السلام عليكم
انا رايح ثالثة ثانوى ان شاء اللة و جبت في ثانية 92.5 و نفسى ادخل كلية علوم
1- ممكن ادخل جامعة حكومة و انا مستريح ؟
2- ممكن اطلع حاجة حلوة ( كيميائى مثلا ) اصل كل الناس بتقولى كلية صعبة جدا و اخرها مدرس احياء؟

ارجوكوم ردوا عليا انا محتار جدا

الف مبرووك الاول على المجموع ف تانية
و ان شاء الله احسن منه ف تالتة
اول سؤال ليك اها ان شاء الله تدخل جامعة حكومية و انت مستريح
و ممكن التنسيق ينزل و تدخل هندسة
و مش هكدب عليك مجال الشغل ف هندسة طبعا احسن من علوم
تانى حاجة بقى الكلية اه صعبة
بس مش زى مانت متخيل والله محتاجة شوية مجهود بسيط و هتبقى كويس
المهم تكون حابب اللى بتدرسه
و اها ممكن تطلع كميائى و ممكن تعمل دبلومة و تبقى دكتور تحاليل
و ممكن تدخل قسم بترول بس ده بفلوس و تبقى مهندس بترول
و فيه قسم جديد اسمه البيو توكنولجى برجه بفلوس
بيقولوا عليه حلو اوى
و فيه قسم كميا حيوى برده حلو بس ده من غير فلوس :d
بالتقدير و بياخدوا فيه 60 طالب بس
و فيه قسم جيوفيزيا ده بيطلعك زى مهندسين البترول برده
بس صعب دخوله شوية عشان تقديره و انه بياخد كحد اقصى 10 طلاب
و ربنا يوفقك للى فيه الخير
فى امان الله

الف شكر واللة ربنا يطمنك
و انا فعلا حابب كل اقسام علوم
بس كنت عايز راى حضرتك فى قسم الفلك و كدة؟

الف شكر واللة ربنا يطمنك
و انا فعلا حابب كل اقسام علوم
بس كنت عايز راى حضرتك فى قسم الفلك و كدة؟
بصراحة انا مخدتش فلك
بس على حد علمى من كلام اصحابى
بيقولوا انه لذيذ جدا ف مذاكرته و بيجيبوا درجات فيه كويسة
اما من حيث سوق العمل فبصراحة انا معرفش
هو انت علمى رياضة ولا علمى علوم
و عايز تدخل جامعة ايه ؟

انا علمى علوم و مش عارف اخش جامعة القاهرة ولا عين شمس

انا علمى علوم و مش عارف اخش جامعة القاهرة ولا عين شمس
كويس علمى علوم متاح ليه كل الاقسام ماعدا الاقسام بتاعة رياضة يعنى رياضة و احصا و حاسب ...
بص هما بيقولوا علوم عين شمس المستوى العلمى فيها كويس
بس من وجهة نظرى ان فيها عيب اللى هو انه مفيهاش نظام الساعات المعتمدة
لكن علوم القاهرة فيها
انا علوم القاهرة بس ده مش تحيز دى وجهة نظرى :)

بصرف النظر عن فهم نظام الساعات دة
تنصحنى ب اية؟

بصرف النظر عن فهم نظام الساعات دة
تنصحنى ب اية؟
ممممممم مقدرش افتى
بس انا بحب جامعتى جدا
نظام الساعات ده نظام حلو جداا من وجهة نظرى
عالاقل انت اللى بتعمل الجدول لنفسك
و ف مواد بتختار انت عايز انهى
و كمان متاح للناس اللى شايلة مواد
انها تاخد منهم مادتين ف الصيف

هي جامعة القاهرة فين؟
و حضرتك كنت قسم اية؟

هي جامعة القاهرة فين؟
و حضرتك كنت قسم اية؟

ف الجيزة قدام جنينة الحيوانات
و انا لسة داخلة تانية
مخترتش القسم لسة

معلش طولت عليكى
هو السنة اللى باختار فيها القسم السنوات اللى قبلها بدرس في كل الاقسام؟

معلش طولت عليكى
هو السنة اللى باختار فيها القسم السنوات اللى قبلها بدرس في كل الاقسام؟

بتدرس حاجات اساسيه وبعدها بتدخل القسم للي انت عايزة

قسم الكمياء الحيوى وقسم الميكروبيولوجى وقسم الحيوان وقسم الحشرات وقسم النبات وقسم البيوتكنولوجى

لازم تدرس قبلهم الفسيولوجى اي علم وظائف الاعضاء
علم السيتولوجى اي علم الخليه
علم الامبريولوجى اي علم الاجنه
علم البوتنى اي علم النبات
علم الميكروبيولوجى اي علم الكائنات الدقيقه
الكميا العضويه والكمياء التحليله والكمياء الفزيائيه والكمياء الغير عضويه

كدة يعنى

وبعدها تتخصص

سبيشيل او مزدوج مع الكمياء

اسبيشيل زى قسم الميكروبيولوجى

اما مزدوج زى قسم الكمياء والميكروبيولوجى
والمزدوج دة ليه ميزة انك بتاخد الصفتيين
بتبقي كميائي وفي نفس الوقت ميكروبيولوجى

وهكذا

وعلم الكيماء الحيوي اغلبه كمياء حيويه طبيه اكلنيكه وهو علم الكمياء المسئول عن تشخيص الامراض سواء كانت كلي او كبد او قلب او سرطان

فمثلا تشخص مرض السرطان عن طريق قياس دلالات الاورام للي موجودة في الدم
دلالات الاورام دى مواد كيماويه بتفرزها الخلايا السرطانيه


