بسم الله الرحمن الرحيم والحمد لله واشهد ان لا اله الا الله وحدة لا شريك له واشهد ان محمد عبدة ورسوله
ويا جماعة عايزة ردود لرايكم فى الموضوع عشان لو حلو احط حلقات تانية
أول مؤشر تعرف بيه رضا ربنا عليك :-

1- صلاة الفجر
بتصلي الفجر؟ .. علي فكرة ناس كتييييييييييييييير اوي وانا كنت اولهم كنت بقول ان احنا طلما نايمين يبقي تسقط عننا الصلاة .. بس هسألك سؤال .. تفتكر ليه ربنا فرضها فى الوقت ده - وهو أعلم - ان احنا هنكون نايمين ... يااه بقالك كام سنة بتصلي 4 فروض بس !! انا مش هطول في النقطة دي وهخش معاك في موضوعنا على طول ..
طيب ليه صلاة الفجر بالذات؟
لو لاحظت ان كل الصلاوات ماعدا الفجر (يعني الظهر والعصر والمغرب والعشاء) الاذان يؤذن .. واحنا نقوم نتوضا ونصلي ونكمل احنا كنا بنعمل ايه ... يعني ممكن نكون بنعمل الصلاة دي كأي عمل روتيني .. علشان أحنا مفروض نصلي !!!!!!

انما صلاة الفجر .. أنت بتكون نايم .. مين اللي بيخليك تصحا عشان تصلي الفجر؟ .. والدك؟؟ والدتك؟؟ المنبه؟ .. لا ولله .. ممكن كل دول يصحوك وفي الاخر يغلبك الشيطان وتنام .. انما شوف لو ربنا راضي عنك هيخليك تصحا تقف قدامه وتكلمه .. اصل الصلاة دي مناجاة العبد لربه .. فشوف قد ايه ربنا خلاك تصحا عشان عايزك تقف قدامه وتناجيه... سواء بقي عن طريق حد صحاك .. ولا فكرك تظبط المنبه ولا ولا ...
ولا ياسلام بقي لو بتصحا علي الفجر من نفسك يااه
طب عايز تتاكد اكتر .. شوف لما بتصحى للفجر بتبقي صاحي مش قادر نفسك تنام .. ويمكن تنام وانت ساجد ناس كتير كده ؟؟ ولا بتبقي صاحي فايق كده وعارف انت بتقول ابه في الصلاة ...
أوعي تقول ان ده علي حسب ما انت نمت كم ساعة للفجر .. والله يا جماعة ببقي نايم ساعتين واصحي للفجر كاني نمت 12 ساعة .. فايق وكله تمام حتي اني ممكن انام بعد الفجر واصحا بعد 4 ساعا ت للعمل احس كاني ما نمتش خالص ..

ها ياتري بتصحا للفجر حالتك ازاي .. فايق ولا ... ولا مبتصليش الفجر خالص ..

طب بالله عليك لو مش عارف تصلي الفجر راجع نفسك شوف ايه الغلط .. وتوب على طول .. ولو معرفتش ايه اللي بعدك عن ربنا .. بالله عليك قول الدعاء ده " استغفر لله الذي لااله الا هو الحي القيوم واتوب اليه " على قد ما ربنا يقدرك وان شاء الله تغفر ذنويك .. يمكن تكون سبب في قربك من ربنا
تاني امر هاتكلم عنه هو

" الدعاء "

ناس كتير فاكرة أنها طالما بتدعي وربنا بيستجب ليها يبقي هما كده علاقتهم كويسة بربنا .. الكلام ده تقريبا 90 % غلط .. وأكبر دليل على كلامي ان ابليس شخصيا ً دعا ربنا وربنا استجاب له .. واهو ابليس يعنيا لكفر بعينه .. قال لربنا امهلني ليوم القيامة وانا اضل عبادك وربنا استجاب له .

