الفيزا كارت وصلت المدارس [الأرشيف] - بوابة الثانوية العامة المصرية

مدرسة الانجلش

29-07-2010, 01:48 PM

السلام عليكم
طبعا ياجماعة كلنا عارفين موضوع الفيزا كارت وكلنا عملناه
وبالفعل يوم السبت استلمنا الفيزا كارت بالرقم السري بتاعها اللي البنك
عمله
ياتري ياجماعة ايه رأيكه في موضوع الفيزا كارت ده ؟
يعني عندنا في الادارة المدرسين والموظفين عايزين يقدمو طلب بوقف تنفيذه
لانه فعلا هيسبب مشاكل زي الطوابير علي المكن الزحام يعني
ياريت اسمع ارائكم

samirhassan

29-07-2010, 01:56 PM

الحكومه بتسترزق من وراء الفوائد يعنى مصلحة

محمد عبد الحكم

29-07-2010, 01:59 PM

ممكن نعرف حضرتك محافظة اية وتبع ادارة اية

هي مصلحة للحكومة ولينا احنا كمان

مدرسة الانجلش

29-07-2010, 02:02 PM

ممكن نعرف حضرتك محافظة اية وتبع ادارة اية

هي مصلحة للحكومة ولينا احنا كمان
محافظة الدقهليه
بس هي مصلحة للحكومة اكتر
لو فيه فكه فوق المرتب مش هناخدها
اخرنا في الفكه 10 جنيه
يعني لو بنقبض مثلا 418 جنيه هناخدهم 410

تامر سرواح

29-07-2010, 02:04 PM

ماحنا خلصنا من طوابير العيش والغاز طلع طوابير المرتبات
كل يوم فى جديد

محمد عبد الحكم

29-07-2010, 02:06 PM

محافظة الدقهليه
بس هي مصلحة للحكومة اكتر
لو فيه فكه فوق المرتب مش هناخدها
اخرنا في الفكه 10 جنيه
يعني لو بنقبض مثلا 418 جنيه هناخدهم 410

الشهر اللي بعده هيكون 425

mhegazi

29-07-2010, 02:15 PM

الحكومه بتسترزق من وراء الفوائد يعنى مصلحة
هو فعلا كدة تشغيل للبنوك
وكمان هو المرتب ناقص خصم عشرة جنيه كل 3 شهور عشان الفيزا ......... ربنا يهدي ....................

إيهاب النجار

29-07-2010, 02:17 PM

طبعا هذا سيكون شئ من أجل الزحام الذى سيحدث بالاضافة الى ترك العمل للذهاب للحصول على المرتب فهذا سيؤثر سلبا علينا وعلى العمل

مدرسة الانجلش

29-07-2010, 02:36 PM

وكمان المكن بتاع الصرف مش هيستحمل الضغط الرهيب اللي هيكون عليه واكيد اكيد هيعطل كتير

مدرسة الانجلش

29-07-2010, 02:37 PM

طبعا الحكومة هتطلعلها بقرشين حلوين اوي من الموضوع ده
شوفو الدوله فيها كام مدرس
ومستحيل الحكومة تطلع خسرانة في شئ

داليا مصطفى ابراهيم

29-07-2010, 02:54 PM

اؤيد الفيزا كارت

محمد ابوصلاح

29-07-2010, 03:03 PM

عندنا في الشرقية لسه الموضوع ده ماوصلش

محمد ابوصلاح

29-07-2010, 03:04 PM

بس احنا ملينا الستمارات من زمان اوي

maths city

29-07-2010, 03:12 PM

مش معاكم المزضوع ده جميل جدا وحيوفر وحيريح كمان وممكن تصرف فى اى وقت من اى حته

نسيم الروض

29-07-2010, 03:12 PM

أحسن حاجه في البرنجان .. إن عمره ما هيبقى مانجه .. حتى لو دهن نفسه أصفر

فيزا كارت ايه وبرنجان إيه .. والله انا مش ضد التقدم ولا حاجه .. بس ضد اللي هيحصل من ورا الموضوع ده

وربنا يجعله عامر

سنوات الانتظار

29-07-2010, 03:27 PM

احنا استلمنا الفيزا بتاعتنا من اول شهر 5 ولسة مقبضناش بيها وياريت بقى منقبضش بيها اصلا لان بيقولو المرتب فقط بالفيزا انما الحوافز باستمارة لوحدها من المدرسة يبقى على ايه الدوخة

