مشاهدة النسخة كاملة : أنا مصرى عجيب شعر/ سمير الأمير


Samir Elamir
01-02-2010, 09:38 AM
أنا مصرى عجيب شعر/ سمير الأمير

______

انا مصرى عجيب

شّيلت المعزه ولاد الديب

عجبتنى القافيه هرشت قفايا

فتّحت عنيّه برغم عمايا

وعمايا ف رزق اليوم مطلوب

ما انا باكل واشرب بالمقلوب

من يوم ماتولى الأمر الموت

وحكمنى الحاكم بالنبوت

ولقيت الفقر بيجرى ورايا

رتبت الحال على عكس هوايا

أنا مصرى عجيب

وعجيب استعجب منى وقال

مذلول وبيرقص للزلزال

مسكين ومحمل حمله عيال

فانقطع الصوت/ واتهد الحيل

واتهز الإريال مال ع السور

المعزه بتنطح قرن الطور

والطور بيميل

ويشد الحبل ويرخى الديل

والديل دلدول

ما هو مش معقول

معلول متشال شايل محمول

افهمنى ياخال

راديو التوظيف قطع الإرسال

والشركه سرّحت العمال

شطّبت فلوس

وبقيت بلبوص

مستعجب ليه!

قرص الطعميه بربع جنيه!

المتبتلة
01-02-2010, 04:22 PM
روعة يا أستاد سمير بجد هم يبكى وهم يضحك وبجد مصرى عجيب يقوم من نومه يضحك على همومه حلو جدا أسلوبك ومقدرش اقول غير ربنا يوفقك وللامام يا أمير الزجل

أحمـدنجـم
01-02-2010, 05:04 PM
أكثر من رائعة يا زجلنا الأمير
فعلاً متميز ومبهر وبتحط ايدك جااااااااااااااااااااااااااامد على الوجع

aissat asmaa
01-02-2010, 06:34 PM
موضوع في القمة مشكوووووووور

http://www.upgulf.com/GIF/jSz07230.gif

Samir Elamir
01-02-2010, 10:40 PM
إلى المتبتله( ليتنى أعرف الاسم)
أشكرك على إطرائك ولك كل احترامى وتقديرى
إلى الشاعر/ أحمد نجم
سعدت بمرورك الكريم وأتابع ما تكتبه وأرجو أن أسعد برأيك دائما
إلى assiat
أشكرك كثيرا وليتنا نكتب أسماءنا صريحة وبالعربية فغربتنا فى هذا العالم لا تحتمل

أنت___عمري
03-02-2010, 12:33 AM
رائع هذا الزجل أمير والله أمير

Samir Elamir
03-02-2010, 10:10 PM
إنت عمرى

شكرا على كلماتك
ولك محبتى واحترامى