طب ليه ربنا استجاب ؟ هقولك بسرعة عشن ده مش موضوعنا .. ممكن ربنا يستجيب دعوة العاصي عشان تزيدوا ضلال أكتر

أمال أزاي الدعاء مؤشر علي رضا ربنا ؟ هقولك :-
انت بتدعي ربنا ؟ بتدعيه كام مرة؟ وازاي ؟ للاسف يا جماعة كتير منا ما بيدعيش ربنا غير لما تكون عايزة حاجة من حاجا ت ا لدنيا .. وممكن في رمضان تدعي عايزة حاجات من الأخرة وبعد رمضان ترجع تاني ..ولما يتحقق له الطلب تنسى تقول الحمدلله أو تصلي ركعتين و تطول في السجدة ... ياه تخيل كده وانت عمال تناجي ربان وتقوله الحمدلله يارب علي كذا .. يارب بارك لي .. اللهم اني اسالك خيره وخير ما هو له .. وعوذ بك من شره وشر ما هو له ......... طب دي الصورة من الارض .. بص بقي الصورة في السماء وربنا عمال يباهى بيك الملائكة .. سمع الملائكة وهي عمالة تقول اسمك في السماء !!ا سمك انت مش اسم حد تاني .. ولا الملائكة الملتفة حولك في الصلاة . لما تتنهي من صلاتك تباهي بها كل الملائكة الاخري انهم خضرو صلاتك اللي كان ربنا يباهى بها الملائكة في السماء ... طب متخيل بيتك وانت عمال تملاه بالملائكة لدرجة ان مفيش مكان خلاص الملائكة ملاته لاخره .. طب ده كله ليه؟ عشان بس اندمجت اوي في مناجاتك لربنا ودعيت باخلاص .

عايز تعرف ربنا راضي عنك ولا لا.. بص لدعائك .. بتفتكرتدعي ربنا ؟ ولا بتبقي داخل الصلاة وفاكر تدعي .. وهب تلاقي نفسك خلصت ونسيت خالص .. طب بلاش اجيبها من عندك .. كم مرة كنت عايز تدعي وتطول في سجود الركعة الاخيرة .. ولما توصل الركعة الاخيرة .. موبيلك رن وخلاك خرجت عن خشوعك وخلصتالصلاة بسرعة عشان انت مستني مكالمة .. كام مرة تبقي فى الركعة الاخيرة وصوت التلفزيون يجيلك تسمع صوت تتر المسلسل بتاعك فتنسي الدعاء ... أو تسمع صوت هيصة فتعرف ان فريقك جاب جون وتنسي الدعاء ..........

عارف ليه الدعاء ؟ عشان ربنا بيحب عبده اللحوح .. ها ربنا عايز يسمعك .. ولا لا
.. طبعاً حاشا لله ن يكون ربنا مش عايز يسمع حد فينا .. الغلط هو اللي بيقي من جوانا وعشان كده الشيطان بيحاول يمنع اي صلة بينك وبين ربنا .. علي سبيل المثال ما يخلكش تصلي .. طب صليت .. ما يخلكش نخشع .. طب خشعت .. ينسيك انك تتكلم مع ربنا وتدعي
بص ربنا بيقولك ايه في القران .. بسم الله الرحمن الرحيم " وقال ربكم ادعوني استجب لكم .. ان الذين يستكبرون عن عبادتي سيدخلون جهنم داخرين "

والرسول صلي الله عليه وسلم يقولك " الدعاء مخ العبادة " فيوم ما تلغي الدعاء من حياتك هو يوم ما تبقي عبادتك ماتت .. زيها زي الانسان لما تشيل منه المخ ! ! !


بص للصحابة .. كانوا يفضلوا بعد رمضان 6 شهور يدعوا ربنا انه يتقبل منهم رمضان .. وال 6 شهور اللي قبل رمضان يدعوا ربنا انه يبلغهم رمضان القادم..

في ناس تفتكر ان لما ربنا يؤخر دعائها يبقي مش راضى عنها ... مع اني شايف غير كده .. ممكن يبقي ربنا مؤخر دعاك لمنع ضرر .. او لحاجة احسن ليك .. او لانه حابب انك تفضل تناجيه و تقوله يارب يارب .. النبي يقولك .. ان الله يحب عبده اللحوح .