حسين الدوانسى

29-07-2010, 04:36 PM

لا أنا لا أوافقكم الرأى الفيزا أحسن بكتير السكرتير مدوخنا على المرتب كمان مش بنقبض غير كل شهرين الفيزا هتريحنا من وجع الدماغ وهتصرف من أى مكان بالفيزا لان ليها مكان من برة فى اى وقت تقدر تصرف لو زحمة استنى بالليل وروح الفيزا احسن بكتير

وليد زكير

29-07-2010, 04:41 PM

يا اخوانا الفيزة كارت بصراحة مش كويسة

عمرو المهدى

29-07-2010, 09:04 PM

انا تبع إداره مصر القديمه وإستلمت الفيزا كارد من شهرين بس لسه مصرفناش بيها
والسبب إن فى مدرسين معانا فى المدرسه لسه مستلموهاش
بس طبعا دى مصلحه للحكومه علشان إحنا هنقبض بفئه 10 جنيه
وبالتالى أى مبلع مكسور أقل من 10 جنيه سيصبح غنيمه حلال لهم
عالم فنانين بيعرفوا يطلعوا القرش من بذر العنب

ايهاب بدر الدين

29-07-2010, 10:01 PM

الواحد مش يقبض بالفيزا كارد بس شر لابد منه
الفيزا كارد للمرتبات العالية مش على واحد بياخد 310 يتخصم منه 10

امجد7007

29-07-2010, 10:53 PM

الفيزا كارد ممكن تكون كويسة فى انك تقبض فى ميعاد محدد زى باقى خلق الله لا سكرتير يقدر يعطلك ولا غيره وكمان ممكن تنفع فى المكافأه بتاعت الامتحانات يعنى نقبضها مع باقى الموظفين فى الادارات الاخرى لان احنا مثلا عندنا موظف فى الاداره لازم يقبض ويرتشى عشان يمشى كشف مكافأه المدرسة بسرعة والا يخليك لما الاداره كلها تقبض وتاخد انت اخر النااااااس عشان مدفعتش
لكن ممكن تكون مش حلوه خاصة لمدرسين القرى يعنى لازم ياخد مواصله عشان يروح المدينه ويصرف ولو فى طابور هيضطر يستناه عشان ميرجعش ويروح تانى
ويجعله عااااااامر ياحكومة ياذكية ياللى كل شوية تبعتى تقولى عايزين اسماء المتعاقدين والاساسيين واللى معرفش ايه ورغم انك كل شوية يبعتولك الاسماء ترجعى وتطلبيهم تانى ونسيتى اختراع اسمه قاعدة بيانات على الكمبيوتر اصلك ذكيـــــــــــــــــــــــــــيه زكريـــــــــــــــــــــــــــا وعجبى عليك ياحكومة

Mr.AI

29-07-2010, 11:48 PM

أنا أسمع إن كل سحبه من البنك بتخصم 3 جنية

mahmoud20002010

30-07-2010, 11:53 AM

اهو كله دمار لينا حسبى الله ونعم الوكيل

مدرسة الانجلش

30-07-2010, 12:53 PM

اهو كله دمار لينا حسبى الله ونعم الوكيل
دمار ليه بس لا قدر الله ؟

منار على

30-07-2010, 01:38 PM

انا مش عارفه فيزا كارت ليه

هما يعنى ال340 جنيه

كتير اووووووووووووووووى لدرجه فيزا كارت

مدرسة الانجلش

30-07-2010, 01:55 PM

والله دمك خفيف

muhammad ellithy

30-07-2010, 03:37 PM

فيزا نصب زي قانون الضرائب العقارية أهو كله تضييق علي خلق الله و خلاص
ربنا يرحمنا

saad200

30-07-2010, 05:02 PM

انا أؤيد موضوع الفيزا كارت

MUSTAFAEGYPT

30-07-2010, 08:24 PM

احنا عملنا استمارات الفيزا دى من فترة بس لسة مفيش جديد

مس ريهام

30-07-2010, 11:21 PM

هو القبص كتير اوى كدا محتاج لفيزا كارت ربنا يستر علينا من الدوله دى ممكن كمان شويه تاخد منا سلفه من القبض للترميم فى المدارس
وعجبى

