السلام عليكم ورحمة الله وبركاته
إخواني وأخواتي الأفاضل
أتمني من الله العلي القدير أن ينعم عليكم بالصحة والعافية وان يباعد بينكم وبين كل مكروه كما باعد بين المشرق والمغرب وان يرزقكم شفاعة حبيبك نبي الرحمة محمد صلي الله عليه وسلم .
أولا أنا آسف جداً لو كان كلامي هيكون كتير علي حضرتكم بس اعذروني لأني بجد محتاجك ومش عارف موقفكم هيكون ايه من مشكلتي لكن الأمل في الله . أسئلة ياما بدور في عقلي بس ياريت حضراتكم تعرفوا إني دلوقتي وبصدق مع الله مليش من بعد ربنا غيركم وغير وقوف أهل الخير زي ربنا ما قال جنبي ويساعدوني وأجرهم وثوابهم علي الله .عندي أمل في الله انكم تحلوا مشكلتي ومعنديش غير إني ادعي ليكم وادعي إن ربنا يوفقكم لكل ما يحبه ويرضاه .
أنا شاب عندي تلاتة وتلاتين سنة ومدرس إعدادي ومش متجوز . أنا من عيلة وبيت بسيط جداً عايش يادوب بالعافية والدي شغال بالأجر اليومي وكمان كبر في السن وكلها سنة ولا اتنين ومش هيقدر يشتغل تاني طلعت لقيت خواتي سبعة تلاتة صبيان وأربع بنات وأنا الكبير في الصبيان وكان لازم أشيل المسئولية بدري قوي . اتبهدلت ياما وياما بكيت عشان اشتري ولو شراب مع إني كنت شغال من وأنا عندي ست سنين لكن عددنا الكبير كأولاد وأسرة حرمنا كلنا من كل حاجة حلوة والله لحد النهاردة البيت عندنا مفهوش غير تلفزيون وتلاجة جبتهم بالعافية و كمان بالتقسيط لما اشتغلت وبنحاول علي قدي اعدل من وضع بيتنا وشكلنا قدام الناس بس الحمل صعب قوي .
وضع البيت عندنا كان ولسه صعب قوي يمكن الشهر بيعدي واللحمة دي ما تعرفش طريق بيتنا ودي حاجة من ضمن حاجات ياما. قاعدين دلوقتي في شقة بالإيجار وربنا عالم عايشين ازاي طبعا عشان الظروف الصعب دي تلاتة من خواتي طلعوا من التعليم يمكن لو كانوا كملوا كانوا هيكونوا أفضل بس دي حكمة ربنا واللهم لا اعتراض ومفيش إرادة بعد إرادة ربنا والرضا بقضائه.
كافحنا كلنا عشان نعيش . كلنا كنا بنشتغل صبيان وبنات لكن بردو أبويا كان عنده شوية إهمال فينا. أنا عمري ما نفتكر إن أبويا اشتري لحد فينا حاجة يفرحوه بيها في مناسبة أو غير مناسبة ولا فكر يعمل حاجة عشانا للزمن .
كان لازم البنات خواتي يتجوزا وبصراحة أول واحد اتقدم لكل واحدة من البنات التلاته وافقنا عليه من غير تردد . حتى البنات كانوا عايزين يخلصوا من العيشة دي بأي شكل جهزناهم جهاز علي قد الحال طبعا بالتقسيط وشوفنا المر بجد في التقسيط وما كانش فيه حل تاني غير كده .
أمي بقي دي حكاية طويلة ست طيبة ملهاش حد في الدنيا بحالها غيرنا وأنا بالأخص لأني بنحبها وحنين عليها اكتر من خواتي كلهم عشان هما دايما بيلوموها علي إنها كانت ممكن تخلينا أحسن من كده لو كانت خدت موقف من أبويا أو كمان لو كانت اتجوزت واحد تاني غير أبويا. كان لازم أمي تمرض لأنها ست بسيطة وكله علي أعصابها وفعلا مرضت بالسكر والضغط والقولون وخلعت سنانها كلها وفقدت نظرها وصدقني والله منظر وشها بيصعب لما تبص في عنيها. وكمان السكر بهدلها وبدأت الغرغرينة تمشي في جمسها وأنا مش عايز أحسسها بكده عشان علي الأقل تفضل جنبنا .
