى احنا ربنا رزقنا بحكومه مش بتهتم
اشمعنى احنا الناس بتسرق فلوس بنوك وفص ملح وداب
اشمعنى احنا .....................؟؟؟

انا كل اللى استنتجته ان احنا شعب مميز للغايه
على فكره احيانا بحس ان احنا شعب متبلد سلبى
على رأى اللى قال
كل واحد بيقول خلينى ماشى جنب الحيط لحد ماهتقع على راسه
المشكله ان موضوعك دا مش ماشى كوره بس
انتى اتكلمتى فى حاجه لازم نتكلم بسببها عن اهتمامات الشعب وحاله
هو اللى جايبنا ورا السكووووووووت
عايزين البلد تتغير الناس تتكلم دا الحل

وبالنسبه بقى لموضوع الجزائر
انا شايفه انهم فى الماتش كان الحل المثل ليهم اللى حصل
فوق دا كله كمان
هم شتموا كتير اوى
بس اللى مش منطقى بقى
دلوقتى
تحسى ان الشعب دا كاره الشعب دا والعكس
مع انه كان ماتش كوره وراح لحاله
مش مبرر اللى بيحصل دا
كأن كل شعب بيحارب اسرائيييييل :angry2:
ميرسى ياتسابيح على التوبيك
بس صدقينى هو اكبر من مجرد توبيك او كلام عن بطوله اخدناها
وانتقاد اللى بيحصل بعدها
دى بلدنا فى كل وقت
مع اختلاف ان كان فى شويه نااااااااس كتير مبسوطين فى الوقت دا على عكس العاده
لكن لو كنتى نزلتى فى وقت تانى
كنتى مش هتشوفى مستشفى ودار مسنين وعجوز هدومه مقطعه
لا كنت هتشوفى واحد ماشى يكلم نفسه
وشوويه عربيااات كتير اوى فى الطريق والحته زحمه والدخان حواليكى والناس مش طايقه بعض ولا طايقه الوقفه ورد فعلها انها تشتم فى بعضهااا
هتلاااقى فى الجنب البعيد
عيل صغير بيشرب مخدرااات
وشويه عيال على الارض مع مامتهم بيتسولوا
كنت هتشوووفى شويه ناس بتتخانق من بعيد على حاجه صغيره او كلمه اتقالت واتفهمت غلط كنتى هتسمعى ......... كنت هتحسى انك مخنوووقه من الزحمه وشكل الناس اللى هيصعب عليكى
تعرفى بحمد ربنا كتير اوى ان تعاملى مع السن دا اللى هو سننا يعنى مش السن اللى اكبر منه
مكن ماتحسيش بهم البلد فى شباب الجامعه بس تحسيه اوى فى الشباب بعد الجامعه لما مش يلاقوا شغل ولا يلاقوا شغل مش مناسب اساسا ليهم
لما ناس فيهم تضطر تهاجر هجره غير شرعيه ععلشان يموتوا بعد كام كيلو فى البحر ولا تشوفي الشباب فى الشارع من فراغهم بيضايقوا فى دى شويه ويتريقوا على الراجل اللى جاى من بعيد علشان منظره شويه وهم حالهم اساسا يصعب على اى حد
كنتى هتمشى شويه كمان وتحسى ان الناس لو جالها اى فرصه تخرج من البلد دى هتخرج
المنظر كان هيبقى اسوود بكتير فى اللحظه دى عن اللى انتى شوفتيه
وللاسف كان هيبقى الواقع وكل دا وانتى لسه ماكملتيش الشارع
لو مشيتى شويه كمان كنتى هتشوفى مصايب احمدى ربنا بقى ان كان فى ماتش وان انتى ماكملتيش الشارع
الماتش اللى كسبنااه كان بنج مخدر مفعوله هيرووح والناس هتفوق منه على همها ماتخافيييش
لنااا الله
نفسى نبطل سلبيه خلينى سااكت وخلينى فى حالى
نفسى الناس مره تقول بصوت عالى انا زهقت ماتركنش على كل حاجه شويه وتقول هتفرحنى يوووم وتانى يوم هتصحى على همك تااانى
اعتقد احنا الشعب الوحيد اللى نابيقولش لا
يابختك يابابا بينا والله

ثاانكس تسابيح على التوبيك
وعذرا على الاطاله
وعلى الرد شويه اللى ممكن يكون بعد عن النقطه اللى كنتى عايزه تتكلمى فيها

S2N55

06-02-2010, 10:26 PM

http://img507.imageshack.us/img507/5576/55021logo2jp9.gif

هدهدى

08-02-2010, 02:26 AM

بصراحة الموضوع رائع بس الناس بتتشغل بالكوره وبتفرح وفى الاخر يتحول الموضوع لانتقام بين مصر والجزئر وبقول حاجه احنا مش هناخد حاجة من الكلام ده كله يعنى كلهم يكسبوا وياخدوا فلوس واحنا نضيع وقتنا على المنتخب والموضوع معدش بيتلعب للرياضة ده بيتلعب للفلوس وهما ياخدوها والشعب المصرى يفضلفقران ومش لاقى شغل:abdoog8:

