لماذا فقد المعلم احترامه؟؟



نسمع اباءنا يقولون ان المعلم عندما كان يدخل الفصل

لاتسمع دبة النملة .. وكل الطلاب يقفون له اجلالا وتقديرا
يهابونه ويحترمونه ويقدرونه حق تقديره



أما اليوم فقد انعكست الصورة تماما ..
يخاف المدرس ان يستثير غضب احد طلابه
حتى لا يكون نصيبه منه (علقة ساخنة ) عقابا

على تطاول المعلم على التلميذ...



يشتري المعلم ود الطلاب سعيا وراء استقطاب اكبر
عدد منهم للدروس الخصوصية .. فيتقرب اليهم ويطلب ودهم ورضاهم عنه



هل هذه الصورة الممسوخة للعلاقة بين المعلم وتلميذه جديرة باخراج جيل

ناجح مثقف .. هل يمكن للطالب ان يحقق تقدما وتفوقا مع وجود مثل هذه
العلاقة التي تفتقر الي احترام المعلم والذي يفترض ان يكون مثلا اعلى وقدوة له؟؟



من المذنب في هذا التردي الشديد .؟؟ المدرس المعدم والذي اذا اعتمد على راتبه



لن يجد العيش (الحاف) لاطعام اهل بيته ؟؟



أم هم اولياء الامور الذين شجعوا ابنائهم على التطاول دون ردع أو توجيه ؟؟
أم كل ما سبق ذكره مجتمعا؟؟

إنا لله وإنا إليه راجعون

فقد المعلم هيبته لأسباب كثيرة منها :

1- أن المعلم نفسه قد يكووون جاهل بعلم نفس التربية وجاهل بطرق تدريس مادته علي الوجه الأمثل
وغير قادر علي ابتكار طرق تعينه علي اتمام عمله علي الوجه الأمثل

2- أن فصولنا بها تكدث غريب جدا فيصل عدد تلاميذ الفصل الواحد إلي 70 و 80 تلميذ فهل يعقل ذلك ؟
مما يؤدي إلي عدم القدرة علي السيطرة علي هذا الكم إلا باستخدام الضرب و الضرب ممنوع

3- وأخيرا ومن الآخر المنظومة التعليمية محتاجة تغيير من جذورها


ولن نتقدم ولا شبر واحد من غير تعليم متطور

انا شايفة انه السبب الاهل و المعلم و الدولة كمان ،

يعني زمان كان الاب يقول للمدرس اكسر و انا جبّر ،
فكان الولد محترم مدرسه
لأنه عارف مكانته ،
دلوقتي الاب احيانا بيتعدى على الاستاذ قدام ابنه
سواء بالكلام او بالفعل ،
فطبيعي الابن ما يحترمش المدرس ،

ده شق من المشكلة ،

المعلم بردو مشارك في كدة
لانه احيانا بيتغاضى عن حقه و مكانته
لان فلان / فلانة بتاخد عندو درس
وهو طبعا مش عاوز يخسر طالب او طالبة
عشان كلمة او فعل !!
يعني ده بيشجع الباقي على انهم يتمادوا معاه ،

وده الشق التاني ،

بس اكيد الحكومة ليها دور لانه المدرس ليه بيدي
دروس ؟!
عشان المرتب مش مرتب استاذ تعب 4 سنين
ومربي اجيال بعد كدة ،

يعني خيوط الموضوع متشابكة
ولو عاوزين نرجع احترام المعلم
لازم كل الجهات تتعاون ،
والا الوضع هيبقى على ماهو عليه ،


و طبعا النتائج معروفة ،
هيطلع جيل لا احترام و لا ثقافة ولا لا ،
يعني من الاخر فاشل ،
لان الاخلاق اهم حاجة ،

وتعرفي رغم كلامي لفوق ده كله
والاسباب ال ذكرتها ،

اعتقد ان السبب الرئيسي دلوقتي
انه التعليم اصبح عملية مادية اكتر منها تعليمية
بالتالي مش مشكلة فيه احترام او لاء
المهم ايه الفلوس ال بتيجي من وراه ،

