السلام عليكم ورحمة اللة وبركاتة
انا كنت عايزة اسال كورسات اية اللى ممكن ناخدها انا خلصت اولى وفى انتظار النتيجة ربنا يستر المهم فى ناس زاميلى راحو اخدوا icdlفى سنتر فى الدقى الكورس ب 20لليفل الواحد وبعدين يروحوا يمتحنوا فى الجامعة انا حاسة انهم استعجلوا على الكورس دا وكمان عايزة اسال ممكن ناخد اية غير الكورس دا وفين وهل نتيجة تانية مش بتطلع غير بالشهادة دى ولا دا كلام وخلاص واسفة انى طولت عليكوا

ونسيت اقولكوا كمان ابتدى اخد الكورسات دى امتى فى تانية ولا تالتة

انا اعرف ان فى حاجه زى دى كده فى مركز البحوث فى الجامعه وكان ب 40 جنيه تقريبا وكنتى برضو هتاخدى الشهاده من الجامعه بس الشهاده بتاعتها ملهاش اى 30 لازمه عشان دى كانت المصريه وبرضو كان فى كورس تانى ب 200 جنيه وبعد ماتخلص بسترد جزء كبير من الفلوس حوالى 80 % من ال 200 جنيه دول بس الكورس ده اتلغى دلوقتى خلاص واحسن حاجه موجوده دلوقتى هوا الكورس بتاع الجمعيه العلميه وده اللى انا شايفه مضمون عن الباقى كله وده ب 650 جنيه باين وبتدفعى 200 فى الاول وبعد شويه بتدفعى الباقى بس بتاخدى الشهاده الرسميه معتمده من اليونسكو ولما تتحط فى الcv هيبقى ليها قيمه كده بس....
وهيا فعلا اجباريه علينا بس خلال الاربع سنين يعنى مش هتاخدى شهاده التخرج الا لما يكون معاكى icdl
وبعدين هوا الكورس ده بيقعد 3 شهور شوفى تاخديهم انتى فى انهى سنه براحتك خالص يعنى عادى
ده كان لكورس ال icdl بس وطبعا الكلام ده انا مش متأكد منه اوى اسألى فيه تانى برضو

شكرا يا احمد على ردك ما انا بردة سالت فى مركز خدمة المجتمع وكان كلة تقريبا 650 بس هو انا اللى مش عارفة انهى احسن ولا كلة بيبقى زى بعضة وهى شهادة وخلاص وبعدين مكنتش عارفة اخدها امتى لان فى ناس خوفونى وقالولى ان شهادة تانية مبتلعش الا بيها بس انت كدا طمنتنى شكرا ليك وبالنسبة لكورسات الانجليزى متعرفش حاجة عنها

شكرا يا احمد على ردك ما انا بردة سالت فى مركز خدمة المجتمع وكان كلة تقريبا 650 بس هو انا اللى مش عارفة انهى احسن ولا كلة بيبقى زى بعضة وهى شهادة وخلاص وبعدين مكنتش عارفة اخدها امتى لان فى ناس خوفونى وقالولى ان شهادة تانية مبتلعش الا بيها بس انت كدا طمنتنى شكرا ليك وبالنسبة لكورسات الانجليزى متعرفش حاجة عنها
انا الى اعرفة ان مركز خدمة المجتمع ب 150 جنية بس والامتحانات ب 35 جنية
يمكن انتى تقصدى الشهادة الانترناشيونال بتبقى اغلى شوية
على فكرة الشهادة مهمة لانك كدة كدة هتخديها فاحسن تخلصى منها بدرى بدرى

انا الى اعرفة ان مركز خدمة المجتمع ب 150 جنية بس والامتحانات ب 35 جنية
يمكن انتى تقصدى الشهادة الانترناشيونال بتبقى اغلى شوية
على فكرة الشهادة مهمة لانك كدة كدة هتخديها فاحسن تخلصى منها بدرى بدرى
ايوة انا قصدى على الانترناشيونال فعلا اصل التانية ملهاش لازمة اصلا

مافيش داعى للحيرة ولا حاجـة

انا اشرحلك القصة من اولها عشان تبقى فاهمة الحكاية كاملة ..

