بسم الله
هو سؤال جه فى بالى
....
هو انا ليه بحب مصر
او احنا ليه بنحب مصر...

قاعد ادور هنا وهنا مش لاقى حاجة مثلا كده تجبرنى على الحب ده
اينعم انا افتكرت كلام حسين فهمى اللى ميدخلش دماغ عيل صغير بريالة ر واحمد السقا وهو متنح
وهو بيقولله بتحب ماما...قالله اه
بتحبها ليه:...البيه متنح مش عارف بيحب امه ليه
والتانى اما صدق وقال: اهو برضو مصر كده.....مش بتحبها لانها احسن بلد فى العالم ولا احسن معرفش ايه
كأنه بيبرر التخلف اللى احنا فيه...
وقال انت بتحب فيها القلوب البيضا والناس اللى بنحبهم وبيحبونا وكلام كده فارغ برضو
لانى بمشى فعلا ومش بلاقى لا قلوب طيبة ولا ناس نضيفة
انا بقى بصيت للموقف ده قولت بجد
احنا بنحب مصر ليه

انا اقوللكم بقى
احنا بنحب مصر عشان دولة خلاقة متجددة
لازم كل يوم بمصيبة او ببلوى شكل
ودى طبيعة المصرى انه مش هيستريح نفسيا ولا اعصابه هتهدى الا لما كام مصيبة تحصل فى اليوم

اتخيلوا معايا كده
ان الميه فى كل بيت فى مصر و متوفرة
فودافون مش بتنصب على حد مثلا..
التعليم عندنا زى الفل والتكنولوجيا مالية كل مكان فى البلد
والمقررات عشرة على عشرة والمناهج تكيف المحششين كمان
مفيش روتين ومصالحك بتتقضى زى الصاروخ فى خمس دقايق
تشوف الجرايد تلاقيها كلها بتعبر بصدق....يعنى الاخبار كلها واحدة مفيش جديد
مترو الانفاق مريح و لنقل عال العال ولا فى حوادث قطارات ولا اى حاجة
اتخيلوا ان مثلا حتى المنتدى ده عادى ومفيهوش خناقات وكل تمام وزى الفل
اتخيلوا مثلا ان كل مصر دولة قوية وبتزرع القمح وبيكفى والدرة وبيكفى والارز وبيكفى...والسمك بيكفى
السياحة عال العال 30 مليون سائح بييجوا سنويا...
الموازنة عال العالو مظبوطة بالمللى جرام كمان
عندنا مثلا السينما ولا اروع...والافلام هادفة لاقصى حد...
النت مثلا عندك 24 ساعة ومش بيتعطل خالص وببلاش كمان
مكنش فيه توزيع جغرافى السنة دى......والتنسيق عال العال وكل واحد بيروح المكان اللى بعجبه

اتخيل ان الاراء زى بعضها مش مثلا تيجى تقول البانر حلو يطلعوا يقولوا لع ده متخلف
لع الكل يقول ده جميل والكل يقول ده وحش مثلا
لو بصيت لكل حاجة فى شقتك او قدامك ولقيتها made in Egypt
لو لقيت المساجد كلها الناس داخل دماغها الكلام والفتوى تتقال مثلا....كله هس محدش يتكلم بعديها لانها صح وكل العلماء متفقين عليها
انك تلاقى محل ومطلوب فيه شاب للعمل ...والبنات تترزع بقى فى البيت وتتهد شوية:D
لما تلاقى قوانين بتحكم الفضائيات وفيه رقابة على كل حاجة وعلى ايناس الدغيدى بالذات:D
ان مفيش طابور عيش ولا حاجة
مفيش رشاوى عشان المصالح تخلص
مفيش اعلانات مستفزة ولا اى حاجة



اتخيلوا ان كل ده موجود فى مصر..وكل حاجة تمام

تفتكروا هنعرف نعيش
لع طبعا
لانها مسألة كيف عند المصرى....طبيعة نفسية.....فطرة خلقه الله عليها
ميحبش يقعد مرتاح
لازم يحس بالمرمطة مثلا فى الشوارع ...ويروح هنا وهنا عشان يمضى ورقة معفنة من موظف معفن .....ويديله سيجارة
ياااااااااااااه....كده يبقى هو فى قمة السعادة

لازم وهو ماشى يسمع الشتيمة تخش ودنه....يا سلام....احلى مقطوعات بيتهوفن
يا حمار يا متخلف يا بن ال....... برضو احلى نغم يسمعه
وان محبش يسمعه يبقى يتخانق...وياسلام على الخناقات...عشق لا ينتهى لدى البنى ادم

لما مثلا يلهط طبق الفول وفحل بصل مش مغسول ويجيله فيرس B
ويلف على كعوب رجليه عشان يتعتالج او ميحصلوش حاجة ويحصل لغيره وبرضو مصر يجرب!!