وأختي الكبيرة مرضت بالقلب وعملت عملية في مستشفي الجامعة في إسكندرية علي نفقة الدولة وقرر الدكاترة إنها مش هتقدر تتجوز وعشان كده قعدت في البيت لحد دلوقتي وصلت سته وتلاتين سنه وطبعا خلاص كلنا عرفنا إنها مش هينفع تتجوز وبحاول معاها علي قد ما اقدر عشان هي ماشية بالعلاج
أختي الأخيرة واصغر واحدة في البنات اتجوزت من حوالي سنتين . طبعا زي ما أنا قلت الحالة يعملها ربنا اجلنا فرحها كام مرة لغاية ما وقفت علي الطلاق لأني شايل حمل كبير وكمان أنا لسه مدرس بادي حياتي مرتبي بسيط وبعدين موضوع الدروس بتكون أرزاق من ربنا وأنا مؤمن بكده يمكن لو كان دخلي لنفسي كان بقي وضعي أحسن من كده وكنت علي الأقل وفرت أي حاجة لكن والله ما كان فيه حاجة متوفرة لان كل حاجة أنا شايلها . وعشان أنا طبعا منقدرش نشيل حمل تاني وهو إن يبقي عندي أخت مطلقة عملت قرض من البنك بضمان الوظيفة كان حوالي سبع آلاف جنية ومع إني هسدد القرض دا تقريبا الضعف من مرتبي طبعا معملش حاجة وحضرتك عارف يعني ايه جواز بنت اليومين دول . استلفت من زمايلي ناس وثقت فيا وناس طبعا مضيت ليهم إيصالات أمانة وكانت دي أول مرة اعرف فيها يعني ايه إيصال أمانة رغم إن مبلغ الدين كان بسيط بس دا لأننا ما تعاملناش مع بعض في فلوس قبل كده . استلفت حوالي 13000 ( ثلاثة عشر ألف جنيهاً ) علي دفعات من دا حسبة ومن دا حسبة عشان البنت ماكانش عندها خيط في إبرة وكمان يعني عشان اعدي الجوازة دي علي خير ومن يومها بدأت مشاكلي محدش طبعا حاسس بيا مرتبي نزل النص تقريباً عشان البنك بيخصم مني مبلغ كبير وكان كل اللي فاضل أول عن أخر حوالي 320 جنية طبعا دول المفروض يعملوا كل حاجة يعني أعيش منهم وكمان أسدد ديون الناس . استعنت بربنا لكن ربنا رزقني بشوية مرض حاولت اصبر لكن المرض زاد قوي وكان لازم أشيل كليتي اليمين ودلوقتي أنا عايش بكلية واحدة اتحرمت من أكل وشرب ياما عشان أحافظ علي الكلية التانية ومش عارف الأيام هتوصلني لفين وأنا حتي لو شكيت بأي حاجة معيش أروح لدكتور ؟
كان نفسي اسيب ولو مكان صغير لامي وأختي من بعدي يعيشوا فيه بدل الإيجار . طبعا مش عارف اعمل ايه أسدد ديوني ولا أشوف مصروف البيت ولا اصرف علي نفسي وعلي مرضي ومرض أمي وأختي وهموم الدنيا كلها فوق راسي بستلف من فلان وأسدد فلان ومن فلان وأسدد فلان وأمد أيدي لكل واحد يعرفني وأديني علي كده بقي لي سنتين مش عارف أفوق دوامة ملهاش أخر . والله العظيم ما في حد في بلدنا اسمي ما خدت منه فلوس سلف بس اعمل ايه يعني ؟ رزقي كده وكمان ياريت نقدر نشتغل أي شغل تاني عشان أنا صحتي في النازل وحاسس إن العمر قصير قوي ومش عارف اعمل ايه ؟عايش مذلول بالديون وبالسلف من الناس . ومن غير مبالغة لان دي هي الحقيقة مليون مرة فكرت في الانتحار عاوز ارتاح لأني تعبان أو اسيب البلد وامشي وأنا مش عارف أروح فين ولا لمين خاصة إني مديون بالمبلغ لناس كتير مش واحد بس وكل مرة بأجل ودلوقتي مش عارف ايه الحل ؟ مديون بقرض البنك 7000 جنية ومديون بباقي أقساط العزال 8000 ومديون للناس 13000 جنية يمكن قرض البنك استحمله عشان بيتخصم من المرتب والأقساط ربنا بيدبرها من أي جنب وقسط العزال اهو كل واحد مننا بيساهم من جنبه مع أني لما أتأخرت علي صاحب المعرض اشتكاني بس ديون الناس عندي 13000 أروح منهم فين وأعمل ايه وأنا كبير في نظر الناس وكمان وثقوا فيا؟
لما بسرح مع نفسي بقول هو أنا غلطت في ايه ؟ طيب هي الدنيا بتعمل ليه كده ؟كل زمايلي أتجوزوا ومعاهم عيال كمان ودا موضوع ماثر فيا نفسياً قوي بس اعمل ايه دا أنا مش عارف اشتري قميص وبنطلون ولا جزمة ولو اشتريت بتكون بردو تقسيط ومنقدرش نقول غير الحمد لله علي كل حال مفيش بأيدي حاجة . محدش بيفكر في مشكلتي ومش عارف اروح لمين والناس دلوقتي كله بيقول يالله نفسي ؟ أنا محتاج حضراتكم تقفوا جنبي وأنا متأكد إن شاء الله انكم هتكون رحماء بي . أنا بتكلم مع حضراتكم دلوقتي ومش عارف ايه موقفكم بس صدقوني والله العظيم أنا كل أملي في الدنيا دي إني أسدد ديون الناس عندي وأعيش حياتي برزق ربنا ومش عايز غير كده . ديون الناس عندي ديون مش قادر أسددها ديون مش عارف أشم نفسي منها بنام واصحي علي ذل في ذل وكمان مش عارف أشوف شغلي راسلت كل المسؤلين مسبتش حد فاكسات وخطابات مسجلة بعلم وصول وكمحدش فكر حتي يرد علي .زمايلي اتقدموا من حواليا وأنا مش عارف نعمل حاجة أنا عارف إن مبلغ الدين مش مبلغ بسيط بس أنا منتظر رحمة ربنا من قلوبكم وأملي في الله إنكم تفكوا كرب إنسان محتاجك وتستروني قدام ربنا والناس ومش كتير علي ربنا وكل دا في ميزان حسناتك وأتمني رسالتي دي تفضل بينك وبين ربنا.
( إن لله عباداً اختصهم بقضاء حوائج الناس )
هي دي مشكلتي وهي دي ظروفي بكل أمانة رغم إني اختصرت فيها كتير وكفاية إن حضراتكم مش بتنقذوني لواحدي أنتم بتنقذوا أسرة ربنا يبارك لكم في أولادكم ومالكم وصحتكم وبيتكم . بالله عليكم وحياة حبيبكم النبي ما تتخلوا عني وباقي حاجة أخيرة أقولها اني مستعد لتقديم أي إثبات لكل كلمة قلتها لأنكم قولتوا إن فيه سرية والله علي ما أقول شهيد.