ولما يبقى حد يسألك تبقى تقوليله الكلمتين دول برده

دلوقتى شهادة الـ ICDL اللي موجودة في مصر ليها شهادتين

ICDL Standerd و ICDL Advanced

بالنسبة للستاندرد دي بتبقى اسمها ICDL V.4

يعنى النسخة الرابعة .. ودي منهج الاوفيس اللي بيتدرس فيها بيبقى اوفيس 2000

بتتكون عموما من 7 موديولز .. ودا الناس كلها عارفاه طبعا

IT - Windows - Office 2000 .. والاوفيس طبعا شامل وورد - اكسيل - باور بوينت - اكسيس - الانترنت والاوتلوك

بالنسبة للادفانسد بقى دي شهادة مبتكرة عملتها هيئة اليونسكو جديد

ومعمولة للناس الحاصلة على الشهادة الاستاندارد وحابه تنمى مهاراتها وتبقى متخصصة اكتر

بتتكون من 4 موديولز .. ويندوز - باوربوينت - اكسيل - اكسيس

ميزة الشهادة دى حاجتين ..

1- ان المنهج اتحدث .. او بمعنى اصح البرامج اتحدثت بدل ما كان على اوفيس 2000 بقى على اوفيس 2007

2- ان كل موديول اجبارى بتمتحنيه بشكل منفصل لوحده

بمعنى انك تخلصى الوورد وتمتحنيه .. فوراً بيدوكى شهادة بانك تجاوزتى الوورد

وهكذا .. لغاية ماتخلصى الاربع موديولز كلهم بيقوموا مديينك شهادة فوق الاربعة اللي انتى خلصتيهم

ودي بتفيد انك خلاص بقيتي expert في الحاجات اللي انتى درستيها

الفرق بين الاستاندارد والادفانسد طبعا واضح ..

ان شهادة الاستاندارد بتفيد انك تجيدي التعامل مع البرامج السابق دراستها

اما الادفانسد فابتفيد انك بقيتى خبيرة او محترفة في التعامل مع البرامج المعينة الموجودة فقط في شهادة الادفانسد

قبل ماخلص بس الجزئية دي فيه كلمة كدا شدتنى في النص

ايوة انا قصدى على الانترناشيونال فعلا اصل التانية ملهاش لازمة اصلا

للأسف الكلام دا مالوش أساس من الصحة .. وانا فاهم انتى تقصدى ايه بالكلمة دي

انا اشرحلك اللي بيحصل

فيه حاجة اسمها skillcard .. البطاقة دي اول مابتروح تسجل في المركز اللي انتي هاتاخدى فيه بتكتبى بياناتك

البطاقة دي بيبقالها كود معين .. الكود دا بيبقى وحيد عالمياً زي البصمة كدا

ودا اللي بيتسجل في اليونسكو منعا لتداخل الارقام مع بعضها

بمعنى انتى وانتى بتسجلى بتكتبى بياناتك عادي .. طلع ان الكود بتاعك مثلا EGY125687

كلمة egy دي محطوطة عشان حاجتين

1- تمنع خلط الارقام مع بعضها .. مع العلم ان الارقام بتبقى كتيرة فوجود كود في النص بيقلل من الخطأ دا

2- انها بتحدد بسهولة المكان الصادر منه الرقم دا

بالنسبة للكود داخل مصر واللي بيتم التعامل بيه .. فيه كودين .. EGY و UN

الفرق بينهم ان egy دا بيبقى وزارة الاتصالات هيا اللي عاملاه

اما un دا بيبقى مكتب اليونيسكو الاقليمي نفسه اللي في مصر هنا هوا اللي عامله

وفي الحاااااااالتين الشهادة نفسها بتعتمد غصب عنها من اليونيسكو وبتتختم بختم اليونيسكو

وبالتالى لا يوجد أى فرق بين الـ UN والـ EGY الا بس في جهة اصدار الكود نفسه

وفي جميع الحالات يستحسن اننا نروح لمكان مشهور ومعروف ان فيه ناس خدت فيه كتير

مش شرط انه يكون غالى .. مش كل حاجة غالية تكون جامدة ومش كل حاجة رخيصة تكون وحشه

بالنسبة للأسعار اللي هاتلاقوها في الجامعة (توفيرا على المشورة والسؤال) هيا الاتى :