**تسابيح**

08-02-2010, 04:29 PM

نسيت أقلكم علي الست اللي مطبخها اتحرق
لما كانت بتشاهد مباراة مصر والجزائر
::::::::::
والطلاب اللي كان وراهم امتحانات
وسابوا مذاكرتهم عشان يشوف الكورة
:::::::::::::::::
والمحاكم اللي كان فيها قضايا
طلاق وفرقة وشتات
كل يوم الكورة بتثبت امكانيتها في تجميع المصريين

**تسابيح**

08-02-2010, 04:31 PM

مبروووووووك الفوز و لكم ان تفرحوا و نحن معكم فارحون
الله يبارك فيكي ياقلبي
عقبالكم ان شاء الله
نورتي ياحبيبتي

أ/رضا عطيه

09-02-2010, 01:12 PM

أتحدى لوكان فيه واحد من اللى قالواالكلام الكبير ده
هدومه مقطعه ولا بيقف فى طابور العيش ولا واقف فى طابور أمام مستودع غاز من بعد الفجر نفسه يروح لأولاده بأنبوبة غاز مليانه لو هيدفع نص مرتبه - لكن التكييف والغاز الطبيعى والمدارس الأجنبيه والطموح لل-----
إنتم شباب اليوم نعم وأكيد حكامنا بعد بكره
وكلامكم هحفظه لناهنا وهخليه لولادى ذكرى
وإن طال ربنا فى عمرى مش هضيع الفرصه
واعلن للعالم المدارى وع الحلم اللى كان فكره
وحكموا البلد بالعدل من على ترابيزة السفره
ياعالم سيبونا لحالنا وشارب المر بحياته أدرى
كان لازم أفرح قوى ولايهمنى كلام من بدره
علشان دى بلدالعزه وكل إنسان له ألف نظره
ومن الصعب دلوقتى لفكر واحد تلاقى أسرى

وشكرا وبالتوفيق للجميع

domyat

11-02-2010, 02:17 PM

لسلام عليكم ورحمة الله وبركاته

فازت مصر برباعية نظيفة في مباراة شهدت 3 كروت حمراء للفريق الجزائري الشقيق
في بداية الأمر ان لم تشاهد اللقاء ستقول 3 بطاقات حمراء اذن الحكم غير عادل
نعم انه لم يكن عادلا
ولكن في حق مصر
ما حدث قي اللقاء كان يستدعي أكثر من ذلك
لن أتحدث طويلا وأترككم مع الصور التي ستضع حدا للقيل والقال

1- في الدقيقة 2 ركلة جزاء صحيحة غير محتسبة لمتعب وكان يستحق معها رفيق حليش انذارا
http://i50.tinypic.com/b7j8de.gif (http://groups.google.com.sa/group/mmuzcom?hl=ar)
2-فاول للمحمدي و عرقلة من يزيد منصوري في الشوط الأول ولم يحصل علي انذار
http://i45.tinypic.com/3145m5h.gif (http://groups.google.com.sa/group/mmuzcom?hl=ar)
3- ركلة جزاء صحيحة لمتعب و كانت تستحق طرد مباشر لحليش لانها فرصة هدف مؤكد
http://i45.tinypic.com/28b9y6p.jpg (http://groups.google.com.sa/group/mmuzcom?hl=ar)
4-لقطة ضرب شاوشي لحكم اللقاء وكانت تستحق كارت أحمر مباشر في الدقيقة 38 من الشوط الأول
http://i49.tinypic.com/2u94leh.gif (http://groups.google.com.sa/group/mmuzcom?hl=ar)
5- ركلة جزاء لمتعب لم تحتسب في الشوط التاني أعقبها خروجه مصابا وكانت تشتحق كارت أحمر علي مجيد بوقرة
http://rapidpic.org/images/m.gif (http://groups.google.com.sa/group/mmuzcom?hl=ar)
6-تسلل علي محمد زيدان من الناحية اليمني واحتسب وكان غير متسلل وكانت فرصة اضافة هدف أخر
http://i50.tinypic.com/n33q5l.gif (http://groups.google.com.sa/group/mmuzcom?hl=ar)
7-عرقلة لمحمد زيدان و ركلة جزاء صحيحة غير محتسبة وانذار لعنتر يحيي لم يحتسب أيضا
http://rapidpic.org/images/z2.gif (http://groups.google.com.sa/group/mmuzcom?hl=ar)
8- تدخل بقصد الايذاء من كريم زياني علي قدم احمد المحمدي وكانت تستحق الانذار
http://i47.tinypic.com/33wkrj5_th.gif
9- خشونة غزال مع احمد حسن وكانت تستحق الانذار
http://i47.tinypic.com/sdlgr8.gif (http://img704.imageshack.us/img704/5318/a7mad7assan5oshona1.gif)
10- طرد صحيح ومستحق لنذير بلحاج لتدخل عنيف بقصد الايذاء وسلوك غير رياضي
http://i45.tinypic.com/r2q0cg_th.gif (http://img43.imageshack.us/img43/7775/mo7amadybel7ag5oshona1.gif)