يبقي عايز تعرف ربنا راضى عنك ولا لا ؟ بص لدعائك .. بتدعي كتير؟ بتدعي بحاجات كويسة ؟ أسلوب دعائك عامل ازاي؟ بتحب الدعاء ولا بتدعي عشان حاجتك ؟؟
خد بالك كل متحب الدعاء ربنا يحببك فيه اكتر .. وكل ماتحبه اكتر اعرف ان ربان بيحب يسمعك وانت بتتذل لله
ثالث مؤشر هو :

القرآن

بصوا يا جماعة من مبدأ ان احنا عايزين نقول كلام مش متكرر ولا سمعناه قبل كده انا مش هاتكلم عن ثواب قراءه القرآن او غيره .. خلينا نتكلم في معاني جديدة ..

بس عشان ابدأ ووصلك اللي في دماغي اسرع .. خليني أعملك حلقة وصل بين الحلقة الاولي وحلقة النهاردة بس عايزك تركز معايا ثواني .

فاكر واحنا بنتكلم عن صلاة الفجر ... من ضمن كلامي كنت بقولك ان صلاة الفجر هاتبينلك لو ربنا راضي عنك هينادي عليك ويصحيك عشان هو حابب يسمعك ... وقولتلك يااه ربنا عايز يسمعك انت .. يعني تخيل مثلاً كل يوم في صلاة الفجر ربنا يقول فلان ابن فلان وفلان ابن فلان وفلان بن فلان وفلان ابن فلان دول عايزهم يقفوا قداماي كده ويتكلموا .... كل الكلام ده قولنا ه قبل كده .. بس لو استمريت علي كده انا بقولك انها كم شهر والعلقة ديها تكثرويمكن ترجع تاني تسيب الفجر .. عارف لبه؟ لان العلاقه مش كامله .. هتقولي علاقة ايه؟
علاقتك بربنا كده - في الحته دي - مش كاملة.

عشان أبسط لك الامور ... لو حضرتك متزوج مثلاً .. او انتي وزوجك في البيت .. و انت وصاحبك او انتي وصاحبتك .... تخيل أو تخيلي لو ان زوجك أو زوجتك أو صاحبك أو صاحبتك دايماً هو او هي اللي بيتكلم ويقترح ومش مديك فرصه تتكلم او ترد .. دايما دايماً هو اللي بيتكلم .. تفتكر بعد فترة العلاقة دي هتبقي عامله ازاي؟ علاقة فاترة ؟ لا ده ممكن تنقطع العلاقه دي خالص ... طب ليه؟
لانها علاقة مش كامله ... اصلها قائمة علي شخص واحد ... هو اللي بيتكلم دايماً ... ............ ولله المثل الأعلي

علاقتك بربنا لازم يكون فيها دعم .. احنا اتفقنا ان انت بتكلم ربنا في الصلاة .. طب مانت لازم تسمع ربنا برضه .. طب تسمعه ازاي ... بص الحديث ده ..(( من أراد أن يكلم الله فليصل، ومن أراد أن يكلمه الله فليقرأ القرآن ))

وكأني عايز أقولك ان انت لازم تدعم علاقتك مع ربنا مش بس هتصلي ... ل ده انت كمان ها تقرأ القرآن.

اسالك سؤال ... كام مرة جاتلك فترة تدين شديدة وقرأت فيه الفرآن ... شهر واثنين ...ويعدين مليت؟ ... كتير؟ طب حتي لو كنت بتقرا القرآن .. بتقراه بشكل روتيني ... عارف ليه؟

لان العلاقة مش مظبوطة .. يعني بص لصلاتك اكيد اكيد فيها خلل .. بص هقولك علي حاجة وانا أحاسب علي الكلام ده ...
عارف امتي تحس بحلاوة القرآن؟ يوم ما تظبط صلاتك ... وعارف امتي تظبط صلاتك وتحس بحلاوتها؟ ..يوم ما تقرأ القرآن بخشوع
بإختصار
* قرآن بخشوع + صلاة بخشوع = علاقة كاملة وتشعر بحلاوة كل منهما.
* قرآن روتيني + صلاة بخشوع = علاقة غير كاملة وستفقد خشوع صلاتك قريباً
* قرآن بخشوع + صلاة روتينية = علاقة غير مكتملة وستفقد خشوع القرآن قريباً