- مركز الحساب العلمى (كلية الحاسبات والمعلومات) 450 جنيه

- مركز خدمة المجتمع 250 جنيه

- مركز البحوث التجارية (خلف مدرج العيوطى) 650 جنيه (تقريبا مش فاكر بالظبط)

- مركز البحوث الاحصائية 450

فروق الاسعار بتبقى ناتجة من مدى نضافة الاجهزة والقاعات والماتيريال اللي بتتوزع وهل فيه تكييف ولا لأ

ودا حوار الـ ICDL من الااااااااخر ان شاء الله

فيه جزئيتين تانيين حابب اتكلم فيهم كشئ اضافى برده للمعلومات العامة

فيه شهادتين .. الاولى اسمها IC3 والتانية اسمها MOS

الـ IC3 دي شهادة دولية برده بس بيتدرس فيها 3 حاجات بس

مقدمة عن الكمبيوتر والويندوز - وورد واكسيل وباوربينت - انترنت واوتلوك

بس الحاجات دي بتبقى دراستها مكثفة شوية ..

بمعنى ان شهادتها برده بتبقى احتراف مش اجادة تعامل بس

طبعا فيه ناس كتيرة ماتعرفش الشهادة دي .. ودا بسبب ان الـ ICDL سمعتها اكتر

عشان كدا المراكز اللي بتدرس الشهادة دي قليلة .. وللأسف مايتعرفلهاش سكة الا للي يسأل بقى

الشهادة التانية بقى اسمها MOS .. ودي بتقدمها شركة مايكروسوفت للي عايزين يدرسوا برامج الاوفيس

برامج الاوفيس زي ما كلنا عارفين هما 5 برامج .. وورد - اكسيل - باوربوينت - اكسيس - اوتلوك

والشهادة اللي بتطلع بيبقى باسم شركة مايكروسوفت

وبيبقى اعتراف نصى منها انك محترف في التعامل مع البرامج دي

معنى كدا ان الـ MOS نوعا ما زي الـ ICDL Advanced بس بتفرق عنها في

1- الـ MOS فيها 5 برامج اوفيس .. اما الـ Advanced فيها 3 برامج بس

2- الـ MOS بيتدرس فيها برامج الاوفيس بس ..

اما الـ Advanced بيتدرس فيها بعض برامج الاوفيس + الويندوز

3- جهة اصدار الشهادة نفسها .. MOS بتبقى مايكرسوفت .. الـ ICDL بتبقى زي ماحنا عارفين اليونيسكو

انا شخصياً شايف ان شهادة الـ MOS اقوى من شهادة الـ ICDL عشان حاجتين

1- ايه الاحسن والاولى ؟ انك تاخد شهادة من الشركة اللي عاملة البرنامج نفسه ولا الجهة التانية اللي بتدرس البرنامج دا ؟

2- معنى انك محترف فى التعامل مع برامج الاوفيس كاملة .. يبقى انتا كدا تمام في الويندوز والانترنت ومش محتاجهم

لان من الطبيعى ان مافيش حد هايعرف يتعامل مع برنامج معين من غير مايبقى عنده دراية كافية بالويندوز ولا ايه ؟

بخصوص استفساراتك بقى

انا كنت عايزة اسال كورسات اية اللى ممكن ناخدها انا خلصت اولى وفى انتظار النتيجة ربنا يستر المهم فى ناس زاميلى راحو اخدوا icdlفى سنتر فى الدقى الكورس ب 20لليفل الواحد وبعدين يروحوا يمتحنوا فى الجامعة انا حاسة انهم استعجلوا على الكورس

لا طبعا ماستعجلوش خاااالص .. الـ icdl دي انا بشبها بالتربية العسكرية كدا للشباب بتوع انتظام

حاجة لازم تتعمل وتتاخد غصب عننا .. ومن غيرها مش هاناخد الشهادة .. فانخلص منها بدري بدري

وكمان عايزة اسال ممكن ناخد اية غير الكورس دا وفين

على حسب دماغك ماشية ازاى .. حددى انتى عايزة مجالك ايه لما تتخرجى من دلوقتى

و على هذا الاساس ابدأى نمي نفسك في المجال دا

وهل نتيجة تانية مش بتطلع غير بالشهادة دى ولا دا كلام وخلاص

سيبك .. كلام مالوش لازمة .. لان ادارة الكلية كدا كدا عارفه انكوا هاتاخدوها يعنى هاتاخدوها