محمد عب دالله

31-07-2010, 02:30 AM

لا الخصم 3 جنيه لو من مكنة غير المخصصة ليك يعنى لو محدد نوعع المكنة تبع بنك معين وغيرتها يخصم فى الحالة دى لكن لو من نفس المكنة عادى بس الاقل من 10 جنيه تترحل لانها كسور للشهر اللى بعده وده للافادة

محمد ابوصلاح

31-07-2010, 11:12 AM

مدرسة الانجلش

31-07-2010, 11:47 AM

وممكن كمان الماكينة التابعة للبنك اللي بنصرف منه تتعطل ونقف بقي طوابير علي البنك عشان نقبض وانا جربت ده لاني معايا فيزا وكنت رايح اصرف لقيت الماكينة معطله فروحت البنك لقيت طوابير ومعاشات فضلت 4 ساعات عشان اصرف
بيقولو هيجيبوا في بنك مصر اللي هنقبض منه 4 ما كينات زياده
بس كان المفروض يجيبوا مكنة لكل مدرس
والله تصرفاتهم تضحك
ع فكرة ممكن نصرف من اي مكنة تابعة لاي بنك
بس هيخصم مننا تقريبا 3 جنيه

mmm6666

31-07-2010, 02:47 PM

الاول نثبت وبعدين ندور على الفيزا كارت

الزوايدي

31-07-2010, 06:25 PM

simsim12

01-08-2010, 12:49 AM

انا ادارة السنبلاوين عملوا الفيزا للمدرسين المثبتين فقط
المتعاقدين لالالالالالالالالالالالالالالالالالالا

مدرسة الانجلش

01-08-2010, 02:07 AM

انتوا عارفين أصل موضوع الفيزا كارت دى ، الموضوع جه نتيجة الاعتصامات الكثيرة التي قام بها كثير من الهيئات والعمال الفترة السابقة ، لان العامل اللي يرفض استلام مرتبه ويعمل اعتصام دي مشكلة وصداع في رأس الحكومة ، طاب الحكومة تتصرف ازاي ،؟ تعمل فيزا كارت والموظف اللي يعمل اعتصام يطلع المسئول يقول :" لا ده كل الموظفين أخدوا حقوقهم لاننا حطينا كل مستحقاتهم في حساباتهم ، لاكن الظاهر ان في ناس بتحوش احنا مالنا بقي"
الحكومة عملت موضوع الفيزا كارت ده لسببين
اولهم ان مرتبنا كبير يعني وتقيل علي موظف الصرف وبيجي بدري عن ميعاده
وتانيهم ان الدولة هتكسب كتييييييير من وراه
استثمار في قوت الشعب يعني

مدرسة الانجلش

01-08-2010, 03:00 AM

انا أؤيد موضوع الفيزا كارت
لماذا ؟؟؟؟؟

مدرسة الانجلش

01-08-2010, 03:02 AM

انا ادارة السنبلاوين عملوا الفيزا للمدرسين المثبتين فقط
المتعاقدين لالالالالالالالالالالالالالالالالالالا
لا ياستاذ سمسم
احنا زيك في الدقهليه واستلمناها متعاقدين ومثبتين
حضرتك تملي استمارتها مرفق معاها صورة البطاقة وتسلمها للموظف بتاع المدرسة وهو يعملها

مدرسة الانجلش

01-08-2010, 03:05 AM

احنا عملنا استمارات الفيزا دى من فترة بس لسة مفيش جديد
اكيد جايه اطمن

مسيو عاطف

01-08-2010, 06:52 AM

انا مش عارفه فيزا كارت ليه

هما يعنى ال340 جنيه

كتير اووووووووووووووووى لدرجه فيزا كارت
فى رأى الحكومة
كتييييييييييييييييير اوي علينا

مدرسة الانجلش

01-08-2010, 07:08 PM

احنا ممكن كمان نحوش منهم

سندس الربيع

04-12-2010, 02:21 PM

المشكلة ياجماعةمش في نظا م الفيزا نفسه المشكلة ان بلد بها 80الف موظف زي شربين وبها ماكنتان فقط للصرف فكيف تسطيع صرف الراتب في ظل هذا الازدحام ارجو من الزملاء في محافظة الدقهية ارسال فاكسات للسيد /محافظ الدقهلية لزيادةعدد مكينات الصرف في ك مراكز الدقهلية ويصراحة هو رجل ايجابي ويسعي دائما لحل مشاكل المحافظة وعلي فكرة ياجماعة مش التربية والتعليم فقط اللي هتصرف بالفيزا د كل المصالح الحكومية

