<div align="center">السلام عليكم ورحمه الله وبركاته


شوفوا يا شباب


دلوقتى فاضل لكم حوالى شهرين بالظبط على امتحاناتكم



طبعا ربنا معاكم


وانا لازم اساعدكم بشويه نصائح


علشان انا عارفة الفترة دى وجربتها سنتين وعارفة ان ممكن ناس نفسيتها تتدمر فى الفترة دى من الضغط وكده



انا دلوقتى باخد رايكم فى حاجة


طبعا انتم كلكم اخواتى وعندى اخت فى تانية ثانوى


المهم انا عندى شوية حاجات كده تخلى اللى يائس من الحياة يبدا يشوفها بنظرة تانية


بس لازم الطلبة كلهم يتابعوا علشان حالتكم بس النفسية


وطبعا مش هخليكم تصوتوا من غير ماتعرفوا خلفية عن الموضوع


عناوين الموضوع اللى هتكلم معاكم فيه هتكون كده


1- لماذا الحديث عن صناعة النجاح؟

2- المفاتيح النجاح الدراسي

3- الاستعداد المنهجي للامتحانات

4- الاستعداد النفسي

5- الاستعداد البدني

6-نصائح ذهبية




وعلشان ماتقولوش مين دى كمان اللى عامله فيها محلله نفسية واخصائية اجتماعية


انا اعتمدت فى الموضوع ده عن البحوث النفسية لواحد اسمه محمد لشيب صحفى ومستشار اعلامى بمجلس النواب


حسيت ان كلامه سهل وبسيط ومؤثر وكمان انا هكون معاكم بردو واتمنى يكون اى حد عنده مشكلة


وشايف لا قدر الله ان الطريق اتقفل يقولى وان شاء الله نلاقى حل سريع ويرتاح



وفى البداية كده عايزه اقولكم ان النجاح ليه 9 مفاتيح


النهارده هنتكلم عن المفتاح الاول وهو



الطموح كنز لا يفنى


طبعا لازم كلنا نكون طموحين وهنعرف ازاى بعدين لما اعرف رايكم فى الموضوع والفكرة


عارفين ياجماعة عمر بن عبد العزيز خامس الخلفاء الراشدين كان طموح عارفين قال ايه ؟؟؟؟


"إن لي نفساً تواقة، تمنت الإمارة فنالتها، وتمنت الخلافة فنالتها، وأنا الآن أتوق إلى الجنة وأرجو أن أنالها"



هنعرف كل حاجة بالتفصيل وهنتكلم بصراحة وكل حاجة بس لو عجبكم الموضوع


معاكم التصويت ليوم الجمعة ان شاء الله


علشان انتم اللى هتحددوا اذا كنت اكمل او الغى الفكرة وتزاكروا احسن


بس انا كل اللى بتمناه ان ربنا يوفقكم وبمد ايدى ليكم علشان الشهرين دول يكونوا خلاصه السنة



سلام يا شباب


ماتنسوش القرار قراركم .......... معادنا يوم الجمعة</div>

الله الله علي الموضوع الجميل بس بااس انا بقي عايش حياتي طموح

شكرا علي الموضوع

الكلام مش ليك يا عمر باشا

انت خلاص عايش فى الجامعة

لسه فى غلابة ما خرجوش من الثانوية


مين قدك يابنى انت رجل المستحيل



سلام وشكرا على تشجيعى مع انك مش من الطلبة

هو انت لسه ما كملتش كمل

مستنى اى الشهرين بيخلصوا بسرعه :(



يلا ابدا وااكد لك انى كل الطلبه فى الوقت دا محتجين تشجيع جبار واناا واحده منهم

ميرسى ليك مقدما على الموضوع دا
بس نصيحه خلى الموضوع قصير علشان الواحد يقدر يقرئه اوكى علشان الوقت مش اكتر

وما تنسانا من دعواتك :)

انا اول من المحتجين للتشجيع لانى مخلصتش ولا ماده من المواد ولا بدات فيهم خالص وادينى مقضيها
هندى
المستشار العاطفى

أنا كنت حرد بس طالما أنت قاصر الرد على الطلبه اللى فى الثانوى حرد بردك
موضوع 10/10 حاجه حلو خالص