11- التسلل المحتسب علي جدو في الكرة التي تم فيها طرد شاوشي وكانت ركلة جزاء صحيحة

http://i48.tinypic.com/35ja2l0.gif (http://groups.google.com.sa/group/mmuzcom?hl=ar) http://rapidpic.org/images/jdo21jzj.gif (http://groups.google.com.sa/group/mmuzcom?hl=ar) http://rapidpic.org/images/jdo23.gif (http://groups.google.com.sa/group/mmuzcom?hl=ar)

12- مجيد بو قرة يسب مساعد الحكم بالإنجليزية ولم يحصل علي طرد مستحق
http://i46.tinypic.com/30rpp38.gif (http://groups.google.com.sa/group/mmuzcom?hl=ar)

الملخص
قرارات مصيبة للحكم
-ركلة جزاء صحيحة 100% لمنتخب مصر وطرد مستحق لحليش
ولكن كان من المفروض ان يكون طرد مباشر لأنه أعاقه عن تسجيل هداف مؤكد
- انذارا مستحقا لمحمود فتح الله من مصر
- طرد مستحق لكل من نذير بلحاج وفوزي شاوشي من الجزائر
- طرد مباشر لحليش بدل من انذاره
- افساد ركلة جزاء لمصر في لقطة طرد شاوشي

قرارات خاطئة لمساعد الحكم
- افساد هجمتين واعدتين لمنتخب مصر
واحد كانت انفرادا كاملا والأخري ركلة جزاء
قرارات خاطئة لكوفي كودجا
- تكاسل عن انذار رفيق حليق وركلة جزاء لمصر ف الدقيقة 2
- تكاسل عن طرد مباشر لحليش في اعاقته لمتعب في ركلة الجزاء المحتسبة
- تكاسل عن ركلة جزاء لمتعب وطرد مستحق لمجيد بوقرة في الشوط الثاني
- تكاسل عن ركلة جزاء وانذار لعنتر يحيي في تدخله علي زيدان
- تكاسل عن ركلة جزاء لزيدان وانذار لعنتر يحيي
- تكاسل عن طرد فوزي شاوشي في الدقيقة 38 لقيامه بسلوك غير رياضي بضربه للحكم
- تكاسل عن طرد مجيد بوقرة بعد تلفظه بالفاظ غير لائقة
- تكاسل عن انذارات لكل من يزيد منصوري وكريم زياني و غزال
لتدخلات عنيفة مع لاعبي منتخب مصر

عفوا كوفي كودجا
لنا 4 ركلات جزاء غير محتسبة
ركلتين لمتعب وواحدة لزيدان وواحدة لجدو ولنا انفراد لزيدان غير متسلل
بجانب كارتين أحمر لبوقرة وشاوشي مبكرا !!!

كوفي كودجا : لن نسامحك

a7med_sale7

12-02-2010, 12:37 AM

مضوع رائع جدا

أ/رضا عطيه

12-02-2010, 07:09 AM

domyatا الله عليك تسلم إيديك وأيـــــادى دمياط كلها علشان خاطر عنيك

وإليكم هذا البيان
ويقولولى ماتفرحشى قال وأنا فى طابور العيش هقول موال
وأنا شايل أنبوبه الغاز ونفسى فى كباية شاى ع البوتاجاز
هقول الله عليكم ياولاد بلدى ياراعبين أسود ونمور وافيال
الفقر والبهدله مش جديده علينا دا احنا وارثنهاأجيال واجيال
والفساد طول عمره مالى الكون مادام فيه طمع وفيه أموال
والمدينه الفاضله فى أفكارنا بس هتفضل كدا خيال فى خيال
ودا مش دفاع عن الفساد والمفسدين دىدعوه لرب العالمين
يقصف عمرهم كلهم-قولوا أمين وهنفرح برضه فى كل حال