علي فكرة أنا شايف إنه
مفيش تعليم ف مصر

موضوع مهم جدااا
كان فى مدرسة المفروض انى ادخلها مشتركة والحمد لله حولت ورقى اصحابى بيحكوا كتير عن المدرسة دى واللى بيحصل للمدرسين فيها
من كام سنة مدرس الفرنساوى اتقطع من الطلاب ولبسه كان غرقان دم
اما السنة اللى فاتت واحد من دفعتى المدرس بيقوله اتاخرت ليه عن الحصة وعينك ما تشوف الا النور مسك المدرس المدرس ده كبير فى السن يعنى فى سن جده ومسكه ضربه :(:(
وفى مواقف كتير بتحصل على مستوى جميع المدارس

لان الادب والاخلاق انعدمت والسبب ان اهله معرفوش يربوه او العيب فى الطالب اما المدرس ملهوش ذنب
ومن علمنى حرفا صرت له عبدا
انا عمرى فى حياتى معملت لمدرس حاجة ولو فى مشكلة مع مدرس فى حاجة اسمها شكوى مش تاخد حقك بعضلاتك ليه شغل بلطجة

صحيح كنت مرة السبب فى نقل مدرسة من المدرسة بس كانت حضرتها اللى غلطانة مش انا السبب بس اخدت حقى بالقانون والعدل :d

اما بالنسبة لبعض المدرسين اللى بيتقربوا من الطلاب عشان الدروس كل واحد وضميرة

وكمان ده مش ذنب المدرس منهم لله اللى بيغلوا الاسعار

يعنى لو شوفنا اى مشكلة فى البلد دى هتكون وراها الحكومة الفلة بتاعت مصر :bosyht9::bosyht9:

شكرا على الموضوع المهم

قم للمعلم وفه التبجيلا .... كاد المعلم أن يكون رسولا
زمان كان الطالب عندما يرى المعلم في شارع أو حي سكني أو سوق وغيره كان يهرب خوفا من أن يراه معلمة
الآن المعلم عندما يقود سيارته ويرى أحد طلابه في أحد الأماكن السابقة يهرب خوفا من أن يراه الطالب
بالفعل لقد وصل المعلم إلي الحضيض من إهانة لشخصه وإهانة لمهنتة
وهذا كله بسبب تلك القرارات الغبية التي تصدرها وزارة التربية والتعليم ( التقليد الأعمى)
فجأه ظهر النظام بمنع الضرب بحجة أنه يؤثر سلبيا على شخصية الطالب ( لست ضد تلك الحجة ولكن يمنعون الضرب بعد أن اضربت الاجيال السابقة وهم طلاب فلم يتعقدوا أو لم تتأثر شخصياتهم بل منّهم الدكتوروالضابط والمهندس والمعلم ... إذا كانت الحجة خوفا على شخصية الطالب يمنعو الضرب بدون إهانة المعلم أمام الملأ ( نقل تأديبي + مساءلة ) أمور صار يعلم بها ولي أمر الطالب لا والطالب أيضا فلماذا لايفقد المعلم احترامه بعد تلك الإجراءات الغبية
أما الكارثة الكبرى فهي في الجهات المسؤولة عن كل هذا و هو الأنظمة الحاكمة في مجتمعاتنا العربية. و مثال نقيض ذلك ما يحصل في المجتمعات الغربية المتقدمة علمياً، فالدولة هناك مسؤولة عن معاقبة الأهل الذين لا يلتزم أبناءهم بأخلاقهم المدرسية و حتى إذا لم يكن الطالب يحصل على نتائج جيدة فإن الحكومة أو النظام تعاقب أهله و هكذا. أما بالنسبة للمعلم فإن هذه الأنظمة إبتدعت لجان مراقبة وضعت أسس و شروط التدريس و أجبرت الأستاذ على الإلتزام بها و من خلالها بدأت تراقب المعلم في طرق تأدية وظيفته.
و كل هذا هو ما يلزمنا في مجتمعاتنا العربية لنطبقه.