<div align="center">الموضوع جميل جدااا
بس أنا ليا تعليق
أو الشباب ده كله صعبان عليه
يعنى الشاب من دول يفضل يتعلم ما يقارب 15 سنه
حرقة أعصاب وفلوس ودروس ومشاكل
وفى الاخر يخلص وياخد الشهادة ومعاها الرقم بتاعه فى طابور العاطلين ويقعد فى البيت او على قهوة
او يشتغل شغلانه لا تناسب المواهل التعليمى اللى معاه
وبعدين يندم على اليوم اللى كان اتعلم فيه
ويبتدى يصاب بالياس لانهمش شايف نفسه بيتقدم ومش شايف مستقبل
سنين عمره ضاعت فى التعليم
البنت اللى كان بيحبها سابته علشان واحد جاهز
أتظلم أكيد فى الكلية بالنسبة للتقدير
واحد ميستحقيش وظيفة اخدها منه علشان الوسطة
يبتدى يكره حياته ويصاب بالياس والاحباط اللىقد يودى فى النهاية الى تطرفه او انتحاره
من هنا ومن هذا المنطلق أدعوا أبناى الطلاب الى عدم اعطاء التعليك أكثر من حقه الطبيعى
لبدنك عليك حق
وأصحابك ليهم عندك حق
التلفزيون والكمبيوتر لزم ترفه عن نفسك
أنتا كان اجتماعى بطبعك أخرج واتكلم مع الناس يعنى اللى اخده الشهادات عمله بيها ايه
من الاخر يابنى منك له
البلد دى بلد اللى معاه فلوس</div>

أنا موافق ومتابع ...

<div align="center">السلام عليكم ورحمه الله وبركاته



شكرا ليكم كلكم



وزى ما قولت الموضوع ده ليكم انتم انا مش هستفيد منه حاجة


بس انا مجربة الثانوية وعارفة كويس كل حاجة


واكيد طبعا كل حاجة بتحسوا بيها انا مريت بيها ومقدره حالتكم كويس



بس اسمحوا لى بما انى لقيت صوت مش موافق



هستنى بردو ليوم الجمعة علشان ادخل فى الموضوع بتاعنا



واشوف الاصوات يمكن الاغلبية يقولوا لا



وبعدين لسه الموضوع مكتوب امبارح بس


خلوه ياخد فرصته مع الاعضاء



زى ما قولت مش هبدأ غير يوم الجمعة حتى لو كل الاعضاء قالت لا



طالما فى صوت واحد موافق يبقى هو اللى ليه الاولوية والباقى ما يتابعش دى حاجة براحته




وعلشان مش اشوقكم هتكلم معاكم انا كلام من عندى




اما الدراسة والمفاتيح وكده خلوا بدايتها ان شاء الله يوم الجمعة



دلوقتى اهم حاجة عندنا ما نقلقش خااااااالص


لسه شهرين



عارفين ايام حرب اكتوبر كان الجيش مش عارف بيدرب ليه



بس كانوا حسين ان فى حاجة


صحيح مكانوش يعرفوا ساعة الصفر


لانها ساعة الصفر

عارفين الحكمة من ساعة الصفر ايه



المفاجأة ..........


مفاجأة للجيشين


تخيلوا انتم بتدربوا طول السنة وقالوا لكم ساعة الصفر مثلا السبت الجاى


اقصد هنا بساعة الصفر الامتحانات



طبعا حسينا بمفاجاه



يا خبر السبت طيب ازاى انا لسه ماعملتش حاجة كده خلاص مستقبلى ......... رااااااااااح



ياترى هتعملوا ايه



اكيد كل واحد فيكم هيموت نفسه علشان ييجى عليه السبت ويكون مجمع المنهج



وطبعا ناس تقول ماخلاص راحت مش فارقة وكلام فقدان الامل ده



انا المفروض بتكلم مع ناس كبيرة وعاقلة وخايفه على مستقبلها بس محتاجة ايدد تسندها .......... صح ؟؟؟؟؟؟


اما الناس اللى بايعين القضية مش محتاجاهم فى موضوعى بصراحة



المهم انتم دلوقتى يا جماعة انسوا الجدول خالص


انتم ليه بتسالوا على فاضل كام يوم بين كل ماده؟؟؟


المفروض انكم ترتاحوا فى الفروق دى مش تزاكروا






المزاكرة بتخلص " ده المفروض يعنى " قبل الجدول يعنى مثلا على 1/6 كده تكونوا مقفلين المنهج كله فى كل المواد