محمد.فوكس

12-02-2010, 07:42 AM

محمد.فوكس

12-02-2010, 07:48 AM

صاحب الموضوع .. هوعدك اني اكلم سمير زاهر يحاول يعمل حاجة من اتنين:
-اما يخلي المنتخب يخسر على طول و خصوصا قدام الجزاير.
- و لو امكن نلغي الكورة خالص.
و ساعتها كل مشاكلنا هتتحل.
________________________
يا ريت متعلقش خطأ القذائريين البربر على شماعة كرة القدم.
كرة القدم ملهاش ذنب.
هم اللي قلبوها حرب .. و في الاخر المصريين طربقوها فوق دماغ الجزايريين.
هم اللي اساؤا التعامل معها.
__________________________
على فكرة بعد ما فرمنا الجزاير بشرف.
العالم خد صورة حضارية عن المصريين و عرف انهم مش همج.
يمكن مش هتصدقني .. بس في ناس كتير عايشين بره لقو الاجانب خدو صورة كويسة اوي عنهم و عرفو ان المصريين متحضرين.
__________________
و لاحظ انك عايز تفسد علينا فرحتنا و جيت تقول الكلام ده لما كسبنا.
لكن لما نخسر .. بتقولولنا المفروض تشجعوا الجزاير في كاس العالم.

**تسابيح**

12-02-2010, 09:19 PM

وانا اضم صوتى فى الحته دى لباشمهندس محموود

بصى حواليكى لو لقيتى حاجه تخلى الشعب دا يفرح غير الكوره قولي ايه هى والناس مستعده تسيب الكوره وتتوجهلها

دى كمان صح انا معاها ابتسم فالقادم اسوأ

انا بجد والله كل مابيتفتح موضوع عن احوال البلد انا بحس انى بتقتل من جوا
لان مفيش حاجه لاغلب الناس تطلعهم من حالتهم الوحشه اوى اوى وكملى اوى دى لغايه ماتزهقى
تعرفى الكوره ماطول عمرها بتتلعب وكان لها جمهور اشمعنى دلوقتى كتيييير اولا والناس حاسه بيها كلهم
اسم بلد بيترفع فى حاجه واحنا اساسا تقريبا حاسيين انه شويه وطوب الارض هيدوس عليه
فسااد فى كل شبر فى ارض بلدك والحمد لله اخيرا حسينا على الاقل ان فى حاجه نضيفه فيها امل
الناس حاسه ان اللى لعبوا ادام كل المنتخبات دى ادوا صوره حلوه عن بلدنا لان اخلاقهم كانت كويسه ولعبهم كان نضيف
كل دا الناس شافته فى الماتشات اللى اتلعبت
الناس اللى كان اهتمامها الكوره من زمان اتفرجوا علشان اهتمامهم بالكوره
والناس اللى مش اهتمامها الكوره اتفرجت على بلدها اتفرجت علشان مره تحس ان علم بلدها بيترفع فى حاجه

عامه انا شايفه ان مووضوعك عندك حق فيه
بس مفيش مانع ان الناس تاخد يومين
الناس هترجع تانى تمشى فى الشارع تكلم نفسها مش هينسوا همهم يعنى
ولسه مشاكل البلد زى ماهى
ولسه اللى بيسرق بيسرق
ولسه الحكومه هتبقى هتبقى اسوأ اسوأ
والمستشفيات هتتملى
لسه الناس هطق اكتر من دلوقتى
لان بلدنا مش بتشوف يوم احلى من اليوم اللى قبله
بجد ماتعرفيش ليه
اشمعنى احنا بالذات بنمشى لورا مش لادام
اشمعنى احنا ربنا رزقنا بحكومه مش بتهتم
اشمعنى احنا الناس بتسرق فلوس بنوك وفص ملح وداب
اشمعنى احنا .....................؟؟؟

انا كل اللى استنتجته ان احنا شعب مميز للغايه
على فكره احيانا بحس ان احنا شعب متبلد سلبى
على رأى اللى قال
كل واحد بيقول خلينى ماشى جنب الحيط لحد ماهتقع على راسه
المشكله ان موضوعك دا مش ماشى كوره بس
انتى اتكلمتى فى حاجه لازم نتكلم بسببها عن اهتمامات الشعب وحاله
هو اللى جايبنا ورا السكووووووووت
عايزين البلد تتغير الناس تتكلم دا الحل