...........................
علم الميكروبيولوجى بيشمل الميكروبيولوجيا التطبيقيه والطبيه والمناعه
وممكن تعمل ماجستير سواء في الميكروبيولوجيا الطبيه والمناعه او الميكروبيولوجيا التطبيقيه

الميكروبيولوجيا الطبيه والمناعه
يعنى بتدرس بعض البكتريا والفطريات والفيروسات للي بتصيب الانسان وازاى انت بتشخصها في المعمل
بيبقي عن طريق انك تعمل مزارع بكتريا او فطرات او كدة
او تشتغل علي البي سي ار او تشتغل علي الاليزا عشان تعرف دة فيرس ايه وهكذا

ودى شغلها في معامل التحاليل
......................
الميكروبيولوجيا التطبيقيه

يعنى بتدرس ازاى تصنع مضاد حيوى او ادويه للسرطانات او للجلطات من البكتريا والفطريات
او ازاى ان انت تنتج اي مادة من البكتريا او الفطريات وتستخدمها في علاج مرض
او ان انت تنقي الميه من البكتريا او تستخدم البكتريا في التخلص من النفايات الذريه
او تستخدم البكتريا في تنقيه الميه او تستخدم البكتريا في فصل عناصر معينه
او تشوف تاثر اي مادة كميائيه علي البكتريا وتشوف هتنفع كمضاد حيوى ولا لاء

ودى شغلها في مصانع الادويه وشركات الميه

يا جماعة انا دلوقتى داخل سنة تالتة ثانو ى وانا علمى رياضة ممكن ادخل كلية علوم لانى حببها جداً وانا جايب 81% فى تانية

ألف مليون مبروك علي النجاح عموما ثم علي المجموع فمن عدي التسعين فهو حاصل علي أمتياز وعقبال السنة الجاية

وأنشألله داخل داخل
أما عن كلية علوم فهي متعة من لا متعة له و لذة من لا لذة له
فهي عاوزة صبر قليل ونص مذاكرة الثانوية تطلع بيها الأول

لكن

عاوزة بعض الصبر فسوف تتأخر كثيرا في الكلية والعملي بتاعها كتير لكن شيق جدا
فمن مادتين بيض تصنع ألوان أحمر وأخضر ____
أنا داخل ثالثة حاصل علي أمثياز في أولي و جيد جدا مرتفع في ثانية لظروف كانت
كنت أذاكر من ساعة إلي ٣ساعات أكثر حاجة بس فتح مخك في العملي
أنا داخلها غصبن عني فما بالك بالمحب لها
وأخيرا ندعوا لك بالتوفيق والنجاح
وأدعو الجميع للأنضمام ألي موقعي
www.adido2010.thanwya.net

افادكم اللة و مش عارف اشكركم ازاى
1- سمعت انو ممكن اجيب تقدير حلو و احول طب ..... الكلام دة صح؟
2- ارجوكم تنصحونى بامتع قسم ثم الاوسع مجالا فى العمل؟
و انا مهتم اكثر بقسم علوم الفلك فقولى مميزاتة و عيوبة و الاحسن منة

بالنسبه لطب دة مش موجود
لكن الموجود زى ما قلت هو انك ممكن تحضر ماجستير ودكتوراه وولو فيه اعلان في كليه طب وعايزين تخصصك بتقدم عادى وممكن تبقي دكتور في كليه طب

وبالنسبه لافضل الاقسام من وجه نظري
قسم الكمياء والكمياء الحيوى
وقسم الكمياء والميكروبيولوجى
وقسم الكميا الاسبيشيل
وقسم الكمياء الحيوى اسبيشيل
وقسم الميكروبيولوجى اسبيشيل

أنا بنصحك تدخل قسم كيمياء
انا كنت حابب قسم رياضة و فيزياء (أنا أزهر) طموحا في إني أكون معيد لكن أهلي غصبوا عليا أدخل كيمياء لأن مجالها أوسع وأكبر مجال ليك للشغل أنك لما تتخرج هتشتغل أنشألله
فا مجالت الكيمياء لا حصر لها
فعلي سبيل المثال لا الحصر
أي مصنع مهما كان محتاج لكيميائي وبيولجي مصانع الأدوية معامل البترول و البحوث الكشف الجنائي و الأسمنت و مرتباته مجزية جدا هتقبض كل سبوع_____إلخ_
مما لا حصر له
بينما رياضة و فيزياء قد رحمك الله منهم وأن كنت سوف تحتاج حاجة منهم فأني في خدمتك و خدمة كل الأعضاء فأنا حاصل علي أمتياز في جميع فروع الرياضة
وإني أحمد الله لدخولي هذا القسم

وإني للأسف لعدم أفادتك في جميع أسألتك لسببان
١_أني أزهر فأفيدك في المجال عموما أما عن النظام والساعات فليس عندنا هذا النظام و لقد أفادتك به رئيس القسم فشكرا له
٢_أنا بدخل نت من علي المحمول لدلك الكتابة صعبة وكذلك تحميل الملفات

وأخير
كنت أتمني أن يكون لجامعة الأزهر مثل هذا المنتدي حتي يمكن للطلبة طرح أسألتهم والتعاون الدراسي فيما بينهم

أأسف للأطالة فقد تكون هذه أخر مشاركة لي في المنتدي
ولكني تحت أمركم ف أي وقت وأي خدمة ف أميلي
diaa_superman***********
السلام عليكم

معلش اسف جدا على السؤال السخيف دة
هى مصاريف جامعة القاهرة كام؟
و عين شمس كام؟
ولا مش ثابتة؟