رامي ابو عاشور

04-12-2010, 02:41 PM

yoyo_595

04-12-2010, 02:50 PM

الفيزا كارت هتوفر مليارات على بلدنا كانت بتتصرف على مجرد عملية نقل الفلوس وبعدين مفيدة لينا برضه نقدر نصرف فى اى وقت اى مبلغ احنا عايزينه بس فى حدود الحساب الموجود والفلوس اللى بتتخصم دى بتتجمع على بعض بتاخدها بعد كده لما بتكمل مبلغ صحيح يعنى حقك عندك مبيروحش بس المشكلة ان المرتب اصلا صغير 300 جنيه كله بيبقى مستنى اديله ع الاقل 25 يوم مفلس وهتبقى زحمة شديده فى بداية الشهر هى تبقى حلوة مع المدرسين اللى على الدرجة الاولى ممكن يصبروا يوم او اتنين لغاية ما الزحمة تخف والمفروض ان المعلم تكون الفيزا بتاعته مفتوحة حسابها مفتوح يصرف كما يشاء تقديرا لجهوده فى تعليم وتربية النشء ورفع مستوى الامة وحضارتها نتمنى ذلك وده موجود تقريبا مع القضاة فى أوروبا ليهم فيزا بحساب مفتوح أو رصيدها عالى جدا ودول كانوا عايزين يتساووا بالمعلم (ولو انه طلب غريب لرفعة قدر المعلم ) لكن الحمد لله تم رفض الطلب بتاتا لأن المعلم هو ألأعلى مكانة ووضعا وهو الاساس الذى أخرج للأمة الطبيب والقاضى والمهندس والعالم فكيف ذلك والحمد لله أنه لا يجرؤ أحد فى بلدنا مهما إرتفع قدرة أن يطالب بالمساواة بالمعلم (ولكن ليس لرفعة قدرة وزيادة راتبه بل العكس) وشكرا

مستر/ عبدالكريم على عبدالنعيم

04-12-2010, 03:58 PM

hassan43

04-12-2010, 04:59 PM

أحنا عندنا فى الاقصر الجميع استلم الفيزا الاساسيين و المتعاقدين و لكن الى الان لم نستخدمها فى حاجة
هل فى حد صرف بيها قبل كده من البنك ؟

winwaw

04-12-2010, 06:35 PM

اصلهم بيقلدوا بلاد برة لكن للاسف تقليد أعمى

أشـرف فتحى

04-12-2010, 07:16 PM

ممتازة البيتزا كارد دى

شيماء20

04-12-2010, 07:24 PM

الموضوع كله تقليد اعمى زى ما الاخوه الافاضل سبقونا وقالو

شيماء20

04-12-2010, 07:27 PM

ممتازة البيتزا كارد دى
جميله جدا حكاية البيتزا دى بس ياترى البيتزا دى من بيتزا هت ولا من بيتزا كينج هههههههههههه

تقبل مرورى:)

وليد عبد العظيم بركات

04-12-2010, 07:34 PM

حسبى الله ونعم الوكيل

محمدأنور3710

04-12-2010, 09:43 PM

احنا ما سمعناش عن الموضوع دة ولو حصل تبقى مشكلة

أبو محمد وفاطمة

04-12-2010, 10:06 PM

الفيزا ليها ايجابياتها وسلبياتها

mhyo2008

05-12-2010, 01:09 AM

احنا فى الاسكندرية اخدنا الفيزا بس لسا ماقبضناش حاجة ... ومش عايزين

مصطفى جمال 1984

05-12-2010, 02:25 AM

خد دية الفيزا كل سنة بيتخصم منها 35 جنية هههههههههههههههههههههههههههههه واللة العظيم علشان عملوها معايا

طارق حامد2

05-12-2010, 08:19 PM

موضوع الفيزا ده قديم خالص
اهنا استلمناها من شهر سبعه اللى فات
وسمعت انها وقفت ولن يتم الصرف بها
لعدم توافر كباين الصرف الالى

اميرة مهران

05-12-2010, 08:23 PM

انا مش عارفه فيزا كارت ليه

هما يعنى ال340 جنيه

كتير اووووووووووووووووى لدرجه فيزا كارت

تمام كده انا معاك فعلا هما كام علشنا يعملوا للمرتب فيزا كارت
وانا معاكم فى عيوبها