وبالنسبه بقى لموضوع الجزائر
انا شايفه انهم فى الماتش كان الحل المثل ليهم اللى حصل
فوق دا كله كمان
هم شتموا كتير اوى
بس اللى مش منطقى بقى
دلوقتى
تحسى ان الشعب دا كاره الشعب دا والعكس
مع انه كان ماتش كوره وراح لحاله
مش مبرر اللى بيحصل دا
كأن كل شعب بيحارب اسرائيييييل :angry2:
ميرسى ياتسابيح على التوبيك
بس صدقينى هو اكبر من مجرد توبيك او كلام عن بطوله اخدناها
وانتقاد اللى بيحصل بعدها
دى بلدنا فى كل وقت
مع اختلاف ان كان فى شويه نااااااااس كتير مبسوطين فى الوقت دا على عكس العاده
لكن لو كنتى نزلتى فى وقت تانى
كنتى مش هتشوفى مستشفى ودار مسنين وعجوز هدومه مقطعه
لا كنت هتشوفى واحد ماشى يكلم نفسه
وشوويه عربيااات كتير اوى فى الطريق والحته زحمه والدخان حواليكى والناس مش طايقه بعض ولا طايقه الوقفه ورد فعلها انها تشتم فى بعضهااا
هتلاااقى فى الجنب البعيد
عيل صغير بيشرب مخدرااات
وشويه عيال على الارض مع مامتهم بيتسولوا
كنت هتشوووفى شويه ناس بتتخانق من بعيد على حاجه صغيره او كلمه اتقالت واتفهمت غلط كنتى هتسمعى ......... كنت هتحسى انك مخنوووقه من الزحمه وشكل الناس اللى هيصعب عليكى
تعرفى بحمد ربنا كتير اوى ان تعاملى مع السن دا اللى هو سننا يعنى مش السن اللى اكبر منه
مكن ماتحسيش بهم البلد فى شباب الجامعه بس تحسيه اوى فى الشباب بعد الجامعه لما مش يلاقوا شغل ولا يلاقوا شغل مش مناسب اساسا ليهم
لما ناس فيهم تضطر تهاجر هجره غير شرعيه ععلشان يموتوا بعد كام كيلو فى البحر ولا تشوفي الشباب فى الشارع من فراغهم بيضايقوا فى دى شويه ويتريقوا على الراجل اللى جاى من بعيد علشان منظره شويه وهم حالهم اساسا يصعب على اى حد
كنتى هتمشى شويه كمان وتحسى ان الناس لو جالها اى فرصه تخرج من البلد دى هتخرج
المنظر كان هيبقى اسوود بكتير فى اللحظه دى عن اللى انتى شوفتيه
وللاسف كان هيبقى الواقع وكل دا وانتى لسه ماكملتيش الشارع
لو مشيتى شويه كمان كنتى هتشوفى مصايب احمدى ربنا بقى ان كان فى ماتش وان انتى ماكملتيش الشارع
الماتش اللى كسبنااه كان بنج مخدر مفعوله هيرووح والناس هتفوق منه على همها ماتخافيييش
لنااا الله
نفسى نبطل سلبيه خلينى سااكت وخلينى فى حالى
نفسى الناس مره تقول بصوت عالى انا زهقت ماتركنش على كل حاجه شويه وتقول هتفرحنى يوووم وتانى يوم هتصحى على همك تااانى
اعتقد احنا الشعب الوحيد اللى نابيقولش لا
يابختك يابابا بينا والله

ثاانكس تسابيح على التوبيك
وعذرا على الاطاله
وعلى الرد شويه اللى ممكن يكون بعد عن النقطه اللى كنتى عايزه تتكلمى فيها
شكراا ياموني ع رأيك
ربنا يخليكي ياقلبي
ان شاء الله تكوني بخير
نورتي الموضوع:av4056bb7jp3:

**تسابيح**

12-02-2010, 09:21 PM

**تسابيح**

12-02-2010, 09:23 PM

**تسابيح**

12-02-2010, 09:26 PM

مضوع رائع جدا
شكرا ع زوقك
نورت الموضوع

**تسابيح**

12-02-2010, 09:39 PM

حاضر .. هنقول للمنتخب المرة الجاية ما يكسبش يمكن المشاكل الزوجية تقل.
مش عارف ليه بتقولي كده لما كسبنا.

ماشي ياريت حضرتك تقوله :006et4:
أنا بقول حاجات شفتها وحاجات اتحكتلي
مش بقول خيالات يعني
بنقل الواقع بس
:romarioxp6:

صاحب الموضوع .. هوعدك اني اكلم سمير زاهر يحاول يعمل حاجة من اتنين:
-اما يخلي المنتخب يخسر على طول و خصوصا قدام الجزاير.
- و لو امكن نلغي الكورة خالص.
و ساعتها كل مشاكلنا هتتحل.

طيب أولا أنا بنت صاحبة الموضوع وليس صاحب الموضوع
ياريت تخلي بال حضرتك من الملاحظة دي
يااريت المنتخب يخسر ادام الجزائر عشان انا مع الجزائر:d
حضرتك بتقول فيها
أيوة لو الكورة اتلغت مشاكل هتتحل :006et4:

يا ريت متعلقش خطأ القذائريين البربر على شماعة كرة القدم.
كرة القدم ملهاش ذنب.
هم اللي قلبوها حرب .. و في الاخر المصريين طربقوها فوق دماغ الجزايريين.

هم اللي اساؤا التعامل معها.