اسفة على الاطالة

معندناش منظومة تعليمية اصلاً علشان ندور على صلاح طرفيها (الطالب والمعلم)

معندناش منظومة تعليمية اصلاً علشان ندور على صلاح طرفيها (الطالب والمعلم)


خير الكلام ما قل ودل

هو ده الكلام الصح :d

فجأه ظهر النظام بمنع الضرب بحجة أنه يؤثر سلبيا على شخصية الطالب ( لست ضد تلك الحجة ولكن يمنعون الضرب بعد أن اضربت الاجيال السابقة وهم طلاب فلم يتعقدوا أو لم تتأثر شخصياتهم بل منّهم الدكتوروالضابط والمهندس والمعلم ...
لست اتفق كلية في تلك الجملة
فهؤلاء الغير متعقدين من الظباط والدكاترة والمعلمين ولدوا كارهين للمنظومة التعليمية
وعلمو ابنائهم ذلك واعطوهم دعمهم ضد المدرسين بكل الوسائل الغير طيبة

فعلاً كان في مدرسين بيفترو زمان
ولو كان هدوء الطالب في الفصل مع المدرسي
فإنه كان لخوفه منه وليس احتراماً له !
البعض طبعاً وليس الكل

- أن المعلم نفسه قد يكووون جاهل بعلم نفس التربية وجاهل بطرق تدريس مادته علي الوجه الأمثل
وغير قادر علي ابتكار طرق تعينه علي اتمام عمله علي الوجه الأمثل

عندك حق طبعا فى الكلام ده
حاليا هو المعلم تجده وهو قدوة التعليم والبحث والثقافة يقتصر على تلقين الدروس طول العام بل طول حياته التدريسية بنفس الاسلوب ونفس الكلام ونص لا يغير منه شئ ولم يحاول يبحث او يغير من خطته او لم يبدل منهجه فى التدريس فهذا المعلم هل هو معلم؟؟
زمان كانت الطلبة عندما تتنافش مع المدرسين تجد فيهم معلومات
جديدة ومثيرة تجعلهم لا يشعرون بالوقت او الملل
فأين ذلك الآن؟؟؟؟؟؟؟؟؟؟؟؟؟

لدي اكثر من سبب اذكر منها :
1- قد يكون ضعف في شخصية المدرس نفسه .
2- قد يكون سوء ادب من بعض الطلاب ثم يقتدي بهم البعض الآخر .
3- إدارة المدرسة التي لا تتخذ اجراء رادع مع من يثير الشغب في الفصل .
4- ولي الأمر الذي اصبح يخاف على ابنه اكثر من اللازم .. زمان كان ولي الأمر يخوف ابنه بالمدرس لو معملتش كذا هقول لمدرسك وكان يقول للمدرس اكسر وانا اجبس على سبيل حرية تصرف المدرس مع الإبن واليوم نجد لو ضرب الابن قد يذهب الأب لعمل بلاغ في قسم الشرطة ..!!!!!!
5- سهولة الامتحانات والتسيب في وضع اعمال السنة التي توضع بشكل روتيني .
6- مطالبة الإدارات التعليمية المدارس برفع نسبة المدارس حتى ولو لم يصح ذلك .. يبقى الطالب راسب وانجحه بايدي .... !!!!!
7- اتجاه المدرس للدروس الخصوصية لرفع مستوى معيشته مما ادى هؤلاء الطلاب للهزار والمزاح مع المدرس وعلى الملأ .. ماهو بيدفع قد كدة ميهزرش ليه ؟؟؟!!!
8- الطالب بيتخرج من المدرسة للشارع فليه هيذاكر وليه يحترم المدرسين فالعملية محصلة بعضها اللي بيتعلم زي اللي متعلمش ... !!!!!!!
اكتفي بهذا القدر يا حضرات ... شكرا لكم ..