احمد ناجى على سميع

05-12-2010, 10:35 PM

..كنا قبضنا بيها شهر سبتمبر و أكتوبر والشهر ده قبضنا من سكرتير المدرسة .....ومش عرفين أيه السبب فى كده اللهم اجعله خير

hassan43

05-12-2010, 10:54 PM

لقيت الفانوس مرة ودعكته -- طلعلى عفريت قاللى شبيك لبيك

قلت خلاص الذل أنا ودعته -- ويا عفريت بالطلبات هاهريك

قالى هأوأو يا إنسان -- دانا العفريت بن الجان

ما يهمنيش مكان وزمان -- واطلب وعندى البرهان

قلتله عاوز قمح زُرع فى مصر -- ومسؤولين يبطلوا فشر

وحكومة متعصرنيش عصر -- ومرتب يسترنى لآخر الشهر

وعاوز عيش بدون طوابير -- وحكومة ضد التبذير

وانتخابات من غير تزوير -- و .......... سابق أشوفه كتير

وعاوز فى بيتى كيلو دقيق -- وسبب مقنع لأى حريق

ومجلس شعب بدون تصفيق -- وفى كأس العالم لينا فريق

وعاوز أزور شرم الشيخ -- وصباعين كفتة اللى فى السيخ

وأشرب مرة عصير بطيخ -- وأخرج من القسم بدون تلطيخ

ونفسى الضحكة ترجع تانى -- وحتة لحمة كندوز أو ضانى

وجنيه مصرى زى البرانى -- ورصيف للمشى أنا وخلاّنى

رد العفريت عليا بغشم -- وقال يا مصرى ماكنش العشم

بص.. أنا ممكن أنقلك الهرم -- واسدلك الأوزون اللى اتخرم

وأرجعلك الأكل اللى اتهضم -- وأعملك بقرة من الغنم

وأعملك قصر من العدم -- وأقولك معنى شرم برم

بس طلباتك طلبات ملموس -- عقله خلاص أكله السوس

ده تخطيط يا بنى ومدروس -- إنك تعيش على طول موكوس

وأحنا بناخد منكوا دروس -- إزاى نخلى العفريت متعوس

ويا رب ترجعنى تانى الفانوس -- وزى بعضه أعيش محبوس

بدل ما أخرج واتبهدل زيك -- وأعيش موكوس على متعوس

أ / ضياء عبد الفتاح

05-12-2010, 11:10 PM

[
ويجعله عااااااامر ياحكومة ياذكية ياللى كل شوية تبعتى تقولى عايزين اسماء المتعاقدين والاساسيين واللى معرفش ايه ورغم انك كل شوية يبعتولك الاسماء ترجعى وتطلبيهم تانى ونسيتى اختراع اسمه قاعدة بيانات على الكمبيوتر اصلك ذكيـــــــــــــــــــــــــــيه زكريـــــــــــــــــــــــــــا وعجبى عليك ياحكومة

والله برافو عليك فعلا بدرى الواحد مضحكش من قلبة ( حلوة أووووووووى اصلك ذكية زكريا )
دى والله كمان فوزية وفتحية
هههههههههههههههههههههههههههه

أم هيما

06-12-2010, 06:00 PM

جت على طوابير المرتب ما احنا مهريين وقفة فى الطوابير

m_ezoo

06-12-2010, 06:47 PM

ما سمعناش اى حاجة عن هذا الموضوع ( سوهاج)

soher.t.m

06-12-2010, 08:05 PM

عمادعرفه

06-12-2010, 08:14 PM

ياعم دول بيعملوا كده علشان الناس اللى متخرجه معانا وشغاله فى البنوك بواسطة تاخد مرتب 1000 جنية
وعلشان بيتعبونا ياخدو حوافز 5000
والغلابه اللى زينا يحلموا ان المرتب يوصل ال400
دى حكومه بايظه

pink life

06-12-2010, 11:50 PM

السلام عليكم
موضوع الفيزا دا لابد منه هو قانون وهيتنفذ
شئنا ام ابينا
بس هو كدا احنا ضدد اى حاجه حديثه
ان شاء الله فى المستقبل لما نقول للاجيال القادمه اننا زمااااااااان كنا بنقبض من الاستمارة ونمضى عليها وكان فى موظف اسمه الصراااف شوفو هيستغربو قد ايه
احنا فى عصر كل حاجه فيه بالاجهزة
خلاص عصر الورق دا هيبطل خلاص
مش بعيد بكرة يعملو كمان ملف انجاز الكترونى