تفتكروا نقدر نعيش من غير لما نشوف عم حسن وهو بيكلم نفسه كل يوم وبيتخانق مع نفسه....مستحيل

تفتكروا يعنى لما نلاقى فى الحاجة الساقعة جلدة انبوبة...وناكلها بعد ما نخلص الازازة...مش موجوده....امال هنشتم فى مين.

لو مثلا ريسنا حبيبنا ماشى على احسن الوجوه والاشكال....امال هنهزق مين
ونقطف فى ريش مين.....وبتوع الجرايد يلقحوا على مين بالكلام اللى يسم البدن....




لما كل ده يبقى تمام ......تفتكروا هنتكلم فى ايه ونناقر فى بعض ازاى
هنقعد ساكتين
مش ممكن ابدا...ومستحيل
انا مش اقدر اتخيل ان مفيش مصيبة تحصل....
لما صاحبنا يمشى فى الشارع يقابل صاحبه ويقولله
شوفت انا امبارح روحت قدمت للواد فى المدرسة بالتليفون ودفعت بالكريديت كل حاجة وخلصت فى نص ساعة

ولا لما يقولله...ده المدير ابن الكذا طلب منى وودانى ادارة كفر الخابور فى زحل .....وخدتها مواصلات وطالع ونازل
ورايح وجاى

مفيش برامج مثلا تاكل على قفانا عيش وتقول...الوزير الفلانى مش شايف شغله
المصلحة الفلانية مش بتاخد رشوة
امن الدولة مش بيزهقوا من تعليق المواطنين.........عليهم:D


تفتكروا بجد لو كله تمام....هنحب مصر برضو...!!!!!

بجد مش هقولك موضوع رائع لانو اكثر من رائع
تسلم ايدك ع المجهود
بس فعلا دى مصر ولو حصل زي ما انتا بتقول هتلاقي عدد الى بينتحرو زي امريكا واكتر . هما بينتحرو ليه علشان مفيش حاجة يعملوها في الدنيا يورحو بقا يعملو في الاخره .
يلا بقا كفايه اوى علشان اروح الحق اجيب عيش هههه

ههههههه
حصلت حاجه غريبه اوى وانا بقرا موضوعك ده
فى اول سطرين قلت انه مش فى سبب يخليك تحب مصر
فباقى الموضوع بقى تخيلت انك ماسك واحد من ودنه وبتقنعه انه اهبل وعبيط ومش يعرف حاجه
لكن ماعلينا ده خيال اطفالى مش اكتر :D
بص انت قلت حاجه مهمه جدا فى موضوعك حلت الموضوع
احنا شعب مش هينفع نعيش مرتاحين
لازم نتعب ونتبهدل علشان الابداع يظهر علشان صدق التجربه الشعريه وتحرى الدقه فى وصف المصايب
فهتلاقى بقى على الصبح احلى اخبار فى الجرايد وهتلاقى البرامج زى العاشره مساءا و90 دقيقه اكبر جمهور فى مصر يادوب تتفرج وانت حاطط ايدك على خدك
ومع ذلك برضه انا بحب البلد دى جدا السبب لانها البلد الوحيد اللى هحس فيها بنفسى يعنى بتخيل كده انى واحده غيرى من بلد تانيه مش نافعه خالص
واحنا اللى هنصلح مصر باذن الله
امال انت داخل هندسه ليه :P

بجد يا خالد

راااااااااااااائع

بس حقولك موقف حصل معايا شخصيا في البلد اللي زي الفل

هو ليه علاقة بالكلية

واحد ابن حلال في اعدادي اسنان دخل الامتحان في السبع مواد المقررين

و كان بيحل زي الفل

و بعد ما خلص الامتحان حاسب لنفسه جيد جدا و يوم ما يغلسوا عليه حيدلوه جيد

و يوم ما يبقوا كارهينه حيشيلوه مادة

المهم جه صاحبكـ يوم النتجية فضل واقف قدام الكشف من الساعة 10 و نص لغاية الساعة 1 :D