يا أخي اتق الله في كلامك
(ما يلفظ من قول الا لدية رقيب عتيد)
متخليش الغضب يخليك تشتم ناس مسلمة زيك
وممكن كمان يكون فيهم أحسن من ناس عايشة في مصر
متحكمش ع حد الا لما تتعامل معاه
عايز الحقيقة الاثنين غلطوا :bosyht9:
على فكرة بعد ما فرمنا الجزاير بشرف.
العالم خد صورة حضارية عن المصريين و عرف انهم مش همج.
يمكن مش هتصدقني .. بس في ناس كتير عايشين بره لقو الاجانب خدو صورة كويسة اوي عنهم و عرفو ان المصريين متحضرين.

ياسلام ع التحضر اللي احنا عايشين فيه !
ما شاء الله
الله ما لا حسد :o
وربنا انا بنت بتكلمني بصيغة المذكر ليه :(

و لاحظ انك عايز تفسد علينا فرحتنا و جيت تقول الكلام ده لما كسبنا.
لكن لما نخسر .. بتقولولنا المفروض تشجعوا الجزاير في كاس العالم.

أيوة أنا باحب افسد الفرحة
مش باحب اشوف المصريين فرحانيين
يمكن بكرهم :(
تعرف انا اصلا مش هتناقش مع حضرتك
لأنك أسلوب من الأول فيه تهكم وسخرية
ع العموم شكرااا أوووي ع زوقك
ياريت تخلي بال حضرتك من الكلمات اللي بالأحمر
نورت
سلالالالالالالالالالالالام

محمد.فوكس

13-02-2010, 06:05 AM

يا استاذة تسابيح النجوم.
اولا انا فعلا اسلوبي ساخر.. لكن مش معناه اني بتريق عليكي..حضرتك اكيد عارفة ان في حاجة اسمها صحافة ساخرة و دي مش حاجة وحشة.
دي طريقة لتوصيل رأيي.
_________________
ثانيا شئنا او ابينا احنا بنحب الكورة و بنفرح لما المنتخب يكسب..انا واحد لا بشجع اهلي ولا زمالك و لا بشوف الدوري المصري خالص.
و التشجيع بالنسبالي هو منتخب مصر.
_______________
حضرتك ربطي بين التحضر و بين الظروف المنيلة بستين نيلة اللي احنا عايشين فيها.
انا اقصد التحضر في التعامل مع الشعوب التانية و خصوصا لو كان شعب همجي.و اننا ردينا عليهم في الملعب.
______________
بالنسبة للجزاير ان فيها ناس كويسين .. انا مقلتش ان مفيهاش..يتقطع لساني.
بس .. احنا كنا بنقول على المتعصبين قلة .. لكن اتضح ان الكويسين اللي بتقولي عليهم هم اللي قلة و ندرة كمان.
و مش عارف ليه لما الناس اللي بيسموا نفسهم عقلا لما يكونوا عايزين يحلو المشكلة دايما يقولو ان مصر هي اللي غلطانة و الجزاير ملايكة.
و انا شايف ان الجزاير راكبها الغلط من فوق لتحت.
بس عموما خلاص الكلام ده كان وقته قبل يوم 28 يناير..لكن مدام خلاص فرمناهم و عرفناهم مقامهم و فضحنا همجيتهم قدام العالم.
لا عايز ادلة و لا ادافع عن مصر و لا اقول الجزاير غلطانة..الرد وصل.
_________________
اخر حاجة انتي قولتي انك بتحبي تفسدي فرحة المصريين..انا معتقدش انك كده.
بس لو تلاحظي معايا ان مواضيع زي دي مش بتتفتح غير لما نكسب.

يعني المنتخب ذنبه ايه...مهي مشاكل ما بعد انجولا 2010 هي مشاكل ما قبلها.
سلام..

**تسابيح**

13-02-2010, 02:25 PM

يا استاذة تسابيح النجوم.
اولا انا فعلا اسلوبي ساخر.. لكن مش معناه اني بتريق عليكي..حضرتك اكيد عارفة ان في حاجة اسمها صحافة ساخرة و دي مش حاجة وحشة.
دي طريقة لتوصيل رأيي.
_________________

ما هي الصحافة الساخرة دي بتسخر من البني آميين اللي بتكتب عنهم
وبعدين احنا هنا في منتدي مش في الجريدة:d

ثانيا شئنا او ابينا احنا بنحب الكورة و بنفرح لما المنتخب يكسب..انا واحد لا بشجع اهلي ولا زمالك و لا بشوف الدوري المصري خالص.
و التشجيع بالنسبالي هو منتخب مصر.
_______________

لو حضرتك لاحظت أني قلت أنا كمان كنت فرحانة مش عشان المنتخب كسب
لا ...لاني مش باحب الكورة أصلا
بس كنت فرحانة عشان المصريين فرحانيين والناس كلها سعيدة
أكيد أتمني كل الناس تبقي سعيدة :)

حضرتك ربطي بين التحضر و بين الظروف المنيلة بستين نيلة اللي احنا عايشين فيها.
انا اقصد التحضر في التعامل مع الشعوب التانية و خصوصا لو كان شعب همجي.و اننا ردينا عليهم في الملعب.