ولحظة اصدار شهادات التخرج هايذلوا اللي ماخدهاش .. فعادى يعنى مش فارقة

ونسيت اقولكوا كمان ابتدى اخد الكورسات دى امتى فى تانية ولا تالتة

يستحسن تبدأى من دلوقتى عشان ماتجيش تتزنقى في الآخر .. خلصي بدري بدري

ميرسى ليك جدا انا والله مش عارفة اشكرك ازاى على تعبك دا وربنا يجازيك خير بجد انتا مش متخيل انتا كدا ريحتنى اد اية بجد كنت محتااارة جدااااااااا

السلام عليكم
اولا .. ازيك يا فامبير ؟؟ و ازي بتووووع انتساب ( طبعا معروفين !! )
...
معلش يا فامب ..
انا عاوز اخد كورس انجليزي و ابدأ فيه من دلوقتي ..
علشان شكلي كده هفضل انتساب .. ومش عاوز اضيع وقت
وناس كتير بيشكروو في معهد القوات المسلحة .. وفي المعهد البريطاني .. و بيرلتز
فعاوز رأيك ؟؟ ولو تعرف الاسعار .. يبقي 100 - 100 ..

مركز الحساب العلمى (كلية الحاسبات والمعلومات) 450 جنيه

- مركز خدمة المجتمع 250 جنيه

- مركز البحوث التجارية (خلف مدرج العيوطى) 650 جنيه (تقريبا مش فاكر بالظبط)

- مركز البحوث الاحصائية 450

الف شكر يا فمبير
طيب ماتعرفرش اني احسن مكان فيهم ..
و هيبتدووا امتي ؟؟
معلش هتعبك معايا

فى منحة تبع وزارة الاتصالات وب185 جنية والشهادة معتمدة من اليونسكو ومدتها 14 يوم وهى بتتاخجد فى كلية الهندسة وهتبدأ اول 8

الكلام دا من شباب تجارة

مش عارف اقدم فين ؟؟؟

اولا .. ازيك يا فامبير ؟؟ و ازي بتووووع انتساب ( طبعا معروفين !! )

هههههههههههههه .. انتا هاتقولي ؟ .. عارفهم واحد واحد

وناس كتير بيشكروو في معهد القوات المسلحة .. وفي المعهد البريطاني .. و بيرلتز
فعاوز رأيك ؟؟

لو قيست لقوة الشهادة نفسها .. هايبقى الترتيب كالاتى

القوات المسلحة - المعهد البريطانى - بيرلتز

لو جيت لكفاءة التدريس ومدى استفادتك الفعلية هايبقى الترتيب كالاتى

بيرلتز - المعهد البريطانى - القوات المسلحة

ولو تعرف الاسعار .. يبقي 100 - 100

-بيرلتز من ليفل 1 لـ 5 بـ 800 .. من 6 لـ 8 بـ 900 .. ودا من غير الكتاب والسي دي

- القوات المسلحة .. لو ليك قريب ظابط في القوات المسلحة بيبقى الليفل تقريبا بـ 80 جنيه

لو مالكش حد خالص .. الليفل بيبقى في حدود الـ 300 او 320 + امتحان تحديد المستوى بـ 20 جنيه

- المعهد البريطانى .. ماعنديش فكرة عن اسعاره بصراحة

طيب ماتعرفرش اني احسن مكان فيهم

عادي كله زي بعضه لان الشهادة واحده .. انتا لو عايز الاحسن فعلا

روح خدها في مركز سوزان مبارك .. الدراسة ببلاش ولمدة 3 شهور ..