مش مصدق

صاحبكـ شال ست مواد من السبعة

ايوة و الله ستة

ما تستغربش انت اكيد في مصر

و هيا دي بلدنا ولازم نرضي بيها و بقضاء ربنا

الحمد لله علي كل حاجة

<div align="center">ياه كل الكلام ده عندك وكاتم فى قلبك

معقولة مصر تبقا زى شوية الكلام اللى انت تعبت نفسك وكتبتهم فى النص
دنتا بتهزر بقا

بص احنا عاملين زى السمك لو طلعنا برا المشاكل نموت

المصرى لازم يجرب التعب والمرمطة والبهدلة علشان لما يرتاح ( ابقا قابلنى ) يحس بطعم الراحة

ثم الحمد لله الريس بتاعنا مش مخلى فى نفسنا اى حاجة

لو الواحد طلب لسان العصفور هيجبهوله

لا واللا الشعب اللى فى خدمة الشرطة

والمصالح بتنقضى من غير ما تدفع ولا منديل احمر

واللا المواصلات سهلة والشوارع فاضية

والامن مسيطر على المنطقة

والاكل مش مسمم والميه مش مقطوعة

والكهربا شغالة 44 ساعة فى اليوم

يعنى كل ما تتمناه مع بابا حسنى راح تلقاه

تفتكر بعد كل ده مش عايزنى احب مصر




هشتكنا وبشتكنا يا ريس ......... دنتا رئيس والنعمة كويس

يا مدلعنا يا مشخلعنا .....

........... هشتكنا وبشتكنا ياريس

</div>

موضوع جميل يا واد ياخالد
عمتا زى ما قولنا احنا عندنا نظام جميل بيقولك اتكلم برحتك وزعق وقول رايك بس من غير قلة ادب
انتا سمعت عن ازمة الميه مش كده
قال اهالى احدى القرى بعمل صلاة استسقاء فما كان من المسئولين الا ان حذروا اهلى القرية من الدعاء على الوزراء او اى مسئول او رمز من رموز الحزب الوطنى
شوف السخافة وقلة الادب يا اخى يعنى مش عايزين الناس تدعى على الظالم كمان
عمتا كلامك جميل ينفع فى حوديت الف ليلة وليلة

انا بحبها علشان اتعلمت فيها وعشت فيها وهي الي ربتني

<div class='quotetop'>إقتباس(اينشتاين @ Aug 9 2007, 04:18 AM) 345369</div>انا بحبها علشان اتعلمت فيها وعشت فيها وهي الي ربتني[/b]
دة كلام منقول من كتاب اولى ابتدائى

شكرا على تعبك ده وكتبتك للموضوع

بس مصر ما تستاهل كل الكلام ده

<div class='quotetop'>إقتباس(NANNOSAAAA @ Aug 9 2007, 04:33 AM) 345376</div>شكرا على تعبك ده وكتبتك للموضوع

بس مصر ما تستاهل كل الكلام ده[/b]

هوا حضرتك مصرية

بص يا خالد منغير لف ولا دوران بدل ما نسئل نفسنا بنحب مصر لية نسئل نفسنا مصر بقت كدة لية
محدش يقلى الحكومة والكلام الى بيرجع ورا ترليون سنة دة
يا شعب مصر الحبيب اهنا سبب تخلف وتاخر وكل حاجة زبالة فى مصر اهنا الى ادينا فرصة لفئة قليلة منا عشان تدينا على قفانا
الشعب المصرى اروع وافضل شعوب العالم بس لما يكون خلاص مقموش الا اختيار واحد تلاقية يعمل البدع
لاكن لو قدامة اكتر من اختيار تلاقية يقعد يدلع ويتشخلع وكل واحد ينام فى سريرة لحد ما كل حاجة تبوظ
المصالح فسدت عشان الناس فاسدة
الرشاوى بتدفع عشان الناس عاوزة تدفع
عشان تحل مشكلة ارجع للاصلها
ومتحكمش على حاجة من الظروف الى انت شايفها دلوقتى رجعها للاصلها واحكم
نرجع للموضوع بئة هو اهنا بنحب مصر لية
السوئال دة متسئلهوش لينا
اهنا جيل معندوش ادنى معدل من الانتماء لبلدة للان بختصار اهنا محدش علمنا الانتماء
فالسوئال دة تسئلة لجيل ربما ياتى فى المستقبل يكون عندة انتماء لمصر



<div class='quotetop'>إقتباس(The_Relativistic200 @ Aug 8 2007, 11:03 PM) 345248</div>بسم الله

السياحة عال العال 30 مليون سائح بييجوا سنويا...
لما صاحبنا يمشى فى الشارع يقابل صاحبه ويقولله
شوفت انا امبارح روحت قدمت للواد فى المدرسة بالتليفون ودفعت بالكريديت كل حاجة وخلصت فى نص ساعة