أنا كنت بتفرج ع الماتش بردو
بس كنت بتفرج عليه عشان اعرف ايه اللي هيحصل هل الميه فعلا هتعود لمجاريها
وشفت المنتخب الجزائري وهو بيضرب في المنتخب المصري
يمكن يكونوا متعصبيين وعايزين يكسبوا أكيد كل واحد نفسوا يكسب منهم
انا ع فكرة مش ببرر موقفهم أصلا
أنا بس زي ما كان بيتقالي أن اللي بيكون في الملعب وبالذات اللي بيحبوا الكورة بيكونوا متعصبين
بس دا مش معناه أننا نحكم ع الجزائر كلهم بالهمجية وعدم التحضر

______________
بالنسبة للجزاير ان فيها ناس كويسين .. انا مقلتش ان مفيهاش..يتقطع لساني.
بس .. احنا كنا بنقول على المتعصبين قلة .. لكن اتضح ان الكويسين اللي بتقولي عليهم هم اللي قلة و ندرة كمان.
و مش عارف ليه لما الناس اللي بيسموا نفسهم عقلا لما يكونوا عايزين يحلو المشكلة دايما يقولو ان مصر هي اللي غلطانة و الجزاير ملايكة.
و انا شايف ان الجزاير راكبها الغلط من فوق لتحت.
بس عموما خلاص الكلام ده كان وقته قبل يوم 28 يناير..لكن مدام خلاص فرمناهم و عرفناهم مقامهم و فضحنا همجيتهم قدام العالم.
لا عايز ادلة و لا ادافع عن مصر و لا اقول الجزاير غلطانة..الرد وصل.

طيب ممكن أسأل حضرتك سؤال
حضرتك شفت جزائريين فين أصلا؟!
ع المنتديات يعني
بجد اللي شعلل المواضيع بين البلدين اللي بيكتبوا في المنتديات
في الاول والاخر كل واحد حتي لو بين المصريين وبعضهم
في المنتدي والنت محدش بيظهر بكل شخصيته الحقيقة
ولا حتي لو كان صادق مليون في الميه
طيب ليه احنا نحكم ع أن مش فيهم الا قلة محترمة
انا بجد اتعملت ع المنتدي بردو مع جزائريين والله
فيهم ناس محترمة جدااا جداا وكانوا بيدافعوا عن مصر وبيحاولوا
يفهموا الأعضاء اللي من بلدهم أن مصر أخت مش عدوه
أنا عارفة ان ممكن حضرتك تقول احنا مش محتاجين حد يتكلم عننا
حضرتك مش تعرف حاجة عن جريدة الشرور زي ما قال عليها واحد جزائري
أثرت ع كثرة من الجزائريين بطريقة رهيبة وفيه ناس منهم مش بتدخل ع النت
وتعرف الحقيقة والناس اللي بتعرف الحقيقة بتحاول تنشرها ع المنتديات
الجزائرية لأنها عارفة كويس أنها عليها أمانة
_________________

اخر حاجة انتي قولتي انك بتحبي تفسدي فرحة المصريين..انا معتقدش انك كده.
بس لو تلاحظي معايا ان مواضيع زي دي مش بتتفتح غير لما نكسب.

يعني المنتخب ذنبه ايه...مهي مشاكل ما بعد انجولا 2010 هي مشاكل ما قبلها.
سلام..

حضرتك عايز تعرف ليه مش بتتفتح الا لما نكسب
لان اللي بيحب بجد بيعرف اللي بيحبهم الحقيقة
وانا مصرية وباحب كل المصريين نفسي بجد البلد تكون متميزة في كل المجالات
والكورة دي خلتنا ننسي كثير من مشاكلنا
انا مش بقول مش نفرح نفرح عادي
بس بحدود لو حضرتك فتحت التليفزيون بعد المباراة وهتلاقي المصريين كثيرة اوي
انهم كلهم اتجمعوا في الكورة
اما لما يبقي فيه حقوق لنا في بلدنا مش عارفين نأخذها محدش فيهم بيفتح بقه
انغظت لما لقيت الريس بيتصل باللاعبيين وناس
كثيراا محتاجة رئيس الحي بس يكلمها ومش لاقيين
مش حاجة تغيظ
يمكن احنا كلنا ع المنتدي أقل مستوي ممكن يعني يبقي المستوي المتوسط
بردو مش هنحس بمعانة ناس كثيرة عايشة في مصر
يعني أكيد فيه ناس فيه مصر محتاجة الملايين والمكلمات اللي بتروح لبتوع الكورة
في الأخرة أنا بس عرضت وجهه نظري أكيد مكنتش بفرضها ع حد
بس حبيت أن الأعضاء يشاركوني
ع العموم حضرتك نورت أكيد الموضوع