1- هتخصص لنفسك ورد من القرآن كل يوم .. حتي لو كان الورد ده آيه واحدة .. لان العبرة مش بالكم ... احنا عايزين واحنا بنقرأ كل آيه نقف بعديها ونفهمها ونفهم كل كلمه كويس .. وما فيش مانع تستعين بكتب تفسير ... بس المهم انك تعرف انت بتقرأ ايه عشان تبتدي تخشع في القرآن .. وبعدين ياسيدي ابقي زود براحتك الكم

2- هنكثف الدعاء شوية ان ربنا يعيننا .. وهندعي لبعض لان الدعاء بظهرا لغيب لاخيك المسلم مستجاب

3- هنواظب بقي علي صلاة الفجر عشان زي مااتفقنا نكمل الدائرة عشان العلاقة تبقي سليمة

ان شاء الله لو قدرنا نعمل ال 3 حاجات دول .. كل اللي جي هيبقي سهل ان شاء الله


ويا جماعة عايزة ردود لرايكم فى الموضوع عشان لو حلو احط حلقات تانية

السلام عليكم ورحمة الله وبركاته
ازيكوا يا جماعة عاملين ايه؟ .. ياتري ايه اخبارك دلوقتي حسيت باللي اتكلمتا عليه المرة اللي فاتت ؟ حست بخشوع في القرآن وفي الصلاة؟ كنا اتفقنا ان مش مهم الكمية اللي بتقرائها علي قد ما تكون فاهم اللي انت بتقرأه .. ربنا يعينكوا جمعياً وأهم حاجة تخلصوا النيه لله.
علشان الناس متقولش ان احنا ماشين بسرعة ومش لحقين نواظب علي ايه ولا ايه .. ان شاء الله حلقة النهاردة خفيفة وجميلة في نفس الوقت .. وهتديك مساحة تظبط نفسك في اللي فات

النهاردة ان شاء الله هنتكلم عن مؤشر جديد تعرف بيه رضا ربنا عنك.. وزي ما قولتلكوا هتكلم عنه بطرية تانية عشان مكررش الكلام اللي سمعناه كتير قبل كده.

---------------------------------------------------------------------------------------------
المؤشر الرابع هو : الذكر

اكيد كلكوا حافظين أحاديث كثيرة واذكار كثيرة وعارفين ثوابها الي اخره ..... بس انا عايز اتكلم عن معني جديد للذكر .. بس خليني اسئلك هو ايه الفكرة من ذكر ربنا؟
بص انا هقولك علي حاجة يمكن مخدش بالك منها قبل كده.
لو انت بتحب شخص مثلاً .. بس مش مجرد حب عادي لاء .. ده حب شديد جداً جداً جداً .. من الطبيعي ان يكون الشخص ده علي طول علي بالك .. يعني تقريباً بتفكر فيه 24 ساعة ..صح؟ اكيد .. ياجماعة اللي ميعرفش الكلم ده يسأل حد بيحب مثلاً زوجته بدرجة كبيرة .. او زوجة بتحب زوجها جداً وزوجها غائب عنها مثلاً .. اسئلها قولها بتفكري في زوجك اد ايه؟ هتقولك تقريباً مبيروحش من بالها .

ولله المثل الاعلي .. وكأني عايز أقولك عايز تعرف دلوقتي مدى حبك انت لربنا شوف اد ايه في اليوم بيجي علي باللك وبتذكره .. مرة؟ مرتين؟ بعد كل صلاة بس؟ ولا علي طول علي بالك وبتذكره؟ ولا تقريباً بيعدي اياااااااام من غير متذكر ربنا.

يا جماعة انا مش جاي اتكلم في اذكار الصباح والمساء أو اذكار ختام الصلاة أو الخروج من البيت أو أو أو أو .... اللي تقريباً معظمنا بيعملها بشكل روتيني من غير ما نفكر احنا بنقول ايه اصلاً.
أنا بتكلم علي انك تكون قاعد كده .. يمكن مع اهلك ..و قدام الكمبيوتر ..أ, بتكلم حد ..وتفتكر ربنا فتذكره علي طول ..... وعلي فكره اكتر ذكر تحس بيه وتفهمه ويلمس قلبك هو اللي تقوله من غير سبب فجأاه كده .. يجي علي بالك فتقوله.

