ما تفك حزنك بقى
شعر/ سمير الأمير
**
ساعات باحس ان الكلام اللى ف عنيك
عكس أحزانك
وعكس الإشارات اللى بتولع
وبتطفى من غير ما تعرف ليه
مش مشكله إنك بتمشى منتشى
والرصيف تحتك مفلق!
الكارثه إنك بتحسدنى على إحساسى بيك/
بالعيل المدبوح عياط!
مع إنى شايف صورتك المقلوبة بتعدل نفسها وتبان
وكأنك انت امتداد الحزن والحيره
استنى لحظه لما ارسمك على وشى
والبد شويه ف كدبك اللى مصدق الخيبه..
العسكرى المجنون رقمنى
بقاله مليون سنه عمال بيجرى
وفجأه نط جوه عنيك
آه يا حلاوة عنيك
كأنهم متفصلين على مقاس العسكرى
يا هلترى حينفدوه على فين؟
إياك تقول إن العساكر دموع
وان البياده صوت إيقاع
أنا جتتى نحّست وكفايه إنى لسه مستنيك
بنيه صافيه كأنك جاى مش رايح.
ما تفك حزنك بقى وتبطل هوايتك البايخه
اللى حبساك فى ادعاء الفرح
عيط مع الواد الصغير كأنه هوه أبوك
عيط كمان واغسل عنيك
خد المرايه وبص فى شكلك
ثم استعد تكون عكس اللى باين
بالظبط زى ما كنت من مليون سنه
قبل اختراع النضارات والأحزمة
قبل البياده المجرمة
ماتترسم فوق العلم.

كلمات حضرتك جميله
ومعبره جداً


شكراً على كلماتك الأكثر من رائعه


تقبل مرورى ،،،،

بارك الله فيك ومتعك بالصحة والعافية

أهلا عم سمير
اخبارك ايه
هليت بنص جميل
انتطر عودتى

مبدع ديما استاذنا وشاعرنا الكبير استاذ سمير
كل عام وحضرتك طيب ورمضان كريم

العزيزة أ./ نغم
كل عام وأنت بخير وتمنياتى لك بصوم مقبول
سمير

أشكرك على مرورك الكريم ومحبة واحترام لك ولإبداعك

أشكرك على مرورك الكريم ومحبة واحترام لك ولإبداعك


أنت المبدع أخى الجميل وياريت تقول لعم السعيد عايزين نتقابل قريب