الموضوع كبير اوي اوي . المشكلة لها أبعاد أساسية ليس من ضمنها الطالب , فهو ليس طرفاً أساسياً في هذه المشكلة . الأطراف الأساسية هي :- المدرس - الوزارة - ولي الأمر
المدرس أصبح جامعاً للمال بأي طريقة حتي ولو كان ذلك علي حساب كرامته !! إذا تخطي الطالب حدوده مع المدرس , تجد الأخير يتظاهر بأن الأمر عادي أو انه مش واخد باله أو مش سامع !! المدرس لا يضع لنفسه شخصية قوية تجعل الطالب يحسب له حساب , وعلي فكرة لما الطالب يخاف من المدرس أحسن من استهانته منه !! المدرس بطل يشرح في الفصل بحجة ان الطلاب بياخدوا دروس خصوصية ومش عايزين يسمعوه , وطبعاً دا في مصلحة المدرس عشان يبقي عنده طاقة للشرح في الدروس الخصوصية !! المدرس حتي في الدروس الخصوصية ليست لديه أية وسيلة لعقاب الطالب , والعقاب شيء مهم وضروري في العملية التعليمية , مش شرط ان العقاب يكون ضرب فقط , لكن لابد من العقاب , كما يوجد ثواب !! المدرس فس الدروس الخصوصية بطل يشرح باستفاضة بحجة ان الطلاب بقت تاخد درسين وتلاتة في نفس المادة " والله بيحصل في مدينتي " !!! المدرس في الدروس الخصوصية مش فارقة معاه ان الطالب يغيب حصة واتنين وتلاتة في الشهر , المهم ان الفلوس تدفع كاملة , وهذا يجعل الطالب ينظر له نظرة ...... !! عدد الطلبة في الدروس الخصوصية تعدي عددهم في الفصل , يبقي ازاي ده درس؟!!!! والطالب يفهم ازاي؟!!!! المدرس هو السبب الرئيسي الأول في فقده لإحترام الطلاب وأولياء الأمور له .
الوزارة هي العامل الثاني حيث أنها منعت كل وسائل العقاب , بل تجد معظم مديري المدارس بيأمروا المدرسين باسترضاء الطلاب وعدم التسبب بمشاكل معهم عشان ادارة المدرسة مش ناقصة وجع دماغ !! الوزارة بتحقق في شكاوي الطلاب , بينما لا تلقي شكاوي المدرسين أي اهتمام !!! الوزارة كل همها في الناحية التعليمية مجرد شكليات فارغة ليست في صلب التعليم مثل دفتر التحضير للمدرس اللي لو نسي يحط التاريخ عليه يتحول إلي التحقيق !! ممنوع دخول المدرس الفصل ومعاه عصا حتي لو كان بغرض الاشارة بها أو بغرض الترهيب !! لو تقدم ولي أمر بشكوي إلي ادارة المدرسة بشأن مدرس , فإن ادارة المدرسة تاخذ صف الطالب !! لا يوجد فصل للطالب في مرحلة التعليم الأساسي , يعني لحد ثالثة اعدادي !! الموجهين بيرحوا المدرسة يشربوا الشاي أو الساقع وساعات بيفطروا هناك ويمكن الموجه يدخل فصل أو اتنين لمدة 10 دقايق ويخرج يكتب في المدرس قصيدة شعر !!
أولياء الأمور وما أدراك ما أولياء الأمور , شيء مستفز , حاجة تجنن. كان زمان الأب يرقع ابنه أو بنته العلقة المتينة
وبعدها تلاقي الولد أو البنت اتعدل وانتبه لدراسته , ويا ويل الطالب لو المدرس قاله حشتكي لأبوك , ياااااه الطالب يوطي علي ايد المدرس يبوسها عشان ما يقولش لأبوه , أما الأن تلاقي الطالب هو اللي بيهدد المدرس بأبوه !!!!!!
وطبعاً ما فيش عقاب في البيت لا ضرب ولا غيره , يبقي ازاي المدرس يضرب أو يهزأ ابني أو بنتي !! هو فاكر نفسه مين يعني!!! دا انا اوديه في ستين داهية !! انا حربيه واعرفه قيمته كويس !!!! كل ده حتي من غير ما يكلف نفسه ويعرف ايه السبب !! اللي يهمه ان محدش يقرب لعياله !!!
معلش اني طولت عليكم , بس اعمل ايه , والله انا اختصرت واختصرت اوي , لأن هذا الأمر شرحه يطول ويطول !!

جزاكى الله خيرا على الموضوع الاكثر من رائع

ومن اسباب عدم احترام الطالب للمدرس

المدرس نفسه هو اللى بيقلل من قيمته

لازم يعرف الطلبه اهميه الماده اللى هيدرسها ويحببهم فيها علشان الطلبه تقدر تحب الماده وبالتالى هتحترم المدرس

لان من اهم الاسباب فى كره الطلبه للمدرسين تعقيدهم فى الماده الدراسيه

وكمان فى ناس بتدخل الكليه وهما مش مؤهلين انهم يكونو مدرسين يعنى بالنسبه ليا ماقدرش اكون مدرسه ثانوى او اعدادى لطلبه اليومين دول هههه دا انا اخرى مدرسه حضانه فادعولنا بقا لان مهنه التعليم مهنه عظيمه لليقدر قيمتها