أنا عارف ان كتير بيقولوا دلوقتي ايه علاقة كده بانك تعرف اذا كان ربنا راضي عنك ولا لاء... ده شئ انت اللي بتعمله... انا بقولك لاء مش اي حد يعمل كده بسهولة .. وبقولك برده انك ممكن توصل للمنزلة دي بسهولة وهقولك ازاي بس خليني الاول اقولك ازايبذكرك لربنا تعرف اذا كان ربنا راضي عنك ولا لاء .
بص الحديث القدسي ده " أنا عند ظن عبدي بي وأنا معه إذا ذكرني، فإن ذكرني في نفسه ذكرته في نفسي، وإن ذكرني في ملأ ذكرته في ملأ خير منه، وإن تقرب إلي شبراُ تقربت إليه ذراعاً وإن تقرب إلي ذراعاً تقربت إليه باعاً وإن أتاني يمشي أتيته هرولة"
والله وكأني بسمع الحديث لاول مرة .. " وأنا معه إذا ذكرني " يعني ربنا معاك دلوقتي وانت بتذكره واثناء مانت بتذكره في نفسك هو وكمان بيذكرك في نفسه اي ذكر؟
اللي احنا بنقوله واحنا سرحنين؟ ولا الذكر اللي تقوله كده وانت عارف كل كلمه فيه ؟

عايز تعرف ربنا راضي عنك ولا لاء ... شوف كام مرة بتفتكر ربنا في اليوم وتذكره... لان اكيد ربنا مش هيذكر حد في نفسه لو كان مش راضي عنه .. يعني شيئ بديهي .. ومش هيخليك تفتكره .
مش عارف اذا كانت الفكره وصلت ولا لاء ... بس خليني ارجع للنقطه اللي سبتها وهي ان انا عارف ان في ناس ممكن تكون بتقرأ الموضوع ده وتقول ياه انا مبفتكرش ربنا خالص .. انا ربنا مش راضي عني .. وييئس ويمشي.
لاء انا بقولك استني ...لان اكيد انا كنت مكانك يوم من الايام وكلنا كنا زيك بس تعالي نحل الموضوع سوا.
انت دلوقتي عايز تخلي ربنا علي باللك علي طول .. هقولك ازاي :-

1- أول حاجة اخلص النيه لله تعالي وحده.
2- راجع لحلقة التانية كانت بتتكلم عن الدعاء .. ادعي ربنا اانه يعينك بس بالله عليك اخلص الدعاء.
3- عشان ربنا يجي علي بالك علي طول لازم اي شهوة تخرج من قلبك عشان مينفعش ربنا والشهوة يكونوا جوا قلبك في وقت واحد.
وعايز تعرف ازاي تخرج شهوة معينه هقولك ازاي ودي طريقة سهلة جداً جداً جداً .
كل الل فات ده كان تهيئة (نظري يعني) اللي جاي بقي عملي
4- ابداء انت بذكر ربنا مع نفسك بس ركز اوي وانت بتذكر ربنا وحاول تفهم كل كلمة بتقولها وحاول انك تدور علي الذكر اللي تساعدك علي كده والاذكار اللي تغفر الذنوب وغيرها.
5- وانت بتصلي الفجر بالذت طلب من ربنا الاعانة .. وعشن كده انا خليت صلاة الفجر أول حلقة عشان هي بجد مدخل لرضا ربنا.

يارب اكون يعني وفقت .. ما كان من توفيق فمن الله .. وما كان من خطأ أو سهو فمني ومن الشيطان.

وان شاء الله اشوفكوا السبت القادم علي خير .
والسلام عليكم ورحمة الله وبركاته

تصدقوا يا جماعة انى مش هكتب فى المنتدى دة ولا حتى كلمة جزاك الله كل خير كل لما اكتب محدش يسيب رد حتى انا زهقت وانا كل لما ادخل على موضوع حتى لو كان مش لطيف بسيب رد انا خالص زهقت والله انا هدخل بس عشان مذكراتى لكن اكتب تانى لا حتى فى قسم شروحات الحاسب محدش بيسيب رد انا زهقت باى