أ/رضا عطيه

13-02-2010, 11:58 PM

كدا أوكدا هو كدا- يعنى نقول كدا- يقولوا هما كدا- يعنى مفيش فايده الرد هيكون كدا -ومين هيصبر على كل كدا- واللى بيتكلم عن حياتنا كدا- ويسودوا الدنيا كدا -واحنا بلادنا كدا -وهنحبها برضه كدا -وهنكون متخلفين كدا- فى نظرهم كدا -وأنا جدى كان كدا -وبنى الهرم كدا- وماقعد يعيط كدا- ويبص على اللى فى إيد الناس كدا- ومايحمد ربنا كدا -على نعمة الأمن كدا- فى بلد ذكرت فى القرأن كدا- الأمن والأمان فيها قبل كل شىء كدا- وربنا يهدينا جميعا كدا- ونحب البلد لذاتها كدا-ومانربطها بأى شخصية كدا- بنحبها أونكرها كدا -لأ ن أم الدنيا عايزانا نحبها كدا-بنعم ربنا اللى ملياها كدا- وابعد عن كدا وكدا -لأن ربنا عايز كدا-والدنيا طول مافيه دنيا هتفضل كدا- فيه طماع هنا وفيه حرامى هنا ومواجهتهم ماتبقاش كدا- وكلام كداوكدا-واشكركم جميعا على صبركم كدا- وربنا يوفق اللى كدا- وكمان اللى كدا-وكفايه على كدا-لايقولى على باشا كدا-أوحزب وطنى كدا- أوحد مرحرح كدا- وأنا الفقر والعدم كدا -راسم خطوتى كدا- والحمد لله على كدا -ع الأقل فقرى بيقربنى لربنا كدا-وربنا يسترها على كدا وكدا--

أبو إسراء A

15-02-2010, 01:25 PM

نوران رجب

15-02-2010, 03:53 PM

الف مبروووووووووووك لمصــــــر
ويارب دايما مصر فوق الجميع
والامه الاسلاميه كلها تبقي فرحانه وايديهم في ايد بعض ومانتفرقش ابداااااااا

cave 2010

15-02-2010, 10:32 PM

مشكووووووووووووووووووووووووووووور يا اخي وبارك الله فيك ومبروك للمنتخب المصري

أ/رضا عطيه

16-02-2010, 02:48 AM

ياساده بالبلدى كدا أنا قلتها فى أكتر من منتدى وهقولها وهكررها دون ملل حتى لو ملت الناس إسمعوها من إنسان غلبان-- حبوا البلد دى لذاتها لخيرها ونعيمها لفضلها علينا وعلى كل إخواتها - حبوا البلد لأرضها ونيلها وكل ناسها وحرام تربطوا ترابها بشخص تحبه أوتكرهه أو مجموعه زادت بلاويها-- حرام بلد عمرها أكتر من سبعة ألاف عام حضاره ومناره -- نتخلى عنها علشان عقدين تلاته اربعه .....وممكن نكون فى الحسبه غلطانين- واللى تكسره النهارده صدقنى ممكن بكره تكون مسئول عن إصلاحه وممكن يكون صعب إصلاحه -- وتبقى زى اللى خطط فى ساعة غضب لهدم بيت أهله وبعد الرحيل ماعاد له غير احتقار فكره وعقله --وسؤال كل الناس أعطوك أومنعوك
حبوها علشان تخلوها ضليله تحمينا من شر الغير--- حتى لو من أقرب الناس --- وإحنا شفنا بعنينا معاملة الغير لينا وبلاش نكدب على بعضينا- وأخوك منع عنك حاجتك فى وقت عصيب لأ وبيفكروا إزاى يحولوه لأداة ضغط على قرارك السياسى والسيادى -لو ضليله تحت شجره والقرار قرارك أفضل مليون مره من قصر ع النيل وبتنام وتصحى بأوامر الغيروتعيش ذليل-ويارب تكونوا فهمتونى---------------- وشكرا للجميع وبالتوفيق والسلام عليكم

محمد.فوكس

26-02-2010, 11:00 AM

شوفو يا ريت كده تفكروا في الكلام ده و الكلام اللي اتقال بعد ماتش السودان.
لا عايزنا نفرح ولا نزعل.

لما نزعل: تقولولنا زعلانين ليه؟
لما نفرح :تقولولنا فرحانين على ايه؟

أ/رضا عطيه

26-02-2010, 07:02 PM

ياعم فوكس ماهو ده التغيير اللى عايزينه فى البلد -- إن الناس ماتعرفشى إمتى تفرح وإمتى تزعل--- والكل يتكلم فى كل حاجه من غير ماحد يسمع أى حاجه - فحكم عقلك وافرح مع الناس وازعل مع الناس واحذر من فكر بعض الناس -يهدينا ويهديكم رب الناس---أمين-وبالتوفيق وشكرا

MIdo.

26-02-2010, 07:50 PM