اما بخصوص الامتحان فانتا هاتدفع الرسوم بس مش اكتر

وفين مركز سوزان مبارك دا وهل دا بيدى انجليزى بس ولا انجليزى وicdl

وفين مركز سوزان مبارك دا وهل دا بيدى انجليزى بس ولا انجليزى وicdl

سوزان مبارك دا ناحية كوبري القبة كدا .. هاتاخدي المترو وتنزلي محطة كوبري القبة وتسألـى

وهوا بيدي كل الكورسات .. انجليش - المانى - ايطالى .. مافيهوش اسبانى

وكله مجانـاً .. بس المشكلة في الشهادة انها مالهاش مصداقية زي باقى مراكز اللغات التانية

النهاردة الصبح جالى جواب من المؤسسة المصرية للغات والكمبيوتر (اظاهر عارفين انى بفكرفى الموضوع داهههه) المهم انهم كاتبين عنوانهم ورقم تليفونهم والاوراق المطلوبة للتقديم بس انا مش عارفة دول تبع اية بالظبط وعرفونى منين اساسا دول تبع الجامعة ولا اية وحدسمع عن المؤسسة دى قبل كدا

السلام عليكم ورحمه الله وبركاته
انا اول مرة ادخل علي المنتدي وبصراحة كده انا سجلت فيه عشان احكي حكايتي مع الزمان قصدي حكايتي مع شهادة الICDL نفسي حد يقولي اعمل ايه عشان بجد انا خلااااااص تعبت.
بدأت الرحلة من حوالي 3سنين وشكلي كده هقفلهم 4 كنت لسه في الجامعة وكان في دكتور كان مصمم انه الشهادة دي نجيبها عشان يستلم مننا المشروع اللي عاملينه فأنا و3 صحابي قلنا لازم ناخدها طب ناخدها منين كان ساعتها المنحة اللي عاملاها وزارة التعليم العالي اللي ب120 جنيه وتستردهم في الآخر وكان في اعلان عن المنحة في كلية تجارة في الجمعية العلمية جامعة القاهرة كان في كشك عملينه عند مدرج هـ ود المهم قدمنا ودفعنا الفلوس واخدنا وصل كان المركز اللي افرب لينا في الدقي رحنا هناك وعملولنا اختبار في الكمبيوتر والدنيا ماشية طبيعي جدا الكلام ده مثلا في شهر3سنة2007 ماشي وبأنا في الكورس ومواعيد متأخرة المهم خلصنا الكورس اللي هوه الشرح وجه بقه ميعاد الامتحانات قام مدير المركز واسمه حمدي انه هتنزل اسامي الناس اللي هتمتحن وفعلا 2من صحابي نزلت اساميهم في الامتحانات وعرفوا مكان الامتحان في مركز اسمه بسملة في شارع هارون وبدأوا يمتحنوا فعلا وانا وصاحبتي لسه مافيش اسامي نزلت ... طب ايه يا جماعة ليه كده قالك الاسامي هتنزل بس انتو اصبروا طب يا جماعة هيه مش بترتيب ابجدي قال لأ دي مسألة حظ وطبعا احنا حظنا معروف صحابنا دول خلصوا امتحانتهم ونجحوا واحنا قاعدين الشهادة طلعت بعدها بكام شهر واحنا قاعدين استردوا فلوسهم واحنا قاعدين وطبعا طول الفترة دي كل مانسأل يقولوا الوزارة قفله المنحة ومش منزلةوscillcardوتابعونا واحنا نتصل وتليفونات طب هاتوا الفلوس لأ مع اني اعرف ناس خدوا فلوسهم من غير ما يمتحنوا المهم اتصرفنا مع الدكتور و الحمد لله عدت وقبل المشروع بعد محايلة والشهادة لسه مافيش لا حس ولاخبر عدت سنة والتانية والتالتة وفي الاخر بعد خناق مع المركز ده والبني آدم اللي اسمه حمدي قال ايه ادانا شهادة من المركز ان انا ادربت فيه ياسلاااام المهم استعوضنا ربنا في الفلوس اللي دفعناها وقلنا بس ما ينفعش لازم نمتحن لأن الدكتور المرة دي مصمم وده كان مشروع التخرج ماشي ندور علي مركز بقي نمتحن فيه بس لاقينا كلية هندسة جامعة القاهرة عاملة منحة امتحانات ب35جنيه مصري قلنا كويس واهي كلية محترمة