pink life

06-12-2010, 11:56 PM

بس بجد القصيده بتاعت hassan 43
اكثر من رائعه
ياريت يقولنا
مصدرها مين؟؟؟

pink life

07-12-2010, 12:04 AM

الزميله مدرسه الانجلش بجد بجد منووووووووووورة المنتدى

شيماء20

07-12-2010, 01:44 AM

مدرسة الانجلش

07-12-2010, 12:21 PM

الزميله مدرسه الانجلش بجد بجد منووووووووووورة المنتدى

مرسيه لزوقك وايد المنتدي منور بيكي

يارب دايما ما يحرمنا من مشاركاتك الرقيقية

مدرسة الانجلش

07-12-2010, 12:23 PM

مدرسة الانجلش

07-12-2010, 12:26 PM

هو الكلام للمعينين بس ولا المتعاقدين ايضا

للجميع يا مستر عبد الكريم

تحياتي لحضرتك
:078111rg3::078111rg3:

مدرسة الانجلش

07-12-2010, 12:29 PM

مدرسة الانجلش

07-12-2010, 12:32 PM

موضوع الفيزا يا جماعة لم يطبق علي المعلمين الاساسيين إلي الان في أغلب محافظات المحروسة فكيف يكون قد تم علي المتعاقدين أرجو التحقق من الأخبار قبل التحدث عنها ، فالفيزا كارت إلي حد علمي لا تتطبق إلا علي من يأخذ قرض من البنك ولمن خرج علي المعاش فقط والله أعلم

اوكيه يااستاذ رامي انا متعاقدة واستلمت الفيزا كارت بتاعتي من يجي 3 شهور

وكل زمايلي الاساسين اللي معايا في المدرسة استلموها يعني كلنا في الادارة استلمناها متعاقدين واساسين ايه رأيك ؟؟؟؟؟

مدرسة الانجلش

07-12-2010, 12:34 PM

monamode

07-12-2010, 01:36 PM

احنا منعرفش حجه عن الكلام ده
السويس

hassan43

07-12-2010, 02:49 PM

بس بجد القصيده بتاعت hassan 43
اكثر من رائعه
ياريت يقولنا
مصدرها مين؟؟؟

شعر بجد جميل وبصراحه احلى حاجه فى الموضوع

ونصيحه لو حضرتك اللى مالفه سيب التدريس واتجه للشعر احسن التدريس مابقاش ليه اى مستقبل:o

شكراً الزميل/ أو الزميلة : pink life شكراً على اهتمامك المصدر : *************** (http://elham.gid3an.com/montada-f6/topic-t1851.htm)
شكراً الاخت الزميلة / شيماء20 على ذوقك الرقيق و على النصيحة
للأمانة مش أنا مؤلفها
لكنى أحب الشعر و أحب تصفح المواقع بحثاً عن الذوق الجميل و الشعر
و وجدت هذه القصيدة تجمع كل معنى يحسه الجميع

hassan43

07-12-2010, 02:55 PM

تسلم الانامل الذهبية يااستاذ حسن

شكراً لحضرتك و اهتمامك
بس هى لا ذهبية و لا حاجة
ده كله نسخ و لصق و أهو اللى تعلمناه فى الاى سي دى ال نطبقه بدل ما احنا فاضيين
و ربنا يصبرنا

رحييق

07-12-2010, 02:57 PM

hassan43

07-12-2010, 03:00 PM

تسلم الأيادي
أشكر حضرتك على ذوقك في اختيار هذا المعنى
تقبل مروري

ألف شكر استاذه / رحييق
شكراً على اهتمامك و جميل كلامك

alinawnaw

20-08-2011, 02:25 PM

أحسن حاجه في البرنجان .. إن عمره ما هيبقى مانجه .. حتى لو دهن نفسه
أورانج

alinawnaw

20-08-2011, 02:27 PM

أورانج يعني برتقالي بس هنا معناها منجاوي هاهاهاهاهاهاهاهاهاهاهاهاااهااهاااا

winwaw

20-08-2011, 02:44 PM

عن نفسى مبحبش حكاية الفيزا دى . ذى ما قلتم كفاية الطوابير وكمان المرتب مش مستاهل

شريف حسن .