فروق الجدول دى بس علشان ترتاحوا فيها ودماغكم ينظم المعلومات تانى ولو فى حد عنده حته كده ناقصاه يقعد يشوفها






مش علشان نزاكر المنهج كله فى يومين او تلاته



غلط ياجماعة لازم يكون عندنا الثقة



طيب هتقولوا لى هنجيب الثقة منين مفيش حاجة مضمونة اليومين دول



هقولكم لو فهمتم الحكمة دى كويس مش هتحتاجونى اصلا



سـئـل نـــابليـــــون

كيف استطعت أن تولد الثقة في نفوس أفراد جيشك .؟

فأجاب : كنت أرد على ثلاث بثلاث ؟؟

* من قال لا أقدر ... قلت له ... حاول

* من قال لا أعرف ... قلت له ... تعلم

* من قال مستحيل ... قلت له ... جرب


كل يوم نسمع الحكمة دى


بس كام يوم عملنا بيها ؟؟؟؟؟؟؟؟؟



وكمان حاجة كويسه بتقول


ليست السعادة في أن تعمل دائما ماتريد بل في أن تريد ما تعمله


كلامى صعب انا عارفة





نفسنا كلنا نبقى كده بس مش عارفين ازاى





مش لاقيين الطريق ؟؟؟؟



ولو لقينا الطريق خايفين نمشى فيه




عايزين تعرفوا ازاى نلاقى طريقنا ونمشى فيه !!!!!!!!!!!!!





تابعونى المرة الجاية وانتم تعرفوا


منتظره تعليقكم على كلامى النهارده


وشاركونى يا جماعة انا عاملة زى اللى بيدى درس خصوصى




فين مشاكلكم اللى هنتكلم فيها ونحلها




مش انا اللى هتكلم



الموضوع ده ليكم فى المقام الاول والاخير



قولوا لى بقى كلامى حلو ولا بلاش منه


احنا بنتسلى بس كده على يوم الجمعة هندخل فى التحديات الجادة


ونعرف مفاتيحنا كلها


التسعة ماتنسوش دول 9 مفاتيح


يعنى ان شاء الله هتبقوا كويسين ماتقلقوش



وربنا معانا كلنا




كل يوم هنتكلم من قلوبنا بس تفاعلوا معايا علشان نتخلص من التوتر


على فكرة ما تقلقوش منى انا بعرف احل مشاكل الثانوية


لسببين انى جربتها وناس فادونى واخدوا بايدى وعندى اخت فى ثانوى


يعنى انا دلوقتى عايشه نفس اللى انتم عايشينه

سلام

اشوفكم على خير وما تنسوش رايكم فى كلام النهارده


ادعولــــــــــــــــى بالله عليكم</div>

كده تمام يا شباب


على العموم خلاص


الفكرة اتلغت



مع ان كانت نيتى اساعدكم مش اكتر



عموما ربنا معاكم



سلام

ليه لاغيتى الفكره دى فكره رائعة وانا فعلا محتاجلها اوى اوى
ارجوالرد العاااااااااااااااااااااااااااااااجل

<div align="center">السلام عليكم ورحمه الله وبركاته

مع ان فى صوتين مش موافقين بس الاغلبية موافقة

عموما هدخل فى الموضوع على طول وهحاول اخلصه فى خلال الاسبوع ده لانى بعد كده هفصل النت

الاول ياريت تدعوا لأختى لان رجلها اتكسرت امبارح وعايزه راحة اسبوعين

وانتم عارفين ان دلوقتى مراجعات وكده
أمانة عليكم تدعوا لها يا جماعة


ندخل فى موضوعنا


بسم الله الرحمن الرحيم

انا قولت ان النجاح ليه 9 مفاتيح

تيجوا نتعرف عليهم كده بسرعة

1 – الطموح كنز لا يفنى :

فكن طموحاً وانظر إلى المعالي.

يعنى ايه الكلام ده ... معالى ايه ؟؟؟

يعنى انا لما اطمح فى حاجة او احدد هدفى اصر انى اجيب اعلى حاجة

يعنى مثلا انا لو عايزه اجيب طب واشتغلت على الامل ده يوم لما انزل بدرجاتى يبقى هجيب صيدلة ... صح

اما لو هحط فى دماغى علوم مثلا يبقى هجيب اداب .. فاهمين

لازم ابص للأعلى حتى لو قدراتى مش هتقدر تحققه

كفاية انى حاولت

سيدنا عمر بن عبد العزيز خامس الخلفاء الراشدين كان طموح

عارفين قال ايه ...