والمرة دي كانت تبع وزارة الاتصالات قلنا اهو نغير عتبة زي ما بيقولوا ودفعت الفلوس انا وصاحبتي النحس دي واخدنا ايصال برضو يادي الوصل فاكرين الفيلم ده بتاع لو كنت اخدت الوصل...... المهم طيب عايزين نبدأ الامتحانات ماشي اعمل scillcard ورحت علي ميعاد اول امتحان وابص في السكيل كارد دي الاقي اسمي ورقم البطاقة غلط وصاحبتي النحس دي برضو اسمها بس غلط عرفتوا انا بقول عليها نحس ليه ولسه طب انا ذنبي ايه انا كاتبلكوا الاسم ورقم البطاقة صح مالهمش دعوة الغلط من عند اللي كتب وطلعنا من المعمل قفانا يقمر عيش حلو قوي ومعلهش وتعالي المرة الجاية هيكون الغلط اتصلح المرة الجاية دي كان فيها ولا شهر او اكتر والناس اللي معانا قربوا يخلصوا اصلا وصاحبتي بعد مرتين بس كان الغلط اتصلح وانا لأ كل مرة اروح وتكون قايلالي الغلط اتصلح وادخل المعمل وافضل مستنية الدور يجي عليا طبعا الالتزام في المواعيد ده حدث ولا حرج عادي انتا تيجي ووقت ماربنا يريد يدخلوك الامتحان المهم كنت ادخل وبعدين الغلط ما يتصلحش او الاقي الاسم يتصلح ورقم البطاقة لا فطبعا مينفعش امتحن واخرج تاني قفايا يقمر عيش دا انا كنت قربت افتح مخبز واحل ازمة العيش ..... وتفضل راكناني جنيبها طول النهار علي امل ان الغلط هيتصلح وانا قاعدة وفي اخر اليوم وهيه ماشية الساعة 6مثلا تقولي لا اما اتصلحش تعالي مرة تانية دي واحدة اسمها هناء والتانية اسمها فيروز وخدبقي عندك برووووووود فظيع وبهدلة وسخافة حسبي الله ونعم الوكيل وفين وفين علي ما الغلط اتصلح دا بعد ما بابا بقي يتصل بيها .
الغلط اتصلح هييييييييييييييه لا مش هيييييييه ولا حاجة عشان انا طلعت عيني علي ماخلصت امتحانات وضيعت محاضرات كتييير بسبب مواعيدهم البايظة في مركز المعلومات في كلية الهندسة بس كله يهون في سبيل الشهادة انا خلصت امتحانات في شهر 3سنة2010 معايا طب الشهادة بقي امتي تابعينا وتديني مواعيد واروح مافيش ومواعيد واروح مافيش وخدت شهادة مؤقتة عشان اقدمها للدكتور يافرحتي والشهادة قالتلي روحي في المجلس الاعلي للجامعات اسألي عليها اروح هناك يقولولي انتي جاية هنا ليه الشهادة مش بتاخديها من هنا انتي بتاخديها من المركز اللي انتي امتحنتي في ودوخيني يا لمونة .
الهانم بابا اتصل بيها في اول شهر 10 قالتلوا اه دي طلعت بس اديني كام يوم اظبط في الشهادات اديتها اسبوع واروحلها تقولي لا ماطلعتش طب انتي قاليله للراجل المحترم انها طلعت لا ماطلعتش وابقي اسألي علي اول الشهر اللي جاي اللي هوه 11 تمام كده ومشيت برضو قفايا يقمر عيش انا كرهت العيش...... بابا بقي اتصل بيها النهاردة علي اساس ان اول الشهر قرب تقوله ايه لا لسه وابقي اسأل عليها في اول شهر12 .
بس خلاص انا كده خلصت واسفة اذا كنت طولت عليكم بس انا كان لازم احكي واقول لأني بجد تعبت دا انا كده شايلة مواقف كتير عملوها معايا وانا ساكتة علي اساس ان كان لك...........
نا دلوقتي عايزة اعرف اللي حصل ده عادي ولا مش عادي
طب لو مش عادي اعمل ايه اتنصب عليا من وزارة التعليم "العالي" ووزارة الاتصالات ناقص ايه تاني
وانا اتخرجت السنة دي وخايفة لو قدمت في اي مكان وقالوا عايزين الشهادات اقولهم ايه
اعمل ايه يا استاذ VAMPIRE
أريد حلاً