ولا لما يقولله...ده المدير ابن الكذا طلب منى وودانى ادارة كفر الخابور فى زحل .....وخدتها مواصلات وطالع ونازل
ورايح وجاى

[/b]

معليش تعليق صغير على الكلمتين دول
قلى يا مان مين ضرب السياحة فى مصر
اوع تقلى الارهاب والحورات دى
اة هو طبعا الارهاب موجود وبياثر وتهديدات القاعدة الاخيرة بضرب مصر اثرت جامد
لاكن اول واحد بيضرب السياحة هو المصرى نفسة
الناس مفكرة السايح دة واحد مش لاقى حتة يضيع فيها فلوسة فكلهم عاوزين ينصبة علية

النقطة التانية
انت بتناقض نفسك لية انت عاوز تقدم فى المدرسة بالتليفون وتدفع بالكريديت
وفى نفس الوقت معترض على التوزيع الجغرافى
على فكرة بئة التوزيع الجغرافى دة من افضل الحجات الى ممكن تتعمل على طريق تطوير التعليم الجامعى فى مصر
ولا عاوز جامعة يبقى فيها مليون طالب وجامعة يبقى فيها الف طالب
وطبعا الطلبة تطلع تشتكى وتقول اهنا كنا حلين وبردو الدكتور شيلنا المادة
ماهو الدكتور دة بشر قدامة ييجة 12 الف كراسة اجابة للدفعة واحدة
هيعمل فيهم اية اكيد فى ناس لازم تتظلم
انا رخمت وطولت يلا سلام كفاية كدة مع ان فى كلام كتير اوى
مرسى اوى يا خالد على موضوعك الهام جدا دة

مشربتش من نيلها ؟ طب جربت تغنيلها؟
جربت لما تكون زعلان تمشي في شوارعها وتحكيلها ؟
ممشتش في ضواحيها ؟ مكبرتش فيها ؟
دور جواك تلقاها هي الصٌحبة وهي الأهل ..

بس كدا

<div class='quotetop'>إقتباس</div>نيلها ؟ طب جربت تغنيلها؟
جربت لما تكون زعلان تمشي في شوارعها وتحكيلها ؟
ممشتش في ضواحيها ؟ مكبرتش فيها ؟
دور جواك تلقاها هي الصٌحبة وهي الأهل ..

طيب مفيش حاجة تيجى كده [/b] :D

انا مش عارف ايه فايدة الكلام ده
يعني انته عمال تقول المصريين .....المصريين.....المصريين
يعني انته امريكاني ولا ايه .مش عارف اقول ايه والله
وانته شايف ان الكلام اللي انته كاتبه ده مفيد
كل الكلام ده عارفينه
بس ايه حكاية المشاكل ديه
انته بتقول ان الشعب المصري اتعود علي المشاكل تمام بس ازاي ميعرفش يعيش من غيرها
يمكن ديه وجهة نظرك
بس محدش عنده وجهة النظر ديه تقريبا إلا انته
يعني مفيش انسان عاقل ميقدرش يعيش إلا بالمشاكل
يمكن انته بتقول وضعك انته لو حدك يمكن انته متقدرش تعيش إلا بالمشاكل
مفيش مشكله.............. بس متقلش كل الشعب المصري ميقدرش يعيش إلا بالمشاكل
انته المفروض بدل متكتب الكلام ده وتعد تسخر من بلدك .مش ظريفه ديه بلدك برده انته مش امريكاني علشان تسخر من مصر انا هقبل الكلام ده من واحد مش هقولك مش مصري هقولك مش عربي
مش تبقي في بلدك وعمال تكلم عليها كده
خلاص مش عجباك اشتغل واتقن عملك
بدل متكتب كلام فاضي

يعني ايه الشعب مش هايعرف يعيش من غير مشاكل وكأن المشاكل دي بتعمل دماغ للبني ادم
طب والنبي خلو البلد مافيهاش مشاكل يا جيل المستقبل ياللي عمال ينقد ويتكلم ويقول ويعيد ياللي دخلين كليات بسم الله ما شاء الله عشان تتمنظرو بيها
وابقو شوفو بقى ساعتها الشعب هايكون مستريح ولا بيدور على المشاكل زي ما بتقولو ولو الشعب مثلا بيحب المشاكل مكانش هايدعى ع الظالم و المفتري بحرارة ساعة الادان

بس خلاص