"إن لي نفساً تواقة، تمنت الإمارة فنالتها، وتمنت الخلافة فنالتها، وأنا الآن أتوق إلى الجنة وأرجو أن أنالها"

2 - العطاء يساوي الأخذ:

النجاح عمل وجد، وتضحية وصبر، ومن منح طموحه صبراً وعملاً وجداً حصد نجاحاً وثماراً..

فمن جدّ وجد ومن زرع حصد

يادى الاسطوانات اللى شبعنا منها

اصبروا بس ماتيجوا نشوف قصده ايه

طبعا اكيد النجاح تضحية ... ماتنسوش انكم فى سن صغير فى ناس عايشه حياتها بس دول بيضحوا بنجاحهم علشان يعيشوا يومين

طيب ايه رايكم لو نضحى بيومين علشان نعيش حياتنا على طول

ليه بنضحى بالقليل طالما هيخسرنا كتير

يبقى نضحى بيومين او شهرين نتعب فيهم علشان نكسب حياتنا وسعادتنا بعد كده

ونعيش حياتنا واحنا ناجحين

صدقونى النجاح طعمه جميل قوى

وحياتك وانت ناجح احسن من حياتك وانت فاشل

الصبر ... الصبر ... كل مانصبر اكتر كل ماربنا هايدينا

وكل مانتعلم اكتر هنشوف الدنيا بعيون تانية .... صدقونى

كلنا عارفين ان الفلاح لو اهمل فى زرعته مش هيجنى حاجة

هو ده اللى بتكلم عنه

الفلاح اللى ساب زرعته اهمل فى حقها وقال ارتاح يومين علشان كده اخر الحصاد مالاقاش حاجة

لو كان تعب اليومين دول كان هايدوق حلاوه ثماره طول السنة وهيبقى عايش مرتاح

3 - غير رأيك في نفسك:

الإنسان يملك طاقات كبيرة وقوى خفية

أنت أقدر مما تتصور، وأقوى مما تتخيل، وأذكى بكثير مما تعتقد..

الكلام ده صحيح

طيب ازاى مثلا نعرف صحته من خطأه ؟؟؟

لو انا قولت لواحد انت تافه انت ماتقدرش تعمل الحاجة دى

هيعمل ايه ؟؟؟؟

حتى لو كان الانسان ده ضعيف اصلا هتلاقوه حاول انه يثبت لى انى غلطانه وانه مش تافه وانه راجل والكلام ده

طيب ليه عمل كل ده

تفتكروا لو انا ماحركتش جواه غيرته على نفسه كان ممكن يعمل حاجة ؟؟؟

كل انسان ربنا جعل له طاقة كبيرة جدا علشان نقدر نعمر الارض

احنا مانقدرش نتخيلها واحنا اذكى بكتير ممكا نتخيل

طيب لو احنا دلوقتى بنلعب لعبة ذكاء وقولت لكم لا الذكى بس يلعب اللعبة

هتعملوا ايه هتقولوا كلكم عايزين نلعبها حتى لو انتم مش اذكياء خالص

هتحبوا تعرفوها .... فضول ممكن ..... تحدى جايز

بس اكيد هتحاولوا

4 - حارب البرمجة السلبية:

لا أستطيع، لست ذكياً. وردّد باستمرار: أنا أستحق الأفضل – أنا مبدع – أنا ممتاز – أنا قادر.

النجاح هو ما تصنعه. فكر( بالنجاح – أحب النجاح.. )

* يبدأ النجاح من الحالة النفسية للفرد، فعليك أن تؤمن بأنك ستنجح – بإذن الله – من أجل أن يكتب لك فعلاً النجاح.

انا مش طويل وأهبل انا قصير ازعه ..... :D

لازم نكون بنثق بنفسنا ونكتشف قدراتنا ومتاكدين ان اللى جوانا اكبر بكتير من اللى بنعمله

5- لا تخش الفشل:

فالفشل مجرد حدث.. وتجارب بل استغله ليكون معبراً لك نحو النجاح، لم ينجح أحد دون أن يتعلم من مدرسة النجاح.