20-08-2011, 02:50 PM

فكرة جميلة وما اعتقدش انه هيكون زحمة لانه هيكون فى اى وقت بس هو موضوع الفكة ده بس

سها أحمد شوقي

20-08-2011, 04:08 PM

يااااااااااااااااااارب متوصلناش دمياط

إسماعيل قناوى

20-08-2011, 05:33 PM

أحلى خبر سمعته فى حياتى عشان الاداريين الله يفقرهم عشان احنا 4 معلمين مساعدين بس والادارة اخرت المرتب شهر 7 فهم رفضوا يجيبوه عشان فى رايهم الموضوع مش مستاهل يروحوا البنك علشان الاربعة المساعدين مع العلم ان فى كل قبض بيسنكحوا بنص جنيه أو جنيه عشان المواصلات كما يدعون مع أنهم بيروحوا بسيارة أحد الزملاء المدرسون وهم كمان بيصرفوا بدلات انتقال.
انا مع الفيزا و الحكومة تاخد 10 جنيه ولا بنى أدم ملهوش لازمة ياخد نص جنيه ويأخر المرتب حتى يومنا هذا لان الموضوع بالنسبة ليه لا يستحق وحسبنا الله ونعم الوكيل .

معمر القذافى

20-08-2011, 05:37 PM

التدريب على حرق مكتب وزير التربيه والتعليم

1- شاهد كل يوم منظر قطرات دماء او اذبح دجاجه او حيوان فالم تستطع اذهب الى الجزار وشاهد منظر الدماء

2- انظر الى اطفالك الجوعا وتذكر يوم 10 من كل شهر وهو يوم انتهاء الراتب
3- تذكر دائمأ انك بغيض و انك حيوان وليس انسان كباقى فئات المجتمع الذين يحصلون على الرواتب المرموقه
4- تذكر الوزير الجاحد على المعلمين والذين يريدهم ان يتسولون وياكل اموالنا بغير حق فليكن مع لترات البنزين او اكتفى بالاعواد الكبريت واشغل مكتب الوزير ليزوق طعم الزل الذى يزوقهم المعلم

إسماعيل قناوى

20-08-2011, 05:38 PM

الموظفة بتاعة المرتبات لما كان القبض حوالى 200 جنيه وزدنا ب 50 % بدل الاعتماد وشها اسود وقالت ادى العقود بقوا بياخدوا زينا مع العلم أننا مؤهلات عليا وهى دبلوم مع الاحترام للحاصلين على دبلومات بس عيب تقول كده وللاسف الصنف ده اللى يبص فى كل زيادة وأدى الموضوع كبر معاها ومش عايزة تشوف قبض شهر 7 وادينا على وش 8 يبقى الفيزا أحسن ألف مليووون مرة.

ايهاب90

20-08-2011, 06:37 PM

حلو موضوع الفيزا ده فكرة كويسة

newir_1f

20-08-2011, 07:13 PM

المرتب فيه كام علشان الواحد يقف فى طابور
والناس اللى بتقول تروح باللي الماكينة الفلوس اللى فيها بتكون خلصت

سيد عبد اللاه

20-08-2011, 08:15 PM

الفيزا كارت مشروع فاشل :
1- التوابير الطويلة والاذدحام الشديد
2- انه من الممكن ان يتأخر القبض إذا تأخر التوريد للبنك وعلى سبيل المثال احنا قبضنا السنة اللي فاتت بعد يوم 6 في الشهر الجديد ولما سألنا قلولنا الادارة حطت الايداع في البنك متأخر
3- المكافأة لن يتم إدراجها في الفيزا ولكن يتم قبضها من السكرتير
4- إذا ضاعت الفيزا او الماكينة سحبتها يتم استخراجها في خلال شهرين وفي هذه الفترة مافيش قبض ليك والامر ده حصل معايا شخصيا فأنا لم اقبض من شهرين لاني دخلت الفيزا في ماكينة خطأ غير المخصصة للصرف فقامت بإعدام البطاقة وبقالي شهرين مقبضتش ورحت الادارة من شهرين وقدمت طلب ةإن شاء الله هاستلمها يوم الخميس القادم
5- يتم خصم 3 جنيه إذا تم الصرف من ماكينة غير المخصصة
وللعلم انا من القاهرة إدارة السلام وهي أول إدارة تطبق مشروع الفيزا العام الماضي