وطن مخطوف
شعر/ سمير الأمير
نسيت توهة النديم جواك عشان يلاقيك
نسيت طبلة فؤاد حداد
نسيت شعرى وندايا عليك
عشان ترجع وطن تانى وترجع ليك
نسيت كل اللى ماتوا ف سكتك وماضيك ...
وفاكر بس بشواتك و ظباطك !!
-ودول عايشين على فقرك وإحباطك
-ودول سايبين ليوم الدين.. ما ينظبتوش
حراميه وحلق حوش
وبيصلوا مايتوضوش
و خاطفينك وخانقينك وخاينينك
وبيعدوا بحور عينك مايتبلوش
**
تموت دايخ، تموت محروق، تموت غرقان
وتتشرد وتتقطع وتتوزع على الاوطان
ومايبانشى ف ليالينا ولا ف لياليك
قمر يهديك
عشان إنت قتيل بإديك

**
وطن مخطوف على اليافطه
وطن متعبى ف الصندوق
وشُعرا بيدنوا ف مالطه
على القهوه فى باب اللوق!!

وشُعرا بيدنوا ف مالطه
على القهوه فى باب اللوق!!




معلش ياشاعر ياعظيم
أتمنى صلاح الحال
ونجد يوما ما تقديرا حقيقيا لشعرك المميز الأسلوب

أجمل تسميه لك

سمير الأمير

شاعر وطنه

تسلم اخي الأمير
يا عميق الكلمة
يا سيف الحق في وجه سلبيات المجتمع

الشاعر / أحمد نجم
معذرة لعدم الرد فى حينه كنت مريضا والحمد لله أصبحت أفضل
سمير

وطن مخطوف .......... ياترى اتخطف واحنا جواه ولا اتخطف واحنا بعيد عنه ولا احنا اللى خطفناه

جميل هذا الابداع الذى كتبته ذكرتنى بتلك الأبيات



وطنى
وان غيروا اسمك ولغتك والديانة
وان سيسوك وطوعوك وأعطوك الا عانة
وان ألبسوك الضعف فى زمن المهانة
فلن أقبرك فى خوفى
ولن أنشر فوق قبرك عطر الادانة

الصديقه الحبيببه
أشكرك على كلماتك الرقيقة