تذكر: الوحيد الذي لا يفشل هو من لا يعمل.. وإذا لم تفشل فلن تجدّ، وما الفشل إلا هزيمة مؤقتة تخلق لك فرص النجاح.

وافتكروا الحكمة اللى بتقول

لا ترضى ان تعيش على هامش الحياة

احنا عايزين نعيش الحياة وليه نعتبر الفشل نهاية الحلم

لا بالعكس ده البداية اعتبروه تجربة

انا ماجبتش مجموع السنة اللى فاتت بس خلاص مش هخلى الفشل يتحكم فيا وهجيب السنة دى

لسه فى فرصه ودايما فى أمل .... طول ما فى مستقبل يبقى فى حياة

6- املأ نفسك بالإيمان والأمل:

الإيمان بالله أساس كل نجاح، وهو النور الذي يضيء لصاحبه الطريق، وهو المعيار الحقيقي لاختيار النجاح الحقيقي..

الإيمان يمنحك القوة وهو بداية ونقطة الانطلاق نحو النجاح.

كلنا لازم نلجأ لربنا

وافتكروا الايه اللى بتقول " ولا تكونوا كالذين نسوا الله فأنساهم انفسهم اولئك هم الفاسقون "

ربنا بينسانا لما احنا بننساه

خلينا دايما فاكرينه ....

واذا سألك عبادى عنى فانى قريب اجيب دعوه الداعى اذا دعانى

سلاحنا اليومين ده هو الدعاء

7- اكتشف مواهبك واستفد منها:

لكل إنسان مواهب وقوى داخلية ينبغي العمل على اكتشافها وتنميتها،

ومن مواهبنا الإبداع والذكاء، والتفكير والاستذكار،

والذاكرة القوية.. ويمكن العمل على رعاية هذه المواهب

والاستفادة منها بدل أن تبقى معطلة في حياتنا

8- الدراسة متعة.. طريق للنجاح:

المرحلة الدراسية من أمتع لحظات الحياة ولا يعرف متعتها إلا من مرّ بها والتحق بغيرها.. متعة التعلم لا تضاهيها متعة في الحياة وخصوصاً لو ارتبطت عند صاحبها بالعبادة.. فطالب العلم عابد لله وما أجمل متعة العلم مقروناً بمتعة العبادة.. الدراسة وطلب العلم متعة تنتهي بالنجاح.. وتتحول لمتعة دائمة حين تكلل بالنجاح.

فعلا والله بجد انا نفسى ارجع الثانوية تانى علشان ازاكر بدل الراحة اللى الواحد فيها دى

وبقول ازاى ممكن بعد سنتين مش هبقى طالبة وهعمل ايه انا شاغلة دلوقتى نفسى بالمزاكرة طيب هعمل ايه بعد كده

9- الناجحون يثقون دائماً في قدرتهم على النجاح:


الثقة في النجاح يعني دخولك معركة النجاح منتصراً بنفسية عالية،

والذي لا يملك الثقة بالنفس يبدأ معركته منهزماً

ونفتكر تانى نابليون لما سألوه كيف استطعت ان تولد الثقة فى نفوس جيشك

فأجاب : كنت أرد على ثلاث بثلاث ؟؟

* من قال لا أقدر ... قلت له ... حاول
* من قال لا أعرف ... قلت له ... تعلم
* من قال مستحيل ... قلت له ... جرب





انا عارفة طولت عليكم جدا

بس اعذرونى قدامى على اول مايو بس وبعدها هقفل النت

والمنتدى مابيفتحش خالص عندى

علشان كده انا هقولكم اللى عندى وانتم ابقى شوفوه براحتكم

المرة الجاية ان شاء الله هنتكلم عن 3 حاجات

اول حاجة ازاى نقدر نجمع مزاكرة السنة كلها فى الشهرين الباقيين

تانى حاجة ازاى نزاكر دروسنا من غير ما ننساها او نسيان اجزاء منها

تالت واخر حاجة ازاى نستغل وقت فراغنا فى مراجعة منظمة وفعالة وغير مجهده

ويارب كلامى يكون خفيف عليكم

وماتنسوش تدعوا لى انا واختى

وياريت اى حد يعلق تعليق واحد بس علشان اعرف ان فى حد متابع

سلام</div>