السلام عليكم ورحمه الله وبركاته
ازيكم
بصوا انا الوقتى فى اولى ثانوى زى ماتعرفوا طبعا
وبعدين الوقتى هما عاوزين الرغبات بتاعتنا فى 2 و3
ولازم اوديها للمدرسة بكرة
وعندى مشكلة
انا ان شاء الله هادخل علمى
بس مش قادرة احدد
اخد كيمياء فى تانيه واحياء مع الفيزياء فى اولى
ولا اخد احياء لانها طويلة فى تانيه واخلى الكيمياء مع الفيزياء
غير كده بقى
انا بحب الكليات اللى محتاجه علمى رياضه
ورياضه 2 سالت قالو لى صعبه جدا
اصحابى هاياخدو احياء فى تانيه وانا بصراحه مش عاوززة احط املى على كليات طب علشان لو مش جبت مجموعها مش ازعل
فابالتالى مايلة لانى اخد كيمياء فى تانيه علشان فراصها اكبر
ارجوكم ساعدونى
واقولو لى عملتوا ايه فى المرحلة دى جايز اقدر احدد
سؤال كمان

هو فى 3 ثانوى مش بيكون فى رياضيات يعنى جبر وحساب مثلثات وهندسة وكده؟

كمان سؤال
كان فى مدرس قالنا انه ممكن اخد علمى علوم ومش اخد رياضه 2 وادخل مثلا حاسبات او هندسه وفى الكلية ادرس رياضه 2 الكلام ده صحيح ؟؟
منتظرة ردكم

اولا بالنسبة لسنه 2 الافضل تاخدى كيمياء وبالنسبه لاختيارك فى سنه 3 خدى اللى انتى مياله ليه بيعنى رياضه2 ومتهتميش بكلام اللى حاواليكي انتى اعملى اللى عليكى وربنا ان شاء الله هيوفقك وبالنسبه لرياضة3 فهى فروع كتير اوى(هندسة وديناميكا واستاتيكا وميكانيكا وحساب مثلثات ................)وفى فروع تانيه بس انا مش فكره ده كل اللى اعرفه وللعلم انا لسه فى 2 ثانوى وفى علمى وهدخل علمى علوم فى 3 ان شاء الله
نصيحة اخيرة:ادرسى الحاجة اللى انتى بتحبيها بدون تفكير
وبا رب اكون عرفت افيدك واساعدك وربنا يوفقك

رياضة اتنين مش صعبة بلدرجة اللي بتقولي عليها , يعني للي بيحب الرياضة اكيد هتكون حلوة
اه فيها شوية صعوبة بس عادي يعني مفيش مواد كلها علي بعضها سهلة و او كلها علي بعضها صعبة
و بالنسبة لفروعها : جبر و هندسة فراغية - تفاضل و تكامل - ميكانيكا " ديناميكا و استاتيكا " ..
و انا كنت ثانوية عامة السنة اللي فاتت و و كنت باخد رياضة اتنين و كنت واخد مستوي رفيع رياضة كمان
و الاتنين بصراحة مش صعبين أوي بالدرجة دي يعني ..

و بصراحة انا من رأيي انك انت اللي تحددي رغبتك , مس تستني من حد يقولك ,
لأنك انت اللي هتقرري مستقبلك مش حد غيرك ..و انت اللي هتخشي تمتحني و هتحددي درجتك ..

لو داخلة علمي رياضة : كيميا في تانية ورياضة في تالتة
لو داخلة علمي علوم : احياء في تانية وكيميا في تالتة
لو محتارة ومقررتيش : كميا في تانية وحسب المجموع نختار في تالتة احياء او رياضة

رياضة 2 طبعاً اصعب واكبر من رياضة 1
لإنه رياضة واحد كانت حاجة بسيطة
يعني مش وجه مقارنة
لكن كرياضة 2 نفسها لو حد بيحب الرياضة اكيد مش صعبة خالص
المهم حب المادة وتجاوبه معاها

خدي كيميا في اولي عشان لو اخدتي احيا يبقي زنقتي نفسك في علمي علوم وبعدين انا زيك هدخل ان شاء الله علم رياضه لاني بحب الرياضه وكلو بيقولي بدال انتي كويسه وبتحبي الرياضه يبقي خديها وهي عايزه مدرس كويس مش اكتر وربنا معانا
وياريت حد يقولي اخد المستوي ايه والماده الادبيه
بيقولو خدي علم نفس عشان سهله وبيقولو اخد فلسفه عشا ن معتمده علي الفهم مش الحفظ وبيقولو خدي اقتصاد واحصا عشان كلها رياضه تمشى مع علمي رياضه انا احترت ياريت لو حد عدي المرحله دي يفدنا وكمان المستوى بيقولو خدو عربي وفي بيقول انجليزي لكن الرياضه بيقولو مليانه ارجوكم تفيدونا
وجزاكم الله خيرا وربنا مع كل طلبه الثانويه العامه