ياحبيبتى ياملاكى
ألف مرة قلتهالك
ان احلامى معاكى
حلم تايه ..حلم هالك
....................
حلمنا الأول بمسكن
بدده سعر الحديد
أصل جايز "عز"ممكن
قلبه جامد من حديد
....................
واما كان الحلم شبكة
الدهب اسعاره طارت
قلت طيب تيجى شركة
طب ابوكى فجأة ساكت
.........................
طب حلمنا بالوظايف
حتى ناكل بس عيش
مصمص الباشا الشفايف
ثم قال :منين مفيش
.....................
طب حلمت انى اسافر
يعنى اجيب لى كام ريال
خد فلوسى ندل كافر
من بتوع المولى قال
.......................
طب حلمت انى اهاجر
امشى واتسوح بعيد
افتكرت البحر غادر
وف بحورنا الموج شديد
.....................
ياحبيبتى اعذرينى
لسه باقى حلم طايش
نفسى اصرخ وتسيبينى
حتى احس بانى عايش
.....................
قلم / هيثم عبدربه

شكرا يا شاعر على قصيدة الأحلام
إن شاء الله لما تتعين يبقى اكتب لنا قصيدة حلم سعيد
مميز دائما يا أستاذ هيثم

أخي في التدريس
اصبر على ملاليم الوزارة
بكره تروق وتحلى وتسافر في إعارة
وتجيب شقة وعربية
وكمان عروسة بنضارة

قم للمعلم واترك التبجيلا .... كاد المعلم أن يضل سبيلا

ضاقت عليه حياته وتكدرت .... بالله كيف ينير بعد عقولا

إن المعلم إن أهنت حياته .... أهداك عقلا مظلما مشكولا

... أخي في المهنة أدعوا .. لك بالصبر .. فصبر جميل !!