ليه المعلم عندنا فى مدرستنا لما يكون عايزنا نحترمه بيكون ولمل عايزنا نضحك يكون يعنى عيب معلم واحنا مدرستنغا بتاخد جوايز كتير لتقدمها المستمر وهى اسمها الزعفران الثانويه المشتركه تابعه لادارة الحامول بكف الشيخ

على فكرة .. رد الموضوع ده موجود فى المدارس .. ان كنت من حضانة نهاية اعدادى فى خاصة قمة الاحترام و التربية و تحس ان المستر اخوك الكبير .. و كل حاجة .. دخلت مدرسة حكومة .. قمة الاهانة و قمة لذل (( على الرغم ان ده اختيارى انى اخش حكومى ))

تخيل لما المدرس ماسك سيجارة قدامك .. و بيشتمك بالاهل .. دانا فى المدرسة القديمة المستر اللى كان يقولى يا حمار او لزميل ليا كنا بنشتكيه ده لا بيشتم بالاب و الام طبيعى جداً انى عندى كرامة و ارد عليه .. و بنفس الشتيمة و لو تمادى اتمادى انا كمان .. مش عضلات .. بس هو يحترم نفسه عشان انا احترمه .. يبقى ليه الذنب على الطالب .!!!

حاجة كمان ... ان الدروس بتخلى قيمة المدرس قليلة جداً .. انا بشوف طلاب بيكلمو المدرسين بتوعهم بالاسم مش ي مستر و يقوله ياعم و كلام من ده .. يبقى انت اللى بتخلى نفسك ي مدرس فى الوضع ده ..

هى فعلا مشكلة وفى مدرسين كتير بتضرب


بس فى مدريسين اكيد لهم احترامهم اكترهم الى بيضربوا الطلاب ضرب ولا فى الاحلام

انا شايفة انه السبب الاهل و المعلم و الدولة كمان ،


يعني زمان كان الاب يقول للمدرس اكسر و انا جبّر ،
فكان الولد محترم مدرسه
لأنه عارف مكانته ،
دلوقتي الاب احيانا بيتعدى على الاستاذ قدام ابنه
سواء بالكلام او بالفعل ،
فطبيعي الابن ما يحترمش المدرس ،

ده شق من المشكلة ،

المعلم بردو مشارك في كدة
لانه احيانا بيتغاضى عن حقه و مكانته
لان فلان / فلانة بتاخد عندو درس
وهو طبعا مش عاوز يخسر طالب او طالبة
عشان كلمة او فعل !!
يعني ده بيشجع الباقي على انهم يتمادوا معاه ،

وده الشق التاني ،

بس اكيد الحكومة ليها دور لانه المدرس ليه بيدي
دروس ؟!
عشان المرتب مش مرتب استاذ تعب 4 سنين
ومربي اجيال بعد كدة ،

يعني خيوط الموضوع متشابكة
ولو عاوزين نرجع احترام المعلم
لازم كل الجهات تتعاون ،
والا الوضع هيبقى على ماهو عليه ،


و طبعا النتائج معروفة ،
هيطلع جيل لا احترام و لا ثقافة ولا لا ،
يعني من الاخر فاشل ،
لان الاخلاق اهم حاجة ،

وتعرفي رغم كلامي لفوق ده كله
والاسباب ال ذكرتها ،

اعتقد ان السبب الرئيسي دلوقتي
انه التعليم اصبح عملية مادية اكتر منها تعليمية
بالتالي مش مشكلة فيه احترام او لاء

المهم ايه الفلوس ال بتيجي من وراه ،

انا اؤيد الرد الجميل ده
و تقبل مروري السريع

صصصصصصصصصصصصصصصصصصححححححححححح

أنا من وجهة نظرى اعطاء سلطة اكبر للطالب عن المدرس
فمثلا الطالب ممكن يتطاول على مدرسه ولو حاول المدرس انه يرد تبدأ الشكوى للوزارة
والدلع الزايد من أولياء الامور أفسد الطلبة
تخيلوا ولى أمر يقول لابنه اعمل اللى انته عايزه محدش يقدر يكلمك دا أنا أقفلهم المدرسة
بالطبع الطالب هيشوف ان سلطة والده أكبر شخصيا من سلطة مدير المدرسة وهيبدأيتعامل على هذا الاساس
مع خالص شكرى وتقديرى واحترامى لكل مدرسينى
ولكل طالب ما زال يحترم ويقدر مدرسينه